1以色列人出埃及地了後四百八十年，所羅門做以色列王，第四年Se-hut月，就是二月，動工起耶和華ê殿。Í-sek-lia̍t lâng chhut Ai-ki̍p tōe liáu-āu sì-pah poeh-cha̍p nî, Só͘-lô-bûn chòe Í-sek-lia̍t ông, tē-sì nî Se-hut ge̍h, chiū-sī jī-ge̍h, tāng-kang khí Iâ-hô-hoa ê tiān.

2所羅門王為耶和華所起ê殿，長六十肘，闊二十肘，高三十肘。Só͘-lô-bûn ông ūi Iâ-hô-hoa só͘ khí ê tiān, tn̂g la̍k-cha̍p tiú, khoah jī-cha̍p tiú, koâiⁿ saⁿ-cha̍p tiú.

3Hit塊厝殿前ê廊長二十肘，kap伊ê厝ê闊平；tī厝ê頭前伊ê闊十肘。Hit tè chhù tiān-chêng ê lông tn̂g jī-cha̍p tiú, kap i ê chhù ê khoah pîⁿ; tī chhù ê thâu-chêng i ê khoah cha̍p tiú.

4Koh為tio̍h厝做窗，有關死ê窗á止。Koh ūi-tio̍h chhù chòe thang, ū koaiⁿ-sí ê thang-á-chí.

5Óa tī厝ê牆，四圍起樓，就是óa tī厝ê牆ê四圍，前殿後殿lóng是án-ni；起邊房tī四圍。Óa tī chhù ê chhiûⁿ, sì-ûi khí lâu, chiū-sī óa tī chhù ê chhiûⁿ ê sì-ûi, chêng-tiān āu-tiān lóng sī án-ni; khí piⁿ-pâng tī sì-ûi.

6樓ê下層闊五肘，中層闊六肘，三層闊七肘；tī厝ê外面做幫牆tī伊ê四圍，hō͘楹á無插入殿ê牆。Lâu ê ē-chân khoah gō͘-tiú, tiong-chân khoah la̍k-tiú, saⁿ-chân khoah chhit-tiú; tī chhù ê gōa-bīn chòe png-chhiûⁿ tī i ê sì-ûi, hō͘ îⁿ-á bô chhah-ji̍p tiān ê chhiûⁿ.

7殿teh起ê時，是用山中phah好ê石；起殿ê時，槌、斧頭，kap別號鐵器ê聲音lóng無聽見。Tiān teh khí ê sî, sī ēng soaⁿ-tiong phah-hó ê chio̍h; khí tiān ê sî, thûi, pó͘-thâu, kap pa̍t-hō thih-khì ê siaⁿ-im lóng bô thiaⁿ-kìⁿ.

8邊á中房ê門，就是tī殿ê chiàⁿ-pêng，tùi捲螺梯上中層，tùi中層上到第三層。Piⁿ-á tiong-pâng ê mn̂g, chiū-sī tī tiān ê chiàⁿ-pêng, tùi kńg-lê-thui chiūⁿ tiong-chân, tùi tiong-chân chiūⁿ kàu tē-saⁿ chân.

9Tùi án-ni，起殿到好；就用柏香柴ê楹，柏香柴ê板，遮蓋殿。Tùi án-ni, khí tiān kàu-hó; chiū ēng pek-hiuⁿ-chhâ ê îⁿ, pek-hiuⁿ-chhâ ê pán, jia-khàm tiān.

10Koh óa tī kui間ê殿有起樓，各高五肘；chiah-ê lóng用柏香柴khòa tī殿裡。Koh óa tī kui-keng ê tiān ū khí lâu, kok koâiⁿ gō͘-tiú; chiah-ê lóng ēng pek-hiuⁿ-chhâ khòa tī tiān--nih.

11耶和華ê話臨到所羅門講，Iâ-hô-hoa ê ōe lîm-kàu Só͘-lô-bûn kóng,

12論到你所起chit間殿，你若行我ê律例，thàn我ê法度，守我一切ê誡命，照án-ni行，我就beh照我所應允你ê父大衛ê話，應驗tī你。Lūn-kàu lí só͘ khí chit keng tiān, lí nā kiâⁿ Góa ê lu̍t-lē, thàn Góa ê hoat-tō͘, siú Góa it-chhè ê kài-bēng, chiàu án-ni kiâⁿ, Góa chiū beh chiàu Góa só͘ èng-ún lí ê pē Tāi-pi̍t ê ōe, èng-giām tī lí.

13我beh tiàm tī以色列人ê中間，也無放sak我ê百姓以色列。Góa beh tiàm tī Í-sek-lia̍t lâng ê tiong-kan, iā bô pàng-sak Góa ê peh-sìⁿ Í-sek-lia̍t.

14所羅門起殿已經明白。Só͘-lô-bûn khí tiān í-keng bêng-pe̍k.

15用柏香柴ê板起做殿ê內重牆；tùi殿ê土腳到楹á，lóng用柴蓋伊ê內重；koh用松樹板舖殿ê土腳。Ēng pek-hiuⁿ-chhâ ê pán khí chòe tiān ê lāi-têng chhiûⁿ; tùi tiān ê thô͘-kha kàu îⁿ-á, lóng ēng chhâ khàm i ê lāi-têng; koh ēng siông-chhiū-pán pho͘ tiān ê thô͘-kha.

16Koh tī殿ê後面，用柏香柴板起二十肘，tùi土腳到楹á，kā伊做tī內面，做後殿，就是至聖所。Koh tī tiān ê āu-bīn, ēng pek-hiuⁿ-chhâ pán khí jī-cha̍p tiú, tùi thô͘-kha kàu îⁿ-á, kā i chòe tī lāi-bīn, chòe āu-tiān, chiū-sī chì-sèng-só͘.

17後殿前ê殿深四十肘。Āu-tiān chêng ê tiān chhim sì-cha̍p tiú.

18殿內ê柏香柴lóng有刻瓠á kap花蕊；殿內lóng是柏香柴，無看見一塊石。Tiān-lāi ê peh-hiuⁿ-chhâ lóng ū khek pû-á kap hoe-lúi; tiān-lāi lóng sī pek-hiuⁿ-chhâ, bô khòaⁿ-kìⁿ chi̍t tè chio̍h.

19厝ê內面有備辦後殿，beh tī-hia安置耶和華ê約櫃。Chhù ê lāi-bīn ū pī-pān āu-tiān, beh tī-hia an-tì Iâ-hô-hoa ê iok-kūi.

20後殿ê內面長二十肘，闊二十肘，高二十肘，lóng用好金安伊；也用柏香柴蓋壇。Āu-tiān ê lāi-bīn tn̂g jī-cha̍p tiú, khoah jī-cha̍p tiú, koâiⁿ jī-cha̍p tiú, lóng ēng hó-kim an i; iā ēng pek-hiuⁿ-chhâ khàm tôaⁿ.

21厝內所羅門lóng用好金安伊，後殿ê頭前牽金鍊á，也用好金安伊。Chhù-lāi Só͘-lô-bûn lóng ēng hó-kim an i, āu-tiān ê thâu-chêng khan kim-liān-á, iā ēng hó-kim an i.

22全殿lóng安金，到hit間殿lóng起好；óa tī後殿ê壇，也lóng安金。Choân-tiān lóng an kim, kàu hit keng tiān lóng khí hó; óa tī āu-tiān ê tôaⁿ, iā lóng an-kim.

23Tī後殿ê內面，伊用橄欖柴做兩個ki-lō͘兵，ta̍k-ê高十肘。Tī āu-tiān ê lāi-bīn, i ēng kaⁿ-ná-chhâ chòe nn̄g ê ki-lō͘-peng, ta̍k-ê koâiⁿ cha̍p-tiú.

24ki-lō͘兵chit-pêng ê翼五肘，ki-lō͘兵hit-pêng ê翼 五肘；tùi chit-pêng ê翼尾到hit-pêng ê翼尾，共十肘。Ki-lō͘-peng chit-pêng ê si̍t gō͘ tiú, ki-lō͘-peng hit-pêng ê si̍t gō͘ tiú; tùi chit-pêng ê si̍t-bé kàu hit-pêng ê si̍t-bé, kiōng cha̍p-tiú.

25Hit-ê ki-lō͘兵也是十肘；兩個ki-lō͘兵ê寸尺、款式，lóng相同。Hit ê ki-lō͘-peng iā sī cha̍p-tiú; nn̄g ê ki-lō͘-peng ê chhùn-chhioh, khoán-sit, lóng saⁿ-tâng.

26Chit-ê ki-lō͘兵高十肘，hit-ê ki-lō͘兵也是án-ni。Chit ê ki-lō͘-peng koâiⁿ cha̍p-tiú, hit ê ki-lō͘-peng iā sī án-ni.

27將ki-lō͘兵hē tī後殿ê內面；ki-lō͘兵ê翼thí開，chit-ê ki-lō͘兵一個翼到chit-pêng ê牆，hit-ê ki-lō͘兵一個翼到hit-pêng ê牆；tī殿內in兩個翼相接。Chiong ki-lō͘-peng hē tī āu-tiān ê lāi-bīn; ki-lō͘-peng ê si̍t thí-khui, chit ê ki-lō͘-peng chi̍t ê si̍t kàu chit-pêng ê chhiûⁿ, hit ê ki-lō͘-peng chi̍t ê si̍t kàu hit-pêng ê chhiûⁿ; tī tiān-lāi in nn̄g ê si̍t saⁿ-chiap.

28伊koh用金安hiah-ê ki-lō͘兵。I koh ēng kim an hiah ê ki-lō͘-peng.

29Hit-ê殿四圍ê牆，內外lóng有雕刻，就是雕刻ki-lō͘兵、棗樹，kap花蕊ê款式。Hit ê tiān sì-ûi ê chhiûⁿ, lāi-gōa lóng ū tiau-khek, chiū-sī tiau-khek ki-lō͘-peng, chó-chhiū, kap hoe-lúi ê khoán-sit.

30殿ê地板，內外lóng安金。Tiān ê tōe-pán, lāi-gōa lóng an-kim.

31Koh用橄欖柴做入後殿ê門；伊ê門楣，門khiā，tìn牆ê五份一。Koh ēng kaⁿ-ná-chhâ chòe ji̍p āu-tiān ê mn̂g; i ê mn̂g-bâi, mn̂g-khiā, tìn chhiûⁿ ê gō͘-hūn-chi̍t.

32用橄欖柴所造兩個門扇，頂面刻ki-lō͘兵、棗樹，kap花蕊ê款式，lóng安金；koh用金鑲ki-lō͘兵kap棗樹ê頂面。Ēng kaⁿ-ná-chhâ só͘ chō nn̄g ê mn̂g-sìⁿ, téng-bīn khek ki-lō͘-peng, chó-chhiū, kap hoe-lúi ê khoán-sit, lóng an-kim; koh ēng kim siuⁿ ki-lō͘-peng kap chó-chhiū ê téng-bīn.

33Koh用橄欖柴做入殿ê門khiā，tìn牆ê四份一。Koh ēng kaⁿ-ná-chhâ chòe ji̍p tiān ê mn̂g-khiā, tìn chhiûⁿ ê sì-hūn-chi̍t.

34用松樹柴，做雙pêng ê門扇；chit pêng門ê兩扇能拗得，hit pêng門ê兩扇也能拗得；Ēng siông-chhiū-chhâ, chòe siang-pêng ê mn̂g-sìⁿ; chit pêng mn̂g ê nn̄g-sìⁿ ōe áu--tit, hit pêng mn̂g ê nn̄g-sìⁿ iā ōe áu--tit;

35頂面刻ki-lō͘兵、棗樹，kap花蕊ê款式，lóng 安金；koh用金鑲tī雕刻ê工ê頂面。téng-bīn khek ki-lō͘-peng, chó-chhiū, kap hoe-lúi ê khoán-sit, lóng an-kim; koh ēng kim siuⁿ tī tiau-khek ê kang ê téng-bīn.

36伊koh用phah好ê石三ûn，柏香柴一ûn，來起內院。I koh ēng phah-hó ê chio̍h saⁿ-ûn, pek-hiuⁿ-chhâ chi̍t-ûn, lâi khí lāi-īⁿ.

37第四年，Se-hut月，hē耶和華殿ê地基。Tē sì-nî, Se-hut ge̍h, hē Iâ-hô-hoa tiān ê tōe-ki.

38到十一年，Pò͘-le̍k月，就是八月，殿堂所有一切照伊ê款式造成；伊起造共七年久。Kàu cha̍p-it nî, Pò͘-le̍k ge̍h, chiū-sī poeh-ge̍h, tiān-tn̂g só͘ ū it-chhè chiàu i ê khoán-sit chō-chiâⁿ; i khí-chō kiōng chhit nî kú.

1所羅門起家己ê厝，十三年久，厝chiah起好。Só͘-lô-bûn khí ka-kī ê chhù, cha̍p-saⁿ nî kú, chhù chiah khí hó.

2Koh起黎巴嫩樹林ê厝，長一百肘，闊五十肘，高三十肘；有柏香柴ê柱四chōa，柱頂有柏香柴ê楹。Koh khí Lī-pa-lùn chhiū-nâ ê chhù, tn̂g chi̍t-pah tiú, khoah gō͘-cha̍p tiú, koâiⁿ saⁿ-cha̍p tiú; ū pek-hiuⁿ-chhâ ê thiāu sì-chōa, thiāu-téng ū pek-hiuⁿ-chhâ ê îⁿ.

3頂面用柏香柴蓋伊，蓋tī四十五支柱頂ê楹；每chōa十五支柱。Téng-bīn ēng pek-hiuⁿ-chhâ khàm i, khàm tī sì-cha̍p-gō͘ ki thiāu-téng ê îⁿ; múi-chōa cha̍p-gō͘ ki thiāu.

4Koh有窗門三chōa，窗kap窗相對；三chōa lóng是án-ni。Koh ū thang-mn̂g saⁿ-chōa, thang kap thang saⁿ-tùi; saⁿ-chōa lóng sī án-ni.

5Chiah-ê門kap門khiā，是用柴做ê，lóng是四方；有窗門三chōa，窗kap窗相對；三chōa lóng是án-ni。Chiah ê mn̂g kap mn̂g-khiā, sī ēng chhâ chòe ê, lóng sī sù-hong; ū thang-mn̂g saⁿ-chōa, thang kap thang saⁿ-tùi; saⁿ-chōa lóng sī án-ni.

6Koh起有柱ê léng廊，長五十肘，闊三十肘；tī in ê頭前koh有léng廊，tī in ê頭前有柱kap戶碇。Koh khí ū thiāu ê léng-lông, tn̂g gō͘-cha̍p tiú, khoah saⁿ-cha̍p tiú; tī in ê thâu-chêng koh ū léng-lông, tī in ê thâu-chêng ū thiāu kap hō͘-tēng.

7Koh起座位ê廊，就是審判ê廊，thang tī-hia審判；chit-ê廊tùi地板到天羅板，用柏香柴蓋。Koh khí chō-ūi ê lông, chiū-sī sím-phòaⁿ ê lông, thang tī-hia sím-phòaⁿ; chit ê lông tùi tōe-pán kàu thian-lô-pán, ēng pek-hiuⁿ-chhâ khàm.

8所羅門家己所beh khiā ê厝，另外有一間院tī廊ê內面，起造ê法相同；所羅門娶法老ê cha-bó͘-kiáⁿ，也kā伊起一間厝，kap chit-ê廊相同。Só͘-lô-bûn ka-kī só͘ beh khiā ê chhù, lēng-gōa ū chi̍t keng īⁿ tī lông ê lāi-bīn, khí-chō ê hoat saⁿ-tâng; Só͘-lô-bûn chhōa Hoat-ló ê cha-bó͘-kiáⁿ, iā kā i khí chi̍t keng chhù, kap chit ê lông saⁿ-tâng.

9起chiah-ê lóng是用寶貝ê石，照寸尺來phah好ê石，內外用鋸á鋸ê；tùi地基到nî-chîⁿ，tùi外面到大院，lóng是án-ni。Khí chiah-ê lóng sī ēng pó-pòe ê chio̍h, chiàu chhùn-chhioh lâi phah-hó ê chio̍h, lāi-gōa ēng kù-á kù--ê; tùi tōe-ki kàu nî-chîⁿ, tùi gōa-bīn kàu tōa-īⁿ, lóng sī án-ni.

10地基是貴氣ê石，是大塊石；有十肘ê石，有八肘ê石。Tōe-ki sī kùi-khì ê chio̍h, sī tōa tè chio̍h; ū cha̍p tiú ê chio̍h, ū poeh tiú ê chio̍h.

11頂面有貴氣ê石，照寸尺phah好ê石，也有柏香柴。Téng-bīn ū kùi-khì ê chio̍h, chiàu chhùn-chhioh phah-hó ê chio̍h, iā ū peh-hiuⁿ-chhâ.

12大院周圍有phah好ê石三ûn，柏香柴一ûn；lóng親像耶和華殿ê內院，kap殿ê廊。Tōa-īⁿ chiu-ûi ū phah-hó ê chio̍h saⁿ-ûn, pek-hiuⁿ-chhâ chi̍t-ûn; lóng chhin-chhiūⁿ Iâ-hô-hoa tiān ê lāi-īⁿ, kap tiān ê lông.

13所羅門王差人tùi Chhui-lô帶Hō͘-lân來。Só͘-lô-bûn ông chhe lâng tùi Chhui-lô tòa Hō͘-lân lâi.

14伊是Ná-hut-tha-lī支派中一個守寡人ê kiáⁿ，伊ê老父是Chhui-lô人，是phah銅師傅。Hō͘-lân有智慧、聰明，本事滿滿，gâu phah ta̍k項ê銅器；伊來所羅門hia，做伊一切ê工。I sī Ná-hut-tha-lī chi-phài tiong chi̍t ê chiú-kóaⁿ lâng ê kiáⁿ, i ê lāu-pē sī Chhui-lô lâng, sī phah-tâng sai-hū. Hō͘-lân ū tì-hūi, chhang-miâ, pún-sū móa-móa, gâu phah ta̍k-hāng ê tâng-khì; i lâi Só͘-lô-bûn hia, chòe i it-chhè ê kang.

15伊製造兩支銅柱，每支高十八肘，柱ê周圍十二肘。I chè-chō nn̄g ki tâng-thiāu, múi-ki koâiⁿ cha̍p-poeh tiú, thiāu ê chiu-ûi cha̍p-jī tiú.

16Koh用銅來鑄兩個柱斗，hē tī柱頂；chit-ê柱斗高五肘，hit-ê柱斗高也五肘。Koh ēng tâng lâi chù nn̄g ê thiāu-táu, hē tī thiāu-téng; chit ê thiāu-táu koâiⁿ gō͘ tiú, hit ê thiāu-táu koâiⁿ iā gō͘-tiú.

17柱頂ê柱斗有刺一目一目 ê 網á kap一環一環ê鍊á；chit-ê柱斗有七個，hit-ê柱斗也有七個。Thiāu-téng ê thiāu-táu ū chhiah chi̍t-ba̍k chi̍t-ba̍k ê bāng-á kap chi̍t-khoân chi̍t-khoân ê liān-á; chit ê thiāu-táu ū chhit-ê, hit ê thiāu-táu iā ū chhit-ê.

18伊造柱；tī一個網á ê頂面ê四圍，有石榴兩chōa，用伊來遮蓋柱頂ê柱斗；hit-ê柱斗也是án-ni。I chō thiāu; tī chi̍t ê bāng-á ê téng-bīn ê sì-ûi, ū sia̍h-liû nn̄g-chōa, ēng i lâi jia-khàm thiāu-téng ê thiāu-táu; hit ê thiāu-táu iā sī án-ni.

19廊ê內面柱頂ê柱斗，有刻百合花四肘。Lông ê lāi-bīn thiāu-téng ê thiāu-táu, ū khek pek-ha̍p-hoe sì tiú.

20兩支柱頂，近網á邊膨圓ê所在，有柱斗；koh有石榴兩百粒tī第二ê柱斗；ta̍k-chōa圍伊。Nn̄g ki thiāu-téng, kūn bāng-á piⁿ phòng-îⁿ ê só͘-chāi, ū thiāu-táu; koh ū sia̍h-liû nn̄g-pah lia̍p tī tē-jī ê thiāu-táu; ta̍k-chōa ûi i.

21伊khiā兩支柱tī殿ê léng廊；khiā tī chiàⁿ-pêng ê名叫Ngá-kun，khiā tī tò-pêng ê，名叫Pho-a-su。I khiā nn̄g ki thiāu tī tiān ê léng-lông; khiā tī chiàⁿ-pêng ê miâ kiò Ngá-kun, khiā tī tò-pêng ê, miâ kiò Pho-a-su.

22Tī柱頂刻百合花；án-ni，造柱ê工就明白。Tī thiāu-téng khek pek-ha̍p-hoe; án-ni, chō thiāu ê kang chiū bêng-pe̍k.

23伊koh鑄一個銅海，款式是圓ê，高五肘，tùi chit-pêng到hit-pêng十肘，周圍三十肘。I koh chù chi̍t ê tâng-hái, khoán-sit sī îⁿ--ê, koâiⁿ gō͘ tiú, tùi chit-pêng kàu hit-pêng cha̍p tiú, chiu-ûi saⁿ-cha̍p tiú.

24Tī伊ê墘ê下面，有瓠á ê款圍伊，每肘十粒，來圍hit-ê銅海；瓠á有兩chōa，鑄銅海ê時，續鑄ê。Tī i ê kîⁿ ê ē-bīn, ū pû-á ê khoán ûi i, múi-tiú cha̍p-lia̍p, lâi ûi hit ê tâng-hái; pû-á ū nn̄g-chōa, chù tâng-hái ê sî, sòa chù--ê.

25銅海khòa tī十二隻銅牛ê頂面；三隻ǹg北，三隻ǹg西，三隻ǹg南，三隻ǹg東；銅海hē tī牛ê頂面，牛尾ǹg內面。Tâng-hái khòa tī cha̍p-jī chiah tâng-gû ê téng-bīn; saⁿ-chiah ǹg-pak, saⁿ-chiah ǹg-sai, saⁿ-chiah ǹg-lâm, saⁿ-chiah ǹg-tang; tâng-hái hē tī gû ê téng-bīn, gû-bé ǹg lāi-bīn.

26銅海厚(kāu)一巴掌ê闊；伊ê墘親像杯ê墘，親像百合花；thang貯兩千pà-te̍k。Tâng-hái kāu chi̍t pa-chiúⁿ ê khoah; i ê kîⁿ chhin-chhiūⁿ poe ê kîⁿ, chhin-chhiūⁿ pek-ha̍p-hoe; thang tóe nn̄g-chheng pà-te̍k.

27伊用銅chhòng十個座；每座長四肘，闊四肘，高三肘。I ēng tâng chhòng cha̍p ê chō; múi-chō tn̂g sì-tiú, khoah sì-tiú, koâiⁿ saⁿ-tiú.

28Ta̍k-ê座ê款式是án-ni；lóng有隔堵(kek-tó͘)；伊ê堵tī角ê所在相接。Ta̍k ê chō ê khoán-sit sī án-ni; lóng ū kek-tó͘; i ê tó͘ tī kak ê só͘-chāi saⁿ-chiap.

29Tī伊ê角相接ê所在，堵ê頂面，有獅，kap牛，kap ki-lō͘兵；tī角相接ê所在ê頂面，有小座；獅kap牛ê下面，有垂kó͘-chîⁿ窗ê鬚。Tī i ê kak saⁿ-chiap ê só͘-chāi, tó͘ ê téng-bīn, ū sai, kap gû, kap ki-lō͘-peng; tī kak saⁿ-chiap ê só͘-chāi ê téng-bīn, ū sió-chō; sai kap gû ê ē-bīn, ū sûi kó͘-chîⁿ-thang ê chhiu.

30Ta̍k-ê座有四個銅輪，kap銅ê軸心；伊ê四腳各有架；架鑄tī盆ê下面；ta̍k-ê邊á有kó͘-chîⁿ窗ê鬚。Ta̍k ê chō ū sì ê tâng-lûn, kap tâng ê te̍k-sim; i ê sì-kha kok ū kè; kè chù tī phûn ê ē-bīn; ta̍k-ê piⁿ-á ū kó͘-chîⁿ-thang ê chhiu.

31伊ê嘴tī斗ê內面èng頂一肘；伊ê嘴是圓ê，親像小座 ê款式，一肘半；tī伊ê嘴有雕刻；伊ê堵是四方ê，m̄是圓ê。I ê chhùi tī táu ê lāi-bīn ǹg-téng chi̍t-tiú; i ê chhùi sī îⁿ-ê, chhin-chhiūⁿ sió-chō ê khoán-sit, chi̍t-tiú-pòaⁿ; tī i ê chhùi ū tiau-khek; i ê tó͘ sī sù-hong ê, m̄-sī îⁿ-ê.

32四個輪tī堵ê下面；輪ê軸心kap座相連；ta̍k-ê輪高一肘半。Sì ê lûn tī tó͘ ê ē-bīn; lûn ê te̍k-sim kap chō saⁿ-liân; ta̍k ê lûn koâiⁿ chi̍t-tiú-pòaⁿ.

33輪ê款，親像車輪ê款；伊ê軸心，伊ê 外環，伊ê chí，伊ê內環，lóng是鑄ê。Lûn ê khoán, chhin-chhiūⁿ chhia-lûn ê khoán; i ê te̍k-sim, i ê gōa-khoân, i ê chí, i ê lāi-khoân, lóng sī chù--ê.

34座ê四角有四個架，架kap座連做一個。Chō ê sì-kak ū sì ê kè, kè kap chō liân-chòe chi̍t-ê.

35座ê頂面有圓ê衍(iān)，高半肘；座ê頂面有伊ê thuh，kap伊ê堵，lóng kap座連做一個；Chō ê téng-bīn ū îⁿ ê iān, koâiⁿ pòaⁿ-tiú; chō ê téng-bīn ū i ê thuh, kap i ê tó͘, lóng kap chō liân-chòe chi̍t-ê;

36伊ê thuh ê板，kap伊ê堵ê頂面，伊刻ki-lō͘兵，kap獅，kap棗樹，照伊ê空位；四圍有結kó͘-chîⁿ窗ê鬚。i ê thuh ê pán, kap i ê tó͘ ê téng-bīn, i khek ki-lō͘-peng, kap sai, kap chó-chhiū, chiàu i ê khàng-ūi; sì-ûi ū kat kó͘-chîⁿ-thang ê chhiu.

37伊照án-ni chhòng十個座；in ê鑄法、寸尺、款式，lóng相同。I chiàu án-ni chhòng cha̍p ê chō; in ê chù-hoat, chhùn-chhioh, khoán-sit, lóng saⁿ-tâng.

38Koh造銅盆十個，每盆thang貯四十pà-te̍k；ta̍k-ê盆直徑四肘；十個座ê頂面，ta̍k-ê座hē一個盆。Koh chō tâng-phûn cha̍p-ê, múi-phûn thang tóe sì-cha̍p pà-te̍k; ta̍k ê phûn ti̍t-kèng sì-tiú; cha̍p ê chō ê téng-bīn, ta̍k ê chō hē chi̍t ê phûn.

39Hiah-ê座，五個hē tī殿ê chiàⁿ-pêng，五個hē tī殿ê tò-pêng；koh用銅海hē tī殿ê chiàⁿ-pêng，tī東勢ê南pêng。Hiah ê chō, gō͘-ê hē tī tiān ê chiàⁿ-pêng, gō͘-ê hē tī tiān ê tò-pêng; koh ēng tâng-hái hē tī tiān ê chiàⁿ-pêng, tī tang--sì ê lâm-pêng.

40Hō͘-lân koh chhòng盆，托á，kap盤。Tùi án-ni，Hō͘-lân為tio̍h所羅門王做完耶和華殿一切ê工；Hō͘-lân koh chhòng phûn, thuh-á, kap pôaⁿ. Tùi án-ni, Hō͘-lân ūi-tio̍h Só͘-lô-bûn ông chòe-oân Iâ-hô-hoa tiān it-chhè ê kang;

41就是兩支柱，kap柱頂ê柱斗ê兩粒球，以及蓋tī柱頂柱斗ê求兩個網；chiū-sī nn̄g ki thiāu, kap thiāu-téng ê thiāu-táu ê nn̄g lia̍p kiû, í-ki̍p khàm tī thiāu-téng thiāu-táu ê kiû nn̄g ê bāng;

42為tio̍h兩個網做四百粒石榴；一個網有兩chōa ê石榴，來蓋柱頂柱斗ê兩粒球；ūi-tio̍h nn̄g ê bāng chòe sì-pah lia̍p sia̍h-liû; chi̍t ê bāng ū nn̄g-chōa ê sia̍h-liû, lâi khàm thiāu-téng thiāu-táu ê nn̄g lia̍p kiû;

43十個座，kap座頂十個盆；cha̍p ê chō, kap chō-téng cha̍p ê phûn;

44銅海一個，kap銅海下面十二隻牛；tâng-hái chi̍t-ê, kap tâng-hái ē-bīn cha̍p-jī chiah gû;

45盆、托á、盤；chiah-ê一切lóng是Hō͘-lân為所羅門王做耶和華殿ê器具，lóng用光明ê銅來做ê。phûn, thuh-á, pôaⁿ. Chiah-ê it-chhè lóng sī Hō͘-lân ūi Só͘-lô-bûn ông chòe Iâ-hô-hoa tiān ê khì-kū, lóng ēng kng-bêng ê tâng lâi chòe ê.

46王tī約旦ê平洋，tī So͘-kat kap Sat-la̍h-tàn ê中間，tī 黏土ê地鑄成ê。Ông tī Iok-tàn ê pîⁿ-iûⁿ, tī So͘-kat kap Sat-la̍h-tàn ê tiong-kan, tī liâm-thô͘ ê tōe chù-chiâⁿ-ê.

47Chiah-ê一切ê器具所羅門lóng無過秤，因為極其chōe，銅ê輕重也bōe得thang知。Chiah ê it-chhè ê khì-kū Só͘-lô-bûn lóng bô kè chhìn, in-ūi ke̍k-kî chōe, tâng ê khin-tāng iā bōe-tit-thang chai.

48所羅門也做耶和華殿內一切ê器具，就是金壇，kap排列餅ê桌，用金做ê；Só͘-lô-bûn iā chòe Iâ-hô-hoa tiān-lāi it-chhè ê khì-kū, chiū-sī kim-tôaⁿ, kap pâi-lia̍t-piáⁿ ê toh, ēng kim chòe--ê;

49後殿ê頭前ê燈台，chiàⁿ-pêng五個，tò-pêng五個，lóng用好金做ê；伊ê花，伊ê燈，伊ê鉗(khîⁿ)，用金做ê；āu-tiān ê thâu-chêng ê teng-tâi, chiàⁿ-pêng gō͘-ê, tò-pêng gō͘-ê, lóng ēng hó-kim chòe--ê; i ê hoe, i ê teng, i ê khîⁿ, ēng kim chòe--ê;

50伊ê杯，伊ê剪刀，伊ê碗，伊ê匙，伊ê火鼎，是用好金做ê；koh有門臼，就是後殿，至聖所ê門臼，kap hit-ê厝，前殿ê門臼，lóng用金做ê。i ê poe, i ê chián-to, i ê óaⁿ, i ê sî, i ê hé-tiáⁿ, sī ēng hó-kim chòe--ê; koh ū mn̂g-khū, chiū-sī āu-tiān, Chì-sèng-só͘ ê mn̂g-khū, kap hit ê chhù, chêng-tiān ê mn̂g-khū, lóng ēng kim chòe--ê.

51Án-ni，所羅門王做完耶和華殿一切ê工。 所羅門將伊ê老父大衛所獻ê物，帶入去，銀、金，kap器具，hē tī耶和華殿ê府庫。Án-ni, Só͘-lô-bûn ông chòe-oân Iâ-hô-hoa tiān it-chhè ê kang. Só͘-lô-bûn chiong i ê lāu-pē Tāi-pi̍t só͘ hiàn ê mi̍h, tòa ji̍p-khì, gûn, kim, kap khì-kū, hē tī Iâ-hô-hoa tiān ê hú-khò͘.

1Hit時所羅門聚集以色列ê長老，kap ta̍k支派ê首領，以及以色列人hiah-ê族長，到耶路撒冷所羅門王hia，beh將耶和華ê約櫃，tùi大衛城，就是錫安，運上來。Hit-sî Só͘-lô-bûn chū-chi̍p Í-sek-lia̍t ê tióng-ló, kap ta̍k chi-phài ê siú-léng, í-ki̍p Í-sek-lia̍t lâng hiah ê cho̍k-tiúⁿ, kàu Iâ-lō͘-sat-léng Só͘-lô-bûn ông hia, beh chiong Iâ-hô-hoa ê iok-kūi, tùi Tāi-pi̍t siâⁿ, chiū-sī Sek-an, ūn-chiūⁿ--lâi.

2Í-tha-liām月，就是七月，ê節期，以色列人lóng聚集到所羅門王hia。Í-tha-liām ge̍h, chiū-sī chhit-ge̍h, ê choeh-kî, Í-sek-lia̍t lâng lóng chū-chi̍p kàu Só͘-lô-bûn ông hia.

3以色列ê長老lóng來，hiah-ê祭司扛約櫃。Í-sek-lia̍t ê tióng-ló lóng lâi, hiah ê chè-si kng iok-kūi.

4In就扛耶和華ê櫃，kap會幕，以及布棚內一切聖ê器具上來；祭司kap利未人lóng 扛伊上來。In chiū kng Iâ-hô-hoa ê kūi, kap hōe-bō͘, í-ki̍p Pò͘-pîⁿ-lāi it-chhè sèng ê khì-kū chiūⁿ-lâi; chè-si kap Lī-bī lâng lóng kng i chiūⁿ-lâi.

5所羅門王kap聚集到伊hia以色列ê全會tī約櫃前獻羊、牛，做祭祀，chōe到bōe算得，也算bōe了。Só͘-lô-bûn ông kap chū-chi̍p kàu i hia Í-sek-lia̍t ê choân-hōe tī iok-kūi chêng hiàn iûⁿ, gû, chòe chè-sū, chōe kàu bōe-sǹg-tit, iā sǹg-bōe-liáu.

6祭司扛耶和華ê約櫃到伊ê所在，入hit間厝ê後殿，到至聖所，hē tī ki-lō͘兵ê翼下。Chè-si kng Iâ-hô-hoa ê iok-kūi kàu i ê só͘-chāi, ji̍p hit keng chhù ê āu-tiān, kàu Chì-sèng-só͘, hē tī ki-lō͘-peng ê si̍t-ē.

7因為ki-lō͘兵thí開in ê翼，tī櫃ê所在ê頂面；koh ki-lō͘兵tī hit頂面遮蓋櫃，kap伊ê kǹg。In-ūi ki-lō͘-peng thí-khui in ê si̍t, tī kūi ê só͘-chāi ê téng-bīn; koh ki-lō͘-peng tī hí(**hit) téng-bīn jia-khàm kūi, kap i ê kǹg.

8Hiah-ê kǹg真長，kǹg尾tī後殿前ê聖所thang看見，tī外面就bōe看見；到今á日iáu tī-hia。Hiah ê kǹg chin-tn̂g, kǹg-bé tī āu-tiān-chêng ê Sèng-só͘ thang khòaⁿ-kìⁿ, tī gōa-bīn chiū bōe khòaⁿ-kìⁿ; kàu kin-á-ji̍t iáu tī-hia.

9櫃內只有兩塊石碑，就是以色列人出埃及地，耶和華kap in立約ê時，摩西tī何烈山所hē-ê；這以外無別項物。Kūi-lāi chí-ū nn̄g tè chio̍h-pi, chiū-sī Í-sek-lia̍t lâng chhut Ai-ki̍p tōe, Iâ-hô-hoa kap in li̍p-iok ê sî, Mô͘-se tī Hô-lia̍t soaⁿ só͘ hē--ê; che í-gōa bô pa̍t-hāng mi̍h.

10當祭司tùi聖所出來ê時，有雲充滿耶和華ê殿；Tng chè-si tùi sèng-só͘ chhut-lâi ê sî, ū hûn chhiong-móa Iâ-hô-hoa ê tiān;

11致到祭司為tio̍h雲ê緣故bōe能khiā-teh服事；因為耶和華ê榮光充滿耶和華ê殿。tì-kàu chè-si ūi-tio̍h hûn ê iân-kò͘ bōe-ōe-khiā--teh ho̍k-sāi; in-ūi Iâ-hô-hoa ê êng-kng chhiong-móa Iâ-hô-hoa ê tiān.

12Hit時所羅門講，耶和華bat講伊beh tiàm tī烏烏暗暗ê所在。Hit-sî Só͘-lô-bûn kóng, Iâ-hô-hoa bat kóng I beh tiàm tī o͘-o͘ àm-àm ê só͘-chāi.

13我已經起chit間殿hō͘你khiā起，做你永遠tòa ê所在。Góa í-keng khí chit keng tiān hō͘ Lí khiā-khí, chòe Lí éng-oán tòa ê só͘-chāi.

14王oa̍t-tńg伊ê面祝福以色列會眾；以色列會眾lóng khiā起來。Ông oa̍t-tńg i ê bīn chiok-hok Í-sek-lia̍t hōe-chiòng; Í-sek-lia̍t hōe-chiòng lóng khiā--khí-lâi.

15伊講；耶和華以色列ê上帝是應該o-ló ê，因為祂親嘴tùi我ê父大衛所應允ê，也親手應驗伊，講，I kóng; Iâ-hô-hoa Í-sek-lia̍t ê Siōng-tè sī eng-kai o-ló ê, in-ūi I chhin-chhùi tùi góa ê pē Tāi-pi̍t só͘ èng-ún ê, iā chhin-chhiú èng-giām i, kóng,

16Tùi我chhōa我ê百姓以色列出埃及以來，我bē-bat tī以色列眾支派中揀一個城，起殿hō͘我ê名tī-hia；獨獨揀大衛治理我ê百姓以色列。Tùi Góa chhōa Góa ê peh-sìⁿ Í-sek-lia̍t chhut Ai-ki̍p í-lâi, Góa bē-bat tī Í-sek-lia̍t chèng chi-phài-tiong kéng chi̍t ê siâⁿ, khí tiān hō͘ Góa ê miâ tī-hia; to̍k-to̍k kéng Tāi-pi̍t tī-lí Góa ê peh-sìⁿ Í-sek-lia̍t.

17我ê父大衛心內有意思，beh為耶和華以色列ê上帝ê名起殿。Góa ê pē Tāi-pi̍t sim-lāi ū ì-sù, beh ūi Iâ-hô-hoa Í-sek-lia̍t ê Siōng-tè ê miâ khí tiān.

18總是耶和華對我ê父大衛講，你ê心有意思beh為我ê名起殿，你chit-ê意思真好；Chóng-sī Iâ-hô-hoa tùi góa ê pē Tāi-pi̍t kóng, Lí ê sim ū ì-sù beh ūi Góa ê miâ khí tiān, lí chit ê ì-sù chin hó;

19獨獨你m̄-thang起殿；你所親生ê kiáⁿ beh為我ê名起殿。to̍k-to̍k lí m̄-thang khí tiān; lí só͘ chhin-siⁿ ê kiáⁿ beh ūi Góa ê miâ khí tiān.

20Taⁿ耶和華應驗祂所講ê話；我照耶和華ê話起來續接我ê父大衛，坐以色列ê國位；koh為耶和華以色列上帝ê名起殿。Taⁿ Iâ-hô-hoa èng-giām I só͘ kóng ê ōe; góa chiàu Iâ-hô-hoa ê ōe khí-lâi sòa-chiap góa ê pē Tāi-pi̍t, chē Í-sek-lia̍t ê kok-ūi; koh ūi Iâ-hô-hoa Í-sek-lia̍t Siōng-tè ê miâ khí tiān.

21我也tī-hia為約櫃備辦一所在，櫃內有耶和華ê約，就是祂chhōa咱ê列祖出埃及ê時，kap in所立ê約。Góa iā tī-hia ūi iok-kūi pī-pān chi̍t só͘-chāi, kūi-lāi ū Iâ-hô-hoa ê iok, chiū-sī I chhōa lán ê lia̍t-chó͘ chhut Ai-ki̍p ê sî, kap in só͘ li̍p ê iok.

22所羅門當以色列會眾ê面前，khiā tī耶和華ê壇前，kia̍h起手ǹg天，講，Só͘-lô-bûn tng Í-sek-lia̍t hōe-chiòng ê bīn-chêng, khiā tī Iâ-hô-hoa ê tôaⁿ-chêng, kia̍h-khí chhiú ǹg thiⁿ, kóng,

23耶和華以色列ê上帝ah，tī天頂，tī地下，無有上帝親像你守約行仁愛tī你hiah-ê奴僕，就是盡心行tī你ê面前ê。Iâ-hô-hoa Í-sek-lia̍t ê Siōng-tè ah, tī thiⁿ-téng, tī tōe-ē, bô ū Siōng-tè chhin-chhiūⁿ Lí siú-iok kiâⁿ jîn-ài tī Lí hiah ê lô͘-po̍k, chiū-sī chīn-sim kiâⁿ tī Lí ê bīn-chêng ê.

24你tùi你ê奴僕我ê父大衛所應允ê，你有守伊；你親嘴講ê，親手應驗伊，照今á日ê款。Lí tùi Lí ê lô͘-po̍k góa ê pē Tāi-pi̍t só͘ èng-ún ê, Lí ū siú i; Lí chhin-chhùi kóng ê, chhin-chhiú èng-giām i, chiàu kin-á-ji̍t ê khoán.

25耶和華以色列ê上帝ah，你所應允你ê奴僕我ê父大衛講，你ê kiáⁿ孫若謹慎in ê所做，行tī我ê面前，親像你行tī我ê面前，就屬tī你ê beh tī我ê面前坐以色列ê國位永無斷；taⁿ求你應驗伊。Iâ-hô-hoa Í-sek-lia̍t ê Siōng-tè ah, Lí só͘ èng-ún Lí ê lô͘-po̍k góa ê pē Tāi-pi̍t kóng, Lí ê kiáⁿ-sun nā kín-sīn in ê só͘-chòe, kiâⁿ tī Góa ê bīn-chêng, chhin-chhiūⁿ lí kiâⁿ tī Góa ê bīn-chêng, chiū sio̍k tī lí-ê beh tī Góa ê bīn-chêng chē Í-sek-lia̍t ê kok-ūi éng bô tn̄g; taⁿ kiû Lí èng-giām i.

26以色列ê上帝ah，祢對祢ê奴僕我ê父大衛所講ê，求祢hō͘伊成做實事。Í-sek-lia̍t ê Siōng-tè ah, Lí tùi Lí ê lô͘-po̍k góa ê pē Tāi-pi̍t só͘ kóng ê, kiû Lí hō͘ i chiâⁿ-chòe si̍t-sū.

27上帝真正beh khiā起地上mah？看ah，天kap chiah-ê天ê天尚且無夠額hō͘你khiā起，何況我所起chit間殿ah？Siōng-tè chin-chiàⁿ beh khiā-khí tōe-chiūⁿ mah? Khòaⁿ ah, thiⁿ kap chiah ê thiⁿ ê thiⁿ siōng-chhiáⁿ bô kàu-gia̍h hō͘ Lí khiā-khí, hô-hòng góa só͘ khí chit keng tiān ah?

28耶和華我ê上帝ah，願你àⁿ落siàu念你ê奴僕ê祈禱懇求，來聽你ê奴僕今á日所祈禱tī你面前ê求叫祈禱。Iâ-hô-hoa góa ê Siōng-tè ah, goān Lí àⁿ-lo̍h siàu-liām Lí ê lô͘-po̍k ê kî-tó khún-kiû, lâi thiaⁿ Lí ê lô͘-po̍k kin-á-ji̍t só͘ kî-tó tī Lí bīn-chêng ê kiû-kiò kî-tó.

29願你日暝看顧chit-ê殿，就是你所講起我ê名beh tī-hia ê所在，來聽。你ê奴僕所beh ǹg chit所在祈禱ê祈禱。Goān Lí ji̍t-mî khòaⁿ-kò͘ chit ê tiān, chiū-sī Lí só͘ kóng-khí Góa ê miâ beh tī-hia ê só͘-chāi, lâi thiaⁿ. Lí ê lô͘-po̍k só͘ beh ǹg chit só͘-chāi kî-tó ê kî-tó.

30你ê奴僕kap你ê百姓以色列ǹg chit所在祈禱ê時，願你聽in ê祈求；願你tī天裡，你khiā起ê所在，來聽in；你聽見ê時，就赦免。Lí ê lô͘-po̍k kap Lí ê peh-sìⁿ Í-sek-lia̍t ǹg chit só͘-chāi kî-tó ê sî, goān Lí thiaⁿ in ê kî-kiû; goān Lí tī thiⁿ--nih, Lí khiā-khí ê só͘-chāi, lâi thiaⁿ in; Lí thiaⁿ-kìⁿ ê sî, chiū sià-bián.

31人若得罪伊ê厝邊，也有人用一個chiù-chōa kah伊chiù-chōa，伊若來chit間殿，tī你ê壇前chiù-chōa；Lâng nā tek-chōe i ê chhù-piⁿ, iā ū lâng ēng chi̍t ê chiù-chōa kah i chiù-chōa, i nā lâi chit keng tiān, tī Lí ê tôaⁿ-chêng chiù-chōa;

32求你tī天裡聽來辨理伊，審判你chiah-ê奴僕，定pháiⁿ人ê罪，照伊所行ê，報應tī伊ê頭殼；定義人做義，照伊ê義來hō͘伊。kiû Lí tī thiⁿ--nih thiaⁿ lâi pān-lí i, sím-phòaⁿ Lí chiah ê lô͘-po̍k, tēng pháiⁿ-lâng ê chōe, chiàu i só͘-kiâⁿ--ê, pò-èng tī i ê thâu-khak; tēng gī-lâng chòe-gī, chiàu i ê gī lâi hō͘ i.

33設使你ê百姓以色列，因為得罪你，chiah thâi輸tī對敵ê面前，in若歸向你，認你ê名，koh tī chit間殿祈禱懇求你；Siat-sú Lí ê peh-sìⁿ Í-sek-lia̍t, in-ūi tek-chōe Lí, chiah thâi-su tī tùi-te̍k ê bīn-chêng, in nā kui-ǹg Lí, jīn Lí ê miâ, koh tī chit keng tiān kî-tó khún-kiû Lí;

34求你tī天裡聽in，來赦免你ê百姓以色列ê罪，hō͘ in tò來你所賞賜in ê列祖ê地。kiû Lí tī thiⁿ--nih thiaⁿ in, lâi sià-bián Lí ê peh-sìⁿ Í-sek-lia̍t ê chōe, hō͘ in tò-lâi Lí só͘ siúⁿ-sù in ê lia̍t-chó͘ ê tōe.

35設使in得罪你，致到天關密，無落雨；你刑罰in ê時，in若ǹg chit所在祈禱，認你ê名，離開in ê罪；Siat-sú in tek-chōe Lí, tì-kàu thiⁿ koaiⁿ-ba̍t, bô lo̍h-hō͘; Lí hêng-hoa̍t in ê sî, in nā ǹg chit só͘-chāi kî-tó, jīn Lí ê miâ, lī-khui in ê chōe;

36求你tī天裡聽in，赦免你ê奴僕kap你ê百姓以色列ê罪，tī你教示in所tio̍h行ê好路ê時，koh落雨tī你ê地，就是你賞賜你ê百姓做業ê。kiû Lí tī thiⁿ--nih thiaⁿ in, sià-bián Lí ê lô͘-po̍k kap Lí ê peh-sìⁿ Í-sek-lia̍t ê chōe, tī Lí kà-sī in só͘ tio̍h kiâⁿ ê hó-lō͘ ê sî, koh lo̍h-hō͘ tī Lí ê tōe, chiū-sī Lí siúⁿ-sù Lí ê peh-sìⁿ chòe-gia̍p--ê.

37Chit-ê地若有飢荒、瘟疫、枯焦、朽爛、草蜢、剪蟲，á是in ê對敵tī in hiah-ê城ê地圍困in，無論有甚麼災厄，甚麼破病；Chit ê tōe nā ū ki-hng, un-e̍k, ko͘-tâ, hiú-nōa, chháu-meh, chián-thâng, á-sī in ê tùi-te̍k tī in hiah ê siâⁿ ê tōe ûi-khùn in, bô-lūn ū sím-mi̍h chai-ē, sím-mi̍h phòa-pīⁿ;

38或是一人，或是你ê百姓以色列ê眾人，ta̍k-ê知家己心內ê災厄，ǹg chit間殿kia̍h起手，無論怎樣懇求，怎樣祈禱；he̍k-sī chi̍t-lâng, he̍k-sī Lí ê peh-sìⁿ Í-sek-lia̍t ê chèng-lâng, ta̍k-ê chai ka-kī sim-lāi ê chai-ē, ǹg chit keng tiān kia̍h-khí chhiú, bô-lūn cháiⁿ-iūⁿ khún-kiû, cháiⁿ-iūⁿ kî-tó;

39願你tī天裡，你所khiā起ê所在，來聽伊，來赦免，來施行；你知in ê心，照in ta̍k人ê行做來款待in，(因為世間ta̍k人ê心，只有你知) ；goān Lí tī thiⁿ--nih, Lí só͘ khiā-khí ê só͘-chāi, lâi thiaⁿ i, lâi sià-bián, lâi si-hêng; Lí chai in ê sim, chiàu in ta̍k-lâng ê kiâⁿ-chòe lâi khoán-thāi in, (in-ūi sè-kan ta̍k-lâng ê sim, chí ū Lí chai);

40Hō͘ in tī你賞賜阮列祖ê地，一世人敬畏你。hō͘ in tī Lí siúⁿ-sù goán lia̍t-chó͘ ê tōe, chi̍t-sì-lâng kèng-ùi Lí.

41論到外邦人，m̄是屬你ê百姓以色列，伊為tio̍h你ê名tùi遠遠ê所在來ê，Lūn-kàu gōa-pang lâng, m̄-sī sio̍k Lí ê peh-sìⁿ Í-sek-lia̍t, i ūi-tio̍h Lí ê miâ tùi hn̄g-hn̄g ê só͘-chāi lâi ê,

42(因為in聽見你ê大名，大權能ê手，伸出ê手；) 若來ǹg chit-ê殿祈禱，(in-ūi in thiaⁿ-kìⁿ Lí ê tōa-miâ, tōa koân-lêng ê chhiú, chhun-chhut ê chhiú;) nā lâi ǹg chit ê tiān kî-tó,

43願你tī天裡，你khiā起ê所在，來聽in，照外邦人一切所tùi你求ê來行；hō͘天下bān百姓lóng bat你ê名，敬畏你，親像你ê百姓以色列一樣；koh hō͘ in知我所起chit間殿是用你ê名來稱ê。goān Lí tī thiⁿ--nih, Lí khiā-khí ê só͘-chāi, lâi thiaⁿ in, chiàu gōa-pang lâng it-chhè só͘ tùi Lí kiû--ê lâi kiâⁿ; hō͘ thiⁿ-ē bān peh-sìⁿ lóng bat Lí ê miâ, kèng-ùi Lí, chhin-chhiūⁿ Lí ê peh-sìⁿ Í-sek-lia̍t chi̍t-iūⁿ; koh hō͘ in chai góa só͘ khí chit keng tiān sī ēng Lí ê miâ lâi chheng--ê.

44你ê百姓若出去你所差in去ê路，kap對敵交戰，也ǹg你所揀ê城，kap我為tio̍h你ê名所起ê殿，來祈禱耶和華；Lí ê peh-sìⁿ nā chhut-khì Lí só͘ chhe in khì ê lō͘, kap tùi-te̍k kau-chiàn, iā ǹg Lí só͘ kéng ê siâⁿ, kap góa ūi-tio̍h Lí ê miâ só͘ khí ê tiān, lâi kî-tó Iâ-hô-hoa;

45願你tī天裡來聽in ê祈禱懇求，來kā in判斷。goān Lí tī thiⁿ--nih lâi thiaⁿ in ê kî-tó khún-kiû, lâi kā in phòaⁿ-toàn.

46你ê百姓若得罪你，(因為無有無犯罪ê人，) 你受氣in，將in交hō͘對敵，致到對敵掠in到對敵ê地，或是遠或是近；Lí ê peh-sìⁿ nā tek-chōe Lí, (in-ūi bô ū bô hoān-chōe ê lâng,) Lí siū-khì in, chiong in kau hō͘ tùi-te̍k, tì-kàu tùi-te̍k lia̍h in kàu tùi-te̍k ê tōe, he̍k-sī hn̄g he̍k-sī kūn;

47in若tī所掠去ê地，心內倒tńg想，來反悔；koh tī掠in ê人ê地，懇求你講，阮有罪，阮有悖逆，阮有做pháiⁿ；in nā tī só͘ lia̍h--khì ê tōe, sim-lāi tò-tńg siūⁿ, lâi hoán-hóe; koh tī lia̍h in ê lâng ê tōe, khún-kiû Lí kóng, Goán ū chōe, goán ū pōe-ge̍k, goán ū chòe-pháiⁿ;

48in若tī受掠去ê地，就是對敵掠in去ê地，盡心盡性歸服你，koh ǹg本地，就是你賞賜in列祖ê地，kap你所揀ê城，以及我為tio̍h你ê名所起ê殿，來祈禱你；in nā tī siū lia̍h-khì ê tōe, chiū-sī tùi-te̍k lia̍h in khì ê tōe, chīn-sim chīn-sèng kui-ho̍k Lí, koh ǹg pún-tōe, chiū-sī Lí siúⁿ-sù in lia̍t-chó͘ ê tōe, kap Lí só͘ kéng ê siâⁿ, í-ki̍p góa ūi-tio̍h Lí ê miâ só͘ khí ê tiān, lâi kî-tó Lí;

49願你tī天裡，你所khiā起ê所在，聽in ê祈禱懇求，kā in判斷；goān Lí tī thiⁿ--nih, Lí só͘ khiā-khí ê só͘-chāi, thiaⁿ in ê kî-tó khún-kiû, kā in phòaⁿ-toàn;

50koh赦免你ê百姓得罪你ê，以及in一切得罪你ê罪過，hō͘ in得tio̍h憐憫tī掠in ê人ê面前，致到掠in ê人憐憫in。koh sià-bián Lí ê peh-sìⁿ tek-chōe Lí ê, í-ki̍p in it-chhè tek-chōe Lí ê chōe-kòa, hō͘ in tit-tio̍h lîn-bín tī lia̍h in ê lâng ê bīn-chêng, tì-kàu lia̍h in ê lâng lîn-bín in.

51因為in是你ê百姓，你ê產業，是你chhōa in出埃及，tùi鑄鐵ê爐中出來ê。In-ūi in sī Lí ê peh-sìⁿ, Lí ê sán-gia̍p, sī Lí chhōa in chhut Ai-ki̍p, tùi chù-thih ê lô͘-tiong chhut-lâi--ê.

52願你ê目睭開看顧你ê奴僕ê祈禱，kap你ê百姓以色列ê祈禱，來聽in一切對你求ê。Goān Lí ê ba̍k-chiu khui khòaⁿ-kò͘ Lí ê lô͘-po̍k ê kî-tó, kap Lí ê peh-sìⁿ Í-sek-lia̍t ê kî-tó, lâi thiaⁿ in it-chhè tùi Lí kiû ê.

53主耶和華ah，因為你bat tùi地上眾百姓ê中間分別in，來做你ê產業，是照你chhōa阮ê列祖出埃及ê時，託你ê奴僕摩西所講ê。Chú Iâ-hô-hoa ah, in-ūi Lí bat tùi tōe-chiūⁿ chèng peh-sìⁿ ê tiong-kan hun-piat in, lâi chòe Lí ê sán-gia̍p, sī chiàu Lí chhōa goán ê lia̍t-chó͘ chhut Ai-ki̍p ê sî, thok Lí ê lô͘-po̍k Mô͘-se só͘ kóng ê.

54所羅門tī耶和華ê壇前腳頭u跪teh，手伸ǹg天，所tùi耶和華祈禱懇求ê已經祈禱明白，就起來；Só͘-lô-bûn tī Iâ-hô-hoa ê tôaⁿ-chêng kha-thâu-u kūi--teh, chhiú chhun ǹg thiⁿ, só͘ tùi Iâ-hô-hoa kî-tó khún-kiû-ê í-keng kî-tó bêng-pe̍k, chiū khí-lâi;

55伊就khiā-teh，大聲祝福以色列全會眾，講，i chiū khiā-teh, tōa-siaⁿ chiok-hok Í-sek-lia̍t choân hōe-chiòng, kóng,

56耶和華是應該tio̍h o-ló-ê，因為伊一切所應允ê，賞賜平安hō͘伊ê百姓以色列，見若託伊ê奴僕摩西所應允ê好話，無一句落空。Iâ-hô-hoa sī eng-kai tio̍h o-ló--ê, in-ūi I it-chhè só͘ èng-ún--ê, siúⁿ-sù pêng-an hō͘ I ê peh-sìⁿ Í-sek-lia̍t, kìⁿ-nā thok I ê lô͘-po̍k Mô͘-se só͘ èng-ún ê hó-ōe, bô chi̍t-kù lo̍k-khong.

57願耶和華咱ê上帝kap咱tī-teh，親像伊kap咱ê列祖tī-teh一樣；願伊無離開咱，無放sak咱；Goān Iâ-hô-hoa lán ê Siōng-tè kap lán tī-teh, chhin-chhiūⁿ I kap lán ê lia̍t-chó͘ tī-teh chi̍t-iūⁿ; goān I bô lī-khui lán, bô pàng-sak lán;

58Hō͘咱ê心歸向伊，來行伊一切ê道路，守伊所命令咱ê列祖ê誡命，伊ê律例，伊ê法度。hō͘ lán ê sim kui-ǹg I, lâi kiâⁿ I it-chhè ê tō-lō͘, siú I só͘ bēng-lēng lán ê lia̍t-chó͘ ê kài-bēng, I ê lu̍t-lē, I ê hoat-tō͘.

59我taⁿ tī耶和華ê面前所祈求chiah-ê話，願chiah-ê話日暝近tī咱ê上帝耶和華；koh日日照tāi-chì所合宜ê為祂ê奴僕判斷，kap祂ê百姓以色列判斷。Góa taⁿ tī Iâ-hô-hoa ê bīn-chêng só͘ kî-kiû chiah ê ōe, goān chiah ê ōe ji̍t-mî kūn tī lán ê Siōng-tè Iâ-hô-hoa; koh ji̍t-ji̍t chiàu tāi-chì só͘ ha̍p-gî--ê ūi I ê lô͘-po̍k phòaⁿ-toàn, kap I ê peh-sìⁿ Í-sek-lia̍t phòaⁿ-toàn.

60Hō͘地上萬百姓知耶和華是上帝，伊以外無別ê。Hō͘ tōe-chiūⁿ bān peh-sìⁿ chai Iâ-hô-hoa sī Siōng-tè, I í-gōa bô pa̍t-ê.

61所以lín ê心tio̍h純全ǹg耶和華咱ê上帝，遵thàn伊ê律例，守伊ê誡命，親像今á日ê款。Só͘-í lín ê sim tio̍h sûn-choân ǹg Iâ-hô-hoa lán ê Siōng-tè, chun-thàn I ê lu̍t-lē, siú I ê kài-bēng, chhin-chhiūⁿ kin-á-ji̍t ê khoán.

62王kap以色列眾百姓相kap tī耶和華ê面前獻祭。Ông kap Í-sek-lia̍t chèng peh-sìⁿ saⁿ-kap tī Iâ-hô-hoa ê bīn-chêng hiàn-chè.

63所羅門獻謝恩ê祭，就是獻hō͘耶和華ê，牛兩萬兩千隻，羊十二萬隻。Án-ni，王kap以色列眾百姓，為耶和華ê殿行獻殿ê禮。Só͘-lô-bûn hiàn siā-un ê chè, chiū-sī hiàn hō͘ Iâ-hô-hoa ê, gû nn̄g-bān nn̄g-chheng chiah, iûⁿ cha̍p-jī-bān chiah. Án-ni, ông kap Í-sek-lia̍t chèng peh-sìⁿ, ūi Iâ-hô-hoa ê tiān kiâⁿ hiàn-tiān ê lé.

64當hit日，王分別耶和華殿前院中ê所在，tī-hia獻燒祭，素祭，kap謝恩祭ê油，因為耶和華頭前ê銅壇siuⁿ細，bōe容允得hiah-ê燒祭、素祭，kap謝恩祭ê油。Tng hit-ji̍t, ông hun-piat Iâ-hô-hoa tiān-chêng īⁿ-tiong ê só͘-chāi, tī-hia hiàn sio-chè, sò͘-chè, kap siā-un-chè ê iû, in-ūi Iâ-hô-hoa thâu-chêng ê tâng-tôaⁿ siuⁿ-sòe, bōe iông-ún-tit hiah ê sio-chè, sò͘-chè, kap siā-un-chè ê iû.

65Hit時所羅門kap以色列眾人，就是tùi Hap-má ê路口到埃及ê溪，lóng kap伊聚集做大會，tī耶和華咱上帝ê面前守節筵七日，koh七日，共十四日。Hit-sî Só͘-lô-bûn kap Í-sek-lia̍t chèng-lâng, chiū-sī tùi Hap-má ê lō͘-kháu kàu Ai-ki̍p ê khoe, lóng kap i chū-chi̍p chòe tōa-hōe, tī Iâ-hô-hoa lán Siōng-tè ê bīn-chêng siú choeh-iân chhit-ji̍t, koh chhit-ji̍t, kiōng cha̍p-sì ji̍t.

66第八日王差百姓去；in就kā王祝福；因為耶和華對伊ê奴僕大衛kap伊ê百姓以色列所施出一切ê恩惠，就歡喜，心內快樂，ta̍k-ê tò去in ê布棚。Tē-poeh ji̍t ông chhe peh-sìⁿ khì; in chiū kā ông chiok-hok; in-ūi Iâ-hô-hoa tùi I ê lô͘-po̍k Tāi-pi̍t kap I ê peh-sìⁿ Í-sek-lia̍t só͘ si-chhut it-chhè ê un-hūi, chiū hoaⁿ-hí, sim-lāi khoài-lo̍k, ta̍k-ê tò-khì in ê pò͘-pîⁿ.