1掃羅tú-á坐位ê年歲做以色列王兩年。Sò-lô tú-á chē-ūi ê nî-hè chòe Í-sek-lia̍t ông nn̄g-nî.

2掃羅就為家己tùi以色列中揀三千人；兩千跟tè掃羅tī Bi̍t-boa̍t kap Pek-te̍k-lī山，一千跟tè約拿單tī便雅憫ê Ki-pí-a；其餘ê人，伊差in tò去ta̍k人ê布棚。Sò-lô chiū ūi ka-kī tùi Í-sek-lia̍t tiong kéng saⁿ-chheng lâng; nn̄g-chheng kun-tè Sò-lô tī Bi̍t-boa̍t kap Pek-te̍k-lī soaⁿ, chi̍t-chheng kun-tè Iok-ná-tan tī Piān-ngá-bín ê Ki-pí-a; kî-û ê lâng, i chhe in tò-khì ta̍k-lâng ê pò͘-pîⁿ.

3約拿單phah Ka-pa腓利士人ê軍營，腓利士人聽見。掃羅就pûn哨角tī全地，講，希伯來人tio̍h聽ah。Iok-ná-tan phah Ka-pa Hui-lī-sū lâng ê kun-iâⁿ, Hui-lī-sū lâng thiaⁿ-kìⁿ. Sò-lô chiū pûn sàu-kak tī choân-tōe, kóng, Hi-pek-lâi lâng tio̍h thiaⁿ ah.

4以色列眾人聽見掃羅phah腓利士人ê軍營，koh聽見以色列人hō͘腓利士人厭惡，百姓就跟tè掃羅，聚集tī Kiat-kah。Í-sek-lia̍t chèng-lâng thiaⁿ-kìⁿ Sò-lô phah Hui-lī-sū lâng ê kun-iâⁿ, koh thiaⁿ-kìⁿ Í-sek-lia̍t lâng hō͘ Hui-lī-sū lâng iàm-ò͘ⁿ, peh-sìⁿ chiū kun-tè Sò-lô, chū-chi̍p tī Kiat-kah.

5腓利士人聚集beh kap以色列人交戰；有車三萬張，馬兵六千，步兵親像海邊ê沙hiah-chōe；就上來，tī Pek-a-bûn東勢ê Bi̍t-boa̍t紮營。Hui-lī-sū lâng chū-chi̍p beh kap Í-sek-lia̍t lâng kau-chiàn; ū chhia saⁿ-bān tiuⁿ, bé-peng la̍k-chheng, pō͘-peng chhin-chhiūⁿ hái-piⁿ ê soa hiah-chōe; chiū chiūⁿ-lâi, tī Pek-a-bûn tang-sì ê Bi̍t-boa̍t chat-iâⁿ.

6以色列人看見家己危急，因為百姓窘迫，就家己bih tī山洞、樹林、石穴，險要ê所在，kap深坑。Í-sek-lia̍t lâng khòaⁿ-kìⁿ ka-kī gûi-kip, in-ūi peh-sìⁿ khún-pek, chiū ka-kī bih tī soaⁿ-tōng, chhiū-nâ, chio̍h-hia̍t, hiám-iàu ê só͘-chāi, kap chhim-khiⁿ.

7也有希伯來人過約旦到Ka-te̍k kap Ki-lia̍t地。掃羅iáu-kú tī Kiat-kah；百姓lóng ngia̍uh-ngia̍uh-chhoah來跟tè伊。Iā ū Hi-pek-lâi lâng kè Iok-tàn kàu Ka-te̍k kap Ki-lia̍t tōe. Sò-lô iáu-kú tī Kiat-kah; peh-sìⁿ lóng ngia̍uh-ngia̍uh-chhoah lâi kun-tè i.

8掃羅照撒母耳所定tio̍h ê日期，thèng候七日。撒母耳iáu未來Kiat-kah，百姓離開伊四散去。Sò-lô chiàu Sat-bó͘-jíⁿ só͘ tiāⁿ-tio̍h ê ji̍t-kî, thèng-hāu chhit-ji̍t. Sat-bó͘-jíⁿ iáu-bē lâi Kiat-kah, peh-sìⁿ lī-khui i sì-sòaⁿ khì.

9掃羅講，將燒祭kap謝恩祭帶來我chia；伊就獻燒祭。Sò-lô kóng, Chiong sio-chè kap siā-un-chè tòa-lâi góa chia; i chiū hiàn sio-chè.

10伊獻燒祭tú-á明白，看ah，撒母耳到lah；掃羅出去迎接伊，beh kā伊請安。I hiàn sio-chè tú-á bêng-pe̍k, khòaⁿ ah, Sat-bó͘-jíⁿ kàu lah; Sò-lô chhut-khì ngiâ-chih i, beh kā i chhéng-an.

11撒母耳講，你做甚麼tāi ah？掃羅講，因為我看見百姓四散離開我，你也無照所定tio̍h ê日期到，koh腓利士人已經聚集tī Bi̍t-boa̍t；Sat-bó͘-jíⁿ kóng, Lí chòe sím-mi̍h tāi ah? Sò-lô kóng, In-ūi góa khòaⁿ-kìⁿ peh-sìⁿ sì-sòaⁿ lī-khui góa, lí iā bô chiàu só͘ tiāⁿ-tio̍h ê ji̍t-kî kàu, koh Hui-lī-sū lâng í-keng chū-chi̍p tī Bi̍t-boa̍t;

12所以我講，腓利士人beh到Kiat-kah攻擊我，也我iáu未求耶和華施恩，我就勉強獻燒祭。só͘-í góa kóng, Hui-lī-sū lâng beh kàu Kiat-kah kong-kek góa, iā góa iáu-bē kiû Iâ-hô-hoa si-un, góa chiū bián-kióng hiàn sio-chè.

13撒母耳對掃羅講，你做戇事lah，因為你無遵守耶和華你上帝所命令你ê誡命；beh是有守，耶和華就堅固你ê王位tī以色列中到永遠。Sat-bó͘-jíⁿ tùi Sò-lô kóng, Lí chòe gōng-sū lah, in-ūi lí bô chun-siú Iâ-hô-hoa lí Siōng-tè só͘ bēng-lēng lí ê kài-bēng; beh sī ū siú, Iâ-hô-hoa chiū kian-kò͘ lí ê ông-ūi tī Í-sek-lia̍t tiong kàu éng-oán.

14Taⁿ你ê王位無久長；耶和華已經chhē-tio̍h合伊ê心意ê一人；koh耶和華也定tio̍h伊做伊ê百姓ê頭，因為你無遵守耶和華所命令你ê。Taⁿ lí ê ông-ūi bô kú-tn̂g; Iâ-hô-hoa í-keng chhē-tio̍h ha̍p I ê sim-ì ê chi̍t-lâng; koh Iâ-hô-hoa iā tiāⁿ-tio̍h i chòe I ê peh-sìⁿ ê thâu, in-ūi lí bô chun-siú Iâ-hô-hoa só͘ bēng-lēng lí ê.

15撒母耳就起來，tùi Kiat-kah上去便雅憫ê Ki-pí-a。掃羅點算tè伊ê人，約略有六百人。Sat-bó͘-jíⁿ chiū khí-lâi, tùi Kiat-kah chiūⁿ-khì Piān-ngá-bín ê Ki-pí-a. Sò-lô tiám-sǹg tè i ê lâng, iok-lio̍k ū la̍k-pah lâng.

16掃羅kap伊ê kiáⁿ約拿單，kap tè in ê人，lóng tiàm tī便雅憫ê Ka-pa。總是腓利士人紮營tī Bi̍t-boa̍t；Sò-lô kap i ê kiáⁿ Iok-ná-tan, kap tè in ê lâng, lóng tiàm tī Piān-ngá-bín ê Ka-pa. Chóng-sī Hui-lī-sū lâng chat-iâⁿ tī Bi̍t-boa̍t;

17有搶劫ê tùi腓利士ê軍營中出來，分做三隊；一隊 oat tùi Gô-hut-la̍h ê路，到Su-a ê地去；Ū chhiúⁿ-kiap-ê tùi Hui-lī-sū ê kun-iâⁿ-tiong chhut-lâi, pun-chòe saⁿ tūi; chi̍t-tūi oat tùi Gô-hut-la̍h ê lō͘, kàu Su-a ê tōe khì;

18koh一隊oat tùi Pek-hô-lûn ê路去；koh一隊 oat tùi Sé-pho-im ê山谷對面地界ê路，ǹg曠野去。koh chi̍t-tūi oat tùi Pek-hô-lûn ê lō͘ khì; koh chi̍t-tūi oat tùi Sé-pho-im ê soaⁿ-kok tùi-bīn tōe-kài ê lō͘, ǹg khòng-iá khì.

19Hit時以色列全地無一個phah鐵師傅，因為腓利士人講，驚了希伯來人製造劍kap鎗。Hit-sî Í-sek-lia̍t choân-tōe bô chi̍t ê phah-thih sai-hū, in-ūi Hui-lī-sū lâng kóng, Kiaⁿ-liáu Hi-pek-lâi lâng chè-chō kiàm kap chhiuⁿ.

20以色列人beh磨利伊ê犁、耙(pē) 、斧頭、鋤頭，ta̍k人tio̍h落去腓利士人hia；Í-sek-lia̍t lâng beh bôa-lāi i ê lôe, pē, pó͘-thâu, tî-thâu, ta̍k-lâng tio̍h lo̍h-khì Hui-lī-sū lâng hia;

21若beh lòe鋤頭、犁、三齒ê叉、斧頭，kap趕牛ê鐵刺，tio̍h一pim ê工錢；nā beh lòe tî-thâu, lôe, saⁿ-khí ê chhe, pó͘-thâu, kap kóaⁿ-gû ê thih-chhì, tio̍h chi̍t-pim ê kang-chîⁿ;

22所以到交戰ê日，tè掃羅kap約拿單ê人無一個手裡有劍有鎗ê；獨獨掃羅kap伊ê kiáⁿ約拿單有。só͘-í kàu kau-chiàn ê ji̍t, tè Sò-lô kap Iok-ná-tan ê lâng bô chi̍t-ê chhiú-nih ū kiàm ū chhiuⁿ ê; to̍k-to̍k Sò-lô kap i ê kiáⁿ Iok-ná-tan ū.

23腓利士防守ê兵出去到Bi̍t-boa̍t ê隘(ài)口。Hui-lī-sū hông-siú ê peng chhut-khì kàu Bi̍t-boa̍t ê ài-kháu.

1有一日掃羅ê kiáⁿ約拿單kā kia̍h伊ê軍器ê少年人講，來，咱來去hit-pêng，到腓利士人軍營hia；總是伊無kā in老父講。Ū chi̍t-ji̍t Sò-lô ê kiáⁿ Iok-ná-tan kā kia̍h i ê kun-khì ê siàu-liân lâng kóng, Lâi, lán lâi khì hit-pêng, kàu Hui-lī-sū lâng kun-iâⁿ hia; chóng-sī i bô kā in lāu-pē kóng.

2掃羅tī Ki-pí-a ê極頭，坐tī Bí-ki-lûn ê石榴樹腳；tè伊ê約略有六百人；Sò-lô tī Ki-pí-a ê ke̍k-thâu, chē tī Bí-ki-lûn ê sia̍h-liû chhiū kha; tè-i-ê iok-lio̍k ū la̍k-pah lâng;

3koh有A-hi-tu̍t ê kiáⁿ A-hi-a，帶í-hut-tek，是Í-ka-phok ê兄，Hui-nî-hap ê kiáⁿ，Í-lī ê孫，就是tī Sī-lô做耶和華ê祭司ê。百姓m̄知約拿單去。koh ū A-hi-tu̍t ê kiáⁿ A-hi-a, tòa í-hut-tek, sī Í-ka-phok ê hiaⁿ, Hui-nî-hap ê kiáⁿ, Í-lī ê sun, chiū-sī tī Sī-lô chòe Iâ-hô-hoa ê chè-si ê. Peh-sìⁿ m̄-chai Iok-ná-tan khì.

4約拿單beh去腓利士ê軍營，所beh過hiah-ê隘口ê中間，chit-pêng有石ê山尖，hit-pêng也有石ê山尖，一個名Pò-siat，一個名Se-nî；Iok-ná-tan beh khì Hui-lī-sū ê kun-iâⁿ, só͘ beh kè hiah ê ài-kháu ê tiong-kan, chit-pêng ū chio̍h ê soaⁿ-chiam, hit-pêng iā ū chio̍h ê soaⁿ-chiam, chi̍t-ê miâ Pò-siat, chi̍t-ê miâ Se-nî;

5一個石ê山尖tī北pêng，kap Bi̍t-boa̍t相對，一個石ê山尖tī南pêng，kap Ka-pa相對。chi̍t ê chio̍h ê soaⁿ-chiam tī pak-pêng, kap Bi̍t-boa̍t saⁿ-tùi, chi̍t ê chio̍h ê soaⁿ-chiam tī lâm-pêng, kap Ka-pa saⁿ-tùi.

6約拿單kā kia̍h伊ê 軍器ê少年人講，來，咱來去無受割禮ê人ê軍營hia，kiám-chhái耶和華beh替咱做tāi-chì；因為耶和華ê救人，無限定人ê chōe少。Iok-ná-tan kā kia̍h i ê kun-khì ê siàu-liân lâng kóng, Lâi, lán lâi khì bô-siū kat-lé ê lâng ê kun-iâⁿ hia, kiám-chhái Iâ-hô-hoa beh thòe lán chòe tāi-chì; in-ūi Iâ-hô-hoa ê kiù lâng, bô hān-tiāⁿ lâng ê chōe-chió.

7Kia̍h伊ê 軍器ê kā伊講，照你ê心所ài-ê lóng行伊，thang進前去；我kap你同心，beh tè你去。Kia̍h i ê kun-khì-ê kā i kóng, Chiàu lí ê sim só͘-ài-ê lóng kiâⁿ i, thang chìn-chêng khì; góa kap lí tâng-sim, beh tè lí khì.

8約拿單講，咱beh經過到hiah-ê人hia，hō͘ in看見咱；Iok-ná-tan kóng, Lán beh keng-kè kàu hiah ê lâng hia, hō͘ in khòaⁿ-kìⁿ lán;

9in若án-ni kā咱講，Lín khiā-teh，thèng候阮到lín hia，咱就定定khiā-teh，無上去in hia。in nā án-ni kā lán kóng, Lín khiā-teh, thèng-hāu goán kàu lín hia, lán chiū tiāⁿ-tiāⁿ khiā-teh, bô chiūⁿ-khì in hia.

10In若講，Lín上來阮chia，咱就上去；因為耶和華將in交tī咱ê手，chit-ê話thang做咱ê證據。In nā kóng, Lín chiūⁿ-lâi goán chia, lán chiū chiūⁿ-khì; in-ūi Iâ-hô-hoa chiong in kau tī lán ê chhiú, chit-ê ōe thang chòe lán ê chèng-kù.

11兩人就hō͘腓利士防守ê兵看見；腓利士人講，希伯來人tùi所bih ê洞出來。Nn̄g-lâng chiū hō͘ Hui-lī-sū hông-siú ê peng khòaⁿ-kìⁿ; Hui-lī-sū lâng kóng, Hi-pek-lâi lâng tùi só͘ bih ê tōng chhut-lâi.

12防守ê兵kā約拿單kap kia̍h伊ê 軍器ê人講，Lín上來阮chia，阮有一項tāi-chì beh報lín；約拿單就kā kia̍h伊ê ke-si ê講，你tè我上去；因為耶和華將in交tī以色列人ê手。Hông-siú ê peng kā Iok-ná-tan kap kia̍h i ê kun-khì ê lâng kóng, Lín chiūⁿ-lâi goán chia, goán ū chi̍t hāng tāi-chì beh pò lín; Iok-ná-tan chiū kā kia̍h i ê ke-si-ê kóng, Lí tè góa chiūⁿ-khì; in-ūi Iâ-hô-hoa chiong in kau tī Í-sek-lia̍t lâng ê chhiú.

13約拿單就用手擒腳踜(lèng)上去，kia̍h伊ê 軍器ê人tè伊。腓利士人倒tī約拿單ê面前，kia̍h伊ê 軍器ê人也tè伊ê後面來thâi in。Iok-ná-tan chiū ēng chhiú-khîⁿ kha-lèng chiūⁿ-khì, kia̍h i ê kun-khì ê lâng tè i. Hui-lī-sū lâng tó tī Iok-ná-tan ê bīn-chêng, kia̍h i ê kun-khì ê lâng iā tè i ê āu-bīn lâi thâi in.

14約拿單kap kia̍h伊ê 軍器ê人起頭所thâi ê，約略二十人，lóng是tī半畝(bó͘)園ê犁溝。Iok-ná-tan kap kia̍h i ê kun-khì ê lâng khí-thâu só͘ thâi ê, iok-lio̍k jī-cha̍p lâng, lóng sī tī pòaⁿ-bó͘ hn̂g ê lôe-kau.

15Tùi án-ni，tī營盤，tī田野，tī眾百姓ê中間，lóng ngia̍uh-ngia̍uh-chhoah；防守ê兵kap搶劫ê兵也lóng ngia̍uh-ngia̍uh-chhoah；地也振動，致到ngia̍uh-ngia̍uh-chhoah到極。Tùi án-ni tī iâⁿ-pôaⁿ, tī chhân-iá, tī chèng peh-sìⁿ ê tiong-kan, lóng ngia̍uh-ngia̍uh-chhoah; hông-siú ê peng kap chhiúⁿ-kiap ê peng iā lóng ngia̍uh-ngia̍uh-chhoah; tōe iā tín-tāng, tì-kàu ngia̍uh-ngia̍uh-chhoah kàu ke̍k.

16Tī便雅憫ê Ki-pí-a，掃羅守望ê兵teh看，看見腓利士ê眾軍兵四散，四界亂亂走。Tī Piān-ngá-bín ê Ki-pí-a, Sò-lô siú-bāng ê peng teh khòaⁿ, khòaⁿ-kìⁿ Hui-lī-sū ê chèng kun-peng sì-sòaⁿ, sì-kòe loān-loān cháu.

17掃羅就kā tè伊ê百姓講，Lín點算，看是誰對咱chia出去；in點算了，就知約拿單kap kia̍h伊ê 軍器ê人無tī-teh。Sò-lô chiū kā tè i ê peh-sìⁿ kóng, Lín tiám-sǹg, khòaⁿ chī-chūi tùi lán chia chhut-khì; in tiám-sǹg liáu, chiū chai Iok-ná-tan kap kia̍h i ê kun-khì ê lâng bô tī-teh.

18掃羅kā A-hi-a講，你tio̍h帶上帝ê約櫃來；因為hit時上帝ê約櫃tī以色列人ê所在。Sò-lô kā A-hi-a kóng, Lí tio̍h tòa Siōng-tè ê iok-kūi lâi; in-ūi hit-sî Siōng-tè ê iok-kūi tī Í-sek-lia̍t lâng ê só͘-chāi.

19掃羅kap祭司講話ê時，腓利士營中hán-hōa ê聲ná久ná大。掃羅就kā祭司講，免動你ê手。Sò-lô kap chè-si kóng-ōe ê sî, Hui-lī-sū iâⁿ-tiong hán-hōa ê siaⁿ ná-kú ná-tōa. Sò-lô chiū kā chè-si kóng, Bián-tāng lí ê chhiú.

20掃羅kap tè伊ê百姓lóng聚集，來到戰場；看見腓利士人ta̍k-ê用刀相殘，真大亂。Sò-lô kap tè i ê peh-sìⁿ lóng chū-chi̍p, lâi kàu chiàn-tiûⁿ; khòaⁿ-kìⁿ Hui-lī-sū lâng ta̍k-ê ēng to saⁿ-chân, chin tōa loān.

21以前óa腓利士人ê希伯來人，tùi四方tè到伊ê營ê，taⁿ也反tńg來幫贊tè掃羅kap約拿單ê以色列人。Í-chêng óa Hui-lī-sū lâng ê Hi-pek-lâi lâng, tùi sì-hng tè kàu i ê iâⁿ ê, taⁿ iā hoán-tńg lâi pang-chān tè Sò-lô kap Iok-ná-tan ê Í-sek-lia̍t lâng.

22Hiah-ê bih tī Í-hoat-liân山地ê以色列人，聽見腓利士人逃走，in就出來jip-óa in ê後面，來交戰。Hiah ê bih tī Í-hoat-liân soaⁿ-tōe ê Í-sek-lia̍t lâng, thiaⁿ-kìⁿ Hui-lī-sū lâng tô-cháu, in chiū chhut-lâi jip-óa in ê āu-bīn, lâi kau-chiàn.

23Hit日耶和華拯救以色列；直直戰到Pek-a-bûn。Hit-ji̍t Iâ-hô-hoa chín-kiù Í-sek-lia̍t; ti̍t-ti̍t chiàn kàu Pek-a-bûn.

24Hit日以色列人真困苦，因為掃羅ǹg百姓chiù-chōa講，無等到日暗，thèng候我報我ê對敵ê冤仇ê事先，食物ê人tio̍h受咒詛；所以百姓無食甚麼。Hit-ji̍t Í-sek-lia̍t lâng chin khùn-khó͘, in-ūi Sò-lô ǹg peh-sìⁿ chiù-chōa kóng, Bô tán kàu ji̍t-àm, thèng-hāu góa pò góa ê tùi-te̍k ê oan-siû ê tāi-seng, chia̍h-mi̍h ê lâng tio̍h siū chiù-chó͘; só͘-í peh-sìⁿ bô chia̍h sím-mi̍h.

25眾百姓入樹林，看見有蜜tī地上。Chèng peh-sìⁿ ji̍p chhiū-nâ, khòaⁿ-kìⁿ ū bi̍t tī tōe-chiūⁿ.

26百姓入樹林，看見有蜜teh滴；總是無人敢用手the̍h入嘴，因為百姓驚hiah-ê chiù-chōa ê話。Peh-sìⁿ ji̍p chhiū-nâ, khòaⁿ-kìⁿ ū bi̍t teh-tih; chóng-sī bô lâng káⁿ ēng chhiú the̍h ji̍p chhùi, in-ūi peh-sìⁿ kiaⁿ hiah ê chiù-chōa ê ōe.

27約拿單無聽見in老父ǹg百姓chiù-chōa，所以伸伊手裡ê柺á尾tuh tī蜜pô͘；伊ê手oat到嘴裡；目睭就金。Iok-ná-tan bô thiaⁿ-kìⁿ in lāu-pē ǹg peh-sìⁿ chiù-chōa, só͘-í chhun i chhiú-nih ê koáiⁿ-á-bé tuh tī bi̍t-pô͘; i ê chhiú oat kàu chhùi-nih; ba̍k-chiu chiū kim.

28百姓中有一人kā伊講，你ê老父ǹg百姓嚴嚴chiù-chōa，講，今á日食甚麼ê，tio̍h受咒詛。百姓就真厭倦。Peh-sìⁿ-tiong ū chi̍t-lâng kā i kóng, Lí ê lāu-pē ǹg peh-sìⁿ giâm-giâm chiù-chōa, kóng, Kin-á-ji̍t chia̍h sím-mi̍h ê, tio̍h siū chiù-chó͘. Peh-sìⁿ chiū chin ià-siān.

29約拿單講，我ê父害tio̍h chit-ê地方；lín看，我試只一點á蜜，目睭就金。Iok-ná-tan kóng, Góa ê pē hāi-tio̍h chit ê tōe-hng; lín khòaⁿ, góa chhì chí chi̍t-tiám-á bi̍t, ba̍k-chiu chiū kim.

30何況百姓今á日若chhut-chāi意思食in所搶對敵ê物，phah死腓利士人kiám無koh khah-chōe mah？Hô-hòng peh-sìⁿ kin-á-ji̍t nā chhut-chāi ì-sù chia̍h in só͘ chhiúⁿ tùi-te̍k ê mi̍h, phah-sí Hui-lī-sū lâng kiám bô koh khah-chōe mah?

31Hit日in phah腓利士人，tùi Bi̍t-boa̍t到A-ngá-lûn；百姓真厭倦。Hit-ji̍t in phah Hui-lī-sū lâng, tùi Bi̍t-boa̍t kàu A-ngá-lûn; peh-sìⁿ chin ià-siān.

32百姓就趕緊走去the̍h所搶ê羊、牛、牛á-kiáⁿ，thâi tī地裡；肉iáu有血，就食伊。Peh-sìⁿ chiū kóaⁿ-kín cháu-khì the̍h só͘ chhiúⁿ ê iûⁿ, gû, gû-á-kiáⁿ, thâi tī tōe-nih; bah iáu ū huih, chiū chia̍h i.

33有人kā掃羅講，百姓得罪耶和華lah，因為in食iáu有血ê肉。伊講，Lín差謬lah；taⁿ tio̍h kō大塊石來我chia。Ū lâng kā Sò-lô kóng, Peh-sìⁿ tek-chōe Iâ-hô-hoa lah, in-ūi in chia̍h iáu ū huih ê bah. I kóng, Lín chha-biū lah; taⁿ tio̍h kō tōa tè chio̍h lâi góa chia.

34掃羅koh講，Lín tio̍h四界行tī百姓ê中間，kā in講，ta̍k人牽in ê牛，ta̍k人牽ê羊，來我chia；tī-chia thâi來食；m̄-thang食iáu有血ê肉，來得罪耶和華。Hit暝百姓ta̍k人牽in ê牛去hia thâi。Sò-lô koh kóng, Lín tio̍h sì-kòe kiâⁿ tī peh-sìⁿ ê tiong-kan, kā in kóng, Ta̍k-lâng khan in ê gû, ta̍k lâng khan in ê iûⁿ, lâi góa chia; tī-chia thâi lâi chia̍h; m̄-thang chia̍h iáu ū huih ê bah, lâi tek-chōe Iâ-hô-hoa. Hit-mî peh-sìⁿ ta̍k-lâng khan in ê gû khì hia thâi.

35掃羅kā耶和華起一座壇；這是伊頭一pái kā耶和華起ê壇。Sò-lô kā Iâ-hô-hoa khí chi̍t chō tôaⁿ; che sī i thâu-chi̍t-pái kā Iâ-hô-hoa khí ê tôaⁿ.

36掃羅講，咱taⁿ tio̍h透暝落去jip腓利士人，搶in，到天光，無留in一人。百姓講，你所看做好ê，就行伊。祭司講，咱tio̍h來chia，親近上帝。Sò-lô kóng, Lán taⁿ tio̍h thàu-mî lo̍h-khì jip Hui-lī-sū lâng, chhiúⁿ in, kàu thiⁿ-kng, bô lâu in chi̍t-lâng. Peh-sìⁿ kóng, Lí só͘ khòaⁿ-chòe hó-ê, chiū kiâⁿ i. Chè-si kóng, Lán tio̍h lâi chia, chhin-kūn Siōng-tè.

37掃羅問上帝講，我tio̍h落去jip腓利士人á m̄免？你beh將in交hō͘以色列ê手mah？hit日上帝無應伊。Sò-lô mn̄g Siōng-tè kóng, Góa tio̍h lo̍h-khì jip Hui-lī-sū lâng á m̄-bián? Lí beh chiong in kau hō͘ Í-sek-lia̍t ê chhiú mah? Hit-ji̍t Siōng-tè bô ìn i.

38掃羅講，Lín百姓中ê序大lóng tio̍h上來chia，查明今á日chit-ê罪是在tī甚麼？Sò-lô kóng, Lín peh-sìⁿ-tiong ê sī-tōa lóng tio̍h chiūⁿ-lâi chia, cha-bêng kin-á-ji̍t chit ê chōe sī chāi-tī sím-mi̍h?

39我kí救以色列永活ê耶和華來講，雖然我ê kiáⁿ約拿單，伊也tio̍h死。總是百姓中無一人應伊。Góa kí kiù Í-sek-lia̍t éng-oa̍h ê Iâ-hô-hoa lâi kóng, Sui-jiân góa ê kiáⁿ Iok-ná-tan, i iā tio̍h sí. Chóng-sī peh-sìⁿ-tiong bô chi̍t-lâng ìn i.

40伊就kā以色列ê眾人講，Lín khiā chit-pêng，我kap我ê kiáⁿ約拿單khiā hit-pêng。百姓對掃羅講，你看做好ê就行伊。I chiū kā Í-sek-lia̍t ê chèng-lâng kóng, Lín khiā chit-pêng, góa kap góa ê kiáⁿ Iok-ná-tan khiā hit-pêng. Peh-sìⁿ tùi Sò-lô kóng, Lí khòaⁿ-chòe hó-ê chiū kiâⁿ i.

41掃羅kā耶和華以色列ê上帝講，求你指示實情；tùi án-ni，liam-tio̍h約拿單kap掃羅，百姓lóng無tāi-chì。Sò-lô kā Iâ-hô-hoa Í-sek-lia̍t ê Siōng-tè kóng, Kiû Lí chí-sī si̍t-chêng; tùi án-ni liam-tio̍h Iok-ná-tan kap Sò-lô, peh-sìⁿ lóng bô tāi-chì.

42掃羅講，Tio̍h tī我kap我ê kiáⁿ約拿單ê中間來liam-khau；就liam-tio̍h約拿單。Sò-lô kóng, Tio̍h tī góa kap góa ê kiáⁿ Iok-ná-tan ê tiong-kan lâi liam-khau; chiū liam-tio̍h Iok-ná-tan.

43掃羅kā約拿單講，你kā我講你做甚麼事。約拿單講，我實在用手裡ê柺á尾ùn一點á蜜來試bāi-teh；án-ni我tio̍h死ah。Sò-lô kā Iok-ná-tan kóng, Lí kā góa kóng lí chòe sím-mi̍h sū. Iok-ná-tan kóng, Góa si̍t-chāi ēng chhiú-nih ê koáiⁿ-á-bé ùn chi̍t-tiám-á bi̍t lâi chhì-bāi-teh; án-ni góa tio̍h sí ah.

44掃羅講，約拿單ah，你的確tio̍h死；願上帝án-ni行，也比án-ni iáu khah重。Sò-lô kóng, Iok-ná-tan ah, lí tek-khak tio̍h sí; goān Siōng-tè án-ni kiâⁿ, iā pí án-ni iáu khah-tāng.

45百姓kā掃羅講，約拿單已經行chit-ê大ê拯救tī以色列ê，伊tio̍h死mah？決斷m̄-thang；阮指永活ê耶和華來講，伊一支頭毛也的確無ka-la̍uh tī地裡，因為伊今á日kap上帝相kap做tāi-chì。Tùi án-ni，百姓救約拿單免死。Peh-sìⁿ kā Sò-lô kóng, Iok-ná-tan í-keng kiâⁿ chit ê tōa ê chín-kiù tī Í-sek-lia̍t ê, i tio̍h sí mah? koat-toàn m̄-thang; goán chí éng-oa̍h ê Iâ-hô-hoa lâi kóng, i chi̍t ki thâu-mn̂g iā tek-khak bô ka-la̍uh tī tōe-nih, in-ūi i kin-á-ji̍t kap Siōng-tè saⁿ-kap chòe tāi-chì. Tùi án-ni peh-sìⁿ kiù Iok-ná-tan bián sí.

46掃羅就上去，無追jip腓利士人。腓利士人也去伊本所在。Sò-lô chiū chiūⁿ-khì, bô tui-jip Hui-lī-sū lâng. Hui-lī-sū lâng iā khì i pún só͘-chāi.

47掃羅掌國ê權柄，治理以色列，去kap四圍lóng總ê對敵交戰，就是攻擊Mô͘-ap人、A-bûn人、Í-tong，kap Só-pa chiah-ê王，kap腓利士人；伊無論所去，lóng khah贏。Sò-lô chiáng kok ê koân-pèng, tī-lí Í-sek-lia̍t, khì kap sì-ûi lóng-chóng ê tùi-te̍k kau-chiàn, chiū-sī kong-kek Mô͘-ap lâng, A-bûn lâng, Í-tong, kap Só-pa chiah ê ông, kap Hui-lī-sū lâng; I bô-lūn só͘ khì, lóng khah-iâⁿ.

48掃羅奮勇攻擊A-má-le̍k人，救以色列脫離搶in ê人ê手。Sò-lô hùn-ióng kong-kek A-má-le̍k lâng, kiù Í-sek-lia̍t thoat-lī chhiúⁿ in ê lâng ê chhiú.

49掃羅ê kiáⁿ是約拿單、E̍k-si-úi、Be̍k-ki-su-a；伊兩個cha-bó͘-kiáⁿ ê名，大ê名叫Bí-la̍h，細ê名叫Bí-kah。Sò-lô ê kiáⁿ sī Iok-ná-tan, E̍k-si-úi, Be̍k-ki-su-a; i nn̄g ê cha-bó͘-kiáⁿ ê miâ, tōa-ê miâ kiò Bí-la̍h, sòe-ê miâ kiò Bí-kah.

50掃羅ê bó͘，名叫A-hi-loán，是A-hi-má-su ê cha-bó͘-kiáⁿ；伊ê軍長，名叫Ap-nî-jíⁿ，是Nî-jíⁿ ê kiáⁿ，Nî-jíⁿ是掃羅ê叔。Sò-lô ê bó͘, miâ kiò A-hi-loán, sī A-hi-má-su ê cha-bó͘-kiáⁿ; i ê kun-tiúⁿ, miâ kiò Ap-nî-jíⁿ, sī Nî-jíⁿ ê kiáⁿ, Nî-jíⁿ sī Sò-lô ê chek.

51掃羅ê老父Ki-sū；Ap-nî-jíⁿ ê老父Nî-jíⁿ，就是A-piat ê kiáⁿ。Sò-lô ê lāu-pē Ki-sū; Ap-nî-jíⁿ ê lāu-pē Nî-jíⁿ, chiū-sī A-piat ê kiáⁿ.

52掃羅一生常常kap腓利士人大交戰；掃羅見若看見有能力ê人，á是勇士，就招集來óa伊。Sò-lô it-seng siông-siông kap Hui-lī-sū lâng tōa kau-chiàn; Sò-lô kìⁿ-nā khòaⁿ-kìⁿ ū lêng-le̍k ê lâng, á-sī ióng-sū, chiū chio-chi̍p lâi óa i.

1撒母耳kā掃羅講，耶和華差我用油抹你，設立你做王，治理伊ê百姓以色列，所以你tio̍h聽耶和華所講ê話。Sat-bó͘-jíⁿ kā Sò-lô kóng, Iâ-hô-hoa chhe góa ēng iû boah lí, siat-li̍p lí chòe-ông, tī-lí I ê peh-sìⁿ Í-sek-lia̍t, só͘-í lí tio̍h thiaⁿ Iâ-hô-hoa só͘ kóng ê ōe.

2萬軍ê耶和華án-ni講，以色列人出埃及ê時，A-má-le̍k人怎樣款待in，怎樣截(chia̍t)in ê路，我lóng記得；Bān-kun ê Iâ-hô-hoa án-ni kóng, Í-sek-lia̍t lâng chhut Ai-ki̍p ê sî, A-má-le̍k lâng cháiⁿ-iūⁿ khoán-thāi in, cháiⁿ-iūⁿ chia̍t in ê lō͘, Góa lóng kì-tit;

3taⁿ你tio̍h去phah A-má-le̍k，一盡滅無in所有ê，莫得保惜in；將男、女、gín-ná、食奶ê，kap牛、羊、駱駝，kap驢，一盡thâi死in。taⁿ lí tio̍h khì phah A-má-le̍k, it-chīn bia̍t-bô in só͘-ū-ê, bo̍h-tit pó-sioh in; chiong lâm, lú, gín-ná, chia̍h-lin-ê, kap gû, iûⁿ, lo̍k-tô, kap lû, it-chīn thâi-sí in.

4掃羅就招集百姓tī Thê-la̍h-in，點算in，共步兵二十萬，猶大人一萬。Sò-lô chiū chio-chi̍p peh-sìⁿ tī Thê-la̍h-in, tiám-sǹg in, kiōng pō͘-peng jī-cha̍p bān, Iû-tāi lâng chi̍t-bān.

5掃羅到A-má-le̍k ê城，埋伏tī山谷中。Sò-lô kàu A-má-le̍k ê siâⁿ, bâi-ho̍k tī soaⁿ-kok-tiong.

6掃羅kā Ki-nî人講，Lín落去離開A-má-le̍k人，免得我將lín kap in做一下剿滅；因為以色列人出埃及ê時，lín bat好款待in；tùi án-ni，Ki-nî人離開A-má-le̍k人去。Sò-lô kā Ki-nî lâng kóng, Lín lo̍h-khì lī-khui A-má-le̍k lâng, bián-tit góa chiong lín kap in chòe-chi̍t-ē châu-bia̍t; in-ūi Í-sek-lia̍t lâng chhut Ai-ki̍p ê sî, lín bat hó khoán-thāi in; tùi án-ni Ki-nî lâng lī-khui A-má-le̍k lâng khì.

7掃羅phah A-má-le̍k人，tùi Hap-hui-la̍h到埃及頭前ê Su-jíⁿ。Sò-lô phah A-má-le̍k lâng, tùi Hap-hui-la̍h kàu Ai-ki̍p thâu-chêng ê Su-jíⁿ.

8伊活活掠A-má-le̍k王A-kah，用刀一盡thâi死伊ê眾百姓。I oa̍h-oa̍h lia̍h A-má-le̍k ông A-kah, ēng to it-chīn thâi-sí i ê chèng peh-sìⁿ.

9總是掃羅kap百姓保惜A-kah，也保惜siōng好ê羊、牛、牛á、羊á，kap一切好ê物，m̄肯剿滅伊；見若下賤m̄成物ê，lóng一盡thâi死。Chóng-sī Sò-lô kap peh-sìⁿ pó-sioh A-kah, iā pó-sioh siōng-hó ê iûⁿ, gû, gû-á, iûⁿ-á, kap it-chhè hó ê mi̍h, m̄-khéng châu-bia̍t i; kìⁿ-nā hā-chiān m̄-chiâⁿ-mi̍h-ê, lóng it-chīn thâi-sí.

10Hit時耶和華ê話臨到撒母耳講，Hit-sî Iâ-hô-hoa ê ōe lîm-kàu Sat-bó͘-jíⁿ kóng,

11我為tio̍h設立掃羅做王來退悔，因為伊oa̍t-tńg去無tè我，無遵守我ê命令。撒母耳真慼心，thong暝求耶和華。Góa ūi-tio̍h siat-li̍p Sò-lô chòe-ông lâi thè-hóe, in-ūi I oa̍t-tńg-khì bô tè Góa, bô chun-siú Góa ê bēng-lēng. Sat-bó͘-jíⁿ chin chhoeh-sim, thong-mî kiû Iâ-hô-hoa.

12撒母耳隔早起，透早beh去迎接掃羅；有人kā撒母耳講，掃羅到Ka-bi̍t，tī-hia為家己khiā石碑，koh oa̍t-tńg過去，落到Kiat-kah。Sat-bó͘-jíⁿ keh chá-khí, thàu-chá beh khì ngiâ-chih Sò-lô; ū lâng kā Sat-bó͘-jíⁿ kóng, Sò-lô kàu Ka-bi̍t, tī-hia ūi ka-kī khiā chio̍h-pi, koh oa̍t-tńg kè-khì, lo̍h kàu Kiat-kah.

13撒母耳到掃羅hia，掃羅kā伊講，願耶和華賜福你，我已經遵守耶和華ê命令lah。Sat-bó͘-jíⁿ kàu Sò-lô hia, Sò-lô kā i kóng, Goān Iâ-hô-hoa sù-hok lí, góa í-keng chun-siú Iâ-hô-hoa ê bēng-lēng lah.

14撒母耳講，Án-ni，就chit-ê羊me̍h-me̍h哮入我ê耳孔，kap我所聽牛teh mā，是甚麼因端？Sat-bó͘-jíⁿ kóng, Án-ni, chiū chit ê iûⁿ me̍h-me̍h-háu ji̍p góa ê hī-khang, kap góa só͘ thiaⁿ gû teh mā, sī sím-mi̍h in-toaⁿ?

15掃羅講，In tùi A-má-le̍k人hia帶來ê；因為百姓保惜siōng好ê羊、牛，beh獻hō͘耶和華你ê上帝；其餘ê阮lóng剿滅。Sò-lô kóng, In tùi A-má-le̍k lâng hia tòa-lâi-ê; in-ūi peh-sìⁿ pó-sioh siōng-hó ê iûⁿ, gû, beh hiàn hō͘ Iâ-hô-hoa lí ê Siōng-tè; kî-û-ê goán lóng châu-bia̍t.

16撒母耳kā掃羅講，你恬恬，我beh將耶和華昨暝所kā我講ê，kā你講。伊kā伊講，請講。Sat-bó͘-jíⁿ kā Sò-lô kóng, Lí tiām-tiām, góa beh chiong Iâ-hô-hoa chā-mî só͘ kā góa kóng ê, kā lí kóng. I kā i kóng, Chhiáⁿ kóng.

17撒母耳講，早你雖然家己看做微細，kiám m̄是受設立做以色列支派ê頭mah？耶和華用油抹你做王，來治理以色列；Sat-bó͘-jíⁿ kóng, Chá lí sui-jiân ka-kī khòaⁿ chòe bî-sòe, kiám m̄-sī siū siat-li̍p chòe Í-sek-lia̍t chi-phài ê thâu mah? Iâ-hô-hoa ēng iû boah lí chòe ông, lâi tī-lí Í-sek-lia̍t;

18koh耶和華差你起身去，吩咐你講，A-má-le̍k人是有罪ê人，你去一盡剿滅伊，koh kap in交戰，到in lóng滅；koh Iâ-hô-hoa chhe lí khí-sin khì, hoan-hù lí kóng, A-má-le̍k lâng sī ū-chōe ê lâng, lí khì it-chīn châu-bia̍t i, koh kap in kau-chiàn, kàu in lóng bia̍t;

19你啥事無thàn耶和華ê話，趕緊去搶物，行耶和華所看做pháiⁿ ê事ah？lí siáⁿ-sū bô thàn Iâ-hô-hoa ê ōe, kóaⁿ-kín khì chhiúⁿ-mi̍h, kiâⁿ Iâ-hô-hoa só͘ khòaⁿ-chòe pháiⁿ ê sū ah?

20掃羅kā撒母耳講，我實在有聽thàn耶和華ê命令，行耶和華所差我行ê路，掠A-má-le̍k王A-kah來，一盡滅A-má-le̍k人；Sò-lô kā Sat-bó͘-jíⁿ kóng, Góa si̍t-chāi ū thiaⁿ-thàn Iâ-hô-hoa ê bēng-lēng, kiâⁿ Iâ-hô-hoa só͘ chhe góa kiâⁿ ê lō͘, lia̍h A-má-le̍k ông A-kah lâi, it-chīn bia̍t A-má-le̍k lâng;

21獨獨百姓tùi所搶ê物ê中間，取羊、牛，應該獻ê物ê siōng好ê，beh tī Kiat-kah祭獻耶和華你ê上帝。to̍k-to̍k peh-sìⁿ tùi só͘ chhiúⁿ ê mi̍h ê tiong-kan, chhú iûⁿ, gû, eng-kai hiàn ê mi̍h ê siōng-hó ê, beh tī Kiat-kah chè-hiàn Iâ-hô-hoa lí ê Siōng-tè.

22撒母耳講，耶和華歡喜燒祭祭祀，kiám親像歡喜人遵thàn耶和華ê話mah？看ah，遵thàn贏過獻祭，聽thàn是贏過羊káng ê油。Sat-bó͘-jíⁿ kóng, Iâ-hô-hoa hoaⁿ-hí sio-chè chè-sū, kiám chhin-chhiūⁿ hoaⁿ-hí lâng chun-thàn Iâ-hô-hoa ê ōe mah? Khòaⁿ ah, chun-thàn iâⁿ-kè hiàn-chè, thiaⁿ-thàn sī iâⁿ-kè iûⁿ-káng ê iû.

23因為背叛是親像行邪術ê罪，硬心是親像服事虛假，親像拜偶像；為tio̍h你棄sak耶和華ê話，伊也棄sak你，無hō͘你做王。In-ūi pōe-poān sī chhin-chhiūⁿ kiâⁿ siâ-su̍t ê chōe, ngī-sim sī chhin-chhiūⁿ ho̍k-sāi hu-ké, chhin-chhiūⁿ pài ngó͘-siōng; ūi-tio̍h lí khì-sak Iâ-hô-hoa ê ōe, I iā khì-sak lí, bô hō͘ lí chòe-ông.

24掃羅對撒母耳講，我有罪，因為我有犯tio̍h耶和華ê命令kap你ê話，是tùi我驚百姓，聽in ê話。Sò-lô tùi Sat-bó͘-jíⁿ kóng, Góa ū-chōe, in-ūi góa ū hoān-tio̍h Iâ-hô-hoa ê bēng-lēng kap lí ê ōe, sī tùi góa kiaⁿ peh-sìⁿ, thiaⁿ in ê ōe.

25Taⁿ求你赦免我ê罪，kap我tò去，hō͘我thang敬拜耶和華。Taⁿ kiû lí sià-bián góa ê chōe, kap góa tò-khì, hō͘ góa thang kèng-pài Iâ-hô-hoa.

26撒母耳kā掃羅講，我m̄ kap你tò去；因為你棄sak耶和華ê命令，耶和華也棄sak你，無hō͘你做以色列ê王。Sat-bó͘-jíⁿ kā Sò-lô kóng, Góa m̄ kap lí tò-khì; in-ūi lí khì-sak Iâ-hô-hoa ê bēng-lēng, Iâ-hô-hoa iā khì-sak lí, bô hō͘ lí chòe Í-sek-lia̍t ê ông.

27撒母耳oa̍t-tńg身beh去，掃羅就khiú伊ê衫á裾，衫就拆斷。Sat-bó͘-jíⁿ oa̍t-tńg-sin beh khì, Sò-lô chiū khiú I ê saⁿ-á-ku, saⁿ chiū thiah-tn̄g.

28撒母耳kā伊講，今á日耶和華hō͘以色列國kap你絕斷，也是án-ni，將伊賞賜你ê厝邊ê一個，比你khah好ê。Sat-bó͘-jíⁿ kā i kóng, Kin-á-ji̍t Iâ-hô-hoa hō͘ Í-sek-lia̍t kok kap lí choa̍t-tn̄g, iā sī án-ni, chiong i siúⁿ-sù lí ê chhù-piⁿ ê chi̍t-ê, pí lí khah-hó-ê.

29以色列ê大顯赫(hián-hek)ê，無白賊，也無退悔；因為伊m̄是世間人，有退悔。Í-sek-lia̍t ê tōa hián-hek ê, bô pe̍h-chha̍t, iā bô thè-hóe; in-ūi I m̄-sī sè-kan lâng, ū thè-hóe.

30掃羅講，我有罪；雖然án-ni，求你尊重我tī我ê百姓ê長老kap以色列人ê面前，kap我tò去，hō͘我敬拜耶和華你ê上帝。Sò-lô kóng, Góa ū chōe; sui-jiân án-ni, kiû lí chun-tiōng góa tī góa ê peh-sìⁿ ê tióng-ló kap Í-sek-lia̍t lâng ê bīn-chêng, kap góa tò-khì, hō͘ góa kèng-pài Iâ-hô-hoa lí ê Siōng-tè.

31撒母耳就oa̍t-tńg身tè掃羅去；掃羅就敬拜耶和華。Sat-bó͘-jíⁿ chiū oa̍t-tńg-sin tè Sò-lô khì; Sò-lô chiū kèng-pài Iâ-hô-hoa.

32撒母耳講，Lín tio̍h帶A-má-le̍k王A-kah來我chia。A-kah就安心來到伊ê面前；A-kah講，死無ê艱苦的確過去lah。Sat-bó͘-jíⁿ kóng, Lín tio̍h tòa A-má-le̍k ông A-kah lâi góa chia. A-kah chiū an-sim lâi kàu i ê bīn-chêng; A-kah kóng, Sí-bô ê kan-khó͘ tek-khak kè-khì lah.

33撒母耳講，你ê刀bat hō͘婦人人無kiáⁿ，án-ni你ê老母tī婦人人中也beh無kiáⁿ；tùi án-ni，撒母耳tī Kiat-kah，耶和華ê面前，將A-kah破kui塊。Sat-bó͘-jíⁿ kóng, Lí ê to bat hō͘ hū-jîn-lâng bô kiáⁿ, án-ni lí ê lāu-bú tī hū-jîn-lâng tiong iā beh bô kiáⁿ; tùi án-ni Sat-bó͘-jíⁿ tī Kiat-kah, Iâ-hô-hoa ê bīn-chêng, chiong A-kah phòa kui-tè.

34撒母耳去La̍h-má；掃羅上去伊ê厝，到掃羅ê Ki-pí-a。Sat-bó͘-jíⁿ khì La̍h-má; Sò-lô chiūⁿ-khì i ê chhù, kàu Sò-lô ê Ki-pí-a.

35撒母耳到伊死ê日，無koh來見掃羅；因為撒母耳為tio̍h掃羅憂悶。耶和華因為設立掃羅做以色列王也退悔。Sat-bó͘-jíⁿ kàu i sí ê ji̍t, bô koh lâi kìⁿ Sò-lô; in-ūi Sat-bó͘-jíⁿ ūi-tio̍h Sò-lô iu-būn. Iâ-hô-hoa in-ūi siat-li̍p Sò-lô chòe Í-sek-lia̍t ông iā thè-hóe.