1論到lín所寫ê事：我講，Ta-po͘人無親近婦人人是好。Lūn-kàu lín só͘ siá ê sū: góa kóng, Ta-po͘-lâng bô chhin-kūn hū-jîn-lâng sī hó.

2總是為tio̍h淫亂ê緣故，ta̍k人tio̍h有家己ê bó͘，婦人人也ta̍k-ê tio̍h有家己ê丈夫。Chóng-sī ūi-tio̍h îm-loān ê iân-kò͘, ta̍k lâng tio̍h ū ka-kī ê bó͘, hū-jîn-lâng iā ta̍k ê tio̍h ū ka-kī ê tiōng-hu.

3丈夫對婦人人tio̍h照所合宜ê款待伊；婦人人對丈夫也tio̍h án-ni。Tiōng-hu tùi hū-jîn-lâng tio̍h chiàu só͘ ha̍p-gî ê khoán-thāi i; hū-jîn-lâng tùi tiōng-hu iā tio̍h án-ni.

4婦人人無權thang主意家己ê身軀，是丈夫主意；丈夫也無權thang主意家己ê身軀，是婦人人主意。Hū-jîn-lâng bô koân thang chú-ì ka-kī ê seng-khu, sī tiōng-hu chú-ì; tiōng-hu iā bô koân thang chú-ì ka-kī ê seng-khu, sī hū-jîn-lâng chú-ì.

5莫得相虧負；獨獨若大家同心，就暫時相離，thang專務祈禱，後來猶原saⁿ-kap tôa，免得撒旦乘lín ê情慾bōe禁得，來試lín。Bo̍h-tit saⁿ khui-hū; to̍k-to̍k nā tāi-ke tâng-sim, chiū chiām-sî saⁿ-lī, thang choan-bū kî-tó, āu-lâi iû-goân saⁿ-kap tôa, bián-tit Sat-tàn sēng lín ê chêng-io̍k bōe kìm-tit, lâi chhì lín.

6我講án-ni，是允准，m̄是命令。Góa kóng án-ni, sī ún-chún, m̄ sī bēng-lēng.

7我ái人lóng親像我。獨獨ta̍k人對上帝為家己ê恩賜；有ê chit款，有ê hit款。Góa ái lâng lóng chhin-chhiūⁿ góa. To̍k-to̍k ta̍k lâng tùi Siōng-tè ūi ka-kī ê un-sù; ū-ê chit khoán, ū-ê hit khoán.

8我對未嫁娶ê kap守寡人講，In若長長親像我是好。Góa tùi bē kè-chhōa ê kap chiú-kóaⁿ lâng kóng, In nā tn̂g-tn̂g chhin-chhiūⁿ góa sī hó.

9設使家己bōe禁得，就tio̍h嫁娶；因為嫁娶是khah好tī慾火teh to̍h。Siat-sú ka-kī bōe kìm-tit, chiū tio̍h kè-chhōa; in-ūi kè-chhōa sī khah hó tī io̍k-hé teh to̍h.

10我命令已經嫁娶ê，其實m̄是我，是主命令。婦人人莫得離開丈夫，Góa bēng-lēng í-keng kè-chhōa ê, kî-si̍t m̄ sī góa, sī Chú bēng-lēng. Hū-jîn-lâng bo̍h-tit lī-khui tiōng-hu,

11(但是已經離開，就tio̍h長長無嫁，或是kap丈夫koh和) ；丈夫也m̄-thang放sak婦人人。(nā sī í-keng lī-khui, chiū tio̍h tn̂g-tn̂g bô kè, he̍k-sī kap tiōng-hu koh hô); tiōng-hu iā m̄ thang pàng-sak hū-jîn-lâng.

12Tùi其餘ê我講，m̄是主講： 若兄弟有婦人人無信主，也婦人人歡喜saⁿ-kap tòa，就莫得放sak伊。Tùi kî-û ê góa kóng, m̄ sī Chú kóng: Nā hiaⁿ-tī ū hū-jîn-lâng bô sìn Chú, iā hū-jîn-lâng hoaⁿ-hí saⁿ-kap tòa, chiū bo̍h-tit pàng-sak i.

13婦人人有丈夫無信主，丈夫歡喜saⁿ-kap tòa，也莫得放sak伊ê丈夫。Hū-jîn-lâng ū tiōng-hu bô sìn Chú, tiōng-hu hoaⁿ-hí saⁿ-kap tòa, iā bo̍h-tit pàng-sak i ê tiōng-hu.

14因為無信主ê丈夫tùi婦人人得tio̍h聖；無信主ê婦人人tùi丈夫得tio̍h聖；若m̄是án-ni，lín ê kiáⁿ兒無清氣，總是taⁿ in是聖。In-ūi bô sìn Chú ê tiōng-hu tùi hū-jîn-lâng tit-tio̍h sèng; bô sìn Chú ê hū-jîn-lâng tùi tiōng-hu tit-tio̍h sèng; nā m̄ sī án-ni, lín ê kiáⁿ-jî bô chheng-khì, chóng-sī taⁿ in sī sèng.

15m̄信ê若離開，就kù-chāi伊離開；兄弟姊妹tī chiah-ê事無受拘束；獨獨上帝召咱是ài得和平。M̄ sìn ê nā lī-khui, chiū kù-chāi i lī-khui; hiaⁿ-tī chí-bē tī chiah ê sū bô siū khu-sok; to̍k-to̍k Siōng-tè tiàu lán sī ài tit hô-pêng.

16婦人人ah，你thái-thó知能救丈夫á bōe？丈夫ah，你 thái-thó知能救婦人人á bōe？Hū-jîn-lâng ah, lí thái-thó chai ōe kiù tiōng-hu á bōe? Tiōng-hu ah, lí thái-thó chai ōe kiù hū-jîn-lâng á bōe?

17獨獨照主所賞賜ta̍k人ê，照上帝所召ta̍k人ê，tio̍h án-ni行。Tī ta̍k-ê教會我所吩咐也是án-ni。To̍k-to̍k chiàu Chú só͘ siúⁿ-sù ta̍k lâng ê, chiàu Siōng-tè só͘ tiàu ta̍k lâng ê, tio̍h án-ni kiâⁿ. Tī ta̍k ê kàu-hōe góa só͘ hoan-hù iā sī án-ni.

18有人已經受割禮來得tio̍h 召mah？就莫得廢無割禮。有人未受割禮來得tio̍h召mah？就莫得受割禮。Ū lâng í-keng siū kat-lé lâi tit-tio̍h tiàu mah? chiū bo̍h-tit hòe-bô kat-lé. Ū lâng bē siū kat-lé lâi tit-tio̍h tiàu mah? chiū bo̍h-tit siū kat-lé.

19受割禮bōe算得賬，無受割禮也bōe算得賬；獨獨是守上帝ê誡nā-tiāⁿ。Siū kat-lé bōe sǹg-tit siàu, bô siū kat-lé iā bōe sǹg-tit siàu; to̍k-to̍k sī siú Siōng-tè ê kài nā-tiāⁿ.

20Ta̍k人tī甚麼等第受召，tio̍h猶原tiàm-tī hit-ê 等第。Ta̍k lâng tī sím-mi̍h téng-tē siū tiàu, tio̍h iû-goân tiàm-tī hit ê téng-tē.

21你做奴才來受召mah？M̄-thang因為án-ni來掛慮。總是若會得自由，是khah好。Lí chòe lô͘-châi lâi siū tiàu mah? M̄ thang in-ūi án-ni lâi khòa-lū. Chóng-sī nā ōe tit chū-iû, sī khah hó.

22因為做奴才，tī主得tio̍h召ê，是hō͘主所tháu放；án-ni做自由，來得tio̍h召ê，是做基督ê奴僕。In-ūi chòe lô͘-châi, tī Chú tit-tio̍h tiàu ê, sī hō͘ Chú só͘ tháu-pàng; án-ni chòe chū-iû, lâi tit-tio̍h tiàu ê, sī chòe Ki-tok ê lô͘-po̍k.

23Lín是用價錢所買ê，m̄-thang成做人ê奴才。Lín sī ēng kè-chîⁿ só͘ bóe ê, m̄ thang chiâⁿ-chòe lâng ê lô͘-châi.

24兄弟ah，ta̍k人tī甚麼地步受召，伊tio̍h tī上帝ê面前長長tòa tī hit-ê地步。Hiaⁿ-tī ah, ta̍k lâng tī sím-mi̍h tē-pō͘ siū tiàu, i tio̍h tī Siōng-tè ê bīn-chêng tn̂g-tn̂g tòa tī hit ê tē-pō͘.

25論到未嫁娶ê，我無有主ê命令；總是我已經得tio̍h主ê憐憫來做盡忠，就將家己ê意見kā lín講。Lūn-kàu bē kè-chhōa ê, góa bô ū Chú ê bēng-lēng; chóng-sī góa í-keng tit-tio̍h Chú ê lîn-bín lâi chòe chīn-tiong, chiū chiong ka-kī ê ì-kiàn kā lín kóng.

26因為看現今ê艱難，照我phah算，人若照伊平常ê款是好。In-ūi khòaⁿ hiān-kim ê kan-lân, chiàu góa phah-sǹg, lâng nā chiàu i pêng-siông ê khoán sī hó.

27你有婦人人mah？莫得求tháu-放。你無婦人人mah？莫得求beh娶。Lí ū hū-jîn-lâng mah? bo̍h-tit kiû tháu-pàng. Lí bô hū-jîn-lâng mah? bo̍h-tit kiû beh chhōa.

28總是你若娶，m̄是犯罪；在室女若嫁，也m̄是犯罪。總是in hit號人beh tī肉體tú-tio̍h患難；我是teh顧lín。Chóng-sī lí nā chhōa, m̄ sī hoān chōe; chāi-sek-lú nā kè, iā m̄ sī hoān chōe. Chóng-sī in hit hō lâng beh tī jio̍k-thé tú-tio̍h hoān-lān; góa sī teh kò͘ lín.

29兄弟ah，我koh講，時日促短lah，所以tùi taⁿ以後，有bó͘ ê tio̍h親像無bó͘，Hiaⁿ-tī ah, góa koh kóng, sî-ji̍t chhek té lah, só͘-í tùi taⁿ í-āu ū bó͘ ê tio̍h chhin-chhiūⁿ bô bó͘,

30啼哭ê親像無啼哭，歡喜ê親像無歡喜，買ê親像無所得tio̍h，用世間ê物ê親像無lām-sám用，thî-khàu ê chhin-chhiūⁿ bô thî-khàu, hoaⁿ-hí ê chhin-chhiūⁿ bô hoaⁿ-hí, bóe ê chhin-chhiūⁿ bô só͘ tit-tio̍h, ēng sè-kan ê mi̍h ê chhin-chhiūⁿ bô lām-sám ēng,

31因為chit世間ê款teh過去lah。in-ūi chit sè-kan ê khoán teh kè-khì lah.

32我ài得lín無所掛慮。無bó͘ ê掛慮主ê事，怎樣會hō͘主歡喜；Góa ài-tit lín bô só͘ khòa-lū. Bô bó͘ ê khòa-lū Chú ê sū, cháiⁿ-iūⁿ ōe hō͘ Chú hoaⁿ-hí;

33但是有bó͘ ê掛慮世間ê事，怎樣會hō͘ bó͘歡喜。nā-sī ū bó͘ ê khòa-lū sè-kan ê sū, cháiⁿ-iūⁿ ōe hō͘ bó͘ hoaⁿ-hí.

34婦人人kap在室女也有分別；無丈夫ê掛慮主ê事，beh hō͘伊ê身軀kap神魂lóng聖。但是有丈夫ê掛慮世間ê事，怎樣會hō͘丈夫歡喜。Hū-jîn-lâng kap chāi-sek-lú iā ū hun-piat; bô tiōng-hu ê khòa-lū Chú ê sū, beh hō͘ i ê seng-khu kap sîn-hûn lóng sèng. Nā-sī ū tiōng-hu ê khòa-lū sè-kan ê sū, cháiⁿ-iūⁿ ōe hō͘ tiōng-hu hoaⁿ-hí.

35我講chiah-ê是為tio̍h lín家己ê利益，m̄是beh籠絡lín，就是beh hō͘ lín行合適ê事，勤勤服事主，無所攪擾。Góa kóng chiah-ê sī ūi-tio̍h lín ka-kī ê lī-ek, m̄ sī beh lóng-lo̍k lín, chiū-sī beh hō͘ lín kiâⁿ ha̍p-sek ê sū, khûn-khûn ho̍k-sāi Chú, bô só͘ kiáu-jiáu.

36但是有人phah算款待伊ê cha-bó͘-kiáⁿ有m̄合適，設使年歲過時，也事情不得已tio̍h án-ni，就thang照意思去行；伊無犯罪；tio̍h hō͘ in合婚。Nā-sī ū lâng phah-sǹg khoán-thāi i ê cha-bó͘-kiáⁿ ū m̄ ha̍p-sek, siat-sú nî-hè kè-sî, iā sū-chêng put-tek-í tio̍h án-ni, chiū thang chiàu ì-sù khì kiâⁿ; i bô hoān-chōe; tio̍h hō͘ in ha̍p-hun.

37若有人堅心，無有不得已ê事，koh有權thang行家己ê意思，也伊家己ê心已經決定beh留伊ê cha-bó͘-kiáⁿ，án-ni行是好。Nā ū lâng kian-sim, bô ū put-tek-í ê sū, koh ū koân thang kiâⁿ ka-kī ê ì-sù, iā i ka-kī ê sim í-keng koat-tiāⁿ beh lâu i ê cha-bó͘-kiáⁿ, án-ni kiâⁿ sī hó.

38親像án-ni，hō͘家己ê cha-bó͘-kiáⁿ出嫁ê是好，無hō͘伊出嫁ê koh-khah好。Chhin-chhiūⁿ án-ni, hō͘ ka-kī ê cha-bó͘-kiáⁿ chhut-kè ê sī hó, bô hō͘ i chhut-kè ê koh khah hó.

39丈夫tī-teh ê時，婦人人受把縛；丈夫若死，婦人人得tio̍h自由，嫁伊所愛ê，獨獨tio̍h嫁屬主ê，chiah thang。Tiōng-hu tī-teh ê sî, hū-jîn-lâng siū pé-pa̍k; tiōng-hu nā sí, hū-jîn-lâng tit-tio̍h chū-iû, kè i só͘ ài ê, to̍k-to̍k tio̍h kè sio̍k Chú ê, chiah thang.

40總是照我phah算，無嫁khah有福氣；koh我想我也有上帝ê神。Chóng-sī chiàu góa phah-sǹg, bô kè khah ū hok-khì; koh góa siūⁿ góa iā ū Siōng-tè ê Sîn.

1論到祭偶像ê物：咱知咱lóng有知識。知識會致到自高；但是仁愛會建立德行。Lūn-kàu chè ngó͘-siōng ê mi̍h: Lán chai lán lóng ū tì-sek. Tì-sek ōe tì-kàu chū-ko; nā-sī jîn-ài ōe kiàn-li̍p tek-hēng.

2人若phah算伊有所知，就是伊iáu-bē知照所應該知。Lâng nā phah-sǹg i ū só͘ chai, chiū-sī i iáu-bē chai chiàu só͘ eng-kai chai.

3人若疼上帝，chit-ê人就是hō͘伊所bat。Lâng nā thiàⁿ Siōng-tè, chit ê lâng chiū-sī hō͘ I só͘ bat.

4論到食祭偶像ê物，咱知偶像tī世間是無影ê，也知上帝獨獨一個，無別個。Lūn-kàu chia̍h chè ngó͘-siōng ê mi̍h, lán chai ngó͘-siōng tī sè-kan sī bô iáⁿ ê, iā chai Siōng-tè to̍k-to̍k chi̍t-ê, bô pa̍t ê.

5因為雖然有稱做上帝ê，或是tī天裡或是tī地裡，親像有chōe-chōe上帝，chōe-chōe主；In-ūi sui-jiân ū chheng chòe siōng-tè ê, he̍k-sī tī thiⁿ-ni̍h he̍k-sī tī tōe-ni̍h, chhin-chhiūⁿ ū chōe-chōe siōng-tè, chōe-chōe chú;

6但是咱chí有一個上帝，就是父，萬物本tùi伊，咱也歸tī伊；koh有一個主耶穌基督，萬物tùi伊，咱也tùi伊。nā-sī lán chí ū chi̍t ê Siōng-tè, chiū-sī Pē, bān mi̍h pún tùi I, lán iā kui tī I; koh ū chi̍t ê Chú Iâ-so͘ Ki-tok, bān mi̍h tùi I, lán iā tùi I.

7總是人無lóng有chit號知識；有ê拜偶像慣勢，到taⁿ掠hit-ê祭祀做祭偶像ê物來食伊，in ê良心既然軟弱，所以就bak-tio̍h。Chóng-sī lâng bô lóng ū chit hō tì-sek; ū-ê pài ngó͘-siōng koàiⁿ-sì, kàu taⁿ lia̍h hit ê chè-sū chòe chè ngó͘-siōng ê mi̍h lâi chia̍h i, in ê liông-sim kì-jiân loán-jio̍k, só͘-í chiū bak-tio̍h.

8總是食物bōe hō͘上帝歡喜咱；無食，咱無虧損；食，咱也無利益。Chóng-sī chia̍h-mi̍h bōe hō͘ Siōng-tè hoaⁿ-hí lán; bô chia̍h, lán bô khui-sún; chia̍h, lán iā bô lī-ek.

9獨獨tio̍h謹慎，驚了lín chit-ê權做軟chiáⁿ ê人ê塞礙。To̍k-to̍k tio̍h kín-sīn, kiaⁿ-liáu lín chit ê koân chòe nńg-chiáⁿ ê lâng ê that-gāi.

10因為若有人看見你有知識ê坐桌tī偶像ê廟，hit-ê軟弱ê人ê良心kiám無tùi án-ni放膽，來食祭偶像ê物mah？In-ūi nā ū lâng khòaⁿ-kìⁿ lí ū tì-sek ê chē toh tī ngó͘-siōng ê biō, hit ê loán-jio̍k ê lâng ê liông-sim kiám bô tùi án-ni hòng-táⁿ, lâi chia̍h chè ngó͘-siōng ê mi̍h mah?

11因為對你ê知識hit-ê軟弱ê人沉淪，就是基督替伊死ê兄弟。in-ūi tùi lí ê tì-sek hit ê loán-jio̍k ê lâng tîm-lûn, chiū-sī Ki-tok thòe i sí ê hiaⁿ-tī.

12Lín án-ni得罪兄弟，傷tio̍h in軟弱ê良心，就是得罪基督。Lín án-ni tek-chōe hiaⁿ-tī, siong-tio̍h in loán-jio̍k ê liông-sim, chiū-sī tek-chōe Ki-tok.

13所以食物若hō͘我ê兄弟跋倒，我就永永m̄食肉，免得hō͘我ê兄弟跋倒。Só͘-í chia̍h-mi̍h nā hō͘ góa ê hiaⁿ-tī poa̍h-tó, góa chiū éng-éng m̄ chia̍h bah, bián-tit hō͘ góa ê hiaⁿ-tī poa̍h-tó.

1我kiám bōe得自由mah？Kiám m̄是使徒mah？Kiám m̄-bat看見咱ê主耶穌mah？Lín kiám m̄是我tiàm-tī主做成ê工mah？Góa kiám bōe tit chū-iû mah? Kiám m̄ sī sù-tô͘ mah? Kiám m̄ bat khòaⁿ-kìⁿ lán ê Chú Iâ-so͘ mah? Lín kiám m̄ sī góa tiàm-tī Chú chòe-chiâⁿ ê kang mah?

2設使對tī別人我m̄是使徒，對tī lín我無m̄是；因為lín tiàm-tī主就是我做使徒ê印證。Siat-sú tùi tī pa̍t lâng góa m̄ sī sù-tô͘, tùi tī lín góa bô m̄ sī; in-ūi lín tiàm-tī Chú chiū-sī góa chòe sù-tô͘ ê ìn-chèng.

3有查問我ê，我就用chit-ê家己分訴。Ū chhâ-mn̄g góa ê, góa chiū ēng chit-ê ka-kī hun-sò͘.

4阮kiám無權thang lim thang食mah？Goán kiám bô koân thang lim thang chia̍h mah?

5阮kiám無權thang娶信主ê姊妹做bó͘來kap阮saⁿ-kap行，親像其餘ê使徒，kap主ê兄弟，kap磯法mah？Goán kiám bô koân thang chhōa sìn Chú ê chí-bē chòe bó͘ lâi kap goán saⁿ-kap kiâⁿ, chhin-chhiūⁿ kî-û ê sù-tô͘, kap Chú ê hiaⁿ-tī, kap Ki-hoat mah?

6á是kan-ta我kap巴拿巴無權thang免做工mah？Á-sī kan-ta góa kap Pa-ná-pa bô koân thang bián chòe kang mah?

7甚麼人當兵，來食家己ê糧mah？甚麼人栽葡萄園，無食伊ê果子mah？甚麼人飼cheng-siⁿ，無食hit陣ê奶mah？Sím-mi̍h lâng tng peng, lâi chia̍h ka-kī ê niû mah? sím-mi̍h lâng chai phû-tô hn̂g, bô chia̍h i ê ké-chí mah? sím-mi̍h lâng chhī cheng-siⁿ, bô chia̍h hit tīn ê lin mah?

8我講chiah-ê kiám是照人ê意見mah？á是律法無án-ni講mah？Góa kóng chiah-ê kiám sī chiàu lâng ê ì-kiàn mah? Á-sī lu̍t-hoat bô án-ni kóng mah?

9因為tī摩西ê律法有記載講，磨五穀ê牛，莫得láng伊ê嘴。上帝kiám是致意tī牛mah？In-ūi tī Mô͘-se ê lu̍t-hoat ū kì-chài kóng, Bō ngó͘-kok ê gû, bo̍h-tit láng i ê chhùi. Siōng-tè kiám sī tì-ì tī gû mah?

10á是一概為tio̍h咱來講伊？真正是為tio̍h咱來寫；因為犁園ê tio̍h存ǹg望來犁；磨五穀ê tio̍h ǹg望saⁿ-kap有份來磨。Á-sī it-khài ūi-tio̍h lán lâi kóng i? Chin-chiàⁿ sī ūi-tio̍h lán lâi siá; in-ūi lôe hn̂g ê tio̍h chûn ǹg-bāng lâi lôe; bō ngó͘-kok ê tio̍h ǹg-bāng saⁿ-kap ū hūn lâi bō.

11阮若將屬tī神ê物也tī lín中間，就tùi lín收成屬tī肉體ê物，kiám是過頭mah？Goán nā chiong sio̍k tī sîn ê mi̍h iā tī lín tiong-kan, chiū tùi lín siu-sêng sio̍k tī jio̍k-thé ê mi̍h, kiám sī kè-thâu mah?

12別人對tī lín尚且有份chit-ê權柄，何況阮mah？總是阮m̄-bat用chit-ê權，反tńg吞忍ta̍k項ê事，免得阮有甚麼阻擋基督ê福音。Pa̍t lâng tùi tī lín siōng-chhiáⁿ ū hūn chit ê koân-pèng, hô-hòng goán mah? Chóng-sī goán m̄ bat ēng chit ê koân, hoán-tńg thun-lún ta̍k hāng ê sū, bián-tit goán ū sím-mi̍h chó͘-tòng Ki-tok ê hok-im.

13Kiám m̄知tio̍h磨tī聖ê事ê食殿內ê物，跟隨祭壇ê，kap祭壇saⁿ-kap分物mah？Kiám m̄ chai tio̍h-bôa tī sèng ê sū ê chia̍h tiān-lāi ê mi̍h, kun-sûi chè-tôaⁿ ê, kap chè-tôaⁿ saⁿ-kap pun mi̍h mah?

14親像án-ni，主設法hō͘傳福音ê人tio̍h tùi福音來度活。Chhin-chhiūⁿ án-ni, Chú siat-hoat hō͘ thoân hok-im ê lâng tio̍h tùi hok-im lâi tō͘ oa̍h.

15但是chiah-ê事我lóng未bat用；koh我寫chiah-ê m̄是ài人án-ni款待我；因為我寧可死，不致人hō͘我所誇口ê歸tī空空。Nā-sī chiah ê sū góa lóng bē bat ēng; koh góa siá chiah-ê m̄ sī ài lâng án-ni khoán-thāi góa; in-ūi góa lêng-khó͘ sí, put-tì lâng hō͘ góa só͘ khoa-kháu ê kui tī khang-khang.

16我傳福音m̄是thang誇口ê事，是不得已nā-tiāⁿ；因為若無傳福音，我就有災禍。Góa thoân hok-im m̄ sī thang khoa-kháu ê sū, sī put-tek-í nā-tiāⁿ; in-ūi nā bô thoân hok-im, góa chiū ū chai-ē.

17我若甘心做chit-ê事，就有報賞；就若m̄甘心，有職任已經交代我lah。Góa nā kam-sim chòe chit ê sū, chiū ū pò-siúⁿ; chiū nā m̄ kam-sim, ū chit-jīm í-keng kau-tāi góa lah.

18Án-ni我ê報賞是甚麼ah？就是我teh傳福音，hō͘人免所費也會得tio̍h福音；免得我tī福音所有ê權用到盡。Án-ni góa ê pò-siúⁿ sī sím-mi̍h ah? Chiū-sī góa teh thoân hok-im, hō͘ lâng bián só͘-hùi iā ōe tit-tio̍h hok-im; bián-tit góa tī hok-im só͘ ū ê koân ēng kàu chīn.

19我對tī眾人sui-bóng是自由，iáu-kú將家己做眾人ê奴僕，為tio̍h beh得tio̍h人ná chōe。Góa tùi tī chèng lâng sui-bóng sī chū-iû, iáu-kú chiong ka-kī chòe chèng lâng ê lô͘-po̍k, ūi-tio̍h beh tit-tio̍h lâng ná chōe.

20Ǹg猶太人我就親像猶太人，beh得tio̍h猶太人；ǹg法下ê人，我雖然本身無屬tī法下，就親像法下ê人，beh得tio̍h法下ê人。Ǹg Iû-thài lâng góa chiū chhin-chhiūⁿ Iû-thài lâng, beh tit-tio̍h Iû-thài lâng; ǹg hoat ē ê lâng, góa sui-jiân pún-sin bô sio̍k tī hoat ē, chiū chhin-chhiūⁿ hoat ē ê lâng, beh tit-tio̍h hoat ē ê lâng.

21Ǹg法外ê人，我就親像法外人，beh得tio̍h法外ê人；其實我m̄是tī上帝ê法外，就是tī基督ê法內。Ǹg hoat gōa ê lâng, góa chiū chhin-chhiūⁿ hoat gōa lâng, beh tit-tio̍h hoat gōa ê lâng; kî-si̍t góa m̄ sī tī Siōng-tè ê hoat gōa, chiū-sī tī Ki-tok ê hoat lāi.

22Ǹg軟弱ê人，我就成做軟弱，beh得tio̍h軟弱ê人。Ǹg ta̍k號人，我成做ta̍k號款，一概是beh救人。Ǹg loán-jio̍k ê lâng góa chiū chiâⁿ-chòe loán-jio̍k, beh tit-tio̍h loán-jio̍k ê lâng. Ǹg ta̍k hō lâng, góa chiâⁿ-chòe ta̍k hō khoán, it-khài sī beh kiù lâng.

23ta̍k項事我因為福音來行，是hō͘我thang saⁿ-kap有份tī福音。Ta̍k hāng sū góa in-ūi hok-im lâi kiâⁿ, sī hō͘ góa thang saⁿ-kap ū hūn tī hok-im.

24Kiám m̄知在場tàu走ê ta̍k-ê lóng走，但是得tio̍h報賞ê只有一個；lín tio̍h án-ni走chiah thang得tio̍h。Kiám m̄ chai chāi-tiûⁿ tàu-cháu ê ta̍k ê lóng cháu, nā-sī tit-tio̍h pò-siúⁿ ê chí ū chi̍t-ê; lín tio̍h án-ni cháu chiah thang tit-tio̍h.

25見若鬥力ê ta̍k項事撙節；in是beh得tio̍h會敗壞ê冕旒，但是咱是beh得tio̍h bōe敗壞ê。Kìⁿ-nā tàu-la̍t ê ta̍k hāng sū chún-chat; in sī beh tit-tio̍h ōe pāi-hoāi ê bián-liû, nā-sī lán sī beh tit-tio̍h bōe pāi-hoāi ê.

26所以我án-ni teh走，m̄是親像無定tio̍h ê方向；我phah拳，無親像teh phah空氣；Só͘-í góa án-ni teh cháu, m̄ sī chhin-chhiūⁿ bô tiāⁿ-tio̍h ê hng-hiùⁿ; góa phah kûn, bô chhin-chhiūⁿ teh phah khong-khì;

27我phah我ê身軀到thiám-thiám，hō͘伊降服；驚了我已經傳hō͘別人，本身kiám-chhái tú-tio̍h拒絕。góa phah góa ê seng-khu kàu thiám-thiám, hō͘ i hâng-ho̍k; kiaⁿ-liáu góa í-keng thoân hō͘ pa̍t lâng, pún-sin kiám-chhái tú-tio̍h kū-choa̍t.