1過chōe-chōe日，tī第三年，耶和華ê話臨到以利亞講，你去，hō͘ A-hap看見你；我beh落雨tī地上。Kè chōe-chōe ji̍t, tī tē-saⁿ nî, Iâ-hô-hoa ê ōe lîm-kàu Í-lī-a kóng, Lí khì, hō͘ A-hap khòaⁿ-kìⁿ lí; Góa beh lo̍h-hō͘ tī tōe-chiūⁿ.

2以利亞就去，beh hō͘ A-hap看見；hit時撒馬利亞飢荒真大。Í-lī-a chiū khì, beh hō͘ A-hap khòaⁿ-kìⁿ; hit-sî Sat-má-lī-a ki-hng chin tōa.

3A-hap就叫伊ê管家ê Gô-pa-tí來。(Gô-pa-tí不止敬畏耶和華。A-hap chiū kiò i ê koán-ke--ê Gô-pa-tí lâi. (Gô-pa-tí put-chí kèng-ùi Iâ-hô-hoa.

4因為Iâ-sé-piat滅耶和華chiah-ê先知ê時，Gô-pa-tí用先知一百人khǹg tī洞內，五十人做一組，用餅kap水養飼in。)In-ūi Iâ-sé-piat bia̍t Iâ-hô-hoa chiah ê sian-ti ê sî, Gô-pa-tí ēng sian-ti chi̍t-pah lâng khǹg tī tōng-lāi, gō͘-cha̍p lâng chòe chi̍t-chó͘(**cho͘), ēng piáⁿ kap chúi iúⁿ-chhī in.)

5A-hap kā Gô-pa-tí講，遍行chit-ê地，到一切ê水泉邊，kap一切ê溪邊；kiám-chhái咱能得tio̍h青草，thang hō͘ 馬、騾活teh，免得cheng-siⁿ一盡失落。A-hap kā Gô-pa-tí kóng, Piàn-kiâⁿ chit ê tōe, kàu it-chhè ê chúi-chôaⁿ-piⁿ, kap it-chhè ê khoe-piⁿ; kiám-chhái lán ōe tit-tio̍h chhiⁿ chháu, thang hō͘ bé, lô oa̍h--teh, bián-tit cheng-siⁿ it-chīn sit-lo̍h.

6Tùi án-ni，in分地beh遍行。A-hap家己行一條路，Gô-pa-tí也家己行一條路。Tùi án-ni in pun tōe beh piàn-kiâⁿ. A-hap ka-kī kiâⁿ chi̍t tiâu lō͘, Gô-pa-tí iā ka-kī kiâⁿ chi̍t tiâu lō͘.

7Gô-pa-tí tī路裡，以利亞tú-tio̍h伊，Gô-pa-tí認得伊，就仆落去，講，你是我ê主以利亞mah？Gô-pa-tí tī lō͘--nih, Í-lī-a tú-tio̍h i, Gô-pa-tí jīn-tit i, chiū phak--lo̍h-khì, kóng, Lí sī góa ê chú Í-lī-a mah?

8應講，是；你去kā你ê主講，以利亞tī-chia。Ìn kóng, Sī; lí khì kā lí ê chú kóng, Í-lī-a tī-chia.

9Gô-pa-tí講，我有犯甚麼罪，你竟然beh將你ê奴僕交tī A-hap ê手，來害死我mah？Gô-pa-tí kóng, Góa ū hoān sím-mi̍h chōe, lí kéng-jiân beh chiong lí ê lô͘-po̍k kau tī A-hap ê chhiú, lâi hāi-sí góa mah?

10我kí永活ê耶和華你ê上帝來講，無一族，無一國，我ê主無差人到hia chhē你；in若講，伊無tī-chia，就kah hit國hit族ê人chiù-chōa講，In實在無tú-tio̍h你。Góa kí éng-oa̍h ê Iâ-hô-hoa lí ê Siōng-tè lâi kóng, Bô chi̍t-cho̍k, bô chi̍t-kok, góa ê chú bô chhe lâng kàu hia chhē lí; in nā kóng, I bô tī-chia, chiū kah hit-kok hit-cho̍k ê lâng chiù-chōa kóng, In si̍t-chāi bô tú-tio̍h lí.

11Taⁿ你講，去kā你ê主講，以利亞tī-chia。Taⁿ lí kóng, Khì kā lí ê chú kóng, Í-lī-a tī-chia.

12我一下離開你，耶和華ê神beh帶你到我所m̄知ê所在，我去kā A-hap講，也伊chhē你bōe tio̍h，就beh thâi死我；總是你ê奴僕tùi少年是敬畏耶和華。Góa chi̍t-ē lī-khui lí, Iâ-hô-hoa ê Sîn beh tòa lí kàu góa só͘ m̄-chai ê só͘-chāi, góa khì kā A-hap kóng, iā i chhē lí bōe tio̍h, chiū beh thâi-sí góa; chóng-sī lí ê lô͘-po̍k tùi siàu-liân sī kèng-ùi Iâ-hô-hoa.

13當Iâ-sé-piat thâi耶和華眾先知ê時，我所做kiám無人kā我ê主講mah？就是我將耶和華ê先知一百人khǹg tī洞裡，五十人做一組，用餅kap水養飼in。Tng Iâ-sé-piat thâi Iâ-hô-hoa chèng sian-ti ê sî, góa só͘ chòe kiám bô lâng kā góa ê chú kóng mah? chiū-sī góa chiong Iâ-hô-hoa ê sian-ti chi̍t-pah lâng khǹg tī tōng--nih, gō͘-cha̍p lâng chòe chi̍t-chó͘(**cho͘), ēng piáⁿ kap chúi iúⁿ-chhī in.

14Taⁿ你講，去kā你ê主講，以利亞tī-chia，伊的確會thâi死我。Taⁿ lí kóng, Khì kā lí ê chú kóng, Í-lī-a tī-chia, i tek-khak ōe thâi-sí góa.

15以利亞講，我kí永活萬軍ê耶和華，就是我khiā tī伊ê面前ê，來講，今á日我的確beh hō͘ A-hap看見我。Í-lī-a kóng, Góa kí éng-oa̍h bān-kun ê Iâ-hô-hoa, chiū-sī góa khiā tī I ê bīn-chêng--ê, lâi kóng, Kin-á-ji̍t góa tek-khak beh hō͘ A-hap khòaⁿ-kìⁿ góa.

16Gô-pa-tí就去見A-hap，kā伊講。Gô-pa-tí chiū khì kìⁿ A-hap, kā i kóng.

17A-hap就來見以利亞。A-hap看見以利亞ê時，A-hap就kā伊講，你chit-ê陷害以色列ê ah！A-hap chiū lâi kìⁿ Í-lī-a. A-hap khòaⁿ-kìⁿ Í-lī-a ê sî, A-hap chiū kā i kóng, Lí chit-ê hām-hāi Í-sek-lia̍t-ê ah!

18以利亞應講，陷害以色列ê m̄是我，是你kap你ê老父ê家；因為lín棄sak耶和華ê誡命，去tè hiah-ê Pa-le̍k。Í-lī-a ìn kóng, Hām-hāi Í-sek-lia̍t--ê m̄-sī góa, sī lí kap lí ê lāu-pē ê ke; in-ūi lín khì-sak Iâ-hô-hoa ê kài-bēng, khì tè hiah ê Pa-le̍k.

19Taⁿ你tio̍h差人，聚集以色列眾人，kap Pa-le̍k ê先知四百五十人，以及A-sià-la̍h ê先知四百人，食tī Iâ-sé-piat ê桌ê，lóng去Ka-bi̍t山到我hia。Taⁿ lí tio̍h chhe lâng, chū-chi̍p Í-sek-lia̍t chèng-lâng, kap Pa-le̍k ê sian-ti sì-pah gō͘-cha̍p lâng, í-ki̍p A-sià-la̍h ê sian-ti sì-pah lâng, chia̍h tī Iâ-sé-piat ê toh--ê, lóng khì Ka-bi̍t soaⁿ kàu góa hia.

20A-hap就差人去以色列眾人hia，招集chiah-ê先知到Ka-bi̍t山。A-hap chiū chhe lâng khì Í-sek-lia̍t chèng-lâng hia, chio-chi̍p chiah ê sian-ti kàu Ka-bi̍t soaⁿ.

21以利亞就近眾百姓講，Lín存兩樣心無決斷，beh到甚麼時ah？若耶和華是上帝，就tio̍h thàn耶和華；若Pa-le̍k是上帝就tio̍h thàn Pa-le̍k；百姓無應一句話。Í-lī-a chiū-kūn chèng peh-sìⁿ kóng, Lín chûn nn̄g-iūⁿ sim bô koat-toàn, beh kàu sím-mi̍h sî ah? Nā Iâ-hô-hoa sī Siōng-tè, chiū tio̍h thàn Iâ-hô-hoa; nā Pa-le̍k sī Siōng-tè chiū tio̍h thàn Pa-le̍k; peh-sìⁿ bô ìn chi̍t kù ōe.

22以利亞kā百姓講，耶和華ê先知，只有chhun我一人，總是Pa-le̍k ê先知，有四百五十人。Í-lī-a kā peh-sìⁿ kóng, Iâ-hô-hoa ê sian-ti, chí-ū chhun góa chi̍t-lâng, chóng-sī Pa-le̍k ê sian-ti, ū sì-pah gō͘-cha̍p lâng.

23Taⁿ tio̍h用兩隻牛káng-á hō͘阮，Pa-le̍k ê先知thang為家己揀一隻牛á，切kui塊，hē tī柴頂，下面m̄-thang lok火；我料理hit隻牛á，hē tī柴頂，下面也無lok火。Taⁿ tio̍h ēng nn̄g chiah gû-káng-á hō͘ goán, Pa-le̍k ê sian-ti thang ūi ka-kī kéng chi̍t chiah gû-á, chhiat kui-tè, hē tī chhâ-téng, ē-bīn m̄-thang lok hé; góa liāu-lí hit chiah gû-á, hē tī chhâ-téng, ē-bīn iā bô lok hé.

24Lín求叫lín ê上帝 ê名，我求叫耶和華ê名；hit-ê用火顯應ê上帝，就是上帝。眾百姓應講，chit-ê話真好。Lín kiû-kiò lín ê siōng-tè ê miâ, góa kiû-kiò Iâ-hô-hoa ê miâ; hit-ê ēng hé hián-èng ê Siōng-tè, chiū-sī Siōng-tè. Chèng peh-sìⁿ ìn kóng, Chit ê ōe chin-hó.

25以利亞tùi Pa-le̍k ê先知講，Lín為家己揀一隻牛káng-á，事先料理伊，因為lín人額khah-chōe，lín求叫lín上帝ê名，獨獨m̄-thang lok火tī下面。Í-lī-a tùi Pa-le̍k ê sian-ti kóng, Lín ūi ka-kī kéng chi̍t chiah gû-káng-á, tāi-seng liāu-lí i, in-ūi lín lâng-gia̍h khah-chōe, lín kiû-kiò lín siōng-tè ê miâ, to̍k-to̍k m̄-thang lok hé tī ē-bīn.

26In就將所hō͘ in ê牛káng-á去料理伊；tùi早起到日晝求叫Pa-le̍k ê名，講，Pa-le̍k ah，tio̍h聽阮；總是無聲seh，也無應答；in tī所起ê壇，周圍tiô跳。In chiū chiong só͘ hō͘ in ê gû-káng-á khì liāu-lí i; tùi chá-khí kàu ji̍t-tàu kiû-kiò Pa-le̍k ê miâ, kóng, Pa-le̍k ah, tio̍h thiaⁿ goán; chóng-sī bô siaⁿ-seh, iā bô ìn-tap; in tī só͘ khí ê tôaⁿ, chiu-ûi tiô-thiàu.

27到中晝，以利亞譏刺in講，大聲求叫lah；因為伊是上帝，伊kiám-chhái靜靜teh想，á是退去偏僻ê所在，á是行路，á是teh睏，lín tio̍h叫伊醒。Kàu tiong-tàu, Í-lī-a ki-chhì in kóng, Tōa-siaⁿ kiû-kiò lah; in-ūi i sī siōng-tè, i kiám-chhái chēng-chēng teh-siūⁿ, á-sī thè--khì phian-phiah ê só͘-chāi, á-sī kiâⁿ-lō͘, á-sī teh-khùn, lín tio̍h kiò i chhíⁿ.

28In大聲求叫，照in ê例，用刀用鎗家己割，致到in ê身軀流血。In tōa-siaⁿ kiû-kiò, chiàu in ê lē, ēng to ēng chhiuⁿ ka-kī koah, tì-kàu in ê sin-khu lâu-huih.

29Tùi日過晝到獻ê-hng祭 ê時，in teh講in ê先知話；總是無聲seh，無應答，也無chhap in ê。Tùi ji̍t kè-tàu kàu hiàn ê-hng-chè ê sî, in teh kóng in ê sian-ti ōe; chóng-sī bô siaⁿ-seh, bô ìn-tap, iā bô chhap in ê.

30以利亞kā眾百姓講，Lín來近óa我；眾百姓就近óa伊；伊就koh 修理耶和華倒壞ê壇。Í-lī-a kā chèng peh-sìⁿ kóng, Lín lâi kūn-óa góa; chèng peh-sìⁿ chiū kūn-óa i; i chiū koh siu-lí Iâ-hô-hoa tó-hoāi ê tôaⁿ.

31以利亞取十二塊石，照雅各ê kiáⁿ ê支派ê數額；chit-ê雅各就是前耶和華ê話bat臨到伊講，以色列beh做你ê名ê。Í-lī-a chhú cha̍p-jī tè chio̍h, chiàu Ngá-kok ê kiáⁿ ê chi-phài ê siàu-gia̍h; chit ê Ngá-kok chiū-sī chêng Iâ-hô-hoa ê ōe bat lîm-kàu i kóng, Í-sek-lia̍t beh chòe lí ê miâ--ê.

32以利亞用chiah-ê石頭，奉耶和華ê名，起一座壇，tī壇ê周圍開溝，能貯得種子兩sè-a。Í-lī-a ēng chiah ê chio̍h-thâu, hōng Iâ-hô-hoa ê miâ, khí chi̍t chō tôaⁿ, tī tôaⁿ ê chiu-ûi khui kau, ōe tóe--tit chéng-chí nn̄g sè-a.

33Koh排列柴，將牛á切kui塊，hē tī柴頂；講，lín用四個桶貯水滿滿，piàⁿ tī燒祭kap柴ê頂面；Koh pâi-lia̍t chhâ, chiong gû-á chhiat kui-tè, hē tī chhâ-téng; kóng, Lín ēng sì ê tháng tóe chúi móa-móa, piàⁿ tī sio-chè kap chhâ ê téng-bīn;

34koh講，Piàⁿ第二pái，in就piàⁿ第二pái；koh講，Piàⁿ 第三pái；in就piàⁿ 第三pái；koh kóng, Piàⁿ tē-jī-pái, in chiū piàⁿ tē-jī-pái; koh kóng, Piàⁿ tē-saⁿ-pái; in chiū piàⁿ tē-saⁿ-pái;

35水流tī壇ê四圍，溝也有水滿滿。chúi lâu tī tôaⁿ ê sì-ûi, kau iā ū chúi móa-móa.

36到獻ê-hng祭ê時，先知以利亞近前來，講，亞伯拉罕、以撒，以色列ê上帝耶和華ah，求你今á日hō͘人知你tī以色列做上帝，也知我是你ê奴僕，koh是照你ê話來行這一切ê事。Kàu hiàn ê-hng chè ê sî, sian-ti Í-lī-a kūn-chêng lâi, kóng, A-pek-la̍h-hán, Í-sat, Í-sek-lia̍t ê Siōng-tè Iâ-hô-hoa ah, kiû Lí kin-á-ji̍t hō͘ lâng chai Lí tī Í-sek-lia̍t chòe Siōng-tè, iā chai góa sī Lí ê lô͘-po̍k, koh sī chiàu Lí ê ōe lâi kiâⁿ che it-chhè ê sū.

37耶和華ah，tio̍h聽我；tio̍h聽我，hō͘ chit國ê百姓知你耶和華就是上帝，你hō͘ in ê心oa̍t倒tńg。Iâ-hô-hoa ah, tio̍h thiaⁿ góa; tio̍h thiaⁿ góa, hō͘ chit-kok ê peh-sìⁿ chai Lí Iâ-hô-hoa chiū-sī Siōng-tè, Lí hō͘ in ê sim oa̍t-tò-tńg.

38耶和華ê火就降落，一盡燒伊ê燒祭，kap柴，kap石，kap土，koh燒乾溝內ê水。Iâ-hô-hoa ê hé chiū kàng-lo̍h, it-chīn sio i ê sio-chè, kap chhâ, kap chio̍h, kap thô͘, koh sio-ta kau-lāi ê chúi.

39眾百姓看見，就仆tī地裡講，耶和華，伊是上帝，耶和華，伊是上帝。Chèng peh-sìⁿ khòaⁿ-kìⁿ, chiū phak tī tōe--nih kóng, Iâ-hô-hoa, I sī Siōng-tè, Iâ-hô-hoa, I sī Siōng-tè.

40以利亞kā in講，掠Pa-le̍k ê先知，無容允一個逃走。In就掠in；以利亞帶in落去到Ki-sūn溪邊，tī-hia thâi in。Í-lī-a kā in kóng, Lia̍h Pa-le̍k ê sian-ti, bô iông-ún chi̍t-ê tô-cháu. In chiū lia̍h in; Í-lī-a tòa in lo̍h-khì kàu Ki-sūn khoe-piⁿ, tī-hia thâi in.

41以利亞kā A-hap講，你taⁿ thang上去lim食；因為有大雨ê聲。Í-lī-a kā A-hap kóng, Lí taⁿ thang chiūⁿ-khì lim-chia̍h; in-ūi ū tōa-hō͘ ê siaⁿ.

42A-hap就上去lim食。以利亞上去Ka-bi̍t山頂，屈身tī地裡，面仆tī兩個腳頭u ê中間。A-hap chiū chiūⁿ-khì lim-chia̍h. Í-lī-a chiūⁿ-khì Ka-bi̍t soaⁿ-téng, khut-sin tī tōe--nih, bīn phak tī nn̄g ê kha-thâu-u ê tiong-kan.

43對伊ê奴僕講，你上去，ǹg海看。奴僕就上去看，講，Lóng無甚麼。伊講，你koh去，tio̍h到七pái。Tùi i ê lô͘-po̍k kóng, Lí chiūⁿ--khì, ǹg hái khòaⁿ. Lô͘-po̍k chiū chiūⁿ-khì khòaⁿ, kóng, Lóng bô sím-mi̍h. I kóng, Lí koh khì, tio̍h kàu chhit-pái.

44到第七pái伊講，看見有雲tùi海裡起來，細細親像人ê手。以利亞講，你上去，kā A-hap講，Tio̍h備辦車落去，免得hō͘雨阻擋。Kàu tē-chhit pái i kóng, Khòaⁿ-kìⁿ ū hûn tùi hái--nih khí-lâi, sòe-sòe chhin-chhiūⁿ lâng ê chhiú. Í-lī-a kóng, Lí chiūⁿ-khì, kā A-hap kóng, Tio̍h pī-pān chhia lo̍h-khì, bián-tit hō͘ hō͘ chó͘-tòng.

45tiap-á久ê中間變天，因為風kap雲烏暗，落大雨。A-hap就坐車去Iâ-su-lia̍t。Tiap-á-kú ê tiong-kan piàn-thiⁿ in-ūi hong kap hûn o͘-àm, lo̍h tōa-hō͘. A-hap chiū chē-chhia khì Iâ-su-lia̍t.

46耶和華ê手khòa tī以利亞ê身上，伊就hâ腰，tī A-hap ê頭前走到Iâ-su-lia̍t ê城門。Iâ-hô-hoa ê chhiú khòa tī Í-lī-a ê sin-chiūⁿ, i chiū hâ-io, tī A-hap ê thâu-chêng cháu kàu Iâ-su-lia̍t ê siâⁿ-mn̂g.

1A-hap將以利亞一切所行ê，kap伊用刀thâi眾先知ê事，lóng kā Iâ-sé-piat講。A-hap chiong Í-lī-a it-chhè só͘-kiâⁿ-ê, kap i ēng to thâi chèng sian-ti ê sū, lóng kā Iâ-sé-piat kóng.

2Iâ-sé-piat就差人去見以利亞，kā伊講，明á日約略chit時，我若無hō͘你ê性命親像in中間一人ê性命一樣，願hiah-ê上帝加倍責罰我。Iâ-sé-piat chiū chhe lâng khì kìⁿ Í-lī-a, kā i kóng, Bîn-á-ji̍t iok-lio̍k chit-sî, góa nā bô hō͘ lí ê sìⁿ-miā chhin-chhiūⁿ in tiong-kan chi̍t-lâng ê sìⁿ-miā chi̍t-iūⁿ, goān hiah ê siōng-tè ka-pē chek-hoa̍t góa.

3以利亞看見án-ni，就起來走，來逃命，到猶大ê別是巴，將奴僕留tī-hia。Í-lī-a khòaⁿ-kìⁿ án-ni, chiū khí-lâi cháu, lâi tô-miā, kàu Iû-tāi ê Pia̍t-sī-pa, chiong lô͘-po̍k lâu tī-hia.

4家己入去曠野，行一日ê路站，到一叢羅庭樹腳；就坐tī-hia求死，講，Taⁿ soah-lah；耶和華ah，求你取我ê性命，因為我無比我ê列祖khah贏。Ka-kī ji̍p-khì khòng-iá, kiâⁿ chi̍t-ji̍t ê lō͘-chām, kàu chi̍t châng lô-têng-chhiū kha; chiū chē tī-hia kiû sí, kóng, Taⁿ soah--lah; Iâ-hô-hoa ah, kiû Lí chhú góa ê sìⁿ-miā, in-ūi góa bô pí góa ê lia̍t-chó͘ khah-iâⁿ.

5就倒tī羅庭樹腳，睏去；有天使來搭伊，講，起來食。Chiū tó tī lô-têng-chhiū kha, khùn--khì; ū thiⁿ-sài lâi tah i, kóng, Khí-lâi chia̍h.

6伊看伊，就看見有餅pek tī火炭ê頂面，koh有一瓶水tī伊ê頭殼邊；伊就食就lim，koh倒落去。I khòaⁿ i, chiū khòaⁿ-kìⁿ ū piáⁿ pek tī hé-thòaⁿ ê téng-bīn, koh ū chi̍t pân chúi tī i ê thâu-khak piⁿ; i chiū chia̍h chiū lim, koh tó--lo̍h-khì.

7耶和華ê天使第二pái koh來搭伊，講，起來食ah，因為路真遠；你行無法得。Iâ-hô-hoa ê thiⁿ-sài tē-jī-pái koh lâi tah i, kóng, Khí-lâi chia̍h ah, in-ūi lō͘ chin hn̄g; lí kiâⁿ bô hoat-tit.

8伊就起來食伊，lim伊；óa靠chit-pái食ê力，行四十日，四十暝，到上帝ê山，就是何烈山。I chiū khí-lâi chia̍h i, lim i; óa-khò chit-pái chia̍h ê la̍t, kiâⁿ sì-cha̍p ji̍t, sì-cha̍p mî, kàu Siōng-tè ê soaⁿ, chiū-sī Hô-lia̍t soaⁿ.

9伊到hia，入一個洞，就tiàm hit內；看ah，耶和華ê話臨到伊，kā伊講，以利亞ah，你tī-chia chhòng甚麼？I kàu hia, ji̍p chi̍t ê tōng, chiū tiàm hí(**hit)-lāi; khòaⁿ ah, Iâ-hô-hoa ê ōe lîm-kàu i, kā i kóng, Í-lī-a ah, lí tī-chia chhòng sím-mi̍h?

10伊應講，我為tio̍h耶和華萬軍ê上帝大熱心；因為以色列人棄sak你ê約，毀壞你hiah-ê壇，用刀thâi你hiah-ê先知，只有chhun我一人；in iáu siàu想我ê性命，beh取伊。I ìn kóng, Góa ūi-tio̍h Iâ-hô-hoa bān-kun ê Siōng-tè tōa jia̍t-sim; in-ūi Í-sek-lia̍t lâng khì-sak Lí ê iok, húi-hoāi Lí hiah ê tôaⁿ, ēng to thâi Lí hiah ê sian-ti, chí-ū chhun góa chi̍t-lâng; in iáu siàu-siūⁿ góa ê sìⁿ-miā, beh chhú i.

11講，你出來khiā tī山裡，tī耶和華ê面前。看ah，耶和華經過，有大koh透ê風，破裂chiah-ê山，phah碎chiah-ê石tī耶和華ê面前；總是耶和華無tī風ê內面；風了後有地動；耶和華也無tī地動ê中間。Kóng, Lí chhut-lâi khiā tī soaⁿ--nih, tī Iâ-hô-hoa ê bīn-chêng. Khòaⁿ ah, Iâ-hô-hoa keng-kè, ū tōa koh thàu ê hong, phòa-li̍h chiah ê soaⁿ, phah-chhùi chiah ê chio̍h tī Iâ-hô-hoa ê bīn-chêng; chóng-sī Iâ-hô-hoa bô tī hong ê lāi-bīn; hong liáu-āu ū tōe-tāng; Iâ-hô-hoa iā bô tī tōe-tāng ê tiong-kan.

12地動了後有火；耶和華也無tī火中；火了後，有細koh輕ê聲。Tōe-tāng liáu-āu ū hé; Iâ-hô-hoa iā bô tī hé-tiong; hé liáu-āu, ū sòe koh khin ê siaⁿ.

13以利亞聽見，就用外衫罩面，出去khiā tī洞口。看ah，有聲臨到伊講，以利亞ah，你tī-chia chhòng甚麼？Í-lī-a thiaⁿ-kìⁿ, chiū ēng gōa-saⁿ tà-bīn, chhut-khì khiā tī tōng-kháu. Khòaⁿ ah, ū siaⁿ lîm-kàu i kóng, Í-lī-a ah, lí tī-chia chhòng sím-mi̍h?

14伊講，我為tio̍h耶和華萬軍ê上帝大熱心；因為以色列人棄sak你ê約，毀壞你hiah-ê壇，用刀thâi你hiah-ê先知；只有chhun我一人，in iáu siàu想我ê性命，beh取伊。I kóng, Góa ūi-tio̍h Iâ-hô-hoa bān-kun ê Siōng-tè tōa jia̍t-sim; in-ūi Í-sek-lia̍t lâng khì-sak Lí ê iok, húi-hoāi Lí hiah ê tôaⁿ, ēng to thâi Lí hiah ê sian-ti; chí-ū chhun góa chi̍t-lâng, in iáu siàu-siūⁿ góa ê sìⁿ-miā, beh chhú i.

15耶和華kā伊講，去ah，你tò去，到大馬色ê曠野；已經到，就tio̍h用油抹Hap-siat做A-lân王；Iâ-hô-hoa kā i kóng, Khì ah, lí tò-khì, kàu Tāi-má-sek ê khòng-iá; í-keng kàu, chiū tio̍h ēng iû boah Hap-siat chòe A-lân ông;

16koh抹Lêng-sī ê孫Iâ-hō͘做以色列王；koh抹A-pek-bí-hô-la̍h人Sa-hoat ê kiáⁿ以利沙做先知續接你。koh boah Lêng-sī ê sun Iâ-hō͘ chòe Í-sek-lia̍t ông; koh boah A-pek-bí-hô-la̍h lâng Sa-hoat ê kiáⁿ Í-lī-sa chòe sian-ti sòa-chiap lí.

17後來脫離Hap-siat ê刀ê，Iâ-hō͘ beh thâi伊；脫離Iâ-hō͘ ê刀ê，以利沙beh thâi伊。Āu-lâi thoat-lī Hap-siat ê to ê, Iâ-hō͘ beh thâi i; thoat-lī Iâ-hō͘ ê to ê, Í-lī-sa beh thâi i.

18總是我tī以色列中留七千人，伊ê腳頭u bē-bat跪Pa-le̍k，伊ê嘴bē-bat chim伊。Chóng-sī Góa tī Í-sek-lia̍t tiong lâu chhit-chheng lâng, i ê kha-thâu-u bē-bat kūi Pa-le̍k, i ê chhùi bē-bat chim i.

19以利亞就離開hia去；tú-tio̍h Sa-hoat ê kiáⁿ以利沙，伊teh犁田；tī伊ê頭前有十二對牛，家己趕第十二對；以利亞經過伊hia，將家己ê衫phoa̍h tī伊ê身上。Í-lī-a chiū lī-khui hia khì; tú-tio̍h Sa-hoat ê kiáⁿ Í-lī-sa, i teh lôe-chhân; tī i ê thâu-chêng ū cha̍p-jī tùi gû, ka-kī kóaⁿ tē cha̍p-jī tùi; Í-lī-a keng-kè i hia, chiong ka-kī ê saⁿ phoa̍h tī i ê sin-chiūⁿ.

20以利沙就離開hiah-ê牛，走到以利亞ê後面，講，求你准我事先chim我ê父母，然後我就tè你。以利亞kā伊講，你tò去，我對你有做甚麼ah？Í-lī-sa chiū lī-khui hiah ê gû, cháu kàu Í-lī-a ê āu-bīn, kóng, Kiû lí chún góa tāi-seng chim góa ê pē-bú, jiân-āu góa chiū tè lí. Í-lī-a kā i kóng, Lí tò-khì, góa tùi lí ū chòe sím-mi̍h ah?

21以利沙就對伊hia tò去，thâi一對牛，用套牛ê器具煮肉，hō͘百姓；in就食伊。伊就起來tè以利亞，來服事伊。Í-lī-sa chiū tùi i hia tò-khì, thâi chi̍t-tùi gû, ēng thò gû ê khì-kū chú bah, hō͘ peh-sìⁿ; in chiū chia̍h i. I chiū khí-lâi tè Í-lī-a, lâi ho̍k-sāi i.

1A-lân王Piān-hap-ta̍t聚集伊ê全軍，有三十二個王kap伊去，有馬，有車，上去圍撒馬利亞，來攻伊。A-lân ông Piān-hap-ta̍t chū-chi̍p i ê choân-kun, ū saⁿ-cha̍p-jī ê ông kap i khì, ū bé, ū chhia, chiūⁿ-khì ûi Sat-má-lī-a, lâi kong i.

2Koh差使者入城見以色列王A-hap，kā伊講，Piān-hap-ta̍t án-ni講，Koh chhe sù-chiá ji̍p siâⁿ kìⁿ Í-sek-lia̍t ông A-hap, kā i kóng, Piān-hap-ta̍t án-ni kóng,

3你ê銀，你ê金，lóng是我ê，你hiah-ê bó͘，你hiah-ê kiáⁿ兒，第一súi ê，也是我ê。Lí ê gûn, lí ê kim, lóng sī góa-ê, lí hiah ê bó͘, lí hiah ê kiáⁿ-jî, tē-it súi ê, iā-sī góa-ê.

4以色列王應講，我ê主，我ê王ah，照你ê話，我kap我所有ê lóng是你ê。Í-sek-lia̍t ông ìn kóng, Góa ê chú, góa ê ông ah, chiàu lí ê ōe, góa kap góa só͘-ū-ê lóng sī lí-ê.

5使者koh來講，Piān-hap-ta̍t án-ni講，我卻有差人去見你，ài你將你ê銀、金、bó͘、kiáⁿ兒，lóng交hō͘我。Sù-chiá koh lâi kóng, Piān-hap-ta̍t án-ni kóng, Góa khiok ū chhe lâng khì kìⁿ lí, ài lí chiong lí ê gûn, kim, bó͘, kiáⁿ-jî, lóng kau hō͘ góa.

6總是明á日約略chit時，我beh差我ê使者到你hia，chhiau-chhē你ê厝，kap你ê奴僕ê厝，見若你所看做好ê，in beh親手帶去。Chóng-sī bîn-á-ji̍t iok-lio̍k chit-sî góa beh chhe góa ê sù-chiá kàu lí hia, chhiau-chhē lí ê chhù, kap lí ê lô͘-po̍k ê chhù, kìⁿ-nā lí só͘ khòaⁿ-chòe hó--ê, in beh chhin-chhiú tòa--khì.

7以色列王召國內ê長老lóng來，kā in講，Lín看，chit-ê人tiâu-tî chhē縫beh害我；伊bat差人來我chia，beh我ê bó͘、kiáⁿ兒，kap金銀，我無推辭伊。Í-sek-lia̍t ông tiàu kok-lāi ê tiúⁿ-ló lóng lâi, kā in kóng, Lín khòaⁿ, chit ê lâng tiâu-tî chhē-phāng beh hāi góa; i bat chhe lâng lâi góa chia, beh góa ê bó͘, kiáⁿ-jî, kap kim gûn, góa bô the-sî--i.

8長老kap眾百姓lóng kā王講，M̄-thang聽伊，也m̄-thang允伊。Tiúⁿ-ló kap chèng peh-sìⁿ lóng kā ông kóng, M̄-thang thiaⁿ i, iā m̄-thang ún i.

9所以王kā Piān-hap-ta̍t ê使者講，Lín kā我ê主我ê王講，你事先差人對你ê奴僕所討ê我有允；總是chit-ê我bōe行得。使者就tò去回覆。Só͘-í ông kā Piān-hap-ta̍t ê sù-chiá kóng, Lín kā góa ê chú góa ê ông kóng, Lí tāi-seng chhe lâng tùi lí ê lô͘-po̍k só͘-thó--ê góa ū ún; chóng-sī chit-ê góa bōe kiâⁿ--tit. Sù-chiá chiū tò-khì hê-hok.

10Piān-hap-ta̍t koh差人講，撒馬利亞ê土粉，若有夠額hō͘ tè我ê人ta̍k人mi一把，就願hiah-ê上帝加倍責罰我。Piān-hap-ta̍t koh chhe lâng kóng, Sat-má-lī-a ê thô͘-hún, nā ū kàu-gia̍h hō͘ tè góa ê lâng ta̍k-lâng mi chi̍t-pé, chiū goān hiah ê siōng-tè ka-pē chek-hoa̍t góa.

11以色列王應講，Lín kā伊講，穿盔甲ê，m̄-thang親像thǹg盔甲ê來誇口。Í-sek-lia̍t ông ìn kóng, Lín kā i kóng, Chhēng khoe-kah--ê, m̄-thang chhin-chhiūⁿ thǹg khoe-kah--ê lâi khoa-kháu.

12Piān-hap-ta̍t kap hiah-ê王tī布棚內lim酒，聽見chiah-ê話，就kā伊ê人臣講，Thang排陣；in就排陣攻城。Piān-hap-ta̍t kap hiah ê ông tī pò͘-pîⁿ-lāi lim-chiú, thiaⁿ-kìⁿ chiah ê ōe, chiū kā i ê jîn-sîn kóng, Thang pâi-tīn; in chiū pâi-tīn kong-siâⁿ.

13有一個先知來見以色列王A-hap講，耶和華án-ni講，你有看見一大陣ê人無？看ah，今á日我beh將in交tī你ê手，你就知我是耶和華。Ū chi̍t ê sian-ti lâi kìⁿ Í-sek-lia̍t ông A-hap kóng, Iâ-hô-hoa án-ni kóng, Lí ū khòaⁿ-kìⁿ chi̍t tōa tīn ê lâng bô? Khòaⁿ ah, kin-á-ji̍t Góa beh chiong in kau tī lí ê chhiú, lí chiū chai Góa sī Iâ-hô-hoa.

14A-hap講，beh用是誰 ah？伊應講，耶和華án-ni講，用chiah-ê省長ê少年人。A-hap講，甚麼人beh排陣ah？伊應講，就是你。A-hap kóng, Beh ēng chī-chūi ah? I ìn kóng, Iâ-hô-hoa án-ni kóng, Ēng chiah ê séng-tiúⁿ ê siàu-liân lâng. A-hap kóng, Sím-mi̍h lâng beh pâi-tīn ah? I ìn kóng, Chiū-sī lí.

15伊就算hiah-ê省長ê少年人，共有兩百三十二名；後來伊koh算眾百姓，就是以色列人，共七千名。I chiū sǹg hiah ê séng-tiúⁿ ê siàu-liân lâng, kiōng ū nn̄g-pah saⁿ-cha̍p-jī miâ; āu-lâi i koh sǹg chèng peh-sìⁿ, chiū-sī Í-sek-lia̍t lâng, kiōng chhit-chheng miâ.

16日中晝ê時，in就出去。Piān-hap-ta̍t kap hiah-ê王，就是幫贊伊ê三十二個王，tī布棚內食酒醉。Ji̍t-tiong-tàu ê sî, in chiū chhut-khì. Piān-hap-ta̍t kap hiah ê ông, chiū-sī pang-chān i ê saⁿ-cha̍p-jī ê ông, tī pò͘-pîⁿ-lāi chia̍h chiú-chùi.

17Hiah-ê省長ê少年人做頭出去。Piān-hap-ta̍t差人去探bāi，in回覆講，有人tùi撒馬利亞出來。Hiah ê séng-tiúⁿ ê siàu-liân lâng chòe-thâu chhut-khì. Piān-hap-ta̍t chhe lâng khì thàm-bāi, in hê-hok kóng, Ū lâng tùi Sat-má-lī-a chhut-lâi.

18伊講，In若為tio̍h講和出來，tio̍h活活掠in；若為tio̍h交戰出來，也tio̍h活活掠in。I kóng, In nā ūi-tio̍h káng-hô chhut-lâi, tio̍h oa̍h-oa̍h lia̍h in; nā ūi-tio̍h kau-chiàn chhut-lâi, iā tio̍h oa̍h-oa̍h lia̍h in.

19Hiah-ê省長ê少年人出城，軍兵tè in；ta̍k人thâi伊ê對敵。Hiah ê séng-tiúⁿ ê siàu-liân lâng chhut siâⁿ, kun-peng tè in; ta̍k-lâng thâi i ê tùi-te̍k.

20A-lân人逃走，以色列人jip in。A-lân王Piān-hap-ta̍t騎馬，kap hiah-ê馬兵逃脫。A-lân lâng tô-cháu, Í-sek-lia̍t lâng jip in. A-lân ông Piān-hap-ta̍t khiâ-bé, kap hiah ê bé-peng tô-thoat.

21以色列王出城，phah hiah-ê車，kap馬，大大thâi死A-lân人。Í-sek-lia̍t ông chhut-siâⁿ, phah hiah ê chhia, kap bé, tōa-tōa thâi-sí A-lân lâng.

22Hit-ê先知來見以色列王，kā伊講，你tio̍h家己強壯，謹慎tio̍h怎樣做；因為明年chit時，A-lân王beh上來攻擊你。Hit ê sian-ti lâi kìⁿ Í-sek-lia̍t ông, kā i kóng, Lí tio̍h ka-kī kiông-chòng, kín-sīn tio̍h cháiⁿ-iūⁿ chòe; in-ūi mê-nî chit-sî, A-lân ông beh chiūⁿ-lâi kong-kek lí.

23A-lân王ê人臣kā伊講，以色列人ê上帝是山頭ê上帝，所以in khah贏咱；總是咱若tī平洋kap in交戰，就會khah贏in。A-lân ông ê jîn-sîn kā i kóng, Í-sek-lia̍t lâng ê Siōng-tè sī soaⁿ-thâu ê Siōng-tè, só͘-í in khah-iâⁿ lán; chóng-sī lán nā tī pîⁿ-iûⁿ kap in kau-chiàn, chiū ōe khah-iâⁿ in.

24Tio̍h án-ni行；hiah-ê王ta̍k-ê tio̍h免職，立軍長來替in。Tio̍h án-ni kiâⁿ; hiah ê ông ta̍k-ê tio̍h bián-chit, li̍p kun-tiúⁿ lâi thòe in.

25Koh招募一隊軍兵照理所失落ê軍兵，用馬補馬，用車補車；咱tī平洋kap in交戰，穩當會贏。王就聽in ê話去行。Koh chio-bō͘ chi̍t tūi kun-peng chiàu lí só͘ sit-lo̍h ê kun-peng, ēng bé pó͘ bé, ēng chhia pó͘ chhia; lán tī pîⁿ-iûⁿ kap in kau-chiàn, ún-tàng ōe iâⁿ. Ông chiū thiaⁿ in ê ōe khì kiâⁿ.

26隔年Piān-hap-ta̍t點算A-lân人，上去A-hut，beh kap以色列人交戰。Keh-nî Piān-hap-ta̍t tiám-sǹg A-lân lâng, chiūⁿ-khì A-hut, beh kap Í-sek-lia̍t lâng kau-chiàn.

27以色列人也點算in ê數額，備辦軍糧，出去抵敵伊，紮營tī in ê對面，親像兩小群ê山羊á；總是A-lân人滿地面。Í-sek-lia̍t lâng iā tiám-sǹg in ê siàu-gia̍h, pī-pān kun-niû, chhut-khì tí-te̍k i, chat-iâⁿ tī in ê tùi-bīn, chhin-chhiūⁿ nn̄g sió-kûn ê soaⁿ-iûⁿ á; chóng-sī A-lân lâng móa tōe-bīn.

28有上帝ê奴僕來見以色列王講，耶和華án-ni講，因為A-lân人講，耶和華是山頭ê上帝，m̄是山谷ê上帝，所以我beh將chit大陣ê人lóng交tī你ê手；lín就知我是耶和華。Ū Siōng-tè ê lô͘-po̍k lâi kìⁿ Í-sek-lia̍t ông kóng, Iâ-hô-hoa án-ni kóng, In-ūi A-lân lâng kóng, Iâ-hô-hoa sī soaⁿ-thâu ê Siōng-tè, m̄-sī soaⁿ-kok ê Siōng-tè, só͘-í Góa beh chiong chit tōa-tīn ê lâng lóng kau tī lí ê chhiú; lín chiū chai Góa sī Iâ-hô-hoa.

29就紮營大家相對面七日；到第七日雙pêng軍兵交戰；tī chit日以色列人thâi死A-lân人步兵十萬。Chiū chat-iâⁿ tāi-ke saⁿ tùi-bīn chhit-ji̍t; kàu tē-chhit ji̍t siang-pêng kun-peng kau-chiàn; tī chit-ji̍t Í-sek-lia̍t lâng thâi-sí A-lân lâng pō͘-peng cha̍p-bān.

30其餘ê走入A-hut城，hit-ê城牆倒，teh死所chhun ê兩萬七千人。Piān-hap-ta̍t走入城，bih tī內房。Kî-û-ê cháu ji̍p A-hut siâⁿ, hit ê siâⁿ-chhiûⁿ tó, teh-sí só͘-chhun ê nn̄g-bān chhit-chheng lâng. Piān-hap-ta̍t cháu ji̍p siâⁿ, bih tī lāi-pâng.

31伊ê人臣kā伊講，看ah，阮聽見以色列家ê列王是仁慈ê王；求你准阮hâ麻布tī阮ê腰，頭殼phoa̍h索，出去投降以色列王；kiám-chhái伊beh饒你ê性命。I ê jîn-sîn kā i kóng, Khòaⁿ ah, goán thiaⁿ-kìⁿ Í-sek-lia̍t ke ê lia̍t-ông sī jîn-chû ê ông; kiû lí chún goán hâ môa-pò͘ tī goán ê io, thâu-khak phoa̍h-soh, chhut-khì tâu-hâng Í-sek-lia̍t ông; kiám-chhái i beh jiâu lí ê sìⁿ-miā.

32In就腰hâ麻布，頭殼phoa̍h索，去見以色列王，講，你ê奴僕Piān-hap-ta̍t講，求你，饒我ê性命。A-hap講，伊iáu活teh mah？伊是我ê兄弟。In chiū io hâ môa-pò͘, thâu-khak phoa̍h-soh, khì kìⁿ Í-sek-lia̍t ông, kóng, Lí ê lô͘-po̍k Piān-hap-ta̍t kóng, Kiû lí, jiâu góa ê sìⁿ-miā. A-hap kóng, I iáu oa̍h--teh mah? i sī góa ê hiaⁿ-tī.

33Hiah-ê人chim-chiok聽伊ê口氣，liâm-piⁿ順伊ê話尾，講，你ê兄弟Piān-hap-ta̍t。伊講，lín去chhōa伊來。Piān-hap-ta̍t出來見王，王就hō͘伊坐車。Hiah ê lâng chim-chiok thiaⁿ i ê kháu-khì, liâm-piⁿ sūn i ê ōe-bé, kóng, Lí ê hiaⁿ-tī Piān-hap-ta̍t. I kóng, Lín khì chhōa i lâi. Piān-hap-ta̍t chhut-lâi kìⁿ ông, ông chiū hō͘ i chē-chhia.

34Piān-hap-ta̍t kā伊講，我ê父對你ê父所搶hiah-ê城，我beh還你；koh你thang tī大馬色設街市，親像我ê父tī撒馬利亞所設ê一樣。A-hap講，我照chit-ê約放你tò去；就kap伊立約，放伊tò去。Piān-hap-ta̍t kā i kóng, Góa ê pē tùi lí ê pē só͘ chhiúⁿ hiah ê siâⁿ, góa beh hêng lí; koh lí thang tī Tāi-má-sek siat koe-chhī, chhin-chhiūⁿ góa ê pē tī Sat-má-lī-a só͘ siat--ê chi̍t-iūⁿ. A-hap kóng, Góa chiàu chit ê iok pàng lí tò-khì; chiū kap i li̍p-iok, pàng i tò-khì.

35有先知ê學生ê一人，用耶和華ê話kā伊ê同伴講，請你phah我。hit人m̄肯phah伊。Ū sian-ti ê ha̍k-seng ê chi̍t-lâng, ēng Iâ-hô-hoa ê ōe kā i ê tâng-phōaⁿ kóng, Chhiáⁿ lí phah góa. Hit-lâng m̄-khéng phah i.

36伊就kā伊講，因為你m̄-thàn耶和華ê話，你一下離開我，beh有獅咬死你。伊一下離開伊去，果然有獅tú-tio̍h來咬死伊。I chiū kā i kóng, In-ūi lí m̄-thàn Iâ-hô-hoa ê ōe, lí chi̍t-ē lī-khui góa, beh ū sai kā-sí lí. I chi̍t-ē lī-khui i khì, kó-jiân ū sai tú-tio̍h lâi kā-sí i.

37伊koh tú-tio̍h一人，kā伊講，請你phah我。伊就phah伊，phah到tio̍h傷。I koh tú-tio̍h chi̍t-lâng, kā i kóng, Chhiáⁿ lí phah góa. I chiū phah--i, phah kàu tio̍h-siong.

38先知就去，tī路裡thèng候王改伊ê容貌，用巾罩目睭。Sian-ti chiū khì, tī lō͘--nih thèng-hāu ông kóe i ê iông-māu, ēng kun tà ba̍k-chiu.

39王tùi hia經過ê時，伊叫王講，你ê奴僕出陣，有一人oat來邊á，koh chhōa一人來交我，講，你顧守chit-ê人；若伊失落，你ê性命tio̍h替伊ê性命；若無，你tio̍h交出一tha-liân-tek ê銀。Ông tùi hia keng-kè ê sî, i kiò ông kóng, Lí ê lô͘-po̍k chhut-tīn, ū chi̍t-lâng oat--lâi piⁿ-á, koh chhōa chi̍t-lâng lâi kau góa, kóng, Lí kò͘-siú chit ê lâng; nā i sit-lo̍h, lí ê sìⁿ-miā tio̍h thòe i ê sìⁿ-miā; nā bô, lí tio̍h kau-chhut chi̍t tha-liân-tek ê gûn.

40你ê奴僕顧chit項hit項ê時，hit人續無去。以色列王kā伊講，你ê案件án-ni，你已經家己判斷。Lí ê lô͘-po̍k kò͘ chit-hāng hit-hāng ê sî, hit-lâng sòa bô--khì. Í-sek-lia̍t ông kā i kóng, Lí ê àn-kiāⁿ án-ni, lí í-keng ka-kī phòaⁿ-toàn.

41伊趕緊除去罩目睭ê巾；以色列王就認得伊是先知ê一個。I kóaⁿ-kín tû-khì tà ba̍k-chiu ê kun; Í-sek-lia̍t ông chiū jīn-tit i sī sian-ti ê chi̍t-ê.

42伊kā王講，耶和華án-ni講，因為你將我所定tio̍h beh滅ê人放hō͘伊去，你ê性命就tio̍h替伊ê性命，你ê百姓就tio̍h替伊ê百姓。I kā ông kóng, Iâ-hô-hoa án-ni kóng, In-ūi lí chiong Góa só͘ tiāⁿ-tio̍h beh bia̍t ê lâng pàng hō͘ i khì, lí ê sìⁿ-miā chiū tio̍h thòe i ê sìⁿ-miā, lí ê peh-sìⁿ chiū tio̍h thòe i ê peh-sìⁿ.

43以色列王就鬱悶無歡喜；到撒馬利亞tò去伊ê厝。Í-sek-lia̍t ông chiū ut-būn bô hoaⁿ-hí; kàu Sat-má-lī-a tò-khì i ê chhù.