1耶和華ê話臨到Hap-ná-nî ê kiáⁿ Iâ-hō͘，攻擊Pa-sa講，Iâ-hô-hoa ê ōe lîm-kàu Hap-ná-nî ê kiáⁿ Iâ-hō͘, kong-kek Pa-sa kóng,

2我已經tùi塵埃ê中間舉起你，設立你做我ê百姓以色列ê人君，你竟然行伊â-lô-phò-àm ê路，hō͘我ê百姓以色列犯罪，tùi in ê罪激我ê受氣。Góa í-keng tùi tîn-ai ê tiong-kan kú-khí lí, siat-li̍p lí chòe Góa ê peh-sìⁿ Í-sek-lia̍t ê jîn-kun, lí kéng-jiân kiâⁿ Iâ-lô-phò-àm ê lō͘, hō͘ Góa ê peh-sìⁿ Í-sek-lia̍t hoān-chōe, tùi in ê chōe kek Góa ê siū-khì.

3看ah，我beh一盡除Pa-sa，kap伊ê家；我也beh hō͘你ê家親像Nî-pat ê kiáⁿ Iâ-lô-phò-àm ê家一樣。Khòaⁿ ah, Góa beh it-chīn tû Pa-sa, kap i ê ke; Góa iā beh hō͘ lí ê ke chhin-chhiūⁿ Nî-pat ê kiáⁿ Iâ-lô-phò-àm ê ke chi̍t-iūⁿ.

4凡若屬Pa-sa ê人，死tī城裡ê，狗beh食伊，死tī田野ê，空中ê鳥beh食伊。Hoān-nā sio̍k Pa-sa ê lâng, sí tī siâⁿ--nih-ê, káu beh chia̍h i, sí tī chhân-iá-ê, khong-tiong ê chiáu beh chia̍h i.

5Pa-sa其餘ê事，kap伊所行ê，以及伊ê能力，kiám無lóng記tī以色列列王ê記錄mah？Pa-sa kî-û ê sū, kap i só͘ kiâⁿ ê, í-ki̍p i ê lêng-le̍k, kiám bô lóng kì tī Í-sek-lia̍t lia̍t-ông ê kì-lio̍k mah?

6Pa-sa kap伊ê列祖同睏，埋葬tī Tek-sat；伊ê kiáⁿ Í-la̍h續接伊做王。Pa-sa kap i ê lia̍t-chó͘ tâng-khùn, bâi-chòng tī Tek-sat; i ê kiáⁿ Í-la̍h sòa-chiap i chòe ông.

7Koh耶和華ê話臨到Hap-ná-nî ê kiáⁿ，先知Iâ-hō͘，攻擊Pa-sa，也攻擊伊ê家；因為伊tī耶和華ê目睭前所行一切ê pháiⁿ，用伊ê手ê所做來激伊ê受氣，親像Iâ-lô-phò-àm ê家一樣；koh因為伊phah死伊ê全家。Koh Iâ-hô-hoa ê ōe lîm-kàu Hap-ná-nî ê kiáⁿ, sian-ti Iâ-hō͘, kong-kek Pa-sa, iā kong-kek i ê ke; in-ūi i tī Iâ-hô-hoa ê ba̍k-chiu-chêng só͘ kiâⁿ it-chhè ê pháiⁿ, ēng i ê chhiú ê só͘-chòe lâi kek I ê siū-khì, chhin-chhiūⁿ Iâ-lô-phò-àm ê ke chi̍t-iūⁿ; koh in-ūi i phah-sí i ê choân-ke.

8猶大王A-sat二十六年，Pa-sa ê kiáⁿ Í-la̍h tī Tek-sat坐位做以色列王，共兩年。Iû-tāi ông A-sat jī-cha̍p-la̍k nî, Pa-sa ê kiáⁿ Í-la̍h tī Tek-sat chē-ūi chòe Í-sek-lia̍t ông, kiōng nn̄g-nî.

9有管理伊ê戰車ê一半ê人臣Sim-lī背叛伊。當伊tī Tek-sat，就是tī Tek-sat管家A-cha̍p ê厝，食酒醉ê時，Ū koán-lí i ê chiàn-chhia ê chi̍t-pòaⁿ ê jîn-sîn Sim-lī pōe-poān i. Tng i tī Tek-sat, chiū-sī tī Tek-sat koán-ke A-cha̍p ê chhù, chia̍h chiú-chùi ê sî,

10Sim-lī就入去phah死伊，篡伊ê位；這是猶大王A-sat二十七年 ê事。Sim-lī chiū ji̍p-khì phah-sí i, chhoàn i ê ūi; che sī Iû-tāi ông A-sat jī-cha̍p-chhit nî ê sū.

11Sim-lī起頭做王，當坐位ê時，就thâi Pa-sa全家，無論親人朋友，lóng無kā伊留一個ta-po͘丁。Sim-lī khí-thâu chòe ông, tng chē-ūi ê sî, chiū thâi Pa-sa choân-ke, bô-lūn chhin-lâng pêng-iú, lóng bô kā i lâu chi̍t ê ta-po͘-teng.

12親像án-ni，Sim-lī滅Pa-sa全家，tú-tú照耶和華託先知Iâ-hō͘所講攻擊Pa-sa ê話。Chhin-chhiūⁿ án-ni, Sim-lī bia̍t Pa-sa choân-ke, tú-tú chiàu Iâ-hô-hoa thok sian-ti Iâ-hō͘ só͘ kóng kong-kek Pa-sa ê ōe.

13這是因為Pa-sa一切ê罪，kap伊ê kiáⁿ Í-la̍h ê罪，in兩人所犯tio̍h ê，也hō͘以色列人犯tio̍h，用虛假ê事來激耶和華以色列ê上帝ê受氣。Che sī in-ūi Pa-sa it-chhè ê chōe, kap i ê kiáⁿ Í-la̍h ê chōe, in nn̄g-lâng só͘ hoān-tio̍h ê, iā hō͘ Í-sek-lia̍t lâng hoān-tio̍h, ēng hu-ké ê sū lâi kek Iâ-hô-hoa Í-sek-lia̍t ê Siōng-tè ê siū-khì.

14Í-la̍h其餘ê事，見伊所行ê，kiám無lóng記tī以色列chiah-ê王ê記錄mah？Í-la̍h kî-û ê sū, kìⁿ i só͘ kiâⁿ ê, kiám bô lóng kì tī Í-sek-lia̍t chiah ê ông ê kì-lio̍k mah?

15猶大王A-sat二十七年，Sim-lī tī Tek-sat做王七日；hit時百姓tú-á紮營圍攻腓利士ê Ki-pí-tùn。Iû-tāi ông A-sat jī-cha̍p-chhit nî, Sim-lī tī Tek-sat chòe ông chhit ji̍t; hit-sî peh-sìⁿ tú-á chat-iâⁿ ûi-kong Hui-lī-sū ê Ki-pí-tùn.

16Tī營中ê百姓聽見講，Sim-lī背叛，koh thâi死王；所以以色列眾人，就hit日tī營中設立軍長Àm-lī做以色列王。Tī iâⁿ-tiong ê peh-sìⁿ thiaⁿ-kìⁿ kóng, Sim-lī pōe-poān, koh thâi-sí ông; só͘-í Í-sek-lia̍t chèng-lâng, chiū hit-ji̍t tī iâⁿ-tiong siat-li̍p kun-tiúⁿ Àm-lī chòe Í-sek-lia̍t ông.

17Àm-lī kap以色列眾人，tùi Ki-pí-tùn上去，圍困Tek-sat。Àm-lī kap Í-sek-lia̍t chèng-lâng, tùi Ki-pí-tùn chiūⁿ-khì, ûi-khùn Tek-sat.

18Sim-lī看見城已經破，就入王宮ê衛所，放火燒王宮，家己死tī內面。Sim-lī khòaⁿ-kìⁿ siâⁿ í-keng phòa, chiū ji̍p ông-kiong ê ōe-só͘, pàng hé sio ông-kiong, ka-kī sí tī lāi-bīn.

19這是因為伊所犯ê罪，是行耶和華所看做pháiⁿ ê，行伊â-lô-phò-àm ê路；行伊所犯ê罪，koh hō͘以色列人犯罪。Che sī in-ūi i só͘ hoān ê chōe, sī kiâⁿ Iâ-hô-hoa só͘ khòaⁿ-chòe pháiⁿ ê, kiâⁿ Iâ-lô-phò-àm ê lō͘; kiâⁿ i só͘ hoān ê chōe, koh hō͘ Í-sek-lia̍t lâng hoān-chōe.

20Sim-lī其餘ê事，kap伊所行背叛ê事，kiám無記tī以色列chiah-ê王ê記錄mah？Sim-lī kî-û ê sū, kap i só͘ kiâⁿ pōe-poān ê sū, kiám bô kì tī Í-sek-lia̍t chiah ê ông ê kì-lio̍k mah?

21Hit時以色列百姓分做兩peng，百姓一半tè Ki-la̍p ê kiáⁿ Thê-pí-nî，beh設立伊做王，koh一半tè Àm-lī。Hit-sî Í-sek-lia̍t peh-sìⁿ hun chòe nn̄g-pêng, peh-sìⁿ chi̍t-pòaⁿ tè Ki-la̍p ê kiáⁿ Thê-pí-nî, beh siat-li̍p i chòe ông, koh chi̍t-pòaⁿ tè Àm-lī.

22總是tè Àm-lī ê百姓贏過tè Ki-la̍p ê kiáⁿ Thê-pí-nî ê百姓；Thê-pí-nî死，Àm-lī就做王。Chóng-sī tè Àm-lī ê peh-sìⁿ iâⁿ-kè tè Ki-la̍p ê kiáⁿ Thê-pí-nî ê peh-sìⁿ; Thê-pí-nî sí, Àm-lī chiū chòe ông.

23猶大王A-sat三十一年，Àm-lī坐位做以色列王，共十二年；tī Tek-sat做王六年。Iû-tāi ông A-sat saⁿ-cha̍p-it nî, Àm-lī chē-ūi chòe Í-sek-lia̍t ông, kiōng cha̍p-jī nî; tī Tek-sat chòe ông la̍k nî.

24Àm-lī用銀兩tha-liân-tek tùi Sat-má買撒馬利亞山，tī山頂起造；就照hit-ê山ê原主Sat-má ê名，kā所起ê城號名叫撒馬利亞。Àm-lī ēng gûn nn̄g tha-liân-tek tùi Sat-má bóe Sat-má-lī-a soaⁿ, tī soaⁿ-téng khí-chō; chiū chiàu hit ê soaⁿ ê goân-chú Sat-má ê miâ, kā só͘ khí ê siâⁿ hō-miâ kiò Sat-má-lī-a.

25Àm-lī行耶和華看做pháiⁿ ê事，比伊以前一切ê王koh-khah pháiⁿ。Àm-lī kiâⁿ Iâ-hô-hoa khòaⁿ-chòe pháiⁿ ê sū, pí i í-chêng it-chhè ê ông koh khah pháiⁿ.

26因為伊行Nî-pat ê kiáⁿ Iâ-lô-phò-àm ê路，kap伊hō͘以色列人犯罪ê罪，用虛假ê事來激耶和華以色列ê上帝ê受氣。In-ūi i kiâⁿ Nî-pat ê kiáⁿ Iâ-lô-phò-àm ê lō͘, kap i hō͘ Í-sek-lia̍t lâng hoān-chōe ê chōe, ēng hu-ké ê sū lâi kek Iâ-hô-hoa Í-sek-lia̍t ê Siōng-tè ê siū-khì.

27Àm-lī其餘所行ê事，kap伊所顯出ê能力，kiám無記tī以色列chiah-ê王ê記錄mah？Àm-lī kî-û só͘ kiâⁿ ê sū, kap i só͘ hián-chhut ê lêng-le̍k, kiám bô kì tī Í-sek-lia̍t chiah ê ông ê kì-lio̍k mah?

28Àm-lī kap伊ê列祖同睏，埋葬tī撒馬利亞；伊ê kiáⁿ A-hap續接伊做王。Àm-lī kap i ê lia̍t-chó͘ tâng-khùn, bâi-chòng tī Sat-má-lī-a; i ê kiáⁿ A-hap sòa-chiap i chòe ông.

29猶大王A-sat三十八年，Àm-lī ê kiáⁿ A-hap坐位，做以色列王；Àm-lī ê kiáⁿ A-hap tī撒馬利亞做以色列王二十二年。Iû-tāi ông A-sat saⁿ-cha̍p-poeh nî, Àm-lī ê kiáⁿ A-hap chē-ūi, chòe Í-sek-lia̍t ông; Àm-lī ê kiáⁿ A-hap tī Sat-má-lī-a chòe Í-sek-lia̍t ông jī-cha̍p-jī nî.

30Àm-lī ê kiáⁿ A-hap行耶和華看做pháiⁿ ê事，比伊以前一切ê王koh-khah pháiⁿ。Àm-lī ê kiáⁿ A-hap kiâⁿ Iâ-hô-hoa khòaⁿ-chòe pháiⁿ ê sū, pí i í-chêng it-chhè ê ông koh khah pháiⁿ.

31伊行Nî-pat ê kiáⁿ Iâ-lô-phò-àm ê罪，iáu-kú掠做小khóa；koh娶Se-tùn王Iat-pa-le̍k ê cha-bó͘-kiáⁿ Iâ-sé-piat做bó͘，去服事Pa-le̍k來拜伊。I kiâⁿ Nî-pat ê kiáⁿ Iâ-lô-phò-àm ê chōe, iáu-kú lia̍h chòe sió-khóa; koh chhōa Se-tùn ông Iat-pa-le̍k ê cha-bó͘-kiáⁿ Iâ-sé-piat chòe bó͘, khì ho̍k-sāi Pa-le̍k lâi pài i.

32伊tī撒馬利亞所起Pa-le̍k ê廟，tī廟內kā Pa-le̍k起壇。I tī Sat-má-lī-a só͘ khí Pa-le̍k ê biō, tī biō-lāi kā Pa-le̍k khí tôaⁿ.

33A-hap koh造A-sià-la̍h；A-hap所行ê激耶和華以色列ê上帝ê受氣，比伊以前ê以色列列王koh-khah傷重。A-hap koh chō A-sià-la̍h; A-hap só͘-kiâⁿ-ê kek Iâ-hô-hoa Í-sek-lia̍t ê Siōng-tè ê siū-khì, pí i í-chêng ê Í-sek-lia̍t lia̍t-ông koh khah siong-tiōng.

34當伊坐位ê時，有Pek-te̍k-lī人Hi-i-le̍k起耶利哥城；hē地基ê時，死大kiáⁿ A-pí-lân，hē門ê時死soah尾kiáⁿ Se-kat；tú照耶和華託Lùn ê kiáⁿ約書亞所講ê話。Tng i chē-ūi ê sî, ū Pek-te̍k-lī lâng Hi-i-le̍k khí Iâ-lī-ko siâⁿ; hē tōe-ki ê sî, sí tōa-kiáⁿ A-pí-lân, hē mn̂g ê sî sí soah-bé kiáⁿ Se-kat; tú chiàu Iâ-hô-hoa thok Lùn ê kiáⁿ Iok-su-a só͘ kóng ê ōe.

1屬Ki-lia̍t khiā起ê百姓，Thê-su-pí人以利亞，對A-hap講，我kí永活耶和華以色列ê上帝，就是我khiā tī伊ê面前ê，來講，chit幾年，我若無講，beh無露水，無雨。Sio̍k Ki-lia̍t khiā-khí ê peh-sìⁿ, Thê-su-pí lâng Í-lī-a, tùi A-hap kóng, Góa kí éng-oa̍h Iâ-hô-hoa Í-sek-lia̍t ê Siōng-tè, chiū-sī góa khiā tī I ê bīn-chêng--ê, lâi kóng, chí(**chit) kúi-nî, góa nā bô kóng, beh bô lō͘-chúi, bô hō͘.

2耶和華ê話臨到以利亞講，Iâ-hô-hoa ê ōe lîm-kàu Í-lī-a kóng,

3你tio̍h離開chia，oat tùi東勢去，bih tī約旦河ê東勢，Ki-li̍p溪邊；Lí tio̍h lī-khui chia, oat tùi tang--sì khì, bih tī Iok-tàn hô ê tang--sì, Ki-li̍p khoe-piⁿ;

4你beh lim hit-ê溪ê水；我已經命令烏鴉tī-hia供給你。lí beh lim hit ê khoe ê chúi; Góa í-keng bēng-lēng o͘-a tī-hia kiong-kip lí.

5伊就去，照耶和華ê話來行；去tiàm tī約旦東勢ê Ki-li̍p溪。I chiū khì, chiàu Iâ-hô-hoa ê ōe lâi kiâⁿ; khì tiàm tī Iok-tàn tang--sì ê Ki-li̍p khoe.

6早起時烏鴉kā伊帶餅kap肉；ê-hng時也帶餅kap肉；伊lim溪裡 ê水。Chá-khí sî o͘-a kā i tòa piáⁿ kap bah; ê-hng sî iā tòa piáⁿ kap bah; i lim khoe--nih ê chúi.

7後來溪水乾；因為hit-ê地方無雨水。Āu-lâi khoe-chúi ta; in-ūi hit ê tōe-hng bô hō͘-chúi.

8耶和華ê話臨到伊講，Iâ-hô-hoa ê ōe lîm-kàu i kóng,

9你起來去到Se-tùn ê Sat-le̍k-hoat，khiā起tī-hia；看ah，我已經命令hit所在一個守寡人養飼你。Lí khí-lâi khì kàu Se-tùn ê Sat-le̍k-hoat, khiā-khí tī-hia; khòaⁿ ah, Góa í-keng bēng-lēng hit só͘-chāi chi̍t ê chiú-kóaⁿ lâng iúⁿ-chhī lí.

10伊就起來，去Sat-le̍k-hoat；到城門ê時，tú-tn̄g有一個守寡人tī hit所在teh拾柴。以利亞就叫伊講，求你用器具iúⁿ淡薄水來hō͘我lim。I chiū khí-lâi, khì Sat-le̍k-hoat; kàu siâⁿ-mn̂g ê sî, tú-tn̄g ū chi̍t ê chiú-kóaⁿ lâng tī hit só͘-chāi teh khioh-chhâ. Í-lī-a chiū kiò i kóng, Kiû lí ēng khì-kū iúⁿ tām-po̍h chúi lâi hō͘ góa lim.

11伊去iúⁿ ê時，以利亞koh叫伊講，請你順手the̍h淡薄餅來hō͘我。I khì iúⁿ ê sî, Í-lī-a koh kiò i kóng, Chhiáⁿ lí sūn-chhiú the̍h tām-po̍h piáⁿ lâi hō͘ góa.

12婦人人講，我kí永活ê耶和華你ê上帝來講，我無一個餅，只有一把á麵粉tī桶裡，kap淡薄油tī瓶裡；看ah，我拾兩支柴，beh tò去為tio̍h我kap我ê kiáⁿ pek逼伊，阮thang食伊，chiah死。Hū-jîn-lâng kóng, Góa kí éng-oa̍h ê Iâ-hô-hoa lí ê Siōng-tè lâi kóng, góa bô chi̍t ê piáⁿ, chí-ū chi̍t-pé-á mī-hún tī tháng--nih, kap tām-po̍h iû tī pân--nih; khòaⁿ ah, góa khioh nn̄g ki chhâ, beh tò-khì ūi-tio̍h góa kap góa ê kiáⁿ pek i, goán thang chia̍h i, chiah sí.

13以利亞kā伊講，免驚；去ah，照你所講ê來行；總是事先kā我做一個細ê餅，帶來hō͘我，然後為tio̍h你kap你ê kiáⁿ做伊。Í-lī-a kā i kóng, Bián kiaⁿ; khì ah, chiàu lí só͘-kóng-ê lâi kiâⁿ; chóng-sī tāi-seng kā góa chòe chi̍t-ê sòe ê piáⁿ, tòa--lâi hō͘ góa, jiân-āu ūi-tio̍h lí kap lí ê kiáⁿ chòe i.

14因為耶和華以色列ê上帝án-ni講，桶內ê麵粉bōe減少，瓶內ê油bōe了，到耶和華落雨tī地上ê日。In-ūi Iâ-hô-hoa Í-sek-lia̍t ê Siōng-tè án-ni kóng, Tháng-lāi ê mī-hún bōe kiám-chió, pân-lāi ê iû bōe liáu, kàu Iâ-hô-hoa lo̍h-hō͘ tī tōe-chiūⁿ ê ji̍t.

15婦人人就去，照以利亞ê話來行；婦人人kap伊ê家kap以利亞食chōe-chōe日。Hū-jîn-lâng chiū khì, chiàu Í-lī-a ê ōe lâi kiâⁿ; hū-jîn-lâng kap i ê ke kap Í-lī-a chia̍h chōe-chōe ji̍t.

16桶內ê麵粉無減，瓶內ê油無了，tú照耶和華託以利亞所講ê話。Tháng-lāi ê mī-hún bô kiám, pân-lāi ê iû bô liáu, tú chiàu Iâ-hô-hoa thok Í-lī-a só͘ kóng ê ōe.

17Chiah-ê tāi-chì了後，chit-ê婦人人，就是hit家ê主人，伊ê kiáⁿ破病，病真傷重，致到伊無一條氣絲。Chiah ê tāi-chì liáu-āu, chit ê hū-jîn-lâng, chiū-sī hit-ke ê chú-lâng, i ê kiáⁿ phòa-pīⁿ, pīⁿ chin siong-tiōng, tì-kàu i bô chi̍t-tiâu khùi-si.

18婦人人kā以利亞講，上帝ê奴僕ah，我kap你甚麼干涉？你來我chia hō͘上帝記得我ê罪，hō͘我ê kiáⁿ死ah。Hū-jîn-lâng kā Í-lī-a kóng, Siōng-tè ê lô͘-po̍k ah, góa kap lí sím-mi̍h kan-sia̍p? Lí lâi góa chia hō͘ Siōng-tè kì-tit góa ê chōe, hō͘ góa ê kiáⁿ sí ah.

19以利亞kā伊講，將你ê kiáⁿ交我。以利亞就tùi婦人人ê胸前抱去，帶到所tiàm ê樓，hē tī家己ê床；Í-lī-a kā i kóng, Chiong lí ê kiáⁿ kau góa. Í-lī-a chiū tùi hū-jîn-lâng ê heng-chêng phō--khì, tòa kàu só͘ tiàm ê lâu, hē tī ka-kī ê chhn̂g;

20就求叫耶和華講，耶和華我ê上帝ah，你kiám koh降災厄tī我所kap伊tòa ê守寡人，害死伊ê kiáⁿ ah？chiū kiû-kiò Iâ-hô-hoa kóng, Iâ-hô-hoa góa ê Siōng-tè ah, Lí kiám koh kàng chai-ē tī góa só͘ kap i tòa ê chiú-kóaⁿ lâng, hāi-sí i ê kiáⁿ ah?

21以利亞就仆tī gín-ná ê身軀三pái，求耶和華講，耶和華我ê上帝ah，求你hō͘ chit-ê gín-ná 回魂。Í-lī-a chiū phak tī gín-ná ê seng-khu saⁿ-pái, kiû Iâ-hô-hoa kóng, Iâ-hô-hoa góa ê Siōng-tè ah, kiû Lí hō͘ chit ê gín-ná hôe-hûn.

22耶和華聽以利亞ê聲，gín-ná ê魂就復到，伊就活。Iâ-hô-hoa thiaⁿ Í-lī-a ê siaⁿ, gín-ná ê hûn chiū ho̍k-tò, i chiū oa̍h.

23以利亞就抱hit-ê gín-ná tùi樓頂落來，入厝交hō͘伊ê老母。以利亞講，看ah，你ê kiáⁿ活lah。Í-lī-a chiū phō hit ê gín-ná tùi lâu-téng lo̍h-lâi, ji̍p chhù kau hō͘ i ê lāu-bú. Í-lī-a kóng, Khòaⁿ ah, lí ê kiáⁿ oa̍h lah.

24婦人人對以利亞講，Taⁿ我知你是上帝ê奴僕，你所講耶和華ê話是真實。Hū-jîn-lâng tùi Í-lī-a kóng, Taⁿ góa chai lí sī Siōng-tè ê lô͘-po̍k, lí só͘ kóng Iâ-hô-hoa ê ōe sī chin-si̍t.

1過chōe-chōe日，tī第三年，耶和華ê話臨到以利亞講，你去，hō͘ A-hap看見你；我beh落雨tī地上。Kè chōe-chōe ji̍t, tī tē-saⁿ nî, Iâ-hô-hoa ê ōe lîm-kàu Í-lī-a kóng, Lí khì, hō͘ A-hap khòaⁿ-kìⁿ lí; Góa beh lo̍h-hō͘ tī tōe-chiūⁿ.

2以利亞就去，beh hō͘ A-hap看見；hit時撒馬利亞飢荒真大。Í-lī-a chiū khì, beh hō͘ A-hap khòaⁿ-kìⁿ; hit-sî Sat-má-lī-a ki-hng chin tōa.

3A-hap就叫伊ê管家ê Gô-pa-tí來。(Gô-pa-tí不止敬畏耶和華。A-hap chiū kiò i ê koán-ke--ê Gô-pa-tí lâi. (Gô-pa-tí put-chí kèng-ùi Iâ-hô-hoa.

4因為Iâ-sé-piat滅耶和華chiah-ê先知ê時，Gô-pa-tí用先知一百人khǹg tī洞內，五十人做一組，用餅kap水養飼in。)In-ūi Iâ-sé-piat bia̍t Iâ-hô-hoa chiah ê sian-ti ê sî, Gô-pa-tí ēng sian-ti chi̍t-pah lâng khǹg tī tōng-lāi, gō͘-cha̍p lâng chòe chi̍t-chó͘(**cho͘), ēng piáⁿ kap chúi iúⁿ-chhī in.)

5A-hap kā Gô-pa-tí講，遍行chit-ê地，到一切ê水泉邊，kap一切ê溪邊；kiám-chhái咱能得tio̍h青草，thang hō͘ 馬、騾活teh，免得cheng-siⁿ一盡失落。A-hap kā Gô-pa-tí kóng, Piàn-kiâⁿ chit ê tōe, kàu it-chhè ê chúi-chôaⁿ-piⁿ, kap it-chhè ê khoe-piⁿ; kiám-chhái lán ōe tit-tio̍h chhiⁿ chháu, thang hō͘ bé, lô oa̍h--teh, bián-tit cheng-siⁿ it-chīn sit-lo̍h.

6Tùi án-ni，in分地beh遍行。A-hap家己行一條路，Gô-pa-tí也家己行一條路。Tùi án-ni in pun tōe beh piàn-kiâⁿ. A-hap ka-kī kiâⁿ chi̍t tiâu lō͘, Gô-pa-tí iā ka-kī kiâⁿ chi̍t tiâu lō͘.

7Gô-pa-tí tī路裡，以利亞tú-tio̍h伊，Gô-pa-tí認得伊，就仆落去，講，你是我ê主以利亞mah？Gô-pa-tí tī lō͘--nih, Í-lī-a tú-tio̍h i, Gô-pa-tí jīn-tit i, chiū phak--lo̍h-khì, kóng, Lí sī góa ê chú Í-lī-a mah?

8應講，是；你去kā你ê主講，以利亞tī-chia。Ìn kóng, Sī; lí khì kā lí ê chú kóng, Í-lī-a tī-chia.

9Gô-pa-tí講，我有犯甚麼罪，你竟然beh將你ê奴僕交tī A-hap ê手，來害死我mah？Gô-pa-tí kóng, Góa ū hoān sím-mi̍h chōe, lí kéng-jiân beh chiong lí ê lô͘-po̍k kau tī A-hap ê chhiú, lâi hāi-sí góa mah?

10我kí永活ê耶和華你ê上帝來講，無一族，無一國，我ê主無差人到hia chhē你；in若講，伊無tī-chia，就kah hit國hit族ê人chiù-chōa講，In實在無tú-tio̍h你。Góa kí éng-oa̍h ê Iâ-hô-hoa lí ê Siōng-tè lâi kóng, Bô chi̍t-cho̍k, bô chi̍t-kok, góa ê chú bô chhe lâng kàu hia chhē lí; in nā kóng, I bô tī-chia, chiū kah hit-kok hit-cho̍k ê lâng chiù-chōa kóng, In si̍t-chāi bô tú-tio̍h lí.

11Taⁿ你講，去kā你ê主講，以利亞tī-chia。Taⁿ lí kóng, Khì kā lí ê chú kóng, Í-lī-a tī-chia.

12我一下離開你，耶和華ê神beh帶你到我所m̄知ê所在，我去kā A-hap講，也伊chhē你bōe tio̍h，就beh thâi死我；總是你ê奴僕tùi少年是敬畏耶和華。Góa chi̍t-ē lī-khui lí, Iâ-hô-hoa ê Sîn beh tòa lí kàu góa só͘ m̄-chai ê só͘-chāi, góa khì kā A-hap kóng, iā i chhē lí bōe tio̍h, chiū beh thâi-sí góa; chóng-sī lí ê lô͘-po̍k tùi siàu-liân sī kèng-ùi Iâ-hô-hoa.

13當Iâ-sé-piat thâi耶和華眾先知ê時，我所做kiám無人kā我ê主講mah？就是我將耶和華ê先知一百人khǹg tī洞裡，五十人做一組，用餅kap水養飼in。Tng Iâ-sé-piat thâi Iâ-hô-hoa chèng sian-ti ê sî, góa só͘ chòe kiám bô lâng kā góa ê chú kóng mah? chiū-sī góa chiong Iâ-hô-hoa ê sian-ti chi̍t-pah lâng khǹg tī tōng--nih, gō͘-cha̍p lâng chòe chi̍t-chó͘(**cho͘), ēng piáⁿ kap chúi iúⁿ-chhī in.

14Taⁿ你講，去kā你ê主講，以利亞tī-chia，伊的確會thâi死我。Taⁿ lí kóng, Khì kā lí ê chú kóng, Í-lī-a tī-chia, i tek-khak ōe thâi-sí góa.

15以利亞講，我kí永活萬軍ê耶和華，就是我khiā tī伊ê面前ê，來講，今á日我的確beh hō͘ A-hap看見我。Í-lī-a kóng, Góa kí éng-oa̍h bān-kun ê Iâ-hô-hoa, chiū-sī góa khiā tī I ê bīn-chêng--ê, lâi kóng, Kin-á-ji̍t góa tek-khak beh hō͘ A-hap khòaⁿ-kìⁿ góa.

16Gô-pa-tí就去見A-hap，kā伊講。Gô-pa-tí chiū khì kìⁿ A-hap, kā i kóng.

17A-hap就來見以利亞。A-hap看見以利亞ê時，A-hap就kā伊講，你chit-ê陷害以色列ê ah！A-hap chiū lâi kìⁿ Í-lī-a. A-hap khòaⁿ-kìⁿ Í-lī-a ê sî, A-hap chiū kā i kóng, Lí chit-ê hām-hāi Í-sek-lia̍t-ê ah!

18以利亞應講，陷害以色列ê m̄是我，是你kap你ê老父ê家；因為lín棄sak耶和華ê誡命，去tè hiah-ê Pa-le̍k。Í-lī-a ìn kóng, Hām-hāi Í-sek-lia̍t--ê m̄-sī góa, sī lí kap lí ê lāu-pē ê ke; in-ūi lín khì-sak Iâ-hô-hoa ê kài-bēng, khì tè hiah ê Pa-le̍k.

19Taⁿ你tio̍h差人，聚集以色列眾人，kap Pa-le̍k ê先知四百五十人，以及A-sià-la̍h ê先知四百人，食tī Iâ-sé-piat ê桌ê，lóng去Ka-bi̍t山到我hia。Taⁿ lí tio̍h chhe lâng, chū-chi̍p Í-sek-lia̍t chèng-lâng, kap Pa-le̍k ê sian-ti sì-pah gō͘-cha̍p lâng, í-ki̍p A-sià-la̍h ê sian-ti sì-pah lâng, chia̍h tī Iâ-sé-piat ê toh--ê, lóng khì Ka-bi̍t soaⁿ kàu góa hia.

20A-hap就差人去以色列眾人hia，招集chiah-ê先知到Ka-bi̍t山。A-hap chiū chhe lâng khì Í-sek-lia̍t chèng-lâng hia, chio-chi̍p chiah ê sian-ti kàu Ka-bi̍t soaⁿ.

21以利亞就近眾百姓講，Lín存兩樣心無決斷，beh到甚麼時ah？若耶和華是上帝，就tio̍h thàn耶和華；若Pa-le̍k是上帝就tio̍h thàn Pa-le̍k；百姓無應一句話。Í-lī-a chiū-kūn chèng peh-sìⁿ kóng, Lín chûn nn̄g-iūⁿ sim bô koat-toàn, beh kàu sím-mi̍h sî ah? Nā Iâ-hô-hoa sī Siōng-tè, chiū tio̍h thàn Iâ-hô-hoa; nā Pa-le̍k sī Siōng-tè chiū tio̍h thàn Pa-le̍k; peh-sìⁿ bô ìn chi̍t kù ōe.

22以利亞kā百姓講，耶和華ê先知，只有chhun我一人，總是Pa-le̍k ê先知，有四百五十人。Í-lī-a kā peh-sìⁿ kóng, Iâ-hô-hoa ê sian-ti, chí-ū chhun góa chi̍t-lâng, chóng-sī Pa-le̍k ê sian-ti, ū sì-pah gō͘-cha̍p lâng.

23Taⁿ tio̍h用兩隻牛káng-á hō͘阮，Pa-le̍k ê先知thang為家己揀一隻牛á，切kui塊，hē tī柴頂，下面m̄-thang lok火；我料理hit隻牛á，hē tī柴頂，下面也無lok火。Taⁿ tio̍h ēng nn̄g chiah gû-káng-á hō͘ goán, Pa-le̍k ê sian-ti thang ūi ka-kī kéng chi̍t chiah gû-á, chhiat kui-tè, hē tī chhâ-téng, ē-bīn m̄-thang lok hé; góa liāu-lí hit chiah gû-á, hē tī chhâ-téng, ē-bīn iā bô lok hé.

24Lín求叫lín ê上帝 ê名，我求叫耶和華ê名；hit-ê用火顯應ê上帝，就是上帝。眾百姓應講，chit-ê話真好。Lín kiû-kiò lín ê siōng-tè ê miâ, góa kiû-kiò Iâ-hô-hoa ê miâ; hit-ê ēng hé hián-èng ê Siōng-tè, chiū-sī Siōng-tè. Chèng peh-sìⁿ ìn kóng, Chit ê ōe chin-hó.

25以利亞tùi Pa-le̍k ê先知講，Lín為家己揀一隻牛káng-á，事先料理伊，因為lín人額khah-chōe，lín求叫lín上帝ê名，獨獨m̄-thang lok火tī下面。Í-lī-a tùi Pa-le̍k ê sian-ti kóng, Lín ūi ka-kī kéng chi̍t chiah gû-káng-á, tāi-seng liāu-lí i, in-ūi lín lâng-gia̍h khah-chōe, lín kiû-kiò lín siōng-tè ê miâ, to̍k-to̍k m̄-thang lok hé tī ē-bīn.

26In就將所hō͘ in ê牛káng-á去料理伊；tùi早起到日晝求叫Pa-le̍k ê名，講，Pa-le̍k ah，tio̍h聽阮；總是無聲seh，也無應答；in tī所起ê壇，周圍tiô跳。In chiū chiong só͘ hō͘ in ê gû-káng-á khì liāu-lí i; tùi chá-khí kàu ji̍t-tàu kiû-kiò Pa-le̍k ê miâ, kóng, Pa-le̍k ah, tio̍h thiaⁿ goán; chóng-sī bô siaⁿ-seh, iā bô ìn-tap; in tī só͘ khí ê tôaⁿ, chiu-ûi tiô-thiàu.

27到中晝，以利亞譏刺in講，大聲求叫lah；因為伊是上帝，伊kiám-chhái靜靜teh想，á是退去偏僻ê所在，á是行路，á是teh睏，lín tio̍h叫伊醒。Kàu tiong-tàu, Í-lī-a ki-chhì in kóng, Tōa-siaⁿ kiû-kiò lah; in-ūi i sī siōng-tè, i kiám-chhái chēng-chēng teh-siūⁿ, á-sī thè--khì phian-phiah ê só͘-chāi, á-sī kiâⁿ-lō͘, á-sī teh-khùn, lín tio̍h kiò i chhíⁿ.

28In大聲求叫，照in ê例，用刀用鎗家己割，致到in ê身軀流血。In tōa-siaⁿ kiû-kiò, chiàu in ê lē, ēng to ēng chhiuⁿ ka-kī koah, tì-kàu in ê sin-khu lâu-huih.

29Tùi日過晝到獻ê-hng祭 ê時，in teh講in ê先知話；總是無聲seh，無應答，也無chhap in ê。Tùi ji̍t kè-tàu kàu hiàn ê-hng-chè ê sî, in teh kóng in ê sian-ti ōe; chóng-sī bô siaⁿ-seh, bô ìn-tap, iā bô chhap in ê.

30以利亞kā眾百姓講，Lín來近óa我；眾百姓就近óa伊；伊就koh 修理耶和華倒壞ê壇。Í-lī-a kā chèng peh-sìⁿ kóng, Lín lâi kūn-óa góa; chèng peh-sìⁿ chiū kūn-óa i; i chiū koh siu-lí Iâ-hô-hoa tó-hoāi ê tôaⁿ.

31以利亞取十二塊石，照雅各ê kiáⁿ ê支派ê數額；chit-ê雅各就是前耶和華ê話bat臨到伊講，以色列beh做你ê名ê。Í-lī-a chhú cha̍p-jī tè chio̍h, chiàu Ngá-kok ê kiáⁿ ê chi-phài ê siàu-gia̍h; chit ê Ngá-kok chiū-sī chêng Iâ-hô-hoa ê ōe bat lîm-kàu i kóng, Í-sek-lia̍t beh chòe lí ê miâ--ê.

32以利亞用chiah-ê石頭，奉耶和華ê名，起一座壇，tī壇ê周圍開溝，能貯得種子兩sè-a。Í-lī-a ēng chiah ê chio̍h-thâu, hōng Iâ-hô-hoa ê miâ, khí chi̍t chō tôaⁿ, tī tôaⁿ ê chiu-ûi khui kau, ōe tóe--tit chéng-chí nn̄g sè-a.

33Koh排列柴，將牛á切kui塊，hē tī柴頂；講，lín用四個桶貯水滿滿，piàⁿ tī燒祭kap柴ê頂面；Koh pâi-lia̍t chhâ, chiong gû-á chhiat kui-tè, hē tī chhâ-téng; kóng, Lín ēng sì ê tháng tóe chúi móa-móa, piàⁿ tī sio-chè kap chhâ ê téng-bīn;

34koh講，Piàⁿ第二pái，in就piàⁿ第二pái；koh講，Piàⁿ 第三pái；in就piàⁿ 第三pái；koh kóng, Piàⁿ tē-jī-pái, in chiū piàⁿ tē-jī-pái; koh kóng, Piàⁿ tē-saⁿ-pái; in chiū piàⁿ tē-saⁿ-pái;

35水流tī壇ê四圍，溝也有水滿滿。chúi lâu tī tôaⁿ ê sì-ûi, kau iā ū chúi móa-móa.

36到獻ê-hng祭ê時，先知以利亞近前來，講，亞伯拉罕、以撒，以色列ê上帝耶和華ah，求你今á日hō͘人知你tī以色列做上帝，也知我是你ê奴僕，koh是照你ê話來行這一切ê事。Kàu hiàn ê-hng chè ê sî, sian-ti Í-lī-a kūn-chêng lâi, kóng, A-pek-la̍h-hán, Í-sat, Í-sek-lia̍t ê Siōng-tè Iâ-hô-hoa ah, kiû Lí kin-á-ji̍t hō͘ lâng chai Lí tī Í-sek-lia̍t chòe Siōng-tè, iā chai góa sī Lí ê lô͘-po̍k, koh sī chiàu Lí ê ōe lâi kiâⁿ che it-chhè ê sū.

37耶和華ah，tio̍h聽我；tio̍h聽我，hō͘ chit國ê百姓知你耶和華就是上帝，你hō͘ in ê心oa̍t倒tńg。Iâ-hô-hoa ah, tio̍h thiaⁿ góa; tio̍h thiaⁿ góa, hō͘ chit-kok ê peh-sìⁿ chai Lí Iâ-hô-hoa chiū-sī Siōng-tè, Lí hō͘ in ê sim oa̍t-tò-tńg.

38耶和華ê火就降落，一盡燒伊ê燒祭，kap柴，kap石，kap土，koh燒乾溝內ê水。Iâ-hô-hoa ê hé chiū kàng-lo̍h, it-chīn sio i ê sio-chè, kap chhâ, kap chio̍h, kap thô͘, koh sio-ta kau-lāi ê chúi.

39眾百姓看見，就仆tī地裡講，耶和華，伊是上帝，耶和華，伊是上帝。Chèng peh-sìⁿ khòaⁿ-kìⁿ, chiū phak tī tōe--nih kóng, Iâ-hô-hoa, I sī Siōng-tè, Iâ-hô-hoa, I sī Siōng-tè.

40以利亞kā in講，掠Pa-le̍k ê先知，無容允一個逃走。In就掠in；以利亞帶in落去到Ki-sūn溪邊，tī-hia thâi in。Í-lī-a kā in kóng, Lia̍h Pa-le̍k ê sian-ti, bô iông-ún chi̍t-ê tô-cháu. In chiū lia̍h in; Í-lī-a tòa in lo̍h-khì kàu Ki-sūn khoe-piⁿ, tī-hia thâi in.

41以利亞kā A-hap講，你taⁿ thang上去lim食；因為有大雨ê聲。Í-lī-a kā A-hap kóng, Lí taⁿ thang chiūⁿ-khì lim-chia̍h; in-ūi ū tōa-hō͘ ê siaⁿ.

42A-hap就上去lim食。以利亞上去Ka-bi̍t山頂，屈身tī地裡，面仆tī兩個腳頭u ê中間。A-hap chiū chiūⁿ-khì lim-chia̍h. Í-lī-a chiūⁿ-khì Ka-bi̍t soaⁿ-téng, khut-sin tī tōe--nih, bīn phak tī nn̄g ê kha-thâu-u ê tiong-kan.

43對伊ê奴僕講，你上去，ǹg海看。奴僕就上去看，講，Lóng無甚麼。伊講，你koh去，tio̍h到七pái。Tùi i ê lô͘-po̍k kóng, Lí chiūⁿ--khì, ǹg hái khòaⁿ. Lô͘-po̍k chiū chiūⁿ-khì khòaⁿ, kóng, Lóng bô sím-mi̍h. I kóng, Lí koh khì, tio̍h kàu chhit-pái.

44到第七pái伊講，看見有雲tùi海裡起來，細細親像人ê手。以利亞講，你上去，kā A-hap講，Tio̍h備辦車落去，免得hō͘雨阻擋。Kàu tē-chhit pái i kóng, Khòaⁿ-kìⁿ ū hûn tùi hái--nih khí-lâi, sòe-sòe chhin-chhiūⁿ lâng ê chhiú. Í-lī-a kóng, Lí chiūⁿ-khì, kā A-hap kóng, Tio̍h pī-pān chhia lo̍h-khì, bián-tit hō͘ hō͘ chó͘-tòng.

45tiap-á久ê中間變天，因為風kap雲烏暗，落大雨。A-hap就坐車去Iâ-su-lia̍t。Tiap-á-kú ê tiong-kan piàn-thiⁿ in-ūi hong kap hûn o͘-àm, lo̍h tōa-hō͘. A-hap chiū chē-chhia khì Iâ-su-lia̍t.

46耶和華ê手khòa tī以利亞ê身上，伊就hâ腰，tī A-hap ê頭前走到Iâ-su-lia̍t ê城門。Iâ-hô-hoa ê chhiú khòa tī Í-lī-a ê sin-chiūⁿ, i chiū hâ-io, tī A-hap ê thâu-chêng cháu kàu Iâ-su-lia̍t ê siâⁿ-mn̂g.