1Tùi上帝ê旨意受召做耶穌基督ê使徒保羅，kap兄弟Só͘-thê-nî，Tùi Siōng-tè ê chí-ì siū tiàu chòe Iâ-so͘ Ki-tok ê sù-tô͘ Pó-lô, kap hiaⁿ-tī Só͘-thê-nî,

2phoe寄hō͘上帝ê教會tī哥林多ê，就是tiàm-tī基督耶穌成聖、受召做聖徒，以及見若ta̍k所在求叫咱ê主耶穌基督ê名ê，主是in ê，也是咱ê；phoe kià hō͘ Siōng-tè ê kàu-hōe tī Ko-lîm-to ê, chiū-sī tiàm-tī Ki-tok Iâ-so͘ chiâⁿ-sèng, siū tiàu chòe sèng-tô͘, í-ki̍p kìⁿ-nā ta̍k só͘-chāi kiû-kiò lán ê Chú Iâ-so͘ Ki-tok ê miâ ê, Chú sī in ê, iā sī lán ê;

3願lín對咱ê父上帝kap主耶穌基督得tio̍h恩典平安。goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

4我常常替lín感謝我ê上帝，是為tio̍h上帝ê恩典tī耶穌基督bat賞賜lín ê，Góa siông-siông thòe lín kám-siā góa ê Siōng-tè, sī ūi-tio̍h Siōng-tè ê un-tián tī Iâ-so͘ Ki-tok bat siúⁿ-sù lín ê,

5因為lín tiàm-tī伊ta̍k項tāi-chì富足，口才知識無m̄齊備，in-ūi lín tiàm-tī I ta̍k hāng tāi-chì hù-chiok, kháu-châi tì-sek bô m̄ chiâu-pī,

6親像基督ê干證得tio̍h堅固tī lín ê中間；chhin-chhiūⁿ Ki-tok ê kan-chèng tit-tio̍h kian-kò͘ tī lín ê tiong-kan;

7致到lín tī chiah-ê恩賜無一項無夠額，來thèng候咱ê主耶穌基督ê顯現；tì-kàu lín tī chiah ê un-sù bô chi̍t hāng bô kàu-gia̍h, lâi thèng-hāu lán ê Chú Iâ-so͘ Ki-tok ê hián-hiān;

8伊也beh堅固lín到路尾，tī咱ê主耶穌基督ê日無thang嫌。I iā beh kian-kò͘ lín kàu lō͘-bé, tī lán ê Chú Iâ-so͘ Ki-tok ê ji̍t bô thang hiâm.

9上帝是信實，lín tùi伊受召來kap伊ê Kiáⁿ咱ê主耶穌基督結聯。Siōng-tè sī sìn-si̍t, lín tùi I siū tiàu lâi kap I ê Kiáⁿ lán ê Chú Iâ-so͘ Ki-tok kiat-liân.

10兄弟ah，taⁿ我對咱ê主耶穌基督ê名勸lín議論lóng tio̍h相同，lín中間莫得有分黨，就是tio̍h一心一意大家相契合。Hiaⁿ-tī ah, taⁿ góa tùi lán ê Chú Iâ-so͘ Ki-tok ê miâ khǹg lín gī-lūn lóng tio̍h saⁿ-tâng, lín tiong-kan bo̍h-tit ū hun-tóng, chiū-sī tio̍h chi̍t sim chi̍t ì tāi-ke saⁿ khè-ha̍p.

11我ê兄弟ah，是Kek-lâi氏家內ê人bat kā我講，lín中間有相爭。Góa ê hiaⁿ-tī ah, sī Kek-lâi--sī ke-lāi ê lâng bat kā góa kóng, lín tiong-kan ū saⁿ-chiⁿ.

12我ê意思是lín ta̍k人有teh講，我屬保羅，我屬亞波羅，我屬磯法，我屬基督。Góa ê ì-sù sī lín ta̍k lâng ū teh kóng, Góa sio̍k Pó-lô, Góa sio̍k A-pho-lô, Góa sio̍k Ki-hoat, Góa sio̍k Ki-tok.

13基督kiám有分開mah？保羅kiám替lín釘十字架mah？á是lín bat受洗禮歸tī保羅ê名mah？Ki-tok kiám ū pun-khui mah? Pó-lô kiám thòe lín tèng si̍p-jī-kè mah? Á-sī lín bat siū sóe-lé kui tī Pó-lô ê miâ mah?

14感謝上帝，tī Kek-你-sū-pò͘、Ka-iû以外，我未bat kā lín一人行洗禮，Kám-siā Siōng-tè, tī Kek-lí-sū-pò͘, Ka-iû í-gōa, góa bē bat kā lín chi̍t lâng kiâⁿ sóe-lé,

15免得人講lín受洗禮歸tī我ê名。bián-tit lâng kóng lín siū sóe-lé kui tī góa ê miâ.

16我也kā Sū-th ê-hoán-à一家ê人行洗禮，其餘有kā別人行洗禮á無，我卻bōe記得。Góa iā kā Sū-thê-hoán-à chi̍t ke ê lâng kiâⁿ sóe-lé, kî-û ū kā pa̍t lâng kiâⁿ sóe-lé á bô góa khiok bōe kì-tit.

17因為基督差我m̄是beh行洗禮，是beh傳福音；不在言語ê智慧，驚了基督ê十字架歸tī空空。In-ūi Ki-tok chhe góa m̄ sī beh kiâⁿ sóe-lé sī beh thoân hok-im; put-chāi giân-gú ê tì-hūi, kiaⁿ-liáu Ki-tok ê si̍p-jī-kè kui tī khang-khang.

18因為十字架ê道理，沉淪ê人看做戇，咱得救ê人看做上帝ê權能。In-ūi si̍p-jī-kè ê tō-lí, tîm-lûn ê lâng khòaⁿ chòe gōng, lán tit kiù ê lâng khòaⁿ chòe Siōng-tè ê koân-lêng.

19因為有記載講， 我beh滅無智慧ê人ê智慧， 也beh棄sak聰明ê人ê聰明。In-ūi ū kì-chài kóng, Góa beh bia̍t-bô tì-hūi ê lâng ê tì-hūi, Iā beh khì-sak chhang-miâ ê lâng ê chhang-miâ.

20智慧ê人tī tá-lo̍h？經學士tī tá-lo̍h？chit世間好辯論ê人tī tá-lo̍h？上帝kiám m̄是hō͘世間ê智慧變成戇？Tì-hūi ê lâng tī tá-lo̍h? Keng-ha̍k-sū tī tá-lo̍h? chit sè-kan hò͘ⁿ piān-lūn ê lâng tī tá-lo̍h? Siōng-tè kiám m̄ sī hō͘ sè-kan ê tì-hūi piàn-chiâⁿ gōng?

21因為世間既然tùi in ê智慧m̄-bat上帝，上帝就歡喜tùi所宣傳ê戇來救chiah-ê信ê人；這lóng是上帝ê智慧。In-ūi sè-kan kì-jiân tùi in ê tì-hūi m̄ bat Siōng-tè, Siōng-tè chiū hoaⁿ-hí tùi só͘ soan-thoân ê gōng lâi kiù chiah ê sìn ê lâng; che lóng sī Siōng-tè ê tì-hūi.

22因為猶太人求神蹟，希利尼人chhē智慧。In-ūi Iû-thài lâng kiû sîn-jiah, Hi-lī-nî lâng chhē tì-hūi.

23但是阮傳釘十字架ê基督，tùi tī猶太人是塞礙，tùi tī外邦人是愚戇；Nā-sī goán thoân tèng si̍p-jī-kè ê Ki-tok, tùi tī Iû-thài lâng sī that-gāi, tùi tī gōa-pang lâng sī gû-gōng;

24但是tùi tī受召ê，無論猶太、希利尼，基督做上帝ê權能，上帝ê智慧。nā-sī tùi tī siū tiàu ê, bô lūn Iû-thài Hi-lī-nî, Ki-tok chòe Siōng-tè ê koân-lêng, Siōng-tè ê tì-hūi.

25因為上帝ê愚戇比人khah智慧，上帝ê軟弱比人khah勇壯。In-ūi Siōng-tè ê gû-gōng pí lâng khah tì-hūi, Siōng-tè ê loán-jio̍k pí lâng khah ióng-chòng.

26兄弟ah，試看lín ê受召，照肉體有智慧ê無jōa-chōe，有權力ê無jōa-chōe，有尊貴ê也無jōa-chōe；Hiaⁿ-tī ah, chhì-khòaⁿ lín ê siū-tiàu, chiàu jio̍k-thé ū tì-hūi ê bô jōa chōe, ū koân-le̍k ê bô jōa chōe, ū chun-kùi ê iā bô jōa chōe;

27但是上帝揀世間ê戇ê，來hō͘智慧ê人見笑；上帝也揀世間ê軟弱ê，來hō͘勇壯ê見笑；nā-sī Siōng-tè kéng sè-kan ê gōng ê, lâi hō͘ tì-hūi ê lâng kiàn-siàu; Siōng-tè iā kéng sè-kan ê loán-jio̍k ê lâi hō͘ ióng-chòng ê kiàn-siàu;

28上帝也揀世間卑賤ê，人看m̄上目ê，以及hiah-ê無ê，來廢無hiah-ê有ê；Siōng-tè iā kéng sè-kan pi-chiān ê, lâng khòaⁿ m̄ chiūⁿ ba̍k ê, í-ki̍p hiah ê bô ê, lâi hòe-bô hiah ê ū-ê;

29hō͘見若有肉體ê tī上帝ê面前無thang誇口。hō͘ kìⁿ-nā ū jio̍k-thé ê tī Siōng-tè ê bīn-chêng bô thang khoa-kháu.

30但是lín tùi上帝得tio̍h tiàm-tī基督耶穌；伊tùi上帝替咱成做智慧，koh做義、成聖，以及贖回；Nā-sī lín tùi Siōng-tè tit-tio̍h tiàm-tī Ki-tok Iâ-so͘; I tùi Siōng-tè thòe lán chiâⁿ-chòe tì-hūi, koh chòe gī, chiâⁿ-sèng, í-ki̍p sio̍k-hôe;

31致到照所記載講，誇口ê人tio̍h用主來誇口。tì-kàu chiàu só͘ kì-chài kóng, Khoa-kháu ê lâng tio̍h ēng Chú lâi khoa-kháu.

1兄弟ah，我前就近lín，無用深沉 ê言語，á是智慧，來對lín傳上帝ê奧妙。Hiaⁿ-tī ah, góa chêng chiū-kūn lín, bô ēng chhim-tîm ê giân-gú, á-sī tì-hūi, lâi tùi lín thoân Siōng-tè ê ò-biāu.

2因為我決斷tī lín中間m̄知別項，只有知耶穌基督釘十字架ê nā-tiāⁿ。In-ūi góa koat-toàn tī lín tiong-kan m̄ chai pa̍t hāng, chí ū chai Iâ-so͘ Ki-tok tèng si̍p-jī-kè ê nā-tiāⁿ.

3Koh我kap lín tī-teh ê時是軟弱、驚惶、gī-gī-chhoah。Koh góa kap lín tī-teh ê sî sī loán-jio̍k, kiaⁿ-hiâⁿ, gī-gī-chhoah.

4我所講所傳ê不在智慧好聽ê話，是在tī聖神kap權能ê闡明；Góa só͘ kóng só͘ thoân ê put-chāi tì-hūi hó thiaⁿ ê ōe, sī chāi-tī Sèng Sîn kap koân-lêng ê chhián-bêng;

5beh hō͘ lín ê信不在人ê智慧，是在tī上帝ê權能。beh hō͘ lín ê sìn put-chāi lâng ê tì-hūi, sī chāi-tī Siōng-tè ê koân-lêng.

6但是阮tī練達ê人ê中間講智慧；獨獨m̄是chit世間ê智慧，也m̄是chit世間chiah-ê beh廢無ê掌權ê ê智慧；Nā-sī goán tī liān-ta̍t ê lâng ê tiong-kan kóng tì-hūi; to̍k-to̍k m̄ sī chit sè-kan ê tì-hūi, iā m̄ sī chit sè-kan chiah ê beh hòe-bô ê chiáng-koân ê ê tì-hūi;

7是講上帝奧妙中ê智慧，前所隱密ê，就是上帝tī萬世代以前所事先定tio̍h hō͘咱得tio̍h榮光ê。sī kóng Siōng-tè ò-biāu tiong ê tì-hūi, chêng só͘ ún-ba̍t ê, chiū-sī Siōng-tè tī bān sè-tāi í-chêng só͘ tāi-seng tiāⁿ-tio̍h hō͘ lán tit-tio̍h êng-kng ê.

8Chit-ê智慧chit世間掌權ê無一個知；若知，就無將榮光ê主釘tī十字架；Chit ê tì-hūi chit sè-kan chiáng-koân ê bô chi̍t-ê chai; nā chai, chiū bô chiong êng-kng ê Chú tèng tī si̍p-jī-kè;

9是照所記載講， 目睭未bat看見，耳孔未bat聽見， 人ê心未bat想tio̍h ê， 就是上帝為tio̍h疼伊ê人見若所備辦ê。sī chiàu só͘ kì-chài kóng, Ba̍k-chiu bē bat khòaⁿ-kìⁿ, hī-khang bē bat thiaⁿ-kìⁿ, Lâng ê sim bē bat siūⁿ-tio̍h ê, Chiū-sī Siōng-tè ūi-tio̍h thiàⁿ I ê lâng kìⁿ-nā só͘ pī-pān ê.

10但是上帝有用聖神kā咱顯明伊；因為聖神透徹萬事kap上帝ê深奧。Nā-sī Siōng-tè ū ēng Sèng Sîn kā lán hián-bêng i; in-ūi Sèng Sîn thàu-thiat bān sū kap Siōng-tè ê chhim-ò.

11Taⁿ人ê事，若m̄是伊家己ê神，別人是誰會知？án-ni上帝ê事，若m̄是上帝ê神，也無一個會知。Taⁿ lâng ê sū, nā m̄ sī i ka-kī ê sîn, pa̍t lâng chī-chūi ōe chai? án-ni Siōng-tè ê sū, nā m̄ sī Siōng-tè ê Sîn, iā bô chi̍t-ê ōe chai.

12但是咱所得tio̍h m̄是世間ê神，就是tùi上帝來ê神，beh hō͘咱知上帝所白白賞賜咱ê。Nā-sī lán só͘ tit-tio̍h m̄ sī sè-kan ê sîn, chiū-sī tùi Siōng-tè lâi ê Sîn, beh hō͘ lán chai Siōng-tè só͘ pe̍h-pe̍h siúⁿ-sù lán ê.

13Koh阮講伊，m̄是用人ê智慧所教示ê話，是用聖神所教示ê；將神靈ê話和合神靈ê事。Koh goán kóng i, m̄ sī ēng lâng ê tì-hūi só͘ kà-sī ê ōe, sī ēng Sèng Sîn só͘ kà-sī ê; chiong sîn-lêng ê ōe hô-ha̍p sîn lêng ê sū.

14但是屬血氣ê人無承受上帝ê神ê事；in是看做戇；也bōe會bat伊，因為tio̍h tùi神chiah會忖度。Nā-sī sio̍k hiat-khì ê lâng bô sêng-siū Siōng-tè ê Sîn ê sū; in sī khòaⁿ chòe gōng; iā bōe-ōe bat i, in-ūi tio̍h tùi sîn chiah ōe chhún-to̍k.

15獨獨屬神ê人忖度萬項事，也家己無hō͘人忖度。To̍k-to̍k sio̍k sîn ê lâng chhún-to̍k bān hāng sū, iā ka-kī bô hō͘ lâng chhún-to̍k.

16因為是誰有知主ê心thang教示伊ah？但是阮有基督ê心。In-ūi chī-chūi ū chai Chú ê sim thang kà-sī I ah? nā-sī goán ū Ki-tok ê sim.

1兄弟ah，我前kap lín講話，bōe會掠lín做屬神ê人，是做屬肉體ê人，tiàm-tī基督是做嬰á ê。Hiaⁿ-tī ah, góa chêng kap lín kóng ōe, bōe-ōe lia̍h lín chòe sio̍k sîn ê lâng, sī chòe sio̍k jio̍k-thé ê lâng, tiàm-tī Ki-tok sī chòe eⁿ-á ê.

2我bat用奶飼lín，無用米糧；Góa bat ēng lin chhī lín, bô ēng bí-niû;

3因為lín前bōe堪得，到taⁿ iáu bōe會；是lín iáu thàn肉體；lín中間既然有怨妒相爭，kiám m̄是thàn肉體，照人ê款來行mah？in-ūi lín chêng bōe kham-tit, kàu taⁿ iáu bōe-ōe; sī lín iáu thàn jio̍k-thé; lín tiong-kan kì-jiân ū oàn-tò͘ saⁿ-chiⁿ, kiám m̄ sī thàn jio̍k-thé, chiàu lâng ê khoán lâi kiâⁿ mah?

4因為chit-ê講，我屬保羅，hit-ê講，我屬亞波羅，án-ni lín kiám m̄是thàn人ê意思mah？In-ūi chit-ê kóng, Góa sio̍k Pó-lô, hit-ê kóng, Góa sio̍k A-pho-lô, án-ni lín kiám m̄ sī thàn lâng ê ì-sù mah?

5亞波羅是甚麼？保羅是甚麼？是lín所tùi in來信ê差用，照主所賞賜ta̍k人ê。A-pho-lô sī sím-mi̍h? Pó-lô sī sím-mi̍h? Sī lín só͘ tùi in lâi sìn ê chhe-ēng, chiàu Chú só͘ siúⁿ-sù ta̍k lâng ê.

6我栽種，亞波羅ak水，獨獨上帝hō͘伊大叢。Góa chai-chèng, A-pho-lô ak-chúi, to̍k-to̍k Siōng-tè hō͘ i tōa châng.

7Án-ni-siⁿ栽種ê，ak水ê，lóng bōe算得賬；只有hō͘伊大叢ê上帝nā-tiāⁿ。Án-ni-siⁿ chai-chèng ê, ak-chúi ê, lóng bōe sǹg tit siàu; chí ū hō͘ i tōa châng ê Siōng-tè nā-tiāⁿ.

8栽種ê kap ak水ê是一樣；但是ta̍k人照家己ê tio̍h磨beh得tio̍h家己ê工錢。Chai-chèng ê kap ak-chúi ê sī chi̍t iūⁿ; nā-sī ta̍k lâng chiàu ka-kī ê tio̍h-bôa beh tit-tio̍h ka-kī ê kang-chîⁿ.

9因為阮是上帝ê同tio̍h磨ê；lín是上帝所作ê園，上帝所起ê厝。In-ūi goán sī Siōng-tè ê tâng tio̍h-bôa ê; lín sī Siōng-tè só͘ choh ê hn̂g, Siōng-tè só͘ khí ê chhù.

10照上帝所賞賜我ê恩，我親像智慧ê師傅頭有hē地基；別人起tī hit頂面。總是ta̍k人tio̍h謹慎怎樣起伊。Chiàu Siōng-tè só͘ siúⁿ-sù góa ê un, góa chhin-chhiūⁿ tì-hūi ê sai-hū-thâu ū hē tōe-ki; pa̍t lâng khí tī hit téng-bīn. Chóng-sī ta̍k lâng tio̍h kín-sīn cháiⁿ-iūⁿ khí i.

11因為所hē ê地基以外無人會hē別個地基，地基就是耶穌基督。In-ūi só͘ hē ê tōe-ki í-gōa bô lâng ōe hē pa̍t ê tōe-ki, tōe-ki chiū-sī Iâ-so͘ Ki-tok.

12總是人若用金、銀、寶石、柴、草、稻稿，起 tī chit-ê地基頂；Chóng-sī lâng nā ēng kim, gûn, pó-chio̍h, chhâ, chháu, tiū-kó, khí tī chit ê tōe-ki téng;

13ta̍k人ê工teh-beh露現；是hit日beh顯明伊，因為beh tùi火來顯現；koh火beh試驗ta̍k人ê工是甚麼款。ta̍k lâng ê kang teh-beh lō͘-hiān; sī hit ji̍t beh hián-bêng i, in-ūi beh tùi hé lâi hián-hiān; koh hé beh chhì-giām ta̍k lâng ê kang sī sím-mi̍h khoán.

14人所起造ê工若iáu留teh，就伊beh得tio̍h工錢；Lâng só͘ khí-chō ê kang nā iáu lâu-teh, chiū i beh tit-tio̍h kang-chîⁿ;

15人ê工若燒lio去，伊就tú-tio̍h損失；獨獨本身beh得tio̍h救，m̄-kú是親像tùi火中脫出。lâng ê kang nā sio-lio-khì, i chiū tú-tio̍h sún-sit; to̍k-to̍k pún-sin beh tit-tio̍h kiù, m̄ kú sī chhin-chhiūⁿ tùi hé-tiong thoat-chhut.

16Kiám m̄知lín是上帝ê殿，上帝ê神tiàm-tī lín內面mah？Kiám m̄ chai lín sī Siōng-tè ê tiān, Siōng-tè ê Sîn tiàm-tī lín lāi-bīn mah?

17人若毀壞上帝ê殿，上帝beh毀壞伊；因為上帝ê殿是聖，殿就是lín chiah-ê。Lâng nā húi-hoāi Siōng-tè ê tiān, Siōng-tè beh húi-hoāi i; in-ūi Siōng-tè ê tiān sī sèng, tiān chiū-sī lín chiah ê.

18人m̄-thang家己騙，lín中間若有人掠家己tī chit世間做有智慧，就tio̍h成做戇，thang成做有智慧。Lâng m̄ thang ka-kī phiàn. Lín tiong-kan nā ū lâng lia̍h ka-kī tī chit sè-kan chòe ū tì-hūi, chiū tio̍h chiâⁿ-chòe gōng, thang chiâⁿ-chòe ū tì-hūi.

19因為chit世間ê智慧照上帝看是戇；因為有記載講，Hō͘ chiah-ê智慧ê人中in家己ê詭譎ê；In-ūi chit sè-kan ê tì-hūi chiàu Siōng-tè khòaⁿ sī gōng; in-ūi ū kì-chài kóng, Hō͘ chiah ê tì-hūi ê lâng tiòng in ka-kī ê khúi-khiat ê;

20koh講，主知有智慧ê人ê念頭是空空。koh kóng, Chú chai ū tì-hūi ê lâng ê liām-thâu sī khang-khang.

21所以m̄-thang將人來誇口；因為萬物是lín ê；Só͘-í m̄ thang chiong lâng lâi khoa-kháu; in-ūi bān mi̍h sī lín ê;

22無論保羅、亞波羅、磯法、世界、活、死、現今ê、將來ê，lóng是lín ê；bô lūn Pó-lô, A-pho-lô, Ki-hoat, sè-kài, oa̍h, sí, hiān-kim ê, chiong-lâi ê, lóng sī lín ê;

23lín是基督ê，基督是上帝ê。lín sī Ki-tok ê, Ki-tok sī Siōng-tè ê.