1所羅門王tī法老ê cha-bó͘-kiáⁿ以外，koh疼chōe-chōe外邦ê cha-bó͘-gín-ná，就是Mô͘-ap、A-bûn、Í-tong、Se-tùn、Hek人ê cha-bó͘-gín-ná。Só͘-lô-bûn ông tī Hoat-ló ê cha-bó͘-kiáⁿ í-gōa, koh thiàⁿ chōe-chōe gōa-pang ê cha-bó͘-gín-ná, chiū-sī Mô͘-ap, A-bûn, Í-tong, Se-tùn, Hek-lâng ê cha-bó͘-gín-ná.

2論到chiah-ê列國，耶和華bat吩咐以色列人講，Lín m̄-thang去in hia，in也m̄-thang來lín chia，因為in會hō͘ lín ê心偏歪，去tè in ê上帝；總是所羅門戀愛hiah-ê cha-bó͘-gín-ná，kap in結聯。Lūn-kàu chiah ê lia̍t-kok, Iâ-hô-hoa bat hoan-hù Í-sek-lia̍t lâng kóng, Lín m̄-thang khì in hia, in iā m̄-thang lâi lín chia, in-ūi in ōe hō͘ lín ê sim phian-oai, khì tè in ê siōng-tè; chóng-sī Só͘-lô-bûn loân-ài hiah ê cha-bó͘-gín-ná, kap in kiat-liân.

3伊有后妃七百，lóng是貴族ê；koh有嬪妃三百；chiah-ê女子誘惑伊ê心。I ū hō͘-hui chhit-pah, lóng sī kùi-cho̍k ê; koh ū pìn-hui saⁿ-pah; chiah ê lú-chú iú-he̍k i ê sim.

4因為所羅門年老ê時，伊hiah-ê bó͘誘惑伊ê心，去tè別ê上帝；伊ê心無純全ǹg耶和華伊ê上帝，親像伊ê父大衛ê心。In-ūi Só͘-lô-bûn nî-lāu ê sî, i hiah ê bó͘ iú-he̍k i ê sim, khì tè pa̍t ê siōng-tè; i ê sim bô sûn-choân ǹg Iâ-hô-hoa i ê Siōng-tè, chhin-chhiūⁿ i ê pē Tāi-pi̍t ê sim.

5所羅門去tè Se-tùn人ê女神A-su-tha-lio̍k，kap A-bûn人可惡ê物，Bí-le̍k-kong。Só͘-lô-bûn khì tè Se-tùn lâng ê lú-sîn A-su-tha-lio̍k, kap A-bûn lâng khó-ò͘ⁿ ê mi̍h, Bí-le̍k-kong.

6所羅門行耶和華所看做pháiⁿ ê事，無專心tè耶和華，親像伊ê老父大衛。Só͘-lô-bûn kiâⁿ Iâ-hô-hoa só͘ khòaⁿ-chòe pháiⁿ ê sū, bô choan-sim tè Iâ-hô-hoa, chhin-chhiūⁿ i ê lāu-pē Tāi-pi̍t.

7Hit時所羅門為tio̍h Mô͘-ap可惡ê物Ki-boa̍t，kap A-bûn人可惡ê物Mô͘-lo̍k，tī耶路撒冷頭前ê山起山頭壇。Hit-sî Só͘-lô-bûn ūi-tio̍h Mô͘-ap khó-ò͘ⁿ ê mi̍h Ki-boa̍t, kap A-bûn lâng khó-ò͘ⁿ ê mi̍h Mô͘-lo̍k, tī Iâ-lō͘-sat-léng thâu-chêng ê soaⁿ khí soaⁿ-thâu-tôaⁿ.

8Hiah-ê外邦ê bó͘ lóng燒香祭祀in ê上帝；伊也為tio̍h in照án-ni做。Hiah ê gōa-pang ê bó͘ lóng sio-hiuⁿ chè-sū in ê siōng-tè; i iā ūi-tio̍h in chiàu án-ni chòe.

9耶和華受氣所羅門，因為伊ê心離開耶和華以色列ê上帝，就是bat兩pái對伊出現；Iâ-hô-hoa siū-khì Só͘-lô-bûn, in-ūi i ê sim lī-khui Iâ-hô-hoa Í-sek-lia̍t ê Siōng-tè, chiū-sī bat nn̄g-pái tùi i chhut-hiān;

10也論到chit-ê事bat命令伊，m̄-thang tè別ê上帝。總是伊無守耶和華所命令ê。iā lūn-kàu chit ê sū bat bēng-lēng i, m̄-thang tè pa̍t ê siōng-tè. Chóng-sī i bô siú Iâ-hô-hoa só͘ bēng-lēng ê.

11所以耶和華對所羅門講，因為你已經行chit-ê事，無守我所命令你守ê約，kap我ê律例，我beh對你來拆裂你ê國，賞賜你ê奴僕。Só͘-í Iâ-hô-hoa tùi Só͘-lô-bûn kóng, In-ūi lí í-keng kiâⁿ chit ê sū, bô siú Góa só͘ bēng-lēng lí siú ê iok, kap Góa ê lu̍t-lē, Góa beh tùi lí lâi thiah-li̍h lí ê kok, siúⁿ-sù lí ê lô͘-po̍k.

12總是因為你ê老父大衛ê緣故，我無tī你活teh ê日行chit-ê事；獨獨beh對你ê kiáⁿ ê手拆裂伊。Chóng-sī in-ūi lí ê lāu-pē Tāi-pi̍t ê iân-kò͘, Góa bô tī lí oa̍h-teh ê ji̍t kiâⁿ chit ê sū; to̍k-to̍k beh tùi lí ê kiáⁿ ê chhiú thiah-li̍h i.

13總是我無將全國拆裂，beh帶tio̍h我ê奴僕大衛，kap我所揀ê耶路撒冷，iáu留一支派hō͘你ê kiáⁿ。Chóng-sī Góa bô chiong choân-kok thiah-li̍h, beh tòa-tio̍h Góa ê lô͘-po̍k Tāi-pi̍t, kap Góa só͘ kéng ê Iâ-lō͘-sat-léng, iáu lâu chi̍t chi-phài hō͘ lí ê kiáⁿ.

14耶和華興起一個對敵攻擊所羅門，就是Í-tong人Hap-ta̍t，伊是Í-tong王ê後裔。Iâ-hô-hoa heng-khí chi̍t ê tùi-te̍k kong-kek Só͘-lô-bûn, chiū-sī Í-tong lâng Hap-ta̍t, i sī Í-tong ông ê hō͘-è.

15前大衛phah Í-tong，伊ê軍長Iok-ap上去埋葬陣亡ê人，將Í-tong ê ta-po͘丁lóng thâi死。Chêng Tāi-pi̍t phah Í-tong, i ê kun-tiúⁿ Iok-ap chiūⁿ-khì bâi-chòng tīn-bông ê lâng, chiong Í-tong ê ta-po͘-teng lóng thâi-sí.

16Iok-ap kap以色列眾人tiàm hia六月日，直到將Í-tong ê ta-po͘丁一盡剪除。Iok-ap kap Í-sek-lia̍t chèng-lâng tiàm hia la̍k-ge̍h-ji̍t, ti̍t-kàu chiong Í-tong ê ta-po͘-teng it-chīn chián-tû.

17Hit時Hap-ta̍t iáu是細漢ê gín-ná。Hap-ta̍t kap伊ê老父人臣中kúi-nā ê Í-tong人，走去埃及。Hit-sî Hap-ta̍t iáu sī sòe-hàn ê gín-ná. Hap-ta̍t kap i ê lāu-pē jîn-sîn tiong kúi-nā ê Í-tong lâng, cháu-khì Ai-ki̍p.

18In tùi米甸起來，到Pa-lân；tùi Pa-lân帶kúi-nā人kap in去埃及，到埃及王法老hia。法老就用厝hō͘ in，派定tio̍h ê米糧，koh用田地hō͘ in。In tùi Bí-tiân khí-lâi, kàu Pa-lân; tùi Pa-lân tòa kúi-nā lâng kap in khì Ai-ki̍p, kàu Ai-ki̍p ông Hoat-ló hia. Hoat-ló chiū ēng chhù hō͘ in, phài tiāⁿ-tio̍h ê bí-niû, koh ēng chhân-tōe hō͘ in.

19Hap-ta̍t tī法老ê面前大得tio̍h恩惠；法老續用伊ê bó͘ ê小妹，就是王后Tap-pí-le̍k ê小妹，hō͘伊做bó͘。Hap-ta̍t tī Hoat-ló ê bīn-chêng tōa tit-tio̍h un-hūi; Hoat-ló sòa ēng i ê bó͘ ê sió-bē, chiū-sī ông-hō͘ Tap-pí-le̍k ê sió-bē, hō͘ i chòe bó͘.

20Tap-pí-le̍k ê小妹kā伊生一個kiáⁿ，名叫Ki-lô͘-poa̍t；Tap-pí-le̍k kā伊斷奶tī法老ê王宮。Ki-lô͘-poa̍t kap法老ê眾kiáⁿ相kap tiàm tī法老ê王宮。Tap-pí-le̍k ê sió-bē kā i siⁿ chi̍t ê kiáⁿ, miâ kiò Ki-lô͘-poa̍t; Tap-pí-le̍k kā i tn̄g-lin tī Hoat-ló ê ông-kiong. Ki-lô͘-poa̍t kap Hoat-ló ê chèng-kiáⁿ saⁿ-kap tiàm tī Hoat-ló ê ông-kiong.

21Hap-ta̍t tī埃及聽見大衛kap伊ê列祖相kap睏，軍長Iok-ap也已經死。Hap-ta̍t就對法老講，容允我去，hō͘我tò去本國。Hap-ta̍t tī Ai-ki̍p thiaⁿ-kìⁿ Tāi-pi̍t kap i ê lia̍t-chó͘ saⁿ-kap khùn, kun-tiúⁿ Iok-ap iā í-keng sí. Hap-ta̍t chiū tùi Hoat-ló kóng, Iông-ún góa khì, hō͘ góa tò-khì pún-kok.

22法老kā伊講，你tī我chia有甚麼欠缺，你竟然ài beh tò去本國ah？伊應講，我無欠缺甚麼；總是容允我tò去。Hoat-ló kā i kóng, Lí tī góa chia ū sím-mi̍h khiàm-kheh, lí kéng-jiân ài beh tò-khì pún-kok ah? I ìn kóng, Góa bô khiàm-kheh sím-mi̍h; chóng-sī iông-ún góa tò-khì.

23上帝koh興起一個對敵攻擊所羅門，就是Í-lī-a-tāi ê kiáⁿ Lī-sùn，是對伊ê主Só-pa王Hap-tāi-tí-siā hia逃走來ê。Siōng-tè koh heng-khí chi̍t ê tùi-te̍k kong-kek Só͘-lô-bûn, chiū-sī Í-lī-a-tāi ê kiáⁿ Lī-sùn, sī tùi i ê chú Só-pa ông Hap-tāi-tí-siā hia tô-cháu lâi ê.

24大衛thâi Só-pa人ê時，Lī-sùn招集人óa伊，做hit黨ê頭；去大馬色，tiàm tī-hia，tī大馬色做王。Tāi-pi̍t thâi Só-pa lâng ê sî, Lī-sùn chio-chi̍p lâng óa i, chòe hit-tóng ê thâu; khì Tāi-má-sek, tiàm tī-hia, tī Tāi-má-sek chòe ông.

25所羅門活teh ê時，Hap-ta̍t做災害以外，Lī-sùn也做以色列ê對敵；伊怨恨以色列；也做A-lân人ê王。Só͘-lô-bûn oa̍h-teh ê sî, Hap-ta̍t chòe chai-hāi í-gōa, Lī-sùn iā chòe Í-sek-lia̍t ê tùi-te̍k; i oàn-hūn Í-sek-lia̍t; iā chòe A-lân lâng ê ông.

26Nî-pat ê kiáⁿ Iâ-lô-phò-àm是Í-hoat-liân族，Sé-lī-ta̍t人，伊是所羅門ê奴僕，也起手攻擊王；伊ê老母是守寡人，名叫Sé-ló͘-a。Nî-pat ê kiáⁿ Iâ-lô-phò-àm sī Í-hoat-liân cho̍k, Sé-lī-ta̍t lâng, i sī Só͘-lô-bûn ê lô͘-po̍k, iā khí-chhiú kong-kek ông; i ê lāu-bú sī chiú-kóaⁿ lâng, miâ kiò Sé-ló͘-a.

27I起手攻擊王ê緣故照下底所記ê；所羅門起Bí-lô，修補伊ê老父大衛城ê破隙。I khí-chhiú kong-kek ông ê iân-kò͘ chiàu ē-tóe só͘ kì ê; Só͘-lô-bûn khí Bí-lô, siu-pó͘ i ê lāu-pē Tāi-pi̍t siâⁿ ê phòa-khiah.

28Iâ-lô-phò-àm是大勇士；所羅門看見chit-ê少年人慇勤，就派伊管理約瑟ê家一切ê工。Iâ-lô-phò-àm sī tōa ióng-sū; Só͘-lô-bûn khòaⁿ-kìⁿ chit ê siàu-liân lâng un-khûn, chiū phài i koán-lí Iok-sek ê ke it-chhè ê kang.

29Hit時Iâ-lô-phò-àm tùi耶路撒冷出來，Sī-lô人先知A-hi-ngá tī路裡tú-tio̍h伊，hit時伊有穿一領新衫；in兩人tī田裡，以外無別人。Hit-sî Iâ-lô-phò-àm tùi Iâ-lō͘-sat-léng chhut-lâi, Sī-lô lâng sian-ti A-hi-ngá tī lō͘--nih tú-tio̍h i, hit-sî i ū chhēng chi̍t niá sin saⁿ; in nn̄g-lâng tī chhân--nih, í-gōa bô pa̍t-lâng.

30A-hi-ngá the̍h伊所穿ê新衫，拆做十二塊；A-hi-ngá the̍h i só͘ chhēng ê sin saⁿ, thiah chòe cha̍p-jī tè;

31kā Iâ-lô-phò-àm講，你thang the̍h十塊，因為耶和華以色列ê上帝án-ni講，看ah，我beh tùi所羅門ê手拆裂伊ê國，將十支派hō͘你。kā Iâ-lô-phò-àm kóng, Lí thang the̍h cha̍p tè, in-ūi Iâ-hô-hoa Í-sek-lia̍t ê Siōng-tè án-ni kóng, Khòaⁿ ah, Góa beh tùi Só͘-lô-bûn ê chhiú thiah-li̍h i ê kok, chiong cha̍p chi-phài hō͘ lí.

32(獨獨因為我ê奴僕大衛ê緣故，kap我tī以色列眾支派中所揀ê耶路撒冷ê緣故，伊iáu有一支派)。(To̍k-to̍k in-ūi Góa ê lô͘-po̍k Tāi-pi̍t ê iân-kò͘, kap Góa tī Í-sek-lia̍t chèng chi-phài tiong só͘ kéng ê Iâ-lō͘-sat-léng ê iân-kò͘, i iáu ū chi̍t chi-phài).

33因為in棄sak我，去敬拜Se-tùn人ê上帝A-su-tha-lio̍k，Mô͘-ap ê上帝 Ki-boa̍t，kap A-bûn人ê上帝 Bí-le̍k-kong，無行我ê道路，做我看做正直ê事，守我ê律例法度，親像伊ê老父大衛ê所做。In-ūi in khì-sak Góa, khì kèng-pài Se-tùn lâng ê siōng-tè A-su-tha-lio̍k, Mô͘-ap ê siōng-tè Ki-boa̍t, kap A-bûn lâng ê siōng-tè Bí-le̍k-kong, bô kiâⁿ Góa ê tō-lō͘, chòe Góa khòaⁿ-chòe chèng-ti̍t ê sū, siú Góa ê lu̍t-lē hoat-tō͘, chhin-chhiūⁿ i ê lāu-pē Tāi-pi̍t ê só͘-chòe.

34總是我無beh對伊ê手搶伊ê全國，是beh hō͘伊一世人做君王，是因為我ê奴僕大衛ê緣故，因為伊是我所揀選ê，有守我ê律例kap法度。Chóng-sī Góa bô beh tùi i ê chhiú chhiúⁿ i ê choân-kok, sī beh hō͘ i chi̍t-sì-lâng chòe kun-ông, sī in-ūi Góa ê lô͘-po̍k Tāi-pi̍t ê iân-kò͘, in-ūi i sī Góa só͘ kéng-soán ê, ū siú Góa ê lu̍t-lē kap hoat-tō͘.

35總是我beh對伊ê kiáⁿ ê手搶伊ê國，用十支派hō͘你；Chóng-sī Góa beh tùi i ê kiáⁿ ê chhiú chhiúⁿ i ê kok, ēng cha̍p chi-phài hō͘ lí;

36用一支派hō͘伊ê kiáⁿ，hō͘我ê奴僕大衛，tī我ê面前，常常有一pha 燈tī耶路撒冷，就是我所揀，thang tī-hia安置我ê名ê城。ēng chi̍t chi-phài hō͘ i ê kiáⁿ, hō͘ Góa ê lô͘-po̍k Tāi-pi̍t, tī Góa ê bīn-chêng, siông-siông ū chi̍t pha teng tī Iâ-lō͘-sat-léng, chiū-sī Góa só͘ kéng, thang tī-hia an-tì Góa ê miâ ê siâⁿ.

37我beh取你，你beh做以色列ê王，照你ê心一切所ài ê來管理。Góa beh chhú lí, lí beh chòe Í-sek-lia̍t ê ông, chiàu lí ê sim it-chhè só͘ ài ê lâi koán-lí.

38你若聽我一切所命令你ê，行我ê道路，做我看做正直ê事，守我ê律例法度，親像我ê奴僕大衛ê所做，我就kap你tī-teh，kā你建立堅固ê家，親像我kā大衛所建立ê一樣；koh beh將以色列交hō͘你。Lí nā thiaⁿ Góa it-chhè só͘ bēng-lēng lí ê, kiâⁿ Góa ê tō-lō͘, chòe Góa khòaⁿ-chòe chèng-ti̍t ê sū, siú Góa ê lu̍t-lē hoat-tō͘, chhin-chhiūⁿ Góa ê lô͘-po̍k Tāi-pi̍t ê só͘ chòe, Góa chiū kap lí tī-teh, kā lí kiàn-li̍p kian-kò͘ ê ke, chhin-chhiūⁿ Góa kā Tāi-pi̍t só͘ kiàn-li̍p-ê chi̍t-iūⁿ; koh beh chiong Í-sek-lia̍t kau hō͘ lí.

39因為這我beh困苦大衛ê後裔；總是無夠永遠。In-ūi che Góa beh khùn-khó͘ Tāi-pi̍t ê hō͘-è; chóng-sī bô kàu éng-oán.

40為tio̍h án-ni，所羅門ài beh thâi死Iâ-lô-phò-àm；Iâ-lô-phò-àm就起來逃走去埃及，到埃及王Sī-sat hia；就tiàm tī埃及到所羅門死。Ūi-tio̍h án-ni, Só͘-lô-bûn ài beh thâi-sí Iâ-lô-phò-àm; Iâ-lô-phò-àm chiū khí-lâi tô-cháu khì Ai-ki̍p, kàu Ai-ki̍p ông Sī-sat hia; chiū tiàm tī Ai-ki̍p kàu Só͘-lô-bûn sí.

41所羅門其餘ê事，見伊所行ê，kap伊ê智慧，kiám無lóng記tī所羅門ê行傳？Só͘-lô-bûn kî-û ê sū, kìⁿ i só͘ kiâⁿ ê, kap i ê tì-hūi, kiám bô lóng kì tī Só͘-lô-bûn ê hēng(**hêng)-toān?

42所羅門tī耶路撒冷做以色列全國ê王，共四十年。Só͘-lô-bûn tī Iâ-lō͘-sat-léng chòe Í-sek-lia̍t choân-kok ê ông, kiōng sì-cha̍p nî.

43所羅門kap伊ê列祖相kap睏，埋葬tī伊ê老父大衛ê城。伊ê kiáⁿ Lô-phò-àm續接伊做王。Só͘-lô-bûn kap i ê lia̍t-chó͘ saⁿ-kap khùn, bâi-chòng tī i ê lāu-pē Tāi-pi̍t ê siâⁿ. I ê kiáⁿ Lô-phò-àm sòa-chiap i chòe ông.

1Lô-phò-àm去示劍，因為以色列眾人到示劍，beh設立伊做王。Lô-phò-àm khì Sī-kiàm, in-ūi Í-sek-lia̍t chèng-lâng kàu Sī-kiàm, beh siat-li̍p i chòe-ông.

2前Nî-pat ê kiáⁿ Iâ-lô-phò-àm閃避所羅門王ê面，走去埃及，tiàm tī-hia。Iâ-lô-phò-àm iáu tī埃及ê時，聽見chit-ê事。Chêng Nî-pat ê kiáⁿ Iâ-lô-phò-àm siám-pī Só͘-lô-bûn ông ê bīn, cháu-khì Ai-ki̍p, tiàm tī-hia. Iâ-lô-phò-àm iáu tī Ai-ki̍p ê sî, thiaⁿ-kìⁿ chit ê sū.

3In差人去叫伊來；Iâ-lô-phò-àm就kap以色列全會來見Lô-phò-àm，kā伊講，In chhe lâng khì kiò i lâi; Iâ-lô-phò-àm chiū kap Í-sek-lia̍t choân-hōe lâi kìⁿ Lô-phò-àm, kā i kóng,

4你ê老父hō͘阮背艱苦ê擔；你ê老父所hē tī阮ê苦工，kap重ê擔，求你減輕，阮就服事你。Lí ê lāu-pē hō͘ goán pē kan-khó͘ ê taⁿ; lí ê lāu-pē só͘ hē tī goán ê khó͘-kang, kap tāng ê taⁿ, kiû lí kiám-khin, goán chiū ho̍k-sāi lí.

5Lô-phò-àm kā in講，Lín tò去，到第三日koh來見我；百姓就去。Lô-phò-àm kā in kóng, Lín tò-khì, kàu tē-saⁿ ji̍t koh lâi kìⁿ góa; peh-sìⁿ chiū khì.

6Lô-phò-àm ê老父所羅門活teh ê時，有跟隨tī伊面前ê老人。Lô-phò-àm王kap in議論，講，Lín有甚麼計策，我thang回覆chit-ê百姓？Lô-phò-àm ê lāu-pē Só͘-lô-bûn oa̍h-teh ê sî, ū kun-sûi tī i bīn-chêng ê lāu-lâng. Lô-phò-àm ông kap in gī-lūn, kóng, Lín ū sím-mi̍h kè-chhek, góa thang hê-hok chit ê peh-sìⁿ?

7In應伊講，今á日你若願做chiah-ê百姓ê奴僕，來服事in，用好話來應in，in就永遠做你ê奴僕。In ìn i kóng, Kin-á-ji̍t lí nā goān chòe chiah ê peh-sìⁿ ê lô͘-po̍k, lâi ho̍k-sāi in, ēng hó-ōe lâi ìn in, in chiū éng-oán chòe lí ê lô͘-po̍k.

8總是伊拒絕老人所hō͘伊ê計策，kap hiah-ê khiā tī伊面前，kap伊平ûn ê少年人，參詳；Chóng-sī i kū-choa̍t lāu-lâng só͘ hō͘ i ê kè-chhek, kap hiah-ê khiā tī i bīn-chêng, kap i pîⁿ-ûn ê siàu-liân lâng, chham-siông;

9kā in講，chit-ê百姓有對我講，你ê老父hē tī阮ê擔，求你hō͘阮khah輕；taⁿ lín有甚麼計策hō͘咱thang回復in？kā in kóng, Chit ê peh-sìⁿ ū tùi góa kóng, Lí ê lāu-pē hē tī goán ê taⁿ, kiû lí hō͘ goán khah-khin; taⁿ lín ū sím-mi̍h kè-chhek hō͘ lán thang hê-hok in?

10Hiah-ê kap伊平ûn ê少年人講，chit-ê百姓對你講，你ê老父hō͘阮背重ê擔，求你kā阮減輕；你tio̍h án-ni 應in講，我ê尾指khah大我ê老父ê腰。Hiah ê kap i pîⁿ-ûn ê siàu-liân lâng kóng, Chit ê peh-sìⁿ tùi lí kóng, Lí ê lāu-pē hō͘ goán pē tāng ê taⁿ, kiû lí kā goán kiám-khin; lí tio̍h án-ni ìn in kóng, Góa ê bé-cháiⁿ khah-tōa góa ê lāu-pē ê io.

11我ê老父hō͘ lín背重ê擔，我beh加添lín ê擔；我ê老父用鞭警戒lín，我beh用蠍á蟲警戒lín。Góa ê lāu-pē hō͘ lín pē tāng ê taⁿ, góa beh ke-thiⁿ lín ê taⁿ; góa ê lāu-pē ēng piⁿ kéng-kài lín, góa beh ēng giat-á-thâng kéng-kài lín.

12第三日Iâ-lô-phò-àm kap眾百姓到Lô-phò-am3hia。照王所命令講，第三日koh來我chia。Tē-saⁿ ji̍t Iâ-lô-phò-àm kap chèng peh-sìⁿ kàu Lô-phò-àm hia. chiàu ông só͘ bēng-lēng kóng, Tē-saⁿ ji̍t koh lâi góa chia.

13王用pháiⁿ聲sàu應百姓，放sak老人所獻ê計策；Ông ēng pháiⁿ siaⁿ-sàu ìn peh-sìⁿ, pàng-sak lāu-lâng só͘ hiàn ê kè-chhek;

14照少年人ê計策對百姓講，我ê父hō͘ lín背重ê擔，我beh加添lín ê擔；我ê父用鞭警戒lín，我beh用蠍á蟲警戒lín。chiàu siàu-liân lâng ê kè-chhek tùi peh-sìⁿ kóng, Góa ê pē hō͘ lín pē tāng ê taⁿ, góa beh ke-thiⁿ lín ê taⁿ; góa ê pē ēng piⁿ kéng-kài lín, góa beh ēng giat-á-thâng kéng-kài lín.

15王無聽thàn百姓；因為chit-ê tāi-chì是出tī耶和華，是beh應驗耶和華託Sī-lô人A-hi-ngá對Nî-pat ê kiáⁿ Iâ-lô-phò-àm所講ê話。Ông bô thiaⁿ-thàn peh-sìⁿ; in-ūi chit ê tāi-chì sī chhut tī Iâ-hô-hoa, sī beh èng-giām Iâ-hô-hoa thok Sī-lô lâng A-hi-ngá tùi Nî-pat ê kiáⁿ Iâ-lô-phò-àm só͘ kóng ê ōe.

16以色列眾百姓看見王無聽thàn in，百姓就對王講，阮tī大衛有甚麼份額ah？阮kap耶西ê kiáⁿ無干涉；以色列ah，tò去lín ê布棚；大衛ah，tio̍h顧你家己ê厝。Tùi án-ni，以色列tò去in ê布棚。Í-sek-lia̍t chèng peh-sìⁿ khòaⁿ-kìⁿ ông bô thiaⁿ-thàn in, peh-sìⁿ chiū tùi ông kóng, Goán tī Tāi-pi̍t ū sím-mi̍h hūn-gia̍h ah? goán kap Iâ-se ê kiáⁿ bô kan-sia̍p; Í-sek-lia̍t ah, tò-khì lín ê pò͘-pîⁿ; Tāi-pi̍t ah, tio̍h kò͘ lí ka-kī ê chhù. Tùi án-ni Í-sek-lia̍t tò-khì in ê pò͘-pîⁿ.

17總是khiā起猶大chiah-ê城ê以色列人，Lô-phò-àm猶原做in ê王。Chóng-sī khiā-khí Iû-tāi chiah ê siâⁿ ê Í-sek-lia̍t lâng, Lô-phò-àm iû-goân chòe in ê ông.

18Lô-phò-àm王差管理做苦工ê人A-to-lân去；以色列眾人就用石頭tìm死伊。Lô-phò-àm王就趕緊上車，beh走去耶路撒冷。Lô-phò-àm ông chhe koán-lí chòe-khó͘-kang ê lâng A-to-lân khì; Í-sek-lia̍t chèng-lâng chiū ēng chio̍h-thâu tìm-sí i. Lô-phò-àm ông chiū kóaⁿ-kín chiūⁿ chhia, beh cháu-khì Iâ-lō͘-sat-léng.

19Tùi án-ni，以色列反叛大衛家，到今á日。Tùi án-ni Í-sek-lia̍t hoán-poān Tāi-pi̍t ke, kàu kin-á-ji̍t.

20以色列眾人聽見Iâ-lô-phò-àm tò來，就差人請伊到會眾ê面前，設立伊做以色列眾人ê王。猶大支派以外，無人tè大衛ê家。Í-sek-lia̍t chèng-lâng thiaⁿ-kìⁿ Iâ-lô-phò-àm tò-lâi, chiū chhe lâng chhiáⁿ i kàu hōe-chiòng ê bīn-chêng, siat-li̍p i chòe Í-sek-lia̍t chèng-lâng ê ông. Iû-tāi chi-phài í-gōa, bô lâng tè Tāi-pi̍t ê ke.

21Lô-phò-àm到耶路撒冷ê時，就聚集猶大全家，kap便雅憫支派ê人，共十八萬人，lóng是過揀ê戰士，beh kap以色列ke交戰，hō͘國位koh歸tī所羅門ê kiáⁿ Lô-phò-àm。Lô-phò-àm kàu Iâ-lō͘-sat-léng ê sî, chiū chū-chi̍p Iû-tāi choân-ke, kap Piān-ngá-bín chi-phài ê lâng, kiōng cha̍p-poeh-bān lâng, lóng sī kè-kéng ê chiàn-sū, beh kap Í-sek-lia̍t ke kau-chiàn, hō͘ kok-ūi koh kui tī Só͘-lô-bûn ê kiáⁿ Lô-phò-àm.

22總是上帝ê話臨到上帝ê奴僕Sī-má-ngá，講，Chóng-sī Siōng-tè ê ōe lîm-kàu Siōng-tè ê lô͘-po̍k Sī-má-ngá, kóng,

23你去kā所羅門ê kiáⁿ，猶大王Lô-phò-àm，kap猶大便雅憫全家，以及其餘ê百姓講，Lí khì kā Só͘-lô-bûn ê kiáⁿ, Iû-tāi ông Lô-phò-àm, kap Iû-tāi Piān-ngá-bín choân-ke, í-ki̍p kî-û ê peh-sìⁿ kóng,

24耶和華án-ni講，Lín莫得上去，莫得kap lín ê兄弟以色列人交戰；ta̍k人tò去伊ê家；因為chit-ê tāi-chì出tī我。In聽耶和華ê話，就倒tńg去，照耶和華ê話。Iâ-hô-hoa án-ni kóng, Lín bo̍h-tit chiūⁿ--khì, bo̍h-tit kap lín ê hiaⁿ-tī Í-sek-lia̍t lâng kau-chiàn; ta̍k-lâng tò-khì i ê ke; in-ūi chit ê tāi-chì chhut tī Góa. In thiaⁿ Iâ-hô-hoa ê ōe, chiū tò-tńg-khì, chiàu Iâ-hô-hoa ê ōe.

25Iâ-lô-phò-àm tī Í-hoat-liân山地起造示劍，就tiàm tī hit中間；koh tùi hia出去，起Pí-lô͘-i-le̍k。Iâ-lô-phò-àm tī Í-hoat-liân soaⁿ-tōe khí-chō Sī-kiàm, chiū tiàm tī hit tiong-kan; koh tùi hia chhut-khì, khí Pí-lô͘-i-le̍k.

26Iâ-lô-phò-àm心內講，Taⁿ chit-ê國beh歸大衛ê家；chit-ê百姓若上去耶路撒冷，tī耶和華ê殿獻祭，chit-ê百姓ê心beh歸 in ê主猶大王Lô-phò-àm；in beh thâi死我，猶原歸猶大王Lô-phò-àm。Iâ-lô-phò-àm sim-lāi kóng, Taⁿ chit ê kok beh kui Tāi-pi̍t ê ke; chit ê peh-sìⁿ nā chiūⁿ-khì Iâ-lō͘-sat-léng, tī Iâ-hô-hoa ê tiān hiàn-chè, chit ê peh-sìⁿ ê sim beh kui in ê chú Iû-tāi ông Lô-phò-àm; in beh thâi-sí góa, iû-goân kui Iû-tāi ông Lô-phò-àm.

28王就計畫，鑄造兩隻金ê牛á，對眾百姓講，Lín上去耶路撒冷，實在為難；以色列ah，看ah，chiah-ê是lín ê上帝，chhōa lín tùi埃及地上來ê。Ông chiū kè-e̍k, chù-chō nn̄g chiah kim ê gû-á, tùi chèng peh-sìⁿ kóng, Lín chiūⁿ-khì Iâ-lō͘-sat-léng, si̍t-chāi ûi-lân; Í-sek-lia̍t ah, khòaⁿ ah, chiah-ê sī lín ê Siōng-tè, chhōa lín tùi Ai-ki̍p tōe chiūⁿ-lâi-ê.

29伊hē一隻tī Pek-te̍k-lī，hē一隻tī Tàn。I hē chi̍t-chiah tī Pek-te̍k-lī, hē chi̍t-chiah tī Tàn.

30Chit-ê tāi-chì成做罪；因為百姓去Tàn，tī hit隻ê頭前拜。Chit ê tāi-chì chiâⁿ-chòe chōe; in-ūi peh-sìⁿ khì Tàn, tī hit chiah ê thâu-chêng pài.

31王tī山頭起廟；tùi百姓中無屬利未族ê，設立伊做祭司。Ông tī soaⁿ-thâu khí biō; tùi peh-sìⁿ tiong bô sio̍k Lī-bī cho̍k-ê, siat-li̍p i chòe chè-si.

32Iâ-lô-phò-àm定tio̍h八月，hit月ê十五，設節期，親像猶大ê節期一樣；tī壇頂獻祭；tī Pek-te̍k-lī也是án-ni做，獻祭tī伊所鑄ê牛á；koh將伊所起造山頭壇ê祭司，安置tī Pek-te̍k-lī。Iâ-lô-phò-àm tiāⁿ-tio̍h poeh-ge̍h, hit-ge̍h ê cha̍p-gō͘, siat choeh-kî, chhin-chhiūⁿ Iû-tāi ê choeh-kî chi̍t-iūⁿ; tī tôaⁿ-téng hiàn-chè; tī Pek-te̍k-lī iā sī án-ni chòe, hiàn-chè tī i só͘ chù ê gû-á; koh chiong i só͘ khí-chō soaⁿ-thâu-tôaⁿ ê chè-si, an-tì tī Pek-te̍k-lī.

33伊tī八月十五日，就是伊ê心私khia所定tio̍h ê月，獻祭tī伊tī Pek-te̍k-lī所起ê壇；kā以色列人設節期，獻祭tī壇裡，koh燒香。I tī poeh-ge̍h cha̍p-gō͘ ji̍t, chiū-sī i ê sim su-khia só͘ tiāⁿ-tio̍h ê ge̍h, hiàn-chè tī i tī Pek-te̍k-lī só͘ khí ê tôaⁿ; kā Í-sek-lia̍t lâng siat choeh-kî, hiàn-chè tī tôaⁿ--nih, koh sio-hiuⁿ.

1Hit時有一個上帝ê奴僕，thàn耶和華ê話，tùi猶大來到Pek-te̍k-lī；Iâ-lô-phò-àm tú-á khiā tī壇邊，beh燒香。Hit-sî ū chi̍t ê Siōng-tè ê lô͘-po̍k, thàn Iâ-hô-hoa ê ōe, tùi Iû-tāi lâi kàu Pek-te̍k-lī; Iâ-lô-phò-àm tú-á khiā tī tôaⁿ-piⁿ, beh sio hiuⁿ.

2伊thàn耶和華ê話，攻擊hit-ê壇，叫講，壇ah，壇ah，耶和華án-ni講，看ah，beh有一個kiáⁿ出世tī大衛ê家，名叫約西亞，伊beh將山頭壇ê祭司，就是tī你ê頂面燒香ê，獻tī你ê頂面；in也beh將人ê骨頭燒tī你ê頂面。I thàn Iâ-hô-hoa ê ōe, kong-kek hit ê tôaⁿ, kiò kóng, Tôaⁿ ah, tôaⁿ ah, Iâ-hô-hoa án-ni kóng, Khòaⁿ ah, beh ū chi̍t ê kiáⁿ chhut-sì tī Tāi-pi̍t ê ke, miâ kiò Iok-se-a, i beh chiong soaⁿ-thâu-tôaⁿ ê chè-si, chiū-sī tī lí ê téng-bīn sio-hiuⁿ-ê, hiàn tī lí ê téng-bīn; in iā beh chiong lâng ê kut-thâu sio tī lí ê téng-bīn.

3Siâng hit日，伊也出一個兆頭，講，看ah，chit-ê壇beh破裂，壇頂ê火灰beh piàⁿ落去；chit-ê就是耶和華所講ê兆頭。Siâng hit-ji̍t i iā chhut chi̍t ê tiāu-thâu, kóng, Khòaⁿ ah, chit ê tôaⁿ beh phòa-li̍h, tôaⁿ-téng ê hé-hu beh piàⁿ--lo̍h-khì; chit-ê chiū-sī Iâ-hô-hoa só͘ kóng ê tiāu-thâu.

4王聽見上帝ê奴僕攻擊Pek-te̍k-lī ê壇所叫ê話，Iâ-lô-phò-àm就tùi壇頂伸手，講，Tio̍h掠伊。伊所伸beh掠伊ê手就枯焦，bōe能kiu 倒tńg；Ông thiaⁿ-kìⁿ Siōng-tè ê lô͘-po̍k kong-kek Pek-te̍k-lī ê tôaⁿ só͘ kiò ê ōe, Iâ-lô-phò-àm chiū tùi tôaⁿ-téng chhun chhiú, kóng, Tio̍h lia̍h i. I só͘ chhun beh lia̍h i ê chhiú chiū ko͘-tâ, bōe-ōe kiu tò-tńg;

5壇就破裂，壇頂ê火灰也piàⁿ落來，照上帝ê奴僕thàn耶和華ê話所出ê兆頭。tôaⁿ chiū phòa-li̍h, tôaⁿ-téng ê hé-hu iā piàⁿ--lo̍h-lâi, chiàu Siōng-tè ê lô͘-po̍k thàn Iâ-hô-hoa ê ōe só͘ chhut ê tiāu-thâu.

6王應上帝ê奴僕講，請你求耶和華你上帝ê恩，替我祈禱，hō͘我ê手復原。Tùi án-ni，上帝ê奴僕祈禱耶和華，王ê手就復原，照起頭ê款。Ông ìn Siōng-tè ê lô͘-po̍k kóng, Chhiáⁿ lí kiû Iâ-hô-hoa lí Siōng-tè ê un, thòe góa kî-tó, hō͘ góa ê chhiú ho̍k-goân. Tùi án-ni, Siōng-tè ê lô͘-po̍k kî-tó Iâ-hô-hoa, ông ê chhiú chiū ho̍k-goân, chiàu khí-thâu ê khoán.

7王kā上帝ê奴僕講，請你kap我tò去阮tau，食點心；我也beh用物送你。Ông kā Siōng-tè ê lô͘-po̍k kóng, Chhiáⁿ lí kap góa tò-khì goán tau, chia̍h tiám-sim; góa iā beh ēng mi̍h sàng lí.

8上帝ê奴僕kā王講，你就若用你王宮ê一半hō͘我，我也m̄ kap你去，也m̄ tī chit所在食餅lim水。Siōng-tè ê lô͘-po̍k kā ông kóng, Lí chiū nā ēng lí ông-kiong ê chi̍t-pòaⁿ hō͘ góa, góa iā m̄ kap lí khì, iā m̄ tī chit só͘-chāi chia̍h-piáⁿ lim-chúi.

9因為耶和華ê話án-ni吩咐我講，你m̄-thang食餅，m̄-thang lim水，也m̄-thang對你ê原路tò來。In-ūi Iâ-hô-hoa ê ōe án-ni hoan-hù góa kóng, Lí m̄-thang chia̍h-piáⁿ, m̄-thang lim-chúi, iā m̄-thang tùi lí ê goân-lō͘ tò-lâi.

10伊就tùi別條路去，無tùi來Pek-te̍k-lī hit條tò去。I chiū tùi pa̍t-tiâu lō͘ khì, bô tùi lâi Pek-te̍k-lī hit-tiâu tò-khì.

11有一個老先知tiàm tī Pek-te̍k-lī，伊ê kiáⁿ到，用上帝ê奴僕當日tī Pek-te̍k-lī所行ê kā伊講，kap對王所講一切ê話，lóng kā老父講。Ū chi̍t ê lāu sian-ti tiàm tī Pek-te̍k-lī, i ê kiáⁿ kàu, ēng Siōng-tè ê lô͘-po̍k tng-ji̍t tī Pek-te̍k-lī só͘-kiâⁿ-ê kā i kóng, kap tùi ông só͘ kóng it-chhè ê ōe, lóng kā lāu-pē kóng.

12老父對in講，伊tùi toh落一條路去。因為伊ê kiáⁿ bat看見tùi猶大來上帝ê奴僕所去ê路。Lāu-pē tùi in kóng, I tùi toh-lo̍h chi̍t tiâu lō͘ khì. In-ūi i ê kiáⁿ bat khòaⁿ-kìⁿ tùi Iû-tāi lâi Siōng-tè ê lô͘-po̍k só͘ khì ê lō͘.

13伊就吩咐伊ê kiáⁿ講，Lín kā我備辦驢。In備辦驢好，伊就騎伊；I chiū hoan-hù i ê kiáⁿ kóng, Lín kā góa pī-pān lû. In pī-pān lû hó, i chiū khiâ i;

14去jip上帝ê奴僕，tú-tio̍h伊坐tī橡樹腳；就問伊講，你是tùi猶大來上帝ê奴僕á m̄是？伊講，我就是。khì jip Siōng-tè ê lô͘-po̍k, tú-tio̍h i chē tī siōng-chhiū kha; chiū mn̄g i kóng, Lí sī tùi Iû-tāi lâi Siōng-tè ê lô͘-po̍k á m̄-sī? I kóng, Góa chiū-sī.

15伊就kā伊講，請你kap我tò去阮tau食餅。I chiū kā i kóng, Chhiáⁿ lí kap góa tò-khì goán tau chia̍h-piáⁿ.

16伊就講，我bōe會kap你tò去，bōe會入你ê家，也bōe會tī chit所在kap你食餅lim水。I chiū kóng, Góa bōe-ōe kap lí tò-khì, bōe-ōe ji̍p lí ê ke, iā bōe-ōe tī chit só͘-chāi kap lí chia̍h-piáⁿ lim-chúi.

17因為耶和華ê話án-ni kā我講，你tī-hia m̄-thang食餅，m̄-thang lim水，也m̄-thang tùi你去ê路tò來。In-ūi Iâ-hô-hoa ê ōe án-ni kā góa kóng, Lí tī-hia m̄-thang chia̍h-piáⁿ, m̄-thang lim-chúi, iā m̄-thang tùi lí khì ê lō͘ tò-lâi.

18伊就kā伊講，我也是先知，kap你一樣；有天使用耶和華ê話kā我講，你chhōa伊kap你tò去你ê厝，hō͘伊食餅lim水。這lóng是騙伊。I chiū kā i kóng, Góa iā sī sian-ti, kap lí chi̍t-iūⁿ; ū thiⁿ-sài ēng Iâ-hô-hoa ê ōe kā góa kóng, Lí chhōa i kap lí tò-khì lí ê chhù, hō͘ i chia̍h-piáⁿ lim-chúi. Che lóng sī phiàn i.

19伊就kap伊tò去，tī伊ê家食餅lim水。I chiū kap i tò-khì, tī i ê ke chia̍h-piáⁿ lim-chúi.

20兩人坐桌ê時，耶和華ê話臨到hit-ê chhōa伊tò來ê先知。Nn̄g-lâng chē-toh ê sî, Iâ-hô-hoa ê ōe lîm-kàu hit ê chhōa i tò-lâi ê sian-ti.

21伊就叫hit-ê tùi猶大來上帝ê奴僕講，耶和華án-ni講，因為你違背耶和華ê話，無守耶和華你上帝所命令你ê命令，I chiū kiò hit ê tùi Iû-tāi lâi Siōng-tè ê lô͘-po̍k kóng, Iâ-hô-hoa án-ni kóng, In-ūi lí ûi-pōe Iâ-hô-hoa ê ōe, bô siú Iâ-hô-hoa lí Siōng-tè só͘ bēng-lēng lí ê bēng-lēng,

22就tò來食餅lim水tī伊所吩咐你講，Tī-hia m̄-thang食餅m̄-thang lim水ê所在，所以你ê身屍bōe-thang入你列祖ê墓。chiū tò-lâi chia̍h-piáⁿ lim-chúi tī I só͘ hoan-hù lí kóng, Tī-hia m̄-thang chia̍h-piáⁿ m̄-thang lim-chúi ê só͘-chāi, só͘-í lí ê sin-si bōe thang ji̍p lí lia̍t-chó͘ ê bōng.

23食餅lim水了後，伊就kā伊所tòa tò來ê先知備辦驢。Chia̍h-piáⁿ lim-chúi liáu-āu, i chiū kā i só͘ tòa tò-lâi ê sian-ti pī-pān lû.

24伊去了，tī路裡有一隻獅tú-tio̍h就咬死伊；身屍放tī路裡，驢khiā tī伊ê身邊，獅也khiā tī伊ê身屍ê身邊。I khì-liáu, tī lō͘--nih ū chi̍t chiah sai tú-tio̍h chiū kā-sí i; sin-si pàng tī lō͘--nih, lû khiā tī i ê sin-piⁿ, sai iā khiā tī i ê sin-si ê sin-piⁿ.

25有人tùi hia經過，看見身屍放tī路裡，獅也khiā tī身屍ê邊頭，就來老先知所tiàm ê城，講起chit-ê事。Ū lâng tùi hia keng-kè, khòaⁿ-kìⁿ sin-si pàng tī lō͘--nih, sai iā khiā tī sin-si ê piⁿ-thâu, chiū lâi lāu sian-ti só͘ tiàm ê siâⁿ, kóng-khí chit ê sū.

26Hit-ê chhōa伊tùi路tò來ê先知聽見就講，這是hit-ê上帝ê奴僕，違逆耶和華ê話ê，所以耶和華將伊交hō͘獅；獅peh拆伊，咬死伊，是照耶和華對伊講ê話。Hit ê chhōa i tùi lō͘ tò-lâi ê sian-ti thiaⁿ-kìⁿ chiū kóng, Che sī hit ê Siōng-tè ê lô͘-po̍k, ûi-ke̍h Iâ-hô-hoa ê ōe--ê, só͘-í Iâ-hô-hoa chiong i kau hō͘ sai; sai peh-thiah i, kā-sí i, sī chiàu Iâ-hô-hoa tùi i kóng ê ōe.

27伊就吩咐伊ê kiáⁿ講，Lín kā我備辦驢。In就備辦。I chiū hoan-hù i ê kiáⁿ kóng, Lín kā góa pī-pān lû. In chiū pī-pān.

28伊去，看見伊ê身屍放tī路裡，驢kap獅khiā tī身屍ê邊á，獅無食身屍，也無peh拆驢。I khì, khòaⁿ-kìⁿ i ê sin-si pàng tī lō͘--nih, lû kap sai khiā tī sin-si ê piⁿ-á, sai bô chia̍h sin-si, iā bô peh-thiah lû.

29先知就取上帝ê奴僕ê身屍，hē tī驢ê頂面，載tò來，到老先知ê城，beh啼哭來埋葬伊。Sian-ti chiū chhú Siōng-tè ê lô͘-po̍k ê sin-si, hē tī lû ê téng-bīn, chài tò-lâi, kàu lāu sian-ti ê siâⁿ, beh thî-khàu lâi bâi-chòng i.

30就將伊ê身屍來葬tī家己ê墓，人就啼哭伊，講，Ai-ah，我ê兄ah！Chiū chiong i ê sin-si lâi chòng tī ka-kī ê bōng, lâng chiū thî-khàu i, kóng, Ai--ah, góa ê hiaⁿ ah!

31埋葬了後，伊就kā伊ê kiáⁿ講，我死了後，lín tio̍h埋葬我tī上帝ê奴僕所埋葬ê墓內，hō͘我ê骨頭óa伊ê骨頭。Bâi-chòng liáu-āu, i chiū kā i ê kiáⁿ kóng, Góa sí liáu-āu, lín tio̍h bâi-chòng góa tī Siōng-tè ê lô͘-po̍k só͘ bâi-chòng ê bōng-lāi, hō͘ góa ê kut-thâu óa i ê kut-thâu.

32因為伊用耶和華ê話叫來攻擊Pek-te̍k-lī ê壇，攻擊撒馬利亞chiah-ê城所有ê山頭廟，伊ê話的確應驗。In-ūi i ēng Iâ-hô-hoa ê ōe kiò lâi kong-kek Pek-te̍k-lī ê tôaⁿ, kong-kek Sat-má-lī-a chiah ê siâⁿ só͘ ū ê soaⁿ-thâu-biō, i ê ōe tek-khak èng-giām.

33Chit-ê tāi-chì了後，Iâ-lô-phò-àm猶原無離開伊ê pháiⁿ路；koh tùi眾百姓中設立山頭ê祭司；見ài ê，就分別伊，hō͘伊做山頭ê祭司。Chit ê tāi-chì liáu-āu, Iâ-lô-phò-àm iû-goân bô lī-khui i ê pháiⁿ-lō͘; koh tùi chèng peh-sìⁿ-tiong siat-li̍p soaⁿ-thâu ê chè-si; kìⁿ ài ê, chiū hun-piat i, hō͘ i chòe soaⁿ-thâu ê chè-si.

34Chit-ê tāi-chì成做Iâ-lô-phò-àm ê家ê罪，致到beh tùi地上剪除伊，滅伊。Chit ê tāi-chì chiâⁿ-chòe Iâ-lô-phò-àm ê ke ê chōe, tì-kàu beh tùi tōe-chiūⁿ chián-tû i, bia̍t i.