1撒母耳kā掃羅講，耶和華差我用油抹你，設立你做王，治理伊ê百姓以色列，所以你tio̍h聽耶和華所講ê話。Sat-bó͘-jíⁿ kā Sò-lô kóng, Iâ-hô-hoa chhe góa ēng iû boah lí, siat-li̍p lí chòe-ông, tī-lí I ê peh-sìⁿ Í-sek-lia̍t, só͘-í lí tio̍h thiaⁿ Iâ-hô-hoa só͘ kóng ê ōe.

2萬軍ê耶和華án-ni講，以色列人出埃及ê時，A-má-le̍k人怎樣款待in，怎樣截(chia̍t)in ê路，我lóng記得；Bān-kun ê Iâ-hô-hoa án-ni kóng, Í-sek-lia̍t lâng chhut Ai-ki̍p ê sî, A-má-le̍k lâng cháiⁿ-iūⁿ khoán-thāi in, cháiⁿ-iūⁿ chia̍t in ê lō͘, Góa lóng kì-tit;

3taⁿ你tio̍h去phah A-má-le̍k，一盡滅無in所有ê，莫得保惜in；將男、女、gín-ná、食奶ê，kap牛、羊、駱駝，kap驢，一盡thâi死in。taⁿ lí tio̍h khì phah A-má-le̍k, it-chīn bia̍t-bô in só͘-ū-ê, bo̍h-tit pó-sioh in; chiong lâm, lú, gín-ná, chia̍h-lin-ê, kap gû, iûⁿ, lo̍k-tô, kap lû, it-chīn thâi-sí in.

4掃羅就招集百姓tī Thê-la̍h-in，點算in，共步兵二十萬，猶大人一萬。Sò-lô chiū chio-chi̍p peh-sìⁿ tī Thê-la̍h-in, tiám-sǹg in, kiōng pō͘-peng jī-cha̍p bān, Iû-tāi lâng chi̍t-bān.

5掃羅到A-má-le̍k ê城，埋伏tī山谷中。Sò-lô kàu A-má-le̍k ê siâⁿ, bâi-ho̍k tī soaⁿ-kok-tiong.

6掃羅kā Ki-nî人講，Lín落去離開A-má-le̍k人，免得我將lín kap in做一下剿滅；因為以色列人出埃及ê時，lín bat好款待in；tùi án-ni，Ki-nî人離開A-má-le̍k人去。Sò-lô kā Ki-nî lâng kóng, Lín lo̍h-khì lī-khui A-má-le̍k lâng, bián-tit góa chiong lín kap in chòe-chi̍t-ē châu-bia̍t; in-ūi Í-sek-lia̍t lâng chhut Ai-ki̍p ê sî, lín bat hó khoán-thāi in; tùi án-ni Ki-nî lâng lī-khui A-má-le̍k lâng khì.

7掃羅phah A-má-le̍k人，tùi Hap-hui-la̍h到埃及頭前ê Su-jíⁿ。Sò-lô phah A-má-le̍k lâng, tùi Hap-hui-la̍h kàu Ai-ki̍p thâu-chêng ê Su-jíⁿ.

8伊活活掠A-má-le̍k王A-kah，用刀一盡thâi死伊ê眾百姓。I oa̍h-oa̍h lia̍h A-má-le̍k ông A-kah, ēng to it-chīn thâi-sí i ê chèng peh-sìⁿ.

9總是掃羅kap百姓保惜A-kah，也保惜siōng好ê羊、牛、牛á、羊á，kap一切好ê物，m̄肯剿滅伊；見若下賤m̄成物ê，lóng一盡thâi死。Chóng-sī Sò-lô kap peh-sìⁿ pó-sioh A-kah, iā pó-sioh siōng-hó ê iûⁿ, gû, gû-á, iûⁿ-á, kap it-chhè hó ê mi̍h, m̄-khéng châu-bia̍t i; kìⁿ-nā hā-chiān m̄-chiâⁿ-mi̍h-ê, lóng it-chīn thâi-sí.

10Hit時耶和華ê話臨到撒母耳講，Hit-sî Iâ-hô-hoa ê ōe lîm-kàu Sat-bó͘-jíⁿ kóng,

11我為tio̍h設立掃羅做王來退悔，因為伊oa̍t-tńg去無tè我，無遵守我ê命令。撒母耳真慼心，thong暝求耶和華。Góa ūi-tio̍h siat-li̍p Sò-lô chòe-ông lâi thè-hóe, in-ūi I oa̍t-tńg-khì bô tè Góa, bô chun-siú Góa ê bēng-lēng. Sat-bó͘-jíⁿ chin chhoeh-sim, thong-mî kiû Iâ-hô-hoa.

12撒母耳隔早起，透早beh去迎接掃羅；有人kā撒母耳講，掃羅到Ka-bi̍t，tī-hia為家己khiā石碑，koh oa̍t-tńg過去，落到Kiat-kah。Sat-bó͘-jíⁿ keh chá-khí, thàu-chá beh khì ngiâ-chih Sò-lô; ū lâng kā Sat-bó͘-jíⁿ kóng, Sò-lô kàu Ka-bi̍t, tī-hia ūi ka-kī khiā chio̍h-pi, koh oa̍t-tńg kè-khì, lo̍h kàu Kiat-kah.

13撒母耳到掃羅hia，掃羅kā伊講，願耶和華賜福你，我已經遵守耶和華ê命令lah。Sat-bó͘-jíⁿ kàu Sò-lô hia, Sò-lô kā i kóng, Goān Iâ-hô-hoa sù-hok lí, góa í-keng chun-siú Iâ-hô-hoa ê bēng-lēng lah.

14撒母耳講，Án-ni，就chit-ê羊me̍h-me̍h哮入我ê耳孔，kap我所聽牛teh mā，是甚麼因端？Sat-bó͘-jíⁿ kóng, Án-ni, chiū chit ê iûⁿ me̍h-me̍h-háu ji̍p góa ê hī-khang, kap góa só͘ thiaⁿ gû teh mā, sī sím-mi̍h in-toaⁿ?

15掃羅講，In tùi A-má-le̍k人hia帶來ê；因為百姓保惜siōng好ê羊、牛，beh獻hō͘耶和華你ê上帝；其餘ê阮lóng剿滅。Sò-lô kóng, In tùi A-má-le̍k lâng hia tòa-lâi-ê; in-ūi peh-sìⁿ pó-sioh siōng-hó ê iûⁿ, gû, beh hiàn hō͘ Iâ-hô-hoa lí ê Siōng-tè; kî-û-ê goán lóng châu-bia̍t.

16撒母耳kā掃羅講，你恬恬，我beh將耶和華昨暝所kā我講ê，kā你講。伊kā伊講，請講。Sat-bó͘-jíⁿ kā Sò-lô kóng, Lí tiām-tiām, góa beh chiong Iâ-hô-hoa chā-mî só͘ kā góa kóng ê, kā lí kóng. I kā i kóng, Chhiáⁿ kóng.

17撒母耳講，早你雖然家己看做微細，kiám m̄是受設立做以色列支派ê頭mah？耶和華用油抹你做王，來治理以色列；Sat-bó͘-jíⁿ kóng, Chá lí sui-jiân ka-kī khòaⁿ chòe bî-sòe, kiám m̄-sī siū siat-li̍p chòe Í-sek-lia̍t chi-phài ê thâu mah? Iâ-hô-hoa ēng iû boah lí chòe ông, lâi tī-lí Í-sek-lia̍t;

18koh耶和華差你起身去，吩咐你講，A-má-le̍k人是有罪ê人，你去一盡剿滅伊，koh kap in交戰，到in lóng滅；koh Iâ-hô-hoa chhe lí khí-sin khì, hoan-hù lí kóng, A-má-le̍k lâng sī ū-chōe ê lâng, lí khì it-chīn châu-bia̍t i, koh kap in kau-chiàn, kàu in lóng bia̍t;

19你啥事無thàn耶和華ê話，趕緊去搶物，行耶和華所看做pháiⁿ ê事ah？lí siáⁿ-sū bô thàn Iâ-hô-hoa ê ōe, kóaⁿ-kín khì chhiúⁿ-mi̍h, kiâⁿ Iâ-hô-hoa só͘ khòaⁿ-chòe pháiⁿ ê sū ah?

20掃羅kā撒母耳講，我實在有聽thàn耶和華ê命令，行耶和華所差我行ê路，掠A-má-le̍k王A-kah來，一盡滅A-má-le̍k人；Sò-lô kā Sat-bó͘-jíⁿ kóng, Góa si̍t-chāi ū thiaⁿ-thàn Iâ-hô-hoa ê bēng-lēng, kiâⁿ Iâ-hô-hoa só͘ chhe góa kiâⁿ ê lō͘, lia̍h A-má-le̍k ông A-kah lâi, it-chīn bia̍t A-má-le̍k lâng;

21獨獨百姓tùi所搶ê物ê中間，取羊、牛，應該獻ê物ê siōng好ê，beh tī Kiat-kah祭獻耶和華你ê上帝。to̍k-to̍k peh-sìⁿ tùi só͘ chhiúⁿ ê mi̍h ê tiong-kan, chhú iûⁿ, gû, eng-kai hiàn ê mi̍h ê siōng-hó ê, beh tī Kiat-kah chè-hiàn Iâ-hô-hoa lí ê Siōng-tè.

22撒母耳講，耶和華歡喜燒祭祭祀，kiám親像歡喜人遵thàn耶和華ê話mah？看ah，遵thàn贏過獻祭，聽thàn是贏過羊káng ê油。Sat-bó͘-jíⁿ kóng, Iâ-hô-hoa hoaⁿ-hí sio-chè chè-sū, kiám chhin-chhiūⁿ hoaⁿ-hí lâng chun-thàn Iâ-hô-hoa ê ōe mah? Khòaⁿ ah, chun-thàn iâⁿ-kè hiàn-chè, thiaⁿ-thàn sī iâⁿ-kè iûⁿ-káng ê iû.

23因為背叛是親像行邪術ê罪，硬心是親像服事虛假，親像拜偶像；為tio̍h你棄sak耶和華ê話，伊也棄sak你，無hō͘你做王。In-ūi pōe-poān sī chhin-chhiūⁿ kiâⁿ siâ-su̍t ê chōe, ngī-sim sī chhin-chhiūⁿ ho̍k-sāi hu-ké, chhin-chhiūⁿ pài ngó͘-siōng; ūi-tio̍h lí khì-sak Iâ-hô-hoa ê ōe, I iā khì-sak lí, bô hō͘ lí chòe-ông.

24掃羅對撒母耳講，我有罪，因為我有犯tio̍h耶和華ê命令kap你ê話，是tùi我驚百姓，聽in ê話。Sò-lô tùi Sat-bó͘-jíⁿ kóng, Góa ū-chōe, in-ūi góa ū hoān-tio̍h Iâ-hô-hoa ê bēng-lēng kap lí ê ōe, sī tùi góa kiaⁿ peh-sìⁿ, thiaⁿ in ê ōe.

25Taⁿ求你赦免我ê罪，kap我tò去，hō͘我thang敬拜耶和華。Taⁿ kiû lí sià-bián góa ê chōe, kap góa tò-khì, hō͘ góa thang kèng-pài Iâ-hô-hoa.

26撒母耳kā掃羅講，我m̄ kap你tò去；因為你棄sak耶和華ê命令，耶和華也棄sak你，無hō͘你做以色列ê王。Sat-bó͘-jíⁿ kā Sò-lô kóng, Góa m̄ kap lí tò-khì; in-ūi lí khì-sak Iâ-hô-hoa ê bēng-lēng, Iâ-hô-hoa iā khì-sak lí, bô hō͘ lí chòe Í-sek-lia̍t ê ông.

27撒母耳oa̍t-tńg身beh去，掃羅就khiú伊ê衫á裾，衫就拆斷。Sat-bó͘-jíⁿ oa̍t-tńg-sin beh khì, Sò-lô chiū khiú I ê saⁿ-á-ku, saⁿ chiū thiah-tn̄g.

28撒母耳kā伊講，今á日耶和華hō͘以色列國kap你絕斷，也是án-ni，將伊賞賜你ê厝邊ê一個，比你khah好ê。Sat-bó͘-jíⁿ kā i kóng, Kin-á-ji̍t Iâ-hô-hoa hō͘ Í-sek-lia̍t kok kap lí choa̍t-tn̄g, iā sī án-ni, chiong i siúⁿ-sù lí ê chhù-piⁿ ê chi̍t-ê, pí lí khah-hó-ê.

29以色列ê大顯赫(hián-hek)ê，無白賊，也無退悔；因為伊m̄是世間人，有退悔。Í-sek-lia̍t ê tōa hián-hek ê, bô pe̍h-chha̍t, iā bô thè-hóe; in-ūi I m̄-sī sè-kan lâng, ū thè-hóe.

30掃羅講，我有罪；雖然án-ni，求你尊重我tī我ê百姓ê長老kap以色列人ê面前，kap我tò去，hō͘我敬拜耶和華你ê上帝。Sò-lô kóng, Góa ū chōe; sui-jiân án-ni, kiû lí chun-tiōng góa tī góa ê peh-sìⁿ ê tióng-ló kap Í-sek-lia̍t lâng ê bīn-chêng, kap góa tò-khì, hō͘ góa kèng-pài Iâ-hô-hoa lí ê Siōng-tè.

31撒母耳就oa̍t-tńg身tè掃羅去；掃羅就敬拜耶和華。Sat-bó͘-jíⁿ chiū oa̍t-tńg-sin tè Sò-lô khì; Sò-lô chiū kèng-pài Iâ-hô-hoa.

32撒母耳講，Lín tio̍h帶A-má-le̍k王A-kah來我chia。A-kah就安心來到伊ê面前；A-kah講，死無ê艱苦的確過去lah。Sat-bó͘-jíⁿ kóng, Lín tio̍h tòa A-má-le̍k ông A-kah lâi góa chia. A-kah chiū an-sim lâi kàu i ê bīn-chêng; A-kah kóng, Sí-bô ê kan-khó͘ tek-khak kè-khì lah.

33撒母耳講，你ê刀bat hō͘婦人人無kiáⁿ，án-ni你ê老母tī婦人人中也beh無kiáⁿ；tùi án-ni，撒母耳tī Kiat-kah，耶和華ê面前，將A-kah破kui塊。Sat-bó͘-jíⁿ kóng, Lí ê to bat hō͘ hū-jîn-lâng bô kiáⁿ, án-ni lí ê lāu-bú tī hū-jîn-lâng tiong iā beh bô kiáⁿ; tùi án-ni Sat-bó͘-jíⁿ tī Kiat-kah, Iâ-hô-hoa ê bīn-chêng, chiong A-kah phòa kui-tè.

34撒母耳去La̍h-má；掃羅上去伊ê厝，到掃羅ê Ki-pí-a。Sat-bó͘-jíⁿ khì La̍h-má; Sò-lô chiūⁿ-khì i ê chhù, kàu Sò-lô ê Ki-pí-a.

35撒母耳到伊死ê日，無koh來見掃羅；因為撒母耳為tio̍h掃羅憂悶。耶和華因為設立掃羅做以色列王也退悔。Sat-bó͘-jíⁿ kàu i sí ê ji̍t, bô koh lâi kìⁿ Sò-lô; in-ūi Sat-bó͘-jíⁿ ūi-tio̍h Sò-lô iu-būn. Iâ-hô-hoa in-ūi siat-li̍p Sò-lô chòe Í-sek-lia̍t ông iā thè-hóe.

1耶和華kā撒母耳講，我已經棄sak掃羅，無hō͘伊做以色列王，你為tio̍h伊憂悶beh到jōa久ah？你tio̍h用角貯油滿滿；去ah，我beh差你去伯利恆人耶西hia；因為我tī伊ê kiáⁿ ê中間備辦一個王。Iâ-hô-hoa kā Sat-bó͘-jíⁿ kóng, Góa í-keng khì-sak Sò-lô, bô hō͘ i chòe Í-sek-lia̍t ông, lí ūi-tio̍h i iu-būn beh kàu jōa-kú ah? Lí tio̍h ēng kak tóe iû móa-móa; khì ah, Góa beh chhe lí khì Pek-lī-hêng lâng Iâ-se hia; in-ūi Góa tī i ê kiáⁿ ê tiong-kan pī-pān chi̍t ê ông.

2撒母耳講，我怎樣thang去？掃羅若聽見，伊beh thâi我。耶和華講，你thang帶一隻牛á kap你去，就講，我來是beh祭獻耶和華。Sat-bó͘-jíⁿ kóng, Góa cháiⁿ-iūⁿ thang khì? Sò-lô nā thiaⁿ-kìⁿ, i beh thâi góa. Iâ-hô-hoa kóng, Lí thang tòa chi̍t chiah gû-á kap lí khì, chiū kóng, Góa lâi sī beh chè-hiàn Iâ-hô-hoa.

3你tio̍h請耶西來赴chit-ê祭祀；我beh指示你所應該行ê事；我所指示你ê人，你tio̍h替我kā伊抹油。Lí tio̍h chhiáⁿ Iâ-se lâi hù chit ê chè-sū; Góa beh chí-sī lí só͘ eng-kai kiâⁿ ê sū; Góa só͘ chí-sī lí ê lâng, lí tio̍h thòe Góa kā i boah-iû.

4撒母耳就照耶和華ê話去行，到伯利恆；城裡hiah-ê長老lóng ngia̍uh-ngia̍uh-chhoah，出來迎接伊講，你來是為tio̍h平安mah？Sat-bó͘-jíⁿ chiū chiàu Iâ-hô-hoa ê ōe khì kiâⁿ, kàu Pek-lī-hêng; siâⁿ-nih hiah ê tiúⁿ-ló lóng ngia̍uh-ngia̍uh-chhoah, chhut-lâi ngiâ-chih i kóng, Lí lâi sī ūi-tio̍h pêng-an mah?

5伊講，為tio̍h平安；我是beh祭獻耶和華；lín tio̍h清氣家己，來kap我赴祭祀。撒母耳就hō͘耶西kap伊hiah-ê kiáⁿ清氣，叫in來赴祭祀。I kóng, Ūi-tio̍h pêng-an; góa sī beh chè-hiàn Iâ-hô-hoa; lín tio̍h chheng-khì ka-kī, lâi kap góa hù chè-sū. Sat-bó͘-jíⁿ chiū hō͘ Iâ-se kap i hiah ê kiáⁿ chheng-khì, kiò in lâi hù chè-sū.

6In已經來，撒母耳看見Í-lī-ap，意思講，耶和華所beh抹油ê，果然tī伊ê面前。In í-keng lâi, Sat-bó͘-jíⁿ khòaⁿ-kìⁿ Í-lī-ap, ì-sù kóng, Iâ-hô-hoa só͘ beh boah-iû-ê, kó-jiân tī I ê bīn-chêng.

7總是耶和華kā撒母耳講，莫得看伊ê容貌，kap伊身軀ê大漢；chit人是我所拒絕；因為耶和華teh看無親像人teh看；人看外貌，耶和華是看心內。Chóng-sī Iâ-hô-hoa kā Sat-bó͘-jíⁿ kóng, Bo̍h-tit khòaⁿ i ê iông-māu, kap i seng-khu ê tōa-hàn; chit-lâng sī Góa só͘ kū-choa̍t; in-ūi Iâ-hô-hoa teh khòaⁿ bô chhin-chhiūⁿ lâng teh khòaⁿ; lâng khòaⁿ gōa-māu, Iâ-hô-hoa sī khòaⁿ sim-lāi.

8耶西叫A-pí-ná-ta̍t，hō͘伊tùi撒母耳ê面前經過；撒母耳講，耶和華也無揀chit人。Iâ-se kiò A-pí-ná-ta̍t, hō͘ i tùi Sat-bó͘-jíⁿ ê bīn-chêng keng-kè; Sat-bó͘-jíⁿ kóng, Iâ-hô-hoa iā bô kéng chit-lâng.

9耶西koh叫Sa-má經過；伊講，耶和華也無揀chit-ê。Iâ-se koh kiò Sa-má keng-kè; i kóng, Iâ-hô-hoa iā bô kéng chit-ê.

10耶西hō͘伊hiah-ê kiáⁿ七個，lóng tùi撒母耳ê面前經過。撒母耳kā耶西講，耶和華也無揀chiah-ê。Iâ-se hō͘ i hiah ê kiáⁿ chhit-ê, lóng tùi Sat-bó͘-jíⁿ ê bīn-chêng keng-kè. Sat-bó͘-jíⁿ kā Iâ-se kóng, Iâ-hô-hoa iā bô kéng chiah-ê.

11撒母耳kā耶西講，你ê kiáⁿ lóng tī-chia mah？伊應講，Iáu有一個soah尾ê，taⁿ teh飼羊。撒母耳kā耶西講，你差人chhōa伊來，因為伊iáu未來，咱無beh坐桌。Sat-bó͘-jíⁿ kā Iâ-se kóng, Lí ê kiáⁿ lóng tī-chia mah? I ìn kóng, Iáu-ū chi̍t-ê soah-bé ê, taⁿ teh chhī-iûⁿ. Sat-bó͘-jíⁿ kā Iâ-se kóng, Lí chhe lâng chhōa i lâi, in-ūi i iáu-bē lâi, lán bô beh chē-toh.

12就差人chhōa伊入來；伊是赤色，目睭清秀，生做好看。耶和華講，chit人就是，你起來kā伊抹油。Chiū chhe lâng chhōa i ji̍p-lâi; i sī chhiah-sek, ba̍k-chiu chheng-siù, siⁿ-chòe hó-khòaⁿ. Iâ-hô-hoa kóng, Chit-lâng chiū-sī, lí khí-lâi kā i boah-iû.

13撒母耳就用角內ê油，tī伊hiah-ê兄ê中間抹伊；tùi hit日起，耶和華ê神大大臨到大衛。撒母耳起身tò去La̍h-má。Sat-bó͘-jíⁿ chiū ēng kak-lāi ê iû, tī i hiah ê hiaⁿ ê tiong-kan boah i; tùi hit-ji̍t khí, Iâ-hô-hoa ê Sîn tōa-tōa lîm-kàu Tāi-pi̍t. Sat-bó͘-jíⁿ khí-sin tò-khì La̍h-má.

14耶和華ê神離開掃羅，有pháiⁿ神tùi耶和華hia來，攪擾伊。Iâ-hô-hoa ê Sîn lī-khui Sò-lô, ū pháiⁿ-sîn tùi Iâ-hô-hoa hia lâi, kiáu-jiáu i.

15掃羅ê人臣對伊講，看ah，taⁿ有一個pháiⁿ神tùi上帝hia來攪擾你；Sò-lô ê jîn-sîn tùi i kóng, Khòaⁿ ah, taⁿ ū chi̍t ê pháiⁿ-sîn tùi Siōng-tè hia lâi kiáu-jiáu lí;

16阮ê主tio̍h命令跟隨你面前ê人臣chhē一個gâu彈琴ê來；tùi上帝hia來ê pháiⁿ神臨到你ê時，hō͘伊用手彈琴，你就好。goán ê chú tio̍h bēng-lēng kun-sûi lí bīn-chêng ê jîn-sîn chhē chi̍t-ê gâu tôaⁿ-khîm-ê lâi; tùi Siōng-tè hia lâi ê pháiⁿ-sîn lîm-kàu lí ê sî, hō͘ i ēng chhiú tôaⁿ-khîm, lí chiū hó.

17掃羅kā伊ê人臣講，Lín kā我chhē一個gâu彈琴ê，chhōa來我chia。Sò-lô kā i ê jîn-sîn kóng, Lín kā góa chhē chi̍t ê gâu tôaⁿ-khîm-ê, chhōa-lâi góa chia.

18少年人中有一個講，我bat看見伯利恆人耶西一個kiáⁿ gâu彈琴，是大勇士，koh是戰士，講話有智慧，面貌好看，耶和華也kap伊tī-teh。Siàu-liân lâng tiong ū chi̍t-ê kóng, Góa bat khòaⁿ-kìⁿ Pek-lī-hêng lâng Iâ-se chi̍t ê kiáⁿ gâu tôaⁿ-khîm, sī tōa ióng-sū, koh sī chiàn-sū, kóng-ōe ū tì-hūi, bīn-māu hó-khòaⁿ, Iâ-hô-hoa iā kap i tī-teh.

19掃羅差使者去見耶西，講，差你ê kiáⁿ大衛，就是hit-ê飼羊ê，來我chia。Sò-lô chhe sù-chiá khì kìⁿ Iâ-se, kóng, Chhe lí ê kiáⁿ Tāi-pi̍t, chiū-sī hit ê chhī-iûⁿ-ê, lâi góa chia.

20耶西就用驢載餅，kap一皮袋ê酒，kap一隻山羊á，交伊ê kiáⁿ大衛，送hō͘掃羅。Iâ-se chiū ēng lû chài piáⁿ, kap chi̍t phê-tē ê chiú, kap chi̍t chiah soaⁿ-iûⁿ-á, kau i ê kiáⁿ Tāi-pi̍t, sàng hō͘ Sò-lô.

21大衛到掃羅hia，跟隨tī伊ê面前；掃羅真疼伊；大衛就做掃羅kia̍h 軍器ê人。Tāi-pi̍t kàu Sò-lô hia, kun-sûi tī i ê bīn-chêng; Sò-lô chin thiàⁿ i; Tāi-pi̍t chiū chòe Sò-lô kia̍h kun-khì ê lâng.

22掃羅差人去見耶西講，求你容允大衛跟隨tī我面前，因為伊得tio̍h恩典tī我ê目睭前。Sò-lô chhe lâng khì kìⁿ Iâ-se kóng, Kiû lí iông-ún Tāi-pi̍t kun-sûi tī góa bīn-chêng, in-ūi i tit-tio̍h un-tián tī góa ê ba̍k-chiu chêng.

23Tùi上帝hia來ê pháiⁿ神臨到掃羅ê時，大衛就the̍h琴用手來彈；掃羅就寬心，得tio̍h好，pháiⁿ神離開伊。Tùi Siōng-tè hia lâi ê pháiⁿ-sîn lîm-kàu Sò-lô ê sî, Tāi-pi̍t chiū the̍h khîm ēng chhiú lâi tôaⁿ; Sò-lô chiū khoan-sim, tit-tio̍h hó, pháiⁿ-sîn lī-khui i.

1腓利士人聚集in ê軍兵，beh交戰，聚集tī屬猶大ê So-ko；紮營tī Í-hut-tāi-bín，tī So-ko kap A-se-ka ê中間。Hui-lī-sū lâng chū-chi̍p in ê kun-peng, beh kau-chiàn, chū-chi̍p tī sio̍k Iû-tāi ê So-ko; chat-iâⁿ tī Í-hut-tāi-bín, tī So-ko kap A-se-ka ê tiong-kan.

2掃羅kap以色列人也聚集，紮營tī Í-la̍h ê山谷，排隊伍抵敵腓利士人。Sò-lô kap Í-sek-lia̍t lâng iā chū-chi̍p, chat-iâⁿ tī Í-la̍h ê soaⁿ-kok, pâi tūi-ngó͘ tí-te̍k Hui-lī-sū lâng.

3腓利士人khiā tī chit-pêng ê山，以色列人khiā tī hit-pêng ê山，中間有山谷。Hui-lī-sū lâng khiā tī chit-pêng ê soaⁿ, Í-sek-lia̍t lâng khiā tī hit-pêng ê soaⁿ, tiong-kan ū soaⁿ-kok.

4Tùi腓利士ê營中有一個戰將出來，名叫Ko-lī-à，是Ka-te̍k人，身軀高六肘koh一掠；Tùi Hui-lī-sū ê iâⁿ-tiong ū chi̍t ê chiàn-chiòng chhut-lâi, miâ kiò Ko-lī-à, sī Ka-te̍k lâng, seng-khu koâiⁿ la̍k-tiú koh chi̍t-lia̍h;

5頭戴銅盔，身穿有鱗(lân) ê戰甲，伊ê戰甲ê銅，有五千sià-khek-le̍k ê重；thâu tì tâng-khoe, sin chhēng ū lân ê chiàn-kah, i-ê chiàn-kah ê tâng, ū gō͘-chheng sià-khek-le̍k ê tāng;

6大腿穿銅裙，肩頭中背銅ê撠(kek)；tōa-thúi chhēng tâng-kûn, keng-thâu tiong pē tâng ê kek;

7鎗柄大親像布機ê軸心；鎗尾ê鐵有六百sià-khek-le̍k ê重；有一個kōaⁿ藤牌ê行tī伊ê頭前。chhiuⁿ-pìⁿ tōa chhin-chhiūⁿ pò͘-ki ê te̍k-sim; chhiuⁿ-bé ê thih ū la̍k-pah sià-khek-le̍k ê tāng; ū chi̍t ê kōaⁿ tîn-pâi-ê kiâⁿ tī i ê thâu-chêng.

8伊khiā-teh對以色列ê軍隊hoah，kā in講，Lín出來排隊伍beh啥事ah？我kiám m̄是腓利士人，lín kiám m̄是掃羅ê奴僕mah？Lín中間揀一人，hō͘伊落來我chia；I khiā-teh tùi Í-sek-lia̍t ê kun-tūi hoah, kā in kóng, Lín chhut-lâi pâi tūi-ngó͘ beh siáⁿ-sū ah? góa kiám m̄-sī Hui-lī-sū lâng, lín kiám m̄-sī Sò-lô ê lô͘-po̍k mah? Lín tiong-kan kéng chi̍t-lâng, hō͘ i lo̍h-lâi góa chia;

9伊若會kap我相thâi，thâi死我，阮就beh做lín ê奴才；我若khah贏伊，thâi死伊，lín就beh做阮ê奴才，服事阮。i nā ōe kap góa saⁿ-thâi, thâi-sí góa, goán chiū beh chòe lín ê lô͘-châi; góa nā khah-iâⁿ i, thâi-sí i, lín chiū beh chòe goán ê lô͘-châi, ho̍k-sāi goán.

10Hit-ê腓利士人koh講，我今á日藐視以色列chiah-ê軍隊；lín叫一人出來，kap我相thâi。Hit ê Hui-lī-sū lâng koh kóng, Góa kin-á-ji̍t biáu-sī Í-sek-lia̍t chiah ê kun-tūi; lín kiò chi̍t-lâng chhut-lâi, kap góa saⁿ-thâi.

11掃羅kap以色列眾人聽見腓利士人chiah-ê話，就真忍，真驚。Sò-lô kap Í-sek-lia̍t chèng-lâng thiaⁿ-kìⁿ Hui-lī-sū lâng chiah ê ōe, chiū chin lún, chin kiaⁿ.

12大衛是猶大伯利恆ê Í-hoat-tha人耶西ê kiáⁿ。耶西有八個kiáⁿ；當掃羅ê時，耶西年歲chōe，tī人ê中間算是老人。Tāi-pi̍t sī Iû-tāi Pek-lī-hêng ê Í-hoat-tha lâng Iâ-se ê kiáⁿ. Iâ-se ū poeh ê kiáⁿ; tng Sò-lô ê sî, Iâ-se nî-hè chōe, tī lâng ê tiong-kan sǹg sī lāu-lâng.

13耶西hiah-ê kiáⁿ，三個khah序大ê tè掃羅去出征；去出征hit三個kiáⁿ，大ê名Í-lī-ap，第二A-pí-ná-ta̍t，第三個Sa-má。Iâ-se hiah ê kiáⁿ, saⁿ-ê khah sī-tōa-ê tè Sò-lô khì chhut-cheng; khì chhut-cheng hit saⁿ ê kiáⁿ, tōa-ê miâ Í-lī-ap, tē-jī A-pí-ná-ta̍t, tē-saⁿ-ê Sa-má.

14大衛是第一細ê；hit三個khah序大ê跟tè掃羅。Tāi-pi̍t sī tē-it-sòe ê; hit saⁿ ê khah sī-tōa-ê kun-tè Sò-lô.

15大衛往來tī掃羅ê所在，tī伯利恆飼伊ê老父ê羊。Tāi-pi̍t óng-lâi tī Sò-lô ê só͘-chāi, tī Pek-lī-hêng chhī i ê lāu-pē ê iûⁿ.

16Hit-ê腓利士人早暗出來khiā-teh tián，歷過四十日。Hit ê Hui-lī-sū lâng chá-àm chhut-lâi khiā-teh tián, le̍k-kè sì-cha̍p ji̍t.

17耶西kā伊ê kiáⁿ大衛講，你tio̍h kā你hiah-ê兄帶烘ê五穀一i-hoat，kap chit十個餅，緊緊去軍營，hō͘你hiah-ê兄；Iâ-se kā i ê kiáⁿ Tāi-pi̍t kóng, Lí tio̍h kā lí hiah ê hiaⁿ tòa hang ê gō͘-kak chi̍t i-hoat, kap chí cha̍p ê piáⁿ, kín-kín khì kun-iâⁿ, hō͘ lí hiah ê hiaⁿ;

18koh帶chit十個牛奶餅，送hō͘ in ê千總，koh問你ê兄平安無，帶伊ê證據來。koh tòa chí cha̍p ê gû-lin-piáⁿ, sàng hō͘ in ê chhian-chóng, koh mn̄g lí ê hiaⁿ pêng-an bô, tòa i ê chèng-kù lâi.

19掃羅kap大衛三個兄，kap以色列眾人，tī Í-la̍h ê山谷，kap腓利士人交戰。Sò-lô kap Tāi-pi̍t saⁿ ê hiaⁿ, kap Í-sek-lia̍t chèng-lâng, tī Í-la̍h ê soaⁿ-kok, kap Hui-lī-sū lâng kau-chiàn.

20大衛透早起來，用羊群放交一個顧守ê人，照耶西所命令伊ê，帶食物去到排列車ê所在；軍兵tú-á出去到戰場，hoah beh交戰。Tāi-pi̍t thàu-chá khí-lâi, ēng iûⁿ-kûn pàng kau chi̍t ê kò͘-siú ê lâng, chiàu Iâ-se só͘ bēng-lēng i ê, tòa chia̍h-mi̍h khì kàu pâi-lia̍t chhia ê só͘-chāi; kun-peng tú-á chhut-khì kàu chiàn-tiûⁿ, hoah beh kau-chiàn.

21以色列人kap腓利士人lóng排列隊伍，兩pêng ê軍隊相對。Í-sek-lia̍t lâng kap Hui-lī-sū lâng lóng pâi-lia̍t tūi-ngó͘, lióng-pêng ê kun-tūi saⁿ-tùi.

22大衛用物件交代顧物件ê人ê手，走到戰場，請安伊ê兄。Tāi-pi̍t ēng mi̍h-kiāⁿ kau-tài kò͘ mi̍h-kiāⁿ ê lâng ê chhiú, cháu kàu chiàn-tiûⁿ, chhéng-an i ê hiaⁿ.

23Kap in講話ê時，看ah，hit-ê戰將，就是Ka-te̍k ê腓利士人，名Ko-lī-à，tùi腓利士ê隊伍出來，照前所講ê來講；大衛聽見。Kap in kóng-ōe ê sî, khòaⁿ ah, hit ê chiàn-chiòng, chiū-sī Ka-te̍k ê Hui-lī-sū lâng, miâ Ko-lī-à, tùi Hui-lī-sū ê tūi-ngó͘ chhut-lâi, chiàu chêng só͘-kóng-ê lâi kóng; Tāi-pi̍t thiaⁿ-kìⁿ.

24以色列眾人看見hit人就走閃伊，盡在驚。Í-sek-lia̍t chèng-lâng khòaⁿ-kìⁿ hit-lâng chiū cháu siám i, chīn-chāi kiaⁿ.

25以色列人講，Chit-ê上來ê人，你有看見mah？伊上來，是beh藐視以色列；若有人能thâi死伊，王beh hō͘伊大好額，將伊ê cha-bó͘-kiáⁿ嫁伊，koh hō͘伊老父一家tī以色列中免納稅當差。Í-sek-lia̍t lâng kóng, Chit-ê chiūⁿ-lâi ê lâng, lí ū khòaⁿ-kìⁿ mah? I chiūⁿ-lâi, sī beh biáu-sī Í-sek-lia̍t; nā ū lâng ōe thâi-sí i, ông beh hō͘ i tōa hó-gia̍h, chiong i ê cha-bó͘-kiáⁿ kè i, koh hō͘ i lāu-pē chi̍t-ke tī Í-sek-lia̍t tiong bián la̍p-sè tng-chhe.

26大衛問khiā tī伊身邊hiah-ê人，有人thâi死chit-ê腓利士人，洗除以色列ê見笑，beh怎樣款待伊ah？chit-ê無受割禮ê腓利士人是是誰，敢藐視永活上帝ê軍隊mah？Tāi-pi̍t mn̄g khiā tī i sin-piⁿ hiah ê lâng, Ū lâng thâi-sí chit ê Hui-lī-sū lâng, sóe-tû Í-sek-lia̍t ê kiàn-siàu, beh cháiⁿ-iūⁿ khoán-thāi i ah? chit-ê bô siū kat-lé ê Hui-lī-sū lâng sī chī-chūi, káⁿ biáu-sī éng-oa̍h Siōng-tè ê kun-tūi mah?

27百姓照前ê話應伊，講，若有人能thâi死chit人，beh án-ni款待伊。Peh-sìⁿ chiàu chêng ê ōe ìn i, kóng, Nā ū lâng ōe thâi-sí chit-lâng, beh án-ni khoán-thāi i.

28大衛ê大兄Í-lī-ap聽見伊kap人teh講話，Í-lī-ap受氣大衛，講，你啥事落來chia？hit幾隻羊tī曠野裡，你放交是誰 ah？我知你驕傲kap你心內ê pháiⁿ；你落來不過是beh看交戰。Tāi-pi̍t ê tōa-hiaⁿ Í-lī-ap thiaⁿ-kìⁿ i kap lâng teh kóng-ōe, Í-lī-ap siū-khì Tāi-pi̍t, kóng, Lí siáⁿ-sū lo̍h-lâi chia? hit kúi chiah iûⁿ tī khòng-iá-nih, lí pàng kau chī-chūi ah? góa chai lí kiau-ngō͘ kap lí sim-lāi ê pháiⁿ; lí lo̍h-lâi put-kò sī beh khòaⁿ kau-chiàn.

29大衛講，我有做甚麼？kiám是無因端mah？Tāi-pi̍t kóng, Góa ū chòe sím-mi̍h? kiám-sī bô in-toaⁿ mah?

30大衛就離開伊，去ǹg別人，照前ê話teh問；百姓照前ê話來應伊。Tāi-pi̍t chiū lī-khui i, khì ǹg pa̍t-lâng, chiàu chêng ê ōe teh mn̄g; peh-sìⁿ chiàu chêng ê ōe lâi ìn i.

31大衛所講ê話已經hō͘人聽見，in就講tī掃羅ê面前；掃羅就差人叫伊來。Tāi-pi̍t só͘ kóng ê ōe í-keng hō͘ lâng thiaⁿ-kìⁿ, in chiū kóng tī Sò-lô ê bīn-chêng; Sò-lô chiū chhe lâng kiò i lâi.

32大衛kā掃羅講，人m̄免為tio̍h hit人來失膽，你ê奴僕beh去kap hit-ê腓利士人交戰。Tāi-pi̍t kā Sò-lô kóng, Lâng m̄-bián ūi-tio̍h hit-lâng lâi sit-táⁿ, lí ê lô͘-po̍k beh khì kap hit ê Hui-lī-sū lâng kau-chiàn.

33掃羅對大衛講，你bōe能去抵敵chit-ê腓利士人，kap伊交戰；因為你ê年歲iáu-kú少，伊tùi少年就學習戰士。Sò-lô tùi Tāi-pi̍t kóng, Lí bōe-ōe khì tí-te̍k chit ê Hui-lī-sū lâng, kap i kau-chiàn; in-ūi lí ê nî-hè iáu-kú chió, i tùi siàu-liân chiū ha̍k-si̍p chiàn-sū.

34大衛kā掃羅講，你ê奴僕kā老父顧羊ê時，有獅á是熊來，tùi羊群中咬羊á去；Tāi-pi̍t kā Sò-lô kóng, Lí ê lô͘-po̍k kā lāu-pē kò͘-iûⁿ ê sî, ū sai á-sī hîm lâi, tùi iûⁿ-kûn-tiong kā iûⁿ-á khì;

35我就jip伊，phah伊，救羊á出伊ê嘴；伊起來beh kāng我，我就khiú伊ê嘴下斗，phah死伊。góa chiū jip i, phah i, kiù iûⁿ-á chhut i ê chhùi; i khí-lâi beh kāng góa, góa chiū khiú i ê chhùi-ē-táu, phah-sí i.

36你ê奴僕bat phah死獅kap熊；chit-ê無受割禮ê腓利士人，也beh親像in ê一隻；因為伊藐視永活上帝ê軍隊。Lí ê lô͘-po̍k bat phah-sí sai kap hîm; chit-ê bô siū kat-lé ê Hui-lī-sū lâng, iā beh chhin-chhiūⁿ in ê chi̍t-chiah; in-ūi i biáu-sī éng-oa̍h Siōng-tè ê kun-tūi.

37大衛koh講，耶和華救我脫離獅ê爪kap熊ê爪，伊也beh救我脫離chit-ê腓利士人ê手。掃羅kā大衛講，你去ah，耶和華beh kap你tī-teh。Tāi-pi̍t koh kóng, Iâ-hô-hoa kiù góa thoat-lī sai ê jiáu kap hîm ê jiáu, I iā beh kiù góa thoat-lī chit ê Hui-lī-sū lâng ê chhiú. Sò-lô kā Tāi-pi̍t kóng, Lí khì ah, Iâ-hô-hoa beh kap lí tī-teh.

38掃羅就用伊ê軍服hō͘大衛穿，用銅ê頭盔hō͘伊戴，koh hō͘伊穿戰甲。Sò-lô chiū ēng i ê kun-ho̍k hō͘ Tāi-pi̍t chhēng, ēng tâng ê thâu-khoe hō͘ i tì, koh hō͘ i chhēng chiàn-kah.

39大衛用刀hâ tī軍服，試行看cheh(=一下)；因為m̄-bat穿tio̍h。大衛kā掃羅講，穿chiah-ê我行bōe去，因為m̄-bat穿tio̍h。Tāi-pi̍t ēng to hâ tī kun-ho̍k, chhì kiâⁿ-khòaⁿ cheh; in-ūi m̄-bat chhēng-tio̍h. Tāi-pi̍t kā Sò-lô kóng, Chhēng chiah-ê góa kiâⁿ bōe khì, in-ūi m̄-bat chhēng-tio̍h.

40大衛就thǹg起來；伊手kia̍h柺á，koh tī山坑á揀五塊光滑ê石卵，hē tī袋á，就是顧羊ê人所帶ê囊；手the̍h hìⁿ石ê索á；就行óa hit-ê腓利士人。Tāi-pi̍t chiū thǹg-khí-lâi; i chhiú kia̍h koáiⁿ-á, koh tī soaⁿ-khiⁿ-á kéng gō͘-tè kng-ku̍t ê chio̍h-nn̄g, hē tī tē-á, chiū-sī kò͘-iûⁿ ê lâng só͘ tòa ê lông; chhiú the̍h hìⁿ-chio̍h ê soh-á; chiū kiâⁿ-óa hit ê Hui-lī-sū lâng.

41Hit-ê腓利士人也ná行óa大衛，kōaⁿ牌ê行tī伊ê頭前。Hit ê Hui-lī-sū lâng iā ná kiâⁿ-óa Tāi-pi̍t, kōaⁿ-pâi-ê kiâⁿ tī i ê thâu-chêng.

42Hit-ê腓利士人kia̍h起來看，看見大衛，就看輕伊；因為伊少歲，色緻赤，面貌好看。Hit ê Hui-lī-sū lâng kia̍h khí-lâi khòaⁿ, khòaⁿ-kìⁿ Tāi-pi̍t, chiū khòaⁿ-khin i; in-ūi i chió hè, sek-tī chhiah, bīn-māu hó-khòaⁿ.

43Hit-ê腓利士人kā大衛講，我kiám是狗mah，你chiah kia̍h柺á來我chia？腓利士人就kí家己ê上帝，咒詛大衛。Hit ê Hui-lī-sū lâng kā Tāi-pi̍t kóng, Góa kiám-sī káu mah, lí chiah kia̍h koáiⁿ-á lâi góa chia? Hui-lī-sū lâng chiū kí ka-kī ê siōng-tè, chiù-chó͘ Tāi-pi̍t.

44Hit-ê腓利士人koh kā大衛講，你來我chia，我beh用你ê肉hō͘空中ê飛鳥kap田野ê野獸。Hit ê Hui-lī-sū lâng koh kā Tāi-pi̍t kóng, Lí lâi góa chia, góa beh ēng lí ê bah hō͘ khong-tiong ê pe-chiáu kap chhân-iá ê iá-siù.

45大衛對hit-ê腓利士人講，你來óa近我，是用刀，用鎗，用撠；我來óa近你，是用萬軍耶和華ê名，以色列軍隊ê上帝，就是你所藐視ê。Tāi-pi̍t tùi hit ê Hui-lī-sū lâng kóng, Lí lâi óa-kūn góa, sī ēng to, ēng chhiuⁿ, ēng kek; góa lâi óa-kūn lí, sī ēng bān-kun Iâ-hô-hoa ê miâ, Í-sek-lia̍t kun-tūi ê Siōng-tè, chiū-sī lí só͘ biáu-sī-ê.

46今á日耶和華beh將你交tī我ê手，我beh phah死你，thâi你ê頭殼；今á日我beh將腓利士軍兵ê身屍，hō͘空中ê飛鳥，地上ê野獸；hō͘普天下ê人lóng知以色列有上帝；Kin-á-ji̍t Iâ-hô-hoa beh chiong lí kau tī góa ê chhiú, góa beh phah-sí lí, thâi lí ê thâu-khak; kin-á-ji̍t góa beh chiong Hui-lī-sū kun-peng ê sin-si, hō͘ khong-tiong ê pe-chiáu, tōe-chiūⁿ ê iá-siù; hō͘ phó͘-thiⁿ-ē ê lâng lóng chai Í-sek-lia̍t ū Siōng-tè;

47koh hō͘ chiah-ê kui群ê人知耶和華救人，m̄是用刀，也m̄是用鎗；因為交戰ê事在tī耶和華，伊beh將lín交tī阮ê手。koh hō͘ chiah ê kui-kûn ê lâng chai Iâ-hô-hoa kiù lâng, m̄-sī ēng to, iā m̄-sī ēng chhiuⁿ; in-ūi kau-chiàn ê sū chāi-tī Iâ-hô-hoa, I beh chiong lín kau tī goán ê chhiú.

48Hit-ê腓利士人起來，進前近óa beh chih大衛。大衛也趕緊走去，ǹg軍隊beh chih腓利士人。Hit ê Hui-lī-sū lâng khí-lâi, chìn-chêng kūn-óa beh chih Tāi-pi̍t. Tāi-pi̍t iā kóaⁿ-kín cháu-khì, ǹg kun-tūi beh chih Hui-lī-sū lâng.

49大衛伸手入袋á內，the̍h一塊石á出來，用索hìⁿ去，射tio̍h腓利士人ê頭額，石á沉入頭額；伊就倒落去，面仆tī地裡。Tāi-pi̍t chhun-chhiú ji̍p tē-á-lāi, the̍h chi̍t tè chio̍h-á chhut-lâi, ēng soh hìⁿ-khì, siā-tio̍h Hui-lī-sū lâng ê thâu-hia̍h, chio̍h-á tîm ji̍p thâu-hia̍h; i chiū tó-lo̍h-khì, bīn phak tī tōe-nih.

50Án-ni大衛用hìⁿ索kap石á khah贏腓利士人，phah死伊；總是大衛ê手無刀。Án-ni Tāi-pi̍t ēng hìⁿ-soh kap chio̍h-á khah-iâⁿ Hui-lī-sū lâng, phah-sí i; chóng-sī Tāi-pi̍t ê chhiú bô to.

51大衛緊緊走去，khiā tī hit-ê腓利士人ê頂面，將伊ê刀拔出鞘(siù)；用hit支thâi死伊，斬伊ê頭殼。腓利士眾人看見in ê勇士已經死，就走。Tāi-pi̍t kín-kín cháu-khì, khiā tī hit ê Hui-lī-sū lâng ê téng-bīn, chiong i ê to pu̍ih chhut-siù; ēng hit-ki thâi-sí i, chám i ê thâu-khak. Hui-lī-sū chèng-lâng khòaⁿ-kìⁿ in ê ióng-sū í-keng sí, chiū cháu.

52以色列人kap猶大人就起來，hoah-hiàm，追jip腓利士人，到Ka-í kap Í-kek-lûn ê城門；tio̍h傷ê腓利士人倒tī Sa-la̍h-im ê路，直到Ka-te̍k，kap Í-kek-lûn。Í-sek-lia̍t lâng kap Iû-tāi lâng chiū khí-lâi, hoah-hiàm, tui-jip Hui-lī-sū lâng, kàu Ka-í kap Í-kek-lûn ê siâⁿ-mn̂g; tio̍h-siong ê Hui-lī-sū lâng tó tī Sa-la̍h-im ê lō͘, ti̍t-kàu Ka-te̍k, kap Í-kek-lûn.

53以色列人追jip腓利士人倒tńg來，就搶in ê營盤。Í-sek-lia̍t lâng tui-jip Hui-lī-sū lâng tò-tńg-lâi, chiū chhiúⁿ in ê iâⁿ-pôaⁿ.

54大衛將hit-ê腓利士人ê頭殼，帶到耶路撒冷；koh用伊ê軍器hē tī家己ê布棚。Tāi-pi̍t chiong hit ê Hui-lī-sū lâng ê thâu-khak, tòa kàu Iâ-lō͘-sat-léng; koh ēng i ê kun-khì hē tī ka-kī ê pò͘-pîⁿ.

55掃羅看見大衛去phah腓利士人ê時，就問軍長Ap-nî-jíⁿ講，Ap-nî-jíⁿ ah，hit-ê少年人是是誰 ê kiáⁿ？Ap-nî-jíⁿ講，我kí王ê活命來chiù-chōa，我m̄知。Sò-lô khòaⁿ-kìⁿ Tāi-pi̍t khì phah Hui-lī-sū lâng ê sî, chiū mn̄g kun-tiúⁿ Ap-nî-jíⁿ kóng, Ap-nî-jíⁿ ah, hit ê siàu-liân lâng sī chī-chūi ê kiáⁿ? Ap-nî-jíⁿ kóng, Góa kí ông ê oa̍h-miā lâi chiù-chōa, góa m̄-chai.

56王講，你去問看hit-ê gín-ná是是誰 ê kiáⁿ。Ông kóng, Lí khì mn̄g-khòaⁿ hit ê gín-ná sī chī-chūi ê kiáⁿ.

57大衛phah死腓利士人tò來，Ap-nî-jíⁿ chhōa伊來掃羅ê面前，伊ê手裡有腓利士人ê頭殼。Tāi-pi̍t phah-sí Hui-lī-sū lâng tò-lâi, Ap-nî-jíⁿ chhōa i lâi Sò-lô ê bīn-chêng, i ê chhiú-nih ū Hui-lī-sū lâng ê thâu-khak.

58掃羅問伊講，少年人ah，你是甚麼人ê kiáⁿ？大衛講，我是你ê奴僕伯利恆人耶西ê kiáⁿ。Sò-lô mn̄g i kóng, Siàu-liân lâng ah, lí sī sím-mi̍h lâng ê kiáⁿ? Tāi-pi̍t kóng, Góa sī lí ê lô͘-po̍k Pek-lī-hêng lâng Iâ-se ê kiáⁿ.