1耶穌基督ê使徒，彼得，phoe寄hō͘四散khiā起tī Pún-to͘、加拉太、Ka-phàⁿ-to-ka、亞西亞、Pí-chhui-nî受揀選ê出外人，Iâ-so͘ Ki-tok ê sù-tô͘, Pí-tek, phoe kià hō͘ sì-sòaⁿ Khiā-khí tī Pún-to͘, Ka-lia̍p-thài, Ka-phàⁿ-to-ka, A-se-a, Pí-chhui-nî siū kéng-soán ê chhut-gōa lâng,

2就是照父上帝ê事先知，在tī神ê感化做聖，到tī順服koh得tio̍h耶穌基督ê血hiù ê：願恩典平安加添chōe-chōe hō͘ lín。chiū-sī chiàu Pē Siōng-tè ê tāi-seng chai, chāi-tī Sîn ê kám-hòa chòe sèng, kàu tī sūn-ho̍k koh tit-tio̍h Iâ-so͘ Ki-tok ê huih hiù ê: goān un-tián pêng-an ke-thiⁿ chōe-chōe hō͘ lín.

3願咱ê主耶穌基督ê上帝，也是伊ê父，得tio̍h o-ló；伊照伊ê大憐憫，用耶穌基督tùi死人中koh活，bat重再生咱，來得tio̍h活ê ǹg望，Goān lán ê Chú Iâ-so͘ Ki-tok ê Siōng-tè, iā sī I ê Pē, tit-tio̍h o-ló; I chiàu I ê tōa lîn-bín, ēng Iâ-so͘ Ki-tok tùi sí-lâng tiong koh-oa̍h, bat têng-chài siⁿ lán, lâi tit-tio̍h oa̍h ê ǹg-bāng,

4也得tio̍h續接bōe敗壞，bōe lâ-sâm，bōe衰退ê業，為tio̍h lín保守tī天裡ê；iā tit-tio̍h sòa-chiap bōe pāi-hoāi, bōe lâ-sâm, bōe soe-thè ê gia̍p, ūi-tio̍h lín pó-siú tī thiⁿ-ni̍h ê;

5lín是tùi信hō͘上帝ê權能保護，到得tio̍h拯救，是便便tī末期beh顯明ê。lín sī tùi sìn hō͘ Siōng-tè ê koân-lêng pó-hō͘, kàu tit-tio̍h chín-kiù, sī piān-piān tī boa̍t-kî beh hián-bêng ê.

6因為án-ni，lín真快樂，雖然現今，若應該tio̍h，tī百樣ê試煉來暫時憂悶，In-ūi án-ni, lín chin khoài-lo̍k, sui-jiân hiān-kim, nā eng-kai tio̍h, tī pah iūⁿ ê chhì-liān lâi chiām-sî iu-būn,

7hō͘ lín ê信ê經驗，比hit-ê bat過火鍛鍊，也猶原會敗壞ê金，iáu-khah寶貝ê，tī耶穌基督顯現ê時，得tio̍h o-ló，榮光，尊貴。hō͘ lín ê sìn ê keng-giām, pí hit ê bat kè hé thoàn-liān, iā iû-goân ōe pāi-hoāi ê kim, iáu khah pó-pòe ê, tī Iâ-so͘ Ki-tok hián-hiān ê sî, tit-tio̍h o-ló, êng-kng, chun-kùi.

8Lín m̄-bat看見伊，也疼伊；現今無看見iáu-kú信伊，就tùi hit-ê講-bōe出滿滿有榮光ê歡喜來快樂；Lín m̄ bat khòaⁿ-kìⁿ I, iā thiàⁿ I; hiān-kim bô khòaⁿ-kìⁿ iáu-kú sìn I, chiū tùi hit ê kóng-bōe-chhut móa-móa ū êng-kng ê hoaⁿ-hí lâi khoài-lo̍k;

9得tio̍h lín信ê結局，就是神魂ê得救。tit-tio̍h lín sìn ê kiat-kio̍k, chiū-sī sîn-hûn ê tit kiù.

10論chit-ê救，事先講論beh到tī lín ê恩hiah-ê先知也有勤勤查考講究；Lūn chit ê kiù, tāi-seng káng-lūn beh kàu tī lín ê un hiah ê sian-ti iā ū khûn-khûn chhâ-khó káng-kiù;

11基督ê神，tiàm-tī in ê，事先干證基督所tú-tio̍h ê艱苦，kap後來chiah-ê榮光，in查考神所指明ê是甚麼期，á是甚麼款式ê期。Ki-tok ê Sîn, tiàm-tī in ê, tāi-seng kan-chèng Ki-tok só͘ tú-tio̍h ê kan-khó͘, kap āu-lâi chiah ê êng-kng, in chhâ-khó Sîn só͘ chí-bêng ê sī sím-mi̍h kî, á-sī sím-mi̍h khoán-sit ê kî.

12In得tio̍h指示，知m̄是為tio̍h家己，是為tio̍h lín chiah-ê，來做差用tī chiah-ê tāi-chì，就是現今hiah-ê óa靠tùi天所差ê聖神來傳福音hō͘ lín ê人所有kā lín講ê；天使也致意省察chiah-ê事。In tit-tio̍h chí-sī, chai m̄ sī ūi-tio̍h ka-kī, sī ūi-tio̍h lín chiah-ê, lâi chòe chhe-ēng tī chiah ê tāi-chì, chiū-sī hiān-kim hiah ê óa-khò tùi thiⁿ só͘ chhe ê Sèng Sîn lâi thoân hok-im hō͘ lín ê lâng só͘ ū kā lín kóng ê; thiⁿ-sài iā tì-ì séng-chhat chiah ê sū.

13所以lín ê心tio̍h hâ腰，tio̍h節制，專心ǹg望tī耶穌基督顯現ê時所beh賞賜lín ê恩典；Só͘-í lín ê sim tio̍h hâ io, tio̍h chiat-chè, choan-sim ǹg-bāng tī Iâ-so͘ Ki-tok hián-hiān ê sî só͘ beh siúⁿ-sù lín ê un-tián;

14親像順thàn ê kiáⁿ，無thàn早前tī lín m̄知影ê時ê私慾；chhin-chhiūⁿ sūn-thàn ê kiáⁿ, bô thàn chá-chêng tī lín m̄ chai-iáⁿ ê sî ê su-io̍k;

15就是親像召lín ê是聖，lín本身也tio̍h做聖tī一切ê行做；chiū-sī chhin-chhiūⁿ tiàu lín ê sī sèng, lín pún-sin iā tio̍h chòe sèng tī it-chhè ê kiâⁿ-chòe;

16因為有記載講，Lín tio̍h做聖；因為我是聖。in-ūi ū kì-chài kóng, Lín tio̍h chòe sèng; in-ūi góa sī sèng.

17無用外貌取人，是照ta̍k人ê行做來審判ê，lín若求叫伊做父，就tio̍h存驚畏，來經過lín寄腳tī世間ê時chūn；Bô ēng gōa-māu chhú lâng, sī chiàu ta̍k lâng ê kiâⁿ-chòe lâi sím-phòaⁿ ê, lín nā kiû-kiò I chòe Pē, chiū tio̍h chûn kiaⁿ-ùi,,lâi keng-kè lín kià-kha tī sè-kan ê sî-chūn;

18因為知lín受贖脫出tùi祖公所流傳空空ê行做，m̄是用會敗壞ê物，或是銀，á是金；in-ūi chai lín siū sio̍k thoat-chhut tùi chó͘-kong só͘ liû-thoân khang-khang ê kiâⁿ-chòe, m̄ sī ēng ōe pāi-hoāi ê mi̍h, he̍k-sī gûn, á-sī kim;

19是用寶血，親像無瑕疵，無污穢ê羊á ê，就是基督ê血；sī ēng pó huih, chhin-chhiūⁿ bô hâ-chhû, bô ù-òe ê iûⁿ-á ê, chiū-sī Ki-tok ê huih;

20伊tī未創造世間ê時是所事先知ê，就tī chiah-ê時ê路尾為tio̍h lín著現ê；I tī bē chhòng-chō sè-kan ê sî sī só͘ tāi-seng chai ê, chiū tī chiah ê sî ê lō͘-bé ūi-tio̍h lín tù-hiān ê;

21lín tùi伊來信上帝，就是hō͘伊tùi死人中koh活ê，也hō͘伊榮光，致到lín ê信kap ǹg望ǹg tī上帝。lín tùi I lâi sìn Siōng-tè, chiū-sī hō͘ I tùi sí-lâng tiong koh-oa̍h ê, iā hō͘ I êng-kng, tì-kàu lín ê sìn kap ǹg-bāng ǹg tī Siōng-tè.

22Lín tùi順thàn真理已經清氣lín ê神魂，致到疼兄弟無假，就tio̍h tùi心切切相疼；Lín tùi sūn-thàn chin-lí í-keng chheng-khì lín ê sîn-hûn, tì-kàu thiàⁿ hiaⁿ-tī bô ké, chiū tio̍h tùi sim chhiat-chhiat saⁿ-thiàⁿ;

23lín已經重頭生，m̄是tùi會敗壞ê種，是tùi bōe敗壞ê種，tùi上帝ê道理，是活，是久長tī-teh ê。lín í-keng têng-thâu-siⁿ, m̄ sī tùi ōe pāi-hoāi ê chéng, sī tùi bōe pāi-hoāi ê chéng, tùi Siōng-tè ê tō-lí, sī oa̍h, sī kú-tn̂g tī-teh ê

24因為， 肉體lóng親像草， 伊ê榮光lóng親像草ê花。 草乾，花謝；In-ūi, Jio̍k-thé lóng chhin-chhiūⁿ chháu, I ê êng-kng lóng chhin-chhiūⁿ chháu ê hoe. Chháu ta, hoe siā;

25獨獨主ê話永遠tī-teh。Chit-ê話就是所傳hō͘ lín福音ê話。To̍k-to̍k Chú ê ōe éng-oán tī-teh.Chit ê ōe chiū-sī só͘ thoân hō͘ lín hok-im ê ōe.

1所以lín除去lóng總ê惡毒，以及lóng總ê詭譎，kap假好，kap怨妒，kap lóng總譭謗ê話；Só͘-í lín tû-khì lóng-chóng ê ok-to̍k, í-ki̍p lóng-chóng ê khúi-khiat, kap ké-hó, kap oàn-tò͘, kap lóng-chóng húi-pòng ê ōe;

2就tio̍h親像tú-á生ê嬰á欣慕神靈專ê奶，hō͘ lín tùi長大到得tio̍h救。chiū tio̍h chhin-chhiūⁿ tú-á siⁿ ê eⁿ-á him-bō͘ sîn-lêng choan ê lin, hō͘ lín tùi tióng-tōa kàu tit-tio̍h kiù.

3Lín若試tio̍h知主是慈善，就tio̍h án-ni。Lín nā chhì-tio̍h chai Chú sī chû-siān, chiū tio̍h án-ni.

4伊是活石，hō͘人棄sak，但是hō͘上帝揀選珍重，lín就近伊，I sī oa̍h chio̍h, hō͘ lâng khì-sak, nā-sī hō͘ Siōng-tè kéng-soán tin-tiōng, lín chiū-kūn I,

5也親像活石起做神靈ê厝，做聖ê祭司班，來獻神靈ê祭，tùi耶穌基督能hō͘上帝歡喜接納ê。iā chhin-chhiūⁿ oa̍h chio̍h khí chòe sîn-lêng ê chhù, chòe sèng ê chè-si-pan, lâi hiàn sîn-lêng ê chè, tùi Iâ-so͘ Ki-tok ōe hō͘ Siōng-tè hoaⁿ-hí chiap-la̍p ê.

6因為聖經有記載講， 看ah，我用所揀選，所珍重ê厝角頭要緊ê石，hē tī郇城。 信伊ê人不致見笑。In-ūi sèng-keng ū kì-chài kóng, Khòaⁿ ah, Góa ēng só͘ kéng-soán, só͘ tin-tiōng ê chhù-kak-thâu iàu-kín ê chio̍h, hē tī Sûn-siâⁿ. Sìn I ê lâng put-tì kiàn-siàu.

7Án-ni hit-ê寶貝是歸tī lín信ê人；但是tī hiah-ê m̄信ê人，就 起厝ê師傅所棄sak ê石， 成做厝角ê頭塊石；Án-ni hit ê pó-pòe sī kui tī lín sìn ê lâng; nā-sī tī hiah ê m̄ sìn ê lâng, chiū Khí chhù ê sai-hū só͘ khì-sak ê chio̍h, Chiâⁿ chòe chhù-kak ê thâu-tè chio̍h;

8又koh， 做跋倒人ê石，礙tio̍h人ê石磐；in m̄順thàn道理來跋倒；會到án-ni，是本定tio̍h teh。iū-koh, Chòe poa̍h-tó lâng ê chio̍h, gāi-tio̍h lâng ê chio̍h-pôaⁿ;in m̄ sūn-thàn tō-lí lâi poa̍h-tó; ōe kàu án-ni, sī pún tiāⁿ-tio̍h teh.

9獨獨lín是揀選ê族，是王也是祭司，是聖ê邦國，是上帝家己ê百姓；hō͘ lín傳報hit-ê召lín出烏暗，入伊微妙ê光ê ê好德；To̍k-to̍k lín sī kéng-soán ê cho̍k, sī ông iā sī chè-si, sī sèng ê pang-kok, sī Siōng-tè ka-kī ê peh-sìⁿ; hō͘ lín thoân-pò hit ê tiàu lín chhut o͘-àm, ji̍p I bî-biāu ê kng ê ê hó-tek;

10lín前m̄是百姓，taⁿ是上帝ê百姓；前無受憐憫，taⁿ有得tio̍h憐憫。lín chêng m̄ sī peh-sìⁿ, taⁿ sī Siōng-tè ê peh-sìⁿ; chêng bô siū lîn-bín, taⁿ ū tit-tio̍h lîn-bín.

11所疼ê兄弟ah，lín做寄腳出外ê人，我勸lín tio̍h禁戒肉體ê私慾，就是攻擊靈魂ê；Só͘ thiàⁿ ê hiaⁿ-tī ah, lín chòe kià-kha chhut-gōa ê lâng, góa khǹg lín tio̍h kìm-kài jio̍k-thé ê su-io̍k, chiū-sī kong-kek lêng-hûn ê;

12lín tī外邦中行做tio̍h端正；hō͘ in看見lín端正ê品行，就tī in所譭謗lín做行pháiⁿ ê事，in thang tī鑑察ê日歸榮光上帝。lín tī gōa-pang-tiong kiâⁿ-chòe tio̍h toan-chiàⁿ; hō͘ in khòaⁿ-kìⁿ lín toan-chiàⁿ ê phín-hēng, chiū tī in só͘ húi-pòng lín chòe kiâⁿ pháiⁿ ê sū, in thang tī kàm-chhat ê ji̍t kui êng-kng Siōng-tè.

13Lín為tio̍h主tio̍h降服見若人所設ê；或是王，是siōng大ê；Lín ūi-tio̍h Chú tio̍h hâng-ho̍k kìⁿ-nā lâng só͘ siat ê ; he̍k-sī ông, sī siōng tōa ê;

14或是官府，是伊所吹來刑罰pháiⁿ人，o-ló好人ê。he̍k-sī koaⁿ-hú, sī i só͘ chhe lâi hêng-hoa̍t pháiⁿ lâng, o-ló hó lâng ê.

15因為上帝ê旨意是án-ni，就是lín行好，來塞密戇人ê m̄知影；In-ūi Siōng-tè ê chí-ì sī án-ni, chiū-sī lín kiâⁿ hó, lâi that-ba̍t gōng lâng ê m̄ chai-iáⁿ;

16做自由ê，也m̄是用自由做惡毒ê遮蓋，就是做上帝ê奴僕。chòe chū-iû ê, iā m̄ sī ēng chū-iû chòe ok-to̍k ê jia-khàm, chiū-sī chòe Siōng-tè ê lô͘-po̍k.

17Tio̍h尊敬眾人，疼眾兄弟，驚畏上帝，尊敬君王。Tio̍h chun-kèng chèng lâng: thiàⁿ chèng hiaⁿ-tī: kiaⁿ-ùi Siōng-tè: chun-kèng kun-ông.

18做奴僕ê，凡事tio̍h驚惶順服主人；m̄-nā tī善良溫純ê，連tī乖癖ê，也tio̍h án-ni。Chòe lô͘-po̍k ê, hoān sū tio̍h kiaⁿ-hiâⁿ sūn-ho̍k chú-lâng; m̄-nā tī siān-liông un-sûn ê, liân tī koai-phiah ê, iā tio̍h án-ni.

19因為人受冤枉，但是為tio̍h天良ǹg上帝來擔憂，這是thang o-ló。In-ūi lâng siū oan-óng, nā-sī ūi-tio̍h thian-liông ǹg Siōng-tè lâi tam-iu, che sī thang o-ló.

20因為lín若犯罪受phah來忍受，有甚麼可取？lín若行好受苦來忍受，這tī上帝ê面前是thang o-ló。In-ūi lín nā hoān chōe siū phah lâi jím-siū, ū sím-mi̍h khó-chhú? lín nā kiâⁿ hó siū-khó͘ lâi jím-siū, che tī Siōng-tè ê bīn-chêng sī thang o-ló.

21因為lín受召本是beh án-ni；因為基督也替lín受苦，留模樣hō͘ lín，beh hō͘ lín tè伊ê腳步；In-ūi lín siū-tiàu pún sī beh án-ni; in-ūi Ki-tok iā thòe lín siū khó͘, lâu bô͘-iūⁿ hō͘ lín, beh hō͘ lín tè I ê kha-pō͘;

22伊無犯罪，嘴內無詭譎；I bô hoān chōe, chhùi-lāi bô khúi-khiat;

23hō͘人罵，無倒罵人；受苦無放tiau；獨獨將本身交託hit-ê照公義審判ê；hō͘ lâng mē, bô tò mē lâng; siū khó͘ bô pàng-tiau; to̍k-to̍k chiong pún-sin kau-thok hit ê chiàu kong-gī sím-phòaⁿ ê;

24伊tī柴裡親身擔當咱ê罪tī伊ê身軀，hō͘咱ǹg罪hit面死ê人會ǹg義chit面來活；tùi伊ê傷痕lín得tio̍h醫好。I tī chhâ-ni̍h chhin-sin tam-tng lán ê chōe tī I ê sin-khu, hō͘ lán ǹg chōe hit bīn sí ê lâng ōe ǹg gī chit bīn lâi oa̍h; tùi I ê siong-hûn lín tit-tio̍h i-hó.

25因為lín前親像羊迷路；但是taⁿ歸tī lín靈魂ê牧者，也是監督。In -ūi lín chêng chhin-chhiūⁿ iûⁿ bê lō͘; nā-sī taⁿ kui tī lín lêng-hûn ê Bo̍k-chiá, iā sī Kàm-tok.

1Lín做婦人人ê，也tio̍h án-ni順服家己ê丈夫；設使有ê無thàn道理，雖然無用講話，也thang用婦人人ê所行得tio̍h in來thàn；Lín chòe hū-jîn-lâng ê, iā tio̍h án-ni sūn-ho̍k ka-kī ê tiōng-hu; siat-sú ū-ê bô thàn tō-lí, sui-jiân bô ēng kóng ōe, iā thang ēng hū-jîn-lâng ê só͘ kiâⁿ tit-tio̍h in lâi thàn;

2因為看見lín清潔驚畏ê所行。in-ūi khòaⁿ-kìⁿ lín chheng-kiat kiaⁿ-ùi ê só͘ kiâⁿ.

3Lín ê裝飾m̄-thang用外面ê病頭毛，kap掛金器，á是穿衣服做裝飾；Lín ê chng-thāⁿ m̄ thang ēng gōa-bīn ê pīⁿ thâu-mn̂g, kap kòa kim-khì, á-sī chhēng i-ho̍k chòe chng-thāⁿ;

4就是用心內隱密ê人，穿溫柔恬靜ê心神，做bōe敗壞ê衣服；這tī上帝ê面前是真寶貝。chiū-sī ēng sim-lāi ún-ba̍t ê lâng, chhēng un-jiû thiâm-chēng ê sim-sîn, chòe bōe pāi-hoāi ê i-ho̍k; che tī Siōng-tè ê bīn-chêng sī chin pó-pòe.

5因為在早聖ê婦人人就是ǹg望上帝ê，也是án-ni家己裝飾，順服家己ê丈夫；In-ūi chāi-chá sèng ê hū-jîn-lâng chiū-sī ǹg-bāng Siōng-tè ê, iā sī án-ni ka-kī chng-thāⁿ, sūn-ho̍k ka-kī ê tiōng-hu;

6親像撒拉順thàn亞伯拉罕，稱伊做主；lín若行好，無tah-hiaⁿh來驚惶，就做伊ê cha-bó͘-kiáⁿ。chhin-chhiūⁿ Sat-la̍h sūn-thàn A-pek-la̍h-hán, chheng i chòe chú; lín nā kiâⁿ hó, bô tah-hiahⁿ lâi kiaⁿ-hiâⁿ, chiū chòe i ê cha-bó͘-kiáⁿ.

7Lín做丈夫ê，也tio̍h án-ni，照知識kap婦人人saⁿ-kap tiàm，尊敬伊是khah軟chiáⁿ ê器具，也是saⁿ-kap承接活命ê恩；hō͘ lín ê祈禱無tú-tio̍h阻擋。Lín chòe tiōng-hu ê, iā tio̍h án-ni, chiàu tì-sek kap hū-jîn-lâng saⁿ-kap tiàm, chun-kèng i sī khah nńg-chiáⁿ ê khì-kū, iā sī saⁿ-kap sêng-chiap oa̍h-miā ê un; hō͘ lín ê kî-tó bô tú-tio̍h chó͘-tòng.

8到底大家tio̍h同心，相體貼，相疼親像兄弟，憐憫，謙卑；Tàu-tí tāi-ke tio̍h tâng-sim, saⁿ thé-thiap, saⁿ-thiàⁿ chhin-chhiūⁿ hiaⁿ-tī, lîn-bín, khiam-pi;

9無用pháiⁿ報pháiⁿ，á是詈罵報詈罵；反tńg tio̍h祝福；因為lín受召是beh hō͘ lín承接祝福。bô ēng pháiⁿ pò pháiⁿ, á-sī lóe-mē pò lóe-mē; hoán-tńg tio̍h chiok-hok; in-ūi lín siū tiàu sī beh hō͘ lín sêng-chiap chiok-hok.

10因為， 人若ài beh惜活命， Koh見tio̍h福氣ê日， 就tio̍h禁止嘴舌無pháiⁿ， 嘴唇無講詭譎:In-ūi, Lâng nā ài beh sioh oa̍h-miā, Koh kìⁿ-tio̍h hok-khì ê ji̍t, Chiū tio̍h kìm-chí chhùi-chi̍h bô pháiⁿ, Chhùi-tûn bô kóng khúi-khiat:

11Tio̍h離開pháiⁿ來行好； Chhē和平來追jip伊。Tio̍h lī-khui pháiⁿ lâi kiâⁿ hó; Chhē hô-pêng lâi tui-jip i.

12因為主ê目睭看義人， 伊ê耳孔聽in ê祈禱: 但是主ê面鑑察行pháiⁿ ê人。In-ūi Chú ê ba̍k-chiu khòaⁿ gī lâng, I ê hī-khang thiaⁿ in ê kî-tó: Nā-sī Chú ê bīn kàm-chhat kiâⁿ pháiⁿ ê lâng.

13Lín若為tio̍h好來熱心，是誰會害lín？Lín nā ūi-tio̍h hó lâi jia̍t-sim, chī-chūi ōe hāi lín?

14總是lín若因為義來受苦，就有福氣；莫得驚in ê威風，也莫得擘腹；Chóng-sī lín nā in-ūi gī lâi siū khó͘, chiū ū hok-khì: bo̍h-tit kiaⁿ in ê ui-hong, iā bo̍h-tit peh-pak;

15獨獨lín心內tio̍h掠基督做主，尊伊做聖；見若有人問lín所ǹg望ê因由，就tio̍h不時便便用溫柔kap驚畏來分訴；to̍k-to̍k lín sim-lāi tio̍h lia̍h Ki-tok chòe Chú, chun I chòe sèng; kìⁿ-nā ū lâng mn̄g lín só͘ ǹg-bāng ê in-iû, chiū tio̍h put-sî piān-piān ēng un-jiû kap kiaⁿ-ùi lâi hun-sò͘;

16tio̍h存無thang責備ê良心；chiah lín tī tá-lo̍h一項事受譭謗，就tī hit項事會hō͘ hiah-ê誣賴lín tiàm-tī基督ê好品行ê，家己受見笑。tio̍h chûn bô thang chek-pī ê liông-sim; chiah lín tī tá-lo̍h chi̍t hāng sū siū húi-pòng, chiū tī hit hāng sū ōe hō͘ hiah ê bû-lōa lín tiàm-tī Ki-tok ê hó phín-hēng ê, ka-kī siū kiàn-siàu.

17因為上帝ê旨意若ài án-ni，就lín行好來受苦，比行pháiⁿ來受苦，khah好。In-ūi Siōng-tè ê chí-ì nā ài án-ni, chiū lín kiâⁿ hó lâi siū khó͘, pí kiâⁿ pháiⁿ lâi siū khó͘, khah hó.

18因為基督也一pái為tio̍h罪受苦，義ê替不義ê，是beh chhōa咱到tī上帝；論肉體就受死，論神就得活；In-ūi Ki-tok iā chi̍t pái ūi-tio̍h chōe siū khó͘, gī-ê thòe put-gī ê, sī beh chhōa lán kàu tī Siōng-tè; lūn jio̍k-thé chiū siū sí, lūn sîn chiū tit oa̍h;

19tī hit-ê神也bat去傳道理hō͘監內hiah-ê神，tī hit ê sîn iā bat khì thoân tō-lí hō͘ kaⁿ-lāi hiah ê sîn,

20就是早m̄信thàn ê，當上帝吞忍thèng候，tī挪亞ê日，teh備辦大船ê時，入hit內面ê人少少，只有八個，tùi水得救；chiū-sī chá m̄ sìn-thàn ê, tng Siōng-tè thun-lún thèng-hāu, tī Ná-a ê ji̍t, teh pī-pān tōa chûn ê sî, ji̍p hit lāi-bīn ê lâng chió-chió, chí ū poeh ê, tùi chúi tit kiù;

21chit-ê所關照ê洗禮taⁿ也救lín，m̄是除去肉體ê lâ-sâm，就是無thang責備ê良心ǹg上帝來求，是tùi耶穌基督ê koh活；chit-ê só͘ koan-chiò ê sóe-lé taⁿ iā kiù lín, m̄ sī tû-khì jio̍k-thé ê lâ-sâm, chiū-sī bô thang chek-pī ê liông-sim ǹg Siōng-tè lâi kiû, sī tùi Iâ-so͘ Ki-tok ê koh-oa̍h;

22伊已經去天裡，taⁿ tī上帝大pêng；chiah-ê天使，kap有權柄ê，有氣力ê，降服伊。I í-keng khì thiⁿ-ni̍h, taⁿ tī Siōng-tè tōa pêng; chiah ê thiⁿ-sài, kap ū koân-pèng ê, ū khùi-la̍t ê, hâng-ho̍k I.