1論到活命ê道，tùi起頭所有，阮所聽見，親目所看見，所觀看，也阮ê手摸tio̍h ê；Lūn-kàu oa̍h-miā ê Tō, tùi khí-thâu só͘ ū, goán só͘ thiaⁿ-kìⁿ, chhin-ba̍k só͘ khòaⁿ-kìⁿ, só͘ koan-khòaⁿ, iā goán ê chhiú bong-tio̍h ê;

2(chit-ê活命bat出現，阮有看見來做干證，也報lín知hit-ê永活ê活命，就是本kap父tī-teh，也出現tī阮ê) ；(chit ê oa̍h-miā bat chhut-hiān, goán ū khòaⁿ-kìⁿ lâi chòe kan-chèng, iā pò lín chai hit ê éng-oa̍h ê oa̍h-miā, chiū-sī pún kap Pē tī-teh, iā chhut-hiān tī goán ê);

3阮將所看見所聽見報lín知，beh hō͘ lín kap阮交陪，koh阮所交陪，就是kap父以及伊ê Kiáⁿ耶穌基督:goán chiong só͘ khòaⁿ-kìⁿ só͘ thiaⁿ-kìⁿ pò lín chai, beh hō͘ lín kap goán kau-pôe, koh goán só͘ kau-pôe, chiū-sī kap Pē í-ki̍p I ê Kiáⁿ Iâ-so͘ Ki-tok:

4阮寫chiah-ê，是beh hō͘阮ê歡喜充滿。goán siá chiah-ê, sī beh hō͘ goán ê hoaⁿ-hí chhiong-móa.

5阮tùi伊所聽ê話，來傳hō͘ lín ê，就是講，上帝是光，tī伊全然無暗。Goán tùi I só͘ thiaⁿ ê ōe, lâi thoân hō͘ lín ê, chiū-sī kóng, Siōng-tè sī kng, tī I choân-jiân bô àm.

6咱若講，有teh kap伊交陪，也行tī烏暗，就是講白賊，無行真實；Lán nā kóng, ū teh kap I kau-pôe, iā kiâⁿ tī o͘-àm, chiū-sī kóng pe̍h-chha̍t, bô kiâⁿ chin-si̍t;

7獨獨咱若行tī光明，親像伊tiàm tī光明，就咱saⁿ-kap交陪，也伊ê Kiáⁿ耶穌ê血洗除咱lóng總ê罪。to̍k-to̍k lán nā kiâⁿ tī kng-bêng, chhin-chhiūⁿ I tiàm tī kng-bêng, chiū lán saⁿ-kap kau-pôe, iā I ê Kiáⁿ Iâ-so͘ ê huih sóe-tû lán lóng-chóng ê chōe.

8咱若講無罪，就是騙家己，真理也無tiàm tī咱。Lán nā kóng bô chōe, chiū-sī phiàn ka-kī, chin-lí iā bô tiàm tī lán.

9咱若認咱ê罪，伊是真實公義，beh赦免咱ê罪，洗除咱lóng總ê不義。Lán nā jīn lán ê chōe, I sī chin-si̍t kong-gī, beh sià-bián lán ê chōe, sóe-tû lán lóng-chóng ê put-gī.

10咱若講未bat犯罪，便是hō͘伊做講白賊ê，伊ê道理無tiàm tī咱。Lán nā kóng bē bat hoān chōe, piān sī hō͘ I chòe kóng pe̍h-chha̍t ê, I ê tō-lí bô tiàm tī lán.

1我ê細kiáⁿ ah，我寫chiah-ê hō͘ lín，是beh hō͘ lín無犯罪。若有人犯罪，就tī父ê面前咱有保惠師，就是義人耶穌基督；Góa ê sòe-kiáⁿ ah, góa siá chiah-ê hō͘ lín, sī beh hō͘ lín bô hoān chōe. Nā ū lâng hoān chōe, chiū tī Pē ê bīn-chêng lán ū Pó-hūi-su, chiū-sī gī-lâng Iâ-so͘ Ki-tok;

2伊為tio̍h咱ê罪，做挽回ê祭；koh m̄-nā為tio̍h咱ê罪，也是為tio̍h thong世間。I ūi-tio̍h lán ê chōe, chòe bán-hôe ê chè; koh m̄ nā ūi-tio̍h lán ê chōe, iā sī ūi-tio̍h thong sè-kan.

3咱若守伊ê命令，tùi án-ni就知咱bat伊。Lán nā siú I ê bēng-lēng, tùi án-ni chiū chai lán bat I.

4人若講，我bat伊，也無守伊ê命令，是白賊ê人，真理也無tiàm tī伊；Lâng nā kóng, góa bat I, iā bô siú I ê bēng-lēng, sī pe̍h-chha̍t ê lâng, chin-lí iā bô tiàm tī i;

5見若守伊ê道理ê，就上帝ê疼tī伊真正有齊全。Tùi án-ni咱知咱tiàm tī伊；kìⁿ-nā siú I ê tō-lí ê, chiū Siōng-tè ê thiàⁿ tī i chin-chiàⁿ ū chiâu-chn̂g. Tùi án-ni lán chai lán tiàm tī I;

6人若家己講tiàm tī伊，就tio̍h照伊所行ê去行。lâng nā ka-kī kóng tiàm tī I, chiū tio̍h chiàu I só͘ kiâⁿ ê khì kiâⁿ.

7所疼ê兄弟ah，我無寫新ê命令hō͘ lín，就是lín tùi起頭所有舊ê命令；hit-ê舊ê命令就是lín所bat聽見ê道理。Só͘ thiàⁿ ê hiaⁿ-tī ah, góa bô siá sin ê bēng-lēng hō͘ lín, chiū-sī lín tùi khí-thâu só͘ ū kū ê bēng-lēng; hit ê kū ê bēng-lēng chiū-sī lín só͘ bat thiaⁿ-kìⁿ ê tō-lí.

8又koh我寫新ê命令hō͘ lín，chit-ê tāi-chì tī伊是真，tī lín也是真；因為烏暗teh過，真光已經teh照。Iū-koh góa siá sin ê bēng-lēng hō͘ lín, chit ê tāi-chì tī I sī chin, tī lín iā sī chin; in-ūi o͘-àm teh kè, chin kng í-keng teh chiò.

9人若講家己tiàm tī光明，也怨恨伊ê兄弟，就伊到taⁿ是tiàm tī烏暗。Lâng nā kóng ka-kī tiàm tī kng-bêng, iā oàn-hūn i ê hiaⁿ-tī, chiū i kàu taⁿ sī tiàm tī o͘-àm.

10人若疼伊ê兄弟，伊是khiā起tī光，也tī伊無跋倒ê因由。Lâng nā thiàⁿ i ê hiaⁿ-tī, i sī khiā-khí tī kng, iā tī i bô poa̍h-tó ê in-iû.

11獨獨人若怨恨伊ê兄弟，伊是tiàm tī暗，koh行tī暗，也m̄知所去ê，因為chit-ê暗hō͘伊ê目睭chhiⁿ-mî。To̍k-to̍k lâng nā oàn-hūn i ê hiaⁿ-tī, i sī tiàm tī àm, koh kiâⁿ tī àm, iā m̄ chai só͘ khì ê, in-ūi chit ê àm hō͘ i ê ba̍k-chiu chhiⁿ-mî.

12細kiáⁿ ah，我寫phoe hō͘ lín，因為lín ê罪為tio̍h伊ê名已經赦免。Sòe-kiáⁿ ah, góa siá phoe hō͘ lín, in-ūi lín ê chōe ūi-tio̍h I ê miâ í-keng sià-bián.

13老大ah，我寫hō͘ lín，因為lín bat hit-ê tùi起頭就有ê。少年人ah，我寫hō͘ lín，因為lín已經khah贏hit-ê pháiⁿ ê。細kiáⁿ ah，我bat寫hō͘ lín，因為lín bat父。Lāu-tōa ah, góa siá hō͘ lín, in-ūi lín bat hit ê tùi khí-thâu chiū ū ê. Siàu-liân lâng ah, góa siá hō͘ lín, in-ūi lín í-keng khah-iâⁿ hit ê pháiⁿ ê. Sòe-kiáⁿ ah, góa bat siá hō͘ lín, in-ūi lín bat Pē.

14老大ah，我bat寫hō͘ lín，因為lín bat hit-ê tùi起頭就有ê。少年人ah，我bat寫hō͘ lín，因為lín勇健，也上帝ê道理tiàm tī lín，也lín已經khah贏hit-ê pháiⁿ ê。Lāu-tōa ah, góa bat siá hō͘ lín, in-ūi lín bat hit ê tùi khí-thâu chiū ū ê. Siàu-liân lâng ah, góa bat siá hō͘ lín, in-ūi lín ióng-kiāⁿ, iā Siōng-tè ê tō-lí tiàm tī lín, iā lín í-keng khah-iâⁿ hit ê pháiⁿ ê.

15莫得疼chit-ê世間，以及世間ê物。人若疼chit世間，就父ê疼無tiàm tī伊。Bo̍h-tit thiàⁿ chit ê sè-kan, í-ki̍p sè-kan ê mi̍h. Lâng nā thiàⁿ chit sè-kan, chiū Pē ê thiàⁿ bô tiàm tī i.

16因為見若tī世間ê，肉體ê私慾，kap目睭ê私慾，kap人生ê驕傲，m̄是tùi父，是tùi世間。In-ūi kìⁿ-nā tī sè-kan ê, jio̍k-thé ê su-io̍k, kap ba̍k-chiu ê su-io̍k, kap jîn-seng ê kiau-ngō͘, m̄ sī tùi Pē, sī tùi sè-kan.

17Koh世間kap伊ê私慾teh過去；獨獨行上帝ê旨意ê永遠tī-teh。Koh sè-kan kap i ê su-io̍k teh kè-khì; to̍k-to̍k kiâⁿ Siōng-tè ê chí-ì ê éng-oán tī-teh.

18細kiáⁿ ah，這是路尾ê時；親像lín bat聽見有hit-ê對敵基督ê來，現今有出chōe-chōe對敵基督ê；tùi án-ni咱知是路尾ê時。Sòe-kiáⁿ ah, che sī lō͘-bé ê sî; chhin-chhiūⁿ lín bat thiaⁿ-kìⁿ ū hit ê tùi-te̍k Ki-tok ê lâi, hiān-kim ū chhut chōe-chōe tùi-te̍k Ki-tok ê; tùi án-ni lán chai sī lō͘-bé ê sî.

19In對咱出去，獨獨m̄是屬咱ê；因為若是屬咱ê，就會長長kap咱tiàm；in出去是beh顯明in lóng m̄是屬咱ê。In tùi lán chhut-khì, to̍k-to̍k m̄ sī sio̍k lán ê; in-ūi nā sī sio̍k lán ê, chiū ōe tn̂g-tn̂g kap lán tiàm; in chhut-khì sī beh hián-bêng in lóng m̄ sī sio̍k lán ê.

20Koh lín tùi聖ê受抹油，續知一切ê tāi-chì。Koh lín tùi Sèng-ê siū boah-iû, sòa chai it-chhè ê tāi-chì.

21我phoe寫hō͘ lín，是m̄是因為lín m̄-bat真理，因為lín bat伊，也因為一切ê白賊lóng m̄是tùi真理。Góa phoe siá hō͘ lín, sī m̄ sī in-ūi lín m̄ bat chin-lí, in-ūi lín bat i, iā in-ūi it-chhè ê pe̍h-chha̍t lóng m̄ sī tùi chin-lí.

22白賊ê是是誰，kiám m̄是無認耶穌做基督ê mah？無認父kap Kiáⁿ ê，chit-ê就是hit-ê對敵基督ê。Pe̍h-chha̍t ê sī chī-chūi, kiám m̄ sī bô jīn Iâ-so͘ chòe Ki-tok ê mah? Bô jīn Pē kap Kiáⁿ ê, chit-ê chiū-sī hit ê tùi-te̍k Ki-tok ê.

23見若無認Kiáⁿ ê，也無有父；認Kiáⁿ ê，也有父。Kìⁿ-nā bô jīn Kiáⁿ ê, iā bô ū Pē; jīn Kiáⁿ ê, iā ū Pē.

24Lín tùi起頭所聽見ê，tio̍h hō͘伊長長tiàm tī lín。但是tùi起頭所聽ê tiàm tī lín，就lín也beh tiàm tī Kiáⁿ kap父。Lín tùi khí-thâu só͘ thiaⁿ-kìⁿ ê, tio̍h hō͘ i tn̂g-tn̂g tiàm tī lín. Nā sī tùi khí-thâu só͘ thiaⁿ ê tiàm tī lín, chiū lín iā beh tiàm tī Kiáⁿ kap Pē.

25Chit-ê也是伊所應允咱ê應允，就是永活。Chit ê iā sī I só͘ èng-ún lán ê èng-ún, chiū-sī éng-oa̍h.

26我寫chiah-ê hō͘ lín，是論hiah-ê迷惑lín ê。Góa siá chiah-ê hō͘ lín, sī lūn hiah ê bê-he̍k lín ê.

27Lín tùi伊所受ê抹油長長tiàm tī lín，也m̄免人教lín；獨獨因為伊ê抹油教示lín萬項事，也是真實m̄是白賊，也照伊bat教示lín ê，lín長長tiàm tī伊。Lín tùi I só͘ siū ê boah-iû tn̂g-tn̂g tiàm tī lín, iā m̄ bián lâng kà lín; to̍k-to̍k in-ūi I ê boah-iû kà-sī lín bān hāng sū, iā sī chin-si̍t m̄ sī pe̍h-chha̍t, iā chiàu i bat kà-sī lín ê, lín tn̂g-tn̂g tiàm tī I.

28Taⁿ，細kiáⁿ ah，lín tio̍h長長tiàm tī伊；án-ni，伊若顯現，chiah hō͘咱tī伊koh臨到ê時能好膽，也tī伊ê面前無見笑。Taⁿ, sòe-kiáⁿ ah, lín tio̍h tn̂g-tn̂g tiàm tī I; án-ni, I nā hián-hiān, chiah hō͘ lán tī I koh lîm-kàu ê sî ōe hó-táⁿ, iā tī I ê bīn-chêng bô kiàn-siàu.

29Lín若知伊是公義，就知見若行義ê人也是伊生ê。Lín nā chai I sī kong-gī, chiū chai kìⁿ-nā kiâⁿ gī ê lâng iā sī I siⁿ ê.

1Lín想看父疼咱到怎樣，hō͘咱稱做上帝ê kiáⁿ；咱也實在是。所以世間人m̄-bat咱，因為m̄-bat伊。Lín siūⁿ-khòaⁿ Pē thiàⁿ lán kàu cháiⁿ-iūⁿ, hō͘ lán chheng chòe Siōng-tè ê kiáⁿ; lán iā si̍t-chāi sī. Só͘-í sè-kan lâng m̄ bat lán, in-ūi m̄ bat I.

2所疼ê兄弟ah，現今咱做上帝ê kiáⁿ，將來怎樣，猶未顯明。咱知伊若顯明，咱就親像伊，因為咱beh看見伊，照伊實在ê款。Só͘ thiàⁿ ê hiaⁿ-tī ah, hiān-kim lán chòe Siōng-tè ê kiáⁿ, chiong-lâi cháiⁿ-iūⁿ, iáu-bē hián-bêng. Lán chai I nā hián-bêng, lán chiū chhin-chhiūⁿ I, in-ūi lán beh khòaⁿ-kìⁿ I, chiàu I si̍t-chāi ê khoán.

3見若靠伊chiah有chit號ǹg望ê，本身清氣親像伊是清氣。Kìⁿ-nā khò I chiah ū chit hō ǹg-bāng ê, pún-sin chheng-khì chhin-chhiūⁿ I sī chheng-khì.

4見若犯罪ê，也行不法；罪就是不法。Kìⁿ-nā hoān chōe ê, iā kiâⁿ put-hoat; chōe chiū-sī put-hoat.

5Lín也知伊bat顯現是beh除去罪；也在tī伊無罪。Lín iā chai I bat hián-hiān sī beh tû-khì chōe; iā chāi-tī I bô chōe.

6見若tòa tī伊ê無犯罪；見若犯罪ê，未bat看見伊，也m̄-bat伊。Kìⁿ-nā tòa tī I ê bô hoān chōe; kìⁿ-nā hoān chōe ê, bē bat khòaⁿ-kìⁿ I, iā m̄ bat I.

7細kiáⁿ ah，m̄-thang hō͘人迷惑lín；行義ê就是義，親像伊是義；Sòe-kiáⁿ ah, m̄ thang hō͘ lâng bê-he̍k lín; kiâⁿ gī ê chiū-sī gī, chhin-chhiūⁿ I sī gī;

8犯罪ê是tùi魔鬼出，因為魔鬼tùi起頭犯罪。上帝ê kiáⁿ所以顯現，是beh毀壞魔鬼ê所做。hoān chōe ê sī tùi Mô͘-kúi chhut, in-ūi Mô͘-kúi tùi khí-thâu hoān chōe. Siōng-tè ê Kiáⁿ só͘-í hián-hiān, sī beh húi-hoāi Mô͘-kúi ê só͘ chòe.

9見若tùi上帝生ê就無犯罪，因為伊ê種長長tiàm tī伊；伊也bōe犯罪，因為伊是tùi上帝生ê。Kìⁿ-nā tùi Siōng-tè siⁿ ê chiū bô hoān chōe, in-ūi I ê chéng tn̂g-tn̂g tiàm tī i; i iā bōe hoān chōe, in-ūi i sī tùi Siōng-tè siⁿ ê.

10上帝ê kiáⁿ兒kap魔鬼ê kiáⁿ兒tùi án-ni顯明，見若無行義kap無疼兄弟ê，m̄是tùi上帝出。Siōng-tè ê kiáⁿ-jî kap Mô͘-kúi ê kiáⁿ-jî tùi án-ni hián-bêng, kìⁿ-nā bô kiâⁿ gī kap bô thiàⁿ hiaⁿ-tī ê, m̄ sī tùi Siōng-tè chhut.

11因為lín tùi起頭所聽ê話，就是咱tio̍h相疼；In-ūi lín tùi khí-thâu só͘ thiaⁿ ê ōe, chiū-sī lán tio̍h saⁿ-thiàⁿ;

12無親像該隱是tùi hit-ê pháiⁿ-ê出，來thâi伊ê小弟。甚麼緣故thâi伊？因為伊所做是pháiⁿ，伊ê小弟所做是義。bô chhin-chhiūⁿ Kai-ún sī tùi hit ê pháiⁿ-ê chhut, lâi thâi i ê sió-tī. Sím-mi̍h iân-kò͘ thâi i? In-ūi i só͘ chòe sī pháiⁿ, i ê sió-tī só͘ chòe sī gī.

13兄弟ah，世間人若怨恨lín，m̄-thang掠做奇怪。Hiaⁿ-tī ah, sè-kan lâng nā oàn-hūn lín, m̄ thang lia̍h-chòe kî-koài.

14咱因為疼兄弟，就知咱已經出死入活。無疼ê是tiàm tī死。Lán in-ūi thiàⁿ hiaⁿ-tī, chiū chai lán í-keng chhut sí ji̍p oa̍h. Bô thiàⁿ ê sī tiàm tī sí.

15見若怨恨伊ê兄弟ê，就是thâi人ê人；lín也知見若thâi人ê，伊ê內面無永活。Kìⁿ-nā oàn-hūn i ê hiaⁿ-tī ê, chiū-sī thâi lâng ê lâng; lín iā chai kìⁿ-nā thâi lâng ê, i ê lāi-bīn bô éng-oa̍h.

16伊替咱獻伊ê性命，咱tùi chit-ê bat仁愛；咱也應該替兄弟獻性命。I thòe lán hiàn I ê sìⁿ-miā, lán tùi chit-ê bat jîn-ài; lán iā eng-kai thòe hiaⁿ-tī hiàn sìⁿ-miā.

17人若有世間ê財產，看見伊ê兄弟欠缺，也無開伊ê慈心，上帝ê疼thái-thó有tiàm tī伊ah？Lâng nā ū sè-kan ê châi-sán, khòaⁿ-kìⁿ i ê hiaⁿ-tī khiàm-kheh, iā bô khui i ê chû-sim, Siōng-tè ê thiàⁿ thái-thó ū tiàm tī i ah?

18細kiáⁿ ah，咱ê相疼m̄-thang用話，用舌；是tio̍h用行，用誠實。Sòe-kiáⁿ ah, lán ê saⁿ-thiàⁿ m̄ thang ēng ōe, ēng chi̍h; sī tio̍h ēng kiâⁿ, ēng sêng-si̍t.

19Tùi án-ni咱beh知咱是出tī真實，見若心有所責備咱，beh安慰咱ê心tī伊ê面前；Tùi án-ni lán beh chai lán sī chhut tī chin-si̍t, kìⁿ-nā sim ū só͘ chek-pī lán, beh an-ùi lán ê sim tī I ê bīn-chêng;

20因為上帝比咱ê心khah大，也無所m̄知。in-ūi Siōng-tè pí lán ê sim khah tōa, iā bô só͘ m̄ chai.

21所疼ê兄弟ah，心若無責備咱，就咱ǹg上帝有好膽；Só͘ thiàⁿ ê hiaⁿ-tī ah, sim nā bô chek-pī lán, chiū lán ǹg Siōng-tè ū hó-táⁿ;

22koh見若咱所求ê，就tùi伊得tio̍h，因為咱守伊ê命令，tī伊ê面前行伊所歡喜ê tāi-chì。koh kìⁿ-nā lán só͘ kiû ê, chiū tùi I tit-tio̍h, in-ūi lán siú I ê bēng-lēng, tī I ê bīn-chêng kiâⁿ I só͘ hoaⁿ-hí ê tāi-chì.

23也伊ê命令是án-ni，就是咱信伊ê Kiáⁿ耶穌基督ê名，koh大家相疼，照伊所hō͘咱ê命令。Iā I ê bēng-lēng sī án-ni, chiū-sī lán sìn I ê Kiáⁿ Iâ-so͘ Ki-tok ê miâ, koh tāi-ke saⁿ-thiàⁿ, chiàu I só͘ hō͘ lán ê bēng-lēng.

24守伊ê命令ê人就tiàm tī伊，伊也tiàm tī伊。咱tùi án-ni知伊tiàm tī咱，是tùi伊所hō͘咱ê神。Siú I ê bēng-lēng ê lâng chiū tiàm tī I, I iā tiàm tī i. Lán tùi án-ni chai I tiàm tī lán, sī tùi I só͘ hō͘ lán ê Sîn.