1以色列人出去beh kap腓利士人交戰，紮營近tī Í-piān-í-siā；腓利士人紮營tī A-hut。Í-sek-lia̍t lâng chhut-khì beh kap Hui-lī-sū lâng kau-chiàn, chat-iâⁿ kūn tī Í-piān-í-siā; Hui-lī-sū lâng chat-iâⁿ tī A-hut.

2腓利士人排陣攻擊以色列人；交戰ê時，以色列人thâi輸tī腓利士人ê面前。腓利士人tī平洋thâi死in ê軍兵，約略四千人。Hui-lī-sū lâng pâi-tīn kong-kek Í-sek-lia̍t lâng; kau-chiàn ê sî, Í-sek-lia̍t lâng thâi-su tī Hui-lī-sū lâng ê bīn-chêng. Hui-lī-sū lâng tī pîⁿ-iûⁿ thâi-sí in ê kun-peng, iok-lio̍k sì-chheng lâng.

3百姓tò來到營內，以色列ê長老講，耶和華今á日啥事hō͘咱thâi輸tī腓利士人ê面前ah？咱m̄值tio̍h扛耶和華ê約櫃tùi Sī-lô來咱chia，hō͘伊tī咱中間thang救咱脫離咱ê對敵ê手。Peh-sìⁿ tò-lâi kàu iâⁿ-lāi, Í-sek-lia̍t ê tióng-ló kóng, Iâ-hô-hoa kin-á-ji̍t siáⁿ-sū hō͘ lán thâi-su tī Hui-lī-sū lâng ê bīn-chêng ah? lán m̄-ta̍t-tio̍h kng Iâ-hô-hoa ê iok-kūi tùi Sī-lô lâi lán chia, hō͘ i tī lán tiong-kan thang kiù lán thoat-lī lán ê tùi-te̍k ê chhiú.

4百姓就差人到Sī-lô，tùi-hia扛坐tī ki-lō͘-peng ê中間萬軍ê耶和華ê約櫃來。Í-lī兩個kiáⁿ Hô-hut-nî、Hui-nî-hap kap上帝ê約櫃tī-hia。Peh-sìⁿ chiū chhe lâng kàu Sī-lô, tùi-hia kng chē tī ki-lō͘-peng ê tiong-kan bān-kun ê Iâ-hô-hoa ê iok-kūi lâi. Í-lī nn̄g ê kiáⁿ Hô-hut-nî Hui-nî-hap kap Siōng-tè ê iok-kūi tī-hia.

5耶和華ê約櫃到營中，以色列眾人就大聲hoah，地續會應聲。Iâ-hô-hoa ê iok-kūi kàu iâⁿ-tiong. Í-sek-lia̍t chèng-lâng chiū tōa-siaⁿ hoah, tōe sòa ōe ìn-siaⁿ.

6腓利士人聽見大聲teh hoah ê聲音，就講，Tī希伯來ê營án-ni大聲hoah，是甚麼緣故？後來就知耶和華ê約櫃到營中。Hui-lī-sū lâng thiaⁿ-kìⁿ tōa-siaⁿ teh hoah ê siaⁿ-im, chiū kóng, Tī Hi-pek-lâi ê iâⁿ án-ni tōa-siaⁿ hoah, sī sím-mi̍h iân-kò͘? āu-lâi chiū chai Iâ-hô-hoa ê iok-kūi kàu iâⁿ-tiong.

7腓利士人就驚惶，講，有上帝到in ê營中；koh講，咱有災厄lah，平素m̄-bat有chit-ê事。Hui-lī-sū lâng chiū kiaⁿ-hiâⁿ, kóng, Ū Siōng-tè kàu in ê iâⁿ-tiong; koh kóng, Lán ū chai-ē lah, pêng-sò͘ m̄-bat ū chit ê sū.

8咱有災厄lah，是誰能救咱脫離chiah-ê大權能ê上帝ê手ah？前tī曠野用ta̍k樣ê災厄phah埃及人ê，就是chiah-ê上帝。Lán ū chai-ē lah, chī-chūi ōe kiù lán thoat-lī chiah ê tōa koân-lêng ê siōng-tè ê chhiú ah? chêng tī khòng-iá ēng ta̍k-iūⁿ ê chai-ē phah Ai-ki̍p lâng ê, chiū-sī chiah ê siōng-tè.

9腓利士人ah，lín tio̍h勇敢，tio̍h做大丈夫，免得lín服事希伯來人，親像in服事lín一樣；lín tio̍h做大丈夫kap in交戰。Hui-lī-sū lâng ah, lín tio̍h ióng-kám, tio̍h chòe tāi-tiōng-hu, bián-tit lín ho̍k-sāi Hi-pek-lâi lâng, chhin-chhiūⁿ in ho̍k-sāi lín chi̍t-iūⁿ; lín tio̍h chòe tāi-tiōng-hu kap in kau-chiàn.

10腓利士人就交戰，以色列人thâi輸；ta̍k-ê走tò去in ê布棚；thâi死真chōe。以色列ê步兵死三萬人。Hui-lī-sū lâng chiū kau-chiàn, Í-sek-lia̍t lâng thâi-su; ta̍k-ê cháu tò-khì in ê pò͘-pîⁿ; thâi-sí chin-chōe. Í-sek-lia̍t ê pō͘-peng sí saⁿ-bān lâng.

11上帝ê約櫃hō͘ in搶去；Í-lī兩個kiáⁿ Hô-hut-nî、Hui-nî-hap也死。Siōng-tè ê iok-kūi hō͘ in chhiúⁿ-khì; Í-lī nn̄g ê kiáⁿ Hô-hut-nî Hui-nî-hap iā sí.

12有一個便雅憫人tùi戰陣走來，衫拆裂，頭殼sám土粉，siâng hit日到Sī-lô。Ū chi̍t ê Piān-ngá-bín lâng tùi chiàn-tīn cháu-lâi, saⁿ thiah-li̍h, thâu-khak sám thô͘-hún, siâng hit-ji̍t kàu Sī-lô.

13伊到ê時，tú-tn̄g Í-lī tī路邊坐tī伊ê位teh瞭望，因為伊ê心為tio̍h上帝ê約櫃來掛慮。Hit人入城報消息，thong城ê人就lóng喉叫。I kàu ê sî, tú-tn̄g Í-lī tī lō͘-piⁿ chē tī i ê ūi teh liâu-bāng, in-ūi i ê sim ūi-tio̍h Siōng-tè ê iok-kūi lâi khòa-lū. Hit-lâng ji̍p-siâⁿ pò siau-sit, thong-siâⁿ ê lâng chiū lóng âu-kiò.

14Í-lī聽見喉叫ê聲，就問講，chit-ê hōa-hōa哮ê聲是甚麼緣故ah？Hit人趕緊來報Í-lī。Í-lī thiaⁿ-kìⁿ âu-kiò ê siaⁿ, chiū mn̄g kóng, Chit ê hōa-hōa-háu ê siaⁿ sī sím-mi̍h iân-kò͘ ah? Hit-lâng kóaⁿ-kín lâi pò Í-lī.

15Hit時Í-lī九十八歲，目睭柴柴，bōe能看見。Hit-sî Í-lī káu-cha̍p-poeh hè, ba̍k-chiu chhâ-chhâ, bōe-ōe khòaⁿ-kìⁿ.

16Hit人kā Í-lī講，我是tùi戰陣來ê，今á日我tùi戰陣走來。Í-lī講，我ê kiáⁿ ah，tāi-chì怎樣？Hit-lâng kā Í-lī kóng, Góa sī tùi chiàn-tīn lâi ê, kin-á-ji̍t góa tùi chiàn-tīn cháu-lâi. Í-lī kóng, Góa ê kiáⁿ ah, tāi-chì cháiⁿ-iūⁿ?

17報消息ê應講，以色列人tī腓利士人ê面前逃走，百姓中受thâi-ê不止chōe，你兩個kiáⁿ，Hô-hut-nî、Hui-nî-hap，也死，上帝ê約櫃續hō͘ in搶去。Pò siau-sit-ê ìn kóng, Í-sek-lia̍t lâng tī Hui-lī-sū lâng ê bīn-chêng tô-cháu, peh-sìⁿ-tiong siū-thâi-ê put-chí chōe, lí nn̄g ê kiáⁿ, Hô-hut-nî Hui-nî-hap, iā sí, Siōng-tè ê iok-kūi sòa hō͘ in chhiúⁿ-khì.

18伊一下講起上帝ê櫃，Í-lī就對伊ê座位hiàⁿ tùi後面，跋倒tī門邊，頷頸折，就死；因為伊年老，身體重。Í-lī做以色列ê士師四十年。I chi̍t-ē kóng-khí Siōng-tè ê kūi, Í-lī chiū tùi i ê chō-ūi hiàⁿ tùi āu-bīn, poa̍h-tó tī mn̂g-piⁿ, ām-kún chi̍h, chiū sí; in-ūi i nî lāu, sin-thé tāng. Í-lī chòe Í-sek-lia̍t ê sū-su sì-cha̍p nî.

19Í-lī ê新婦，Hui-nî-hap ê bó͘，懷孕beh到期；伊聽見上帝ê櫃hō͘人搶去，ta-koaⁿ kap丈夫lóng死ê消息，就khiau-ku來生kiáⁿ，因為大痛疼忽然到。Í-lī ê sim-pū, Hui-nî-hap ê bó͘, hoâi-īn beh kàu-kî; i thiaⁿ-kìⁿ Siōng-tè ê kūi hō͘ lâng chhiúⁿ-khì, ta-koaⁿ kap tiōng-hu lóng sí ê siau-sit, chiū khiau-ku lâi siⁿ-kiáⁿ, in-ūi tōa thàng-thiàⁿ hut-jiân kàu.

20Teh-beh死ê時，邊頭teh khiā hiah-ê婦人人kā伊講，m̄免驚，你生 ta-po͘-gín-ná lah；總是伊無應，也無關心。Teh-beh sí ê sî, piⁿ-thâu teh khiā hiah ê hū-jîn-lâng kā i kóng, M̄-bián kiaⁿ, lí siⁿ ta-po͘-gín-ná lah; chóng-sī i bô ìn, iā bô koan-sim.

21伊kā gín-ná號名Í-ka-phok，講，榮光離開以色列。這是因為上帝ê櫃hō͘人搶，koh因為ta-koaⁿ kap丈夫也死。I kā gín-ná hō-miâ Í-ka-phok, kóng, Êng-kng lī-khui Í-sek-lia̍t. Che sī in-ūi Siōng-tè ê kūi hō͘ lâng chhiúⁿ, koh in-ūi ta-koaⁿ kap tiōng-hu iā sí.

22伊koh講，榮光離開以色列，因為上帝ê櫃受搶。I koh kóng, Êng-kng lī-khui Í-sek-lia̍t, in-ūi Siōng-tè ê kūi siū-chhiúⁿ.

1腓利士人帶上帝ê約櫃，tùi Í-piān-í-siā扛到A-si̍t-tu̍t。Hui-lī-sū lâng tòa Siōng-tè ê iok-kūi, tùi Í-piān-í-siā kng kàu A-si̍t-tu̍t.

2腓利士人將上帝ê櫃扛入Tāi-kún ê廟，hē tī Tāi-kún ê身邊。Hui-lī-sū lâng chiong Siōng-tè ê kūi kng ji̍p Tāi-kún ê biō, hē tī Tāi-kún ê sin-piⁿ.

3隔早起A-si̍t-tu̍t ê人起來，看見Tāi-kún跋倒tī耶和華ê櫃前，面仆tī地裡；就將Tāi-kún koh chhāi tī伊ê原位。Keh chá-khí A-si̍t-tu̍t ê lâng khí-lâi, khòaⁿ-kìⁿ Tāi-kún poa̍h-tó tī Iâ-hô-hoa ê kūi-chêng, bīn phak tī tōe-nih; chiū chiong Tāi-kún koh chhāi tī i ê goân-ūi.

4Koh隔日透早起來，看見Tāi-kún跋倒tī耶和華ê櫃前，面仆tī地裡；koh Tāi-kún ê頭kap兩支手掌lóng折tī戶碇頂；只有chhun Tāi-kún khu̍t-khu̍t ê身軀。Koh keh-ji̍t thàu-chá khí-lâi, khòaⁿ-kìⁿ Tāi-kún poa̍h-tó tī Iâ-hô-hoa ê kūi-chêng, bīn phak tī tōe-nih; koh Tāi-kún ê thâu kap nn̄g-ki chhiú-chiúⁿ lóng chi̍h tī hō͘-tēng téng; chí-ū chhun Tāi-kún khu̍t-khu̍t ê sin-khu.

5為tio̍h án-ni，Tāi-kún ê祭司，kap一切入A-si̍t-tu̍t Tāi-kún ê廟ê人，lóng無踏Tāi-kún ê戶碇，直到今á日。Ūi-tio̍h án-ni, Tāi-kún ê chè-si, kap it-chhè ji̍p A-si̍t-tu̍t Tāi-kún ê biō ê lâng, lóng bô ta̍h Tāi-kún ê hō͘-tēng, ti̍t-kàu kin-á-ji̍t.

6耶和華ê手重重phah A-si̍t-tu̍t人，敗壞in，hō͘ in發粒á症；就是A-si̍t-tu̍t kap伊ê境內lóng是án-ni。Iâ-hô-hoa ê chhiú tāng-tāng phah A-si̍t-tu̍t lâng, pāi-hoāi in, hō͘ in hoat lia̍p-á-chèng; chiū-sī A-si̍t-tu̍t kap i ê kéng-lāi lóng sī án-ni.

7A-si̍t-tu̍t人看見án-ni，就講，以色列上帝ê櫃m̄-thang tiàm tī咱中間，因為伊ê手重重phah咱，kap咱ê上帝Tāi-kún。A-si̍t-tu̍t lâng khòaⁿ-kìⁿ án-ni, chiū kóng, Í-sek-lia̍t Siōng-tè ê kūi m̄-thang tiàm tī lán tiong-kan, in-ūi I ê chhiú tāng-tāng phah lán, kap lán ê siōng-tè Tāi-kún.

8就差人請腓利士hiah-ê首領來聚集in hia，講，以色列上帝ê櫃咱tio̍h怎樣設法ah？In應講，Thang將以色列上帝ê櫃運去Ka-te̍k；就將以色列上帝ê櫃運到hia。Chiū chhe lâng chhiáⁿ Hui-lī-sū hiah ê siú-léng lâi chū-chi̍p in hia, kóng, Í-sek-lia̍t Siōng-tè ê kūi lán tio̍h cháiⁿ-iūⁿ siat-hoat ah? In ìn kóng, Thang chiong Í-sek-lia̍t Siōng-tè ê kūi ūn khì Ka-te̍k; chiū chiong Í-sek-lia̍t Siōng-tè ê kūi ūn kàu hia.

9運到了後，耶和華ê手攻擊hit-ê城，hō͘ hit-ê城ê人真大亂；koh phah城內ê人無論大細，in lóng發粒á症。Ūn-kàu liáu-āu, Iâ-hô-hoa ê chhiú kong-kek hit ê siâⁿ, hō͘ hit ê siâⁿ ê lâng chin tōa-loān; koh phah siâⁿ-lāi ê lâng bô-lūn tōa-sòe, in lóng hoat lia̍p-á-chèng.

10In就將上帝ê櫃送到Í-kek-lûn。上帝ê櫃到Í-kek-lûn，Í-kek-lûn ê人就hoah講，In將以色列上帝ê櫃運到咱chia，beh害死咱kap咱ê百姓。In chiū chiong Siōng-tè ê kūi sàng-kàu Í-kek-lûn. Siōng-tè ê kūi kàu Í-kek-lûn, Í-kek-lûn ê lâng chiū hoah kóng, In chiong Í-sek-lia̍t Siōng-tè ê kūi ūn-kàu lán chia, beh hāi-sí lán kap lán ê peh-sìⁿ.

11就差人聚集腓利士lóng總ê首領，講以色列上帝ê約櫃tio̍h送伊去hō͘伊tò去本所在，免得伊害死咱kap咱ê百姓；hit時thong城有致到死ê擾亂；因為上帝ê手tī-hia phah in真重；Chiū chhe lâng chū-chi̍p Hui-lī-sū lóng-chóng ê siú-léng, kóng Í-sek-lia̍t Siōng-tè ê iok-kūi tio̍h sàng i khì hō͘ i tò-khì pún só͘-chāi, bián-tit i hāi-sí lán kap lán ê peh-sìⁿ; hit-sî thong-siâⁿ ū tì-kàu sí ê jiáu-loān; in-ūi Siōng-tè ê chhiú tī-hia phah in chin-tāng;

12無死ê人lóng tú-tio̍h粒á症；城中啼哭ê聲透到天裡。bô sí ê lâng lóng tú-tio̍h lia̍p-á-chèng; siâⁿ-tiong thî-khàu ê siaⁿ thàu kàu thiⁿ-nih.

1耶和華ê約櫃tòa tī腓利士人ê地七月日久。Iâ-hô-hoa ê iok-kūi tòa tī Hui-lī-sū lâng ê tōe chhit-ge̍h-ji̍t kú.

2腓利士人叫hiah-ê祭司kap術士講，耶和華ê約櫃咱tio̍h怎樣設法？請指示阮tio̍h怎樣送伊tò去本所在。Hui-lī-sū lâng kiò hiah ê chè-si kap su̍t-sū kóng, Iâ-hô-hoa ê iok-kūi lán tio̍h cháiⁿ-iūⁿ siat-hoat? chhiáⁿ chí-sī goán tio̍h cháiⁿ-iūⁿ sàng i tò-khì pún só͘-chāi.

3In講，Lín若送以色列上帝ê約櫃去，m̄-thang hō͘伊空空去，的確tio̍h用補過失ê祭還伊；lín chiah會得tio̍h好，也會知伊ê手啥事無離開lín。In kóng, Lín nā sàng Í-sek-lia̍t Siōng-tè ê iok-kūi khì, m̄-thang hō͘ i khang-khang khì, tek-khak tio̍h ēng pó͘-kè-sit ê chè hêng i; lín chiah ōe tit-tio̍h hó, iā ōe chai I ê chhiú siáⁿ-sū bô lī-khui lín.

4In講，阮tio̍h用甚麼做補過失ê祭來還伊ah？應講，tio̍h用金粒á五個，金老鼠五隻，照腓利士首領ê數額；因為lín kap lín ê首領所tú-tio̍h ê災厄一樣。In kóng, Goán tio̍h ēng sím-mi̍h chòe pó͘-kè-sit ê chè lâi hêng I ah? Ìn kóng, Tio̍h ēng kim lia̍p-á gō͘-ê, kim niáu-chhú gō͘-chiah, chiàu Hui-lī-sū siú-léng ê siàu-gia̍h; in-ūi lín kap lín ê siú-léng só͘ tú-tio̍h ê chai-ē chi̍t-iūⁿ.

5所以lín tio̍h做lín ê粒á ê像，kap毀傷lín ê地老鼠ê像；koh tio̍h歸榮光hō͘以色列ê上帝；kiám-chhái伊對tī lín，kap lín ê上帝，kap lín ê地，會放輕伊ê手。Só͘-í lín tio̍h chòe lín ê lia̍p-á ê siōng, kap húi-siong lín ê tōe niáu-chhú ê siōng; koh tio̍h kui êng-kng hō͘ Í-sek-lia̍t ê Siōng-tè; kiám-chhái I tùi-tī lín, kap lín ê siōng-tè, kap lín ê tōe, ōe pàng khin I ê chhiú.

6Lín啥事硬lín ê心，親像埃及人kap法老硬in ê心ah？上帝tī in中間行神跡，in kiám無放百姓去，百姓就去mah？Lín siáⁿ-sū ngī lín ê sim, chhin-chhiūⁿ Ai-ki̍p lâng kap Hoat-ló ngī in ê sim ah? Siōng-tè tī in tiong-kan kiâⁿ sîn-jiah, in kiám bô pàng peh-sìⁿ khì, peh-sìⁿ chiū khì mah?

7Taⁿ lín tio̍h備辦一張新ê車，kap兩隻有奶ê牛母，bē-bat掛擔ê，將chiah-ê牛縛tī車裡，也hō͘牛á-kiáⁿ離開伊，tò去in厝。Taⁿ lín tio̍h pī-pān chi̍t-tiuⁿ sin ê chhia, kap nn̄g-chiah ū-lin ê gû-bú, bē-bat kòa taⁿ ê, chiong chiah ê gû pa̍k tī chhia-nih, iā hō͘ gû-á-kiáⁿ lī-khui i, tò-khì in chhù.

8用耶和華ê約櫃hē tī車裡，也用你所還金ê寶物做補過失ê祭ê，lok tī箱內，hē tī櫃邊，送伊去。Ēng Iâ-hô-hoa ê iok-kūi hē tī chhia-nih, iā ēng lí só͘ hêng kim ê pó-mi̍h chòe pó͘-kè-sit ê chè ê, lok tī siuⁿ-lāi, hē tī kūi-piⁿ, sàng i khì.

9Lín tio̍h看，伊若對伊交界ê路上到Pek-sī-be̍k，就降chit-ê大災厄hō͘咱ê實在是伊；若無，就thang知phah咱ê m̄是伊ê手，是咱偶然tú-tio̍h-ê。Lín tio̍h khòaⁿ, i nā tùi i kau-kài ê lō͘ chiūⁿ kàu Pek-sī-be̍k, chiū kàng chit ê tōa chai-ē hō͘ lán-ê si̍t-chāi sī I; nā bô, chiū thang chai phah-lán-ê m̄-sī I ê chhiú, sī lán ngó͘-jiân tú-tio̍h-ê.

10Hiah-ê人就án-ni行，將兩隻有奶ê牛母縛tī車裡，koh關牛á-kiáⁿ tī厝內。Hiah ê lâng chiū án-ni kiâⁿ, chiong nn̄g-chiah ū-lin ê gû-bú pa̍k tī chhia-nih, koh koaiⁿ gû-á-kiáⁿ tī chhù-lāi.

11Koh用耶和華ê約櫃，以及khǹg金老鼠kap粒á像ê箱，lóng hē tī車裡；Koh ēng Iâ-hô-hoa ê iok-kūi, í-ki̍p khǹg kim niáu-chhú kap lia̍p-á-siōng ê siuⁿ, lóng hē tī chhia-nih;

12牛母直直ǹg Pek-sī-be̍k ê路去，tùi大路行，ná行ná哮，無偏左右；腓利士hiah-ê首領tè後面去，到Pek-sī-be̍k ê境界。gû-bú ti̍t-ti̍t ǹg Pek-sī-be̍k ê lō͘ khì, tùi tōa-lō͘ kiâⁿ, ná-kiâⁿ ná-háu, bô phian chó-iū; Hui-lī-sū hiah ê siú-léng tè āu-bīn khì, kàu Pek-sī-be̍k ê kéng-kài.

13Tú-tú Pek-sī-be̍k人tī山谷割麥，kia̍h目看見約櫃，看見就歡喜。Tú-tú Pek-sī-be̍k lâng tī soaⁿ-kok koah be̍h, kia̍h-ba̍k khòaⁿ-kìⁿ iok-kūi, khòaⁿ-kìⁿ chiū hoaⁿ-hí.

14車到Pek-sī-be̍k人約書亞ê園，就停teh；tī-hia有一塊大塊石磐；in破車ê柴獻兩隻牛母做燒祭hō͘耶和華。Chhia kàu Pek-sī-be̍k lâng Iok-su-a ê hn̂g, chiū thêng-teh; tī-hia ū chi̍t-tè tōa-tè chio̍h-pôaⁿ; in phòa chhia ê chhâ hiàn nn̄g chiah gû-bú chòe sio-chè hō͘ Iâ-hô-hoa.

15利未人將耶和華ê約櫃，kap伊邊á貯金ê寶物ê箱，the̍h落來，hē tī hit塊大石磐ê頂面。Pek-sī-be̍k人tī hit日獻燒祭kap祭祀，hō͘耶和華。Lī-bī lâng chiong Iâ-hô-hoa ê iok-kūi, kap i piⁿ-á tóe kim ê pó-mi̍h ê siuⁿ, the̍h-lo̍h-lâi, hē tī hit tè tōa chio̍h-pôaⁿ ê téng-bīn. Pek-sī-be̍k lâng tī hit-ji̍t hiàn sio-chè kap chè-sū, hō͘ Iâ-hô-hoa.

16腓利士人五個首領看見，siâng hit日就tò去Í-kek-lûn。Hui-lī-sū lâng gō͘ ê siú-léng khòaⁿ-kìⁿ, siâng hit-ji̍t chiū tò-khì Í-kek-lûn.

17腓利士人還hō͘耶和華做補過失ê祭ê金粒á，就是chiah-ê；一粒為tio̍h A-si̍t-tu̍t，一粒為tio̍h Ka-sat，一粒為tio̍h A-si̍t-ki-lûn，一粒為tio̍h Ka-te̍k，一粒為tio̍h Í-kek-lûn；Hui-lī-sū lâng hêng hō͘ Iâ-hô-hoa chòe pó͘-kè-sit ê chè ê kim lia̍p-á, chiū-sī chiah-ê; chi̍t-lia̍p ūi-tio̍h A-si̍t-tu̍t, chi̍t-lia̍p ūi-tio̍h Ka-sat, chi̍t-lia̍p ūi-tio̍h A-si̍t-ki-lûn, chi̍t-lia̍p ūi-tio̍h Ka-te̍k, chi̍t-lia̍p ūi-tio̍h Í-kek-lûn;

18金老鼠ê數額，是照腓利士ê首領所管ê城，就是堅固ê城kap鄉社；也續到大塊石磐，就是hē耶和華ê約櫃ê；chit塊石磐到今á日iáu tī Pek-sī-be̍k人約書亞ê園。kim niáu-chhú ê siàu-gia̍h, sī chiàu Hui-lī-sū ê siú-léng só͘ koán ê siâⁿ, chiū-sī kian-kò͘ ê siâⁿ kap hiuⁿ-siā; iā sòa kàu tōa tè chio̍h-pôaⁿ, chiū-sī hē Iâ-hô-hoa ê iok-kūi ê; chit tè chio̍h-pôaⁿ kàu kin-á-ji̍t iáu tī Pek-sī-be̍k lâng Iok-su-a ê hn̂g.

19耶和華phah死Pek-sī-be̍k人，因為in看伊ê約櫃內，就phah死in七十人；五萬人百姓哀哭，因為耶和華大大phah死百姓。Iâ-hô-hoa phah-sí Pek-sī-be̍k lâng, in-ūi in khòaⁿ I ê iok-kūi-lāi, chiū phah-sí in chhit-cha̍p lâng; gō͘-bān lâng peh-sìⁿ ai-khàu, in-ūi Iâ-hô-hoa tōa-tōa phah-sí peh-sìⁿ.

20Pek-sī-be̍k人講，Chī-chūi能khiā tī耶和華，chit-ê聖ê上帝，ê面前ah？伊beh上去甚麼人hia，來離開咱ah？Pek-sī-be̍k lâng kóng, Chī-chūi ōe khiā tī Iâ-hô-hoa, chit ê sèng ê Siōng-tè, ê bīn-chêng ah? I beh chiūⁿ-khì sím-mi̍h lâng hia, lâi lī-khui lán ah?

21Tùi án-ni，差人去見Ki-lia̍t-iâ-lîm khiā起ê百姓，講，腓利士人將耶和華ê約櫃送tò來；lín落來，扛上去lín hia。Tùi án-ni chhe lâng khì kìⁿ Ki-lia̍t-iâ-lîm khiā-khí ê peh-sìⁿ, kóng, Hui-lī-sū lâng chiong Iâ-hô-hoa ê iok-kūi sàng tò-lâi; lín lo̍h-lâi, kng chiūⁿ-khì lín hia.