1大衛tùi La̍h-má ê Ná-iok逃走，到約拿單ê面前，講，我做甚麼？我有甚麼pháiⁿ？tī你ê老父ê面前有甚麼罪，伊竟然teh siàu想我ê性命mah？Tāi-pi̍t tùi La̍h-má ê Ná-iok tô-cháu, kàu Iok-ná-tan ê bīn-chêng, kóng, Góa chòe sím-mi̍h? góa ū sím-mi̍h pháiⁿ? tī lí ê lāu-pē ê bīn-chêng ū sím-mi̍h chōe, i kéng-jiân teh siàu-siūⁿ góa ê sìⁿ-miā mah?

2約拿單kā伊講，決斷m̄是，你bōe到死；我ê老父做tāi-chì，無論大細，無一項無hō͘我知；我ê老父kiám kan-ta隱瞞我chit項事mah？決斷無án-ni。Iok-ná-tan kā i kóng, Koat-toàn m̄-sī, lí bōe kàu sí; góa ê lāu-pē chòe tāi-chì, bô-lūn tōa-sòe, bô chi̍t-hāng bô hō͘ góa chai; góa ê lāu-pē kiám kan-ta ún-môa góa chit hāng sū mah? koat-toàn bô án-ni.

3大衛koh chiù-chōa講，你ê老父準準知我tī你ê面前得tio̍h恩典；伊ê心講，M̄-thang hō͘約拿單知，驚了伊會憂悶；我kí耶和華ê永活kap你ê活命來chiù-chōa，我離開死只有一步nā-tiāⁿ。Tāi-pi̍t koh chiù-chōa kóng, Lí ê lāu-pē chún-chún chai góa tī lí ê bīn-chêng tit-tio̍h un-tián; i ê sim kóng, M̄-thang hō͘ Iok-ná-tan chai, kiaⁿ-liáu i ōe iu-būn; góa kí Iâ-hô-hoa ê éng-oa̍h kap lí ê oa̍h-miā lâi chiù-chōa, góa lī-khui sí chí-ū chi̍t-pō͘ nā-tiāⁿ.

4約拿單kā大衛講，你ê心所ài，我beh kā你做。Iok-ná-tan kā Tāi-pi̍t kóng, Lí ê sim só͘ ài, góa beh kā lí chòe.

5大衛kā約拿單講，明á日是初一，我應該tio̍h kap王坐桌；求你容允我去bih tī田裡，到第三日ê-hng。Tāi-pi̍t kā Iok-ná-tan kóng, Bîn-á-ji̍t sī chhoe-it, góa eng-kai tio̍h kap ông chē-toh; kiû lí iông-ún góa khì bih tī chhân-nih, kàu tē-saⁿ ji̍t ê-hng.

6你ê老父若看我無tī-teh，你就講，大衛切切求我准伊tò去本城伯利恆，因為伊thong家 tī-hia獻年祭。Lí ê lāu-pē nā khòaⁿ góa bô tī-teh, lí chiū kóng, Tāi-pi̍t chhiat-chhiat kiû góa chún i tò-khì pún-siâⁿ Pek-lī-hêng, in-ūi i thong-ke tī-hia hiàn nî-chè.

7伊若講，好lah，就你ê奴僕有平安；伊若發受氣，就知伊決意beh害我。I nā kóng, Hó lah, chiū lí ê lô͘-po̍k ū pêng-an; i nā hoat siū-khì, chiū chai i koat-ì beh hāi góa.

8Taⁿ你tio̍h施恩hō͘你ê奴僕；因為你前有hō͘你ê奴僕kap你kí耶和華來結約；我若有罪，請你本身thâi我；啥事帶我到你ê老父hia？Taⁿ lí tio̍h si-un hō͘ lí ê lô͘-po̍k; in-ūi lí chêng ū hō͘ lí ê lô͘-po̍k kap lí kí Iâ-hô-hoa lâi kiat-iok; góa nā ū chōe, chhiáⁿ lí pún-sin thâi góa; siáⁿ-sū tòa góa kàu lí ê lāu-pē hia?

9約拿單講，決斷無對你án-ni行；因為我若真知我ê老父決意beh害你，我kiám無kā你講mah？Iok-ná-tan kóng, Koat-toàn bô tùi lí án-ni kiâⁿ; in-ūi góa nā chin chai góa ê lāu-pē koat-ì beh hāi lí, góa kiám bô kā lí kóng mah?

10大衛kā約拿單講，你ê老父若用pháiⁿ聲sàu應你，是誰 beh來kā我講ah？Tāi-pi̍t kā Iok-ná-tan kóng, Lí ê lāu-pē nā ēng pháiⁿ siaⁿ-sàu ìn lí, chī-chūi beh lâi kā góa kóng ah?

11約拿單kā大衛講，來lah，咱出來去田裡；兩人就出去田裡。Iok-ná-tan kā Tāi-pi̍t kóng, Lâi lah, lán chhut-lâi khì chhân-nih; nn̄g-lâng chiū chhut-khì chhân-nih.

12約拿單kā大衛講，願耶和華以色列ê上帝做干證，明á日chit時，á是第三日，我探看我ê老父，若有好意思ǹg大衛，我kiám無差人kā你講mah？Iok-ná-tan kā Tāi-pi̍t kóng, Goān Iâ-hô-hoa Í-sek-lia̍t ê Siōng-tè chòe kan-chèng, bîn-á-ji̍t chit-sî, á-sī tē-saⁿ ji̍t, góa thàm-khòaⁿ góa ê lāu-pē, nā ū hó ì-sù ǹg Tāi-pi̍t, góa kiám bô chhe lâng kā lí kóng mah?

13我ê老父若有意思害你，我beh kā你講，hō͘你平安去；若無，願耶和華加倍責罰約拿單；願耶和華kap你tī-teh，親像伊bat kap我ê老父tī-teh一樣。Góa ê lāu-pē nā ū ì-sù hāi lí, góa beh kā lí kóng, hō͘ lí pêng-an khì; nā-bô, goān Iâ-hô-hoa ka-pē chek-hoa̍t Iok-ná-tan; goān Iâ-hô-hoa kap lí tī-teh, chhin-chhiūⁿ I bat kap góa ê lāu-pē tī-teh chi̍t-iūⁿ.

14M̄-nā我活teh ê時，你tio̍h對我顯明耶和華ê慈愛，免得我死無；M̄-nā góa oa̍h-teh ê sî, lí tio̍h tùi góa hián-bêng Iâ-hô-hoa ê chû-ài, bián-tit góa sí-bô;

15就耶和華tùi地上一盡剪除大衛ê對敵ê時，你也永遠m̄-thang對我ê家絕斷你ê恩惠。chiū Iâ-hô-hoa tùi tōe-chiūⁿ it-chīn chián-tû Tāi-pi̍t ê tùi-te̍k ê sî, lí iā éng-oán m̄-thang tùi góa ê ke choa̍t-tn̄g lí ê un-hūi.

16約拿單就kap大衛ê家結約，講，願耶和華tùi大衛chiah-ê對敵ê手來討伊。Iok-ná-tan chiū kap Tāi-pi̍t ê ke kiat-iok, kóng, Goān Iâ-hô-hoa tùi Tāi-pi̍t chiah ê tùi-te̍k ê chhiú lâi thó i.

17約拿單因為疼大衛，就kah伊koh chiù-chōa；因為伊疼伊親像疼家己ê性命。Iok-ná-tan in-ūi thiàⁿ Tāi-pi̍t, chiū kah i koh chiù-chōa; in-ūi i thiàⁿ i chhin-chhiūⁿ thiàⁿ ka-kī ê sìⁿ-miā.

18約拿單kā伊講，明á日是月ê初一，你ê位放空，beh講你無tī-teh。Iok-ná-tan kā i kóng, Bîn-á-ji̍t sī ge̍h ê chhoe-it, lí ê ūi pàng-khang, beh kóng lí bô tī-teh.

19等到三日，你tio̍h緊緊落去到你前tú-tio̍h tāi-chì所bih ê所在，tī Í-sek ê石磐hia thèng候；Tán kàu saⁿ-ji̍t, lí tio̍h kín-kín lo̍h-khì kàu lí chêng tú-tio̍h tāi-chì só͘ bih ê só͘-chāi, tī Í-sek ê chio̍h-pôaⁿ hia thèng-hāu;

20我beh射三支箭tī石磐邊，ná親像考靶一樣；góa beh siā saⁿ ki chìⁿ tī chio̍h-pôaⁿ piⁿ, ná chhin-chhiūⁿ khó-pé chi̍t-iūⁿ;

21我beh差一個gín-ná，講，你去chhē hiah-ê箭；我若kā gín-ná講，看ah，箭tī你chit-pêng，tio̍h拾伊；你就thang tò來；我kí活ê耶和華來chiù-chōa，你有平安無害。góa beh chhe chi̍t ê gín-ná, kóng, Lí khì chhē hiah ê chìⁿ; góa nā kā gín-ná kóng, Khòaⁿ ah, chìⁿ tī lí chit-pêng, tio̍h khioh i; lí chiū thang tò-lâi; góa kí oa̍h ê Iâ-hô-hoa lâi chiù-chōa, lí ū pêng-an bô hāi.

22我若kā gín-ná講，看ah，箭tī你hit-pêng，你就tio̍h去；因為是耶和華差你去。Góa nā kā gín-ná kóng, Khòaⁿ ah, chìⁿ tī lí hit-pêng, lí chiū tio̍h khì; in-ūi sī Iâ-hô-hoa chhe lí khì.

23論到你我今á日所講ê，有耶和華tī你我ê中間，直到永遠。Lūn-kàu lí góa kin-á-ji̍t só͘-kóng-ê, ū Iâ-hô-hoa tī lí góa ê tiong-kan, ti̍t-kàu éng-oán.

24大衛就去bih tī田裡；到初一日，王坐桌得beh食。Tāi-pi̍t chiū khì bih tī chhân-nih; kàu chhoe-it ji̍t, ông chē-toh tit-beh chia̍h.

25王照常坐伊ê位，就是óa tī壁裡ê位；約拿單teh khiā；Ap-nî-jíⁿ坐tī掃羅ê身邊；大衛ê位放空。Ông chiàu-siông chē i ê ūi, chiū-sī óa tī piah-nih ê ūi; Iok-ná-tan teh khiā; Ap-nî-jíⁿ chē tī Sò-lô ê sin-piⁿ; Tāi-pi̍t ê ūi pàng-khang.

26總是chit日掃羅無講甚麼；伊phah算大衛tú-tio̍h tāi-chì，無清氣，伊的確是無清氣。Chóng-sī chit-ji̍t Sò-lô bô kóng sím-mi̍h; i phah-sǹg Tāi-pi̍t tú-tio̍h tāi-chì, bô chheng-khì, i tek-khak sī bô chheng-khì.

27隔日，就是hit月ê初二，大衛ê位猶原放空；掃羅問伊ê kiáⁿ約拿單講，耶西ê kiáⁿ怎樣chā-á日今á日無來食？Keh-ji̍t, chiū-sī hit ge̍h ê chhoe-jī, Tāi-pi̍t ê ūi iû-goân pàng-khang; Sò-lô mn̄g i ê kiáⁿ Iok-ná-tan kóng, Iâ-se ê kiáⁿ cháiⁿ-iūⁿ chā-á-ji̍t kin-á-ji̍t bô lâi chia̍h?

28約拿單應掃羅講，大衛切切求我准伊去伯利恆；Iok-ná-tan ìn Sò-lô kóng, Tāi-pi̍t chhiat-chhiat kiû góa chún i khì Pek-lī-hêng;

29伊講，求你准我去，因為阮tau tī城內有祭祀，我ê兄吩咐我去；taⁿ我若tī你ê目睭前得tio̍h恩典，求你准去見我hiah-ê兄；所以伊無來kap王坐桌。i kóng, Kiû lí chún góa khì, in-ūi goán tau tī siâⁿ-lāi ū chè-sū, góa ê hiaⁿ hoan-hù góa khì; taⁿ góa nā tī lí ê ba̍k-chiu-chêng tit-tio̍h un-tián, kiû lí chún khì kìⁿ góa hiah ê hiaⁿ; só͘-í i bô lâi kap ông chē-toh.

30掃羅對約拿單發受氣，kā伊講，你chit-ê硬心悖逆ê婦人人ê kiáⁿ，我kiám m̄知你揀耶西ê kiáⁿ家己取凌辱，致到你ê老母tú-tio̍h thǹg-theh ê凌辱mah？Sò-lô tùi Iok-ná-tan hoat siū-khì, kā i kóng, Lí chit ê ngī-sim pōe-ge̍k ê hū-jîn-lâng ê kiáⁿ góa kiám m̄-chai lí kéng Iâ-se ê kiáⁿ ka-kī chhú lêng-jio̍k, tì-kàu lí ê lāu-bú tú-tio̍h thǹg-theh ê lêng-jio̍k mah?

31因為耶西ê kiáⁿ活tī地上ê時，你kap你ê國的確bōe堅固；taⁿ tio̍h差人去掠伊到我chia，伊的確tio̍h死。In-ūi Iâ-se ê kiáⁿ oa̍h tī tōe-chiūⁿ ê sî, lí kap lí ê kok tek-khak bōe kian-kò͘; taⁿ tio̍h chhe lâng khì lia̍h i kàu góa chia, i tek-khak tio̍h sí.

32約拿單應伊ê老父掃羅，對伊講，伊啥事tio̍h死ah？伊有做甚麼ah？Iok-ná-tan ìn i ê lāu-pē Sò-lô, tùi i kóng, I siáⁿ-sū tio̍h sí ah? i ū chòe sím-mi̍h ah?

33掃羅cho̍h hit支鎗，beh鑿約拿單；約拿單就知伊ê老父決意beh thâi大衛。Sò-lô cho̍h hit ki chhiuⁿ, beh chha̍k Iok-ná-tan; Iok-ná-tan chiū chai i ê lāu-pē koat-ì beh thâi Tāi-pi̍t.

34Tùi án-ni，約拿單真受氣，就tùi桌裡起來，tī chit初二日無食甚麼；伊因為大衛煩惱，是因為伊ê老父凌辱伊。Tùi án-ni Iok-ná-tan chin siū-khì, chiū tùi toh-nih khí-lâi, tī chí chhoe-jī ji̍t bô chia̍h sím-mi̍h; i in-ūi Tāi-pi̍t hoân-ló, sī in-ūi i ê lāu-pē lêng-jio̍k i.

35隔早起，約拿單照伊kap大衛所約ê時，出去到田裡；有一個gín-ná kap伊去。Keh chá-khí, Iok-ná-tan chiàu i kap Tāi-pi̍t só͘ iok ê sî, chhut-khì kàu chhân-nih; ū chi̍t ê gín-ná kap i khì.

36Kā gín-ná講，你走去chhē我所射ê箭；gín-ná走去；伊就射一支箭tī伊ê頭前。Kā gín-ná kóng, Lí cháu-khì chhē góa só͘ siā ê chìⁿ; gín-ná cháu-khì; i chiū siā chi̍t ki chìⁿ tī i ê thâu-chêng.

37Gín-ná到約拿單箭射到ê所在，約拿單tī gín-ná ê後面叫講，箭kiám m̄是tī你ê頭前mah？Gín-ná kàu Iok-ná-tan chìⁿ siā kàu ê só͘-chāi, Iok-ná-tan tī gín-ná ê āu-bīn kiò kóng, Chìⁿ kiám m̄-sī tī lí ê thâu-chêng mah?

38約拿單koh叫gín-ná講，趕緊o͘h，緊緊去，m̄-thang 延chhiân。約拿單ê gín-ná就拾hiah-ê箭，倒tńg來伊ê主人hia。Iok-ná-tan koh kiò gín-ná kóng, Kóaⁿ-kín o͘h, kín-kín khì, m̄-thang iân-chhiân. Iok-ná-tan ê gín-ná chiū khioh hiah ê chìⁿ, tò-tńg lâi i ê chú-lâng hia.

39總是gín-ná m̄知這是甚麼意思，只有約拿單kap大衛知chit-ê tāi-chì。Chóng-sī gín-ná m̄-chai che sī sím-mi̍h ì-sù, chí-ū Iok-ná-tan kap Tāi-pi̍t chai chit ê tāi-chì.

40約拿單將器械交代gín-ná，吩咐講，你the̍h tò去城內。Iok-ná-tan chiong khì-hâi kau-tài gín-ná, hoan-hù kóng, Lí the̍h tò-khì siâⁿ-lāi.

41Gín-ná去了後，大衛就tùi南勢一所在出來，仆tī地裡，拜三拜，兩人相chim，相kap啼哭，大衛koh khah到極。Gín-ná khì liáu-āu, Tāi-pi̍t chiū tùi lâm-sì chi̍t só͘-chāi chhut-lâi, phak tī tōe-nih, pài saⁿ-pài, nn̄g-lâng saⁿ-chim, saⁿ-kap thî-khàu, Tāi-pi̍t koh khah kàu-ke̍k.

42約拿單kā大衛講，你taⁿ平安去；咱兩人已經kí耶和華ê名chiù-chōa講，願耶和華tī你我ê中間koh tī你ê後裔kap我ê後裔ê中間，直到永遠。伊就起來去；約拿單也tò去城內。Iok-ná-tan kā Tāi-pi̍t kóng, Lí taⁿ pêng-an khì; lán nn̄g-lâng í-keng kí Iâ-hô-hoa ê miâ chiù-chōa kóng, Goān Iâ-hô-hoa tī lí góa ê tiong-kan koh tī lí ê hō͘-è kap góa ê hō͘-è ê tiong-kan, ti̍t-kàu éng-oán. I chiū khí-lâi khì; Iok-ná-tan iā tò-khì siâⁿ-lāi.

1大衛到Lô-pek，到祭司A-hi-bí-le̍k hia。A-hi-bí-le̍k驚惶來接大衛，對伊講，你啥事家己來，無人kap你來ah？Tāi-pi̍t kàu Lô-pek, kàu chè-si A-hi-bí-le̍k hia. A-hi-bí-le̍k kiaⁿ-hiâⁿ lâi chih Tāi-pi̍t, tùi i kóng, Lí siáⁿ-sū ka-kī lâi, bô lâng kap lí lâi ah?

2大衛應祭司A-hi-bí-le̍k講，王命令我一件事，koh kā我講，我所差你ê事，kap我所命令你ê，lóng m̄-thang hō͘人知；我已經派少年人tī某所在thèng候我；Tāi-pi̍t ìn chè-si A-hi-bí-le̍k kóng, Ông bēng-lēng góa chi̍t kiāⁿ sū, koh kā góa kóng, Góa só͘ chhe lí ê sū, kap góa só͘ bēng-lēng lí ê, lóng m̄-thang hō͘ lâng chai; góa í-keng phài siàu-liân lâng tī bó͘ só͘-chāi thèng-hāu góa;

3taⁿ你ê手有甚麼物，請你用五個餅hō͘我，á是別項。taⁿ lí ê chhiú ū sím-mi̍h mi̍h, chhiáⁿ lí ēng gō͘ ê piáⁿ hō͘ góa, á-sī pa̍t-hāng.

4祭司對大衛講，我ê手裡無平常ê餅，只有聖ê餅；若少年人無親近婦人人，chiah thang。Chè-si tùi Tāi-pi̍t kóng, Góa ê chhiú-nih bô pêng-siông ê piáⁿ, chí-ū sèng ê piáⁿ; nā siàu-liân lâng bô chhin-kūn hū-jîn-lâng, chiah thang.

5大衛應祭司kā伊講，到taⁿ約略有三日，bē-bat親近婦人人；我出門ê時，雖然是平常ê tāi-chì，少年人ê器具是清氣；何況今á日in ê器具kiám無聖mah？Tāi-pi̍t ìn chè-si kā i kóng, Kàu-taⁿ iok-lio̍k ū saⁿ-ji̍t, bē-bat chhin-kūn hū-jîn-lâng; góa chhut-mn̂g ê sî, sui-jiân sī pêng-siông ê tāi-chì, siàu-liân lâng ê khì-kū sī chheng-khì; hô-hòng kin-á-ji̍t in ê khì-kū kiám bô sèng mah?

6祭司就the̍h聖ê餅hō͘伊，因為tī-hia無別物ê餅，只有排列ê餅，tùi耶和華ê面前the̍h起來ê；the̍h起來hit日，是beh hē燒ê餅來排伊。Chè-si chiū the̍h sèng ê piáⁿ hō͘ i, in-ūi tī-hia bô pa̍t-mi̍h ê piáⁿ, chí-ū pâi-lia̍t ê piáⁿ, tùi Iâ-hô-hoa ê bīn-chêng the̍h-khí-lâi ê; the̍h-khí-lâi hit-ji̍t, sī beh hē sio ê piáⁿ lâi pâi i.

7當hit日tī-hia，有掃羅ê奴僕留tī耶和華ê面前，名叫To-ek，是Í-tong人，做掃羅顧cheng-siⁿ-ê ê頭人。Tng hit-ji̍t tī-hia, ū Sò-lô ê lô͘-po̍k lâu tī Iâ-hô-hoa ê bīn-chêng, miâ kiò To-ek, sī Í-tong lâng, chòe Sò-lô kò͘ cheng-siⁿ-ê ê thâu-lâng.

8大衛問A-hi-bí-le̍k講，你手下有鎗á是刀á無？因為王ê tāi-chì真緊急，我lóng無帶刀kap器械。Tāi-pi̍t mn̄g A-hi-bí-le̍k kóng, Lí chhiú-ē ū chhiuⁿ á-sī to á-bô? in-ūi ông ê tāi-chì chin kín-kip, góa lóng bô tòa to kap khì-hâi.

9祭司講，有腓利士人歌利亞ê刀，就是你前tī Í-la̍h ê山谷所thâi死ê，tī-chia，包tī布裡，tī Í-hut-tek ê後面；你若beh用，就kia̍h去，因為hit支以外無別項。大衛講，Chit支刀無一支會比得伊，請你hō͘我。Chè-si kóng, Ū Hui-lī-sū lâng Ko-lī-à ê to, chiū-sī lí chêng tī Í-la̍h ê soaⁿ-kok só͘ thâi-sí-ê, tī-chia, pau tī pò͘-nih, tī í-hut-tek ê āu-bīn; lí nā beh ēng, chiū kia̍h-khì, in-ūi hit-ki í-gōa bô pa̍t-hāng. Tāi-pi̍t kóng, Chit ki to bô chi̍t-ki ōe pí tit i, chhiáⁿ lí hō͘ góa.

10Hit日大衛起身，閃避掃羅，走到Ka-te̍k王A-kiat hia。Hit-ji̍t Tāi-pi̍t khí-sin, siám-pī Sò-lô, cháu kàu Ka-te̍k ông A-kiat hia.

11A-kiat hiah-ê人臣kā伊講，Chit-ê kiám m̄是hit國ê王大衛mah？in tī跳舞中唱和講， 掃羅thâi死in ê千千， 大衛thâi死in ê萬萬，kiám m̄是指chit人mah？A-kiat hiah ê jîn-sîn kā i kóng, Chit-ê kiám m̄-sī hit-kok ê ông Tāi-pi̍t mah? in tī thiàu-bú-tiong chhiùⁿ-hô[hō] kóng, Sò-lô thâi-sí in ê chheng-chheng, Tāi-pi̍t thâi-sí in ê bān-bān, kiám m̄-sī chí chit-lâng mah?

12大衛將chiah-ê話存tī心內，真驚Ka-te̍k王A-kiat；Tāi-pi̍t chiong chiah ê ōe chûn tī sim-lāi, chin kiaⁿ Ka-te̍k ông A-kiat;

13就tī眾人ê面前，改換舉動；tī in ê手下假顛狂，tī城門ê門扇亂寫亂劃，hō͘ nōa流tī嘴鬚裡。chiū tī chèng-lâng ê bīn-chêng, kóe-ōaⁿ kú-tōng; tī in ê chhiú-ē ké tian-kông, tī siâⁿ-mn̂g ê mn̂g-sìⁿ loān-siá loān-u̍ih, hō͘ nōa lâu tī chhùi-chhiu-nih.

14A-kiat kā伊ê人臣講，Lín看，chit-ê人是顛狂啥事帶伊來我chia ah？A-kiat kā i ê jîn-sîn kóng, Lín khòaⁿ, chit ê lâng sī tian-kông siáⁿ-sū tòa i lâi góa chia ah?

15我kiám有欠用顛狂ê，lín chiah chhōa chit人來顛狂tī我ê面前ah？Chit人kiám thang入我ê厝mah？Góa kiám ū khiàm-ēng tian-kông ê, lín chiah chhōa chit-lâng lâi tian-kông tī góa ê bīn-chêng ah? chit-lâng kiám thang ji̍p góa ê chhù mah?

1大衛就離開hia，走到A-tō͘-lân ê洞；伊ê兄弟kap伊ê老父全家聽見，就lóng落去到伊hia。Tāi-pi̍t chiū lī-khui hia, cháu kàu A-tō͘-lân ê tōng; i ê hiaⁿ-tī kap i ê lāu-pē choân-ke thiaⁿ-kìⁿ, chiū lóng lo̍h-khì kàu i hia.

2見若窘迫ê、欠債ê、心內鬱卒ê，lóng聚集到伊hia；大衛就做in ê頭；óa伊ê約略有四百人。Kìⁿ-nā khún-pek-ê, khiàm-chè-ê, sim-lāi ut-chut-ê, lóng chū-chi̍p kàu i hia; Tāi-pi̍t chiū chòe in ê thâu; óa i ê iok-lio̍k ū sì-pah lâng.

3大衛tùi hia去Mô͘-ap ê Bí-su-pa，kā Mô͘-ap王講，求你容允我ê老父，我ê老母出來，tiàm lín chia khiā，thèng候我知上帝beh kā我怎樣行。Tāi-pi̍t tùi hia khì Mô͘-ap ê Bí-su-pa, kā Mô͘-ap ông kóng, Kiû lí iông-ún góa ê lāu-pē, góa ê lāu-bú chhut-lâi, tiàm lín chia khiā, thèng-hāu góa chai Siōng-tè beh kā góa cháiⁿ-iūⁿ kiâⁿ.

4伊chhōa in到Mô͘-ap王ê面前。大衛tiàm tī山寨ê時chūn，伊ê父母也tiàm tī Mô͘-ap王hia。I chhōa in kàu Mô͘-ap ông ê bīn-chêng. Tāi-pi̍t tiàm tī soaⁿ-chē ê sî-chūn, i ê pē-bú iā tiàm tī Mô͘-ap ông hia.

5先知Ka-tek kā大衛講，你m̄-thang tiàm tī衛所，tio̍h去猶大地。大衛就離開hia，去到Hap-lia̍t ê樹林。Sian-ti Ka-tek kā Tāi-pi̍t kóng, Lí m̄-thang tiàm tī ōe-só͘, tio̍h khì Iû-tāi tōe. Tāi-pi̍t chiū lī-khui hia, khì kàu Hap-lia̍t ê chhiū-nâ.

6掃羅tī Ki-pí-a ê La̍h-má，坐tī垂絲柳ê樹腳，手裡kia̍h鎗，眾人臣圍纍tī伊ê左右。掃羅聽見講，大衛kap tè ê人hō͘人tú-tio̍h。Sò-lô tī Ki-pí-a ê La̍h-má, chē tī sûi-si-liú ê chhiū-kha, chhiú-nih kia̍h chhiuⁿ, chèng jîn-sîn ûi-lûi tī i ê chó-iū. Sò-lô thiaⁿ-kìⁿ kóng, Tāi-pi̍t kap tè ê lâng hō͘ lâng tú-tio̍h.

7掃羅就kā 圍伊ê人臣講，便雅憫人ah，lín tio̍h聽；耶西ê kiáⁿ會用田kap葡萄園hō͘ lín ta̍k人mah？能設立lín ta̍k人做千總、百總mah？Sò-lô chiū kā ûi i ê jîn-sîn kóng, Piān-ngá-bín lâng ah, lín tio̍h thiaⁿ; Iâ-se ê kiáⁿ ōe ēng chhân kap phû-tô-hn̂g hō͘ lín ta̍k-lâng mah? ōe siat-li̍p lín ta̍k-lâng chòe chhian-chóng, peh-chóng mah?

8Lín竟然相kap計謀攻擊我；我ê kiáⁿ bat kap耶西ê kiáⁿ結約，無人報我知；lín中間無一人可憐我；我ê kiáⁿ教唆我ê人臣攻擊我，當等我，親像今á日ê款，lín lóng無報我知。Lín kéng-jiân saⁿ-kap kè-bô͘ kong-kek góa; góa ê kiáⁿ bat kap Iâ-se ê kiáⁿ kiat-iok, bô lâng pò góa chai; lín tiong-kan bô chi̍t-lâng khó-lîn góa; góa ê kiáⁿ kàu-so góa ê jîn-sîn kong-kek góa, tng-tán góa, chhin-chhiūⁿ kin-á-ji̍t ê khoán, lín lóng bô pò góa chai.

9Hit時Í-tong人To-ek khiā tī掃羅人臣ê中間，kā伊講，我bat看見耶西ê kiáⁿ到Lô-pek，到A-hi-tu̍t ê kiáⁿ A-hi-bí-le̍k hia。Hit-sî Í-tong lâng To-ek khiā tī Sò-lô jîn-sîn ê tiong-kan, kā i kóng, Góa bat khòaⁿ-kìⁿ Iâ-se ê kiáⁿ kàu Lô-pek, kàu A-hi-tu̍t ê kiáⁿ A-hi-bí-le̍k hia.

10A-hi-bí-le̍k替伊問耶和華，koh hō͘伊食物，也用腓利士人歌利亞ê刀hō͘伊。A-hi-bí-le̍k thòe i mn̄g Iâ-hô-hoa, koh hō͘ i chia̍h-mi̍h, iā ēng Hui-lī-sū lâng Ko-lī-à ê to hō͘ i.

11王就差人召A-hi-tu̍t ê kiáⁿ，祭司A-hi-bí-le̍k，kap伊老父全家，就是tiàm tī Lô-pek hiah-ê祭司；in就lóng來王hia。Ông chiū chhe lâng tiàu A-hi-tu̍t ê kiáⁿ, chè-si A-hi-bí-le̍k, kap i lāu-pē choân-ke, chiū-sī tiàm tī Lô-pek hiah ê chè-si; in chiū lóng lâi ông hia.

12掃羅講，A-hi-tu̍t ê kiáⁿ ah，tio̍h聽。伊應講，我ê主ah，我tī-chia。Sò-lô kóng, A-hi-tu̍t ê kiáⁿ ah, tio̍h thiaⁿ. I ìn kóng, Góa ê chú ah, góa tī-chia.

13掃羅kā伊講，Lín啥事kap耶西ê kiáⁿ計謀攻擊我，你竟然用餅kap刀hō͘伊；koh替伊問上帝，hō͘伊起來攻擊我，當等我，親像今á日ê款？Sò-lô kā i kóng, Lín siáⁿ-sū kap Iâ-se ê kiáⁿ kè-bô͘ kong-kek góa, lí kéng-jiân ēng piáⁿ kap to hō͘ i; koh thòe i mn̄g Siōng-tè, hō͘ i khí-lâi kong-kek góa, tng-tán góa, chhin-chhiūⁿ kin-á-ji̍t ê khoán?

14A-hi-bí-le̍k應王講，你ê人臣中，是誰能比得大衛ê盡忠ah？伊是王ê kiáⁿ婿，koh做你ê參謀，也tī你ê家中是尊貴ê；A-hi-bí-le̍k ìn ông kóng, Lí ê jîn-sîn tiong, chī-chūi ōe pí-tit Tāi-pi̍t ê chīn-tiong ah? i sī ông ê kiáⁿ-sài, koh chòe lí ê chham-bô͘, iā tī lí ê ke-tiong sī chun-kùi ê;

15我kiám是tùi今á日chiah替伊問上帝mah？我決斷無hit號意思；王莫得用甚麼歸tī奴僕kap我ê老父全家；因為chiah-ê一切ê事，無論大細，你ê奴僕lóng m̄知。góa kiám-sī tùi kin-á-ji̍t chiah thòe i mn̄g Siōng-tè mah? Góa koat-toàn bô hit-hō ì-sù; ông bo̍h-tit ēng sím-mi̍h kui tī lô͘-po̍k kap góa ê lāu-pē choân-ke; in-ūi chiah-ê it-chhè ê sū, bô-lūn tōa-sòe, lí ê lô͘-po̍k lóng m̄-chai.

16王講，A-hi-bí-le̍k ah，你kap你ê老父全家lóng的確tio̍h死。Ông kóng, A-hi-bí-le̍k ah, lí kap lí ê lāu-pē choân-ke lóng tek-khak tio̍h sí.

17王命令左右ê侍衛講，Lín oa̍t-tńg去thâi耶和華ê祭司；因為in也幫贊大衛，koh因為in知大衛逃走，竟然無報我知。總是王ê人臣m̄肯伸手phah死耶和華ê祭司。Ông bēng-lēng chó-iū ê sī-ōe kóng, Lín oa̍t-tńg khì thâi Iâ-hô-hoa ê chè-si; in-ūi in iā pang-chān Tāi-pi̍t, koh in-ūi in chai Tāi-pi̍t tô-cháu, kéng-jiân bô pò góa chai. Chóng-sī ông ê jîn-sîn m̄-khéng chhun-chhiú phah-sí Iâ-hô-hoa ê chè-si.

18王kā To-ek講，你oa̍t-tńg去phah hiah-ê祭司。Í-tong人To-ek就oa̍t-tńg去phah祭司；hit日thâi死穿幼苧布ê í-hut-tek八十五人。Ông kā To-ek kóng, Lí oa̍t-tńg khì phah hiah ê chè-si. Í-tong lâng To-ek chiū oa̍t-tńg khì phah chè-si; hit-ji̍t thâi-sí chhēng iù-tōe-pò͘ ê í-hut-tek poeh-cha̍p-gō͘ lâng.

19Koh用刀phah祭司ê城Lô-pek其中ê男女、gín-ná、食奶ê嬰á，kap牛、驢、羊，lóng用刀thâi死。Koh ēng to phah chè-si ê siâⁿ Lô-pek kî-tiong ê lâm-lú, gín-ná, chia̍h-lin ê eⁿ-á, kap gû, lû, iûⁿ, lóng ēng to thâi-sí.

20A-hi-tu̍t ê kiáⁿ，A-hi-bí-le̍k有一個kiáⁿ，名叫A-pí-a-tha，脫離走去tè大衛。A-hi-tu̍t ê kiáⁿ, A-hi-bí-le̍k ū chi̍t ê kiáⁿ, miâ kiò A-pí-a-tha, thoat-lī cháu-khì tè Tāi-pi̍t.

21A-pí-a-tha kā大衛講，掃羅有thâi死耶和華ê祭司。A-pí-a-tha kā Tāi-pi̍t kóng, Sò-lô ū thâi-sí Iâ-hô-hoa ê chè-si.

22大衛kā A-pí-a-tha講，hit日Í-tong人To-ek tī-hia，我知伊的確會kā掃羅講；你ê老父全家失落性命，lóng是因為我ê緣故。Tāi-pi̍t kā A-pí-a-tha kóng, Hit-ji̍t Í-tong lâng To-ek tī-hia, góa chai i tek-khak ōe kā Sò-lô kóng; lí ê lāu-pē choân-ke sit-lo̍h sìⁿ-miā, lóng sī in-ūi góa ê iân-kò͘.

23你tio̍h kap我tòa，m̄免驚；因為siàu想我ê性命ê就是siàu想你ê性命；你kap我tòa，會得tio̍h保全。Lí tio̍h kap góa tòa, m̄-bián kiaⁿ; in-ūi siàu-siūⁿ góa ê sìⁿ-miā-ê chiū-sī siàu-siūⁿ lí ê sìⁿ-miā; lí kap góa tòa, ōe tit-tio̍h pó-choân.