1耶和華kā撒母耳講，我已經棄sak掃羅，無hō͘伊做以色列王，你為tio̍h伊憂悶beh到jōa久ah？你tio̍h用角貯油滿滿；去ah，我beh差你去伯利恆人耶西hia；因為我tī伊ê kiáⁿ ê中間備辦一個王。Iâ-hô-hoa kā Sat-bó͘-jíⁿ kóng, Góa í-keng khì-sak Sò-lô, bô hō͘ i chòe Í-sek-lia̍t ông, lí ūi-tio̍h i iu-būn beh kàu jōa-kú ah? Lí tio̍h ēng kak tóe iû móa-móa; khì ah, Góa beh chhe lí khì Pek-lī-hêng lâng Iâ-se hia; in-ūi Góa tī i ê kiáⁿ ê tiong-kan pī-pān chi̍t ê ông.