1A-hap將以利亞一切所行ê，kap伊用刀thâi眾先知ê事，lóng kā Iâ-sé-piat講。A-hap chiong Í-lī-a it-chhè só͘-kiâⁿ-ê, kap i ēng to thâi chèng sian-ti ê sū, lóng kā Iâ-sé-piat kóng.

2Iâ-sé-piat就差人去見以利亞，kā伊講，明á日約略chit時，我若無hō͘你ê性命親像in中間一人ê性命一樣，願hiah-ê上帝加倍責罰我。Iâ-sé-piat chiū chhe lâng khì kìⁿ Í-lī-a, kā i kóng, Bîn-á-ji̍t iok-lio̍k chit-sî, góa nā bô hō͘ lí ê sìⁿ-miā chhin-chhiūⁿ in tiong-kan chi̍t-lâng ê sìⁿ-miā chi̍t-iūⁿ, goān hiah ê siōng-tè ka-pē chek-hoa̍t góa.

3以利亞看見án-ni，就起來走，來逃命，到猶大ê別是巴，將奴僕留tī-hia。Í-lī-a khòaⁿ-kìⁿ án-ni, chiū khí-lâi cháu, lâi tô-miā, kàu Iû-tāi ê Pia̍t-sī-pa, chiong lô͘-po̍k lâu tī-hia.

4家己入去曠野，行一日ê路站，到一叢羅庭樹腳；就坐tī-hia求死，講，Taⁿ soah-lah；耶和華ah，求你取我ê性命，因為我無比我ê列祖khah贏。Ka-kī ji̍p-khì khòng-iá, kiâⁿ chi̍t-ji̍t ê lō͘-chām, kàu chi̍t châng lô-têng-chhiū kha; chiū chē tī-hia kiû sí, kóng, Taⁿ soah--lah; Iâ-hô-hoa ah, kiû Lí chhú góa ê sìⁿ-miā, in-ūi góa bô pí góa ê lia̍t-chó͘ khah-iâⁿ.

5就倒tī羅庭樹腳，睏去；有天使來搭伊，講，起來食。Chiū tó tī lô-têng-chhiū kha, khùn--khì; ū thiⁿ-sài lâi tah i, kóng, Khí-lâi chia̍h.

6伊看伊，就看見有餅pek tī火炭ê頂面，koh有一瓶水tī伊ê頭殼邊；伊就食就lim，koh倒落去。I khòaⁿ i, chiū khòaⁿ-kìⁿ ū piáⁿ pek tī hé-thòaⁿ ê téng-bīn, koh ū chi̍t pân chúi tī i ê thâu-khak piⁿ; i chiū chia̍h chiū lim, koh tó--lo̍h-khì.

7耶和華ê天使第二pái koh來搭伊，講，起來食ah，因為路真遠；你行無法得。Iâ-hô-hoa ê thiⁿ-sài tē-jī-pái koh lâi tah i, kóng, Khí-lâi chia̍h ah, in-ūi lō͘ chin hn̄g; lí kiâⁿ bô hoat-tit.

8伊就起來食伊，lim伊；óa靠chit-pái食ê力，行四十日，四十暝，到上帝ê山，就是何烈山。I chiū khí-lâi chia̍h i, lim i; óa-khò chit-pái chia̍h ê la̍t, kiâⁿ sì-cha̍p ji̍t, sì-cha̍p mî, kàu Siōng-tè ê soaⁿ, chiū-sī Hô-lia̍t soaⁿ.

9伊到hia，入一個洞，就tiàm hit內；看ah，耶和華ê話臨到伊，kā伊講，以利亞ah，你tī-chia chhòng甚麼？I kàu hia, ji̍p chi̍t ê tōng, chiū tiàm hí(**hit)-lāi; khòaⁿ ah, Iâ-hô-hoa ê ōe lîm-kàu i, kā i kóng, Í-lī-a ah, lí tī-chia chhòng sím-mi̍h?

10伊應講，我為tio̍h耶和華萬軍ê上帝大熱心；因為以色列人棄sak你ê約，毀壞你hiah-ê壇，用刀thâi你hiah-ê先知，只有chhun我一人；in iáu siàu想我ê性命，beh取伊。I ìn kóng, Góa ūi-tio̍h Iâ-hô-hoa bān-kun ê Siōng-tè tōa jia̍t-sim; in-ūi Í-sek-lia̍t lâng khì-sak Lí ê iok, húi-hoāi Lí hiah ê tôaⁿ, ēng to thâi Lí hiah ê sian-ti, chí-ū chhun góa chi̍t-lâng; in iáu siàu-siūⁿ góa ê sìⁿ-miā, beh chhú i.

11講，你出來khiā tī山裡，tī耶和華ê面前。看ah，耶和華經過，有大koh透ê風，破裂chiah-ê山，phah碎chiah-ê石tī耶和華ê面前；總是耶和華無tī風ê內面；風了後有地動；耶和華也無tī地動ê中間。Kóng, Lí chhut-lâi khiā tī soaⁿ--nih, tī Iâ-hô-hoa ê bīn-chêng. Khòaⁿ ah, Iâ-hô-hoa keng-kè, ū tōa koh thàu ê hong, phòa-li̍h chiah ê soaⁿ, phah-chhùi chiah ê chio̍h tī Iâ-hô-hoa ê bīn-chêng; chóng-sī Iâ-hô-hoa bô tī hong ê lāi-bīn; hong liáu-āu ū tōe-tāng; Iâ-hô-hoa iā bô tī tōe-tāng ê tiong-kan.

12地動了後有火；耶和華也無tī火中；火了後，有細koh輕ê聲。Tōe-tāng liáu-āu ū hé; Iâ-hô-hoa iā bô tī hé-tiong; hé liáu-āu, ū sòe koh khin ê siaⁿ.

13以利亞聽見，就用外衫罩面，出去khiā tī洞口。看ah，有聲臨到伊講，以利亞ah，你tī-chia chhòng甚麼？Í-lī-a thiaⁿ-kìⁿ, chiū ēng gōa-saⁿ tà-bīn, chhut-khì khiā tī tōng-kháu. Khòaⁿ ah, ū siaⁿ lîm-kàu i kóng, Í-lī-a ah, lí tī-chia chhòng sím-mi̍h?

14伊講，我為tio̍h耶和華萬軍ê上帝大熱心；因為以色列人棄sak你ê約，毀壞你hiah-ê壇，用刀thâi你hiah-ê先知；只有chhun我一人，in iáu siàu想我ê性命，beh取伊。I kóng, Góa ūi-tio̍h Iâ-hô-hoa bān-kun ê Siōng-tè tōa jia̍t-sim; in-ūi Í-sek-lia̍t lâng khì-sak Lí ê iok, húi-hoāi Lí hiah ê tôaⁿ, ēng to thâi Lí hiah ê sian-ti; chí-ū chhun góa chi̍t-lâng, in iáu siàu-siūⁿ góa ê sìⁿ-miā, beh chhú i.

15耶和華kā伊講，去ah，你tò去，到大馬色ê曠野；已經到，就tio̍h用油抹Hap-siat做A-lân王；Iâ-hô-hoa kā i kóng, Khì ah, lí tò-khì, kàu Tāi-má-sek ê khòng-iá; í-keng kàu, chiū tio̍h ēng iû boah Hap-siat chòe A-lân ông;

16koh抹Lêng-sī ê孫Iâ-hō͘做以色列王；koh抹A-pek-bí-hô-la̍h人Sa-hoat ê kiáⁿ以利沙做先知續接你。koh boah Lêng-sī ê sun Iâ-hō͘ chòe Í-sek-lia̍t ông; koh boah A-pek-bí-hô-la̍h lâng Sa-hoat ê kiáⁿ Í-lī-sa chòe sian-ti sòa-chiap lí.

17後來脫離Hap-siat ê刀ê，Iâ-hō͘ beh thâi伊；脫離Iâ-hō͘ ê刀ê，以利沙beh thâi伊。Āu-lâi thoat-lī Hap-siat ê to ê, Iâ-hō͘ beh thâi i; thoat-lī Iâ-hō͘ ê to ê, Í-lī-sa beh thâi i.

18總是我tī以色列中留七千人，伊ê腳頭u bē-bat跪Pa-le̍k，伊ê嘴bē-bat chim伊。Chóng-sī Góa tī Í-sek-lia̍t tiong lâu chhit-chheng lâng, i ê kha-thâu-u bē-bat kūi Pa-le̍k, i ê chhùi bē-bat chim i.

19以利亞就離開hia去；tú-tio̍h Sa-hoat ê kiáⁿ以利沙，伊teh犁田；tī伊ê頭前有十二對牛，家己趕第十二對；以利亞經過伊hia，將家己ê衫phoa̍h tī伊ê身上。Í-lī-a chiū lī-khui hia khì; tú-tio̍h Sa-hoat ê kiáⁿ Í-lī-sa, i teh lôe-chhân; tī i ê thâu-chêng ū cha̍p-jī tùi gû, ka-kī kóaⁿ tē cha̍p-jī tùi; Í-lī-a keng-kè i hia, chiong ka-kī ê saⁿ phoa̍h tī i ê sin-chiūⁿ.

20以利沙就離開hiah-ê牛，走到以利亞ê後面，講，求你准我事先chim我ê父母，然後我就tè你。以利亞kā伊講，你tò去，我對你有做甚麼ah？Í-lī-sa chiū lī-khui hiah ê gû, cháu kàu Í-lī-a ê āu-bīn, kóng, Kiû lí chún góa tāi-seng chim góa ê pē-bú, jiân-āu góa chiū tè lí. Í-lī-a kā i kóng, Lí tò-khì, góa tùi lí ū chòe sím-mi̍h ah?

21以利沙就對伊hia tò去，thâi一對牛，用套牛ê器具煮肉，hō͘百姓；in就食伊。伊就起來tè以利亞，來服事伊。Í-lī-sa chiū tùi i hia tò-khì, thâi chi̍t-tùi gû, ēng thò gû ê khì-kū chú bah, hō͘ peh-sìⁿ; in chiū chia̍h i. I chiū khí-lâi tè Í-lī-a, lâi ho̍k-sāi i.

1A-lân王Piān-hap-ta̍t聚集伊ê全軍，有三十二個王kap伊去，有馬，有車，上去圍撒馬利亞，來攻伊。A-lân ông Piān-hap-ta̍t chū-chi̍p i ê choân-kun, ū saⁿ-cha̍p-jī ê ông kap i khì, ū bé, ū chhia, chiūⁿ-khì ûi Sat-má-lī-a, lâi kong i.

2Koh差使者入城見以色列王A-hap，kā伊講，Piān-hap-ta̍t án-ni講，Koh chhe sù-chiá ji̍p siâⁿ kìⁿ Í-sek-lia̍t ông A-hap, kā i kóng, Piān-hap-ta̍t án-ni kóng,

3你ê銀，你ê金，lóng是我ê，你hiah-ê bó͘，你hiah-ê kiáⁿ兒，第一súi ê，也是我ê。Lí ê gûn, lí ê kim, lóng sī góa-ê, lí hiah ê bó͘, lí hiah ê kiáⁿ-jî, tē-it súi ê, iā-sī góa-ê.

4以色列王應講，我ê主，我ê王ah，照你ê話，我kap我所有ê lóng是你ê。Í-sek-lia̍t ông ìn kóng, Góa ê chú, góa ê ông ah, chiàu lí ê ōe, góa kap góa só͘-ū-ê lóng sī lí-ê.

5使者koh來講，Piān-hap-ta̍t án-ni講，我卻有差人去見你，ài你將你ê銀、金、bó͘、kiáⁿ兒，lóng交hō͘我。Sù-chiá koh lâi kóng, Piān-hap-ta̍t án-ni kóng, Góa khiok ū chhe lâng khì kìⁿ lí, ài lí chiong lí ê gûn, kim, bó͘, kiáⁿ-jî, lóng kau hō͘ góa.

6總是明á日約略chit時，我beh差我ê使者到你hia，chhiau-chhē你ê厝，kap你ê奴僕ê厝，見若你所看做好ê，in beh親手帶去。Chóng-sī bîn-á-ji̍t iok-lio̍k chit-sî góa beh chhe góa ê sù-chiá kàu lí hia, chhiau-chhē lí ê chhù, kap lí ê lô͘-po̍k ê chhù, kìⁿ-nā lí só͘ khòaⁿ-chòe hó--ê, in beh chhin-chhiú tòa--khì.

7以色列王召國內ê長老lóng來，kā in講，Lín看，chit-ê人tiâu-tî chhē縫beh害我；伊bat差人來我chia，beh我ê bó͘、kiáⁿ兒，kap金銀，我無推辭伊。Í-sek-lia̍t ông tiàu kok-lāi ê tiúⁿ-ló lóng lâi, kā in kóng, Lín khòaⁿ, chit ê lâng tiâu-tî chhē-phāng beh hāi góa; i bat chhe lâng lâi góa chia, beh góa ê bó͘, kiáⁿ-jî, kap kim gûn, góa bô the-sî--i.

8長老kap眾百姓lóng kā王講，M̄-thang聽伊，也m̄-thang允伊。Tiúⁿ-ló kap chèng peh-sìⁿ lóng kā ông kóng, M̄-thang thiaⁿ i, iā m̄-thang ún i.

9所以王kā Piān-hap-ta̍t ê使者講，Lín kā我ê主我ê王講，你事先差人對你ê奴僕所討ê我有允；總是chit-ê我bōe行得。使者就tò去回覆。Só͘-í ông kā Piān-hap-ta̍t ê sù-chiá kóng, Lín kā góa ê chú góa ê ông kóng, Lí tāi-seng chhe lâng tùi lí ê lô͘-po̍k só͘-thó--ê góa ū ún; chóng-sī chit-ê góa bōe kiâⁿ--tit. Sù-chiá chiū tò-khì hê-hok.

10Piān-hap-ta̍t koh差人講，撒馬利亞ê土粉，若有夠額hō͘ tè我ê人ta̍k人mi一把，就願hiah-ê上帝加倍責罰我。Piān-hap-ta̍t koh chhe lâng kóng, Sat-má-lī-a ê thô͘-hún, nā ū kàu-gia̍h hō͘ tè góa ê lâng ta̍k-lâng mi chi̍t-pé, chiū goān hiah ê siōng-tè ka-pē chek-hoa̍t góa.

11以色列王應講，Lín kā伊講，穿盔甲ê，m̄-thang親像thǹg盔甲ê來誇口。Í-sek-lia̍t ông ìn kóng, Lín kā i kóng, Chhēng khoe-kah--ê, m̄-thang chhin-chhiūⁿ thǹg khoe-kah--ê lâi khoa-kháu.

12Piān-hap-ta̍t kap hiah-ê王tī布棚內lim酒，聽見chiah-ê話，就kā伊ê人臣講，Thang排陣；in就排陣攻城。Piān-hap-ta̍t kap hiah ê ông tī pò͘-pîⁿ-lāi lim-chiú, thiaⁿ-kìⁿ chiah ê ōe, chiū kā i ê jîn-sîn kóng, Thang pâi-tīn; in chiū pâi-tīn kong-siâⁿ.

13有一個先知來見以色列王A-hap講，耶和華án-ni講，你有看見一大陣ê人無？看ah，今á日我beh將in交tī你ê手，你就知我是耶和華。Ū chi̍t ê sian-ti lâi kìⁿ Í-sek-lia̍t ông A-hap kóng, Iâ-hô-hoa án-ni kóng, Lí ū khòaⁿ-kìⁿ chi̍t tōa tīn ê lâng bô? Khòaⁿ ah, kin-á-ji̍t Góa beh chiong in kau tī lí ê chhiú, lí chiū chai Góa sī Iâ-hô-hoa.

14A-hap講，beh用是誰 ah？伊應講，耶和華án-ni講，用chiah-ê省長ê少年人。A-hap講，甚麼人beh排陣ah？伊應講，就是你。A-hap kóng, Beh ēng chī-chūi ah? I ìn kóng, Iâ-hô-hoa án-ni kóng, Ēng chiah ê séng-tiúⁿ ê siàu-liân lâng. A-hap kóng, Sím-mi̍h lâng beh pâi-tīn ah? I ìn kóng, Chiū-sī lí.

15伊就算hiah-ê省長ê少年人，共有兩百三十二名；後來伊koh算眾百姓，就是以色列人，共七千名。I chiū sǹg hiah ê séng-tiúⁿ ê siàu-liân lâng, kiōng ū nn̄g-pah saⁿ-cha̍p-jī miâ; āu-lâi i koh sǹg chèng peh-sìⁿ, chiū-sī Í-sek-lia̍t lâng, kiōng chhit-chheng miâ.

16日中晝ê時，in就出去。Piān-hap-ta̍t kap hiah-ê王，就是幫贊伊ê三十二個王，tī布棚內食酒醉。Ji̍t-tiong-tàu ê sî, in chiū chhut-khì. Piān-hap-ta̍t kap hiah ê ông, chiū-sī pang-chān i ê saⁿ-cha̍p-jī ê ông, tī pò͘-pîⁿ-lāi chia̍h chiú-chùi.

17Hiah-ê省長ê少年人做頭出去。Piān-hap-ta̍t差人去探bāi，in回覆講，有人tùi撒馬利亞出來。Hiah ê séng-tiúⁿ ê siàu-liân lâng chòe-thâu chhut-khì. Piān-hap-ta̍t chhe lâng khì thàm-bāi, in hê-hok kóng, Ū lâng tùi Sat-má-lī-a chhut-lâi.

18伊講，In若為tio̍h講和出來，tio̍h活活掠in；若為tio̍h交戰出來，也tio̍h活活掠in。I kóng, In nā ūi-tio̍h káng-hô chhut-lâi, tio̍h oa̍h-oa̍h lia̍h in; nā ūi-tio̍h kau-chiàn chhut-lâi, iā tio̍h oa̍h-oa̍h lia̍h in.

19Hiah-ê省長ê少年人出城，軍兵tè in；ta̍k人thâi伊ê對敵。Hiah ê séng-tiúⁿ ê siàu-liân lâng chhut siâⁿ, kun-peng tè in; ta̍k-lâng thâi i ê tùi-te̍k.

20A-lân人逃走，以色列人jip in。A-lân王Piān-hap-ta̍t騎馬，kap hiah-ê馬兵逃脫。A-lân lâng tô-cháu, Í-sek-lia̍t lâng jip in. A-lân ông Piān-hap-ta̍t khiâ-bé, kap hiah ê bé-peng tô-thoat.

21以色列王出城，phah hiah-ê車，kap馬，大大thâi死A-lân人。Í-sek-lia̍t ông chhut-siâⁿ, phah hiah ê chhia, kap bé, tōa-tōa thâi-sí A-lân lâng.

22Hit-ê先知來見以色列王，kā伊講，你tio̍h家己強壯，謹慎tio̍h怎樣做；因為明年chit時，A-lân王beh上來攻擊你。Hit ê sian-ti lâi kìⁿ Í-sek-lia̍t ông, kā i kóng, Lí tio̍h ka-kī kiông-chòng, kín-sīn tio̍h cháiⁿ-iūⁿ chòe; in-ūi mê-nî chit-sî, A-lân ông beh chiūⁿ-lâi kong-kek lí.

23A-lân王ê人臣kā伊講，以色列人ê上帝是山頭ê上帝，所以in khah贏咱；總是咱若tī平洋kap in交戰，就會khah贏in。A-lân ông ê jîn-sîn kā i kóng, Í-sek-lia̍t lâng ê Siōng-tè sī soaⁿ-thâu ê Siōng-tè, só͘-í in khah-iâⁿ lán; chóng-sī lán nā tī pîⁿ-iûⁿ kap in kau-chiàn, chiū ōe khah-iâⁿ in.

24Tio̍h án-ni行；hiah-ê王ta̍k-ê tio̍h免職，立軍長來替in。Tio̍h án-ni kiâⁿ; hiah ê ông ta̍k-ê tio̍h bián-chit, li̍p kun-tiúⁿ lâi thòe in.

25Koh招募一隊軍兵照理所失落ê軍兵，用馬補馬，用車補車；咱tī平洋kap in交戰，穩當會贏。王就聽in ê話去行。Koh chio-bō͘ chi̍t tūi kun-peng chiàu lí só͘ sit-lo̍h ê kun-peng, ēng bé pó͘ bé, ēng chhia pó͘ chhia; lán tī pîⁿ-iûⁿ kap in kau-chiàn, ún-tàng ōe iâⁿ. Ông chiū thiaⁿ in ê ōe khì kiâⁿ.

26隔年Piān-hap-ta̍t點算A-lân人，上去A-hut，beh kap以色列人交戰。Keh-nî Piān-hap-ta̍t tiám-sǹg A-lân lâng, chiūⁿ-khì A-hut, beh kap Í-sek-lia̍t lâng kau-chiàn.

27以色列人也點算in ê數額，備辦軍糧，出去抵敵伊，紮營tī in ê對面，親像兩小群ê山羊á；總是A-lân人滿地面。Í-sek-lia̍t lâng iā tiám-sǹg in ê siàu-gia̍h, pī-pān kun-niû, chhut-khì tí-te̍k i, chat-iâⁿ tī in ê tùi-bīn, chhin-chhiūⁿ nn̄g sió-kûn ê soaⁿ-iûⁿ á; chóng-sī A-lân lâng móa tōe-bīn.

28有上帝ê奴僕來見以色列王講，耶和華án-ni講，因為A-lân人講，耶和華是山頭ê上帝，m̄是山谷ê上帝，所以我beh將chit大陣ê人lóng交tī你ê手；lín就知我是耶和華。Ū Siōng-tè ê lô͘-po̍k lâi kìⁿ Í-sek-lia̍t ông kóng, Iâ-hô-hoa án-ni kóng, In-ūi A-lân lâng kóng, Iâ-hô-hoa sī soaⁿ-thâu ê Siōng-tè, m̄-sī soaⁿ-kok ê Siōng-tè, só͘-í Góa beh chiong chit tōa-tīn ê lâng lóng kau tī lí ê chhiú; lín chiū chai Góa sī Iâ-hô-hoa.

29就紮營大家相對面七日；到第七日雙pêng軍兵交戰；tī chit日以色列人thâi死A-lân人步兵十萬。Chiū chat-iâⁿ tāi-ke saⁿ tùi-bīn chhit-ji̍t; kàu tē-chhit ji̍t siang-pêng kun-peng kau-chiàn; tī chit-ji̍t Í-sek-lia̍t lâng thâi-sí A-lân lâng pō͘-peng cha̍p-bān.

30其餘ê走入A-hut城，hit-ê城牆倒，teh死所chhun ê兩萬七千人。Piān-hap-ta̍t走入城，bih tī內房。Kî-û-ê cháu ji̍p A-hut siâⁿ, hit ê siâⁿ-chhiûⁿ tó, teh-sí só͘-chhun ê nn̄g-bān chhit-chheng lâng. Piān-hap-ta̍t cháu ji̍p siâⁿ, bih tī lāi-pâng.

31伊ê人臣kā伊講，看ah，阮聽見以色列家ê列王是仁慈ê王；求你准阮hâ麻布tī阮ê腰，頭殼phoa̍h索，出去投降以色列王；kiám-chhái伊beh饒你ê性命。I ê jîn-sîn kā i kóng, Khòaⁿ ah, goán thiaⁿ-kìⁿ Í-sek-lia̍t ke ê lia̍t-ông sī jîn-chû ê ông; kiû lí chún goán hâ môa-pò͘ tī goán ê io, thâu-khak phoa̍h-soh, chhut-khì tâu-hâng Í-sek-lia̍t ông; kiám-chhái i beh jiâu lí ê sìⁿ-miā.

32In就腰hâ麻布，頭殼phoa̍h索，去見以色列王，講，你ê奴僕Piān-hap-ta̍t講，求你，饒我ê性命。A-hap講，伊iáu活teh mah？伊是我ê兄弟。In chiū io hâ môa-pò͘, thâu-khak phoa̍h-soh, khì kìⁿ Í-sek-lia̍t ông, kóng, Lí ê lô͘-po̍k Piān-hap-ta̍t kóng, Kiû lí, jiâu góa ê sìⁿ-miā. A-hap kóng, I iáu oa̍h--teh mah? i sī góa ê hiaⁿ-tī.

33Hiah-ê人chim-chiok聽伊ê口氣，liâm-piⁿ順伊ê話尾，講，你ê兄弟Piān-hap-ta̍t。伊講，lín去chhōa伊來。Piān-hap-ta̍t出來見王，王就hō͘伊坐車。Hiah ê lâng chim-chiok thiaⁿ i ê kháu-khì, liâm-piⁿ sūn i ê ōe-bé, kóng, Lí ê hiaⁿ-tī Piān-hap-ta̍t. I kóng, Lín khì chhōa i lâi. Piān-hap-ta̍t chhut-lâi kìⁿ ông, ông chiū hō͘ i chē-chhia.

34Piān-hap-ta̍t kā伊講，我ê父對你ê父所搶hiah-ê城，我beh還你；koh你thang tī大馬色設街市，親像我ê父tī撒馬利亞所設ê一樣。A-hap講，我照chit-ê約放你tò去；就kap伊立約，放伊tò去。Piān-hap-ta̍t kā i kóng, Góa ê pē tùi lí ê pē só͘ chhiúⁿ hiah ê siâⁿ, góa beh hêng lí; koh lí thang tī Tāi-má-sek siat koe-chhī, chhin-chhiūⁿ góa ê pē tī Sat-má-lī-a só͘ siat--ê chi̍t-iūⁿ. A-hap kóng, Góa chiàu chit ê iok pàng lí tò-khì; chiū kap i li̍p-iok, pàng i tò-khì.

35有先知ê學生ê一人，用耶和華ê話kā伊ê同伴講，請你phah我。hit人m̄肯phah伊。Ū sian-ti ê ha̍k-seng ê chi̍t-lâng, ēng Iâ-hô-hoa ê ōe kā i ê tâng-phōaⁿ kóng, Chhiáⁿ lí phah góa. Hit-lâng m̄-khéng phah i.

36伊就kā伊講，因為你m̄-thàn耶和華ê話，你一下離開我，beh有獅咬死你。伊一下離開伊去，果然有獅tú-tio̍h來咬死伊。I chiū kā i kóng, In-ūi lí m̄-thàn Iâ-hô-hoa ê ōe, lí chi̍t-ē lī-khui góa, beh ū sai kā-sí lí. I chi̍t-ē lī-khui i khì, kó-jiân ū sai tú-tio̍h lâi kā-sí i.

37伊koh tú-tio̍h一人，kā伊講，請你phah我。伊就phah伊，phah到tio̍h傷。I koh tú-tio̍h chi̍t-lâng, kā i kóng, Chhiáⁿ lí phah góa. I chiū phah--i, phah kàu tio̍h-siong.

38先知就去，tī路裡thèng候王改伊ê容貌，用巾罩目睭。Sian-ti chiū khì, tī lō͘--nih thèng-hāu ông kóe i ê iông-māu, ēng kun tà ba̍k-chiu.

39王tùi hia經過ê時，伊叫王講，你ê奴僕出陣，有一人oat來邊á，koh chhōa一人來交我，講，你顧守chit-ê人；若伊失落，你ê性命tio̍h替伊ê性命；若無，你tio̍h交出一tha-liân-tek ê銀。Ông tùi hia keng-kè ê sî, i kiò ông kóng, Lí ê lô͘-po̍k chhut-tīn, ū chi̍t-lâng oat--lâi piⁿ-á, koh chhōa chi̍t-lâng lâi kau góa, kóng, Lí kò͘-siú chit ê lâng; nā i sit-lo̍h, lí ê sìⁿ-miā tio̍h thòe i ê sìⁿ-miā; nā bô, lí tio̍h kau-chhut chi̍t tha-liân-tek ê gûn.

40你ê奴僕顧chit項hit項ê時，hit人續無去。以色列王kā伊講，你ê案件án-ni，你已經家己判斷。Lí ê lô͘-po̍k kò͘ chit-hāng hit-hāng ê sî, hit-lâng sòa bô--khì. Í-sek-lia̍t ông kā i kóng, Lí ê àn-kiāⁿ án-ni, lí í-keng ka-kī phòaⁿ-toàn.

41伊趕緊除去罩目睭ê巾；以色列王就認得伊是先知ê一個。I kóaⁿ-kín tû-khì tà ba̍k-chiu ê kun; Í-sek-lia̍t ông chiū jīn-tit i sī sian-ti ê chi̍t-ê.

42伊kā王講，耶和華án-ni講，因為你將我所定tio̍h beh滅ê人放hō͘伊去，你ê性命就tio̍h替伊ê性命，你ê百姓就tio̍h替伊ê百姓。I kā ông kóng, Iâ-hô-hoa án-ni kóng, In-ūi lí chiong Góa só͘ tiāⁿ-tio̍h beh bia̍t ê lâng pàng hō͘ i khì, lí ê sìⁿ-miā chiū tio̍h thòe i ê sìⁿ-miā, lí ê peh-sìⁿ chiū tio̍h thòe i ê peh-sìⁿ.

43以色列王就鬱悶無歡喜；到撒馬利亞tò去伊ê厝。Í-sek-lia̍t ông chiū ut-būn bô hoaⁿ-hí; kàu Sat-má-lī-a tò-khì i ê chhù.

1Chiah-ê tāi-chì了後，Iâ-su-lia̍t人Ná-po̍k有葡萄園tī Iâ-su-lia̍t，近撒馬利亞王A-hap ê宮。Chiah ê tāi-chì liáu-āu, Iâ-su-lia̍t lâng Ná-po̍k ū phû-tô-hn̂g tī Iâ-su-lia̍t, kūn Sat-má-lī-a ông A-hap ê kiong.

2A-hap kā Ná-po̍k講，你用你ê葡萄園hō͘我，我thang做菜園；因為是近tī我ê宮；我beh用koh-khah好ê園kā你換；á是你ài銀，我就照價錢hō͘你。A-hap kā Ná-po̍k kóng, Lí ēng lí ê phû-tô-hn̂g hō͘ góa, góa thang chòe chhài-hn̂g; in-ūi sī kūn tī góa ê kiong; góa beh ēng koh khah-hó ê hn̂g kā lí ōaⁿ; á-sī lí ài gûn, góa chiū chiàu kè-chîⁿ hō͘ lí.

3Ná-po̍k kā A-hap講，用我ê祖所留ê業hō͘你，chit-ê tāi-chì願耶和華禁止我。Ná-po̍k kā A-hap kóng, Ēng góa ê chó͘ só͘ lâu ê gia̍p hō͘ lí, chit ê tāi-chì goān Iâ-hô-hoa kìm-chí góa.

4A-hap因為Iâ-su-lia̍t人Ná-po̍k所講ê話，就鬱卒無歡喜；tò去伊ê厝；因為Ná-po̍k bat講，我m̄用我ê祖業hō͘你，A-hap就倒tī眠床，面ǹg內面，也m̄食。A-hap in-ūi Iâ-su-lia̍t lâng Ná-po̍k só͘ kóng ê ōe, chiū ut-chut bô hoaⁿ-hí; tò--khì i ê chhù; in-ūi Ná-po̍k bat kóng, Góa m̄ ēng góa ê chó͘-gia̍p hō͘ lí, A-hap chiū tó tī bîn-chhn̂g, bīn ǹg lāi-bīn, iā m̄ chia̍h.

5王后Iâ-sé-piat到伊hia，問伊講，你ê心內憂悶續m̄食，是啥緣故ah？Ông-hō͘ Iâ-sé-piat kàu i hia, mn̄g i kóng, Lí ê sim-lāi iu-būn sòa m̄-chia̍h, sī siáⁿ iân-kò͘ ah?

6伊kā伊講，因為我對Iâ-su-lia̍t人Ná-po̍k講，你用你ê葡萄園hō͘我，我用銀hō͘你；á是你若ài，我就用葡萄園換你。伊講，我ê葡萄園，我m̄ hō͘你。I kā i kóng, In-ūi góa tùi Iâ-su-lia̍t lâng Ná-po̍k kóng, Lí ēng lí ê phû-tô-hn̂g hō͘ góa, góa ēng gûn hō͘ lí; á-sī lí nā ài, góa chiū ēng phû-tô-hn̂g ōaⁿ lí. I kóng, Góa ê phû-tô-hn̂g, góa m̄ hō͘ lí.

7王后Iâ-sé-piat kā伊講，你chit-chūn是teh管理以色列國á-m̄是？做你起來食，hō͘你ê心歡喜；我beh用Iâ-su-lia̍t人Ná-po̍k ê葡萄園hō͘你。Ông-hō͘ Iâ-sé-piat kā i kóng, Lí chit-chūn sī teh koán-lí Í-sek-lia̍t kok á-m̄-sī? chòe lí khí-lâi chia̍h, hō͘ lí ê sim hoaⁿ-hí; góa beh ēng Iâ-su-lia̍t lâng Ná-po̍k ê phû-tô-hn̂g hō͘ lí.

8就用A-hap ê名寫phoe，用王ê 印tǹg伊；寄hiah-ê phoe hō͘ Ná-po̍k ê城，hō͘ kap伊khiā起ê長老貴族。Chiū ēng A-hap ê miâ siá-phoe, ēng ông ê ìn tǹg--i; kià hiah ê phoe hō͘ Ná-po̍k ê siâⁿ, hō͘ kap i khiā-khí ê tiúⁿ-ló kùi-cho̍k.

9寫tī phoe裡講，Lín tio̍h宣布禁食，hō͘ Ná-po̍k坐tī百姓間ê高位；Siá tī phoe--nih kóng, Lín tio̍h soan-pò͘ kìm-chia̍h, hō͘ Ná-po̍k chē tī peh-sìⁿ-kan ê koâiⁿ-ūi;

10koh 設兩個匪類tī伊ê面前，做干證告伊講，你謗瀆上帝kap王；然後就拖伊出去，用石頭tìm死伊。koh siat nn̄g ê húi-lūi tī i ê bīn-chêng, chòe kan-chèng kò i kóng, Lí pòng-to̍k Siōng-tè kap ông; jiân-āu chiū thoa i chhut-khì, ēng chio̍h-thâu tìm-sí i.

11伊城內ê人，就是khiā起hit-ê城ê長老，kap貴族，就照Iâ-sé-piat所寄ê話，就是照伊寄hō͘ in ê phoe所寫ê，來行。I siâⁿ-lāi ê lâng, chiū-sī khiā-khí hit ê siâⁿ ê tiúⁿ-ló, kap kùi-cho̍k, chiū chiàu Iâ-sé-piat só͘ kià ê ōe, chiū-sī chiàu i kià hō͘ in ê phoe só͘-siá-ê, lâi kiâⁿ.

12宣布禁食，hō͘ Ná-po̍k坐tī百姓間ê高位。Soan-pò͘ kìm-chia̍h, hō͘ Ná-po̍k chē tī peh-sìⁿ-kan ê koâiⁿ-ūi.

13Hit兩個匪類入去，坐tī伊ê面前；匪類當百姓ê面前做干證告Ná-po̍k講，Ná-po̍k謗瀆上帝kap王；就拖伊出城外，用石頭tìm死伊。Hit nn̄g ê húi-lūi ji̍p-khì, chē tī i ê bīn-chêng; húi-lūi tng peh-sìⁿ ê bīn-chêng chòe kan-chèng kò Ná-po̍k kóng, Ná-po̍k pòng-to̍k Siōng-tè kap ông; chiū thoa i chhut siâⁿ-gōa, ēng chio̍h-thâu tìm-sí i.

14就差人去kā Iâ-sé-piat講，Ná-po̍k已經hō͘石頭tìm死lah。Chiū chhe lâng khì kā Iâ-sé-piat kóng, Ná-po̍k í-keng hō͘ chio̍h-thâu tìm-sí lah.

15Iâ-sé-piat聽見Ná-po̍k hō͘石頭tìm死，Iâ-sé-piat就kā A-hap講，你起來掌Iâ-su-lia̍t人Ná-po̍k m̄肯為tio̍h價錢hō͘你ê葡萄園，因為Ná-po̍k已經死，無命lah。Iâ-sé-piat thiaⁿ-kìⁿ Ná-po̍k hō͘ chio̍h-thâu tìm-sí, Iâ-sé-piat chiū kā A-hap kóng, Lí khí-lâi chiáng Iâ-su-lia̍t lâng Ná-po̍k m̄-khéng ūi-tio̍h kè-chîⁿ hō͘ lí ê phû-tô-hn̂g, in-ūi Ná-po̍k í-keng sí, bô-miā lah.

16A-hap聽見Ná-po̍k已經死，A-hap就起來，落去Iâ-su-lia̍t人Ná-po̍k ê葡萄園hia，beh掌伊。A-hap thiaⁿ-kìⁿ Ná-po̍k í-keng sí, A-hap chiū khí-lâi, lo̍h-khì Iâ-su-lia̍t lâng Ná-po̍k ê phû-tô-hn̂g hia, beh chiáng i.

17耶和華ê話臨到Thê-su-pí人以利亞，講，Iâ-hô-hoa ê ōe lîm-kàu Thê-su-pí lâng Í-lī-a, kóng,

18你起來，去見tiàm tī撒馬利亞ê以色列王A-hap；伊落去Ná-po̍k ê葡萄園beh掌伊；chit-chūn伊tī-hia。Lí khí-lâi, khì kìⁿ tiàm tī Sat-má-lī-a ê Í-sek-lia̍t ông A-hap; i lo̍h-khì Ná-po̍k ê phû-tô-hn̂g beh chiáng i; chit-chūn i tī-hia.

19你tio̍h kā伊講，耶和華án-ni講，你有thâi死人koh掌伊ê業mah？Koh tio̍h kā伊講，耶和華án-ni講，狗tī甚麼所在舐(chī)Ná-po̍k ê血，狗也beh tī-hia 舐你ê血，就是你本身ê血。Lí tio̍h kā i kóng, Iâ-hô-hoa án-ni kóng, Lí ū thâi-sí lâng koh chiáng i ê gia̍p mah? Koh tio̍h kā i kóng, Iâ-hô-hoa án-ni kóng, Káu tī sím-mi̍h só͘-chāi chī Ná-po̍k ê huih, káu iā beh tī-hia chī lí ê huih, chiū-sī lí pún-sin ê huih.

20A-hap kā以利亞講，我ê對敵ah，你chhē-tio̍h我mah？伊應講，我chhē-tio̍h你，因為你賣家己，行耶和華看做pháiⁿ ê事。A-hap kā Í-lī-a kóng, Góa ê tùi-te̍k ah, lí chhē-tio̍h góa mah? I ìn kóng, Góa chhē-tio̍h lí, in-ūi lí bōe ka-kī, kiâⁿ Iâ-hô-hoa khòaⁿ-chòe pháiⁿ ê sū.

21耶和華講，我beh 降災厄hō͘你，beh一盡除你；見屬A-hap ê ta-po͘丁，無論受拘束ê，á是自由ê，lóng tī以色列中剪除伊。Iâ-hô-hoa kóng, Góa beh kàng chai-ē hō͘ lí, beh it-chīn tû lí; kìⁿ sio̍k A-hap ê ta-po͘-teng, bô-lūn siū khu-sok--ê, á-sī chū-iû--ê, lóng tī Í-sek-lia̍t tiong chián-tû i.

22我beh hō͘你ê家親像Nî-pat ê kiáⁿ Iâ-lô-phò-àm ê家，koh親像A-hi-ngá ê kiáⁿ Pa-sa ê家，因為你所干犯激動我受氣ê事，koh hō͘以色列犯罪。Góa beh hō͘ lí ê ke chhin-chhiūⁿ Nî-pat ê kiáⁿ Iâ-lô-phò-àm ê ke, koh chhin-chhiūⁿ A-hi-ngá ê kiáⁿ Pa-sa ê ke, in-ūi lí só͘ kan-hoān kek-tōng Góa siū-khì ê sū, koh hō͘ Í-sek-lia̍t hoān-chōe.

23論Iâ-sé-piat耶和華也有講，到beh食Iâ-sé-piat tī Iâ-su-lia̍t ê外城。Lūn Iâ-sé-piat Iâ-hô-hoa iā ū kóng, Kàu beh chia̍h Iâ-sé-piat tī Iâ-su-lia̍t ê gōa-siâⁿ.

24屬A-hap ê人，死tī城內ê，狗beh食伊，死tī田野ê，空中ê鳥beh食伊。Sio̍k A-hap ê lâng, sí tī siâⁿ--lāi ê, káu beh chia̍h--i, sí tī chhân-iá ê, khong-tiong ê chiáu beh chia̍h--i.

25(總是無人親像A-hap，因為伊家己bōe，行耶和華看做pháiⁿ ê事；是對伊ê王后Iâ-sé-piat教唆伊。(Chóng-sī bô lâng chhin-chhiūⁿ A-hap, in-ūi i ka-kī bōe, kiâⁿ Iâ-hô-hoa khòaⁿ-chòe pháiⁿ ê sū; sī tùi i ê ông-hō͘ Iâ-sé-piat kàu[kiáu]-sō i.

26伊行大可惡ê事，因為伊tè hiah-ê偶像，lóng親像A-mô͘-lī人一樣，就是耶和華所趕出tī以色列人ê面前ê。)I kiâⁿ tōa khó-ò͘ⁿ ê sū, in-ūi i tè hiah ê ngó͘-siōng, lóng chhin-chhiūⁿ A-mô͘-lī lâng chi̍t-iūⁿ, chiū-sī Iâ-hô-hoa só͘ kóaⁿ-chhut tī Í-sek-lia̍t lâng ê bīn-chêng--ê.)

27A-hap聽見chiah-ê話，就拆裂衫，身軀穿粗麻布，禁食，睏也倒tī粗麻布，koh ûn-ûn-á行。A-hap thiaⁿ-kìⁿ chiah ê ōe, chiū thiah-li̍h saⁿ, sin-khu chhēng chho͘ môa-pò͘, kìm-chia̍h, khùn iā tó tī chho͘-môa-pò͘, koh ûn-ûn-á kiâⁿ.

28耶和華ê話臨到Thê-su-pí人以利亞講，Iâ-hô-hoa ê ōe lîm-kàu Thê-su-pí lâng Í-lī-a kóng,

29A-hap怎樣家己謙卑tī我ê面前，你有看見mah？因為伊家己謙卑tī我ê面前，所以我無beh tī伊活teh ê日降chit-ê災厄；是tī伊ê kiáⁿ ê日，降chit-ê災厄tī伊ê家。A-hap cháiⁿ-iūⁿ ka-kī khiam-pi tī góa ê bīn-chêng, lí ū khòaⁿ-kìⁿ mah? in-ūi i ka-kī khiam-pi tī Góa ê bīn-chêng, só͘-í Góa bô beh tī i oa̍h-teh ê ji̍t kàng chit ê chai-ē; sī tī i ê kiáⁿ ê ji̍t, kàng chit ê chai-ē tī i ê ke.