1有人報大衛講，看ah，腓利士人phah Ki-i-la̍h，搶五穀場。Ū lâng pò Tāi-pi̍t kóng, Khòaⁿ ah, Hui-lī-sū lâng phah Ki-i-la̍h, chhiúⁿ gō͘-kak-tiûⁿ.

2大衛就問耶和華講，我thang去phah hiah-ê腓利士人á m̄-thang？耶和華kā大衛講，你thang去phah腓利士人，救Ki-i-la̍h。Tāi-pi̍t chiū mn̄g Iâ-hô-hoa kóng, Góa thang khì phah hiah ê Hui-lī-sū lâng á m̄-thang? Iâ-hô-hoa kā Tāi-pi̍t kóng, Lí thang khì phah Hui-lī-sū lâng, kiù Ki-i-la̍h.

3Tè大衛ê人kā伊講，咱tī猶大地chia尚且驚惶，何況去Ki-i-la̍h phah腓利士人ê軍隊ah？Tè Tāi-pi̍t ê lâng kā i kóng, Lán tī Iû-tāi tōe chia siōng-chhiáⁿ kiaⁿ-hiâⁿ, hô-hòng khì Ki-i-la̍h phah Hui-lī-sū lâng ê kun-tūi ah?

4大衛koh問耶和華；耶和華應講，你起來，落去Ki-i-la̍h，因為我beh用腓利士人交tī你ê手。Tāi-pi̍t koh mn̄g Iâ-hô-hoa; Iâ-hô-hoa ìn kóng, Lí khí-lâi, lo̍h-khì Ki-i-la̍h, in-ūi Góa beh ēng Hui-lī-sū lâng kau tī lí ê chhiú.

5大衛kap tè伊ê人去Ki-i-la̍h，kap腓利士人交戰；搶in ê cheng-siⁿ，thâi死in chōe-chōe人；án-ni大衛救Ki-i-la̍h khiā起ê百姓。Tāi-pi̍t kap tè i ê lâng khì Ki-i-la̍h, kap Hui-lī-sū lâng kau-chiàn; chhiúⁿ in ê cheng-siⁿ, thâi-sí in chōe-chōe lâng; án-ni Tāi-pi̍t kiù Ki-i-la̍h khiā-khí ê peh-sìⁿ.

6A-hi-bí-le̍k ê kiáⁿ A-pí-a-tha走去到Ki-i-la̍h見大衛ê時，手裡帶 í-hut-tek落去。A-hi-bí-le̍k ê kiáⁿ A-pí-a-tha cháu-khì kàu Ki-i-la̍h kìⁿ Tāi-pi̍t ê sî, chhiú-nih tòa í-hut-tek lo̍h-khì.

7有人kā掃羅講，大衛到Ki-i-la̍h；掃羅講，上帝將伊交tī我ê手，因為伊入有門有chhòaⁿ ê城，關tiâu tī hit內面。Ū lâng kā Sò-lô kóng, Tāi-pi̍t kàu Ki-i-la̍h; Sò-lô kóng, Siōng-tè chiong i kau tī góa ê chhiú, in-ūi i ji̍p ū mn̂g ū chhòaⁿ ê siâⁿ, koaiⁿ-tiâu tī hit lāi-bīn.

8掃羅就招集眾百姓beh去交戰，落去Ki-i-la̍h，圍困大衛kap tè伊ê人。Sò-lô chiū chio-chi̍p chèng peh-sìⁿ beh khì kau-chiàn, lo̍h-khì Ki-i-la̍h, ûi-khùn Tāi-pi̍t kap tè i ê lâng.

9大衛知掃羅設計謀beh害伊，就kā A-pí-a-tha講，你帶í-hut-tek來。Tāi-pi̍t chai Sò-lô siat kè-bô͘ beh hāi i, chiū kā A-pí-a-tha kóng, Lí tòa í-hut-tek lâi.

10大衛講，耶和華以色列ê上帝ah，你ê奴僕確實聽見掃羅ài-beh來Ki-i-la̍h，beh為tio̍h我ê緣故滅chit-ê城；Tāi-pi̍t kóng, Iâ-hô-hoa Í-sek-lia̍t ê Siōng-tè ah, Lí ê lô͘-po̍k khak-si̍t thiaⁿ-kìⁿ Sò-lô ài-beh lâi Ki-i-la̍h, beh ūi-tio̍h góa ê iân-kò͘ bia̍t chit ê siâⁿ;

11Ki-i-la̍h人beh將我交tī伊ê手á無？掃羅beh照你ê奴僕所聽見ê落來á無？耶和華以色列ê上帝ah，求你指示你ê奴僕。耶和華講，掃羅beh落來。Ki-i-la̍h lâng beh chiong góa kau tī i ê chhiú á-bô? Sò-lô beh chiàu Lí ê lô͘-po̍k só͘ thiaⁿ-kìⁿ-ê lo̍h-lâi á-bô? Iâ-hô-hoa Í-sek-lia̍t ê Siōng-tè ah, kiû Lí chí-sī Lí ê lô͘-po̍k. Iâ-hô-hoa kóng, Sò-lô beh lo̍h-lâi.

12大衛koh講，Ki-i-la̍h人beh將我kap tè我ê人交tī掃羅ê手mah？耶和華講，In beh將你交hō͘伊。Tāi-pi̍t koh kóng, Ki-i-la̍h lâng beh chiong góa kap tè góa ê lâng kau tī Sò-lô ê chhiú mah? Iâ-hô-hoa kóng, In beh chiong lí kau hō͘ i.

13大衛kap tè伊ê人，約略六百，就起身出Ki-i-la̍h，去in所去ê所在。有人kā掃羅講，大衛已經tùi Ki-i-la̍h逃走；掃羅就無出去。Tāi-pi̍t kap tè i ê lâng, iok-lio̍k la̍k-pah, chiū khí-sin chhut Ki-i-la̍h, khì in só͘ khì ê só͘-chāi. Ū lâng kā Sò-lô kóng, Tāi-pi̍t í-keng tùi Ki-i-la̍h tô-cháu; Sò-lô chiū bô chhut-khì.

14大衛tiàm tī曠野ê衛所，常常tī Se-hut曠野ê山地。掃羅ta̍k日chhē伊；總是上帝無將大衛交tī伊ê手。Tāi-pi̍t tiàm tī khòng-iá ê ōe-só͘, siông-siông tī Se-hut khòng-iá ê soaⁿ-tōe. Sò-lô ta̍k-ji̍t chhē i; chóng-sī Siōng-tè bô chiong Tāi-pi̍t kau tī i ê chhiú.

15大衛知掃羅已經出來teh siàu想伊ê性命，hit時大衛tī Se-hut ê曠野，tiàm tī樹林內。Tāi-pi̍t chai Sò-lô í-keng chhut-lâi teh siàu-siūⁿ i ê sìⁿ-miā, hit-sî Tāi-pi̍t tī Se-hut ê khòng-iá, tiàm tī chhiū-nâ-lāi.

16掃羅ê kiáⁿ約拿單起身，去hit-ê樹林內見大衛，hō͘伊靠上帝來堅固。Sò-lô ê kiáⁿ Iok-ná-tan khí-sin, khì hit ê chhiū-nâ-lāi kìⁿ Tāi-pi̍t, hō͘ i khò Siōng-tè lâi kian-kò͘.

17就kā伊講，m̄免驚，我ê父掃羅ê手chhē你bōe tio̍h；你beh做以色列王，我beh做你ê第二；chit-ê事我ê父掃羅已經知；Chiū kā i kóng, M̄-bián kiaⁿ, góa ê pē Sò-lô ê chhiú chhē lí bōe tio̍h; lí beh chòe Í-sek-lia̍t ông, góa beh chòe lí ê tē-jī; chit ê sū góa ê pē Sò-lô í-keng chai;

18Tùi án-ni，兩人tī耶和華ê面前結約。大衛tiàm樹林，約拿單tò去伊ê厝。tùi án-ni nn̄g-lâng tī Iâ-hô-hoa ê bīn-chêng kiat-iok. Tāi-pi̍t tiàm chhiū-nâ, Iok-ná-tan tò-khì i ê chhù.

19Se-hut人上去Ki-pí-a見掃羅講，大衛kiám m̄是tiàm tī阮hia，bih tī樹林內ê衛所，tī Iâ-sī-bûn南pêng ê Hap-ki-la̍h山mah？Se-hut lâng chiūⁿ-khì Ki-pí-a kìⁿ Sò-lô kóng, Tāi-pi̍t kiám m̄-sī tiàm tī goán hia, bih tī chhiū-nâ-lāi ê ōe-só͘, tī Iâ-sī-bûn lâm-pêng ê Hap-ki-la̍h soaⁿ mah?

20王ah，請你照你ê心所ài落去ê，落去；將伊交tī王ê手是阮ê tāi。Ông ah, chhiáⁿ lí chiàu lí ê sim só͘ ài lo̍h-khì-ê, lo̍h-khì; chiong i kau tī ông ê chhiú sī goán ê tāi.

21掃羅講，願耶和華賜福lín，因為lín可憐我。Sò-lô kóng, Goān Iâ-hô-hoa sù-hok lín, in-ūi lín khó-lîn góa.

22請lín tò去，koh事先備辦，詳細知，探看伊行踏ê所在；甚麼人看見伊tī-hia；因為有人kā我講，伊真狡獪(káu-koài)。Chhiáⁿ lín tò-khì, koh tāi-seng pī-pān, siông-sè chai, thàm-khòaⁿ i kiâⁿ-ta̍h ê só͘-chāi; sím-mi̍h lâng khòaⁿ-kìⁿ i tī-hia; in-ūi ū lâng kā góa kóng, i chin káu-koài.

23所以lín tio̍h查看知伊一切家己bih密ê所在，倒tńg來用實情kā我講；我就beh kap lín去；伊若tī chit-ê境內，我beh tī猶大ê眾鄉社kā伊chhiau出來。Só͘-í lín tio̍h chhâ-khòaⁿ chai i it-chhè ka-kī bih-ba̍t ê só͘-chāi, tò-tńg lâi ēng si̍t-chêng kā góa kóng; góa chiū beh kap lín khì; i nā tī chit ê kéng-lāi, góa beh tī Iû-tāi ê chèng hiuⁿ-siā kā i chhiau-chhut-lâi.

24In就起身，事先掃羅去Se-hut。大衛kap tè伊ê人tiàm tī Má-hûn ê曠野，tī Ia5si7-bûn南勢ê A-la̍h-pa。In chiū khí-sin, tāi-seng Sò-lô khì Se-hut. Tāi-pi̍t kap tè i ê lâng tiàm tī Má-hûn ê khòng-iá, tī Iâ-sī-bûn lâm-sì ê A-la̍h-pa.

25掃羅kap tè伊ê人去chhē伊；有人kā大衛講，伊就落去到石磐，tiàm tī Má-hûn ê曠野。掃羅聽見，就tī Má-hûn ê曠野追jip大衛。Sò-lô kap tè i ê lâng khì chhē i; ū lâng kā Tāi-pi̍t kóng, i chiū lo̍h-khì kàu chio̍h-pôaⁿ, tiàm tī Má-hûn ê khòng-iá. Sò-lô thiaⁿ-kìⁿ, chiū tī Má-hûn ê khòng-iá tui-jip Tāi-pi̍t.

26掃羅行tī山ê chit-pêng，大衛kap tè伊ê人行tī山ê hit-pêng；大衛緊急行，閃避tī掃羅ê面前；因為掃羅kap tè伊ê人，四面圍大衛kap tè伊ê人，beh掠in。Sò-lô kiâⁿ tī soaⁿ ê chit-pêng, Tāi-pi̍t kap tè i ê lâng kiâⁿ tī soaⁿ ê hit-pêng; Tāi-pi̍t kín-kip kiâⁿ, siám-pī tī Sò-lô ê bīn-chêng; in-ūi Sò-lô kap tè i ê lâng, sì-bīn ûi Tāi-pi̍t kap tè i ê lâng, beh lia̍h in.

27有使者到來報掃羅講，你tio̍h緊緊tò來，因為腓利士人侵犯境界。Ū sù-chiá kàu lâi pò Sò-lô kóng, Lí tio̍h kín-kín tò-lâi, in-ūi Hui-lī-sū lâng chhim-hoān kéng-kài.

28Tùi án-ni，掃羅無jip大衛，tò去抵敵腓利士人；因為án-ni，hit-ê所在名叫Se-la̍h-hap-má-hi-lô-kiat。Tùi án-ni Sò-lô bô jip Tāi-pi̍t, tò-khì tí-te̍k Hui-lī-sū lâng; in-ūi án-ni, hit ê só͘-chāi miâ-kiò Se-la̍h-hap-má-hi-lô-kiat.

29大衛tùi hia上去；tiàm tī Ún-ki-tí ê衛所。Tāi-pi̍t tùi hia chiūⁿ-khì; tiàm tī Ún-ki-tí ê ōe-só͘.

1掃羅追jip腓利士人tò來ê時，有人kā伊講，看ah，大衛tiàm tī Ún-ki-tí ê曠野。Sò-lô tui-jip Hui-lī-sū lâng tò-lâi ê sî, ū lâng kā i kóng, Khòaⁿ ah, Tāi-pi̍t tiàm tī Ún-ki-tí ê khòng-iá.

2掃羅就tùi以色列中chhōa揀選ê兵三千，去chhē大衛，kap tè伊ê人，去野山羊ê石磐；Sò-lô chiū tùi Í-sek-lia̍t tiong chhōa kéng-soán ê peng saⁿ-chheng, khì chhē Tāi-pi̍t, kap tè i ê lâng, khì iá-soaⁿ-iûⁿ ê chio̍h-pôaⁿ;

3到路邊ê羊寮，tī-hia有洞，掃羅入去beh大便。大衛kap tè伊ê人bih tī洞內khah深ê所在。kàu lō͘-piⁿ ê iûⁿ-tiâu, tī-hia ū tōng, Sò-lô ji̍p-khì beh tāi-piān. Tāi-pi̍t kap tè i ê lâng bih tī tōng-lāi khah chhim ê só͘-chāi.

4跟tè大衛ê人kā伊講，耶和華bat kā你講，我beh將你ê對敵交tī你ê手，照你所看做好ê款待伊；看ah，hit-ê日到lah。大衛就起來，暗靜割掃羅外服ê衫á裾。Kun-tè Tāi-pi̍t ê lâng kā i kóng, Iâ-hô-hoa bat kā lí kóng, Góa beh chiong lí ê tùi-te̍k kau tī lí ê chhiú, chiàu lí só͘ khòaⁿ-chòe hó-ê khoán-thāi i; khòaⁿ ah, hit ê ji̍t kàu lah. Tāi-pi̍t chiū khí-lâi, àm-chīⁿ koah Sò-lô gōa-ho̍k ê saⁿ-á-ku.

5後來大衛心內家己責備；因為割掃羅ê衫á裾。Āu-lâi Tāi-pi̍t sim-lāi ka-kī chek-pī; in-ūi koah Sò-lô ê saⁿ-á-ku.

6Tùi tè伊ê人講，願耶和華禁止我，對我ê主耶和華所抹油ê行chit-ê事，起手來攻擊伊，因為伊是耶和華所抹油ê。Tùi tè i ê lâng kóng, Goān Iâ-hô-hoa kìm-chí góa, tùi góa ê chú Iâ-hô-hoa só͘ boah-iû-ê kiâⁿ chit ê sū, khí-chhiú lâi kong-kek i, in-ūi i sī Iâ-hô-hoa só͘ boah-iû-ê.

7大衛用chiah-ê話阻止tè伊ê人，m̄准in起來攻擊掃羅。掃羅起來，tùi洞內出去行伊ê路。Tāi-pi̍t ēng chiah ê ōe chó͘-chí tè i ê lâng , m̄-chún in khí-lâi kong-kek Sò-lô. Sò-lô khí-lâi, tùi tōng-lāi chhut-khì kiâⁿ i ê lō͘.

8後來大衛也起來，tùi洞內出去，tī掃羅ê後面叫講，我ê主，我ê王。掃羅oa̍t頭看；大衛就屈身仆tī地裡拜。Āu-lâi Tāi-pi̍t iā khí-lâi, tùi tōng-lāi chhut-khì, tī Sò-lô ê āu-bīn kiò kóng, Góa ê chú, góa ê ông. Sò-lô oa̍t-thâu khòaⁿ; Tāi-pi̍t chiū khut-sin phak tī tōe-nih pài.

9大衛對掃羅講，你啥事聽人ê話，講，大衛想beh害你ah？Tāi-pi̍t tùi Sò-lô kóng, Lí siáⁿ-sū thiaⁿ lâng ê ōe, kóng, Tāi-pi̍t siūⁿ beh hāi lí ah?

10今á日你親目看見，今á日你tī洞內，耶和華將你交tī我ê手；有人kah我thâi你；總是我疼惜你；我講，我無beh伸手害我ê主；因為伊是耶和華所抹油ê。Kin-á-ji̍t lí chhin-ba̍k khòaⁿ-kìⁿ, kin-á-ji̍t lí tī tōng-lāi, Iâ-hô-hoa chiong lí kau tī góa ê chhiú; ū lâng kah góa thâi lí; chóng-sī góa thiàⁿ-sioh lí; góa kóng, Góa bô beh chhun-chhiú hāi góa ê chú; in-ūi i sī Iâ-hô-hoa só͘ boah-iû-ê.

11我ê父ah，你看cheh，看你外服ê衫á裾tī我ê手；我割你ê外服衫á裾，無thâi你；tùi án-ni，你thang看出就知我ê手無做甚麼pháiⁿ，無悖逆你；我m̄-bat得罪你，總是你親像phah獵siàu想我ê性命。Góa ê pē ah, lí khòaⁿ cheh, khòaⁿ lí gōa-ho̍k ê saⁿ-á-ku tī góa ê chhiú; góa koah lí ê gōa-ho̍k saⁿ-á-ku, bô thâi lí; tùi án-ni lí thang khòaⁿ-chhut chiū chai góa ê chhiú bô chòe sím-mi̍h pháiⁿ, bô pōe-ge̍k lí; góa m̄-bat tek-chōe lí, chóng-sī lí chhin-chhiūⁿ phah-la̍h siàu-siūⁿ góa ê sìⁿ-miā.

12願耶和華tī你我ê中間判斷，耶和華beh tī你ê身上kā我伸冤；總是我ê手無beh害你。Goān Iâ-hô-hoa tī lí góa ê tiong-kan phòaⁿ-toàn, Iâ-hô-hoa beh tī lí ê sin-chiūⁿ kā góa sin-oan; chóng-sī góa ê chhiú bô beh hāi lí.

13親像古早人有一句俗語講，pháiⁿ事tùi pháiⁿ人出；總是我ê手m̄ kāng你。Chhin-chhiūⁿ kó͘-chá lâng ū chi̍t-kù sio̍k-gú kóng, Pháiⁿ-sū tùi pháiⁿ-lâng chhut; chóng-sī góa ê chhiú m̄ kāng lí.

14以色列王出來beh chhē 是誰 ah？你追jip 是誰 ah？不過chhē一隻死狗，一粒kā蚤。Í-sek-lia̍t ông chhut-lâi beh chhē chī-chūi ah? lí tui-jip chī-chūi ah? put-kò chhē chi̍t chiah sí-káu, chi̍t lia̍p kā-cháu.

15所以願耶和華做審判司，判斷tī你我ê中間；koh鑑察來辯護我ê案件，救我出你ê手。Só͘-í goān Iâ-hô-hoa chòe sím-phòaⁿ-si, phòaⁿ-toàn tī lí góa ê tiong-kan; koh kàm-chhat lâi piān-hō͘ góa ê àn-kiāⁿ, kiù góa chhut lí ê chhiú.

16大衛對掃羅講chiah-ê話soah，掃羅講，我ê kiáⁿ大衛，這是你ê聲mah？掃羅就出聲啼哭；Tāi-pi̍t tùi Sò-lô kóng chiah ê ōe soah, Sò-lô kóng, Góa ê kiáⁿ Tāi-pi̍t, che sī lí ê siaⁿ mah? Sò-lô chiū chhut-siaⁿ thî-khàu;

17kā大衛講，你比我khah公義，因為你用好報我，總是我用pháiⁿ報你；kā Tāi-pi̍t kóng, Lí pí góa khah kong-gī, in-ūi lí ēng hó pò góa, chóng-sī góa ēng pháiⁿ pò lí;

18你今á日是表明用好款待我，因為耶和華將我交tī你ê手，總是你無thâi死我。lí kin-á-ji̍t sī piáu-bêng ēng hó khoán-thāi góa, in-ūi Iâ-hô-hoa chiong góa kau tī lí ê chhiú, chóng-sī lí bô thâi-sí góa.

19人若tú-tio̍h伊ê對敵，kiám有放伊平安去mah？願耶和華因為你今á日對我所行ê，用好報你；Lâng nā tú-tio̍h i ê tùi-te̍k, kiám ū pàng i pêng-an khì mah? Goān Iâ-hô-hoa in-ūi lí kin-á-ji̍t tùi góa só͘ kiâⁿ-ê, ēng hó pò lí;

20看ah，taⁿ我知你的確beh做王，以色列國beh堅固tī你ê手。khòaⁿ ah, taⁿ góa chai lí tek-khak beh chòe-ông, Í-sek-lia̍t kok beh kian-kò͘ tī lí ê chhiú.

21Taⁿ你tio̍h kí耶和華對我chiù-chōa，我過身了，無剪除我ê後裔，tī我ê父ê家無滅無我ê名。Taⁿ lí tio̍h kí Iâ-hô-hoa tùi góa chiù-chōa, góa kè-sin liáu, bô chián-tû góa ê hō͘-è, tī góa ê pē ê ke bô bia̍t-bô góa ê miâ.

22大衛就ǹg掃羅chiù-chōa。掃羅就tò去伊ê厝。大衛kap tè伊ê人上去衛所。Tāi-pi̍t chiū ǹg Sò-lô chiù-chōa. Sò-lô chiū tò-khì i ê chhù. Tāi-pi̍t kap tè i ê lâng chiūⁿ-khì ōe-só͘.

1撒母耳死，以色列眾人聚集，為tio̍h伊啼哭，埋葬伊tī伊家己ê厝，就是tī La̍h-má。大衛起身落去tī Pa-lân ê曠野。Sat-bó͘-jíⁿ sí, Í-sek-lia̍t chèng lâng chū-chi̍p, ūi-tio̍h i thî-khàu, bâi-chòng i tī i ka-kī ê chhù, chiū-sī tī La̍h-má. Tāi-pi̍t khí-sin lo̍h-khì tī Pa-lân ê khòng-iá.

2Tī Má-hûn有一人，伊ê產業tī Ka-bi̍t，是大好額人，有綿羊三千隻，山羊一千隻；伊tī Ka-bi̍t剪羊毛。Tī Má-hûn ū chi̍t-lâng, i ê sán-gia̍p tī Ka-bi̍t, sī tōa hó-gia̍h lâng, ū mî-iûⁿ saⁿ-chheng chiah, soaⁿ-iûⁿ chi̍t-chheng chiah; i tī Ka-bi̍t chián iûⁿ-mn̂g.

3Hit人是迦勒族ê人，名叫Ná-pat，伊ê bó͘名叫A-pí-kai，是聰明koh súi ê婦人人，總是hit人ê行做是硬心koh兇惡。Hit-lâng sī Ka-le̍k cho̍k ê lâng, miâ kiò Ná-pat, i ê bó͘ miâ kiò A-pí-kai, sī chhang-miâ koh súi ê hū-jîn-lâng, chóng-sī hit-lâng ê kiâⁿ-chòe sī ngī-sim koh hiong-ok.

4大衛tī曠野聽見Ná-pat teh剪羊毛，Tāi-pi̍t tī khòng-iá thiaⁿ-kìⁿ Ná-pat teh chián iûⁿ-mn̂g,

5大衛就差十個少年人；大衛吩咐hiah-ê少年人講，Lín tio̍h上去Ka-bi̍t，見Ná-pat，用我ê名kā伊請安。Tāi-pi̍t chiū chhe cha̍p ê siàu-liân lâng; Tāi-pi̍t hoan-hù hiah ê siàu-liân lâng kóng, Lín tio̍h chiūⁿ-khì Ka-bi̍t, kìⁿ Ná-pat, ēng góa ê miâ kā i chhéng-an.

6Tio̍h kā hit-ê好命人講，願你平安，願你ê家平安，願你一切所有ê lóng平安。Tio̍h kā hit ê hó-miā lâng kóng, Goān lí pêng-an, goān lí ê ke pêng-an, goān lí it-chhè só͘-ū-ê lóng pêng-an.

7Taⁿ我聽見講，有人tī你hia，kā你剪羊毛；你ê牧者bat kap阮tòa，阮無欺負伊；in tī Ka-bi̍t ê時，lóng bē-bat失落甚麼；Taⁿ góa thiaⁿ-kìⁿ kóng, ū lâng tī lí hia, kā lí chián iûⁿ-mn̂g; lí ê bo̍k-chiá bat kap goán tòa, goán bô khi-hū i; in tī Ka-bi̍t ê sî, lóng bē-bat sit-lo̍h sím-mi̍h;

8thang問你ê少年人，in beh kā你講；所以願我ê少年人tī你ê目睭前得tio̍h恩典；因為阮來是好日子，求你照你ê手隨便the̍h淡薄hō͘你ê奴僕，kap你ê kiáⁿ大衛。thang mn̄g lí ê siàu-liân lâng, in beh kā lí kóng; só͘-í goān góa ê siàu-liân lâng tī lí ê ba̍k-chiu chêng tit-tio̍h un-tián; in-ūi goán lâi sī hó ji̍t-chí, kiû lí chiàu lí ê chhiú sûi-piān the̍h tām-po̍h hō͘ lí ê lô͘-po̍k, kap lí ê kiáⁿ Tāi-pi̍t.

9大衛ê少年人到，就將chiah-ê話用大衛ê名，lóng kā Ná-pat講，就靜靜thèng候。Tāi-pi̍t ê siàu-liân lâng kàu, chiū chiong chiah ê ōe ēng Tāi-pi̍t ê miâ, lóng kā Ná-pat kóng, chiū chēng-chēng thèng-hāu.

10Ná-pat 應大衛ê奴僕講，大衛是是誰？耶西ê kiáⁿ是是誰？近來chōe-chōe奴僕背伊ê主人。Ná-pat ìn Tāi-pi̍t ê lô͘-po̍k kóng, Tāi-pi̍t sī chī-chūi? Iâ-se ê kiáⁿ sī chī-chūi? kūn-lâi chōe-chōe lô͘-po̍k pōe i ê chú-lâng.

11我ê餅，我ê水，kap為tio̍h kā剪羊毛ê人我所thâi cheng-siⁿ ê肉，beh hō͘剪羊毛ê人，我kiám thang hō͘ hiah-ê我m̄知伊tùi toh落來ê人mah？Góa ê piáⁿ, góa ê chúi, kap ūi-tio̍h kā chián iûⁿ-mn̂g ê lâng góa só͘ thâi cheng-siⁿ ê bah, beh hō͘ chián iûⁿ-mn̂g ê lâng, góa kiám thang hō͘ hiah ê góa m̄-chai i tùi toh-lo̍h lâi ê lâng mah?

12大衛ê少年人就oa̍t-tńg身，tùi原路tò去，照chiah-ê話lóng kā大衛講。Tāi-pi̍t ê siàu-liân lâng chiū oa̍t-tńg-sin, tùi goân-lō͘ tò-khì, chiàu chiah ê ōe lóng kā Tāi-pi̍t kóng.

13大衛對tè伊ê人講，Lín ta̍k人lóng tio̍h背刀；in就lóng 背刀。大衛也背刀；tè大衛上去ê約略有四百人，留兩百人顧守雜物。Tāi-pi̍t tùi tè i ê lâng kóng, Lín ta̍k-lâng lóng tio̍h pē to; in chiū lóng pē to. Tāi-pi̍t iā pē to; tè Tāi-pi̍t chiūⁿ-khì-ê iok-lio̍k ū sì-pah lâng, lâu nn̄g-pah lâng kò͘-siú cha̍p-mi̍h.

14Ná-pat hiah-ê少年人中有一個來kā Ná-pat ê bó͘ A-pí-kai講，大衛tùi曠野差使者來請安阮主人，主人反tńg嘲皮(sau-phî)in。Ná-pat hiah ê siàu-liân lâng tiong ū chi̍t-ê lâi kā Ná-pat ê bó͘ A-pí-kai kóng, Tāi-pi̍t tùi khòng-iá chhe sù-chiá lâi chhéng-an goán chú-lâng, chú-lâng hoán-tńg sau-phî in.

15總是hiah-ê人款待阮真好，阮tī田野kap in往來ê時，lóng無受傷害，也無失落甚麼；Chóng-sī hiah ê lâng khoán-thāi goán chin hó, goán tī chhân-iá kap in óng-lâi ê sî, lóng bô siū siong-hāi, iā bô sit-lo̍h sím-mi̍h;

16阮tī in hia飼羊ê時，in暝日做阮ê牆圍。goán tī in hia chhī-iûⁿ ê sî, in mî-ji̍t chòe goán ê chhiûⁿ-ûi.

17Taⁿ你tio̍h知，也tio̍h打算，看你beh怎樣行；因為有定tio̍h意思beh害阮ê主人kap伊ê全家；伊ê性情兇惡，無人敢kap伊講話。Taⁿ lí tio̍h chai, iā tio̍h táⁿ-sǹg, khòaⁿ lí beh cháiⁿ-iūⁿ kiâⁿ; in-ūi ū tiāⁿ-tio̍h ì-sù beh hāi goán ê chú-lâng kap i ê choân-ke; i ê sèng-chêng hiong-ok, bô lâng káⁿ kap i kóng-ōe.

18A-pí-kai就趕緊將兩百個餅，兩皮袋酒，五隻備辦好ê羊，五sè-a烘ê五穀，一百pha葡萄干，兩百個無花果餅，hō͘ kúi-nā隻驢背。A-pí-kai chiū kóaⁿ-kín chiong nn̄g-pah ê piáⁿ, nn̄g phê-tē chiú, gō͘-chiah pī-pān hó ê iûⁿ, gō͘ sè-a hang ê gō͘-kak, chi̍t-pah pha phû-tô-koaⁿ, nn̄g-pah ê bû-hoa-kó piáⁿ, hō͘ kúi-nā chiah lû pē.

19Kā伊hiah-ê少年人講，Lín做頭去，我beh tè lín ê後面去；總是無kā伊ê丈夫Ná-pat講。Kā i hiah ê siàu-liân lâng kóng, Lín chòe-thâu khì, góa beh tè lín ê āu-bīn khì; chóng-sī bô kā i ê tiōng-hu Ná-pat kóng.

20伊就騎驢，tú-á落山ê oat角忽然看見大衛kap tè伊ê人tī對面落來；伊就tú-tio̍h in。I chiū khiâ lû, tú-á lo̍h-soaⁿ ê oat-kak hut-jiân khòaⁿ-kìⁿ Tāi-pi̍t kap tè i ê lâng tī tùi-bīn lo̍h-lâi; i chiū tú-tio̍h in.

21大衛bat講，Chit人tī曠野一切所有ê，我kā伊顧守致到屬tī伊ê無失落一項，實在是空空；伊用pháiⁿ報我ê好。Tāi-pi̍t bat kóng, Chit-lâng tī khòng-iá it-chhè só͘ ū-ê, góa kā i kò͘-siú tì-kàu sio̍k tī i-ê bô sit-lo̍h chi̍t-hāng, si̍t-chāi sī khang-khang; i ēng pháiⁿ pò góa ê hó.

22凡若屬伊ê，我若留伊一個ta-po͘-kiáⁿ到明á天光，願上帝照án-ni款待大衛ê對敵，也比án-ni iáu khah重。Hoān-nā sio̍k i ê, góa nā lâu i chi̍t ê ta-po͘-kiáⁿ kàu bîn-á-thiⁿ-kng, goān Siōng-tè chiàu án-ni khoán-thāi Tāi-pi̍t ê tùi-te̍k, iā pí án-ni iáu khah-tāng.

23A-pí-kai看見大衛，就趕緊tùi伊ê驢落來，tī大衛ê面前àⁿ頭仆tī地裡，拜伊。A-pí-kai khòaⁿ-kìⁿ Tāi-pi̍t, chiū kóaⁿ-kín tùi i ê lû lo̍h-lâi, tī Tāi-pi̍t ê bīn-chêng àⁿ-thâu phak tī tōe-nih, pài i.

24仆tī伊ê腳下，講，我ê主ah，願chit-ê罪歸tī我，求你准你ê女婢講hō͘你聽，koh求你聽你ê女婢ê話。Phak tī i ê kha-ē, kóng, Góa ê chú ah, goān chit ê chōe kui tī góa, kiû lí chún lí ê lú-pī kóng hō͘ lí thiaⁿ, koh kiû lí thiaⁿ lí ê lú-pī ê ōe.

25求我ê主莫得致意chit-ê無hē落ê人Ná-pat，因為伊ê名怎樣，伊ê人款也是án-ni；伊ê名叫Ná-pat，伊做人果然愚戇。總是我ê主所差來ê少年人，你ê女婢也無看見。Kiû góa ê chú bo̍h-tit tì-ì chit ê bô hē-lo̍h ê lâng Ná-pat, in-ūi i ê miâ cháiⁿ-iūⁿ, i ê lâng-khoán iā sī án-ni; i ê miâ kiò Ná-pat, i chòe-lâng kó-jiân gû-gōng. Chóng-sī góa ê chú só͘ chhe-lâi ê siàu-liân lâng, lí ê lú-pī iā bô khòaⁿ-kìⁿ.

26我ê主ah，耶和華既然禁止你犯tio̍h thâi死人ê罪，用你ê手報家己ê仇讎，所以我kí永活ê耶和華kap你ê活命來chiù-chōa，講，願你ê對敵，kap計謀害我ê主ê，lóng親像Ná-pat。Góa ê chú ah, Iâ-hô-hoa kì-jiân kìm-chí lí hoān-tio̍h thâi-sí lâng ê chōe, ēng lí ê chhiú pò ka-kī ê kiû-siû, só͘-í góa kí éng-oa̍h ê Iâ-hô-hoa kap lí ê oa̍h-miā lâi chiù-chōa, kóng, Goān lí ê tùi-te̍k, kap kè-bô͘ hāi góa ê chú ê, lóng chhin-chhiūⁿ Ná-pat.

27Taⁿ你ê女婢所帶來hō͘我ê主ê禮物，thang hō͘跟tè我ê主ê少年人；Taⁿ lí ê lú-pī só͘ tòa lâi hō͘ góa ê chú ê lé-mi̍h, thang hō͘ kun-tè góa ê chú ê siàu-liân lâng;

28求你寬恕你ê女婢ê罪過；因為耶和華的確kā我ê主建立堅固ê家，因為我ê主為tio̍h耶和華交戰；koh tī你一生ê日無查出你有甚麼過失。kiû lí khoan-sù lí ê lú-pī ê chōe-kòa; in-ūi Iâ-hô-hoa tek-khak kā góa ê chú kiàn-li̍p kian-kò͘ ê ke, in-ūi góa ê chú ūi-tio̍h Iâ-hô-hoa kau-chiàn; koh tī lí it-seng ê ji̍t bô chhâ-chhut lí ū sím-mi̍h kè-sit.

29雖然有人起來追jip你，siàu想你ê性命，總是我ê主ê性命beh tī耶和華你ê上帝hia，包tī活命ê包內；你ê對敵ê性命，耶和華beh kā伊hìⁿ出來，親像tùi hìⁿ索ê中間hìⁿ出去一樣。Sui-jiân ū lâng khí-lâi tui-jip lí, siàu-siūⁿ lí ê sìⁿ-miā, chóng-sī góa ê chú ê sìⁿ-miā beh tī Iâ-hô-hoa lí ê Siōng-tè hia, pau tī oa̍h-miā ê pau-lāi; lí ê tùi-te̍k ê sìⁿ-miā Iâ-hô-hoa beh kā i hìⁿ-chhut-lâi, chhin-chhiūⁿ tùi hìⁿ-soh ê tiong-kan hìⁿ-chhut-khì chi̍t-iūⁿ.

30到後日，耶和華照伊所應允我ê主ê福氣，來一盡行tī你，設立你做以色列ê頭，Kàu āu-ji̍t Iâ-hô-hoa chiàu I só͘ èng-ún góa ê chú ê hok-khì, lâi it-chīn kiâⁿ tī lí, siat-li̍p lí chòe Í-sek-lia̍t ê thâu,

31當hit時，我ê主m̄免為tio̍h流無罪ê人ê血，申家己ê冤，致到有甚麼憂悶，á是心內家己責備；耶和華賜福hō͘我ê主ê時，求你記念你ê女婢。tng hit-sî, góa ê chú m̄-bián ūi-tio̍h lâu bô-chōe ê lâng ê huih, sin ka-kī ê oan, tì-kàu ū sím-mi̍h iu-būn, á-sī sim-lāi ka-kī chek-pī; Iâ-hô-hoa sù-hok hō͘ góa ê chú ê sî, kiû lí kì-liām lí ê lú-pī.

32大衛kā A-pí-kai講，耶和華以色列ê上帝，是應該o-ló ê；因為伊今á日差你來tú-tio̍h我；Tāi-pi̍t kā A-pí-kai kóng, Iâ-hô-hoa Í-sek-lia̍t ê Siōng-tè, sī eng-kai o-ló ê; in-ūi I kin-á-ji̍t chhe lí lâi tú-tio̍h góa;

33你ê智慧thang o-ló，你本身也thang o-ló；因為你今á日阻擋我犯tio̍h thâi死人ê罪，無用家己ê手報家己ê仇讎。lí ê tì-hūi thang o-ló, lí pún-sin iā thang o-ló; in-ūi lí kin-á-ji̍t chó͘-tòng góa hoān-tio̍h thâi-sí lâng ê chōe, bô ēng ka-kī ê chhiú pò ka-kī ê kiû-siû.

34禁止我傷害你ê耶和華以色列ê上帝，我kí祂ê永活來chiù-chōa，若你無緊緊來接我，到明á早起見若屬Ná-pat ê，決斷無留一個ta-po͘-kiáⁿ。Kìm-chí góa siong-hāi lí ê Iâ-hô-hoa Í-sek-lia̍t ê Siōng-tè, góa kí I ê éng-oa̍h lâi chiù-chōa, nā lí bô kín-kín lâi chih góa, kàu bîn-á-chá-khí kìⁿ-nā sio̍k Ná-pat ê, koat-toàn bô lâu chi̍t ê ta-po͘-kiáⁿ.

35大衛收 A-pí-kai帶來hō͘伊ê物，就kā伊講，你thang平安tò去你ê家；看ah，我有聽你ê話，帶tio̍h你。Tāi-pi̍t siu A-pí-kai tòa lâi hō͘ i ê mi̍h, chiū kā i kóng, Lí thang pêng-an tò-khì lí ê ke; khòaⁿ ah, góa ū thiaⁿ lí ê ōe, tòa-tio̍h lí.

36A-pí-kai到Ná-pat hia，看見伊tī家內排設筵席，親像王ê筵席；Ná-pat心大歡喜，因為伊真大醉。所以A-pí-kai無論大細ê事，lóng無kā伊講；thèng候到隔早起。A-pí-kai kàu Ná-pat hia, khòaⁿ-kìⁿ i tī ke-lāi pâi-siat iân-sia̍h, chhin-chhiūⁿ ông ê iân-sia̍h; Ná-pat sim tōa hoaⁿ-hí, in-ūi i chin tōa chùi. Só͘-í A-pí-kai bô-lūn tōa-sòe ê sū, lóng bô kā i kóng; thèng-hāu kàu keh chá-khí.

37到隔早起，Ná-pat酒退；伊ê bó͘將chiah-ê事kā伊講；伊ê心tī內面親像死，伊變親像石頭。Kàu keh chá-khí, Ná-pat chiú thè; i ê bó͘ chiong chiah ê sū kā i kóng; i ê sim tī lāi-bīn chhin-chhiūⁿ sí, i piàn chhin-chhiūⁿ chio̍h-thâu.

38約略十日，耶和華phah Ná-pat；伊就死。Iok-lio̍k cha̍p-ji̍t Iâ-hô-hoa phah Ná-pat; i chiū sí.

39大衛聽見Ná-pat已經死，就講，應該tio̍h o-ló耶和華，因為我tùi Ná-pat ê手所受ê凌辱，伊有kā我伸冤，koh阻止奴僕行pháiⁿ；耶和華也hō͘ Ná-pat ê pháiⁿ歸到Ná-pat ê頭殼。Án-ni大衛就差人去kap A-pí-kai講，beh娶伊做bó͘。Tāi-pi̍t thiaⁿ-kìⁿ Ná-pat í-keng sí, chiū kóng, Eng-kai tio̍h o-ló Iâ-hô-hoa, in-ūi góa tùi Ná-pat ê chhiú só͘ siū ê lêng-jio̍k, I ū kā góa sin-oan, koh chó͘-chí lô͘-po̍k kiâⁿ-pháiⁿ; Iâ-hô-hoa iā hō͘ Ná-pat ê pháiⁿ kui kàu Ná-pat ê thâu-khak. Án-ni Tāi-pi̍t chiū chhe lâng khì kap A-pí-kai kóng, beh chhōa i chòe-bó͘.

40大衛ê奴僕到Ka-bi̍t見A-pí-kai，kā伊講，大衛差阮來見你，想beh 娶你做bó͘。Tāi-pi̍t ê lô͘-po̍k kàu Ka-bi̍t kìⁿ A-pí-kai, kā i kóng, Tāi-pi̍t chhe goán lâi kìⁿ lí, siūⁿ beh chhōa lí chòe-bó͘.

41A-pí-kai就起來，仆tī地裡，講，你ê女婢tī-chia，願做差用，來洗我ê主hiah-ê奴僕ê腳。A-pí-kai chiū khí-lâi, phak tī tōe-nih, kóng, Lí ê lú-pī tī-chia, goān chòe chhe-ēng, lâi sóe góa ê chú hiah ê lô͘-po̍k ê kha.

42A-pí-kai緊緊起來，騎驢，有伊五個女婢相kap去；伊就tè大衛ê使者去做大衛ê bó͘。A-pí-kai kín-kín khí-lâi, khiâ-lû, ū i gō͘ ê lú-pī saⁿ-kap khì; i chiū tè Tāi-pi̍t ê sù-chiá khì chòe Tāi-pi̍t ê bó͘.

43大衛也娶Iâ-su-lia̍t人A-hi-loán；in兩人lóng做伊ê bó͘。Tāi-pi̍t iā chhōa Iâ-su-lia̍t lâng A-hi-loán; in nn̄g-lâng lóng chòe i ê bó͘.

44掃羅已經將伊ê cha-bó͘-kiáⁿ Bí-kah，就是大衛ê bó͘，hō͘ Ka-lîm人，La̍h-ek ê kiáⁿ Phàⁿ-thê做bó͘。Sò-lô í-keng chiong i ê cha-bó͘-kiáⁿ Bí-kah, chiū-sī Tāi-pi̍t ê bó͘, hō͘ Ka-lîm lâng, La̍h-ek ê kiáⁿ Phàⁿ-thê chòe bó͘.