1A-lân王Piān-hap-ta̍t聚集伊ê全軍，有三十二個王kap伊去，有馬，有車，上去圍撒馬利亞，來攻伊。A-lân ông Piān-hap-ta̍t chū-chi̍p i ê choân-kun, ū saⁿ-cha̍p-jī ê ông kap i khì, ū bé, ū chhia, chiūⁿ-khì ûi Sat-má-lī-a, lâi kong i.

2Koh差使者入城見以色列王A-hap，kā伊講，Piān-hap-ta̍t án-ni講，Koh chhe sù-chiá ji̍p siâⁿ kìⁿ Í-sek-lia̍t ông A-hap, kā i kóng, Piān-hap-ta̍t án-ni kóng,

3你ê銀，你ê金，lóng是我ê，你hiah-ê bó͘，你hiah-ê kiáⁿ兒，第一súi ê，也是我ê。Lí ê gûn, lí ê kim, lóng sī góa-ê, lí hiah ê bó͘, lí hiah ê kiáⁿ-jî, tē-it súi ê, iā-sī góa-ê.

4以色列王應講，我ê主，我ê王ah，照你ê話，我kap我所有ê lóng是你ê。Í-sek-lia̍t ông ìn kóng, Góa ê chú, góa ê ông ah, chiàu lí ê ōe, góa kap góa só͘-ū-ê lóng sī lí-ê.

5使者koh來講，Piān-hap-ta̍t án-ni講，我卻有差人去見你，ài你將你ê銀、金、bó͘、kiáⁿ兒，lóng交hō͘我。Sù-chiá koh lâi kóng, Piān-hap-ta̍t án-ni kóng, Góa khiok ū chhe lâng khì kìⁿ lí, ài lí chiong lí ê gûn, kim, bó͘, kiáⁿ-jî, lóng kau hō͘ góa.

6總是明á日約略chit時，我beh差我ê使者到你hia，chhiau-chhē你ê厝，kap你ê奴僕ê厝，見若你所看做好ê，in beh親手帶去。Chóng-sī bîn-á-ji̍t iok-lio̍k chit-sî góa beh chhe góa ê sù-chiá kàu lí hia, chhiau-chhē lí ê chhù, kap lí ê lô͘-po̍k ê chhù, kìⁿ-nā lí só͘ khòaⁿ-chòe hó--ê, in beh chhin-chhiú tòa--khì.

7以色列王召國內ê長老lóng來，kā in講，Lín看，chit-ê人tiâu-tî chhē縫beh害我；伊bat差人來我chia，beh我ê bó͘、kiáⁿ兒，kap金銀，我無推辭伊。Í-sek-lia̍t ông tiàu kok-lāi ê tiúⁿ-ló lóng lâi, kā in kóng, Lín khòaⁿ, chit ê lâng tiâu-tî chhē-phāng beh hāi góa; i bat chhe lâng lâi góa chia, beh góa ê bó͘, kiáⁿ-jî, kap kim gûn, góa bô the-sî--i.

8長老kap眾百姓lóng kā王講，M̄-thang聽伊，也m̄-thang允伊。Tiúⁿ-ló kap chèng peh-sìⁿ lóng kā ông kóng, M̄-thang thiaⁿ i, iā m̄-thang ún i.

9所以王kā Piān-hap-ta̍t ê使者講，Lín kā我ê主我ê王講，你事先差人對你ê奴僕所討ê我有允；總是chit-ê我bōe行得。使者就tò去回覆。Só͘-í ông kā Piān-hap-ta̍t ê sù-chiá kóng, Lín kā góa ê chú góa ê ông kóng, Lí tāi-seng chhe lâng tùi lí ê lô͘-po̍k só͘-thó--ê góa ū ún; chóng-sī chit-ê góa bōe kiâⁿ--tit. Sù-chiá chiū tò-khì hê-hok.

10Piān-hap-ta̍t koh差人講，撒馬利亞ê土粉，若有夠額hō͘ tè我ê人ta̍k人mi一把，就願hiah-ê上帝加倍責罰我。Piān-hap-ta̍t koh chhe lâng kóng, Sat-má-lī-a ê thô͘-hún, nā ū kàu-gia̍h hō͘ tè góa ê lâng ta̍k-lâng mi chi̍t-pé, chiū goān hiah ê siōng-tè ka-pē chek-hoa̍t góa.

11以色列王應講，Lín kā伊講，穿盔甲ê，m̄-thang親像thǹg盔甲ê來誇口。Í-sek-lia̍t ông ìn kóng, Lín kā i kóng, Chhēng khoe-kah--ê, m̄-thang chhin-chhiūⁿ thǹg khoe-kah--ê lâi khoa-kháu.

12Piān-hap-ta̍t kap hiah-ê王tī布棚內lim酒，聽見chiah-ê話，就kā伊ê人臣講，Thang排陣；in就排陣攻城。Piān-hap-ta̍t kap hiah ê ông tī pò͘-pîⁿ-lāi lim-chiú, thiaⁿ-kìⁿ chiah ê ōe, chiū kā i ê jîn-sîn kóng, Thang pâi-tīn; in chiū pâi-tīn kong-siâⁿ.

13有一個先知來見以色列王A-hap講，耶和華án-ni講，你有看見一大陣ê人無？看ah，今á日我beh將in交tī你ê手，你就知我是耶和華。Ū chi̍t ê sian-ti lâi kìⁿ Í-sek-lia̍t ông A-hap kóng, Iâ-hô-hoa án-ni kóng, Lí ū khòaⁿ-kìⁿ chi̍t tōa tīn ê lâng bô? Khòaⁿ ah, kin-á-ji̍t Góa beh chiong in kau tī lí ê chhiú, lí chiū chai Góa sī Iâ-hô-hoa.

14A-hap講，beh用是誰 ah？伊應講，耶和華án-ni講，用chiah-ê省長ê少年人。A-hap講，甚麼人beh排陣ah？伊應講，就是你。A-hap kóng, Beh ēng chī-chūi ah? I ìn kóng, Iâ-hô-hoa án-ni kóng, Ēng chiah ê séng-tiúⁿ ê siàu-liân lâng. A-hap kóng, Sím-mi̍h lâng beh pâi-tīn ah? I ìn kóng, Chiū-sī lí.

15伊就算hiah-ê省長ê少年人，共有兩百三十二名；後來伊koh算眾百姓，就是以色列人，共七千名。I chiū sǹg hiah ê séng-tiúⁿ ê siàu-liân lâng, kiōng ū nn̄g-pah saⁿ-cha̍p-jī miâ; āu-lâi i koh sǹg chèng peh-sìⁿ, chiū-sī Í-sek-lia̍t lâng, kiōng chhit-chheng miâ.

16日中晝ê時，in就出去。Piān-hap-ta̍t kap hiah-ê王，就是幫贊伊ê三十二個王，tī布棚內食酒醉。Ji̍t-tiong-tàu ê sî, in chiū chhut-khì. Piān-hap-ta̍t kap hiah ê ông, chiū-sī pang-chān i ê saⁿ-cha̍p-jī ê ông, tī pò͘-pîⁿ-lāi chia̍h chiú-chùi.

17Hiah-ê省長ê少年人做頭出去。Piān-hap-ta̍t差人去探bāi，in回覆講，有人tùi撒馬利亞出來。Hiah ê séng-tiúⁿ ê siàu-liân lâng chòe-thâu chhut-khì. Piān-hap-ta̍t chhe lâng khì thàm-bāi, in hê-hok kóng, Ū lâng tùi Sat-má-lī-a chhut-lâi.

18伊講，In若為tio̍h講和出來，tio̍h活活掠in；若為tio̍h交戰出來，也tio̍h活活掠in。I kóng, In nā ūi-tio̍h káng-hô chhut-lâi, tio̍h oa̍h-oa̍h lia̍h in; nā ūi-tio̍h kau-chiàn chhut-lâi, iā tio̍h oa̍h-oa̍h lia̍h in.

19Hiah-ê省長ê少年人出城，軍兵tè in；ta̍k人thâi伊ê對敵。Hiah ê séng-tiúⁿ ê siàu-liân lâng chhut siâⁿ, kun-peng tè in; ta̍k-lâng thâi i ê tùi-te̍k.

20A-lân人逃走，以色列人jip in。A-lân王Piān-hap-ta̍t騎馬，kap hiah-ê馬兵逃脫。A-lân lâng tô-cháu, Í-sek-lia̍t lâng jip in. A-lân ông Piān-hap-ta̍t khiâ-bé, kap hiah ê bé-peng tô-thoat.

21以色列王出城，phah hiah-ê車，kap馬，大大thâi死A-lân人。Í-sek-lia̍t ông chhut-siâⁿ, phah hiah ê chhia, kap bé, tōa-tōa thâi-sí A-lân lâng.

22Hit-ê先知來見以色列王，kā伊講，你tio̍h家己強壯，謹慎tio̍h怎樣做；因為明年chit時，A-lân王beh上來攻擊你。Hit ê sian-ti lâi kìⁿ Í-sek-lia̍t ông, kā i kóng, Lí tio̍h ka-kī kiông-chòng, kín-sīn tio̍h cháiⁿ-iūⁿ chòe; in-ūi mê-nî chit-sî, A-lân ông beh chiūⁿ-lâi kong-kek lí.

23A-lân王ê人臣kā伊講，以色列人ê上帝是山頭ê上帝，所以in khah贏咱；總是咱若tī平洋kap in交戰，就會khah贏in。A-lân ông ê jîn-sîn kā i kóng, Í-sek-lia̍t lâng ê Siōng-tè sī soaⁿ-thâu ê Siōng-tè, só͘-í in khah-iâⁿ lán; chóng-sī lán nā tī pîⁿ-iûⁿ kap in kau-chiàn, chiū ōe khah-iâⁿ in.

24Tio̍h án-ni行；hiah-ê王ta̍k-ê tio̍h免職，立軍長來替in。Tio̍h án-ni kiâⁿ; hiah ê ông ta̍k-ê tio̍h bián-chit, li̍p kun-tiúⁿ lâi thòe in.

25Koh招募一隊軍兵照理所失落ê軍兵，用馬補馬，用車補車；咱tī平洋kap in交戰，穩當會贏。王就聽in ê話去行。Koh chio-bō͘ chi̍t tūi kun-peng chiàu lí só͘ sit-lo̍h ê kun-peng, ēng bé pó͘ bé, ēng chhia pó͘ chhia; lán tī pîⁿ-iûⁿ kap in kau-chiàn, ún-tàng ōe iâⁿ. Ông chiū thiaⁿ in ê ōe khì kiâⁿ.

26隔年Piān-hap-ta̍t點算A-lân人，上去A-hut，beh kap以色列人交戰。Keh-nî Piān-hap-ta̍t tiám-sǹg A-lân lâng, chiūⁿ-khì A-hut, beh kap Í-sek-lia̍t lâng kau-chiàn.

27以色列人也點算in ê數額，備辦軍糧，出去抵敵伊，紮營tī in ê對面，親像兩小群ê山羊á；總是A-lân人滿地面。Í-sek-lia̍t lâng iā tiám-sǹg in ê siàu-gia̍h, pī-pān kun-niû, chhut-khì tí-te̍k i, chat-iâⁿ tī in ê tùi-bīn, chhin-chhiūⁿ nn̄g sió-kûn ê soaⁿ-iûⁿ á; chóng-sī A-lân lâng móa tōe-bīn.

28有上帝ê奴僕來見以色列王講，耶和華án-ni講，因為A-lân人講，耶和華是山頭ê上帝，m̄是山谷ê上帝，所以我beh將chit大陣ê人lóng交tī你ê手；lín就知我是耶和華。Ū Siōng-tè ê lô͘-po̍k lâi kìⁿ Í-sek-lia̍t ông kóng, Iâ-hô-hoa án-ni kóng, In-ūi A-lân lâng kóng, Iâ-hô-hoa sī soaⁿ-thâu ê Siōng-tè, m̄-sī soaⁿ-kok ê Siōng-tè, só͘-í Góa beh chiong chit tōa-tīn ê lâng lóng kau tī lí ê chhiú; lín chiū chai Góa sī Iâ-hô-hoa.

29就紮營大家相對面七日；到第七日雙pêng軍兵交戰；tī chit日以色列人thâi死A-lân人步兵十萬。Chiū chat-iâⁿ tāi-ke saⁿ tùi-bīn chhit-ji̍t; kàu tē-chhit ji̍t siang-pêng kun-peng kau-chiàn; tī chit-ji̍t Í-sek-lia̍t lâng thâi-sí A-lân lâng pō͘-peng cha̍p-bān.

30其餘ê走入A-hut城，hit-ê城牆倒，teh死所chhun ê兩萬七千人。Piān-hap-ta̍t走入城，bih tī內房。Kî-û-ê cháu ji̍p A-hut siâⁿ, hit ê siâⁿ-chhiûⁿ tó, teh-sí só͘-chhun ê nn̄g-bān chhit-chheng lâng. Piān-hap-ta̍t cháu ji̍p siâⁿ, bih tī lāi-pâng.

31伊ê人臣kā伊講，看ah，阮聽見以色列家ê列王是仁慈ê王；求你准阮hâ麻布tī阮ê腰，頭殼phoa̍h索，出去投降以色列王；kiám-chhái伊beh饒你ê性命。I ê jîn-sîn kā i kóng, Khòaⁿ ah, goán thiaⁿ-kìⁿ Í-sek-lia̍t ke ê lia̍t-ông sī jîn-chû ê ông; kiû lí chún goán hâ môa-pò͘ tī goán ê io, thâu-khak phoa̍h-soh, chhut-khì tâu-hâng Í-sek-lia̍t ông; kiám-chhái i beh jiâu lí ê sìⁿ-miā.

32In就腰hâ麻布，頭殼phoa̍h索，去見以色列王，講，你ê奴僕Piān-hap-ta̍t講，求你，饒我ê性命。A-hap講，伊iáu活teh mah？伊是我ê兄弟。In chiū io hâ môa-pò͘, thâu-khak phoa̍h-soh, khì kìⁿ Í-sek-lia̍t ông, kóng, Lí ê lô͘-po̍k Piān-hap-ta̍t kóng, Kiû lí, jiâu góa ê sìⁿ-miā. A-hap kóng, I iáu oa̍h--teh mah? i sī góa ê hiaⁿ-tī.

33Hiah-ê人chim-chiok聽伊ê口氣，liâm-piⁿ順伊ê話尾，講，你ê兄弟Piān-hap-ta̍t。伊講，lín去chhōa伊來。Piān-hap-ta̍t出來見王，王就hō͘伊坐車。Hiah ê lâng chim-chiok thiaⁿ i ê kháu-khì, liâm-piⁿ sūn i ê ōe-bé, kóng, Lí ê hiaⁿ-tī Piān-hap-ta̍t. I kóng, Lín khì chhōa i lâi. Piān-hap-ta̍t chhut-lâi kìⁿ ông, ông chiū hō͘ i chē-chhia.

34Piān-hap-ta̍t kā伊講，我ê父對你ê父所搶hiah-ê城，我beh還你；koh你thang tī大馬色設街市，親像我ê父tī撒馬利亞所設ê一樣。A-hap講，我照chit-ê約放你tò去；就kap伊立約，放伊tò去。Piān-hap-ta̍t kā i kóng, Góa ê pē tùi lí ê pē só͘ chhiúⁿ hiah ê siâⁿ, góa beh hêng lí; koh lí thang tī Tāi-má-sek siat koe-chhī, chhin-chhiūⁿ góa ê pē tī Sat-má-lī-a só͘ siat--ê chi̍t-iūⁿ. A-hap kóng, Góa chiàu chit ê iok pàng lí tò-khì; chiū kap i li̍p-iok, pàng i tò-khì.

35有先知ê學生ê一人，用耶和華ê話kā伊ê同伴講，請你phah我。hit人m̄肯phah伊。Ū sian-ti ê ha̍k-seng ê chi̍t-lâng, ēng Iâ-hô-hoa ê ōe kā i ê tâng-phōaⁿ kóng, Chhiáⁿ lí phah góa. Hit-lâng m̄-khéng phah i.

36伊就kā伊講，因為你m̄-thàn耶和華ê話，你一下離開我，beh有獅咬死你。伊一下離開伊去，果然有獅tú-tio̍h來咬死伊。I chiū kā i kóng, In-ūi lí m̄-thàn Iâ-hô-hoa ê ōe, lí chi̍t-ē lī-khui góa, beh ū sai kā-sí lí. I chi̍t-ē lī-khui i khì, kó-jiân ū sai tú-tio̍h lâi kā-sí i.

37伊koh tú-tio̍h一人，kā伊講，請你phah我。伊就phah伊，phah到tio̍h傷。I koh tú-tio̍h chi̍t-lâng, kā i kóng, Chhiáⁿ lí phah góa. I chiū phah--i, phah kàu tio̍h-siong.

38先知就去，tī路裡thèng候王改伊ê容貌，用巾罩目睭。Sian-ti chiū khì, tī lō͘--nih thèng-hāu ông kóe i ê iông-māu, ēng kun tà ba̍k-chiu.

39王tùi hia經過ê時，伊叫王講，你ê奴僕出陣，有一人oat來邊á，koh chhōa一人來交我，講，你顧守chit-ê人；若伊失落，你ê性命tio̍h替伊ê性命；若無，你tio̍h交出一tha-liân-tek ê銀。Ông tùi hia keng-kè ê sî, i kiò ông kóng, Lí ê lô͘-po̍k chhut-tīn, ū chi̍t-lâng oat--lâi piⁿ-á, koh chhōa chi̍t-lâng lâi kau góa, kóng, Lí kò͘-siú chit ê lâng; nā i sit-lo̍h, lí ê sìⁿ-miā tio̍h thòe i ê sìⁿ-miā; nā bô, lí tio̍h kau-chhut chi̍t tha-liân-tek ê gûn.

40你ê奴僕顧chit項hit項ê時，hit人續無去。以色列王kā伊講，你ê案件án-ni，你已經家己判斷。Lí ê lô͘-po̍k kò͘ chit-hāng hit-hāng ê sî, hit-lâng sòa bô--khì. Í-sek-lia̍t ông kā i kóng, Lí ê àn-kiāⁿ án-ni, lí í-keng ka-kī phòaⁿ-toàn.

41伊趕緊除去罩目睭ê巾；以色列王就認得伊是先知ê一個。I kóaⁿ-kín tû-khì tà ba̍k-chiu ê kun; Í-sek-lia̍t ông chiū jīn-tit i sī sian-ti ê chi̍t-ê.

42伊kā王講，耶和華án-ni講，因為你將我所定tio̍h beh滅ê人放hō͘伊去，你ê性命就tio̍h替伊ê性命，你ê百姓就tio̍h替伊ê百姓。I kā ông kóng, Iâ-hô-hoa án-ni kóng, In-ūi lí chiong Góa só͘ tiāⁿ-tio̍h beh bia̍t ê lâng pàng hō͘ i khì, lí ê sìⁿ-miā chiū tio̍h thòe i ê sìⁿ-miā, lí ê peh-sìⁿ chiū tio̍h thòe i ê peh-sìⁿ.

43以色列王就鬱悶無歡喜；到撒馬利亞tò去伊ê厝。Í-sek-lia̍t ông chiū ut-būn bô hoaⁿ-hí; kàu Sat-má-lī-a tò-khì i ê chhù.

1Chiah-ê tāi-chì了後，Iâ-su-lia̍t人Ná-po̍k有葡萄園tī Iâ-su-lia̍t，近撒馬利亞王A-hap ê宮。Chiah ê tāi-chì liáu-āu, Iâ-su-lia̍t lâng Ná-po̍k ū phû-tô-hn̂g tī Iâ-su-lia̍t, kūn Sat-má-lī-a ông A-hap ê kiong.

2A-hap kā Ná-po̍k講，你用你ê葡萄園hō͘我，我thang做菜園；因為是近tī我ê宮；我beh用koh-khah好ê園kā你換；á是你ài銀，我就照價錢hō͘你。A-hap kā Ná-po̍k kóng, Lí ēng lí ê phû-tô-hn̂g hō͘ góa, góa thang chòe chhài-hn̂g; in-ūi sī kūn tī góa ê kiong; góa beh ēng koh khah-hó ê hn̂g kā lí ōaⁿ; á-sī lí ài gûn, góa chiū chiàu kè-chîⁿ hō͘ lí.

3Ná-po̍k kā A-hap講，用我ê祖所留ê業hō͘你，chit-ê tāi-chì願耶和華禁止我。Ná-po̍k kā A-hap kóng, Ēng góa ê chó͘ só͘ lâu ê gia̍p hō͘ lí, chit ê tāi-chì goān Iâ-hô-hoa kìm-chí góa.

4A-hap因為Iâ-su-lia̍t人Ná-po̍k所講ê話，就鬱卒無歡喜；tò去伊ê厝；因為Ná-po̍k bat講，我m̄用我ê祖業hō͘你，A-hap就倒tī眠床，面ǹg內面，也m̄食。A-hap in-ūi Iâ-su-lia̍t lâng Ná-po̍k só͘ kóng ê ōe, chiū ut-chut bô hoaⁿ-hí; tò--khì i ê chhù; in-ūi Ná-po̍k bat kóng, Góa m̄ ēng góa ê chó͘-gia̍p hō͘ lí, A-hap chiū tó tī bîn-chhn̂g, bīn ǹg lāi-bīn, iā m̄ chia̍h.

5王后Iâ-sé-piat到伊hia，問伊講，你ê心內憂悶續m̄食，是啥緣故ah？Ông-hō͘ Iâ-sé-piat kàu i hia, mn̄g i kóng, Lí ê sim-lāi iu-būn sòa m̄-chia̍h, sī siáⁿ iân-kò͘ ah?

6伊kā伊講，因為我對Iâ-su-lia̍t人Ná-po̍k講，你用你ê葡萄園hō͘我，我用銀hō͘你；á是你若ài，我就用葡萄園換你。伊講，我ê葡萄園，我m̄ hō͘你。I kā i kóng, In-ūi góa tùi Iâ-su-lia̍t lâng Ná-po̍k kóng, Lí ēng lí ê phû-tô-hn̂g hō͘ góa, góa ēng gûn hō͘ lí; á-sī lí nā ài, góa chiū ēng phû-tô-hn̂g ōaⁿ lí. I kóng, Góa ê phû-tô-hn̂g, góa m̄ hō͘ lí.

7王后Iâ-sé-piat kā伊講，你chit-chūn是teh管理以色列國á-m̄是？做你起來食，hō͘你ê心歡喜；我beh用Iâ-su-lia̍t人Ná-po̍k ê葡萄園hō͘你。Ông-hō͘ Iâ-sé-piat kā i kóng, Lí chit-chūn sī teh koán-lí Í-sek-lia̍t kok á-m̄-sī? chòe lí khí-lâi chia̍h, hō͘ lí ê sim hoaⁿ-hí; góa beh ēng Iâ-su-lia̍t lâng Ná-po̍k ê phû-tô-hn̂g hō͘ lí.

8就用A-hap ê名寫phoe，用王ê 印tǹg伊；寄hiah-ê phoe hō͘ Ná-po̍k ê城，hō͘ kap伊khiā起ê長老貴族。Chiū ēng A-hap ê miâ siá-phoe, ēng ông ê ìn tǹg--i; kià hiah ê phoe hō͘ Ná-po̍k ê siâⁿ, hō͘ kap i khiā-khí ê tiúⁿ-ló kùi-cho̍k.

9寫tī phoe裡講，Lín tio̍h宣布禁食，hō͘ Ná-po̍k坐tī百姓間ê高位；Siá tī phoe--nih kóng, Lín tio̍h soan-pò͘ kìm-chia̍h, hō͘ Ná-po̍k chē tī peh-sìⁿ-kan ê koâiⁿ-ūi;

10koh 設兩個匪類tī伊ê面前，做干證告伊講，你謗瀆上帝kap王；然後就拖伊出去，用石頭tìm死伊。koh siat nn̄g ê húi-lūi tī i ê bīn-chêng, chòe kan-chèng kò i kóng, Lí pòng-to̍k Siōng-tè kap ông; jiân-āu chiū thoa i chhut-khì, ēng chio̍h-thâu tìm-sí i.

11伊城內ê人，就是khiā起hit-ê城ê長老，kap貴族，就照Iâ-sé-piat所寄ê話，就是照伊寄hō͘ in ê phoe所寫ê，來行。I siâⁿ-lāi ê lâng, chiū-sī khiā-khí hit ê siâⁿ ê tiúⁿ-ló, kap kùi-cho̍k, chiū chiàu Iâ-sé-piat só͘ kià ê ōe, chiū-sī chiàu i kià hō͘ in ê phoe só͘-siá-ê, lâi kiâⁿ.

12宣布禁食，hō͘ Ná-po̍k坐tī百姓間ê高位。Soan-pò͘ kìm-chia̍h, hō͘ Ná-po̍k chē tī peh-sìⁿ-kan ê koâiⁿ-ūi.

13Hit兩個匪類入去，坐tī伊ê面前；匪類當百姓ê面前做干證告Ná-po̍k講，Ná-po̍k謗瀆上帝kap王；就拖伊出城外，用石頭tìm死伊。Hit nn̄g ê húi-lūi ji̍p-khì, chē tī i ê bīn-chêng; húi-lūi tng peh-sìⁿ ê bīn-chêng chòe kan-chèng kò Ná-po̍k kóng, Ná-po̍k pòng-to̍k Siōng-tè kap ông; chiū thoa i chhut siâⁿ-gōa, ēng chio̍h-thâu tìm-sí i.

14就差人去kā Iâ-sé-piat講，Ná-po̍k已經hō͘石頭tìm死lah。Chiū chhe lâng khì kā Iâ-sé-piat kóng, Ná-po̍k í-keng hō͘ chio̍h-thâu tìm-sí lah.

15Iâ-sé-piat聽見Ná-po̍k hō͘石頭tìm死，Iâ-sé-piat就kā A-hap講，你起來掌Iâ-su-lia̍t人Ná-po̍k m̄肯為tio̍h價錢hō͘你ê葡萄園，因為Ná-po̍k已經死，無命lah。Iâ-sé-piat thiaⁿ-kìⁿ Ná-po̍k hō͘ chio̍h-thâu tìm-sí, Iâ-sé-piat chiū kā A-hap kóng, Lí khí-lâi chiáng Iâ-su-lia̍t lâng Ná-po̍k m̄-khéng ūi-tio̍h kè-chîⁿ hō͘ lí ê phû-tô-hn̂g, in-ūi Ná-po̍k í-keng sí, bô-miā lah.

16A-hap聽見Ná-po̍k已經死，A-hap就起來，落去Iâ-su-lia̍t人Ná-po̍k ê葡萄園hia，beh掌伊。A-hap thiaⁿ-kìⁿ Ná-po̍k í-keng sí, A-hap chiū khí-lâi, lo̍h-khì Iâ-su-lia̍t lâng Ná-po̍k ê phû-tô-hn̂g hia, beh chiáng i.

17耶和華ê話臨到Thê-su-pí人以利亞，講，Iâ-hô-hoa ê ōe lîm-kàu Thê-su-pí lâng Í-lī-a, kóng,

18你起來，去見tiàm tī撒馬利亞ê以色列王A-hap；伊落去Ná-po̍k ê葡萄園beh掌伊；chit-chūn伊tī-hia。Lí khí-lâi, khì kìⁿ tiàm tī Sat-má-lī-a ê Í-sek-lia̍t ông A-hap; i lo̍h-khì Ná-po̍k ê phû-tô-hn̂g beh chiáng i; chit-chūn i tī-hia.

19你tio̍h kā伊講，耶和華án-ni講，你有thâi死人koh掌伊ê業mah？Koh tio̍h kā伊講，耶和華án-ni講，狗tī甚麼所在舐(chī)Ná-po̍k ê血，狗也beh tī-hia 舐你ê血，就是你本身ê血。Lí tio̍h kā i kóng, Iâ-hô-hoa án-ni kóng, Lí ū thâi-sí lâng koh chiáng i ê gia̍p mah? Koh tio̍h kā i kóng, Iâ-hô-hoa án-ni kóng, Káu tī sím-mi̍h só͘-chāi chī Ná-po̍k ê huih, káu iā beh tī-hia chī lí ê huih, chiū-sī lí pún-sin ê huih.

20A-hap kā以利亞講，我ê對敵ah，你chhē-tio̍h我mah？伊應講，我chhē-tio̍h你，因為你賣家己，行耶和華看做pháiⁿ ê事。A-hap kā Í-lī-a kóng, Góa ê tùi-te̍k ah, lí chhē-tio̍h góa mah? I ìn kóng, Góa chhē-tio̍h lí, in-ūi lí bōe ka-kī, kiâⁿ Iâ-hô-hoa khòaⁿ-chòe pháiⁿ ê sū.

21耶和華講，我beh 降災厄hō͘你，beh一盡除你；見屬A-hap ê ta-po͘丁，無論受拘束ê，á是自由ê，lóng tī以色列中剪除伊。Iâ-hô-hoa kóng, Góa beh kàng chai-ē hō͘ lí, beh it-chīn tû lí; kìⁿ sio̍k A-hap ê ta-po͘-teng, bô-lūn siū khu-sok--ê, á-sī chū-iû--ê, lóng tī Í-sek-lia̍t tiong chián-tû i.

22我beh hō͘你ê家親像Nî-pat ê kiáⁿ Iâ-lô-phò-àm ê家，koh親像A-hi-ngá ê kiáⁿ Pa-sa ê家，因為你所干犯激動我受氣ê事，koh hō͘以色列犯罪。Góa beh hō͘ lí ê ke chhin-chhiūⁿ Nî-pat ê kiáⁿ Iâ-lô-phò-àm ê ke, koh chhin-chhiūⁿ A-hi-ngá ê kiáⁿ Pa-sa ê ke, in-ūi lí só͘ kan-hoān kek-tōng Góa siū-khì ê sū, koh hō͘ Í-sek-lia̍t hoān-chōe.

23論Iâ-sé-piat耶和華也有講，到beh食Iâ-sé-piat tī Iâ-su-lia̍t ê外城。Lūn Iâ-sé-piat Iâ-hô-hoa iā ū kóng, Kàu beh chia̍h Iâ-sé-piat tī Iâ-su-lia̍t ê gōa-siâⁿ.

24屬A-hap ê人，死tī城內ê，狗beh食伊，死tī田野ê，空中ê鳥beh食伊。Sio̍k A-hap ê lâng, sí tī siâⁿ--lāi ê, káu beh chia̍h--i, sí tī chhân-iá ê, khong-tiong ê chiáu beh chia̍h--i.

25(總是無人親像A-hap，因為伊家己bōe，行耶和華看做pháiⁿ ê事；是對伊ê王后Iâ-sé-piat教唆伊。(Chóng-sī bô lâng chhin-chhiūⁿ A-hap, in-ūi i ka-kī bōe, kiâⁿ Iâ-hô-hoa khòaⁿ-chòe pháiⁿ ê sū; sī tùi i ê ông-hō͘ Iâ-sé-piat kàu[kiáu]-sō i.

26伊行大可惡ê事，因為伊tè hiah-ê偶像，lóng親像A-mô͘-lī人一樣，就是耶和華所趕出tī以色列人ê面前ê。)I kiâⁿ tōa khó-ò͘ⁿ ê sū, in-ūi i tè hiah ê ngó͘-siōng, lóng chhin-chhiūⁿ A-mô͘-lī lâng chi̍t-iūⁿ, chiū-sī Iâ-hô-hoa só͘ kóaⁿ-chhut tī Í-sek-lia̍t lâng ê bīn-chêng--ê.)

27A-hap聽見chiah-ê話，就拆裂衫，身軀穿粗麻布，禁食，睏也倒tī粗麻布，koh ûn-ûn-á行。A-hap thiaⁿ-kìⁿ chiah ê ōe, chiū thiah-li̍h saⁿ, sin-khu chhēng chho͘ môa-pò͘, kìm-chia̍h, khùn iā tó tī chho͘-môa-pò͘, koh ûn-ûn-á kiâⁿ.

28耶和華ê話臨到Thê-su-pí人以利亞講，Iâ-hô-hoa ê ōe lîm-kàu Thê-su-pí lâng Í-lī-a kóng,

29A-hap怎樣家己謙卑tī我ê面前，你有看見mah？因為伊家己謙卑tī我ê面前，所以我無beh tī伊活teh ê日降chit-ê災厄；是tī伊ê kiáⁿ ê日，降chit-ê災厄tī伊ê家。A-hap cháiⁿ-iūⁿ ka-kī khiam-pi tī góa ê bīn-chêng, lí ū khòaⁿ-kìⁿ mah? in-ūi i ka-kī khiam-pi tī Góa ê bīn-chêng, só͘-í Góa bô beh tī i oa̍h-teh ê ji̍t kàng chit ê chai-ē; sī tī i ê kiáⁿ ê ji̍t, kàng chit ê chai-ē tī i ê ke.

1以色列kap A-lân三年久無交戰。Í-sek-lia̍t kap A-lân saⁿ-nî kú bô kau-chiàn.

2到第三年猶大王Iok-sa-hoat落去以色列王hia。Kàu tē-saⁿ nî Iû-tāi ông Iok-sa-hoat lo̍h-khì Í-sek-lia̍t ông hia.

3以色列王對伊ê奴僕講，Lín kiám m̄知Ki-lia̍t ê La̍h-boa̍t是咱ê？咱竟然恬恬無tùi A-lân王ê手搶來mah？Í-sek-lia̍t ông tùi i ê lô͘-po̍k kóng, Lín kiám-m̄-chai Ki-lia̍t ê La̍h-boa̍t sī lán-ê? lán kéng-jiân tiām-tiām bô tùi A-lân ông ê chhiú chhiúⁿ--lâi mah?

4A-hap ka7Iok-sa-hoat講，你beh kap我去Ki-lia̍t ê La̍h-boa̍t交戰mah？Iok-sa-hoat kā以色列王講，我親像你，我ê百姓親像你ê百姓，我ê馬親像你ê馬。A-hap kā Iok-sa-hoat kóng, Lí beh kap góa khì Ki-lia̍t ê La̍h-boa̍t kau-chiàn mah? Iok-sa-hoat kā Í-sek-lia̍t ông kóng, Góa chhin-chhiūⁿ lí, góa ê peh-sìⁿ chhin-chhiūⁿ lí ê peh-sìⁿ, góa ê bé chhin-chhiūⁿ lí ê bé.

5Iok-sa-hoat kā以色列王講，請你今á日問耶和華ê意思，Iok-sa-hoat kā Í-sek-lia̍t ông kóng, Chhiáⁿ lí kin-á-ji̍t mn̄g Iâ-hô-hoa ê ì-sù,

6以色列王就聚集先知約略四百人，問in講，我tio̍h上去Ki-lia̍t ê La̍h-boa̍t來交戰，á是tio̍h soah ah？In講，Thang上去；因為主beh將伊交tī王ê手。Í-sek-lia̍t ông chiū chū-chi̍p sian-ti iok-lio̍k sì-pah lâng, mn̄g in kóng, Góa tio̍h chiūⁿ--khì Ki-lia̍t ê La̍h-boa̍t lâi kau-chiàn, á-sī tio̍h soah ah? In kóng, Thang chiūⁿ--khì; in-ūi Chú beh chiong i kau tī ông ê chhiú.

7Iok-sa-hoat講，Tī-chia kiám無iáu有耶和華ê先知，hō͘咱thang對伊來問mah？Iok-sa-hoat kóng, Tī-chia kiám bô iáu ū Iâ-hô-hoa ê sian-ti, hō͘ lán thang tùi i lâi mn̄g mah?

8以色列王ka7Iok-sa-hoat講，iáu有一人，是Im-la̍h ê kiáⁿ Bí-kai-ngá，咱thang對伊來問耶和華；總是我怨恨伊，因為伊所讖語我ê，lóng無好話，只有災厄nā-tiāⁿ。Iok-sa-hoat講，請王莫得án-ni講。Í-sek-lia̍t ông kā Iok-sa-hoat kóng, Iáu ū chi̍t-lâng, sī Im-la̍h ê kiáⁿ Bí-kai-ngá, lán thang tùi i lâi mn̄g Iâ-hô-hoa; chóng-sī góa oàn-hūn i, in-ūi i só͘ chhàm-gú góa-ê, lóng bô hó-ōe, chí-ū chai-ē nā-tiāⁿ. Iok-sa-hoat kóng, Chhiáⁿ ông bo̍h-tit án-ni kóng.

9以色列王就召一個官員來，講，你去叫Im-la̍h ê kiáⁿ Bí-kai-ngá緊緊來。Í-sek-lia̍t ông chiū tiàu chi̍t ê koaⁿ-oân lâi, kóng, Lí khì kiò Im-la̍h ê kiáⁿ Bí-kai-ngá kín-kín lâi.

10以色列王kap猶大王Iok-sa-hoat，ta̍k-ê坐伊ê座位，穿禮服，tī撒馬利亞城門口闊ê所在；眾先知ta̍k-ê tī in ê面前讖語。Í-sek-lia̍t ông kap Iû-tāi ông Iok-sa-hoat, ta̍k-ê chē i ê chō-ūi, chhēng lé-ho̍k, tī Sat-má-lī-a siâⁿ-mn̂g-kháu khoah ê só͘-chāi; chèng sian-ti ta̍k-ê tī in ê bīn-chêng chhàm-gú.

11Ki-ná-ná ê kiáⁿ Se-tí-ka做鐵角，講，耶和華án-ni講，你beh用chiah-ê tak A-lân人，到in滅無。Ki-ná-ná ê kiáⁿ Se-tí-ka chòe thih-kak, kóng, Iâ-hô-hoa án-ni kóng, Lí beh ēng chiah-ê tak A-lân lâng, kàu in bia̍t-bô.

12眾先知lóng án-ni讖語講，Thang上去Ki-lia̍t ê La̍h-boa̍t，beh得勝；因為耶和華beh將伊交tī王ê手。Chèng sian-ti lóng án-ni chhàm-gú kóng, Thang chiūⁿ--khì Ki-lia̍t ê La̍h-boa̍t, beh tek-sèng; in-ūi Iâ-hô-hoa beh chiong i kau tī ông ê chhiú.

13Hit-ê去叫Bí-kai-ngá ê使者kā伊講，看ah，眾先知lóng講一樣話，對王講好事；求你所講ê kap in相同，平平講好話。Hit-ê khì kiò Bí-kai-ngá ê sù-chiá kā i kóng, Khòaⁿ ah, chèng sian-ti lóng kóng chi̍t-iūⁿ ōe, tùi ông kóng hó-sū; kiû lí só͘-kóng-ê kap in saⁿ-tâng, pîⁿ-pîⁿ kóng hó-ōe.

14Bí-kai-ngá講，我kí永活ê耶和華來講，耶和華對我講甚麼，我beh講伊。Bí-kai-ngá kóng, Góa kí éng-oa̍h ê Iâ-hô-hoa lâi kóng, Iâ-hô-hoa tùi góa kóng sím-mi̍h, góa beh kóng i.

15Bí-kai-ngá到王ê面前，王問伊講，Bí-kai-ngá ah，阮thang上去Ki-lia̍t ê La̍h-boa̍t來交戰，á是tio̍h soah ah？伊應講，Thang上去，beh得勝；耶和華beh將伊交tī王ê手。Bí-kai-ngá kàu ông ê bīn-chêng, ông mn̄g i kóng, Bí-kai-ngá ah, goán thang chiūⁿ-khì Ki-lia̍t ê La̍h-boa̍t lâi kau-chiàn, á-sī tio̍h soah ah? I ìn kóng, Thang chiūⁿ-khì, beh tek-sèng; Iâ-hô-hoa beh chiong i kau tī ông ê chhiú.

16王對伊講，我tio̍h幾pái kah你chiù-chōa，你託耶和華ê名，只有tio̍h用真實kā我講？Ông tùi i kóng, Góa tio̍h kúi-pái kah lí chiù-chōa, lí thok Iâ-hô-hoa ê miâ, chí-ū tio̍h ēng chin-si̍t kā góa kóng?

17Bí-kai-ngá講，我看見以色列眾百姓四散tī山裡，親像無牧者ê羊一般；耶和華án-ni講，Chiah-ê無主人，in ta̍k-ê thang平安tò去in ê家。Bí-kai-ngá kóng, Góa khòaⁿ-kìⁿ Í-sek-lia̍t chèng peh-sìⁿ sì-sòaⁿ tī soaⁿ--nih, chhin-chhiūⁿ bô bo̍k-chiá ê iûⁿ chi̍t-poaⁿ; Iâ-hô-hoa án-ni kóng, Chiah-ê bô chú-lâng, in ta̍k-ê thang pêng-an tò-khì in ê ke.

18以色列王kā Iok-sa-hoat講，我kiám無kā你講，Chit人所beh讖語我ê，無講好話，只有災厄nā-tiāⁿ。Í-sek-lia̍t ông kā Iok-sa-hoat kóng, Góa kiám bô kā lí kóng, Chit-lâng só͘ beh chhàm-gú góa--ê, bô kóng hó-ōe, chí-ū chai-ē nā-tiāⁿ.

19Bí-kai-ngá講，所以你tio̍h聽耶和華ê話；我看見耶和華坐tī寶座，天頂ê萬軍khiā tī伊ê左右。Bí-kai-ngá kóng, Só͘-í lí tio̍h thiaⁿ Iâ-hô-hoa ê ōe; góa khòaⁿ-kìⁿ Iâ-hô-hoa chē tī pó-chō, thiⁿ-téng ê bān-kun khiā tī I ê chó-iū.

20耶和華講，Chī-chūi beh引誘A-hap，hō͘伊上去Ki-lia̍t ê La̍h-boa̍t，死tī-hia ah？Chit-ê講án-ni，hit-ê講àn-ni。Iâ-hô-hoa kóng, Chī-chūi beh ín-iú A-hap, hō͘ i chiūⁿ-khì Ki-lia̍t ê La̍h-boa̍t, sí tī-hia ah? Chit-ê kóng án-ni, hit-ê kóng àn-ni.

21後來有一個神出來，khiā tī耶和華ê面前，講，我beh引誘伊。Āu-lâi ū chi̍t ê sîn chhut-lâi, khiā tī Iâ-hô-hoa ê bīn-chêng, kóng, Góa beh ín-iú i.

22耶和華問伊講，你beh用甚麼法度？伊講，我beh出去，做白賊ê神tī伊眾先知ê嘴。耶和華講，你beh引誘伊，也beh成伊；出去，來做án-ni。Iâ-hô-hoa mn̄g i kóng, Lí beh ēng sím-mi̍h hoat-tō͘? I kóng, Góa beh chhut-khì, chòe pe̍h-chha̍t ê sîn tī i chèng sian-ti ê chhùi. Iâ-hô-hoa kóng, Lí beh ín-iú i, iā beh chiâⁿ i; chhut-khì, lâi chòe án-ni.

23Taⁿ耶和華用白賊ê神入tī你chiah-ê先知ê嘴；耶和華論到你有講災厄。Taⁿ Iâ-hô-hoa ēng pe̍h-chha̍t ê sîn ji̍p tī lí chiah ê sian-ti ê chhùi; Iâ-hô-hoa lūn-kàu lí ū kóng chai-ē.

24Ki-ná-ná ê kiáⁿ Se-tí-ka進前，搧(siàn)Bí-kai-ngá ê嘴phóe，講，耶和華ê神tùi toh落一條路離開我來kap你講ah？Ki-ná-ná ê kiáⁿ Se-tí-ka chìn-chêng, siàn Bí-kai-ngá ê chhùi-phóe, kóng, Iâ-hô-hoa ê sîn tùi toh-lo̍h chi̍t tiâu lō͘ lī-khui góa lâi kap lí kóng ah?

25Bí-kai-ngá講，看ah，你入內房家己bih，hit日就beh看見。Bí-kai-ngá kóng, Khòaⁿ ah, lí ji̍p lāi-pâng ka-kī bih, hit-ji̍t chiū beh khòaⁿ-kìⁿ.

26以色列王講，Tio̍h帶Bí-kai-ngá去交城守A-bûn，kap王ê kiáⁿ Iok-a-si，講，Í-sek-lia̍t ông kóng, Tio̍h tòa Bí-kai-ngá khì kau siâⁿ-siú A-bûn, kap ông ê kiáⁿ Iok-a-si, kóng,

27王án-ni講，用Chit人關tī監裡，用艱苦ê餅，艱苦ê水，hō͘伊食，thèng候我平安tò來。Ông án-ni kóng, Ēng chit-lâng koaiⁿ tī kaⁿ--nih, ēng kan-khó͘ ê piáⁿ, kan-khó͘ ê chúi, hō͘ i chia̍h, thèng-hāu góa pêng-an tò-lâi.

28Bí-kai-ngá講，你若真正平安tò來，就是耶和華無託我講。Koh講，chiah-ê百姓ah，lín lóng tio̍h聽。Bí-kai-ngá kóng, Lí nā chin-chiàⁿ pêng-an tò-lâi, chiū-sī Iâ-hô-hoa bô thok góa kóng. Koh kóng, Chiah ê peh-sìⁿ ah, lín lóng tio̍h thiaⁿ.

29以色列王kap猶大王Iok-sa-hoat上去Ki-lia̍t ê La̍h-boa̍t。Í-sek-lia̍t ông kap Iû-tāi ông Iok-sa-hoat chiūⁿ--khì Ki-lia̍t ê La̍h-boa̍t.

30以色列王kā Iok-sa-hoat講，我beh改妝上陣；你thang穿王服。以色列王就改妝上陣。Í-sek-lia̍t ông kā Iok-sa-hoat kóng, Góa beh kái-chong chiūⁿ-tīn; lí thang chhēng ông-ho̍k. Í-sek-lia̍t ông chiū kái-chong chiūⁿ-tīn.

31A-lân王有吩咐伊ê戰車ê官長三十二個，講，無論大細m̄-thang kap in交戰，只有kap以色列王交戰。A-lân ông ū hoan-hù i ê chiàn-chhia ê koaⁿ-tiúⁿ saⁿ-cha̍p-jī-ê, kóng, Bô-lūn tōa-sòe m̄-thang kap in kau-chiàn, chí-ū kap Í-sek-lia̍t ông kau-chiàn.

32戰車ê官長看見Iok-sa-hoat，就講，這必定是以色列王；就oa̍t-tńg beh kap伊交戰。Iok-sa-hoat就哮救。Chiàn-chhia ê koaⁿ-tiúⁿ khòaⁿ-kìⁿ Iok-sa-hoat, chiū kóng, Che pit-tiāⁿ sī Í-sek-lia̍t ông; chiū oa̍t-tńg beh kap i kau-chiàn. Iok-sa-hoat chiū háu-kiù.

33戰車ê官長看見m̄是以色列王，就oa̍t-tńg去無追伊。Chiàn-chhia ê koaⁿ-tiúⁿ khòaⁿ-kìⁿ m̄-sī Í-sek-lia̍t ông, chiū oa̍t-tńg-khì bô tui i.

34有一人偶然開弓射入以色列王戰甲ê kap-chōa；王kā趕車ê講，你oa̍t-tńg手，帶我出陣；因為我tio̍h重傷。Ū chi̍t-lâng ngó͘-jiân khui-keng siā-ji̍p Í-sek-lia̍t ông chiàn-kah ê kap-chōa; ông kā kóaⁿ-chhia--ê kóng, Lí oa̍t-tńg chhiú, tòa góa chhut-tīn; in-ūi góa tio̍h tāng-siong.

35Hit日交戰ê勢面ná猛烈；有人扶王tī車裡，抵擋A-lân人；到日暗王就死，血tùi tio̍h傷ê所在流到車底。Hit-ji̍t kau-chiàn ê sè-bīn ná béng-lia̍t; ū lâng hû ông tī chhia--nih, tí-tng A-lân lâng; kàu ji̍t àm ông chiū sí, huih tùi tio̍h-siong ê só͘-chāi lâu kàu chhia-tóe.

36日beh落ê時，有號令遍傳tī軍營中，講，ta̍k人tò去本城，ta̍k人tò去本地。Ji̍t beh lo̍h ê sî, ū hō-lēng piàn-thoân tī kun-iâⁿ-tiong, kóng, Ta̍k-lâng tò-khì pún-siâⁿ, ta̍k-lâng tò-khì pún-tōe.

37王死，帶伊到撒馬利亞；in埋葬王tī撒馬利亞。Ông sí, tòa i kàu Sat-má-lī-a; in bâi-chòng ông tī Sat-má-lī-a.

38有人洗伊ê車tī Sat-má-li-a ê池邊，狗來舐伊ê血，tú照耶和華所講ê話；娼妓也tī-hia洗身軀。Ū lâng sóe i ê chhia tī Sat-má-li-a ê tî-piⁿ, káu lâi chī i ê huih, tú-chiàu Iâ-hô-hoa só͘ kóng ê ōe; chhiong-ki iā tī-hia sóe seng-khu.

39A-hap其餘ê事，見伊所行ê，kap伊所起象牙ê厝，以及所起lóng總ê城，kiám無記tī以色列chiah-ê王ê記錄mah？A-hap kî-û ê sū, kìⁿ i só͘-kiâⁿ-ê, kap i só͘ khí chhiūⁿ-gê ê chhù, í-ki̍p só͘ khí lóng-chóng ê siâⁿ, kiám bô kì tī Í-sek-lia̍t chiah ê ông ê kì-lio̍k mah?

40A-hap kap伊ê列祖同睏；伊ê kiáⁿ A-hap-siā續接伊做王。A-hap kap i ê lia̍t-chó͘ tâng khùn; i ê kiáⁿ A-hap-siā sòa-chiap i chòe ông.

41以色列王A-hap第四年，A-sat ê kiáⁿ Iok-sa-hoat坐位做猶大王。Í-sek-lia̍t ông A-hap tē-sì nî, A-sat ê kiáⁿ Iok-sa-hoat chē-ūi chòe Iû-tāi ông.

42Iok-sa-hoat坐位ê時，三十五歲；tī耶路撒冷做王二十五年；伊ê老母名叫A-só͘-pa，就是Sī-lī-hi ê cha-bó͘-kiáⁿ。Iok-sa-hoat chē-ūi ê sî, saⁿ-cha̍p-gō͘ hè; tī Iâ-lō͘-sat-léng chòe ông jī-cha̍p-gō͘ nî; i ê lāu-bú miâ kiò A-só͘-pa, chiū-sī Sī-lī-hi ê cha-bó͘-kiáⁿ.

43Iok-sa-hoat行伊ê老父A-sat hiah-ê路，無oa̍t-tńg離開伊，行耶和華看做好ê事；總是山頭壇iáu未廢無，百姓猶原獻祭燒香tī山頭壇。Iok-sa-hoat kiâⁿ i-ê lāu-pē A-sat hiah ê lō͘, bô oa̍t-tńg lī-khui i, kiâⁿ Iâ-hô-hoa khòaⁿ-chòe hó ê sū; chóng-sī soaⁿ-thâu-tôaⁿ iáu-bē hòe-bô, peh-sìⁿ iû-goân hiàn-chè sio-hiuⁿ tī soaⁿ-thâu-tôaⁿ.

44Iok-sa-hoat kap以色列王立約和好。Iok-sa-hoat kap Í-sek-lia̍t ông li̍p-iok hô-hó.

45Iok-sa-hoat其餘ê事，kap伊所顯出ê能力，kap伊怎樣交戰，kiám無lóng記tī猶大列王ê記錄mah？Iok-sa-hoat kî-û ê sū, kap i só͘ hián-chhut ê lêng-le̍k, kap i cháiⁿ-iūⁿ kau-chiàn, kiám bô lóng kì tī Iû-tāi lia̍t-ông ê kì-lio̍k mah?

46伊ê老父A-sat ê時，所留落來ê攣童，Iok-sa-hoat tùi國內除去。I ê lāu-pē A-sat ê sî, só͘ lâu--lo̍h-lâi ê loân-tông, Iok-sa-hoat tùi kok-lāi tû-khì.

47Hit時Í-tong無王，有委員管理伊。Hit-sî Í-tong bô ông, ū úi-oân koán-lí i.

48Iok-sa-hoat造Tha-si ê船隻，beh去Gô-hui運金來；總是無去，因為船phah破tī Í-sûn-ka-piat。Iok-sa-hoat chō Tha-si ê chûn-chiah, beh khì Gô-hui ūn kim lâi; chóng-sī bô khì, in-ūi chûn phah-phòa tī Í-sûn-ka-piat.

49A-hap ê kiáⁿ A-hap-siā kā Iok-sa-hoat講，容允我ê奴僕kap你ê奴僕坐船相kap去；總是Iok-sa-hoat m̄肯。A-hap ê kiáⁿ A-hap-siā kā Iok-sa-hoat kóng, Iông-ún góa ê lô͘-po̍k kap lí ê lô͘-po̍k chē-chûn saⁿ-kap khì; chóng-sī Iok-sa-hoat m̄-khéng.

50Iok-sa-hoat kap列祖同睏，kap伊ê列祖葬tī伊ê祖大衛ê城；伊ê kiáⁿ Iâ-hô-lâm續接伊做王。Iok-sa-hoat kap lia̍t-chó͘ tâng-khùn, kap i ê lia̍t-chó͘ chòng tī i ê chó͘ Tāi-pi̍t ê siâⁿ; i ê kiáⁿ Iâ-hô-lâm sòa-chiap i chòe ông.

51猶大王Iok-sa-hoat十七年，A-hap ê kiáⁿ A-hap-siā tī撒馬利亞坐位，做以色列王，做王tī以色列歷過兩年。Iû-tāi ông Iok-sa-hoat cha̍p-chhit nî, A-hap ê kiáⁿ A-hap-siā tī Sat-má-lī-a chē-ūi, chòe Í-sek-lia̍t ông, chòe-ông tī Í-sek-lia̍t le̍k-kè nn̄g-nî.

52伊行耶和華看做pháiⁿ ê事，行伊ê父ê路，kap伊ê老母ê路，kap hō͘以色列犯罪ê Nî-pat ê kiáⁿ Iâ-lô-phò-àm ê路。I kiâⁿ Iâ-hô-hoa khòaⁿ-chòe pháiⁿ ê sū, kiâⁿ i ê pē ê lō͘, kap i ê lāu-bú ê lō͘, kap hō͘ Í-sek-lia̍t hoān-chōe ê Nî-pat ê kiáⁿ Iâ-lô-phò-àm ê lō͘.

53伊照in老父一切所行ê服事Pa-le̍k來敬拜伊，激耶和華以色列上帝ê受氣。I chiàu in lāu-pē it-chhè só͘-kiâⁿ-ê ho̍k-sāi Pa-le̍k lâi kèng-pài i, kek Iâ-hô-hoa Í-sek-lia̍t Siōng-tè ê siū-khì.