1兄弟ah，我前就近lín，無用深沉 ê言語，á是智慧，來對lín傳上帝ê奧妙。Hiaⁿ-tī ah, góa chêng chiū-kūn lín, bô ēng chhim-tîm ê giân-gú, á-sī tì-hūi, lâi tùi lín thoân Siōng-tè ê ò-biāu.

2因為我決斷tī lín中間m̄知別項，只有知耶穌基督釘十字架ê nā-tiāⁿ。In-ūi góa koat-toàn tī lín tiong-kan m̄ chai pa̍t hāng, chí ū chai Iâ-so͘ Ki-tok tèng si̍p-jī-kè ê nā-tiāⁿ.

3Koh我kap lín tī-teh ê時是軟弱、驚惶、gī-gī-chhoah。Koh góa kap lín tī-teh ê sî sī loán-jio̍k, kiaⁿ-hiâⁿ, gī-gī-chhoah.

4我所講所傳ê不在智慧好聽ê話，是在tī聖神kap權能ê闡明；Góa só͘ kóng só͘ thoân ê put-chāi tì-hūi hó thiaⁿ ê ōe, sī chāi-tī Sèng Sîn kap koân-lêng ê chhián-bêng;

5beh hō͘ lín ê信不在人ê智慧，是在tī上帝ê權能。beh hō͘ lín ê sìn put-chāi lâng ê tì-hūi, sī chāi-tī Siōng-tè ê koân-lêng.

6但是阮tī練達ê人ê中間講智慧；獨獨m̄是chit世間ê智慧，也m̄是chit世間chiah-ê beh廢無ê掌權ê ê智慧；Nā-sī goán tī liān-ta̍t ê lâng ê tiong-kan kóng tì-hūi; to̍k-to̍k m̄ sī chit sè-kan ê tì-hūi, iā m̄ sī chit sè-kan chiah ê beh hòe-bô ê chiáng-koân ê ê tì-hūi;

7是講上帝奧妙中ê智慧，前所隱密ê，就是上帝tī萬世代以前所事先定tio̍h hō͘咱得tio̍h榮光ê。sī kóng Siōng-tè ò-biāu tiong ê tì-hūi, chêng só͘ ún-ba̍t ê, chiū-sī Siōng-tè tī bān sè-tāi í-chêng só͘ tāi-seng tiāⁿ-tio̍h hō͘ lán tit-tio̍h êng-kng ê.

8Chit-ê智慧chit世間掌權ê無一個知；若知，就無將榮光ê主釘tī十字架；Chit ê tì-hūi chit sè-kan chiáng-koân ê bô chi̍t-ê chai; nā chai, chiū bô chiong êng-kng ê Chú tèng tī si̍p-jī-kè;

9是照所記載講， 目睭未bat看見，耳孔未bat聽見， 人ê心未bat想tio̍h ê， 就是上帝為tio̍h疼伊ê人見若所備辦ê。sī chiàu só͘ kì-chài kóng, Ba̍k-chiu bē bat khòaⁿ-kìⁿ, hī-khang bē bat thiaⁿ-kìⁿ, Lâng ê sim bē bat siūⁿ-tio̍h ê, Chiū-sī Siōng-tè ūi-tio̍h thiàⁿ I ê lâng kìⁿ-nā só͘ pī-pān ê.

10但是上帝有用聖神kā咱顯明伊；因為聖神透徹萬事kap上帝ê深奧。Nā-sī Siōng-tè ū ēng Sèng Sîn kā lán hián-bêng i; in-ūi Sèng Sîn thàu-thiat bān sū kap Siōng-tè ê chhim-ò.

11Taⁿ人ê事，若m̄是伊家己ê神，別人是誰會知？án-ni上帝ê事，若m̄是上帝ê神，也無一個會知。Taⁿ lâng ê sū, nā m̄ sī i ka-kī ê sîn, pa̍t lâng chī-chūi ōe chai? án-ni Siōng-tè ê sū, nā m̄ sī Siōng-tè ê Sîn, iā bô chi̍t-ê ōe chai.

12但是咱所得tio̍h m̄是世間ê神，就是tùi上帝來ê神，beh hō͘咱知上帝所白白賞賜咱ê。Nā-sī lán só͘ tit-tio̍h m̄ sī sè-kan ê sîn, chiū-sī tùi Siōng-tè lâi ê Sîn, beh hō͘ lán chai Siōng-tè só͘ pe̍h-pe̍h siúⁿ-sù lán ê.

13Koh阮講伊，m̄是用人ê智慧所教示ê話，是用聖神所教示ê；將神靈ê話和合神靈ê事。Koh goán kóng i, m̄ sī ēng lâng ê tì-hūi só͘ kà-sī ê ōe, sī ēng Sèng Sîn só͘ kà-sī ê; chiong sîn-lêng ê ōe hô-ha̍p sîn lêng ê sū.

14但是屬血氣ê人無承受上帝ê神ê事；in是看做戇；也bōe會bat伊，因為tio̍h tùi神chiah會忖度。Nā-sī sio̍k hiat-khì ê lâng bô sêng-siū Siōng-tè ê Sîn ê sū; in sī khòaⁿ chòe gōng; iā bōe-ōe bat i, in-ūi tio̍h tùi sîn chiah ōe chhún-to̍k.

15獨獨屬神ê人忖度萬項事，也家己無hō͘人忖度。To̍k-to̍k sio̍k sîn ê lâng chhún-to̍k bān hāng sū, iā ka-kī bô hō͘ lâng chhún-to̍k.

16因為是誰有知主ê心thang教示伊ah？但是阮有基督ê心。In-ūi chī-chūi ū chai Chú ê sim thang kà-sī I ah? nā-sī goán ū Ki-tok ê sim.

1兄弟ah，我前kap lín講話，bōe會掠lín做屬神ê人，是做屬肉體ê人，tiàm-tī基督是做嬰á ê。Hiaⁿ-tī ah, góa chêng kap lín kóng ōe, bōe-ōe lia̍h lín chòe sio̍k sîn ê lâng, sī chòe sio̍k jio̍k-thé ê lâng, tiàm-tī Ki-tok sī chòe eⁿ-á ê.

2我bat用奶飼lín，無用米糧；Góa bat ēng lin chhī lín, bô ēng bí-niû;

3因為lín前bōe堪得，到taⁿ iáu bōe會；是lín iáu thàn肉體；lín中間既然有怨妒相爭，kiám m̄是thàn肉體，照人ê款來行mah？in-ūi lín chêng bōe kham-tit, kàu taⁿ iáu bōe-ōe; sī lín iáu thàn jio̍k-thé; lín tiong-kan kì-jiân ū oàn-tò͘ saⁿ-chiⁿ, kiám m̄ sī thàn jio̍k-thé, chiàu lâng ê khoán lâi kiâⁿ mah?

4因為chit-ê講，我屬保羅，hit-ê講，我屬亞波羅，án-ni lín kiám m̄是thàn人ê意思mah？In-ūi chit-ê kóng, Góa sio̍k Pó-lô, hit-ê kóng, Góa sio̍k A-pho-lô, án-ni lín kiám m̄ sī thàn lâng ê ì-sù mah?

5亞波羅是甚麼？保羅是甚麼？是lín所tùi in來信ê差用，照主所賞賜ta̍k人ê。A-pho-lô sī sím-mi̍h? Pó-lô sī sím-mi̍h? Sī lín só͘ tùi in lâi sìn ê chhe-ēng, chiàu Chú só͘ siúⁿ-sù ta̍k lâng ê.

6我栽種，亞波羅ak水，獨獨上帝hō͘伊大叢。Góa chai-chèng, A-pho-lô ak-chúi, to̍k-to̍k Siōng-tè hō͘ i tōa châng.

7Án-ni-siⁿ栽種ê，ak水ê，lóng bōe算得賬；只有hō͘伊大叢ê上帝nā-tiāⁿ。Án-ni-siⁿ chai-chèng ê, ak-chúi ê, lóng bōe sǹg tit siàu; chí ū hō͘ i tōa châng ê Siōng-tè nā-tiāⁿ.

8栽種ê kap ak水ê是一樣；但是ta̍k人照家己ê tio̍h磨beh得tio̍h家己ê工錢。Chai-chèng ê kap ak-chúi ê sī chi̍t iūⁿ; nā-sī ta̍k lâng chiàu ka-kī ê tio̍h-bôa beh tit-tio̍h ka-kī ê kang-chîⁿ.

9因為阮是上帝ê同tio̍h磨ê；lín是上帝所作ê園，上帝所起ê厝。In-ūi goán sī Siōng-tè ê tâng tio̍h-bôa ê; lín sī Siōng-tè só͘ choh ê hn̂g, Siōng-tè só͘ khí ê chhù.

10照上帝所賞賜我ê恩，我親像智慧ê師傅頭有hē地基；別人起tī hit頂面。總是ta̍k人tio̍h謹慎怎樣起伊。Chiàu Siōng-tè só͘ siúⁿ-sù góa ê un, góa chhin-chhiūⁿ tì-hūi ê sai-hū-thâu ū hē tōe-ki; pa̍t lâng khí tī hit téng-bīn. Chóng-sī ta̍k lâng tio̍h kín-sīn cháiⁿ-iūⁿ khí i.

11因為所hē ê地基以外無人會hē別個地基，地基就是耶穌基督。In-ūi só͘ hē ê tōe-ki í-gōa bô lâng ōe hē pa̍t ê tōe-ki, tōe-ki chiū-sī Iâ-so͘ Ki-tok.

12總是人若用金、銀、寶石、柴、草、稻稿，起 tī chit-ê地基頂；Chóng-sī lâng nā ēng kim, gûn, pó-chio̍h, chhâ, chháu, tiū-kó, khí tī chit ê tōe-ki téng;

13ta̍k人ê工teh-beh露現；是hit日beh顯明伊，因為beh tùi火來顯現；koh火beh試驗ta̍k人ê工是甚麼款。ta̍k lâng ê kang teh-beh lō͘-hiān; sī hit ji̍t beh hián-bêng i, in-ūi beh tùi hé lâi hián-hiān; koh hé beh chhì-giām ta̍k lâng ê kang sī sím-mi̍h khoán.

14人所起造ê工若iáu留teh，就伊beh得tio̍h工錢；Lâng só͘ khí-chō ê kang nā iáu lâu-teh, chiū i beh tit-tio̍h kang-chîⁿ;

15人ê工若燒lio去，伊就tú-tio̍h損失；獨獨本身beh得tio̍h救，m̄-kú是親像tùi火中脫出。lâng ê kang nā sio-lio-khì, i chiū tú-tio̍h sún-sit; to̍k-to̍k pún-sin beh tit-tio̍h kiù, m̄ kú sī chhin-chhiūⁿ tùi hé-tiong thoat-chhut.

16Kiám m̄知lín是上帝ê殿，上帝ê神tiàm-tī lín內面mah？Kiám m̄ chai lín sī Siōng-tè ê tiān, Siōng-tè ê Sîn tiàm-tī lín lāi-bīn mah?

17人若毀壞上帝ê殿，上帝beh毀壞伊；因為上帝ê殿是聖，殿就是lín chiah-ê。Lâng nā húi-hoāi Siōng-tè ê tiān, Siōng-tè beh húi-hoāi i; in-ūi Siōng-tè ê tiān sī sèng, tiān chiū-sī lín chiah ê.

18人m̄-thang家己騙，lín中間若有人掠家己tī chit世間做有智慧，就tio̍h成做戇，thang成做有智慧。Lâng m̄ thang ka-kī phiàn. Lín tiong-kan nā ū lâng lia̍h ka-kī tī chit sè-kan chòe ū tì-hūi, chiū tio̍h chiâⁿ-chòe gōng, thang chiâⁿ-chòe ū tì-hūi.

19因為chit世間ê智慧照上帝看是戇；因為有記載講，Hō͘ chiah-ê智慧ê人中in家己ê詭譎ê；In-ūi chit sè-kan ê tì-hūi chiàu Siōng-tè khòaⁿ sī gōng; in-ūi ū kì-chài kóng, Hō͘ chiah ê tì-hūi ê lâng tiòng in ka-kī ê khúi-khiat ê;

20koh講，主知有智慧ê人ê念頭是空空。koh kóng, Chú chai ū tì-hūi ê lâng ê liām-thâu sī khang-khang.

21所以m̄-thang將人來誇口；因為萬物是lín ê；Só͘-í m̄ thang chiong lâng lâi khoa-kháu; in-ūi bān mi̍h sī lín ê;

22無論保羅、亞波羅、磯法、世界、活、死、現今ê、將來ê，lóng是lín ê；bô lūn Pó-lô, A-pho-lô, Ki-hoat, sè-kài, oa̍h, sí, hiān-kim ê, chiong-lâi ê, lóng sī lín ê;

23lín是基督ê，基督是上帝ê。lín sī Ki-tok ê, Ki-tok sī Siōng-tè ê.

1人tio̍h掠阮做基督ê差用，做上帝chiah-ê奧妙ê管家。Lâng tio̍h lia̍h goán chòe Ki-tok ê chhe-ēng, chòe Siōng-tè chiah ê ò-biāu ê koán-ke.

2Koh所ǹg望tī管家ê，是ài得伊盡忠。Koh só͘ ǹg-bāng tī koán-ke ê, sī ài tit i chīn-tiong.

3但是我hō͘ lín á是別人批評，我掠做極小khóa ê事；我也無家己批評。Nā-sī góa hō͘ lín á-sī pa̍t lâng phoe-phêng, góa lia̍h chòe ke̍k sió-khóa ê sū; góa iā bô ka-kī phoe-phêng.

4因為我m̄知家己有甚麼thang責備，總是我無tùi chit-ê得tio̍h稱做義；獨獨批評我ê就是主。In-ūi góa m̄ chai ka-kī ū sím-mi̍h thang chek-pī, chóng-sī góa bô tùi chit-ê tit-tio̍h chheng-chòe-gī; to̍k-to̍k phoe-phêng góa ê chiū-sī Chú.

5所以時未到，lín莫得批評甚麼；thèng候主到，伊beh用光照tī烏暗chiah-ê隱密ê事，顯明chiah-ê心內ê計謀；hit時ta̍k人beh tùi上帝得tio̍h伊ê o-ló。Só͘-í sî bē kàu, lín bo̍h-tit phoe-phêng sím-mi̍h; thèng-hāu Chú kàu, I beh ēng kng chiò tī o͘-àm chiah ê ún-ba̍t ê sū, hián-bêng chiah ê sim-lāi ê kè-bô͘; hit sî ta̍k lâng beh tùi Siōng-tè tit-tio̍h i ê o-ló.

6兄弟ah，我為tio̍h lín chiah-ê借本身kap亞波羅來講起chiah-ê tāi-chì，是beh hō͘ lín tī款待阮ê事來學習chit句。莫得過頭tī所記載；免得lín自高，尊重chit-ê，看輕hit-ê。Hiaⁿ-tī ah, góa ūi-tio̍h lín chiah-ê chioh pún-sin kap A-pho-lô lâi kóng-khí chiah ê tāi-chì, sī beh hō͘ lín tī khoán-thāi goán ê sū lâi ha̍k-si̍p chit kù. Bo̍h-tit kè-thâu tī só͘ kì-chài; bián-tit lín chū-ko, chun-tiōng chit-ê, khòaⁿ-khin hit-ê.

7因為是誰 hō͘你各樣tī別人ah？你所有ê，tá-lo̍h 一項m̄是tùi受ê？但是tùi受ê，怎樣誇口，ná親像m̄是tùi受ê ah？In-ūi chī-chūi hō͘ lí koh-iūⁿ tī pa̍t lâng ah? lí só͘ ū ê, tá-lo̍h chi̍t hāng m̄ sī tùi siū ê? Nā-sī tùi siū ê, cháiⁿ-iūⁿ khoa-kháu, ná chhin-chhiūⁿ m̄ sī tùi siū ê ah?

8Lín已經飽足，已經富有，lín已經做王，阮無份；我真正ài lín做王，hō͘阮也kap lín saⁿ-kap做王。Lín í-keng pá-chiok, í-keng pù-ū, lín í-keng chòe ông, goán bô hūn; góa chin-chiàⁿ ài lín chòe ông, hō͘ goán iā kap lín saⁿ-kap chòe ông.

9因為我teh想，上帝有安置阮chiah-ê使徒tī尾溜，親像擬死ê犯人；因為阮成做一棚戲，hō͘世間，kap天使，kap人看。In-ūi góa teh siūⁿ, Siōng-tè ū an-tì goán chiah ê sù-tô͘ tī bé-liu, chhin-chhiūⁿ gí-sí ê hoān-lâng; in-ūi goán chiâⁿ-chòe chi̍t pîⁿ hì, hō͘ sè-kan, kap thiⁿ-sài, kap lâng khòaⁿ.

10阮為tio̍h基督做戇，lín tiàm-tī基督做智慧；阮軟弱，lín勇壯；lín尊貴，阮卑賤。Goán ūi-tio̍h Ki-tok chòe gōng, lín tiàm-tī Ki-tok chòe tì-hūi; goán loán-jio̍k, lín ióng-chòng; lín chun-kùi, goán pi-chiān.

11到tī chit-tia̍p阮也iau，也嘴乾，thǹg-pak-theh，hō͘人cheng，無定tio̍h ê所在；Kàu tī chit tia̍p goán iā iau, iā chhùi-ta, thǹg-pak-theh, hō͘ lâng cheng, bô tiāⁿ-tio̍h ê só͘-chāi;

12也勞苦親手做工；受詈罵，就kā人祝福；受khún-tio̍k，就吞忍；iā lô-khó͘ chhin-chhiú chòe kang; siū lóe-mē, chiū kā lâng chiok-hok; siū khún-tio̍k, chiū thun-lún;

13受譭謗，就kap人好嘴；竟然成做世間ê糞埽，萬物ê渣滓，到tī今á日。siū húi-pòng, chiū kap lâng hó-chhùi; kèng-jiân chiâⁿ-chòe sè-kan ê pùn-sò, bān mi̍h ê che-tái, kàu tī kin-á-ji̍t.

14我寫chiah-ê m̄是beh hō͘ lín見笑，是警戒lín，親像我所疼ê kiáⁿ。Góa siá chiah-ê m̄ sī beh hō͘ lín kiàn-siàu, sī kéng-kài lín, chhin-chhiūⁿ góa só͘ thiàⁿ ê kiáⁿ.

15因為lín tiàm-tī基督，先生雖然講萬，但是老父就無chōe ê；因為tī基督耶穌，我bat tùi福音來生lín。In-ūi lín tiàm-tī Ki-tok, sian-siⁿ sui-jiân káng-bān, nā-sī lāu-pē chiū bô chōe ê; in-ūi tī Ki-tok Iâ-so͘, góa bat tùi hok-im lâi siⁿ lín.

16所以我勸lín tio̍h學我。Só͘-í góa khǹg lín tio̍h o̍h góa.

17因為án-ni，我已經差提摩太去lín hia，伊tiàm-tī主是我所疼koh盡忠ê kiáⁿ；伊beh hō͘ lín記得我tiām-tī基督ê行踏，就是親像我ta̍k所在，tī ta̍k-ê教會所教示ê。In-ūi án-ni góa í-keng chhe Thê-mô͘-thài khì lín hia, i tiàm-tī Chú sī góa só͘ thiàⁿ koh chīn-tiong ê kiáⁿ; i beh hō͘ lín kì-tit góa tiām-tī Ki-tok ê kiâⁿ-ta̍h, chiū-sī chhin-chhiūⁿ góa ta̍k só͘-chāi, tī ta̍k ê kàu-hōe só͘ kà-sī ê.

18有人自高，掠做我無beh到lín hia。Ū lâng chū-ko, lia̍h-chòe góa bô beh kàu lín hia.

19總是主若允准，我beh緊緊去就近lín；koh我所beh知ê，m̄是hiah-ê自高ê人ê話，就是in ê權能。Chóng-sī Chú nā ún-chún, góa beh kín-kín khì chiū-kūn lín; koh góa só͘ beh chai ê, m̄ sī hiah ê chū-ko ê lâng ê ōe, chiū-sī in ê koân-lêng.

20因為上帝ê國不在講話，是在tī權能。In-ūi Siōng-tè ê kok put-chāi kóng ōe, sī chāi-tī koân-lêng.

21Lín ài怎樣？我就近lín tio̍h kia̍h箠á去？á是用仁愛kap溫柔ê心神ah？Lín ài cháiⁿ-iūⁿ? góa chiū-kūn lín tio̍h kia̍h chhê-á khì? á-sī ēng jîn-ài kap un-jiû ê sim-sîn ah?