1兄弟ah，我hō͘ lín知我前所傳hō͘ lín ê福音，lín所承受，所óa靠來khiā在ê；Hiaⁿ-tī ah, góa hō͘ lín chai góa chêng só͘ thoân hō͘ lín ê hok-im, lín só͘ sêng-siū, só͘ óa-khò lâi khiā-chāi ê;

2lín若執守我所傳hō͘ lín福音ê道理，也m̄是空空信，就tùi chit-ê得救。lín nā chip-siú góa só͘ thoân hō͘ lín hok-im ê tō-lí, iā m̄ sī khang-khang sìn, chiū tùi chit-ê tit kiù.

3因為我所受來傳hō͘ lín ê，第一就是基督為tio̍h咱ê罪死，照聖經所記載；In-ūi góa só͘ siū lâi thoân hō͘ lín ê, tē it chiū-sī Ki-tok ūi-tio̍h lán ê chōe sí, chiàu sèng-keng só͘ kì-chài;

4koh有埋葬；第三日koh活，也照聖經所記載；koh ū bâi-chòng; tē saⁿ ji̍t koh-oa̍h, iā chiàu sèng-keng só͘ kì-chài;

5有出現hō͘磯法看見；koh出現hō͘十二個使徒看見；ū chhut-hiān hō͘ Ki-hoat khòaⁿ-kìⁿ; koh chhut-hiān hō͘ cha̍p-jī ê sù-tô͘ khòaⁿ-kìⁿ;

6koh一pái出現hō͘五百gōa ê兄弟同時看見，其中大半iáu tī-teh，但是有ê已經睏去。koh chi̍t pái chhut-hiān hō͘ gō͘-pah gōa ê hiaⁿ-tī tâng sî khòaⁿ-kìⁿ, kî-tiong tōa pòaⁿ iáu tī-teh, nā-sī ū-ê í-keng khùn-khì.

7Koh一pái出現hō͘雅各看見；又koh一pái出現hō͘ lóng總ê使徒看見；Koh chi̍t pái chhut-hiān hō͘ Ngá-kok khòaⁿ-kìⁿ; iū-koh chi̍t pái chhut-hiān hō͘ lóng-chóng ê sù-tô͘ khòaⁿ-kìⁿ;

8siōng路尾也出現hō͘我看見，我是親像未夠月來生ê。siōng lō͘-bé iā chhut-hiān hō͘ góa khòaⁿ-kìⁿ, góa sī chhin-chhiūⁿ bē kàu ge̍h lâi siⁿ ê.

9因為我是使徒ê至微細ê，bōe堪得稱做使徒，因為我bat khún-tio̍k上帝ê教會。In-ūi góa sī sù-tô͘ ê chì-bî-sòe ê, bōe kham-tit chheng chòe sù-tô͘, in-ūi góa bat khún-tio̍k Siōng-tè ê kàu-hōe.

10總是我taⁿ成做chit等號ê人，是tùi上帝ê恩chiah有；koh伊所賞賜我ê恩m̄是空空；但是我比in眾人khah tio̍h磨；其實m̄是我，是上帝ê恩kap我tī-teh ê。Chóng-sī góa taⁿ chiâⁿ chòe chit téng-hō ê lâng, sī tùi Siōng-tè ê un chiah ū; koh I só͘ siúⁿ-sù góa ê un m̄ sī khang-khang; nā-sī góa pí in chèng lâng khah tio̍h-bôa; kî-si̍t m̄ sī góa, sī Siōng-tè ê un kap góa tī-teh ê.

11Án-ni不論是我á是in，阮mī án-ni傳，lín mī án-ni信。Án-ni put-lūn sī góa á-sī in, goán mī án-ni thoân, lín mī án-ni sìn.

12Taⁿ若傳基督tùi死人中koh活，怎樣lín中間有人講死人無koh活ah？Taⁿ nā thoân Ki-tok tùi sí-lâng tiong koh-oa̍h, cháiⁿ-iūⁿ lín tiong-kan ū lâng kóng sí-lâng bô koh-oa̍h ah?

13死人若無koh活，就基督未bat koh活；Sí-lâng nā bô koh-oa̍h, chiū Ki-tok bē bat koh-oa̍h;

14基督若未bat koh活，就阮所傳ê是空空，lín ê信也是空空。Ki-tok nā bē bat koh-oa̍h, chiū goán só͘ thoân ê sī khang-khang, lín ê sìn iā sī khang-khang.

15死人若無koh活，就上帝未bat hō͘基督koh活；m̄-kú阮干證伊bat hō͘伊koh活，就顯明阮是做上帝白賊ê干證。Sí-lâng nā bô koh-oa̍h, chiū Siōng-tè bē bat hō͘ Ki-tok koh-oa̍h; m̄ kú goán kan-chèng I bat hō͘ I koh-oa̍h, chiū hián-bêng goán sī chòe Siōng-tè pe̍h-chha̍t ê kan-chèng.

16因為死人若無koh活，就基督未bat koh活。In-ūi sí-lâng nā bô koh-oa̍h, chiū Ki-tok bē bat koh-oa̍h.

17基督若未bat koh活，就lín ê信無chhái-kang，lín iáu-kú tī lín ê罪中。Ki-tok nā bē bat koh-oa̍h, chiū lín ê sìn bô chhái-kang, lín iáu-kú tī lín ê chōe tiong.

18就hiah-ê tiàm-tī基督已經睏ê，也是沉淪。Chiū hiah ê tiàm-tī Ki-tok í-keng khùn ê, iā sī tîm-lûn.

19咱若kan-ta在生有ǹg望tī基督，就tī眾人中咱是第一可憐ê。Lán nā kan-ta chāi-siⁿ ū ǹg-bāng tī Ki-tok, chiū tī chèng lâng tiong lán sī tē it khó-lîn ê.

20總是taⁿ基督已經tùi死人中koh活，做chiah-ê teh睏ê頭一個koh活ê。Chóng-sī taⁿ Ki-tok í-keng tùi sí-lâng tiong koh-oa̍h, chòe chiah ê teh khùn ê thâu chi̍t ê koh-oa̍h ê.

21因為既然tùi一人chiah有死，也tùi一人chiah有死人ê koh活。In-ūi kì-jiân tùi chi̍t lâng chiah ū sí, iā tùi chi̍t lâng chiah ū sí-lâng ê koh-oa̍h.

22因為親像tī亞當眾人lóng死，也親像án-ni tī基督眾人beh得tio̍h koh活。In-ūi chhin-chhiūⁿ tī A-tong chèng lâng lóng sí, iā chhin-chhiūⁿ án-ni tī Ki-tok chèng lâng beh tit-tio̍h koh-oa̍h.

23但是ta̍k-ê照伊ê次序；頭一個是基督，第二是hiah-ê屬基督ê，tī伊臨到ê時。Nā-sī ta̍k ê chiàu i ê chhù-sū; thâu chi̍t ê sī Ki-tok, tē jī sī hiah ê sio̍k Ki-tok ê, tī I lîm-kàu ê sî.

24然後末期到，就是伊已經廢無lóng總ê政治，lóng總ê權柄kap才能，將國交hō͘父上帝ê時；Jiân-āu boa̍t-kî kàu, chiū-sī I í-keng hòe-bô lóng-chóng ê chèng-tī, lóng-chóng ê koân-pèng kap châi-lêng, chiong kok kau hō͘ Pē Siōng-tè ê sî;

25因為伊的確做王，到hē lóng總ê對敵tī伊ê腳下。in-ūi I tek-khak chòe ông, kàu hē lóng-chóng ê tùi-te̍k tī I ê kha-ē.

26第一路尾受廢無ê對敵，就是死。Tē it lō͘-bé siū hòe-bô ê tùi-te̍k, chiū-sī Sí.

27因為有講，伊hō͘萬項有降服tī伊ê腳下。已經講，萬項有降服伊，就hit-ê hō͘萬項有降服伊ê，無在內，是明。In-ūi ū kóng, I hō͘ bān-hāng-ū hâng-ho̍k tī I ê kha-ē. Í-keng kóng, Bān-hāng-ū hâng-ho̍k I, chiū hit ê hō͘ bān-hāng-ū hâng-ho̍k I ê, bô chāi-lāi, sī bêng.

28萬項有已經降服伊，就Kiáⁿ也beh家己降服tī hō͘萬項有降服伊ê，hō͘上帝tī萬有中做萬有ê。Bān-hāng-ū í-keng hâng-ho̍k I, chiū Kiáⁿ iā beh ka-kī hâng-ho̍k tī hō͘ bān-hāng-ū hâng-ho̍k I ê, hō͘ Siōng-tè tī bān-ū tiong chòe bān-ū ê.

29若m̄是án-ni，就為tio̍h死人受洗禮ê，beh啥事？死人若一概無koh活，為tio̍h in受洗禮甚麼緣故？Nā m̄ sī án-ni, chiū ūi-tio̍h sí-lâng siū sóe-lé ê, beh siáⁿ-sū? Sí-lâng nā it-khài bô koh-oa̍h, ūi-tio̍h in siū sóe-lé sím-mi̍h iân-kò͘?

30Koh阮啥事時時冒險ah？Koh goán siáⁿ-sū sî-sî mō͘-hiám ah?

31兄弟ah，我tī咱ê主基督耶穌為tio̍h lín所有ê誇口，我kí伊來chiù-chōa，我日日phe死。Hiaⁿ-tī ah, góa tī lán ê Chú Ki-tok Iâ-so͘ ūi-tio̍h lín só͘ ū ê khoa-kháu, góa kí i lâi chiù-chōa, góa ji̍t-ji̍t phe-sí.

32我若照人ê款，tī以弗所kap野獸相phah，我有甚麼利益？死人若無koh活，咱就做咱lim，做咱食，因為明á日beh死lah。Góa nā chiàu lâng ê khoán, tī Í-hut-só͘ kap iá-siù saⁿ-phah, góa ū sím-mi̍h lī-ek? Sí-lâng nā bô koh-oa̍h, lán chiū chòe lán lim, chòe lán chia̍h, in-ūi bîn-á-ji̍t beh sí lah.

33莫得受迷惑；lām-sám交陪是敗壞好德行。Bo̍h-tit siū bê-he̍k; Lām-sám kau-pôe sī pāi-hoāi hó tek-hēng.

34Tio̍h醒悟來照義，莫得犯罪；因為有人m̄-bat上帝。我講án-ni，是beh hō͘ lín見笑。Tio̍h chhíⁿ-gō͘ lâi chiàu gī, bo̍h-tit hoān chōe; in-ūi ū lâng m̄ bat Siōng-tè. Góa kóng án-ni, sī beh hō͘ lín kiàn-siàu.

35有人beh講，死人怎樣koh活？用甚麼號ê身體來ah？Ū lâng beh kóng, Sí-lâng cháiⁿ-iūⁿ koh-oa̍h? Ēng sím-mi̍h hō ê sin-thé lâi ah?

36戇人ah，你所掖ê，無事先死，就bōe活。Gōng lâng ah, lí só͘ iā ê, bô tāi-seng sí, chiū bōe oa̍h.

37Koh你所掖ê m̄是hit-ê將來ê形體，或是麥，或是別樣ê五穀，不過是一粒子nā-tiāⁿ。Koh lí só͘ iā ê m̄ sī hit ê chiong-lâi ê hêng-thé, he̍k-sī be̍h, he̍k-sī pa̍t iūⁿ ê ngó͘-kok, put-kò sī chi̍t lia̍p chí nā-tiāⁿ.

38但是上帝照伊所定tio̍h ê，用形體hō͘伊；tī ta̍k號種子有伊家己ê形體。Nā-sī Siōng-tè chiàu I só͘ tiāⁿ-tio̍h ê, ēng hêng-thé hō͘ i; tī ta̍k hō chéng-chí ū i ka-kī ê hêng-thé.

39見若肉體m̄是同一樣ê肉體；人ê一款，獸ê一款，鳥ê一款，魚ê一款。Kìⁿ-nā jio̍k-thé m̄ sī tâng chi̍t iūⁿ ê jio̍k-thé; lâng-ê chi̍t khoán, siù-ê chi̍t khoán, chiáu-ê chi̍t khoán, hî-ê chi̍t khoán.

40有天裡ê形體，也有地裡ê形體；總是tī天裡ê ê榮光各樣tī地裡ê ê榮光。Ū thiⁿ-ni̍h ê hêng-thé, iā ū tōe-ni̍h ê hêng-thé; chóng-sī tī thiⁿ-ni̍h ê ê êng-kng koh-iūⁿ tī tōe-ni̍h ê ê êng-kng.

41日ê榮光是一款，月ê榮光koh一款，chiah-ê星ê榮光又koh一款；因為chit粒星kap hit粒星，榮光無相同。Ji̍t ê êng-kng sī chi̍t khoán, ge̍h ê êng-kng koh chi̍t khoán, chiah ê chhiⁿ ê êng-kng iū-koh chi̍t khoán; in-ūi chit lia̍p chhiⁿ kap hit lia̍p chhiⁿ, êng-kng bô saⁿ-tâng.

42死人koh活也是án-ni。所掖ê是會朽爛，koh活ê是bōe朽爛；Sí-lâng koh-oa̍h iā sī án-ni. Só͘ iā ê sī ōe hiú-nōa, koh-oa̍h ê sī bōe hiú-nōa;

43所掖ê是凌辱，koh活ê是榮光；所掖ê是軟chiáⁿ，koh活ê是勇健；só͘ iā ê sī lêng-jio̍k, koh-oa̍h ê sī êng-kng; só͘ iā ê sī nńg-chiáⁿ, koh-oa̍h ê sī ióng-kiāⁿ;

44所掖ê是血氣ê形體，koh活ê是神靈ê形體；若有血氣ê形體，也有神靈ê形體。só͘ iā ê sī hiat-khì ê hêng-thé, koh-oa̍h ê sī sîn-lêng ê hêng-thé; nā ū hiat-khì ê hêng-thé, iā ū sîn-lêng ê hêng-thé.

45所記載也是án-ni講，頭一個人，亞當，成做有血氣ê活人。Só͘ kì-chài iā sī án-ni kóng, Thâu chi̍t ê lâng, A-tong, chiâⁿ-chòe ū hiat-khì ê oa̍h lâng.

46路尾ê亞當成做賞賜活ê神。總是神ê m̄是事先，是血氣ê事先；神ê tè後。Lō͘-bé ê A-tong chiâⁿ-chòe siúⁿ-sù oa̍h ê sîn. Chóng-sī sîn ê m̄ sī tāi-seng, sī hiat-khì ê tāi-seng; sîn ê tè-āu.

47頭一個人出tī地裡，屬tī土ê類；第二ê人出tī天裡。Thâu chi̍t ê lâng chhut tī tōe-ni̍h, sio̍k tī thô͘ ê lūi; tē jī ê lâng chhut tī thiⁿ-ni̍h.

48Hit-ê屬tī土類ê是怎樣，見若屬tī土類ê也是án-ni；也hit-ê屬tī天裡ê是怎樣，見若屬tī天裡ê也是án-ni。Hit ê sio̍k tī thô͘-lūi ê sī cháiⁿ-iūⁿ, kìⁿ-nā sio̍k tī thô͘-lūi ê iā sī án-ni; iā hit ê sio̍k tī thiⁿ-ni̍h ê sī cháiⁿ-iūⁿ, kìⁿ-nā sio̍k tī thiⁿ-ni̍h ê iā sī án-ni.

49咱既然穿屬tī土ê ê形狀，也beh穿屬tī天ê ê形狀。Lán kì-jiân chhēng sio̍k tī thô͘ ê ê hêng-chōng, iā beh chhēng sio̍k tī thiⁿ ê ê hêng-chōng.

50兄弟ah，我講血氣ê肉體bōe會承接上帝ê國，會朽爛ê bōe會承接bōe朽爛ê。Hiaⁿ-tī ah, góa kóng hiat-khì ê jio̍k-thé bōe-ōe sêng-chiap Siōng-tè ê kok, ōe hiú-nōa ê bōe-ōe sêng-chiap bōe hiú-nōa ê.

51Taⁿ我用奧妙kā lín講；咱無beh lóng睏，是beh lóng變化，Taⁿ góa ēng ò-biāu kā lín kóng; lán bô beh lóng khùn, sī beh lóng piàn-hòa,

52一時á久，目一nih，末期哨角tân ê時；因為哨角beh tân，死人就beh koh活，變做bōe朽爛ê，咱也beh變化。chi̍t sî-á kú, ba̍k chi̍t nih, boa̍t-kî sàu-kak tân ê sî; in-ūi sàu-kak beh tân, sí-lâng chiū beh koh-oa̍h, piàn-chòe bōe hiú-nōa ê, lán iā beh piàn-hòa.

53因為chit-ê會朽爛ê的確tio̍h變做bōe朽爛，chit-ê會死ê變做bōe死。In-ūi chit ê ōe hiú-nōa ê tek khak tio̍h piàn-chòe bōe hiú-nōa, chit ê ōe sí ê piàn-chòe bōe sí.

54但是chit-ê會朽爛ê已經變做bōe朽爛，也chit-ê會死ê已經變做bōe死，就所記載講，有廢無死來khah贏伊，chit-ê話hit時beh應驗。Nā-sī chit ê ōe hiú-nōa ê í-keng piàn-chòe bōe hiú-nōa, iā chit ê ōe sí ê í-keng piàn-chòe bōe sí, chiū só͘ kì-chài kóng, Ū hòe-bô sí lâi khah-iâⁿ i, chit ê ōe hit sî beh èng-giām.

55死ah，你ê khah贏tī tá-lo̍h？死ah，你ê厲害tī tá-lo̍h？Sí ah, lí ê khah-iâⁿ tī tá-lo̍h? Sí ah, lí ê lī-hāi tī tá-lo̍h?

56死ê厲害就是罪，罪ê權勢是律法。Sí ê lī-hāi chiū-sī chōe, chōe ê koân-sè sī lu̍t-hoat.

57總是感謝上帝，伊hō͘咱對咱ê主耶穌基督得tio̍h khah贏。Chóng-sī kám-siā Siōng-tè, I hō͘ lán tùi lán ê Chú Iâ-so͘ Ki-tok tit-tio̍h khah-iâⁿ.

58所以，我所疼ê兄弟ah，lín tio̍h堅固，無搖choah，常常盡力tī主ê工；因為知lín tio̍h磨tī主ê m̄是空空。Só͘-í, góa só͘ thiàⁿ ê hiaⁿ-tī ah, lín tio̍h kian-kò͘, bô iô-choah, siông-siông chīn-la̍t tī Chú ê kang; in-ūi chai lín tio̍h-bôa tī Chú ê m̄ sī khang-khang.

1論到tôe銀幫贊聖徒ê事，照我所bat吩咐加拉太chiah-ê教會ê，lín也tio̍h án-ni行。Lūn-kàu tôe gûn pang-chān sèng-tô͘ ê sū, chiàu góa só͘ bat hoan-hù Ka-lia̍p-thài chiah ê kàu-hōe ê, lín iā tio̍h án-ni kiâⁿ.

2每七日ê頭一日，lín ta̍k人照所得ê利，家己積下teh，免得我來ê時chiah捐tôe。Múi chhit-ji̍t ê thâu chi̍t ji̍t, lín ta̍k lâng chiàu só͘ tek ê lī, ka-kī chek-hē teh, bián-tit góa lâi ê sî chiah koan-tôe.

3我若到，看lín用phoe舉薦甚麼人，我beh差in帶lín所送ê銀到耶路撒冷。Góa nā kàu, khòaⁿ lín ēng phoe kú-chiàn sím-mi̍h lâng, góa beh chhe in tòa lín só͘ sàng ê gûn kàu Iâ-lō͘-sat-léng.

4若應該tio̍h我去，in也thang kap我去。Nā eng-kai tio̍h góa khì, in iā thang kap góa khì.

5我經過馬其頓了後，就beh到lín hia。Góa keng-kè Má-kî-tùn liáu-āu, chiū beh kàu lín hia.

6因為我tùi馬其頓經過；kiám-chhái beh kap lín且tòa，過冬天，也敢hō͘ lín送我tī所beh去ê。In-ūi góa tùi Má-kî-tùn keng-kè; kiám-chhái beh kap lín chhiáⁿ tòa, kè tang-thiⁿ iā káⁿ, hō͘ lín sàng góa tī só͘ beh khì ê.

7是我m̄ ài chit-tia̍p tī路裡見tio̍h lín；因為主若准，我ǹg望kap lín tòa-teh khah久。Sī góa m̄ ài chit tia̍p tī lō͘-ni̍h kìⁿ-tio̍h lín; in-ūi Chú nā chún, góa ǹg-bāng kap lín tòa-teh khah kú.

8總是我iáu beh tòa tī以弗所，到五旬節。Chóng-sī góa iáu beh tòa tī Í-hut-só͘, kàu gō͘-sûn-choeh.

9因為主有kā我開一個闊大koh有功效ê門；但是對敵也chōe。In-ūi Chú ū kā góa khui chi̍t ê khoah-tōa koh ū kong-hāu ê mn̂g; nā-sī tùi-te̍k iā chōe.

10提摩太若到，lín tio̍h留心hō͘伊tī lín中間無驚惶；因為伊tio̍h磨tī主ê工，親像我一樣。Thê-mô͘-thài nā kàu, lín tio̍h liû-sim hō͘ i tī lín tiong-kan bô kiaⁿ-hiâⁿ; in-ūi i tio̍h-bôa tī Chú ê kang, chhin-chhiūⁿ góa chi̍t iūⁿ.

11所以m̄-thang有人看輕伊；tio̍h送伊安然起身就近我，因為我teh thèng候伊kap chiah-ê兄弟來。Só͘-í m̄ thang ū lâng khòaⁿ-khin i; tio̍h sàng i an-jiân khí-sin chiū-kūn góa, in-ūi góa teh thèng-hāu i kap chiah ê hiaⁿ-tī lâi.

12論到兄弟亞波羅，我再三勸伊kap chiah-ê兄弟就近lín。總是伊現今lóng無意思beh去；若有機會，伊就beh去。Lūn-kàu hiaⁿ-tī A-pho-lô, góa chài-saⁿ khǹg i kap chiah ê hiaⁿ-tī chiū-kūn lín. Chóng-sī i hiān-kim lóng bô ì-sù beh khì; nā ū ki-hōe, i chiū beh khì.

13Lín tio̍h警醒，khiā在tì信，做大丈夫，做勇健。Lín tio̍h kéng-séng, khiā-chāi tì sìn, chòe tāi tiōng-hu, chòe ióng-kiāⁿ.

14Lín凡事tio̍h tī仁愛來行。Lín hoān sū tio̍h tī jîn-ài lâi kiâⁿ.

15兄弟ah，lín知Sū-thê-hoán-à ê家，是A-kai-a頭水ê果子，in掠服事聖徒做家己ê職份，Hiaⁿ-tī ah, lín chai Sū-thê-hoán-à ê ke, sī A-kai-a thâu-chúi ê ké-chí, in lia̍h ho̍k-sāi sèng-tô͘ chòe ka-kī ê chit-hūn,

16我勸lín降服chit等號ê人，以及見若同做工來tio̍h磨ê。góa khǹg lín hâng-ho̍k chit-téng-hō ê lâng, í-ki̍p kìⁿ-nā tâng chòe kang lâi tio̍h-bôa ê.

17我歡喜Sū-thê-hoán-à、Hok-tô͘-lah、A-kai-kó͘來，因為in補lín ê無夠。Góa hoaⁿ-hí Sū-thê-hoán-à, Hok-tô͘-lah, A-kai-kó͘ lâi, in-ūi in pó͘ lín ê bô kàu.

18是in有安慰我kap lín ê心神。親像chit號ê人，lín tio̍h知thang敬重伊。Sī in ū an-ùi góa kap lín ê sim-sîn. Chhin-chhiūⁿ chit hō ê lâng, lín tio̍h chai thang kèng-tiōng i.

19亞西亞chiah-ê教會請安lín。亞居拉、百基拉kap聚集tī in厝內ê教會，tiàm-tī主切切請安lín。A-se-a chiah ê kàu-hōe chhéng-an lín. A-ku-lah, Pek-ki-lah kap chū-chi̍p tī in chhù-lāi ê kàu-hōe, tiàm-tī Chú chhiat-chhiat chhéng-an lín.

20眾兄弟請安lín。Lín tio̍h用聖ê相chim來相請安。Chèng hiaⁿ-tī chhéng-an lín. Lín tio̍h ēng sèng ê saⁿ-chim lâi saⁿ chhéng-an.

21我保羅親筆請安lín。Góa Pó-lô chhin-pit chhéng-an lín.

22若有無疼主ê人，伊tio̍h受咒詛。咱ê主來ah。Nā ū bô thiàⁿ Chú ê lâng, i tio̍h siū chiù-chó͘. Lán ê Chú lâi ah.

23願主耶穌基督ê恩kap lín tī-teh。Goān Chú Iâ-so͘ Ki-tok ê un kap lín tī-teh.

24我ê疼tī基督耶穌kap lín眾人tī-teh。À-bēng。Góa ê thiàⁿ tī Ki-tok Iâ-so͘ kap lín chèng lâng tī-teh. À-bēng.

1Tùi上帝ê旨意做基督耶穌ê使徒保羅，kap兄弟提摩太，phoe寄hō͘上帝ê教會tī哥林多ê，以及遍A-kai-a lóng總ê聖徒；Tùi Siōng-tè ê chí-ì chòe Ki-tok Iâ-so͘ ê sù-tô͘ Pó-lô, kap hiaⁿ-tī Thê-mô͘-thài, phoe kià hō͘ Siōng-tè ê kàu-hōe tī Ko-lîm-to ê, í-ki̍p piàn A-kai-a lóng-chóng ê sèng-tô͘;

2願lín對咱ê父上帝kap主耶穌基督得tio̍h恩典平安。goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

3願咱ê主耶穌基督ê上帝，也是伊ê父，就是憐憫ê父，賞賜ta̍k樣安慰ê上帝，得tio̍h o-ló。Goān lán ê Chú Iâ-so͘ Ki-tok ê Siōng-tè, iā sī I ê Pē, chiū-sī lîn-bín ê Pē, siúⁿ-sù ta̍k iūⁿ an-ùi ê Siōng-tè, tit-tio̍h o-ló.

4阮tī ta̍k樣患難中，伊安慰阮，beh hō͘阮tùi上帝所安慰阮ê安慰，來安慰ta̍k樣患難中ê人。Goán tī ta̍k iūⁿ hoān-lān tiong, I an-ùi goán, beh hō͘ goán tùi Siōng-tè só͘ an-ùi goán ê an-ùi, lâi an-ùi ta̍k iūⁿ hoān-lān tiong ê lâng.

5因為親像基督ê艱苦滿出來到tī阮，阮ê安慰也tùi基督滿滿。In-ūi chhin-chhiūⁿ Ki-tok ê kan-khó͘ móa-chhut-lâi kàu tī goán, goán ê an-ùi iā tùi Ki-tok móa-móa.

6阮或是受患難，是beh做lín受安慰kap得救ê路用；或是受安慰，是beh做lín受安慰ê路用，chit-ê安慰hō͘ lín 能吞忍艱苦，照阮所tú-tio̍h ê一樣。Goán he̍k-sī siū hoān-lān, sī beh chòe lín siū an-ùi kap tit kiù ê lō͘-ēng; he̍k-sī siū an-ùi, sī beh chòe lín siū an-ùi ê lō͘-ēng, chit ê an-ùi hō͘ lín ōe thun-lún kan-khó͘, chiàu goán só͘ tú-tio̍h ê chi̍t iūⁿ.

7Koh阮所替lín ǹg望ê是堅固，因為知lín既然有份tī chiah-ê艱苦，就有份tī安慰，也是án-ni。Koh goán só͘ thòe lín ǹg-bāng ê sī kian-kò͘, in-ūi chai lín kì-jiân ū hūn tī chiah ê kan-khó͘, chiū ū hūn tī an-ùi, iā sī án-ni.

8兄弟ah，論到阮tī亞西亞所tú-tio̍h ê患難，阮m̄ ài lín m̄知；是受teh重真thiám到當bōe起，連活也無ǹg望；Hiaⁿ-tī ah, lūn-kàu goán tī A-se-a só͘ tú-tio̍h ê hoān-lān, goán m̄ ài lín m̄ chai; sī siū teh-tāng chin thiám kàu tng bōe khí, liân oa̍h iā bô ǹg-bāng;

9阮家己心內也按算會死；beh hō͘阮無óa靠家己，獨獨óa靠hō͘死人koh活ê上帝；goán ka-kī sim-lāi iā àn-sǹg ōe sí; beh hō͘ goán bô óa-khò ka-kī, to̍k-to̍k óa-khò hō͘ sí-lâng koh-oa̍h ê Siōng-tè;

10伊已經救阮脫離hiah大ê死無，koh beh救阮；阮也ǹg望伊iáu beh救阮；I í-keng kiù goán thoat-lī hiah tōa ê sí-bô, koh beh kiù goán; goán iā ǹg-bāng I iáu beh kiù goán;

11lín也用祈禱來幫贊阮，beh hō͘ chōe-chōe人因為阮來感謝，就是為tio̍h阮tùi chōe-chōe人祈禱所得tio̍h ê恩。lín iā ēng kî-tó lâi pang-chān goán, beh hō͘ chōe-chōe lâng in-ūi goán lâi kám-siā, chiū-sī ūi-tio̍h goán tùi chōe-chōe lâng kî-tó só͘ tit-tio̍h ê un.

12因為阮所誇口ê，阮ê良心也做阮ê干證，就是阮照上帝ê聖潔kap誠實，m̄是用肉體ê智慧，是用上帝ê恩，往來tī世間，tùi lín koh-khah是án-ni。In-ūi goán só͘ khoa-kháu ê, goán ê liông-sim iā chòe goán ê kan-chèng, chiū-sī goán chiàu Siōng-tè ê sèng-kiat kap sêng-si̍t, m̄ sī ēng jio̍k-thé ê tì-hūi, sī ēng Siōng-tè ê un, óng-lâi tī sè-kan, tùi lín koh khah sī án-ni.

13因為阮所寫hō͘ lín ê無別項，獨獨lín所讀所認ê，我也ǹg望lín到尾beh認伊；In-ūi goán só͘ siá hō͘ lín ê bô pa̍t hāng, to̍k-to̍k lín só͘ tha̍k só͘ jīn ê, góa iā ǹg-bāng lín kàu bé beh jīn i;

14親像lín中間有人認阮，tī咱ê主耶穌ê日，掠阮做lín ê誇口，親像阮也掠lín做阮ê誇口。chhin-chhiūⁿ lín tiong-kan ū lâng jīn goán, tī lán ê Chú Iâ-so͘ ê ji̍t, lia̍h goán chòe lín ê khoa-kháu, chhin-chhiūⁿ goán iā lia̍h lín chòe goán ê khoa-kháu.

15我因為信án-ni，本議定beh事先就近lín，hō͘ lín重再得tio̍h利益；Góa in-ūi sìn án-ni, pún gī-tiāⁿ beh tāi-seng chiū-kūn lín, hō͘ lín têng-chài tit-tio̍h lī-ek;

16也ài tùi lín hia經過去馬其頓，koh tùi馬其頓去lín hia，hō͘ lín送我去猶太。iā ài tùi lín hia keng-kè khì Má-kî-tùn, koh tùi Má-kî-tùn khì lín hia, hō͘ lín sàng góa khì Iû-thài.

17我已經議定án-ni，kiám有用浮漂mah？á是我所議定ê是照肉體來議定，致到我有hit-ê是，是，亦有hit-ê m̄是，m̄是mah？Góa í-keng gī-tiāⁿ án-ni, kiám ū ēng phû-phiò mah? á-sī góa só͘ gī-tiāⁿ ê sī chiàu jio̍k-thé lâi gī-tiāⁿ, tì-kàu góa ū hit ê Sī, sī, ia̍h ū hit ê M̄ sī, m̄ sī mah?

18上帝是信實，án-ni阮所tùi lín講ê話也無有是kap m̄是。Siōng-tè sī sìn-si̍t, án-ni goán só͘ tùi lín kóng ê ōe iā bô ū Sī kap M̄ sī.

19因為tùi阮chiah-ê，就是tùi我kap 西拉提摩太，tī lín中間所傳上帝ê Kiáⁿ耶穌基督無有是kap m̄是，在tī伊只有是nā-tiāⁿ。In-ūi tùi goán chiah-ê, chiū-sī tùi góa kap Se-lah Thê-mô͘-thài, tī lín tiong-kan só͘ thoân Siōng-tè ê Kiáⁿ Iâ-so͘ Ki-tok bô ū Sī kap M̄ sī, chāi-tī I chí ū Sī nā-tiāⁿ.

20因為上帝所應允ê，無論jōa-chōe，在tī伊lóng有是；所以À-bēng也是tùi伊，hō͘上帝對咱得tio̍h榮光。In-ūi Siōng-tè só͘ èng-ún ê, bô lūn jōa chōe, chāi-tī I lóng ū Sī; só͘-í À-bēng iā sī tùi I, hō͘ Siōng-tè tùi lán tit-tio̍h êng-kng.

21Taⁿ堅固阮kap lín tī基督，koh用油抹咱ê，是上帝；Taⁿ kian-kò͘ goán kap lín tī Ki-tok, koh ēng iû boah lán ê, sī Siōng-tè;

22伊也kā咱蓋印，koh賞賜神tī咱ê心做定。I iā kā lán khàm-ìn, koh siúⁿ-sù Sîn tī lán ê sim chòe tiāⁿ.

23我kí我ê活命求上帝做干證，我無koh到哥林多是因為寬容lín。Góa kí góa ê oa̍h-miā kiû Siōng-tè chòe kan-chèng, góa bô koh kàu Ko-lîm-to sī in-ūi khoan-iông lín.

24m̄是阮管轄lín ê信，是幫贊lín ê歡喜；因為lín tùi信來khiā在。M̄ sī goán koán-hat lín ê sìn, sī pang-chān lín ê hoaⁿ-hí; in-ūi lín tùi sìn lâi khiā-chāi.