1Hit時腓利士人聚集軍兵出陣，beh kap以色列人交戰。A-kiat對大衛講，你tio̍h確實知，你kap tè你ê人lóng tio̍h tè我出陣。Hit-sî Hui-lī-sū lâng chū-chi̍p kun-peng chhut-tīn, beh kap Í-sek-lia̍t lâng kau-chiàn. A-kiat tùi Tāi-pi̍t kóng, Lí tio̍h khak-si̍t chai, lí kap tè lí ê lâng lóng tio̍h tè góa chhut-tīn.

2大衛對A-kiat講，是，奴僕所能做ê tāi-chì，你的確會知。A-kiat kā大衛講，Án-ni，我設立你永遠做我ê侍衛長。Tāi-pi̍t tùi A-kiat kóng, Sī, lô͘-po̍k só͘ ōe chòe ê tāi-chì, lí tek-khak ōe chai. A-kiat kā Tāi-pi̍t kóng, Án-ni, góa siat-li̍p lí éng-oán chòe góa ê sī-ōe-tiúⁿ.

3Hit時撒母耳已經死，以色列眾人為tio̍h伊哀哭，埋葬i tī La̍h-má，就是tī伊ê本城。掃羅bat趕逐鬼上身ê kap行邪術ê離開伊ê境內。Hit-sî Sat-bó͘-jíⁿ í-keng sí, Í-sek-lia̍t chèng-lâng ūi-tio̍h i ai-khàu, bâi-chòng i tī La̍h-má, chiū-sī tī i ê pún-siâⁿ. Sò-lô bat kóaⁿ-tio̍k kúi chiūⁿ-sin-ê kap kiâⁿ siâ-su̍t-ê lī-khui i ê kéng-lāi.

4腓利士人聚集，紮營tī Su-liām；掃羅聚集以色列眾人，紮營tī Ki-lī-pho。Hui-lī-sū lâng chū-chi̍p, chat-iâⁿ tī Su-liām; Sò-lô chū-chi̍p Í-sek-lia̍t chèng-lâng, chat-iâⁿ tī Ki-lī-pho.

5掃羅看見腓利士ê軍兵，就真驚，心pho̍k-pho̍k-chhéng到極。Sò-lô khòaⁿ-kìⁿ Hui-lī-sū ê kun-peng, chiū chin kiaⁿ, sim pho̍k-pho̍k-chhéng kàu-ke̍k.

6掃羅問耶和華；耶和華lóng無用眠夢，á是O͘-lêng，á是先知，來應伊。Sò-lô mn̄g Iâ-hô-hoa; Iâ-hô-hoa lóng bô ēng bîn-bāng, á-sī O͘-lêng, á-sī sian-ti, lâi ìn i.

7掃羅吩咐伊ê奴僕講，你tio̍h kā我chhē紅姨，hō͘我thang去伊 hia問伊；奴僕講，Tī Ún-to-jíⁿ有一個紅姨。Sò-lô hoan-hù i ê lô͘-po̍k kóng, Lí tio̍h kā góa chhē ang-î, hō͘ góa thang khì i hia mn̄g i; lô͘-po̍k kóng, Tī Ún-to-jíⁿ ū chi̍t ê ang-î.

8掃羅就改換伊ê形容，穿別號ê衫，有兩人kap伊去，暝時去hit-ê婦人人hia。掃羅講，請你用上你ê身ê神，kā我行法術，我所kā你講ê人，你kā我牽伊上來。Sò-lô chiū kóe-ōaⁿ i ê hêng-iông, chhēng pa̍t-hō ê saⁿ, ū nn̄g-lâng kap i khì, mî-sî khì hit ê hū-jîn-lâng hia. Sò-lô kóng, Chhiáⁿ lí ēng chiūⁿ lí ê sin ê sîn, kā góa kiâⁿ hoat-su̍t, góa só͘ kā lí kóng ê lâng, lí kā góa khan i chiūⁿ lâi.

9婦人人對伊講；看ah，你知掃羅ê所做；伊tùi境內剪除chiah-ê鬼上身ê，kap行邪術ê；你啥事設計beh害死我ê性命ah？Hū-jîn-lâng tùi i kóng; khòaⁿ ah, lí chai Sò-lô ê só͘-chòe; i tùi kéng-lāi chián-tû chiah ê kúi chiūⁿ-sin-ê, kap kiâⁿ siâ-su̍t ê; lí siáⁿ-sū siat-kè beh hāi-sí góa ê sìⁿ-miā ah?

10掃羅kí耶和華對伊chiù-chōa，講，我kí永活ê耶和華來chiù-chōa，你無beh因為chit-ê事受刑罰。Sò-lô kí Iâ-hô-hoa tùi i chiù-chōa, kóng, Góa kí éng-oa̍h ê Iâ-hô-hoa lâi chiù-chōa, lí bô beh in-ūi chit ê sū siū hêng-hoa̍t.

11婦人人講，我tio̍h kā你牽甚麼人上來ah？伊講，Kā我牽撒母耳上來。Hū-jîn-lâng kóng, Góa tio̍h kā lí khan sím-mi̍h lâng chiūⁿ-lâi ah? I kóng, Kā góa khan Sat-bó͘-jíⁿ chiūⁿ-lâi.

12婦人人看見撒母耳，就大聲叫；婦人人kā掃羅講，你啥事騙我；因為你是掃羅。Hū-jîn-lâng khòaⁿ-kìⁿ Sat-bó͘-jíⁿ, chiū tōa-siaⁿ kiò; hū-jîn-lâng kā Sò-lô kóng, Lí siáⁿ-sū phiàn góa; in-ūi lí sī Sò-lô.

13王對伊講，莫得驚，你看見甚麼？婦人人kā掃羅講，我看見神明tùi地裡上來。Ông tùi i kóng, Bo̍h-tit kiaⁿ, lí khòaⁿ-kìⁿ sím-mi̍h? Hū-jîn-lâng kā Sò-lô kóng, Góa khòaⁿ-kìⁿ sîn-bêng tùi tōe-nih chiūⁿ-lâi.

14掃羅講，伊ê形狀怎樣？伊講，有一個老人上來，身軀moa長衫。Sò-lô kóng, I ê hêng-chōng cháiⁿ-iūⁿ? I kóng, Ū chi̍t ê lāu-lâng chiūⁿ-lâi, sin-khu moa tn̂g-saⁿ.

15掃羅知是撒母耳，就仆tī地裡拜伊。撒母耳kā掃羅講，你啥事攪擾我，牽我上來ah？掃羅講，我困苦到極；因為腓利士人kap我交戰，上帝也離開我，無koh用先知，á是眠夢，來應我；所以我請你來，thang指示我tio̍h怎樣行。Sò-lô chai sī Sat-bó͘-jíⁿ, chiū phak tī tōe-nih pài i. Sat-bó͘-jíⁿ kā Sò-lô kóng, Lí siáⁿ-sū kiáu-jiáu góa, khan góa chiūⁿ-lâi ah? Sò-lô kóng, Góa khùn-khó͘ kàu-ke̍k; in-ūi Hui-lī-sū lâng kap góa kau-chiàn, Siōng-tè iā lī-khui góa, bô koh ēng sian-ti, á-sī bîn-bāng, lâi ìn góa; só͘-í góa chhiáⁿ lí lâi, thang chí-sī góa tio̍h cháiⁿ-iūⁿ kiâⁿ.

16撒母耳講，耶和華已經離開你，續做你ê對敵；你啥事問我ah？Sat-bó͘-jíⁿ kóng, Iâ-hô-hoa í-keng lī-khui lí, sòa chòe lí ê tùi-te̍k; lí siáⁿ-sū mn̄g góa ah?

17耶和華照伊託我所講ê話行tī你；耶和華已經對你ê手搶奪國位，hō͘你ê同伴大衛。Iâ-hô-hoa chiàu I thok góa só͘ kóng ê ōe kiâⁿ tī lí; Iâ-hô-hoa í-keng tùi lí ê chhiú chhiúⁿ-toa̍t kok-ūi, hō͘ lí ê tâng-phōaⁿ Tāi-pi̍t.

18因為你無thàn耶和華ê話，行伊ê大受氣tī A-má-le̍k，所以耶和華今á日án-ni行tī你；In-ūi lí bô thàn Iâ-hô-hoa ê ōe, kiâⁿ I ê tōa siū-khì tī A-má-le̍k, só͘-í Iâ-hô-hoa kin-á-ji̍t án-ni kiâⁿ tī lí;

19koh耶和華beh將你kap以色列交tī腓利士人ê手；明á日你kap你hiah-ê kiáⁿ beh kap我tī-teh；耶和華beh將以色列ê軍兵交tī腓利士人ê手。koh Iâ-hô-hoa beh chiong lí kap Í-sek-lia̍t kau tī Hui-lī-sū lâng ê chhiú; bîn-á-ji̍t lí kap lí hiah ê kiáⁿ beh kap góa tī-teh; Iâ-hô-hoa beh chiong Í-sek-lia̍t ê kun-peng kau tī Hui-lī-sū lâng ê chhiú.

20掃羅忽然身軀倒直直tī地裡，因為撒母耳ê話，就真驚，到lóng無力；因為一日一暝lóng無食甚麼。Sò-lô hut-jiân sin-khu tó-ti̍t-ti̍t tī tōe-nih, in-ūi Sat-bó͘-jíⁿ ê ōe, chiū chin kiaⁿ, kàu lóng bô la̍t; in-ūi chi̍t-ji̍t chi̍t-mî lóng bô chia̍h sím-mi̍h.

21婦人人óa近掃羅，看見伊真擘腹，對伊講，你ê女婢聽你ê話，無顧家己ê性命，聽你所kā我講ê話。Hū-jîn-lâng óa-kūn Sò-lô, khòaⁿ-kìⁿ i chin peh-pak, tùi i kóng, Lí ê lú-pī thiaⁿ lí ê ōe, bô kò͘ ka-kī ê sìⁿ-miā, thiaⁿ lí só͘ kā góa kóng ê ōe.

22Taⁿ求你聽女婢ê話，容允我tī你ê面前排淡薄食物，hō͘你食，你行路chiah有氣力。Taⁿ kiû lí thiaⁿ lú-pī ê ōe, iông-ún góa tī lí ê bīn-chêng pâi tām-po̍h chia̍h-mi̍h, hō͘ lí chia̍h, lí kiâⁿ lō͘ chiah ū khùi-la̍t.

23伊推辭講，我m̄食。總是伊ê奴僕kap婦人人好嘴勸伊，伊chiah聽in ê嘴tùi地裡起來，坐tī床裡。I the-sî kóng, Góa m̄-chia̍h. Chóng-sī i ê lô͘-po̍k kap hū-jîn-lâng hó-chhùi khǹg i, i chiah thiaⁿ in ê chhùi tùi tōe-nih khí-lâi, chē tī chhn̂g-nih.

24婦人人厝內有一隻肥ê牛á，趕緊thâi伊，koh the̍h麵粉，chhiau伊做無酵餅，來pek伊；Hū-jîn-lâng chhù-lāi ū chi̍t chiah pûi ê gû-á, kóaⁿ-kín thâi i, koh the̍h mī-hún, chhiau i chòe bô-kàⁿ-piáⁿ, lâi pek i;

25排tī掃羅kap伊ê奴僕ê面前，in食伊。Hit暝in就起身去。pâi tī Sò-lô kap i ê lô͘-po̍k ê bīn-chêng, in chia̍h i. Hit-mî in chiū khí-sin khì.

1腓利士人聚集in ê軍兵到A-hut。以色列人紮營tī Iâ-su-lia̍t ê水泉邊。Hui-lī-sū lâng chū-chi̍p in ê kun-peng kàu A-hut. Í-sek-lia̍t lâng chat-iâⁿ tī Iâ-su-lia̍t ê chúi-chôaⁿ-piⁿ.

2腓利士人hiah-ê首領chhōa兵，有ê一百，有ê一千，進前去。大衛kap tè伊ê人，kap A-kiat，tè tī後面。Hui-lī-sū lâng hiah ê siú-léng chhōa peng, ū-ê chi̍t-pah, ū-ê chi̍t-chheng, chìn-chêng khì. Tāi-pi̍t kap tè i ê lâng, kap A-kiat, tè tī āu-bīn.

3腓利士人ê首領講，chiah-ê希伯來人tī-chia做甚麼？A-kiat kā腓利士人ê首領講，Chit-ê kiám m̄是以色列王掃羅ê人臣大衛mah？伊kap我tòa已經有chiah-ê日，chiah-ê年；對伊投降我到今á日，我bē-bat看見伊有過失。Hui-lī-sū lâng ê siú-léng kóng, chiah ê Hi-pek-lâi lâng tī-chia chòe sím-mi̍h? A-kiat kā Hui-lī-sū lâng ê siú-léng kóng, Chit-ê kiám m̄-sī Í-sek-lia̍t ông Sò-lô ê jîn-sîn Tāi-pi̍t mah? i kap góa tòa í-keng ū chiah ê ji̍t, chiah ê nî; tùi i tâu-hâng góa kàu kin-á-ji̍t, góa bē-bat khòaⁿ-kìⁿ i ū kè-sit.

4腓利士人ê首領受氣伊；腓利士人ê首領kā伊講，Tio̍h hō͘ chit人tò去，tò去你所安置伊ê所在，m̄-thang hō͘伊kap咱落陣，驚了伊tī陣內做咱ê對敵；伊beh kap伊ê主人koh和，beh用甚麼ah？Kiám m̄是chiah-ê人ê頭殼？Hui-lī-sū lâng ê siú-léng siū-khì i; Hui-lī-sū lâng ê siú-léng kā i kóng, Tio̍h hō͘ chit-lâng tò-khì, tò-khì lí só͘ an-tì i ê só͘-chāi, m̄-thang hō͘ i kap lán lo̍h-tīn, kiaⁿ-liáu i tī tīn-lāi chòe lán ê tùi-te̍k; i beh kap i ê chú-lâng koh hô, beh ēng sím-mi̍h ah? Kiám m̄-sī chiah ê lâng ê thâu-khak?

5前in有人跳舞唱和講， 掃羅thâi死in ê千千， 大衛thâi死in ê萬萬；所講ê，kiám m̄是chit-ê大衛mah？Chêng in ū lâng thiàu-bú chhiùⁿ-hō kóng, Sò-lô thâi-sí in ê chheng-chheng, Tāi-pi̍t thâi-sí in ê bān-bān; só͘ kóng ê, kiám m̄-sī chit ê Tāi-pi̍t mah?

6A-kiat叫大衛來，kā伊講，我kí永活ê耶和華來chiù-chōa，你是正直，你kap我出入tī軍隊中，我看是好；因為對你來我chia ê時，到今á日，我m̄-bat看見你有甚麼過失；獨獨chiah-ê首領看你做m̄好；A-kiat kiò Tāi-pi̍t lâi, kā i kóng, Góa kí éng-oa̍h ê Iâ-hô-hoa lâi chiù-chōa, lí sī chèng-ti̍t, lí kap góa chhut-ji̍p tī kun-tūi tiong, góa khòaⁿ sī hó; in-ūi tùi lí lâi góa chia ê sî, kàu kin-á-ji̍t, góa m̄-bat khòaⁿ-kìⁿ lí ū sím-mi̍h kè-sit; to̍k-to̍k chiah ê siú-léng khòaⁿ lí chòe m̄-hó;

7taⁿ你tò去，安然去，驚了你所做，腓利士人ê首領無歡喜。taⁿ lí tò-khì, an-jiân khì, kiaⁿ-liáu lí só͘ chòe, Hui-lī-sū lâng ê siú-léng bô hoaⁿ-hí.

8大衛kā A-kiat講，我bat做甚麼？tùi我起頭來你ê面前ê時到今á日，你tī你ê奴僕有看出甚麼tāi-chì，hō͘我無thang kap王我ê主ê對敵交戰ah？Tāi-pi̍t kā A-kiat kóng, Góa bat chòe sím-mi̍h? tùi góa khí-thâu lâi lí ê bīn-chêng ê sî kàu kin-á-ji̍t, lí tī lí ê lô͘-po̍k ū khòaⁿ-chhut sím-mi̍h tāi-chì, hō͘ góa bô thang kap ông góa ê chú ê tùi-te̍k kau-chiàn ah?

9A-kiat應大衛講，我知你tī我ê目睭前是好，親像上帝ê使者一樣；總是腓利士人ê首領講，Chit人m̄-thang kap咱去交戰。A-kiat ìn Tāi-pi̍t kóng, Góa chai lí tī góa ê ba̍k-chiu-chêng sī hó, chhin-chhiūⁿ Siōng-tè ê sù-chiá chi̍t-iūⁿ; chóng-sī Hui-lī-sū lâng ê siú-léng kóng, Chit-lâng m̄-thang kap lán khì kau-chiàn.

10所以你以及你ê主ê奴僕kap你來ê，tio̍h早早起來；你已經起來，到天光就tio̍h去。Só͘-í lí í-ki̍p lí ê chú ê lô͘-po̍k kap lí lâi-ê, tio̍h chá-chá khí-lâi; lí í-keng khí-lâi, kàu thiⁿ-kng chiū tio̍h khì.

11隔早起，大衛kap tè伊ê人早早起來，起身tò去腓利士ê地。腓利士人也上去Iâ-su-lia̍t。Keh chá-khí Tāi-pi̍t kap tè i ê lâng chá-chá khí-lâi, khí-sin tò-khì Hui-lī-sū ê tōe. Hui-lī-sū lâng iā chiūⁿ-khì Iâ-su-lia̍t.

1第三日，大衛kap tè伊ê人到Sé-kek-la̍h。A-má-le̍k人已經侵犯南方kap Sé-kek-la̍h，也phah Sé-kek-la̍h，用火燒伊；Tē-saⁿ ji̍t Tāi-pi̍t kap tè i ê lâng kàu Sé-kek-la̍h. A-má-le̍k lâng í-keng chhim-hoān lâm-hng kap Sé-kek-la̍h, iā phah Sé-kek-la̍h, ēng hé sio i;

2掠城內ê婦女，無論大細，無thâi死一個，kan-ta掠伊去。lia̍h siâⁿ-lāi ê hū-lú, bô-lūn tōa-sòe, bô thâi-sí chi̍t-ê, kan-ta lia̍h i khì.

3大衛kap tè伊ê人到hit-ê城，看見城已經hō͘ 火燒去，in ê bó͘、kiáⁿ、cha-bó͘-kiáⁿ，lóng hō͘伊掠去。Tāi-pi̍t kap tè i ê lâng kàu hit ê siâⁿ, khòaⁿ-kìⁿ siâⁿ í-keng hō͘ hé sio-khì, in ê bó͘, kiáⁿ, cha-bó͘-kiáⁿ, lóng hō͘ i lia̍h-khì.

4大衛kap tè伊ê人就開聲哮，哮到無力thang哮。Tāi-pi̍t kap tè i ê lâng chiū khui-siaⁿ háu, háu kàu bô la̍t thang háu.

5大衛兩個bó͘，Iâ-su-lia̍t人A-hi-loán，kap bat做Ka-bi̍t人Ná-pat ê bó͘ A-pí-kai，也hō͘伊掠去。Tāi-pi̍t nn̄g ê bó͘, Iâ-su-lia̍t lâng A-hi-loán, kap bat chòe Ka-bi̍t lâng Ná-pat ê bó͘ A-pí-kai, iā hō͘ i lia̍h-khì.

6大衛真著急，因為百姓講，tio̍h用石頭tìm伊；是百姓人人為tio̍h in ê kiáⁿ cha-bó͘-kiáⁿ真煩惱；總是大衛óa靠耶和華伊ê上帝，家己堅固。Tāi-pi̍t chin tio̍h-kip, in-ūi peh-sìⁿ kóng, Tio̍h ēng chio̍h-thâu tìm i; sī peh-sìⁿ lâng-lâng ūi-tio̍h in ê kiáⁿ cha-bó͘-kiáⁿ chin hoân-ló; chóng-sī Tāi-pi̍t óa-khò Iâ-hô-hoa i ê Siōng-tè, ka-kī kian-kò͘.

7大衛kā A-hi-bí-le̍k ê kiáⁿ，祭司A-pí-a-tha，講，請你kā我帶í-hut-tek來。A-pí-a-tha就帶í-hut-tek到大衛hia。Tāi-pi̍t kā A-hi-bí-le̍k ê kiáⁿ, chè-si A-pí-a-tha, kóng, Chhiáⁿ lí kā góa tòa í-hut-tek lâi. A-pí-a-tha chiū tòa í-hut-tek kàu Tāi-pi̍t hia.

8大衛問耶和華講，我jip chit-ê軍隊，jip會tio̍h á-bōe？耶和華講，你tio̍h jip伊，因為jip穩當tio̍h，也穩當救in lóng tò來。Tāi-pi̍t mn̄g Iâ-hô-hoa kóng, Góa jip chit ê kun-tūi, jip ōe tio̍h á-bōe? Iâ-hô-hoa kóng, Lí tio̍h jip i, in-ūi jip ún-tàng tio̍h, iā ún-tàng kiù in lóng tò-lâi.

9大衛就kap tè伊ê六百人到Pí-so ê溪；留teh ê人歇tī-hia。Tāi-pi̍t chiū kap tè i ê la̍k-pah lâng kàu Pí-so ê khoe; lâu-teh ê lâng hioh tī-hia.

10總是大衛kap四百人去追jip；有兩百人厭倦，bōe會過Pí-so ê溪，就留tī-hia。Chóng-sī Tāi-pi̍t kap sì-pah lâng khì tui-jip; ū nn̄g-pah lâng ià-siān, bōe-ōe kè Pí-so ê khoe, chiū lâu tī-hia.

11In tī田野tú-tio̍h一個埃及人，就帶伊到大衛hia；用餅hō͘伊，伊就食，用水hō͘伊lim；In tī chhân-iá tú-tio̍h chi̍t ê Ai-ki̍p lâng, chiū tòa i kàu Tāi-pi̍t hia; ēng piáⁿ hō͘ i, i chiū chia̍h, ēng chúi hō͘ i lim;

12koh hō͘伊一塊無花果餅，兩pha葡萄干；伊食了，精神復到；因為伊三日三暝無食餅無lim水。koh hō͘ i chi̍t tè bû-hoa-kó piáⁿ, nn̄g pha phû-tô-koaⁿ; i chia̍h-liáu, cheng-sîn ho̍k-tò; in-ūi i saⁿ-ji̍t saⁿ-mî bô chia̍h piáⁿ bô lim chúi.

13大衛問伊講，你屬是誰？tùi toh落來？伊應講，我是埃及ê少年人，是A-má-le̍k人ê奴僕；因為我三日前破病，我ê主人就放sak我；Tāi-pi̍t mn̄g i kóng, Lí sio̍k chī-chūi? tùi toh-lo̍h lâi? I ìn kóng, Góa sī Ai-ki̍p ê siàu-liân lâng, sī A-má-le̍k lâng ê lô͘-po̍k; in-ūi góa saⁿ-ji̍t chêng phòa-pīⁿ, góa ê chú-lâng chiū pàng-sak góa;

14阮侵犯Ki-lī-thê ê南勢，kap屬猶大ê地，kap迦勒地ê南勢；koh用火燒Sé-kek-la̍h。goán chhim-hoān Ki-lī-thê ê lâm-sì, kap sio̍k Iû-tāi ê tōe, kap Ka-le̍k tōe ê lâm-sì; koh ēng hé sio Sé-kek-la̍h.

15大衛問伊講，你能chhōa我到hit-ê軍隊hia á-bōe？伊應講，你tio̍h kā我kí上帝來chiù-chōa，無thâi死我，也無將我交tī我ê主人ê手，我就beh chhōa你落去到hit-ê軍隊hia。Tāi-pi̍t mn̄g i kóng, Lí ōe chhōa góa kàu hit ê kun-tūi hia á-bōe? I ìn kóng, Lí tio̍h kā góa kí Siōng-tè lâi chiù-chōa, bô thâi-sí góa, iā bô chiong góa kau tī góa ê chú-lâng ê chhiú, góa chiū beh chhōa lí lo̍h-khì kàu hit ê kun-tūi hia.

16伊chhōa伊落去ê時，看見in四散tī遍地，lim食跳舞；因為tùi腓利士地kap猶大地所搶ê物真chōe。I chhōa i lo̍h-khì ê sî, khòaⁿ-kìⁿ in sì-sòaⁿ tī piàn-tōe, lim-chia̍h thiàu-bú; in-ūi tùi Hui-lī-sū tōe kap Iû-tāi tōe só͘ chhiúⁿ ê mi̍h chin-chōe.

17大衛phah in tùi黃昏暗到隔日ê-hng；只有四百個騎駱駝ê少年人走去，以外無一人走離。Tāi-pi̍t phah in tùi hông-hun-àm kàu keh-ji̍t ê-hng; chí-ū sì-pah ê khiâ lo̍k-tô ê siàu-liân lâng cháu-khì, í-gōa bô chi̍t-lâng cháu-lī.

18A-má-le̍k人所搶去ê財物，大衛lóng救倒tńg，大衛也救伊兩個bó͘ tò來。A-má-le̍k lâng só͘ chhiúⁿ-khì ê châi-bu̍t, Tāi-pi̍t lóng kiù tò-tńg, Tāi-pi̍t iā kiù i nn̄g ê bó͘ tò-lâi.

19見若A-má-le̍k人所搶去ê，無論大細，kiáⁿ、cha-bó͘-kiáⁿ、財物，大衛lóng帶倒tńg，無失落一個。Kìⁿ-nā A-má-le̍k lâng só͘ chhiúⁿ-khì-ê, bô-lūn tōa-sòe, kiáⁿ, cha-bó͘-kiáⁿ, châi-bu̍t, Tāi-pi̍t lóng tòa tò-tńg, bô sit-lo̍h chi̍t-ê.

20大衛koh搶所有ê羊群、牛群，in趕伊tī cheng-siⁿ ê頭前，講，這是大衛所取來ê。Tāi-pi̍t koh chhiúⁿ só͘ ū ê iûⁿ-kûn, gû-kûn, in kóaⁿ i tī cheng-siⁿ ê thâu-chêng, kóng, Che sī Tāi-pi̍t só͘ chhú-lâi-ê.

21大衛到hiah-ê厭倦bōe能跟tè大衛去，留tī Pí-so溪ê兩百人hia。In出來迎接大衛kap tè伊ê百姓。大衛進前到百姓hia，請安in。Tāi-pi̍t kàu hiah ê ià-siān bōe-ōe kun-tè Tāi-pi̍t khì, lâu tī Pí-so khoe ê nn̄g-pah lâng hia. In chhut-lâi ngiâ-chih Tāi-pi̍t kap tè i ê peh-sìⁿ. Tāi-pi̍t chìn-chêng kàu peh-sìⁿ hia, chhéng-an in.

22Kap大衛去ê人，其中有pháiⁿ人匪類lóng總講，因為in無kap咱去，咱所救倒tńg ê物，的確m̄分hō͘ in，kan-ta用in ta̍k人ê bó͘、kiáⁿ兒，hō͘ in，hō͘ in chhōa去。Kap Tāi-pi̍t khì ê lâng, kî-tiong ū pháiⁿ-lâng húi-lūi lóng-chóng kóng, In-ūi in bô kap lán khì, lán só͘ kiù tò-tńg ê mi̍h, tek-khak m̄ pun hō͘ in, kan-ta ēng in ta̍k-lâng ê bó͘, kiáⁿ-jî, hō͘ in, hō͘ in chhōa khì.

23大衛講，兄弟ah，m̄-thang將耶和華所賞賜咱ê物，án-ni做；因為祂保護咱，將攻擊咱ê軍隊交tī咱ê手。Tāi-pi̍t kóng, Hiaⁿ-tī ah, m̄-thang chiong Iâ-hô-hoa só͘ siúⁿ-sù lán ê mi̍h, án-ni chòe; in-ūi I pó-hō͘ lán, chiong kong-kek lán ê kun-tūi kau tī lán ê chhiú.

24Chit-ê tāi-chì 是誰 beh聽thàn lín ah？顧守雜物ê人所得tio̍h ê份額tio̍h親像出陣ê人ê份額，大家tio̍h平分。Chit ê tāi-chì chī-chūi beh thiaⁿ-thàn lín ah? kò͘-siú cha̍p-mi̍h ê lâng só͘ tit-tio̍h ê hūn-gia̍h tio̍h chhin-chhiūⁿ chhut-tīn ê lâng ê hūn-gia̍h, tāi-ke tio̍h pîⁿ-pun.

25Tùi hit日以後，大衛設立chit-ê做以色列ê律例法度，直到今á日。Tùi hit-ji̍t í-āu Tāi-pi̍t siat-li̍p chit-ê chòe Í-sek-lia̍t ê lu̍t-lē hoat-tō͘, ti̍t-kàu kin-á-ji̍t.

26大衛到Sé-kek-la̍h ê時，tùi所搶ê物ê中間the̍h起來，寄去送伊ê朋友，猶大ê長老，講，看ah，chiah-ê是tùi耶和華ê對敵搶來ê，送hō͘ lín做禮物。Tāi-pi̍t kàu Sé-kek-la̍h ê sî, tùi só͘ chhiúⁿ ê mi̍h ê tiong-kan the̍h-khí-lâi, kià khì sàng i ê pêng-iú, Iû-tāi ê tiúⁿ-ló, kóng, Khòaⁿ ah, chiah-ê sī tùi Iâ-hô-hoa ê tùi-te̍k chhiúⁿ lâi ê, sàng hō͘ lín chòe lé-mi̍h.

27就是送hō͘ tiàm tī Pek-te̍k-lī ê，tiàm tī南方ê La̍h-boa̍t ê，tiàm tī Ngá-thê-jíⁿ ê；Chiū-sī sàng hō͘ tiàm tī Pek-te̍k-lī ê, tiàm tī lâm-hng ê La̍h-boa̍t ê, tiàm tī Ngá-thê-jíⁿ ê;

28tiàm tī A-lô-jíⁿ ê，tiàm tī Sek-boa̍t ê，tiàm tī Í-si̍t-thê-bo̍k ê；tiàm tī A-lô-jíⁿ ê, tiàm tī Sek-boa̍t ê, tiàm tī Í-si̍t-thê-bo̍k ê;

29tiàm tī La̍h-hap-le̍k ê，tiàm tī Iâ-la̍h-bia̍t人chiah-ê城ê，tiàm tī Ki-nî人hiah-ê城ê；tiàm tī La̍h-hap-le̍k ê, tiàm tī Iâ-la̍h-bia̍t lâng chiah ê siâⁿ ê, tiàm tī Ki-nî lâng hiah ê siâⁿ ê;

30tiàm tī Hô-jíⁿ-má ê，tiàm tī Ko-la̍h-san ê，tiàm tī A-that ê；tiàm tī Hô-jíⁿ-má ê, tiàm tī Ko-la̍h-san ê, tiàm tī A-that ê;

31tiàm tī Hi-pek-lûn ê，以及大衛kap tè伊ê人平素所往來ê所在，lóng hō͘伊。tiàm tī Hi-pek-lûn ê, í-ki̍p Tāi-pi̍t kap tè i ê lâng pêng-sò͘ só͘ óng-lâi ê só͘-chāi, lóng hō͘ i.