1大衛kap掃羅講明白，約拿單ê性命kap大衛ê性命生相連；約拿單疼伊親像家己ê性命。Tāi-pi̍t kap Sò-lô kóng bêng-pe̍k, Iok-ná-tan ê sìⁿ-miā kap Tāi-pi̍t ê sìⁿ-miā siⁿ saⁿ-liân; Iok-ná-tan thiàⁿ i chhin-chhiūⁿ ka-kī ê sìⁿ-miā.

2Hit日掃羅留伊，無hō͘伊tò去老父ê家。Hit-ji̍t Sò-lô lâu i, bô hō͘ i tò-khì lāu-pē ê ke.

3約拿單kap大衛兩人結約，因為伊疼伊親像家己ê性命。Iok-ná-tan kap Tāi-pi̍t nn̄g-lâng kiat-iok, in-ūi i thiàⁿ i chhin-chhiūⁿ ka-kī ê sìⁿ-miā.

4約拿單thǹg伊身軀ê外衫，hō͘大衛；koh將伊ê軍服，連伊ê刀，伊ê弓，伊ê腰帶，也hō͘伊。Iok-ná-tan thǹg i sin-khu ê gōa-saⁿ, hō͘ Tāi-pi̍t; koh chiong i ê kun-ho̍k, liân i ê to, i ê keng, i ê io-tòa, iā hō͘ i.

5見若掃羅差伊去toh落，大衛所去無m̄精通；掃羅就設立伊做戰士ê頭人。眾百姓kap掃羅ê人臣lóng看做好。Kìⁿ-nā Sò-lô chhe i khì toh-lo̍h, Tāi-pi̍t só͘ khì bô m̄ cheng-thong; Sò-lô chiū siat-li̍p i chòe chiàn-sū ê thâu-lâng. Chèng peh-sìⁿ kap Sò-lô ê jîn-sîn lóng khòaⁿ-chòe hó.

6大衛phah死hit-ê腓利士人倒tńg，in tò來ê時，hiah-ê婦女tùi以色列ta̍k ê城出來，唱歌、跳舞，用lin-long鼓，用歡喜，用作樂ê器具，來迎接掃羅王。Tāi-pi̍t phah-sí hit ê Hui-lī-sū lâng tò-tńg, in tò-lâi ê sî, hiah ê hū-lú tùi Í-sek-lia̍t ta̍k ê siâⁿ chhut-lâi, chhiùⁿ-koa, thiàu-bú, ēng lin-long-kó͘, ēng hoaⁿ-hí, ēng chok-ga̍k ê khì-kū, lâi ngiâ-chih Sò-lô ông.

7Hiah-ê婦女跳舞，有ê唱，有ê和，講， 掃羅thâi死in千千， 大衛thâi死in萬萬。Hiah ê hū-lú thiàu-bú, ū-ê chhiùⁿ, ū-ê hô[hō], kóng, Sò-lô thâi-sí in chheng-chheng, Tāi-pi̍t thâi-sí in bān-bān.

8掃羅不止受氣，無歡喜chit-ê話，就講，將萬萬hō͘大衛，千千hō͘我，只有chhun國位bē hō͘伊nā-tiāⁿ。Sò-lô put-chí siū-khì, bô hoaⁿ-hí chit ê ōe, chiū kóng, Chiong bān-bān hō͘ Tāi-pi̍t, chheng-chheng hō͘ góa, chí-ū chhun kok-ūi bē hō͘ i nā-tiāⁿ.

9Tùi hit日起，掃羅看見大衛就gîn伊。Tùi hit-ji̍t khí, Sò-lô khòaⁿ-kìⁿ Tāi-pi̍t chiū gîn i.

10隔日tùi上帝hia來ê pháiⁿ神大大臨到掃羅，伊就tī厝內講先知話。大衛照常用手彈琴，掃羅手裡有鎗。Keh-ji̍t tùi Siōng-tè hia lâi ê pháiⁿ-sîn tōa-tōa lîm-kàu Sò-lô, i chiū tī chhù-lāi kóng sian-ti ōe. Tāi-pi̍t chiàu-siông ēng chhiú tôaⁿ-khîm, Sò-lô chhiú-nih ū chhiuⁿ.

11掃羅用鎗cho̍h去，因為講，我beh試大衛，釘伊tī壁裡。大衛tī伊ê面前閃避兩pái。Sò-lô ēng chhiuⁿ cho̍h-khì, in-ūi kóng, Góa beh chhì Tāi-pi̍t, tèng i tī piah-nih. Tāi-pi̍t tī i ê bīn-chêng siám-pī nn̄g-pái.

12掃羅驚大衛，因為耶和華kap伊tī-teh，離開掃羅。Sò-lô kiaⁿ Tāi-pi̍t, in-ūi Iâ-hô-hoa kap i tī-teh, lī-khui Sò-lô.

13掃羅chiah hō͘大衛離開伊，設立伊做千總；伊tī百姓ê面前出入。Sò-lô chiah hō͘ Tāi-pi̍t lī-khui i, siat-li̍p i chòe chhian-chóng; i tī peh-sìⁿ ê bīn-chêng chhut-ji̍p.

14大衛見所做ê tāi-chì無m̄精通，耶和華kap伊tī-teh。Tāi-pi̍t kìⁿ só͘ chòe ê tāi-chì bô m̄ cheng-thong, Iâ-hô-hoa kap i tī-teh.

15掃羅看見大衛所做ê tāi-chì真精通，不止驚伊。Sò-lô khòaⁿ-kìⁿ Tāi-pi̍t só͘ chòe ê tāi-chì chin cheng-thong, put-chí kiaⁿ i.

16獨獨以色列kap猶大ê眾人lóng疼大衛，因為伊tī in面前出入。To̍k-to̍k Í-sek-lia̍t kap Iû-tāi ê chèng lâng lóng thiàⁿ Tāi-pi̍t, in-ūi i tī in bīn-chêng chhut-ji̍p.

17掃羅kā大衛講，看ah，我beh用大cha-bó͘-kiáⁿ Bí-la̍h hō͘你做bó͘，獨獨ài你做我ê勇士，替耶和華交戰。掃羅心內講，我m̄-thang親手害伊，tio̍h借腓利士人ê手害伊。Sò-lô kā Tāi-pi̍t kóng, Khòaⁿ ah, góa beh ēng tōa cha-bó͘-kiáⁿ Bí-la̍h hō͘ lí chòe-bó͘, to̍k-to̍k ài lí chòe góa ê ióng-sū, thòe Iâ-hô-hoa kau-chiàn. Sò-lô sim-lāi kóng, Góa m̄-thang chhin-chhiú hāi i, tio̍h chioh Hui-lī-sū lâng ê chhiú hāi i.

18大衛kā掃羅講，我是是誰，我有甚麼身分，我老父ê家tī以色列中是甚麼號ê家，我thang做王ê kiáⁿ婿mah？Tāi-pi̍t kā Sò-lô kóng, Góa sī chī-chūi, góa ū sím-mi̍h sin-hūn, góa lāu-pē ê ke tī Í-sek-lia̍t tiong sī sím-mi̍h hō ê ke, góa thang chòe ông ê kiáⁿ-sài mah?

19掃羅ê cha-bó͘-kiáⁿ Bí-la̍h定tio̍h hō͘大衛ê期到lah，竟然hō͘ Bí-hô-la̍h人A-tek-lia̍t做bó͘。Sò-lô ê cha-bó͘-kiáⁿ Bí-la̍h tiāⁿ-tio̍h hō͘ Tāi-pi̍t ê kî kàu lah, kéng-jiân hō͘ Bí-hô-la̍h lâng A-tek-lia̍t chòe-bó͘.

20掃羅ê cha-bó͘-kiáⁿ Bí-kah疼大衛；有人kā掃羅講；掃羅歡喜chit-ê事。Sò-lô ê cha-bó͘-kiáⁿ Bí-kah thiàⁿ Tāi-pi̍t; ū lâng kā Sò-lô kóng; Sò-lô hoaⁿ-hí chit ê sū.

21掃羅心內講，我將chit-ê cha-bó͘-kiáⁿ hō͘大衛做羅網來網伊；thang借腓利士人ê手害伊。掃羅就kā大衛講，Taⁿ chit-ê第二pái你thang做我ê kiáⁿ婿。Sò-lô sim-lāi kóng, Góa chiong chit ê cha-bó͘-kiáⁿ hō͘ Tāi-pi̍t chòe lô-bāng lâi bāng i; thang chioh Hui-lī-sū lâng ê chhiú hāi i. Sò-lô chiū kā Tāi-pi̍t kóng, Taⁿ chit ê tē-jī pái lí thang chòe góa ê kiáⁿ-sài.

22掃羅吩咐人臣講，Lín暗靜kā大衛講，王歡喜你，人臣也疼你；所以你thang做王ê kiáⁿ婿。Sò-lô hoan-hù jîn-sîn kóng, Lín àm-chīⁿ kā Tāi-pi̍t kóng, Ông hoaⁿ-hí lí, jîn-sîn iā thiàⁿ lí; só͘-í lí thang chòe ông ê kiáⁿ-sài.

23掃羅ê人臣就將chiah-ê話講hō͘大衛聽；大衛講，Lín phah算做王ê kiáⁿ婿是小khóa事mah？我是sòng-hiong卑微ê人。Sò-lô ê jîn-sîn chiū chiong chiah ê ōe kóng hō͘ Tāi-pi̍t thiaⁿ; Tāi-pi̍t kóng, Lín phah-sǹg chòe ông ê kiáⁿ-sài sī sió-khóa sū mah? góa sī sòng-hiong pi-bî ê lâng.

24掃羅ê人臣回覆，講，大衛所講ê，án-ni，án-ni。Sò-lô ê jîn-sîn hê-hok, kóng, Tāi-pi̍t só͘ kóng ê, án-ni, án-ni.

25掃羅講，Lín tio̍h對大衛án-ni講，王m̄-ài甚麼聘禮，只有beh一百ê腓利士人陽物ê皮，thang報仇tī王ê對敵。掃羅ê意思beh hō͘大衛死tī腓利士人ê手。Sò-lô kóng, Lín tio̍h tùi Tāi-pi̍t án-ni kóng, ông m̄-ài sím-mi̍h phèng-lé, chí-ū beh chi̍t-pah ê Hui-lī-sū lâng iông-bu̍t ê phê, thang pò-siû tī ông ê tùi-te̍k. Sò-lô ê ì-sù beh hō͘ Tāi-pi̍t sí tī Hui-lī-sū lâng ê chhiú.

26伊ê人臣將chiah-ê話kā大衛講；大衛歡喜beh做王ê kiáⁿ婿。I ê jîn-sîn chiong chiah ê ōe kā Tāi-pi̍t kóng; Tāi-pi̍t hoaⁿ-hí beh chòe ông ê kiáⁿ-sài.

27日期iáu未到，大衛起來kap tè伊ê人，起身去，thâi死兩百ê腓利士人。大衛帶 hiah-ê陽物ê皮，in就照數額一盡獻hō͘王，hō͘伊thang做王ê kiáⁿ婿。Tùi án-ni，掃羅將cha-bó͘-kiáⁿ Bí-kah hō͘伊做bó͘。Ji̍t-kî iáu-bē kàu, Tāi-pi̍t khí-lâi kap tè i ê lâng, khí-sin khì, thâi-sí nn̄g-pah ê Hui-lī-sū lâng. Tāi-pi̍t tòa hiah ê iông-bu̍t ê phê, in chiū chiàu siàu-gia̍h it-chīn hiàn hō͘ ông, hō͘ i thang chòe ông ê kiáⁿ-sài. Tùi án-ni Sò-lô chiong cha-bó͘-kiáⁿ Bí-kah hō͘ i chòe-bó͘.

28掃羅看見，koh知耶和華kap大衛tī-teh；koh掃羅ê cha-bó͘-kiáⁿ Bí-kah也疼伊。Sò-lô khòaⁿ-kìⁿ, koh chai Iâ-hô-hoa kap Tāi-pi̍t tī-teh; koh Sò-lô ê cha-bó͘-kiáⁿ Bí-kah iā thiàⁿ i.

29掃羅益發驚大衛；掃羅常常做大衛ê對敵。Sò-lô it-hoat kiaⁿ Tāi-pi̍t; Sò-lô siông-siông chòe Tāi-pi̍t ê tùi-te̍k.

30腓利士hiah-ê首領出來交戰；in ta̍k-pái出來，大衛所行比掃羅hiah-ê人臣khah精通；Tùi án-ni，伊ê名hō͘人koh尊重。Hui-lī-sū hiah ê siú-léng chhut-lâi kau-chiàn; in ta̍k-pái chhut-lâi, Tāi-pi̍t só͘ kiâⁿ pí Sò-lô hiah ê jîn-sîn khah cheng-thong; tùi án-ni i ê miâ hō͘ lâng koh chun-tiōng.

1掃羅對伊ê kiáⁿ約拿單kap眾人臣講，Tio̍h thâi死大衛；總是掃羅ê kiáⁿ約拿單不止歡喜大衛。Sò-lô tùi i ê kiáⁿ Iok-ná-tan kap chèng jîn-sîn kóng, Tio̍h thâi-sí Tāi-pi̍t; chóng-sī Sò-lô ê kiáⁿ Iok-ná-tan put-chí hoaⁿ-hí Tāi-pi̍t.

2約拿單kā大衛講，我ê老父掃羅想beh thâi你；所以明á早起你tio̍h小心，到一個偏僻ê所在，家己bih。Iok-ná-tan kā Tāi-pi̍t kóng, Góa ê lāu-pē Sò-lô siūⁿ beh thâi lí; só͘-í bîn-á-chá-khí lí tio̍h sió-sim, kàu chi̍t-ê phian-phiah ê só͘-chāi, ka-kī bih.

3我beh去你所bih ê田，khiā tī我ê老父身邊；我kap我ê老父議論你ê事，我所看見ê我beh kā你講。Góa beh khì lí só͘ bih ê chhân, khiā tī góa ê lāu-pē sin-piⁿ; góa kap góa ê lāu-pē gī-lūn lí ê sū, góa só͘ khòaⁿ-kìⁿ ê góa beh kā lí kóng.

4約拿單對伊ê老父掃羅論大衛，替伊講好話，講，王m̄-thang得罪你ê奴僕大衛，因為伊未bat得罪你；伊對你所行ê，lóng是好；Iok-ná-tan tùi i ê lāu-pē Sò-lô lūn Tāi-pi̍t, thòe i kóng hó-ōe, kóng, Ông m̄-thang tek-chōe lí ê lô͘-po̍k Tāi-pi̍t, in-ūi i bē bat tek-chōe lí; i tùi lí só͘-kiâⁿ-ê, lóng sī hó;

5因為伊bat拚命thâi死hit-ê腓利士人，耶和華為以色列眾人大行拯救；hit時你看見，不止歡喜；taⁿ啥事無緣故beh thâi死大衛，流無罪ê人ê血，來犯罪ah？in-ūi i bat piàⁿ-miā thâi-sí hit ê Hui-lī-sū lâng, Iâ-hô-hoa ūi Í-sek-lia̍t chèng-lâng tōa kiâⁿ chín-kiù; hit-sî lí khòaⁿ-kìⁿ, put-chí hoaⁿ-hí; taⁿ siáⁿ-sū bô iân-kò͘ beh thâi-sí Tāi-pi̍t, lâu bô-chōe ê lâng ê huih, lâi hoān-chōe ah?

6掃羅聽約拿單ê話；掃羅kí耶和華ê活來chiù-chōa講，我無beh hō͘伊死。Sò-lô thiaⁿ Iok-ná-tan ê ōe; Sò-lô kí Iâ-hô-hoa ê oa̍h lâi chiù-chōa kóng, Góa bô beh hō͘ i sí.

7約拿單叫大衛來；約拿單將這一切ê話kā伊講；約拿單chhōa大衛去見掃羅；伊猶原khiā tī掃羅ê面前。Iok-ná-tan kiò Tāi-pi̍t lâi; Iok-ná-tan chiong che it-chhè ê ōe kā i kóng; Iok-ná-tan chhōa Tāi-pi̍t khì kìⁿ Sò-lô; i iû-goân khiā tī Sò-lô ê bīn-chêng.

8以後koh有交戰；大衛出去kap腓利士人交戰，大大thâi死in；in就tī伊ê面前逃走。Í-āu koh ū kau-chiàn; Tāi-pi̍t chhut-khì kap Hui-lī-sū lâng kau-chiàn, tōa-tōa thâi-sí in; in chiū tī i ê bīn-chêng tô-cháu.

9掃羅坐tī厝內，手kia̍h鎗；hit時tùi耶和華hia來ê pháiⁿ神koh臨到伊；大衛用手彈琴。Sò-lô chē tī chhù-lāi, chhiú kia̍h chhiuⁿ; hit-sî tùi Iâ-hô-hoa hia lâi ê pháiⁿ-sîn koh lîm-kàu i; Tāi-pi̍t ēng chhiú tôaⁿ-khîm.

10掃羅beh用鎗刺大衛，釘伊tī壁裡；伊就tùi掃羅ê面前閃開；hit支鎗鑿入壁。Hit暝大衛就走來閃避伊。Sò-lô beh ēng chhiuⁿ chhì Tāi-pi̍t, tèng i tī piah-nih; i chiū tùi Sò-lô ê bīn-chêng siám-khui; hit ki chhiuⁿ chha̍k-ji̍p piah. Hit-mî Tāi-pi̍t chiū cháu lâi siám-pī i.

11掃羅差人到大衛ê厝守伊，thèng候天光beh thâi伊。大衛ê bó͘ Bí-kah對伊講，你今暝若無逃命，明á日你beh受thâi。Sò-lô chhe lâng kàu Tāi-pi̍t ê chhù siú i, thèng-hāu thiⁿ-kng beh thâi i. Tāi-pi̍t ê bó͘ Bí-kah tùi i kóng, Lí kim-mî nā bô tô-miā, bîn-á-ji̍t lí beh siū-thâi.

12Bí-kah就tùi窗á墜大衛落去；伊就走去，來閃避。Bí-kah chiū tùi thang-á tūi Tāi-pi̍t lo̍h-khì; i chiū cháu-khì, lâi siám-pī.

13Bí-kah用家內ê偶像hē tī眠床，頭殼khòa tī山羊毛ê枕頭，用被蓋伊。Bí-kah ēng ke-lāi ê ngó͘-siōng hē tī bîn-chhn̂g, thâu-khak khòa tī soaⁿ-iûⁿ-mn̂g ê chím-thâu, ēng phē khàm i.

14掃羅差人去掠大衛；Bí-kah講，伊破病。Sò-lô chhe lâng khì lia̍h Tāi-pi̍t; Bí-kah kóng, I phòa-pīⁿ.

15掃羅koh差人去看大衛，講，連眠床扛來我chia，我thang thâi死伊。Sò-lô koh chhe lâng khì khòaⁿ Tāi-pi̍t, kóng, Liân bîn-chhn̂g kng-lâi góa chia, góa thang thâi-sí i.

16使者入去，看見床裡有偶像，頭殼khòa tī山羊毛ê枕頭。Sù-chiá ji̍p-khì, khòaⁿ-kìⁿ chhn̂g-nih ū ngó͘-siōng, thâu-khak khòa tī soaⁿ-iûⁿ-mn̂g ê chím-thâu.

17掃羅對Bí-kah講，你啥事án-ni騙我，放我ê對敵逃走ah？Bí-kah應講，伊kā我講，你放我去，我kiám tio̍h thâi死你mah？Sò-lô tùi Bí-kah kóng, Lí siáⁿ-sū án-ni phiàn góa, pàng góa ê tùi-te̍k tô-cháu ah? Bí-kah ìn kóng, I kā góa kóng, Lí pàng góa khì, góa kiám tio̍h thâi-sí lí mah?

18大衛走去，逃閃到La̍h-má，見撒母耳，將掃羅對伊所行ê事，lóng總kā伊講。伊kap撒母耳就去Ná-iok khiā起。Tāi-pi̍t cháu-khì, tô-siám kàu La̍h-má, kìⁿ Sat-bó͘-jíⁿ, chiong Sò-lô tùi i só͘ kiâⁿ ê sū, lóng-chóng kā i kóng. I kap Sat-bó͘-jíⁿ chiū khì Ná-iok khiā-khí.

19有人kā掃羅講，看ah，大衛tī La̍h-má ê Ná-iok。Ū lâng kā Sò-lô kóng, Khòaⁿ ah, Tāi-pi̍t tī La̍h-má ê Ná-iok.

20掃羅差使者去掠大衛；in看見一陣先知teh講先知話，koh撒母耳khiā tī in中間監督in，上帝ê神臨到掃羅ê使者，in也講先知話。Sò-lô chhe sù-chiá khì lia̍h Tāi-pi̍t; in khòaⁿ-kìⁿ chi̍t tīn sian-ti teh kóng sian-ti ōe, koh Sat-bó͘-jíⁿ khiā tī in tiong-kan kam(**kàm)-tok in, Siōng-tè ê Sîn lîm-kàu Sò-lô ê sù-chiá, in iā kóng sian-ti ōe.

21有人將chit-ê事kā掃羅講；伊就差別ê使者去；in也講先知話。掃羅第三pái差使者去，in也講先知話。Ū lâng chiong chit ê sū kā Sò-lô kóng; i chiū chhe pa̍t ê sù-chiá khì; in iā kóng sian-ti ōe. Sò-lô tē-saⁿ pái chhe sù-chiá khì, in iā kóng sian-ti ōe.

22後來伊本身也去La̍h-má；到Se-ko͘ ê大井hia，問人講，撒母耳kap大衛tī toh落？有人kā伊講，看ah，tī La̍h-má ê Ná-iok。Āu-lâi i pún-sin iā khì La̍h-má; kàu Se-ko͘ ê tōa-chíⁿ hia, mn̄g lâng kóng, Sat-bó͘-jíⁿ kap Tāi-pi̍t tī toh-lo̍h? Ū lâng kā i kóng, Khòaⁿ ah, tī La̍h-má ê Ná-iok.

23伊就去La̍h-má ê Ná-iok；上帝ê神也臨到伊；伊ná行ná講先知話，直到La̍h-má ê Ná-iok。I chiū khì La̍h-má ê Ná-iok; Siōng-tè ê Sîn iā lîm-kàu i; i ná-kiâⁿ ná-kóng sian-ti ōe, ti̍t-kàu La̍h-má ê Ná-iok.

24伊就thǹg衫，tī撒母耳ê面前講先知話；thong日thong暝thǹg-theh倒teh；Tùi án-ni，人teh講，掃羅也列tī先知中mah？I chiū thǹg-saⁿ, tī Sat-bó͘-jíⁿ ê bīn-chêng kóng sian-ti ōe; thong-ji̍t thong-mî thǹg-theh tó-teh; tùi án-ni lâng teh kóng, Sò-lô iā lia̍t tī sian-ti tiong mah?

1大衛tùi La̍h-má ê Ná-iok逃走，到約拿單ê面前，講，我做甚麼？我有甚麼pháiⁿ？tī你ê老父ê面前有甚麼罪，伊竟然teh siàu想我ê性命mah？Tāi-pi̍t tùi La̍h-má ê Ná-iok tô-cháu, kàu Iok-ná-tan ê bīn-chêng, kóng, Góa chòe sím-mi̍h? góa ū sím-mi̍h pháiⁿ? tī lí ê lāu-pē ê bīn-chêng ū sím-mi̍h chōe, i kéng-jiân teh siàu-siūⁿ góa ê sìⁿ-miā mah?

2約拿單kā伊講，決斷m̄是，你bōe到死；我ê老父做tāi-chì，無論大細，無一項無hō͘我知；我ê老父kiám kan-ta隱瞞我chit項事mah？決斷無án-ni。Iok-ná-tan kā i kóng, Koat-toàn m̄-sī, lí bōe kàu sí; góa ê lāu-pē chòe tāi-chì, bô-lūn tōa-sòe, bô chi̍t-hāng bô hō͘ góa chai; góa ê lāu-pē kiám kan-ta ún-môa góa chit hāng sū mah? koat-toàn bô án-ni.

3大衛koh chiù-chōa講，你ê老父準準知我tī你ê面前得tio̍h恩典；伊ê心講，M̄-thang hō͘約拿單知，驚了伊會憂悶；我kí耶和華ê永活kap你ê活命來chiù-chōa，我離開死只有一步nā-tiāⁿ。Tāi-pi̍t koh chiù-chōa kóng, Lí ê lāu-pē chún-chún chai góa tī lí ê bīn-chêng tit-tio̍h un-tián; i ê sim kóng, M̄-thang hō͘ Iok-ná-tan chai, kiaⁿ-liáu i ōe iu-būn; góa kí Iâ-hô-hoa ê éng-oa̍h kap lí ê oa̍h-miā lâi chiù-chōa, góa lī-khui sí chí-ū chi̍t-pō͘ nā-tiāⁿ.

4約拿單kā大衛講，你ê心所ài，我beh kā你做。Iok-ná-tan kā Tāi-pi̍t kóng, Lí ê sim só͘ ài, góa beh kā lí chòe.

5大衛kā約拿單講，明á日是初一，我應該tio̍h kap王坐桌；求你容允我去bih tī田裡，到第三日ê-hng。Tāi-pi̍t kā Iok-ná-tan kóng, Bîn-á-ji̍t sī chhoe-it, góa eng-kai tio̍h kap ông chē-toh; kiû lí iông-ún góa khì bih tī chhân-nih, kàu tē-saⁿ ji̍t ê-hng.

6你ê老父若看我無tī-teh，你就講，大衛切切求我准伊tò去本城伯利恆，因為伊thong家 tī-hia獻年祭。Lí ê lāu-pē nā khòaⁿ góa bô tī-teh, lí chiū kóng, Tāi-pi̍t chhiat-chhiat kiû góa chún i tò-khì pún-siâⁿ Pek-lī-hêng, in-ūi i thong-ke tī-hia hiàn nî-chè.

7伊若講，好lah，就你ê奴僕有平安；伊若發受氣，就知伊決意beh害我。I nā kóng, Hó lah, chiū lí ê lô͘-po̍k ū pêng-an; i nā hoat siū-khì, chiū chai i koat-ì beh hāi góa.

8Taⁿ你tio̍h施恩hō͘你ê奴僕；因為你前有hō͘你ê奴僕kap你kí耶和華來結約；我若有罪，請你本身thâi我；啥事帶我到你ê老父hia？Taⁿ lí tio̍h si-un hō͘ lí ê lô͘-po̍k; in-ūi lí chêng ū hō͘ lí ê lô͘-po̍k kap lí kí Iâ-hô-hoa lâi kiat-iok; góa nā ū chōe, chhiáⁿ lí pún-sin thâi góa; siáⁿ-sū tòa góa kàu lí ê lāu-pē hia?

9約拿單講，決斷無對你án-ni行；因為我若真知我ê老父決意beh害你，我kiám無kā你講mah？Iok-ná-tan kóng, Koat-toàn bô tùi lí án-ni kiâⁿ; in-ūi góa nā chin chai góa ê lāu-pē koat-ì beh hāi lí, góa kiám bô kā lí kóng mah?

10大衛kā約拿單講，你ê老父若用pháiⁿ聲sàu應你，是誰 beh來kā我講ah？Tāi-pi̍t kā Iok-ná-tan kóng, Lí ê lāu-pē nā ēng pháiⁿ siaⁿ-sàu ìn lí, chī-chūi beh lâi kā góa kóng ah?

11約拿單kā大衛講，來lah，咱出來去田裡；兩人就出去田裡。Iok-ná-tan kā Tāi-pi̍t kóng, Lâi lah, lán chhut-lâi khì chhân-nih; nn̄g-lâng chiū chhut-khì chhân-nih.

12約拿單kā大衛講，願耶和華以色列ê上帝做干證，明á日chit時，á是第三日，我探看我ê老父，若有好意思ǹg大衛，我kiám無差人kā你講mah？Iok-ná-tan kā Tāi-pi̍t kóng, Goān Iâ-hô-hoa Í-sek-lia̍t ê Siōng-tè chòe kan-chèng, bîn-á-ji̍t chit-sî, á-sī tē-saⁿ ji̍t, góa thàm-khòaⁿ góa ê lāu-pē, nā ū hó ì-sù ǹg Tāi-pi̍t, góa kiám bô chhe lâng kā lí kóng mah?

13我ê老父若有意思害你，我beh kā你講，hō͘你平安去；若無，願耶和華加倍責罰約拿單；願耶和華kap你tī-teh，親像伊bat kap我ê老父tī-teh一樣。Góa ê lāu-pē nā ū ì-sù hāi lí, góa beh kā lí kóng, hō͘ lí pêng-an khì; nā-bô, goān Iâ-hô-hoa ka-pē chek-hoa̍t Iok-ná-tan; goān Iâ-hô-hoa kap lí tī-teh, chhin-chhiūⁿ I bat kap góa ê lāu-pē tī-teh chi̍t-iūⁿ.

14M̄-nā我活teh ê時，你tio̍h對我顯明耶和華ê慈愛，免得我死無；M̄-nā góa oa̍h-teh ê sî, lí tio̍h tùi góa hián-bêng Iâ-hô-hoa ê chû-ài, bián-tit góa sí-bô;

15就耶和華tùi地上一盡剪除大衛ê對敵ê時，你也永遠m̄-thang對我ê家絕斷你ê恩惠。chiū Iâ-hô-hoa tùi tōe-chiūⁿ it-chīn chián-tû Tāi-pi̍t ê tùi-te̍k ê sî, lí iā éng-oán m̄-thang tùi góa ê ke choa̍t-tn̄g lí ê un-hūi.

16約拿單就kap大衛ê家結約，講，願耶和華tùi大衛chiah-ê對敵ê手來討伊。Iok-ná-tan chiū kap Tāi-pi̍t ê ke kiat-iok, kóng, Goān Iâ-hô-hoa tùi Tāi-pi̍t chiah ê tùi-te̍k ê chhiú lâi thó i.

17約拿單因為疼大衛，就kah伊koh chiù-chōa；因為伊疼伊親像疼家己ê性命。Iok-ná-tan in-ūi thiàⁿ Tāi-pi̍t, chiū kah i koh chiù-chōa; in-ūi i thiàⁿ i chhin-chhiūⁿ thiàⁿ ka-kī ê sìⁿ-miā.

18約拿單kā伊講，明á日是月ê初一，你ê位放空，beh講你無tī-teh。Iok-ná-tan kā i kóng, Bîn-á-ji̍t sī ge̍h ê chhoe-it, lí ê ūi pàng-khang, beh kóng lí bô tī-teh.

19等到三日，你tio̍h緊緊落去到你前tú-tio̍h tāi-chì所bih ê所在，tī Í-sek ê石磐hia thèng候；Tán kàu saⁿ-ji̍t, lí tio̍h kín-kín lo̍h-khì kàu lí chêng tú-tio̍h tāi-chì só͘ bih ê só͘-chāi, tī Í-sek ê chio̍h-pôaⁿ hia thèng-hāu;

20我beh射三支箭tī石磐邊，ná親像考靶一樣；góa beh siā saⁿ ki chìⁿ tī chio̍h-pôaⁿ piⁿ, ná chhin-chhiūⁿ khó-pé chi̍t-iūⁿ;

21我beh差一個gín-ná，講，你去chhē hiah-ê箭；我若kā gín-ná講，看ah，箭tī你chit-pêng，tio̍h拾伊；你就thang tò來；我kí活ê耶和華來chiù-chōa，你有平安無害。góa beh chhe chi̍t ê gín-ná, kóng, Lí khì chhē hiah ê chìⁿ; góa nā kā gín-ná kóng, Khòaⁿ ah, chìⁿ tī lí chit-pêng, tio̍h khioh i; lí chiū thang tò-lâi; góa kí oa̍h ê Iâ-hô-hoa lâi chiù-chōa, lí ū pêng-an bô hāi.

22我若kā gín-ná講，看ah，箭tī你hit-pêng，你就tio̍h去；因為是耶和華差你去。Góa nā kā gín-ná kóng, Khòaⁿ ah, chìⁿ tī lí hit-pêng, lí chiū tio̍h khì; in-ūi sī Iâ-hô-hoa chhe lí khì.

23論到你我今á日所講ê，有耶和華tī你我ê中間，直到永遠。Lūn-kàu lí góa kin-á-ji̍t só͘-kóng-ê, ū Iâ-hô-hoa tī lí góa ê tiong-kan, ti̍t-kàu éng-oán.

24大衛就去bih tī田裡；到初一日，王坐桌得beh食。Tāi-pi̍t chiū khì bih tī chhân-nih; kàu chhoe-it ji̍t, ông chē-toh tit-beh chia̍h.

25王照常坐伊ê位，就是óa tī壁裡ê位；約拿單teh khiā；Ap-nî-jíⁿ坐tī掃羅ê身邊；大衛ê位放空。Ông chiàu-siông chē i ê ūi, chiū-sī óa tī piah-nih ê ūi; Iok-ná-tan teh khiā; Ap-nî-jíⁿ chē tī Sò-lô ê sin-piⁿ; Tāi-pi̍t ê ūi pàng-khang.

26總是chit日掃羅無講甚麼；伊phah算大衛tú-tio̍h tāi-chì，無清氣，伊的確是無清氣。Chóng-sī chit-ji̍t Sò-lô bô kóng sím-mi̍h; i phah-sǹg Tāi-pi̍t tú-tio̍h tāi-chì, bô chheng-khì, i tek-khak sī bô chheng-khì.

27隔日，就是hit月ê初二，大衛ê位猶原放空；掃羅問伊ê kiáⁿ約拿單講，耶西ê kiáⁿ怎樣chā-á日今á日無來食？Keh-ji̍t, chiū-sī hit ge̍h ê chhoe-jī, Tāi-pi̍t ê ūi iû-goân pàng-khang; Sò-lô mn̄g i ê kiáⁿ Iok-ná-tan kóng, Iâ-se ê kiáⁿ cháiⁿ-iūⁿ chā-á-ji̍t kin-á-ji̍t bô lâi chia̍h?

28約拿單應掃羅講，大衛切切求我准伊去伯利恆；Iok-ná-tan ìn Sò-lô kóng, Tāi-pi̍t chhiat-chhiat kiû góa chún i khì Pek-lī-hêng;

29伊講，求你准我去，因為阮tau tī城內有祭祀，我ê兄吩咐我去；taⁿ我若tī你ê目睭前得tio̍h恩典，求你准去見我hiah-ê兄；所以伊無來kap王坐桌。i kóng, Kiû lí chún góa khì, in-ūi goán tau tī siâⁿ-lāi ū chè-sū, góa ê hiaⁿ hoan-hù góa khì; taⁿ góa nā tī lí ê ba̍k-chiu-chêng tit-tio̍h un-tián, kiû lí chún khì kìⁿ góa hiah ê hiaⁿ; só͘-í i bô lâi kap ông chē-toh.

30掃羅對約拿單發受氣，kā伊講，你chit-ê硬心悖逆ê婦人人ê kiáⁿ，我kiám m̄知你揀耶西ê kiáⁿ家己取凌辱，致到你ê老母tú-tio̍h thǹg-theh ê凌辱mah？Sò-lô tùi Iok-ná-tan hoat siū-khì, kā i kóng, Lí chit ê ngī-sim pōe-ge̍k ê hū-jîn-lâng ê kiáⁿ góa kiám m̄-chai lí kéng Iâ-se ê kiáⁿ ka-kī chhú lêng-jio̍k, tì-kàu lí ê lāu-bú tú-tio̍h thǹg-theh ê lêng-jio̍k mah?

31因為耶西ê kiáⁿ活tī地上ê時，你kap你ê國的確bōe堅固；taⁿ tio̍h差人去掠伊到我chia，伊的確tio̍h死。In-ūi Iâ-se ê kiáⁿ oa̍h tī tōe-chiūⁿ ê sî, lí kap lí ê kok tek-khak bōe kian-kò͘; taⁿ tio̍h chhe lâng khì lia̍h i kàu góa chia, i tek-khak tio̍h sí.

32約拿單應伊ê老父掃羅，對伊講，伊啥事tio̍h死ah？伊有做甚麼ah？Iok-ná-tan ìn i ê lāu-pē Sò-lô, tùi i kóng, I siáⁿ-sū tio̍h sí ah? i ū chòe sím-mi̍h ah?

33掃羅cho̍h hit支鎗，beh鑿約拿單；約拿單就知伊ê老父決意beh thâi大衛。Sò-lô cho̍h hit ki chhiuⁿ, beh chha̍k Iok-ná-tan; Iok-ná-tan chiū chai i ê lāu-pē koat-ì beh thâi Tāi-pi̍t.

34Tùi án-ni，約拿單真受氣，就tùi桌裡起來，tī chit初二日無食甚麼；伊因為大衛煩惱，是因為伊ê老父凌辱伊。Tùi án-ni Iok-ná-tan chin siū-khì, chiū tùi toh-nih khí-lâi, tī chí chhoe-jī ji̍t bô chia̍h sím-mi̍h; i in-ūi Tāi-pi̍t hoân-ló, sī in-ūi i ê lāu-pē lêng-jio̍k i.

35隔早起，約拿單照伊kap大衛所約ê時，出去到田裡；有一個gín-ná kap伊去。Keh chá-khí, Iok-ná-tan chiàu i kap Tāi-pi̍t só͘ iok ê sî, chhut-khì kàu chhân-nih; ū chi̍t ê gín-ná kap i khì.

36Kā gín-ná講，你走去chhē我所射ê箭；gín-ná走去；伊就射一支箭tī伊ê頭前。Kā gín-ná kóng, Lí cháu-khì chhē góa só͘ siā ê chìⁿ; gín-ná cháu-khì; i chiū siā chi̍t ki chìⁿ tī i ê thâu-chêng.

37Gín-ná到約拿單箭射到ê所在，約拿單tī gín-ná ê後面叫講，箭kiám m̄是tī你ê頭前mah？Gín-ná kàu Iok-ná-tan chìⁿ siā kàu ê só͘-chāi, Iok-ná-tan tī gín-ná ê āu-bīn kiò kóng, Chìⁿ kiám m̄-sī tī lí ê thâu-chêng mah?

38約拿單koh叫gín-ná講，趕緊o͘h，緊緊去，m̄-thang 延chhiân。約拿單ê gín-ná就拾hiah-ê箭，倒tńg來伊ê主人hia。Iok-ná-tan koh kiò gín-ná kóng, Kóaⁿ-kín o͘h, kín-kín khì, m̄-thang iân-chhiân. Iok-ná-tan ê gín-ná chiū khioh hiah ê chìⁿ, tò-tńg lâi i ê chú-lâng hia.

39總是gín-ná m̄知這是甚麼意思，只有約拿單kap大衛知chit-ê tāi-chì。Chóng-sī gín-ná m̄-chai che sī sím-mi̍h ì-sù, chí-ū Iok-ná-tan kap Tāi-pi̍t chai chit ê tāi-chì.

40約拿單將器械交代gín-ná，吩咐講，你the̍h tò去城內。Iok-ná-tan chiong khì-hâi kau-tài gín-ná, hoan-hù kóng, Lí the̍h tò-khì siâⁿ-lāi.

41Gín-ná去了後，大衛就tùi南勢一所在出來，仆tī地裡，拜三拜，兩人相chim，相kap啼哭，大衛koh khah到極。Gín-ná khì liáu-āu, Tāi-pi̍t chiū tùi lâm-sì chi̍t só͘-chāi chhut-lâi, phak tī tōe-nih, pài saⁿ-pài, nn̄g-lâng saⁿ-chim, saⁿ-kap thî-khàu, Tāi-pi̍t koh khah kàu-ke̍k.

42約拿單kā大衛講，你taⁿ平安去；咱兩人已經kí耶和華ê名chiù-chōa講，願耶和華tī你我ê中間koh tī你ê後裔kap我ê後裔ê中間，直到永遠。伊就起來去；約拿單也tò去城內。Iok-ná-tan kā Tāi-pi̍t kóng, Lí taⁿ pêng-an khì; lán nn̄g-lâng í-keng kí Iâ-hô-hoa ê miâ chiù-chōa kóng, Goān Iâ-hô-hoa tī lí góa ê tiong-kan koh tī lí ê hō͘-è kap góa ê hō͘-è ê tiong-kan, ti̍t-kàu éng-oán. I chiū khí-lâi khì; Iok-ná-tan iā tò-khì siâⁿ-lāi.