1Pho-a-su上到城門，坐tī-hia；tú-tn̄g Pho-a-su所講hit-ê該親ê tùi-hia過；伊就對伊講，某人ah，請你oat來chia坐；伊就oat去坐。Pho-a-su chiūⁿ kàu siâⁿ-mn̂g, chē tī-hia; tú-tn̄g Pho-a-su só͘ kóng hit ê kai-chhin-ê tùi-hia kè; i chiū tùi i kóng, Bó͘-lâng ah, chhiáⁿ lí oat-lâi chia chē; i chiū oat-khì chē.

2Pho-a-su koh tùi本城ê長老中叫十人來，kā in講，請lín坐tiàm chia；in就坐。Pho-a-su koh tùi pún-siâⁿ ê tióng-ló tiong kiò cha̍p-lâng lâi, kā in kóng, Chhiáⁿ lín chē tiàm chia; in chiū chē.

3Pho-a-su對hit-ê至親ê講，Tùi Mô͘-ap地tò來ê拿俄米，taⁿ賣伊 hit份ê園，是本屬咱ê兄Í-lī-bí-le̍k ê；Pho-a-su tùi hit ê chì-chhin-ê kóng, Tùi Mô͘-ap tōe tò-lâi ê Ná-o-bí, taⁿ bōe i hit-hūn ê hn̂g, sī pún sio̍k lán ê hiaⁿ Í-lī-bí-le̍k ê;

4我意思beh通知你講，Tio̍h tī chiah-ê坐teh ê人ê面前kap我ê百姓ê長老ê面前，買伊；你若beh贖，就贖伊；若m̄贖伊，就明明講hō͘我知；因為你以外無別人thang贖伊，第二就是我。伊應講，我beh贖伊。góa ì-sù beh thong-ti lí kóng, Tio̍h tī chiah ê chē-teh ê lâng ê bīn-chêng kap góa ê peh-sìⁿ ê tióng-ló ê bīn-chêng, bóe i; lí nā beh sio̍k, chiū sio̍k i; nā m̄ sio̍k i, chiū bêng-bêng kóng hō͘ góa chai; in-ūi lí í-gōa bô pa̍t-lâng thang sio̍k i, tē-jī chiū-sī góa. I ìn kóng, Góa beh sio̍k i.

5Pho-a-su講，你tùi拿俄米ê手買hit份園ê日，也tio̍h tùi死人ê bó͘，Mô͘-ap ê cha-bó͘-kiáⁿ路得，買伊，來建立死人ê名tī伊ê業。Pho-a-su kóng, Lí tùi Ná-o-bí ê chhiú bóe hit hūn hn̂g ê ji̍t, iā tio̍h tùi sí-lâng ê bó͘, Mô͘-ap ê cha-bó͘-kiáⁿ Lō͘-tek, bóe i, lâi kiàn-li̍p sí-lâng ê miâ tī i ê gia̍p.

6Hit-ê至親ê講，我bōe會為家己贖伊，驚了我礙tio̍h家己ê業；我贖業ê權你thang為家己掌伊；因為我bōe會贖伊。Hit ê chì-chhin-ê kóng, Góa bōe-ōe ūi ka-kī sio̍k i, kiaⁿ-liáu góa gāi-tio̍h ka-kī ê gia̍p; góa sio̍k-gia̍p ê koân lí thang ūi ka-kī chiáng i; in-ūi góa bōe-ōe sio̍k i.

7前tī以色列中beh決定甚麼事，或是贖回，或是交換，chit人tio̍h thǹg鞋hō͘ hit人；以色列人lóng用chit-ê做證據ê例。Chêng tī Í-sek-lia̍t tiong beh koat-tēng sím-mi̍h sū, he̍k-sī sio̍k-hôe, he̍k-sī kau-ōaⁿ, chit lâng tio̍h thǹg ôe hō͘ hit lâng; Í-sek-lia̍t lâng lóng ēng chit-ê chòe chèng-kù ê lē.

8Hit-ê至親對Pho-a-su講，你為家己買伊；伊就thǹg家己ê鞋。Hit ê chì-chhin tùi Pho-a-su kóng, Lí ūi ka-kī bóe i; i chiū thǹg ka-kī ê ôe.

9Pho-a-su kā長老kap眾百姓講，Lín今á日做干證，見若屬Í-lī-bí-le̍k，見若屬Ki-liân Má-lûn ê，我lóng tùi拿俄米ê手買來；Pho-a-su kā tióng-ló kap chèng peh-sìⁿ kóng, Lín kin-á-ji̍t chòe kan-chèng, kìⁿ-nā sio̍k Í-lī-bí-le̍k, kìⁿ-nā sio̍k Ki-liân Má-lûn ê, góa lóng tùi Ná-o-bí ê chhiú bóe lâi;

10koh買Má-lûn ê bó͘，Mô͘-ap ê cha-bó͘-kiáⁿ，路得做我ê bó͘，thang建立死人ê名tī伊ê業，hō͘死人ê名無絕tī伊ê兄弟中，kap伊ê本城；lín今á日做干證。koh bóe Má-lûn ê bó͘, Mô͘-ap ê cha-bó͘-kiáⁿ, Lō͘-tek chòe góa ê bó͘, thang kiàn-li̍p sí-lâng ê miâ tī i ê gia̍p, hō͘ sí-lâng ê miâ bô choa̍t tī i ê hiaⁿ-tī-tiong, kap i ê pún-siâⁿ; lín kin-á-ji̍t chòe kan-chèng.

11Tī城門teh坐hiah-ê眾百姓kap長老講，阮做干證；願耶和華hō͘入你ê家ê婦人人親像建立以色列家拉結、利亞兩人一樣；koh願你tī Í-hoat-tha做豪傑，tī伯利恆做有名聲ê；Tī siâⁿ-mn̂g teh chē hiah ê chèng peh-sìⁿ kap tiúⁿ-ló kóng, Goán chòe kan-chèng; goān Iâ-hô-hoa hō͘ ji̍p lí ê ke ê hū-jîn-lâng chhin-chhiūⁿ kiàn-li̍p Í-sek-lia̍t ke La̍h-kiat Lī-a nn̄g-lâng chi̍t-iūⁿ; koh goān lí tī Í-hoat-tha chòe hô-kia̍t, tī Pek-lī-hêng chòe ū miâ-siaⁿ-ê;

12也願你ê家tùi耶和華用chit-ê cha-bó͘-kiáⁿ所beh賞賜你ê後裔，成做親像Hoat-le̍k-su ê家，就是Tha-má kā猶大所生ê。iā goān lí ê ke tùi Iâ-hô-hoa ēng chit ê cha-bó͘-kiáⁿ só͘ beh siúⁿ-sù lí ê hō͘-è, chiâⁿ-chòe chhin-chhiūⁿ Hoat-le̍k-su ê ke, chiū-sī Tha-má kā Iû-tāi só͘ siⁿ ê.

13Tùi án-ni，Pho-a-su娶路得做bó͘；已經kap伊同房。耶和華hō͘伊懷孕生一個kiáⁿ。Tùi án-ni Pho-a-su chhōa Lō͘-tek chòe-bó͘; í-keng kap i tâng-pâng. Iâ-hô-hoa hō͘ i hoâi-īn siⁿ chi̍t ê kiáⁿ.

14Hiah-ê婦人人對拿俄米講，耶和華是應該o-ló ê；因為伊今á日無放sak你，致到你無至親ê人；願chit-ê gín-ná tī以色列中得tio̍h名聲。Hiah ê hū-jîn-lâng tùi Ná-o-bí kóng, Iâ-hô-hoa sī eng-kai o-ló ê; in-ūi I kin-á-ji̍t bô pàng-sak lí, tì-kàu lí bô chì-chhin ê lâng; goān chit ê gín-ná tī Í-sek-lia̍t tiong tit-tio̍h miâ-siaⁿ.

15伊beh復到你ê精英，奉養你ê年老；因為生伊ê，就是你hit-ê疼你ê新婦，tùi-tī你比七個kiáⁿ iáu khah好ê。I beh ho̍k-tò lí ê cheng-eng, hōng-ióng lí ê nî-lāu; in-ūi siⁿ i-ê, chiū-sī lí hit ê thiàⁿ lí ê sim-pū, tùi-tī lí pí chhit ê kiáⁿ iáu khah-hó ê.

16拿俄米抱hit-ê gín-ná，hē tī伊ê胸前，io伊親像老母。Ná-o-bí phō hit ê gín-ná, hē tī i ê heng-chêng, io i chhin-chhiūⁿ lāu-bú.

17厝邊hiah-ê婦人人就kā伊號名，講，拿俄米有得tio̍h gín-ná lah；就叫伊ê名O-pī-tek；伊是耶西ê老父，耶西是大衛ê老父。Chhù-piⁿ hiah ê hū-jîn-lâng chiū kā i hō miâ, kóng, Ná-o-bí ū tit-tio̍h gín-ná lah; chiū kiò i ê miâ O-pī-tek; i sī Iâ-se ê lāu-pē, Iâ-se sī Tāi-pi̍t ê lāu-pē.

18Hoat-le̍k-su ê後裔記tī下底；Hoat-le̍k-su生Hi-su-lûn；Hoat-le̍k-su ê hō͘-è kì tī ē-tóe; Hoat-le̍k-su siⁿ Hi-su-lûn;

19Hi-su-lûn生Lân，Lân生A-bí-ná-ta̍t；Hi-su-lûn siⁿ Lân, Lân siⁿ A-bí-ná-ta̍t;

20A-bí-ná-ta̍t生Ná-sūn，Ná-sūn生Sat-bûn；A-bí-ná-ta̍t siⁿ Ná-sūn, Ná-sūn siⁿ Sat-bûn;

21Sat-bûn生Pho-a-su，Pho-a-su生O-pī-tek；Sat-bûn siⁿ Pho-a-su, Pho-a-su siⁿ O-pī-tek;

22O-pī-tek生耶西，耶西生大衛。O-pī-tek siⁿ Iâ-se, Iâ-se siⁿ Tāi-pi̍t.

1Í-hoat-liân山地ê La̍h-má-so-hui，有一個Í-hoat-liân人名叫Í-lī-ka-ná，是So͘-hut ê元孫，Thok-hō͘ ê曾孫，Í-lī-hō͘ ê孫，Iâ-lô-hán ê kiáⁿ。Í-hoat-liân soaⁿ-tōe ê La̍h-má-so-hui, ū chi̍t ê Í-hoat-liân lâng miâ-kiò Í-lī-ka-ná, sī So͘-hut ê goân-sun, Thok-hō͘ ê cheng-sun, Í-lī-hō͘ ê sun, Iâ-lô-hán ê kiáⁿ.

2伊有兩個bó͘，一個名Hap-ná，一個名Pí-nî-ná；Pí-nî-ná有kiáⁿ兒，Hap-ná無kiáⁿ兒。I ū nn̄g ê bó͘, chi̍t-ê miâ Hap-ná, chi̍t-ê miâ Pí-nî-ná; Pí-nî-ná ū kiáⁿ-jî, Hap-ná bô kiáⁿ-jî.

3Chit人ta̍k年對伊ê本城上去到Sī-lô，beh敬拜，也beh祭祀萬軍ê耶和華；Í-lī兩個kiáⁿ Hô-hut-nî、Hui-nî-hap tī-hia做耶和華ê祭司。Chit-lâng ta̍k-nî tùi i ê pún-siâⁿ chiūⁿ-khì kàu Sī-lô, beh kèng-pài, iā beh chè-sū bān-kun ê Iâ-hô-hoa; Í-lī nn̄g ê kiáⁿ Hô-hut-nî Hui-nî-hap tī-hia chòe Iâ-hô-hoa ê chè-si.

4Í-lī-ka-ná獻祭ê日，分祭肉hō͘伊ê bó͘ Pí-nî-ná，kap伊ê kiáⁿ cha-bó͘-kiáⁿ；Í-lī-ka-ná hiàn-chè ê ji̍t, pun chè-bah hō͘ i ê bó͘ Pí-nî-ná, kap i ê kiáⁿ cha-bó͘-kiáⁿ;

5總是分hō͘ Hap-ná ê是雙份，因為伊疼Hap-ná；但是耶和華關密伊ê胎。chóng-sī pun hō͘ Hap-ná ê sī siang-hūn, in-ūi i thiàⁿ Hap-ná; nā-sī Iâ-hô-hoa koaiⁿ-ba̍t i ê thai.

6Kap伊做對頭ê Pí-nî-ná大大激伊，beh hō͘伊憂悶；因為耶和華關密伊ê胎。Kap i chòe tùi-thâu ê Pí-nî-ná tōa-tōa kek i, beh hō͘ i iu-būn; in-ūi Iâ-hô-hoa koaiⁿ-ba̍t i ê thai.

7伊上到耶和華ê厝ê時，Í-lī-ka-ná年年án-ni行，Pí-nî-ná猶原激伊；伊就啼哭，續m̄食。I chiūⁿ kàu Iâ-hô-hoa ê chhù ê sî, Í-lī-ka-ná nî-nî án-ni kiâⁿ, Pí-nî-ná iû-goân kek i; i chiū thî-khàu, sòa m̄-chia̍h.

8伊ê丈夫Í-lī-ka-ná kā伊講，Hap-ná ah，你啥事啼哭？啥事m̄食？啥事心憂悶ah？我tùi-tī你kiám無比十個kiáⁿ khah好mah？I ê tiōng-hu Í-lī-ka-ná kā i kóng, Hap-ná ah, lí siáⁿ-sū thî-khàu? siáⁿ-sū m̄-chia̍h? siáⁿ-sū sim iu-būn ah? góa tùi-tī lí kiám bô pí cha̍p ê kiáⁿ khah-hó mah?

9In tī Sī-lô lim食了後，Hap-ná就起來。祭司Í-lī tī耶和華殿ê門khiā邊坐tī伊ê位。In tī Sī-lô lim-chia̍h liáu-āu, Hap-ná chiū khí-lâi. Chè-si Í-lī tī Iâ-hô-hoa tiān ê mn̂g-khiā-piⁿ chē tī i ê ūi.

10Hap-ná ê心內憂苦，祈禱耶和華來大啼哭；Hap-ná ê sim-lāi iu-khó͘, kî-tó Iâ-hô-hoa lâi tōa thî-khàu;

11下願講，萬軍ê耶和華ah，你若果然垂落看顧你ê女婢ê艱難，koh siàu念我，無bōe記得你ê女婢，賞賜你ê女婢生ta-po͘-kiáⁿ，我beh hō͘伊歸tī耶和華到一世人，剃頭刀無到伊ê頭殼。hē-goān kóng, Bān-kun ê Iâ-hô-hoa ah, Lí nā kó-jiân sûi-lo̍h khòaⁿ-kò͘ Lí ê lú-pī ê kan-lân, koh siàu-liām góa, bô bōe-kì-tit Lí ê lú-pī, siúⁿ-sù Lí ê lú-pī siⁿ ta-po͘-kiáⁿ, góa beh hō͘ i kui tī Iâ-hô-hoa kàu chi̍t-sì-lâng, thì-thâu-to bô kàu i ê thâu-khak.

12Hap-ná tī耶和華ê面前直直祈禱ê時，Í-lī注目看伊ê嘴。Hap-ná tī Iâ-hô-hoa ê bīn-chêng ti̍t-ti̍t kî-tó ê sî, Í-lī chù-ba̍k khòaⁿ i ê chhùi.

13Taⁿ Hap-ná心內靜靜求，只有嘴唇振動，無聽見聲；所以Í-lī掠做伊是酒醉。Taⁿ Hap-ná sim-lāi chēng-chēng kiû, chí-ū chhùi-tûn tín-tāng, bô thiaⁿ-kìⁿ siaⁿ; só͘-í Í-lī lia̍h-chòe i sī chiú-chùi.

14Í-lī kā伊講，你beh醉到tī時ah？你m̄-thang koh lim酒。Í-lī kā i kóng, Lí beh chùi kàu tī-sî ah? Lí m̄-thang koh lim chiú.

15Hap-ná應講，我ê主ah，m̄是án-ni；我是心內憂苦ê婦人人，薄酒厚酒我lóng無lim；獨獨tī耶和華ê面前吐出心情；Hap-ná ìn kóng, Góa ê chú ah, m̄-sī án-ni; góa sī sim-lāi iu-khó͘ ê hū-jîn-lâng, po̍h-chiú kāu-chiú góa lóng bô lim; to̍k-to̍k tī Iâ-hô-hoa ê bīn-chêng thò͘-chhut sim-chêng;

16莫得掠你ê女婢做pháiⁿ德行ê婦女，因為我到taⁿ tùi我ê大憂悶受激氣來講。bo̍h-tit lia̍h lí ê lú-pī chòe pháiⁿ tek-hēng ê hū-lú, in-ūi góa kàu-taⁿ tùi góa ê tōa iu-būn siū kek-khì lâi kóng.

17Í-lī應伊講，你thang平安tò去；願以色列ê上帝允准你所對伊求ê。Í-lī ìn i kóng, Lí thang pêng-an tò-khì; goān Í-sek-lia̍t ê Siōng-tè ún-chún lí só͘ tùi I kiû ê.

18Hap-ná講，願你ê女婢得tio̍h恩tī你ê面前。婦人人就tò去，來lim食，就無koh再帶憂容。Hap-ná kóng, Goān lí ê lú-pī tit-tio̍h un tī lí ê bīn-chêng. Hū-jîn-lâng chiū tò-khì, lâi lim-chia̍h, chiū bô koh-chài tài-iu-iông.

19隔日in早早起來，tī耶和華ê面前敬拜，就tò去La̍h-má，到伊ê家。Í-lī-ka-ná kap bó͘ Hap-ná同房；耶和華siàu念Hap-ná。Keh-ji̍t in chá-chá khí-lâi, tī Iâ-hô-hoa ê bīn-chêng kèng-pài, chiū tò-khì La̍h-má, kàu i ê ke. Í-lī-ka-ná kap bó͘ Hap-ná tâng-pâng; Iâ-hô-hoa siàu-liām Hap-ná.

20Hap-ná就懷孕；到時就生一個kiáⁿ，kā伊號名叫撒母耳，講，這是我對耶和華求ê。Hap-ná chiū hoâi-īn; kàu-sî chiū siⁿ chi̍t ê kiáⁿ, kā i hō-miâ kiò Sat-bó͘-jíⁿ, kóng, Che sī góa tùi Iâ-hô-hoa kiû-ê.

21Hit人Í-lī-ka-ná kap伊ê thong家lóng上去，beh用ta̍k年ê祭祀kap伊所hē ê願獻hō͘耶和華。Hit-lâng Í-lī-ka-ná kap i ê thong-ke lóng chiūⁿ-khì, beh ēng ta̍k-nî ê chè-sū kap i só͘ hē ê goān hiàn-hō͘ Iâ-hô-hoa.

22總是Hap-ná無上去；kā伊ê丈夫講，thèng候gín-ná斷奶，我就帶伊上去，hō͘伊朝見耶和華，永遠tiàm tī-hia。Chóng-sī Hap-ná bô chiūⁿ-khì; kā i ê tiōng-hu kóng, Thèng-hāu gín-ná tn̄g-lin, góa chiū tòa i chiūⁿ-khì, hō͘ i tiâu-kìⁿ Iâ-hô-hoa, éng-oán tiàm tī-hia.

23伊ê丈夫Í-lī-ka-ná kā伊講，照你所看做好ê來行，thang thèng候gín-ná斷奶；總是願耶和華應驗伊ê話。Tùi án-ni，婦人人tī家內io kiáⁿ，到斷奶。I ê tiōng-hu Í-lī-ka-ná kā i kóng, Chiàu lí só͘ khòaⁿ-chòe hó-ê lâi kiâⁿ, thang thèng-hāu gín-ná tn̄g-lin; chóng-sī goān Iâ-hô-hoa èng-giām I ê ōe. Tùi án-ni hū-jîn-lâng tī ke-lāi io kiáⁿ, kàu tn̄g-lin.

24已經kā伊斷奶，就chhōa伊相kap上Sī-lô，到耶和華ê厝；koh帶三隻牛káng，一i-hoat幼ê麵粉，一皮袋酒；hit時gín-ná iáu細漢。Í-keng kā i tn̄g-lin, chiū chhōa i saⁿ-kap chiūⁿ Sī-lô, kàu Iâ-hô-hoa ê chhù; koh tòa saⁿ chiah gû-káng, chi̍t i-hoat iù ê mī-hún, chi̍t phê-tē chiú; hit-sî gín-ná iáu sòe-hàn.

25In thâi一隻牛káng，就chhōa gín-ná到Í-lī ê面前。In thâi chi̍t chiah gû-káng, chiū chhōa gín-ná kàu Í-lī ê bīn-chêng.

26婦人人講，我ê主ah，我kí你ê活命來chiù-chōa，我ê主ah，前khiā tī你chia，祈求耶和華ê，hit-ê婦人人就是我。Hū-jîn-lâng kóng, Góa ê chú ah, góa kí lí ê oa̍h-miā lâi chiù-chōa, góa ê chú ah, chêng khiā tī lí chia, kî-kiû Iâ-hô-hoa ê, hit ê hū-jîn-lâng chiū-sī góa.

27我求ài得tio̍h chit-ê gín-ná；耶和華已經賞賜我所對伊求ê；Góa kiû ài tit-tio̍h chit ê gín-ná; Iâ-hô-hoa í-keng siúⁿ-sù góa só͘ tùi I kiû ê;

28所以我用chit-ê gín-ná還耶和華，伊一世人還耶和華。就tī-hia敬拜耶和華。só͘-í góa ēng chit ê gín-ná hêng Iâ-hô-hoa, i chi̍t-sì-lâng hêng Iâ-hô-hoa. Chiū tī-hia kèng-pài Iâ-hô-hoa.

1Hap-ná祈禱講， 我ê心因為耶和華來快樂， 我ê角因為耶和華來kia̍h高； 我ǹg對敵敢講大話， 因為我為tio̍h你ê拯救來歡喜。Hap-ná kî-tó kóng, Góa ê sim in-ūi Iâ-hô-hoa lâi khoài-lo̍k, Góa ê kak in-ūi Iâ-hô-hoa lâi kia̍h-koâiⁿ; Góa ǹg tùi-te̍k káⁿ kóng tōa-ōe, In-ūi góa ūi-tio̍h Lí ê chín-kiù lâi hoaⁿ-hí.

2無有聖ê親像耶和華； 你以外無別ê； 也無石磐親像咱ê上帝。Bô ū sèng-ê chhin-chhiūⁿ Iâ-hô-hoa; Lí í-gōa bô pa̍t ê; Iā bô chio̍h-pôaⁿ chhin-chhiūⁿ lán ê Siōng-tè.

3Lín m̄-thang自誇講驕傲ê話； 也m̄-thang hō͘ lām-sám ê話出你ê嘴； 因為耶和華是知識ê上帝， 人ê行做hō͘祂批評。Lín m̄-thang chū-khoa kóng kiau-ngō͘ ê ōe; Iā m̄-thang hō͘ lām-sám ê ōe chhut lí ê chhùi; In-ūi Iâ-hô-hoa sī tì-sek ê Siōng-tè, Lâng ê kiâⁿ-chòe hō͘ I phoe-phêng.

4勇士ê弓已經at折； Tio̍h-tak ê人用氣力hâ腰。Ióng-sū ê keng í-keng at-chi̍h; Tio̍h-tak ê lâng ēng khùi-la̍t hâ-io.

5飽足ê，hō͘人倩來thàn食； Iau-ê，無koh iau； Bōe生育ê，生七個kiáⁿ， 有chōe-chōe kiáⁿ-ê，反tńg衰弱。Pá-chiok-ê, hō͘ lâng chhiàⁿ lâi thàn-chia̍h; Iau-ê, bô koh iau; Bōe seng-io̍k ê, siⁿ chhit ê kiáⁿ, Ū chōe-chōe kiáⁿ-ê, hoán-tńg soe-jio̍k.

6耶和華hō͘人死，也hō͘人活； hō͘人落陰間，也hō͘人起來。Iâ-hô-hoa hō͘ lâng sí, iā hō͘ lâng oa̍h; Hō͘ lâng lo̍h im-kan, iā hō͘ lâng khí-lâi.

7耶和華hō͘人sòng-hiong，也hō͘人好額； hō͘人降低，也hō͘人升高。Iâ-hô-hoa hō͘ lâng sòng-hiong, iā hō͘ lâng hó-gia̍h; Hō͘ lâng kàng-kē, iā hō͘ lâng seng-koâiⁿ.

8祂tùi塵埃升高sòng-hiong人， Tùi糞埽堆高升欠缺ê人， Hō͘ in kap首領相kap坐， 續接榮光ê座位； 因為地ê柱屬tī耶和華， 祂將世界安置tī hit頂面。I tùi tîn-ai seng-koâiⁿ sòng-hiong lâng, Tùi pùn-sò-tui ko-seng khiàm-kheh ê lâng, Hō͘ in kap siú-léng saⁿ-kap chē, Sòa-chiap êng-kng ê chō-ūi; In-ūi tōe ê thiāu sio̍k tī Iâ-hô-hoa, I chiong sè-kài an-tì tī hit téng-bīn.

9伊beh保守伊聖ê ê腳， Hō͘ pháiⁿ人tī烏暗中靜chauh-chauh； 因為人óa靠氣力bōe會khah贏。I beh pó-siú I sèng-ê ê kha, Hō͘ pháiⁿ-lâng tī o͘-àm-tiong chēng-chauh-chauh; In-ūi lâng óa-khò khùi-la̍t bōe-ōe khah-iâⁿ.

10Kap耶和華相爭ê beh受phah碎； 伊beh tùi天用雷phah伊； 耶和華beh審判地ê極頭； 賞賜氣力hō͘伊ê王， 舉起伊受抹油ê ê角。Kap Iâ-hô-hoa saⁿ-chiⁿ-ê beh siū phah-chhùi; I beh tùi thiⁿ ēng lûi phah i; Iâ-hô-hoa beh sím-phòaⁿ tōe ê ke̍k-thâu; Siúⁿ-sù khùi-la̍t hō͘ I ê ông, Kú-khí I siū boah-iû-ê ê kak.

11Í-lī-ka-ná tò去La̍h-má到伊ê家。Hit-ê gín-ná tī祭司Í-lī ê面前服事耶和華。Í-lī-ka-ná tò-khì La̍h-má kàu i ê ke. Hit ê gín-ná tī chè-si Í-lī ê bīn-chêng ho̍k-sāi Iâ-hô-hoa.

12Í-lī hiah-ê kiáⁿ是匪類，m̄-bat耶和華。Í-lī hiah ê kiáⁿ sī húi-lūi, m̄-bat Iâ-hô-hoa.

13祭司tī百姓ê例，就是見若人獻祭teh 煮肉ê時，祭司ê奴僕就來，手kia̍h三爪ê叉；Chè-si tī peh-sìⁿ ê lē, chiū-sī kìⁿ-nā lâng hiàn-chè teh chú-bah ê sî, chè-si ê lô͘-po̍k chiū lâi, chhiú kia̍h saⁿ-jiáu ê chhe;

14用叉插入缽，á是鼎，á是鐵銚(tiō)，á是鍋，見若所差出來ê肉，祭司lóng the̍h做家己ê；in tī Sī-lô親像án-ni款待見若來hia ê以色列人。ēng chhe chhah-ji̍p poah, á-sī tiáⁿ, á-sī thih-tiō, á-sī e, kìⁿ-nā só͘ chhe-chhut-lâi ê bah, chè-si lóng the̍h chòe ka-kī-ê; in tī Sī-lô chhin-chhiūⁿ án-ni khoán-thāi kìⁿ-nā lâi hia ê Í-sek-lia̍t lâng.

15Koh tī未燒油lâ ê事先，祭司ê奴僕就來，kā獻祭ê人講，你tio̍h用肉hō͘祭司thang pek，因為伊m̄-ài你過煮ê肉，是ài生ê。Koh tī bē sio iû-lâ ê tāi-seng, chè-si ê lô͘-po̍k chiū lâi, kā hiàn-chè ê lâng kóng, Lí tio̍h ēng bah hō͘ chè-si thang pek, in-ūi i m̄-ài lí kè-chú ê bah, sī ài chhiⁿ-ê.

16Hit人若對伊講，Beh事先燒油，然後thang照你ê心所ài the̍h去，伊就講，M̄ ah，chit-tia̍p tio̍h hō͘我；若m̄，我beh強強the̍h去。Hit-lâng nā tùi i kóng, Beh tāi-seng sio iû, jiân-āu thang chiàu lí ê sim só͘ ài the̍h-khì, i chiū kóng, M̄ ah, chit-tia̍p tio̍h hō͘ góa; nā m̄, góa beh kiông-kiông the̍h-khì.

17Án-ni hiah-ê少年人ê罪tī耶和華ê面前真重；因為人厭惡耶和華ê祭祀。Án-ni hiah ê siàu-liân lâng ê chōe tī Iâ-hô-hoa ê bīn-chêng chin-tāng; in-ūi lâng iàm-ò͘ⁿ Iâ-hô-hoa ê chè-sū.

18Hit時撒母耳iáu細漢，穿幼苧布ê í-hut-tek，tī耶和華ê面前服事。Hit-sî Sat-bó͘-jíⁿ iáu sòe-hàn, chhēng iù-tōe-pò͘ ê í-hut-tek, tī Iâ-hô-hoa ê bīn-chêng ho̍k-sāi.

19Koh伊ê老母ta̍k年kā伊做一領細領ê長衫；kap伊ê丈夫上來獻年祭ê時，帶來hō͘伊。Koh i ê lāu-bú ta̍k-nî kā i chòe chi̍t-niá sòe-niá ê tn̂g-saⁿ; kap i ê tiōng-hu chiūⁿ-lâi hiàn nî-chè ê sî, tòa-lâi hō͘ i.

20Í-lī kā Í-lī-ka-ná kap伊ê bó͘祝福，講，願耶和華對chit-ê婦人人koh賞賜你後裔，來替所還hō͘耶和華ê。In就tò去本所在。Í-lī kā Í-lī-ka-ná kap i ê bó͘ chiok-hok, kóng, Goān Iâ-hô-hoa tùi chit ê hū-jîn-lâng koh siúⁿ-sù lí hō͘-è, lâi thòe só͘ hêng hō͘ Iâ-hô-hoa ê. In chiū tò-khì pún só͘-chāi.

21耶和華看顧Hap-ná；伊就懷孕生三個kiáⁿ，兩個cha-bó͘-kiáⁿ。Gín-ná撒母耳也tī耶和華ê面前漸漸大漢。Iâ-hô-hoa khòaⁿ-kò͘ Hap-ná; i chiū hoâi-īn siⁿ saⁿ ê kiáⁿ, nn̄g ê cha-bó͘-kiáⁿ. Gín-ná Sat-bó͘-jíⁿ iā tī Iâ-hô-hoa ê bīn-chêng chiām-chiām tōa-hàn.

22Í-lī真老，聽見伊ê kiáⁿ對以色列眾人所行一切ê事，koh聽見in kap會幕門前做工ê婦人人私通。Í-lī chin-lāu, thiaⁿ-kìⁿ i ê kiáⁿ tùi Í-sek-lia̍t chèng-lâng só͘ kiâⁿ it-chhè ê sū, koh thiaⁿ-kìⁿ in kap hōe-bō͘ mn̂g-chêng chòe-kang ê hū-jîn-lâng su-thong.

23伊就kā in講，Lín啥事行chiah-ê事ah？我tùi chiah-ê眾百姓聽見lín ê pháiⁿ所行；I chiū kā in kóng, Lín siáⁿ-sū kiâⁿ chiah ê sū ah? góa tùi chiah ê chèng peh-sìⁿ thiaⁿ-kìⁿ lín ê pháiⁿ só͘ kiâⁿ;

24我ê kiáⁿ ah，m̄-thang án-ni；因為我所聽見ê風聲是m̄好；lín hō͘耶和華ê百姓犯罪。góa ê kiáⁿ ah, m̄-thang án-ni; in-ūi góa só͘ thiaⁿ-kìⁿ ê hong-siaⁿ sī m̄-hó; lín hō͘ Iâ-hô-hoa ê peh-sìⁿ hoān-chōe.

25人若得罪人，上帝審判伊；人若得罪耶和華，是誰替伊祈禱？但是in m̄聽老父ê話；因為耶和華存意beh thâi in。Lâng nā tek-chōe lâng, Siōng-tè sím-phòaⁿ i; lâng nā tek-chōe Iâ-hô-hoa, chī-chūi thòe i kî-tó? Nā-sī in m̄-thiaⁿ lāu-pē ê ōe; in-ūi Iâ-hô-hoa chûn-ì beh thâi in.

26Gín-ná撒母耳漸漸大漢，得tio̍h耶和華kap人ná疼伊。Gín-ná Sat-bó͘-jíⁿ chiām-chiām tōa-hàn, tit-tio̍h Iâ-hô-hoa kap lâng ná thiàⁿ i.

27有上帝ê奴僕來見Í-lī，對伊講，耶和華án-ni講，你ê祖公ê家，前tī埃及法老ê家做奴僕ê時，我kiám無對伊出現mah？Ū Siōng-tè ê lô͘-po̍k lâi kìⁿ Í-lī, tùi i kóng, Iâ-hô-hoa án-ni kóng, Lí ê chó͘-kong ê ke, chêng tī Ai-ki̍p Hoat-ló ê ke chòe lô͘-po̍k ê sî, Góa kiám bô tùi i chhut-hiān mah?

28我kiám無tùi以色列眾支派，揀伊做我ê祭司，tī我ê壇頂獻祭、燒香，穿í-hut-tek tī我ê面前；以色列族所獻ê火祭我kiám無lóng hō͘伊ê祖公ê家mah？Góa kiám bô tùi Í-sek-lia̍t chèng chi-phài, kéng i chòe Góa ê chè-si, tī Góa ê tôaⁿ-téng hiàn-chè, sio-hiuⁿ, chhēng í-hut-tek tī Góa ê bīn-chêng; Í-sek-lia̍t cho̍k só͘ hiàn ê hé-chè Góa kiám bô lóng hō͘ i ê chó͘-kong ê ke mah?

29我所命令ê祭祀禮物tī我khiā起ê所在ê，lín啥事thún踏伊，尊重你ê kiáⁿ khah過頭尊重我，用我ê百姓以色列所獻siōng好ê禮物，來家己肥ah？Góa só͘ bēng-lēng ê chè-sū lé-mi̍h tī Góa khiā-khí ê só͘-chāi ê, lín siáⁿ-sū thún-ta̍h i, chun-tiōng lí ê kiáⁿ khah kè-thâu chun-tiōng Góa, ēng Góa ê peh-sìⁿ Í-sek-lia̍t só͘ hiàn siōng-hó ê lé-mi̍h, lâi ka-kī pûi ah?

30所以耶和華以色列ê上帝講，我實在bat講，你ê家，你ê老父ê家beh永遠行tī我ê面前；總是taⁿ耶和華講，我決斷m̄ án-ni；因為尊重我ê，我beh尊重伊，藐視我ê，伊beh受看輕。Só͘-í Iâ-hô-hoa Í-sek-lia̍t ê Siōng-tè kóng, Góa si̍t-chāi bat kóng, lí ê ke, lí ê lāu-pē ê ke beh éng-oán kiâⁿ tī Góa ê bīn-chêng; chóng-sī taⁿ Iâ-hô-hoa kóng, Góa koat-toàn m̄ án-ni; in-ūi chun-tiōng Góa ê, Góa beh chun-tiōng i, biáu-sī Góa ê, i beh siū khòaⁿ-khin.

31看ah，日子beh到，我beh斬斷你ê手骨，kap你ê父ê家ê手骨，hō͘你ê家中無一個老人。Khòaⁿ ah, ji̍t-chí beh kàu, Góa beh chām-tn̄g lí ê chhiú-kut, kap lí ê pē ê ke ê chhiú-kut, hō͘ lí ê ke-tiong bô chi̍t ê lāu-lâng.

32Tī上帝hō͘以色列人享福ê時，你beh看見我ê厝ê衰敗；tī你ê家中beh永遠無一個老人；Tī Siōng-tè hō͘ Í-sek-lia̍t lâng hióng-hok ê sî, lí beh khòaⁿ-kìⁿ Góa ê chhù ê soe-pāi; tī lí ê ke-tiong beh éng-oán bô chi̍t ê lāu-lâng;

33屬tī你ê人，我無tùi我ê壇剿滅ê，beh phah-pháiⁿ你ê目睭，憂傷你ê心；你家中所koh生ê人，lóng beh中年就死；sio̍k tī lí ê lâng, Góa bô tùi Góa ê tôaⁿ châu-bia̍t ê, beh phah-pháiⁿ lí ê ba̍k-chiu, iu-siong lí ê sim; lí ke-tiong só͘ koh siⁿ ê lâng, lóng beh tiong-liân chiū sí;

34你兩個kiáⁿ Hô-hut-nî、Hui-nî-hap所tú-tio̍h-ê，beh做你ê兆頭；in兩人beh同一日死。lí nn̄g ê kiáⁿ Hô-hut-nî Hui-nî-hap só͘ tú-tio̍h-ê, beh chòe lí ê tiāu-thâu; in nn̄g-lâng beh tâng chi̍t ji̍t sí.

35我beh為家己立一個盡忠ê祭司，伊beh照我ê心我ê意來行；我beh為伊建立堅固ê家；伊beh永遠行tī我所抹油ê ê面前。Góa beh ūi ka-kī li̍p chi̍t ê chīn-tiong ê chè-si, i beh chiàu Góa ê sim Góa ê ì lâi kiâⁿ; Góa beh ūi i kiàn-li̍p kian-kò͘ ê ke; i beh éng-oán kiâⁿ tī Góa só͘ boah-iû-ê ê bīn-chêng.

36你ê家所chhun ê人lóng beh來跪拜伊，求一個銀，一個餅，講，求你hō͘我當祭司職-ê一個，hō͘我thang得tio̍h淡薄餅來食。Lí ê ke só͘ chhun ê lâng lóng beh lâi kūi-pài i, kiû chi̍t ê gûn, chi̍t ê piáⁿ, kóng, Kiû lí hō͘ góa tng chè-si-chit ê chi̍t-ê, hō͘ góa thang tit-tio̍h tām-po̍h piáⁿ lâi chia̍h.