1大衛王歲chōe年老，雖然kā伊蓋被，猶原bōe燒。Tāi-pi̍t ông hè-chōe nî-lāu, sui-jiân kā i kah-phē, iû-goân bōe sio.

2伊hiah-ê奴僕就kā伊講，Tio̍h kā我ê主我ê王chhē一個在室女，hō͘伊khiā tī王ê面前來奉承伊；koh睏tī你ê胸前，thang hō͘我ê主我ê王得tio̍h燒。I hiah ê lô͘-po̍k chiū kā i kóng, Tio̍h kā góa ê chú góa ê ông chhē chi̍t ê chāi-sek-lú, hō͘ i khiā tī ông ê bīn-chêng lâi hōng-sêng i; koh khùn tī lí ê heng-chêng, thang hō͘ góa ê chú góa ê ông tit-tio̍h sio.

3就tī以色列ê四境chhē súi ê cha-bó͘-gín-ná；chhē-tio̍h Su-liām一個女子，名A-pí-soah，帶到王hia。Chiū tī Í-sek-lia̍t ê sì-kéng chhē súi ê cha-bó͘-gín-ná; chhē--tio̍h Su-liām chi̍t ê lú-chú, miâ A-pí-soah, tòa kàu ông hia.

4Chit-ê cha-bó͘-gín-ná súi到極；伊奉承王，伺候伊。總是王無親近伊。Chit ê cha-bó͘-gín-ná súi kàu-ke̍k; i hōng-sêng ông, su-hāu i. Chóng-sī ông bô chhin-kūn i.

5Hit時Hap-ki̍p ê kiáⁿ A-to-nî-ngá自高，講，我beh做王；就為家己備辦車，馬兵koh五十人走tī伊ê頭前。Hit-sî Hap-ki̍p ê kiáⁿ A-to-nî-ngá chū-ko, kóng, Góa beh chòe-ông; chiū ūi ka-kī pī-pān chhia, bé-peng koh gō͘-cha̍p lâng cháu tī i ê thâu-chêng.

6伊ê老父平時m̄-bat hō͘伊憂悶，m̄-bat對伊講，你怎樣án-ni做？伊生做不止好；伊出世tī Ap-sa-li王ê尾後。I ê lāu-pē pêng-sî m̄-bat hō͘ i iu-būn, m̄-bat tùi i kóng, Lí cháiⁿ-iūⁿ án-ni chòe? I siⁿ-chòe put-chí hó; i chhut-sì tī Ap-sa-liông ê bé-āu.

7伊kap Sé-ló͘-ngá ê kiáⁿ Iok-ap，kap祭司A-pí-a-tha參詳；in就tè A-to-nî-ngá，來幫贊伊。I kap Sé-ló͘-ngá ê kiáⁿ Iok-ap, kap chè-si A-pí-a-tha chham-siông; in chiū tè A-to-nî-ngá, lâi pang-chān i.

8總是祭司Sat-tok，kap Iâ-hô-iâ-tāi ê kiáⁿ Pí-ná-ngá，先知Ná-tan，kap Sī-múi，Lī-í，kap大衛ê勇士，lóng無為A-to-nî-ngá。Chóng-sī chè-si Sat-tok, kap Iâ-hô-iâ-tāi ê kiáⁿ Pí-ná-ngá, sian-ti Ná-tan, kap Sī-múi, Lī-í, kap Tāi-pi̍t ê ióng-sū, lóng bô ūi A-to-nî-ngá.

9A-to-nî-ngá tī近Ún-lô-kiat、Só-hi-lia̍t ê石磐邊，thâi羊、牛，kap肥ê cheng-siⁿ，請伊ê眾兄弟，就是王ê kiáⁿ，以及猶大所有做王ê人臣ê眾人。A-to-nî-ngá tī kūn Ún-lô-kiat, Só-hi-lia̍t ê chio̍h-pôaⁿ piⁿ, thâi iûⁿ, gû, kap pûi ê cheng-siⁿ, chhiáⁿ i ê chèng hiaⁿ-tī, chiū-sī ông ê kiáⁿ, í-ki̍p Iû-tāi só͘ ū chòe ông ê jîn-sîn ê chèng-lâng.

10獨獨先知Ná-tan，kap Pí-ná-ngá，以及勇士，kap伊ê小弟所羅門，伊lóng無請in。To̍k-to̍k sian-ti Ná-tan, kap Pí-ná-ngá, í-ki̍p ióng-sū, kap i ê sió-tī Só͘-lô-bûn, i lóng bô chhiáⁿ in.

11Ná-tan kā所羅門ê老母Poa̍t-sī-pa講，Hap-ki̍p ê kiáⁿ A-to-nî-ngá做王lah，你無聽見mah？咱ê主大衛也m̄知。Ná-tan kā Só͘-lô-bûn ê lāu-bú Poa̍t-sī-pa kóng, Hap-ki̍p ê kiáⁿ A-to-nî-ngá chòe-ông lah, lí bô thiaⁿ-kìⁿ mah? Lán ê chú Tāi-pi̍t iā m̄-chai.

12Taⁿ你來，我替你打算，thang保全你ê性命，kap你ê kiáⁿ所羅門ê性命。Taⁿ lí lâi, góa thòe lí táⁿ-sǹg, thang pó-choân lí ê sìⁿ-miā, kap lí ê kiáⁿ Só͘-lô-bûn ê sìⁿ-miā.

13你入去見大衛王，kā伊講，我ê主我ê王ah，你kiám m̄-bat對你ê女婢chiù-chōa講，你ê kiáⁿ所羅門beh續接我做王，伊beh坐我ê位mah？怎樣A-to-nî-ngá做王ah？Lí ji̍p--khì kìⁿ Tāi-pi̍t ông, kā i kóng, Góa ê chú góa ê ông ah, lí kiám m̄-bat tùi lí ê lú-pī chiù-chōa kóng, Lí ê kiáⁿ Só͘-lô-bûn beh sòa-chiap góa chòe-ông, i beh chē góa ê ūi mah? cháiⁿ-iūⁿ A-to-nî-ngá chòe-ông ah?

14你tī-hia kap王講話ê時，我也tè你ê ka-chiah後入去，來干證你ê話是實。Lí tī-hia kap ông kóng-ōe ê sî, góa iā tè lí ê ka-chiah-āu ji̍p--khì, lâi kan-chèng lí ê ōe sī si̍t.

15Poa̍t-sī-pa入去房內見王，王真老；Su-liām ê cha-bó͘-gín-ná A-pí-soah teh伺候王。Poa̍t-sī-pa ji̍p--khì pâng-lāi kìⁿ ông, ông chin lāu; Su-liām ê cha-bó͘-gín-ná A-pí-soah teh su-hāu ông.

16Poa̍t-sī-pa鞠躬拜王；王講，你beh甚麼？Poa̍t-sī-pa kiok-kiong pài ông; ông kóng, Lí beh sím-mi̍h?

17伊kā伊講，我ê主ah，你bat kí耶和華你ê上帝，來對你ê女婢chiù-chōa，講，你ê kiáⁿ所羅門beh續接我做王，伊beh坐tī我ê位。I kā i kóng, Góa ê chú ah, lí bat kí Iâ-hô-hoa lí ê Siōng-tè, lâi tùi lí ê lú-pī chiù-chōa, kóng, Lí ê kiáⁿ Só͘-lô-bûn beh sòa-chiap góa chòe-ông, i beh chē tī góa ê ūi.

18看ah，taⁿ A-to-nî-ngá做王，我ê主我ê王你也m̄知。Khòaⁿ ah, taⁿ A-to-nî-ngá chòe-ông, góa ê chú góa ê ông lí iā m̄-chai.

19伊有thâi chōe-chōe牛，肥ê cheng-siⁿ，kap羊，請王ê眾kiáⁿ，kap祭司A-pí-a-tha，kap軍長Iok-ap；獨獨你ê奴僕所羅門，伊無請。I ū thâi chōe-chōe gû, pûi ê cheng-siⁿ, kap iûⁿ, chhiáⁿ ông ê chèng-kiáⁿ, kap chè-si A-pí-a-tha, kap kun-tiúⁿ Iok-ap; to̍k-to̍k lí ê lô͘-po̍k Só͘-lô-bûn, i bô chhiáⁿ.

20我ê主我ê王ah，以色列眾人ê目睭lóng teh看你，thèng候你kā in講，是誰 beh續接我ê主我ê王，來坐伊ê位。Góa ê chú góa ê ông ah, Í-sek-lia̍t chèng-lâng ê ba̍k-chiu lóng teh khòaⁿ lí, thèng-hāu lí kā in kóng, chī-chūi beh sòa-chiap góa ê chú góa ê ông, lâi chē i ê ūi.

21若無，到我ê主我ê王kap列祖相kap睏了後，我kap我ê kiáⁿ所羅門beh算做有罪ê人。Nā bô, kàu góa ê chú góa ê ông kap lia̍t-chó͘ saⁿ-kap khùn liáu-āu, góa kap góa ê kiáⁿ Só͘-lô-bûn beh sǹg-chòe ū-chōe ê lâng.

22看ah，伊iáu teh kap王講話ê時，先知Ná-tan也入來。Khòaⁿ ah, i iáu teh kap ông kóng-ōe ê sî, sian-ti Ná-tan iā ji̍p-lâi.

23有人kā王講，先知Ná-tan tī-chia。Ná-tan入去王ê面前，仆tī地裡拜王。Ū lâng kā ông kóng, Sian-ti Ná-tan tī-chia. Ná-tan ji̍p-khì ông ê bīn-chêng, phak tī tōe--nih pài ông.

24Ná-tan講，我ê主我ê王，你kiám有講，A-to-nî-ngá beh續接我做王，beh坐我ê位mah？Ná-tan kóng, Góa ê chú góa ê ông, lí kiám ū kóng, A-to-nî-ngá beh sòa-chiap góa chòe-ông, beh chē góa ê ūi mah?

25因為今á日伊落去，thâi chōe-chōe牛，kap肥ê cheng-siⁿ，kap羊，請王ê眾kiáⁿ，kap chiah-ê軍長，kap祭司A-pí-a-tha；看ah，in tī伊ê面前lim食，就講，願A-to-nî-ngá王萬歲。In-ūi kin-á-ji̍t i lo̍h--khì, thâi chōe-chōe gû, kap pûi ê cheng-siⁿ, kap iûⁿ, chhiáⁿ ông ê chèng-kiáⁿ, kap chiah ê kun-tiúⁿ, kap chè-si A-pí-a-tha; khòaⁿ ah, in tī i ê bīn-chêng lim-chia̍h, chiū kóng, Goān A-to-nî-ngá ông bān-sòe.

26獨獨我，就是你ê奴僕，kap祭司Sat-tok，kap Iâ-hô-iâ-tāi ê kiáⁿ Pí-ná-ngá，以及你ê奴僕所羅門，伊lóng無請。To̍k-to̍k góa, chiū-sī lí ê lô͘-po̍k, kap chè-si Sat-tok, kap Iâ-hô-iâ-tāi ê kiáⁿ Pí-ná-ngá, í-ki̍p lí ê lô͘-po̍k Só͘-lô-bûn, i lóng bô chhiáⁿ.

27這是我ê主我ê王所做，也無kā你ê奴僕講，是誰 beh續接我ê主我ê王，坐伊ê位mah？Che sī góa ê chú góa ê ông só͘ chòe, iā bô kā lí ê lô͘-po̍k kóng, chī-chūi beh sòa-chiap góa ê chú góa ê ông, chē i ê ūi mah?

28大衛王應講，Kā我叫Poa̍t-sī-pa來。伊就入來王ê面前，tī王ê面前khiā-teh。Tāi-pi̍t ông ìn kóng, Kā góa kiò Poa̍t-sī-pa lâi. I chiū ji̍p-lâi ông ê bīn-chêng, tī ông ê bīn-chêng khiā--teh.

29王chiù-chōa講，我kí救我ê性命脫離一切ê患難，永活ê耶和華來講，Ông chiù-chōa kóng, Góa kí kiù góa ê sìⁿ-miā thoat-lī it-chhè ê hoān-lān, éng-oa̍h ê Iâ-hô-hoa lâi kóng,

30我既然kí耶和華以色列ê上帝對你chiù-chōa，講，你ê kiáⁿ所羅門beh續接我做王，伊beh坐我ê位來替我，我今á日beh照án-ni行。Góa kì-jiân kí Iâ-hô-hoa Í-sek-lia̍t ê Siōng-tè tùi lí chiù-chōa, kóng, Lí ê kiáⁿ Só͘-lô-bûn beh sòa-chiap góa chòe-ông, i beh chē góa ê ūi lâi thòe góa, góa kin-á-ji̍t beh chiàu án-ni kiâⁿ.

31Poa̍t-sī-pa就鞠躬仆tī地裡，拜王，講，願我ê主大衛王萬萬歲。Poa̍t-sī-pa chiū kiok-kiong phak tī tōe--nih, pài ông, kóng, Goān góa ê chú Tāi-pi̍t ông bān-bān-sòe.

32大衛王koh講，Kā我叫祭司Sat-tok，先知Ná-tan，kap Iâ-hô-iâ-tāi ê kiáⁿ Pí-ná-ngá來；in就lóng來王ê面前。Tāi-pi̍t ông koh kóng, Kā góa kiò chè-si Sat-tok, sian-ti Ná-tan, kap Iâ-hô-iâ-tāi ê kiáⁿ Pí-ná-ngá lâi; in chiū lóng lâi ông ê bīn-chêng.

33王kā in講，Tio̍h chhōa lín ê主hiah-ê奴僕kap lín去，hō͘我ê kiáⁿ所羅門騎我ê騾，hō͘伊落去到Ki-hùn；Ông kā in kóng, Tio̍h chhōa lín ê chú hiah ê lô͘-po̍k kap lín khì, hō͘ góa ê kiáⁿ Só͘-lô-bûn khiâ góa ê lô, hō͘ i lo̍h-khì kàu Ki-hùn;

34tī-hia祭司Sat-tok，kap先知Ná-tan，tio̍h用油抹伊做以色列王；lín也tio̍h pûn哨角，講，願所羅門王萬歲。tī-hia chè-si Sat-tok, kap sian-ti Ná-tan, tio̍h ēng iû boah i chòe Í-sek-lia̍t ông; lín iā tio̍h pûn sàu-kak, kóng, Goān Só͘-lô-bûn ông bān-sòe.

35然後tè伊上來，伊beh來坐我ê位，續接我做王；因為我設立伊做以色列kap猶大ê君王。Jiân-āu tè i chiūⁿ-lâi, i beh lâi chē góa ê ūi, sòa-chiap góa chòe-ông; in-ūi góa siat-li̍p i chòe Í-sek-lia̍t kap Iû-tāi ê kun-ông.

36Iâ-hô-iâ-tāi ê kiáⁿ Pí-ná-ngá 應王講，A-bēng，願耶和華我ê主我ê王ê上帝也án-ni講。Iâ-hô-iâ-tāi ê kiáⁿ Pí-ná-ngá ìn ông kóng, A-bēng, goān Iâ-hô-hoa góa ê chú góa ê ông ê Siōng-tè iā án-ni kóng.

37耶和華怎樣kap我ê主我ê王tī-teh，願伊照án-ni kap所羅門tī-teh，koh hō͘伊ê國位比我ê主大衛王ê國位koh-khah大。Iâ-hô-hoa cháiⁿ-iūⁿ kap góa ê chú góa ê ông tī-teh, goān I chiàu án-ni kap Só͘-lô-bûn tī-teh, koh hō͘ i ê kok-ūi pí góa ê chú Tāi-pi̍t ông ê kok-ūi koh khah tōa.

38Tùi án-ni，祭司Sat-tok，先知Ná-tan，Iâ-hô-iâ-tāi ê kiáⁿ Pí-ná-ngá，kap Ki-lī-thê人、Pí-lī-thê人，lóng落去，hō͘所羅門騎大衛王ê騾，送伊到Ki-hùn。Tùi án-ni chè-si Sat-tok, sian-ti Ná-tan, Iâ-hô-iâ-tāi ê kiáⁿ Pí-ná-ngá, kap Ki-lī-thê lâng, Pí-lī-thê lâng, lóng lo̍h-khì, hō͘ Só͘-lô-bûn khiâ Tāi-pi̍t ông ê lô, sàng i kàu Ki-hùn.

39祭司Sat-tok就tùi布棚內the̍h貯油ê角，用油抹所羅門；人就pûn哨角，眾百姓lóng講，願所羅門王萬歲。Chè-si Sat-tok chiū tùi Pò͘-pîⁿ-lāi the̍h tóe-iû ê kak, ēng iû boah Só͘-lô-bûn; lâng chiū pûn sàu-kak, chèng peh-sìⁿ lóng kóng, Goān Só͘-lô-bûn ông bān-sòe.

40眾百姓tè伊上來，koh pûn笛á，大大歡喜，致到地因為in ê聲到beh裂開。Chèng peh-sìⁿ tè i chiūⁿ--lâi, koh pûn ta̍t-á, tōa-tōa hoaⁿ-hí, tì-kàu tōe in-ūi in ê siaⁿ kàu beh li̍h-khui.

41A-to-nî-ngá以及kap伊tī-teh hiah-ê人客tú-á食桌 soah聽見。Iok-ap聽見哨角ê聲就講，城內怎樣有hōa-hōa哮ê聲ah？伊iáu teh講ê時，看ah，祭司A-pí-a-tha ê kiáⁿ約拿單來。A-to-nî-ngá í-ki̍p kap i tī-teh hiah ê lâng-kheh tú-á chia̍h-toh soah thiaⁿ-kìⁿ. Iok-ap thiaⁿ-kìⁿ sàu-kak ê siaⁿ chiū kóng, Siâⁿ-lāi cháiⁿ-iūⁿ ū hōa-hōa-háu ê siaⁿ ah? I iáu teh kóng ê sî, khòaⁿ ah, chè-si A-pí-a-tha ê kiáⁿ Iok-ná-tan lâi.

42A-to-nî-ngá kā伊講，入來，你是妥當人，必定是報好消息。A-to-nî-ngá kā i kóng, Ji̍p-lâi, lí sī thò-tòng lâng, pit-tiāⁿ sī pò hó siau-sit.

43約拿單應A-to-nî-ngá講，有影咱ê主大衛王已經設立所羅門做王；Iok-ná-tan ìn A-to-nî-ngá kóng, Ū-iáⁿ lán ê chú Tāi-pi̍t ông í-keng siat-li̍p Só͘-lô-bûn chòe-ông;

44王差祭司Sat-tok，先知Ná-tan，Iâ-hô-iâ-tāi ê kiáⁿ Pí-ná-ngá，kap Ki-lī-thê人，Pí-lī-thê人，kap所羅門去，in hō͘伊騎王ê騾；ông chhe chè-si Sat-tok, sian-ti Ná-tan, Iâ-hô-iâ-tāi ê kiáⁿ Pí-ná-ngá, kap Ki-lī-thê lâng, Pí-lī-thê lâng, kap Só͘-lô-bûn khì, in hō͘ i khiâ ông ê lô;

45祭司Sat-tok kap先知Ná-tan，tī Ki-hùn已經抹伊做王；in lóng tùi hia上來真歡喜，致到城應聲；這就是lín所聽見ê聲；chè-si Sat-tok kap sian-ti Ná-tan, tī Ki-hùn í-keng boah i chòe-ông; in lóng tùi hia chiūⁿ-lâi chin hoaⁿ-hí, tì-kàu siâⁿ ìn siaⁿ; che chiū-sī lín só͘ thiaⁿ-kìⁿ ê siaⁿ;

46koh所羅門已經坐國位。koh Só͘-lô-bûn í-keng chē kok-ūi.

47王ê人臣也來kā咱ê主大衛王祝福，講，願你ê上帝hō͘所羅門ê名，比你ê名，khah贏，hō͘伊ê國位，比你ê國位，khah大；王就tī床裡àⁿ落去拜。Ông ê jîn-sîn iā lâi kā lán ê chú Tāi-pi̍t ông chiok-hok, kóng, Goān lí ê Siōng-tè hō͘ Só͘-lô-bûn ê miâ, pí lí ê miâ, khah-iâⁿ, hō͘ i ê kok-ūi, pí lí ê kok-ūi, khah-tōa; ông chiū tī chhn̂g--nih àⁿ--lo̍h-khì pài.

48王也án-ni講，耶和華以色列ê上帝是應該o-ló ê，因為伊賞賜我有一人今á日坐我ê位，我也親目看見。Ông iā án-ni kóng, Iâ-hô-hoa Í-sek-lia̍t ê Siōng-tè sī eng-kai o-ló--ê, in-ūi I siúⁿ-sù góa ū chi̍t-lâng kin-á-ji̍t chē góa ê ūi, góa iā chhin-ba̍k khòaⁿ-kìⁿ.

49Hiah-ê kap A-to-nî-ngá tī-teh ê人客lóng驚惶起來，ta̍k人行伊n ê路。Hiah-ê kap A-to-nî-ngá tī-teh ê lâng-kheh lóng kiaⁿ-hiâⁿ khí-lâi, ta̍k-lâng kiâⁿ in ê lō͘.

50A-to-nî-ngá為tio̍h所羅門就驚，起來去擒壇角。A-to-nî-ngá ūi-tio̍h Só͘-lô-bûn chiū kiaⁿ, khí-lâi khì khîⁿ tôaⁿ-kak.

51有人kā所羅門講，看ah，A-to-nî-ngá驚所羅門王，因為伊擒壇角，講，願所羅門王今á日對我chiù-chōa，的確無用刀thâi死伊ê奴僕。Ū lâng kā Só͘-lô-bûn kóng, Khòaⁿ ah, A-to-nî-ngá kiaⁿ Só͘-lô-bûn ông, in-ūi i khîⁿ tôaⁿ-kak, kóng, Goān Só͘-lô-bûn ông kin-á-ji̍t tùi góa chiù-chōa, tek-khak bô ēng to thâi-sí i ê lô͘-po̍k.

52所羅門講，伊若beh做好人，一支頭毛也bōe ka-la̍uh tī地裡；若看伊有pháiⁿ，就的確tio̍h死。Só͘-lô-bûn kóng, I nā beh chòe hó-lâng, chi̍t ki thâu-mn̂g iā bōe ka-la̍uh tī tōe--nih; nā khòaⁿ i ū pháiⁿ, chiū tek-khak tio̍h sí.

53所羅門王就差人去，in就帶伊tùi壇裡落來。伊就來拜tī所羅門王ê面前。所羅門kā伊講，你tò去你ê厝。Só͘-lô-bûn ông chiū chhe lâng khì, in chiū tòa i tùi tôaⁿ--nih lo̍h-lâi. I chiū lâi pài tī Só͘-lô-bûn ông ê bīn-chêng. Só͘-lô-bûn kā i kóng, Lí tò-khì lí ê chhù.

1大衛beh死ê期近lah；就吩咐伊ê kiáⁿ所羅門講，Tāi-pi̍t beh sí ê kî kūn--lah; chiū hoan-hù i ê kiáⁿ Só͘-lô-bûn kóng,

2我teh-beh行世間眾人所tio̍h行ê路；所以你tio̍h勇敢，做大丈夫；Góa teh-beh kiâⁿ sè-kan chèng-lâng só͘ tio̍h kiâⁿ ê lō͘; só͘-í lí tio̍h ióng-kám, chòe tāi-tiōng-hu;

3守耶和華你上帝所交代你守ê，行伊ê道路，守伊ê律例，伊ê誡命，伊ê法度，伊干證ê話，照所寫tī摩西律法ê冊裡ê；án-ni你無論做甚麼，無論tùi toh落去，lóng會興通；siú Iâ-hô-hoa lí Siōng-tè só͘ kau-tài lí siú ê, kiâⁿ I ê tō-lō͘, siú I ê lu̍t-lē, I ê kài-bēng, I ê hoat-tō͘, I kan-chèng ê ōe, chiàu só͘ siá tī Mô͘-se lu̍t-hoat ê chheh--nih ê; án-ni lí bô-lūn chòe sím-mi̍h, bô-lūn tùi toh-lo̍h khì, lóng ōe heng-thong;

4也hō͘耶和華應驗伊所應允我ê話講，你ê kiáⁿ孫若謹慎伊ê路，盡心盡意誠實行tī我ê面前，就你ê後裔坐以色列ê國位永無斷。iā hō͘ Iâ-hô-hoa èng-giām I só͘ èng-ún góa ê ōe kóng, Lí ê kiáⁿ-sun nā kín-sīn i ê lō͘, chīn-sim chīn-ì sêng-si̍t kiâⁿ tī Góa ê bīn-chêng, chiū lí ê hō͘-è chē Í-sek-lia̍t ê kok-ūi éng bô tn̄g.

5你也知Sé-ló͘-ngá ê kiáⁿ Iok-ap對我所行ê，伊對以色列兩個軍長所行ê，就是Nî-jíⁿ ê kiáⁿ Ap-nî-jíⁿ，kap Ek-thiap ê kiáⁿ A-má-sat，伊thâi死in；伊tī太平ê時流in ê血，親像tī交戰ê時一樣，將chit-ê交戰ê血bak-tio̍h伊ê腰所hâ ê帶，kap伊ê腳所穿ê鞋。Lí iā chai Sé-ló͘-ngá ê kiáⁿ Iok-ap tùi góa só͘ kiâⁿ ê, i tùi Í-sek-lia̍t nn̄g ê kun-tiúⁿ só͘ kiâⁿ ê, chiū-sī Nî-jíⁿ ê kiáⁿ Ap-nî-jíⁿ, kap Ek-thiap ê kiáⁿ A-má-sat, i thâi-sí in; i tī thài-pêng ê sî lâu in ê huih, chhin-chhiūⁿ tī kau-chiàn ê sî chi̍t-iūⁿ, chiong chit ê kau-chiàn ê huih bak-tio̍h i ê io só͘ hâ ê tòa, kap i ê kha só͘ chhēng ê ôe.

6所以你tio̍h照你ê智慧來行，m̄-thang容允伊白頭毛安然落陰間。Só͘-í lí tio̍h chiàu lí ê tì-hūi lâi kiâⁿ, m̄-thang iông-ún i pe̍h-thâu-mn̂g an-jiân lo̍h im-kan.

7你tio̍h好款待Ki-lia̍t人Pa-se-lâi hiah-ê kiáⁿ，hō͘ in常常tī你ê桌食；因為我閃避你ê兄Ap-sa-liông ê時，in án-ni款待我。Lí tio̍h hó khoán-thāi Ki-lia̍t lâng Pa-se-lâi hiah ê kiáⁿ, hō͘ in siông-siông tī lí ê toh chia̍h; in-ūi góa siám-pī lí ê hiaⁿ Ap-sa-liông ê sî, in án-ni khoán-thāi góa.

8看ah，kap你tī-teh-ê有Pa-hō͘-lîm ê便雅憫人，Ki-la̍h ê kiáⁿ Sī-múi；我去Má-hap-liām ê日，伊用重ê咒詛咒詛我；總是伊有落約旦迎接我，我就kí耶和華對伊chiù-chōa講，我無beh用刀thâi你。Khòaⁿ ah, kap lí tī-teh-ê ū Pa-hō͘-lîm ê Piān-ngá-bín lâng, Ki-la̍h ê kiáⁿ Sī-múi; góa khì Má-hap-liām ê ji̍t, i ēng tāng ê chiù-chó͘ chiù-chó͘ góa; chóng-sī i ū lo̍h Iok-tàn ngiâ-chih góa, góa chiū kí Iâ-hô-hoa tùi i chiù-chōa kóng, Góa bô beh ēng to thâi lí.

9Taⁿ你莫得算伊無罪，因為你是聰明ê人，也會知tio̍h怎樣款待伊，tio̍h hō͘伊白頭毛流血落陰間。Taⁿ lí bo̍h-tit sǹg i bô-chōe, in-ūi lí sī chhang-miâ ê lâng, iā ōe chai tio̍h cháiⁿ-iūⁿ khoán-thāi i, tio̍h hō͘ i pe̍h-thâu-mn̂g lâu-huih lo̍h im-kan.

10大衛kap伊ê列祖相kap睏，埋葬tī大衛ê城。Tāi-pi̍t kap i ê lia̍t-chó͘ saⁿ-kap khùn, bâi-chòng tī Tāi-pi̍t ê siâⁿ.

11大衛做以色列王共四十年；tī Hi-pek-lûn做王七年，tī耶路撒冷做王三十三年。Tāi-pi̍t chòe Í-sek-lia̍t ông kiōng sì-cha̍p nî; tī Hi-pek-lûn chòe-ông chhit-nî, tī Iâ-lō͘-sat-léng chòe-ông saⁿ-cha̍p-saⁿ nî.

12所羅門坐伊ê老父大衛ê位；伊ê國堅固到極。Só͘-lô-bûn chē i ê lāu-pē Tāi-pi̍t ê ūi; i ê kok kian-kò͘ kàu-ke̍k.

13Hap-ki̍p ê kiáⁿ，A-to-nî-ngá，去見所羅門ê老母Poa̍t-sī-pa；伊問伊講，你來是平安mah？應講，平安。Hap-ki̍p ê kiáⁿ, A-to-nî-ngá, khì kìⁿ Só͘-lô-bûn ê lāu-bú Poa̍t-sī-pa; i mn̄g i kóng, Lí lâi sī pêng-an mah? Ìn kóng, Pêng-an.

14Koh講，我有tāi-chì beh對你講。伊講，做你講。Koh kóng, Góa ū tāi-chì beh tùi lí kóng. I kóng, Chòe lí kóng.

15A-to-nî-ngá講，你知國本是我ê，以色列眾人也lóng意向我，ài我做王；總是國反tńg歸我ê小弟，因為是tùi耶和華hō͘伊。A-to-nî-ngá kóng, Lí chai kok pún sī góa-ê, Í-sek-lia̍t chèng-lâng iā lóng ì-hiòng góa, ài góa chòe-ông; chóng-sī kok hoán-tńg kui góa ê sió-tī, in-ūi sī tùi Iâ-hô-hoa hō͘ i.

16Taⁿ我有一件事求你，ǹg望你莫得推辭我。伊講，做你講。Taⁿ góa ū chi̍t kiāⁿ sū kiû lí, ǹg-bāng lí bo̍h-tit the-sî góa. I kóng, Chòe lí kóng.

17伊講，求你`對所羅門王講，hō͘伊將Su-liām ê cha-bó͘-kiáⁿ A-pí-soah賞賜我做bó͘，因為王的確無推辭你。I kóng, Kiû lí tùi Só͘-lô-bûn ông kóng, hō͘ i chiong Su-liām ê cha-bó͘-kiáⁿ A-pí-soah siúⁿ-sù góa chòe-bó͘, in-ūi ông tek-khak bô the-sî lí.

18Poa̍t-sī-pa講，好，我替你kā王講。Poa̍t-sī-pa kóng, Hó, góa thòe lí kā ông kóng.

19Tùi án-ni，Poa̍t-sī-pa去見所羅門王，beh為tio̍h A-to-nî-ngá kā伊講；王起來迎接伊，對伊鞠躬，koh坐伊ê位，吩咐人為王ê老母設座位；伊就坐tī王ê chiàⁿ-pêng。Tùi án-ni Poa̍t-sī-pa khì kìⁿ Só͘-lô-bûn ông, beh ūi-tio̍h A-to-nî-ngá kā i kóng; ông khí-lâi ngiâ-chih i, tùi i kiok-kiong, koh chē i ê ūi, hoan-hù lâng ūi ông ê lāu-bú siat chō-ūi; i chiū chē tī ông ê chiàⁿ-pêng.

20伊就講，我有一件小khóa事求你，請你莫得推辭我。王kā伊講，我ê老母ah，做你講；我無beh推辭你。I chiū kóng, Góa ū chi̍t-kiāⁿ sió-khóa sū kiû lí, chhiáⁿ lí bo̍h--tit the-sî góa. Ông kā i kóng, Góa ê lāu-bú ah, chòe lí kóng; góa bô beh the-sî lí.

21伊講，願用Su-liām ê cha-bó͘-gín-ná，A-pí-soah，hō͘你ê兄A-to-nî-ngá做bó͘。I kóng, Goān ēng Su-liām ê cha-bó͘-gín-ná, A-pí-soah, hō͘ lí ê hiaⁿ A-to-nî-ngá chòe-bó͘.

22所羅門王應伊ê老母講，你啥事為tio̍h A-to-nî-ngá求Su-liām ê cha-bó͘-gín-ná，A-pí-soah ah？也tio̍h替伊求國；因為伊是我ê兄；就是tio̍h為伊，kap祭司A-pí-a-tha，kap Sé-ló͘-ngá ê kiáⁿ Iok-ap來求。Só͘-lô-bûn ông ìn i ê lāu-bú kóng, Lí siáⁿ-sū ūi-tio̍h A-to-nî-ngá kiû Su-liām ê cha-bó͘-gín-ná, A-pí-soah ah? iā tio̍h thòe i kiû kok; in-ūi i sī góa ê hiaⁿ; chiū-sī tio̍h ūi i, kap chè-si A-pí-a-tha, kap Sé-ló͘-ngá ê kiáⁿ Iok-ap lâi kiû.

23所羅門王就kí耶和華來chiù-chōa講，A-to-nî-ngá講這話是害家己ê性命；若無，願上帝加倍責罰我。Só͘-lô-bûn ông chiū kí Iâ-hô-hoa lâi chiù-chōa kóng, A-to-nî-ngá kóng che ōe sī hāi ka-kī ê sìⁿ-miā; nā-bô, goān Siōng-tè ka-pē chek-hoa̍t góa.

24耶和華堅固我，hō͘我坐我ê父大衛ê位，照伊所應允ê話，kā我建立家；我kí伊ê永活來chiù-chōa，A-to-nî-ngá今á日的確死。Iâ-hô-hoa kian-kò͘ góa, hō͘ góa chē góa ê pē Tāi-pi̍t ê ūi, chiàu I só͘ èng-ún ê ōe, kā góa kiàn-li̍p ke; góa kí I ê éng-oa̍h lâi chiù-chōa, A-to-nî-ngá kin-á-ji̍t tek-khak sí.

25所羅門王就差Iâ-hô-iâ-tāi ê kiáⁿ Pí-ná-ngá去；伊就phah伊，hō͘伊死。Só͘-lô-bûn ông chiū chhe Iâ-hô-iâ-tāi ê kiáⁿ Pí-ná-ngá khì; i chiū phah i, hō͘ i sí.

26王kā祭司A-pí-a-tha講，你tio̍h tò去A-ná-tu̍t，你ê田園hia；你應該tio̍h死，總是今a日我m̄ hō͘你死，因為你tī我ê父大衛ê面前有扛主耶和華ê櫃；koh我ê老父所受一切ê患難，你也kap伊受患難。Ông kā chè-si A-pí-a-tha kóng, Lí tio̍h tò--khì A-ná-tu̍t, lí ê chhân-hn̂g hia; lí eng-kai tio̍h sí, chóng-sī kin-a-ji̍t góa m̄ hō͘ lí sí, in-ūi lí tī góa ê pē Tāi-pi̍t ê bīn-chêng ū kng Chú Iâ-hô-hoa ê kūi; koh góa ê lāu-pē só͘ siū it-chhè ê hoān-lān, lí iā kap i siū hoān-lān.

27所羅門就革逐A-pí-a-tha，m̄准伊做耶和華ê祭司；án-ni就應驗耶和華tī Sī-lô論Í-lī ê家所講ê話。Só͘-lô-bûn chiū kek-tio̍k A-pí-a-tha, m̄-chún i chòe Iâ-hô-hoa ê chè-si; án-ni chiū èng-giām Iâ-hô-hoa tī Sī-lô lūn Í-lī ê ke só͘ kóng ê ōe.

28Chit-ê消息傳到Iok-ap，Iok-ap就走，入耶和華ê布棚，擒壇角；因為Iok-ap雖然無tè Ap-sa-li王，總是tè A-to-nî-ngá。Chit ê siau-sit thoân kàu Iok-ap, Iok-ap chiū cháu, ji̍p Iâ-hô-hoa ê Pò͘-pîⁿ, khîⁿ tôaⁿ-kak; in-ūi Iok-ap sui-jiân bô tè Ap-sa-liông, chóng-sī tè A-to-nî-ngá.

29有人kā所羅門王講，Iok-ap走到耶和華ê布棚，taⁿ tī壇邊；所羅門就差Iâ-hô-iâ-tāi ê kiáⁿ pí-ná-ngá講，你去phah伊。Ū lâng kā Só͘-lô-bûn ông kóng, Iok-ap cháu kàu Iâ-hô-hoa ê Pò͘-pîⁿ, taⁿ tī tôaⁿ-piⁿ; Só͘-lô-bûn chiū chhe Iâ-hô-iâ-tāi ê kiáⁿ Pí-ná-ngá kóng, Lí khì phah i.

30Pí-ná-ngá到耶和華ê布棚，kā Iok-ap講，王án-ni講，你tio̍h出來。伊應講，M̄-ah，我beh死tī-chia。Pí-ná-ngá去回覆王講，Iok-ap án-ni講，án-ni 應我。Pí-ná-ngá kàu Iâ-hô-hoa ê Pò͘-pîⁿ, kā Iok-ap kóng, Ông án-ni kóng, Lí tio̍h chhut-lâi. I ìn kóng, M̄--ah, góa beh sí tī-chia. Pí-ná-ngá khì hê-hok ông kóng, Iok-ap án-ni kóng, án-ni ìn góa.

31王kā伊講，你thang照伊ê話行；phah死來埋葬伊；thang hō͘ Iok-ap無因端流人ê血hit-ê罪無歸tī我，kap我老父ê家。Ông kā i kóng, Lí thang chiàu i ê ōe kiâⁿ; phah-sí lâi bâi-chòng i; thang hō͘ Iok-ap bô in-toaⁿ lâu lâng ê huih hit ê chōe bô kui tī góa, kap góa lāu-pē ê ke.

32耶和華beh用伊ê血歸tī伊家己ê頭殼；因為伊phah比伊khah義，比伊khah好ê兩人，用刀thâi死伊；就是以色列ê軍長Nî-jíⁿ ê kiáⁿ Ap-nî-jíⁿ，kap猶大ê軍長Ek-thiap ê kiaN2A-má-sat；也我ê老父大衛m̄知。Iâ-hô-hoa beh ēng i ê huih kui tī i ka-kī ê thâu-khak; in-ūi i phah pí i khah gī, pí i khah hó ê nn̄g lâng, ēng to thâi-sí i; chiū-sī Í-sek-lia̍t ê kun-tiúⁿ Nî-jíⁿ ê kiáⁿ Ap-nî-jíⁿ, kap Iû-tāi ê kun-tiúⁿ Ek-thiap ê kiáⁿ A-má-sat; iā góa ê lāu-pē Tāi-pi̍t m̄-chai.

33Tùi án-ni，in ê血beh歸tī Iok-ap ê頭殼，kap伊ê後裔ê頭殼，到永遠；獨獨大衛kap伊ê後裔，伊ê家，伊ê位，beh tùi耶和華得tio̍h平安，到永遠。Tùi án-ni in ê huih beh kui tī Iok-ap ê thâu-khak, kap i ê hō͘-è ê thâu-khak, kàu éng-oán; to̍k-to̍k Tāi-pi̍t kap i ê hō͘-è, i ê ke, i ê ūi, beh tùi Iâ-hô-hoa tit-tio̍h pêng-an, kàu éng-oán.

34Iâ-hô-iâ-tāi ê kiáⁿ Pí-ná-ngá就上去，phah死伊，就埋葬伊tī曠野，tī伊家己ê厝。Iâ-hô-iâ-tāi ê kiáⁿ Pí-ná-ngá chiū chiūⁿ--khì, phah-sí i, chiū bâi-chòng i tī khòng-iá, tī i ka-kī ê chhù.

35王就設立Iâ-hô-iâ-tāi ê kiáⁿ Pí-ná-ngá替Iok-ap做軍長；koh設立祭司Sat-tok，來替A-pí-a-tha。Ông chiū siat-li̍p Iâ-hô-iâ-tāi ê kiáⁿ Pí-ná-ngá thòe Iok-ap chòe kun-tiúⁿ; koh siat-li̍p chè-si Sat-tok, lâi thòe A-pí-a-tha.

36王差人叫Sī-múi來，就kā伊講，你tio̍h為家己起厝tī耶路撒冷，khiā起tī-hia，m̄-thang出hia去別位。Ông chhe lâng kiò Sī-múi lâi, chiū kā i kóng, Lí tio̍h ūi ka-kī khí chhù tī Iâ-lō͘-sat-léng, khiā-khí tī-hia, m̄-thang chhut hia khì pa̍t-ūi.

37因為你tio̍h確實知，你出去過Khip-lûn溪，hit日tio̍h死，你ê血beh歸你家己ê頭殼。In-ūi lí tio̍h khak-si̍t chai, lí chhut-khì kè Khip-lûn khoe, hit-ji̍t tio̍h sí, lí ê huih beh kui lí ka-kī ê thâu-khak.

38Sī-múi應王講，Chit-ê話真好；我ê主我ê王所講ê，你ê奴僕beh án-ni行。Tùi án-ni，Sī-múi tiàm tī耶路撒冷chōe-chōe日。Sī-múi ìn ông kóng, Chit ê ōe chin-hó; góa ê chú góa ê ông só͘ kóng-ê, lí ê lô͘-po̍k beh án-ni kiâⁿ. Tùi án-ni Sī-múi tiàm tī Iâ-lō͘-sat-léng chōe-chōe ji̍t.

39過三年，Sī-múi兩個奴僕走到Ka-te̍k王Má-ka ê kiáⁿ A-kiat hia；有人kā Sī-múi講，你看，你ê奴僕tī Ka-te̍k。Kè saⁿ-nî, Sī-múi nn̄g ê lô͘-po̍k cháu kàu Ka-te̍k ông Má-ka ê kiáⁿ A-kiat hia; ū lâng kā Sī-múi kóng, Lí khòaⁿ, lí ê lô͘-po̍k tī Ka-te̍k.

40Sī-múi起來，備辦驢去Ka-te̍k，到A-kiat王hia，chhē伊ê奴僕；Sī-múi就去Ka-te̍k帶伊ê奴僕tò來。Sī-múi khí-lâi, pī-pān lû khì Ka-te̍k, kàu A-kiat ông hia, chhē i ê lô͘-po̍k; Sī-múi chiū khì Ka-te̍k tòa i ê lô͘-po̍k tò-lâi.

41有人kā所羅門講，Sī-múi出耶路撒冷去Ka-te̍k tò來。Ū lâng kā Só͘-lô-bûn kóng, Sī-múi chhut Iâ-lō͘-sat-léng khì Ka-te̍k tò-lâi.

42王就差人叫Sī-múi來，對伊講，我kiám m̄是叫你kí耶和華chiù-chōa，koh警戒你講，你tio̍h確實知你出來去外面，無論去toh落，hit日你tio̍h死mah？你應我講，我聽chit-ê話真好。Ông chiū chhe lâng kiò Sī-múi lâi, tùi i kóng, Góa kiám-m̄-sī kiò lí kí Iâ-hô-hoa chiù-chōa, koh kéng-kài lí kóng, Lí tio̍h khak-si̍t chai lí chhut-lâi khì gōa-bīn, bô-lūn khì toh-lo̍h, hit-ji̍t lí tio̍h sí mah? Lí ìn góa kóng, Góa thiaⁿ chit ê ōe chin hó.

43Taⁿ你啥事無執守kí耶和華所chiù-chōa-ê，kap我所警戒你ê命令ah？Taⁿ lí siáⁿ-sū bô chip-siú kí Iâ-hô-hoa só͘ chiù-chōa-ê, kap góa só͘ kéng-kài lí ê bēng-lēng ah?

44王koh kā Sī-múi講，你ê心所存ê pháiⁿ，就是你對阮老父大衛所行ê你家己lóng知；所以耶和華beh將你ê pháiⁿ歸你家己ê頭殼。Ông koh kā Sī-múi kóng, Lí ê sim só͘ chûn ê pháiⁿ, chiū-sī lí tùi goán lāu-pē Tāi-pi̍t só͘ kiâⁿ-ê lí ka-kī lóng chai; só͘-í Iâ-hô-hoa beh chiong lí ê pháiⁿ kui lí ka-kī ê thâu-khak.

45總是所羅門王beh得tio̍h福氣；koh大衛ê國位beh tī耶和華ê面前堅固，到永遠。Chóng-sī Só͘-lô-bûn ông beh tit-tio̍h hok-khì; koh Tāi-pi̍t ê kok-ūi beh tī Iâ-hô-hoa ê bīn-chêng kian-kò͘, kàu éng-oán.

46王就命令Iâ-hô-iâ-tāi ê kiáⁿ Pí-ná-ngá，伊就出去，phah hō͘伊死。Tùi án-ni，國位堅固tī所羅門ê手。Ông chiū bēng-lēng Iâ-hô-iâ-tāi ê kiáⁿ Pí-ná-ngá, i chiū chhut-khì, phah hō͘ i sí. Tùi án-ni kok-ūi kian-kò͘ tī Só͘-lô-bûn ê chhiú.

1所羅門kap埃及王法老結親，娶法老ê cha-bó͘-kiáⁿ做bó͘，帶伊入大衛城，thèng候伊起家己ê厝，kap耶和華ê殿，以及耶路撒冷四圍ê城牆完工。Só͘-lô-bûn kap Ai-ki̍p ông Hoat-ló kiat-chhin, chhōa Hoat-ló ê cha-bó͘-kiáⁿ chòe-bó͘, tòa i ji̍p Tāi-pi̍t siâⁿ, thèng-hāu i khí ka-kī ê chhù, kap Iâ-hô-hoa ê tiān, í-ki̍p Iâ-lō͘-sat-léng sì-ûi ê siâⁿ-chhiûⁿ oân-kang.

2當時iáu未有為耶和華ê名起殿；所以百姓猶原tī山頭壇獻祭。Tng-sî iáu-bē ū ūi Iâ-hô-hoa ê miâ khí tiān; só͘-í peh-sìⁿ iû-goân tī soaⁿ-thâu-tôaⁿ hiàn-chè.

3所羅門疼耶和華，行伊ê老父大衛ê法律，獨獨tī山頭壇獻祭燒香。Só͘-lô-bûn thiàⁿ Iâ-hô-hoa, kiâⁿ i ê lāu-pē Tāi-pi̍t ê hoat-lu̍t, to̍k-to̍k tī soaⁿ-thâu-tôaⁿ hiàn-chè sio-hiuⁿ.

4王去Ki-piàn獻祭，因為tī-hia有極大ê山頭壇；所羅門tī壇頂獻燒祭ê cheng-siⁿ一千隻。Ông khì Ki-piàn hiàn-chè, in-ūi tī-hia ū ke̍k-tōa ê soaⁿ-thâu-tôaⁿ; Só͘-lô-bûn tī tôaⁿ-téng hiàn sio-chè ê cheng-siⁿ chi̍t-chheng chiah.

5Tī Ki-piàn，暝時tī夢中耶和華對所羅門出現；上帝講，你ài我賞賜你甚麼？thang對我求。Tī Ki-piàn, mî--sî tī bāng-tiong Iâ-hô-hoa tùi Só͘-lô-bûn chhut-hiān; Siōng-tè kóng, Lí ài Góa siúⁿ-sù lí sím-mi̍h? thang tùi Góa kiû.

6所羅門講，你bat施大恩hō͘你ê奴僕，我ê父大衛，照伊用誠實、公義、正直ê心，kap你tī-teh，行tī你ê面前；你也kā伊留chit-ê大恩典，就是賞賜伊一個kiáⁿ坐伊ê位，親像今á日án-ni。Só͘-lô-bûn kóng, Lí bat si tōa-un hō͘ Lí ê lô͘-po̍k, góa ê pē Tāi-pi̍t, chiàu i ēng sêng-si̍t, kong-gī, chèng-ti̍t ê sim, kap Lí tī-teh, kiâⁿ tī Lí ê bīn-chêng; Lí iā kā i lâu chit ê tōa un-tián, chiū-sī siúⁿ-sù i chi̍t ê kiáⁿ chē i ê ūi, chhin-chhiūⁿ kin-á-ji̍t án-ni.

7耶和華我ê上帝ah，taⁿ你hō͘你ê奴僕續接我ê老父大衛做王；總是我是gín-ná，m̄知tio̍h怎樣出入。Iâ-hô-hoa góa ê Siōng-tè ah, taⁿ Lí hō͘ Lí ê lô͘-po̍k sòa-chiap góa ê lāu-pē Tāi-pi̍t chòe-ông; chóng-sī góa sī gín-ná, m̄-chai tio̍h cháiⁿ-iūⁿ chhut-ji̍p.

8你ê奴僕tiàm tī你所揀ê百姓中，chiah-ê百姓chōe到bōe算得，也算bōe了。Lí ê lô͘-po̍k tiàm tī Lí só͘ kéng ê peh-sìⁿ tiong, chiah ê peh-sìⁿ chōe kàu bōe-sǹg-tit, iā sǹg-bōe-liáu.

9求你賞賜你ê奴僕智慧ê心，thang判斷你ê百姓，來分別好pháiⁿ；因為是誰能判斷你chiah-chōe ê百姓ah？Kiû Lí siúⁿ-sù Lí ê lô͘-po̍k tì-hūi ê sim, thang phòaⁿ-toàn Lí ê peh-sìⁿ, lâi hun-piat hó-pháiⁿ; in-ūi chī-chūi ōe phòaⁿ-toàn Lí chiah-chōe ê peh-sìⁿ ah?

10因為所羅門求這，主歡喜伊ê話。In-ūi Só͘-lô-bûn kiû che, Chú hoaⁿ-hí i ê ōe.

11上帝對伊講，你既然求這，無為家己求歲壽無為家己求好額，也無求滅絕你ê對敵ê性命，單單為家己求智慧thang分別審判ê你；Siōng-tè tùi i kóng, Lí kì-jiân kiû che, bô ūi ka-kī kiû hè-siū bô ūi ka-kī kiû hó-gia̍h, iā bô kiû bia̍t-choa̍t lí ê tùi-te̍k ê sìⁿ-miā, toaⁿ-toaⁿ ūi ka-kī kiû tì-hūi thang hun-piat sím-phòaⁿ ê lí;

12看ah，我照你ê話來做；我賞賜你聰明智慧ê心；致到你以前無人親像你，你以後也無有人起來親像你。khòaⁿ ah, Góa chiàu lí ê ōe lâi chòe; Góa siúⁿ-sù lí chhang-miâ tì-hūi ê sim; tì-kàu lí í-chêng bô lâng chhin-chhiūⁿ lí, lí í-āu iā bô ū lâng khí-lâi chhin-chhiūⁿ lí.

13你所無求ê，我也hō͘你；就是好額、尊貴，hō͘你tī世間ê日子，列王無一個能比得你。Lí só͘ bô kiû-ê, Góa iā hō͘ lí; chiū-sī hó-gia̍h, chun-kùi, hō͘ lí tī sè-kan ê ji̍t-chí, lia̍t-ông bô chi̍t-ê ōe pí-tit lí.

14你若行我ê道路，守我ê律例，kap我ê誡命，學你ê老父大衛所行ê，我就beh hō͘你長歲壽。Lí nā kiâⁿ Góa ê tō-lō͘, siú Góa ê lu̍t-lē, kap Góa ê kài-bēng, o̍h lí ê lāu-pē Tāi-pi̍t só͘-kiâⁿ-ê, Góa chiū beh hō͘ lí tn̂g hè-siū.

15所羅門睏醒，知是眠夢；就去耶路撒冷khiā tī耶和華ê約櫃前，獻燒祭，kap謝恩祭；koh為tio̍h 伊hiah-ê人臣排設筵席。Só͘-lô-bûn khùn-chhíⁿ, chai sī bîn-bāng; chiū khì Iâ-lō͘-sat-léng khiā tī Iâ-hô-hoa ê iok-kūi chêng, hiàn sio-chè, kap siā-un-chè; koh ūi-tio̍h i hiah ê jîn-sîn pâi-siat iân-sia̍h.

16有一日兩個妓女來王hia，khiā tī王ê面前。Ū chi̍t-ji̍t nn̄g ê kī-lú lâi ông hia, khiā tī ông ê bīn-chêng.

17一個婦人人講，我ê主ah，我kap chit-ê婦人人相kap tòa一間厝；我kap伊tī厝內生一個kiáⁿ。Chi̍t ê hū-jîn-lâng kóng, Góa ê chú ah, góa kap chit ê hū-jîn-lâng saⁿ-kap tòa chi̍t keng chhù; góa kap i tī chhù-lāi siⁿ chi̍t ê kiáⁿ.

18我生kiáⁿ了後第三日，chit-ê婦人人也生gín-ná，阮相kap khiā起，除阮兩人以外，厝內無別人kap阮tī-teh。Góa siⁿ-kiáⁿ liáu-āu tē-saⁿ ji̍t, chit ê hū-jîn-lâng iā siⁿ gín-ná, goán saⁿ-kap khiā-khí, tû goán nn̄g-lâng í-gōa, chhù-lāi bô pa̍t-lâng kap goán tī-teh.

19暝時chit-ê婦人人ê kiáⁿ死，因為伊睏ê時teh-tio̍h伊。Mî-sî chit ê hū-jîn-lâng ê kiáⁿ sí, in-ūi i khùn ê sî teh-tio̍h i.

20伊半暝起來，thàn你ê女婢teh睏，tùi我ê身邊抱我ê gín-ná去，hē tī伊ê胸前，將伊ê死gín-ná hē tī我ê胸前。I pòaⁿ-mî khí-lâi, thàn lí ê lú-pī teh khùn, tùi góa ê sin-piⁿ phō góa ê gín-ná khì, hē tī i ê heng-chêng, chiong i ê sí gín-ná hē tī góa ê heng-chêng.

21天beh光ê時，我起來beh hō͘我ê gín-ná食奶；無phah算，gín-ná已經死；到天光，我詳細看，m̄是我所生ê kiáⁿ。Thiⁿ beh kng ê sî, góa khí-lâi beh hō͘ góa ê gín-ná chia̍h-lin; bô phah-sǹg, gín-ná í-keng sí; kàu thiⁿ kng, góa siông-sè khòaⁿ, m̄-sī góa só͘ siⁿ ê kiáⁿ.

22Hit-ê婦人人講，無，活ê是我ê kiáⁿ，死ê是你ê kiáⁿ；chit-ê婦人人講，無，死ê是你ê kiáⁿ，活ê是我ê kiáⁿ；in tī王ê面前án-ni相諍。Hit ê hū-jîn-lâng kóng, Bô, oa̍h--ê sī góa ê kiáⁿ, sí--ê sī lí ê kiáⁿ; chit ê hū-jîn-lâng kóng, Bô, sí--ê sī lí ê kiáⁿ, oa̍h--ê sī góa ê kiáⁿ; in tī ông ê bīn-chêng án-ni saⁿ-chìⁿ.

23王講，chit-ê婦人人講，活ê kiáⁿ是我ê，死ê kiáⁿ是你ê；hit-ê婦人人講，無，死ê kiáⁿ是你ê，活ê kiáⁿ是我ê。Ông kóng, Chit ê hū-jîn-lâng kóng, Oa̍h ê kiáⁿ sī góa-ê, sí ê kiáⁿ sī lí-ê; hit ê hū-jîn-lâng kóng, Bô, sí ê kiáⁿ sī lí-ê, oa̍h ê kiáⁿ sī góa-ê.

24王講，Kā我kia̍h刀來；就kia̍h刀到王ê面前。Ông kóng, Kā góa kia̍h to lâi; chiū kia̍h to kàu ông ê bīn-chêng.

25王講，將活ê gín-ná破做兩pêng，一pêng hō͘ hit-ê，一pêng hō͘ chit-ê。Ông kóng, Chiong oa̍h ê gín-ná phòa chòe nn̄g-pêng, chi̍t-pêng hō͘ hit-ê, chi̍t-pêng hō͘ chit-ê.

26活ê gín-ná ê老母為tio̍h家己ê kiáⁿ，心親像火teh-to̍h，就對王講，我ê主ah，將活ê kiáⁿ hō͘ hit-ê婦人人，千萬m̄-thang hō͘伊死；hit-ê婦人人講，chit-ê gín-ná莫得歸你，也莫得歸我；破伊，thang。Oa̍h ê gín-ná ê lāu-bú ūi-tio̍h ka-kī ê kiáⁿ, sim chhin-chhiūⁿ hé teh-to̍h, chiū tùi ông kóng, Góa ê chú ah, chiong oa̍h ê kiáⁿ hō͘ hit ê hū-jîn-lâng, chhian-bān m̄-thang hō͘ i sí; hit ê hū-jîn-lâng kóng, Chit ê gín-ná bo̍h-tit kui lí, iā bo̍h-tit kui góa; phòa i, thang.

27王應講，將活ê gín-ná hō͘ chit-ê婦人人，千萬m̄-thang thâi伊；因為伊實在是伊ê老母。Ông ìn kóng, Chiong oa̍h ê gín-ná hō͘ chit ê hū-jîn-lâng, chhian-bān m̄-thang thâi i; in-ūi i si̍t-chāi sī i ê lāu-bú.

28以色列眾人聽見王所判斷ê案，就lóng敬畏伊；因為看見伊ê心內有上帝ê智慧來判斷。Í-sek-lia̍t chèng-lâng thiaⁿ-kìⁿ ông só͘ phòaⁿ-toàn ê àn, chiū lóng kèng-ùi i; in-ūi khòaⁿ-kìⁿ i ê sim-lāi ū Siōng-tè ê tì-hūi lâi phòaⁿ-toàn.