1撒母耳已經老，就設立伊ê kiáⁿ做以色列ê士師。Sat-bó͘-jíⁿ í-keng lāu, chiū siat-li̍p i ê kiáⁿ chòe Í-sek-lia̍t ê sū-su.

2伊ê大kiáⁿ名叫約珥，第二kiáⁿ名叫A-pí-a；in tī別是巴做士師。I ê tōa-kiáⁿ miâ-kiò Iok-jíⁿ, tē-jī-kiáⁿ miâ-kiò A-pí-a; in tī Pia̍t-sī-pa chòe sū-su.

3總是伊ê kiáⁿ無行伊ê路，偏私貪財，受pò͘賂，無照直判斷。Chóng-sī i ê kiáⁿ bô kiâⁿ i ê lō͘, phian-su tham-châi, siū pò͘-lō͘, bô chiàu-ti̍t phòaⁿ-toàn.

4以色列ê長老lóng聚集，到La̍h-má見撒母耳；Í-sek-lia̍t ê tiúⁿ-ló lóng chū-chi̍p, kàu La̍h-má kìⁿ Sat-bó͘-jíⁿ;

5kā伊講，看ah，你已經老，你ê kiáⁿ無行你ê路；taⁿ求你kā阮設立一個王判斷阮，親像列國一樣。kā i kóng, Khòaⁿ ah, lí í-keng lāu, lí ê kiáⁿ bô kiâⁿ lí ê lō͘; taⁿ kiû lí kā goán siat-li̍p chi̍t ê ông phòaⁿ-toàn goán, chhin-chhiūⁿ lia̍t-kok chi̍t-iūⁿ.

6In講，求你kā阮設立一個王判斷阮，hit-ê事撒母耳無歡喜。撒母耳就祈禱耶和華。In kóng, Kiû lí kā goán siat-li̍p chi̍t ê ông phòaⁿ-toàn goán, hit ê sū Sat-bó͘-jíⁿ bô hoaⁿ-hí. Sat-bó͘-jíⁿ chiū kî-tó Iâ-hô-hoa.

7耶和華對撒母耳講，百姓對你所講一切ê話，你tio̍h thàn；因為in m̄是棄sak你，是棄sak我，無hō͘我做in ê王。Iâ-hô-hoa tùi Sat-bó͘-jíⁿ kóng, Peh-sìⁿ tùi lí só͘ kóng it-chhè ê ōe, lí tio̍h thàn; in-ūi in m̄-sī khì-sak lí, sī khì-sak Góa, bô hō͘ Góa chòe in ê ông.

8Tùi我chhōa in出埃及到今á日，in一切ê所行離開我，去服事別ê上帝，taⁿ也照án-ni款待你；Tùi Góa chhōa in chhut Ai-ki̍p kàu kin-á-ji̍t, in it-chhè ê só͘-kiâⁿ lī-khui Góa, khì ho̍k-sāi pa̍t ê siōng-tè, taⁿ iā chiàu án-ni khoán-thāi lí;

9所以你tio̍h thàn in ê話；總是tio̍h嚴嚴警戒in，hō͘ in知將來管理in ê王ê制度是怎樣。só͘-í lí tio̍h thàn in ê ōe; chóng-sī tio̍h giâm-giâm kéng-kài in, hō͘ in chai chiong-lâi koán-lí in ê ông ê chè-tō͘ sī cháiⁿ-iūⁿ.

10撒母耳用耶和華ê話lóng kā百姓講，就是hiah-ê對伊討一個王ê，講，Sat-bó͘-jíⁿ ēng Iâ-hô-hoa ê ōe lóng kā peh-sìⁿ kóng, chiū-sī hiah ê tùi i thó chi̍t ê ông ê, kóng,

11將來管理lín ê王ê制度就是án-ni，伊beh取lín ê kiáⁿ，為家己設立伊kā伊管車，做伊ê馬兵，走tī車ê頭前；Chiong-lâi koán-lí lín ê ông ê chè-tō͘ chiū-sī án-ni, i beh chhú lín ê kiáⁿ, ūi ka-kī siat-li̍p i kā i koán-chhia, chòe i ê bé-peng, cháu tī chhia ê thâu-chêng;

12koh beh為家己設立in做千總，五十夫長；也beh設立人kā伊作園，收五穀，製造軍器，kap車裡ê器具；koh beh ūi ka-kī siat-li̍p in chòe chhian-chóng, ngó͘-si̍p-hu-tióng; iā beh siat-li̍p lâng kā i choh-hn̂g, siu gō͘-kak, chè-chō kun-khì, kap chhia-nih ê khì-kū;

13beh取lín ê cha-bó͘-kiáⁿ kā伊製造芳油，做煮食ê，做pek餅ê；beh chhú lín ê cha-bó͘-kiáⁿ kā i chè-chō phang-iû, chòe chú-chia̍h-ê, chòe pek-piáⁿ-ê;

14lín ê田園、葡萄園、橄欖-園，hit-ê siōng好ê，伊beh取伊來hō͘伊ê奴僕；lín ê chhân-hn̂g, phû-tô-hn̂g, kaⁿ-ná-hn̂g, hit ê siōng-hó-ê, i beh chhú i lâi hō͘ i ê lô͘-po̍k;

15lín所種作ê，kap lín ê葡萄園，伊beh取十份一，hō͘伊ê太監kap奴僕。lín só͘ chèng-choh-ê, kap lín ê phû-tô-hn̂g, i beh chhú cha̍p-hūn-chi̍t, hō͘ i ê thài-kàm kap lô͘-po̍k.

16Koh beh取lín ê奴僕、女婢、勇健ê少年人，kap lín ê驢，來做伊ê差用；Koh beh chhú lín ê lô͘-po̍k, lú-pī, ióng-kiāⁿ ê siàu-liân lâng, kap lín ê lû, lâi chòe i ê chhe-ēng;

17lín ê羊群，伊beh取十份ê一份；lín也beh做伊ê奴僕；lín ê iûⁿ-kûn, i beh chhú cha̍p-hūn ê chi̍t-hūn; lín iā beh chòe i ê lô͘-po̍k;

18Hit時lín beh因為所揀ê王來喉叫；總是耶和華tī hit時m̄聽lín。hit-sî lín beh in-ūi só͘ kéng ê ông lâi âu-kiò; chóng-sī Iâ-hô-hoa tī hit-sî m̄-thiaⁿ lín.

19總是百姓m̄肯聽撒母耳ê話，講，M̄-ah，阮的確beh一個王治理阮；Chóng-sī peh-sìⁿ m̄-khéng thiaⁿ Sat-bó͘-jíⁿ ê ōe, kóng, M̄-ah, goán tek-khak beh chi̍t ê ông tī-lí goán;

20Hō͘阮親像列國一樣，阮ê王判斷阮，做頭chhōa阮，替阮交戰。hō͘ goán chhin-chhiūⁿ lia̍t-kok chi̍t-iūⁿ, goán ê ông phòaⁿ-toàn goán, chòe-thâu chhōa goán, thòe goán kau-chiàn.

21撒母耳已經聽見百姓lóng總ê話，就講hiah-ê話hō͘耶和華聽。Sat-bó͘-jíⁿ í-keng thiaⁿ-kìⁿ peh-sìⁿ lóng-chóng ê ōe, chiū kóng hiah ê ōe hō͘ Iâ-hô-hoa thiaⁿ.

22耶和華對撒母耳講，你tio̍h聽in ê話，kā in設立一個王。撒母耳kā以色列人講，Lín ta̍k-ê tò去家己ê城。Iâ-hô-hoa tùi Sat-bó͘-jíⁿ kóng, Lí tio̍h thiaⁿ in ê ōe, kā in siat-li̍p chi̍t ê ông. Sat-bó͘-jíⁿ kā Í-sek-lia̍t lâng kóng, Lín ta̍k-ê tò-khì ka-kī ê siâⁿ.

1有一個便雅憫人，名叫Ki-sū，是便雅憫人A-húi-a ê元孫，Pí-ko-la̍h ê曾孫，Sián-lô ê孫，A-piat ê kiáⁿ，是一個大氣力ê勇士。Ū chi̍t ê Piān-ngá-bín lâng, miâ-kiò Ki-sū, sī Piān-ngá-bín lâng A-húi-a ê goân-sun, Pí-ko-la̍h ê cheng-sun, Sián-lô ê sun, A-piat ê kiáⁿ, sī chi̍t ê tōa khùi-la̍t ê ióng-sū.

2伊有一個kiáⁿ，名叫掃羅，勇壯koh好生做，tī以色列中無一人能比得伊ê好生做；身體比眾人khah-高一個頭殼。I ū chi̍t ê kiáⁿ, miâ-kiò Sò-lô, ióng-chòng koh hó siⁿ-chòe, tī Í-sek-lia̍t tiong bô chi̍t-lâng ōe pí-tit i ê hó siⁿ-chòe; sin-thé pí chèng-lâng khah-koâiⁿ chi̍t ê thâu-khak.

3掃羅ê老父Ki-sū phah-m̄見kúi-nā隻驢母。Ki-sū kā伊ê kiáⁿ掃羅講，你chhōa一個奴僕起身去chhē驢母。Sò-lô ê lāu-pē Ki-sū phah-m̄-kìⁿ kúi-nā chiah lû-bú. Ki-sū kā i ê kiáⁿ Sò-lô kóng, Lí chhōa chi̍t ê lô͘-po̍k khí-sin khì chhē lû-bú.

4伊就經過Í-hoat-liân山地，kap Sa-lī-sa ê地，lóng chhē無；koh經過Sa-lîm ê地，也無tī-hia；koh經過便雅憫ê地，也chhē無。I chiū keng-kè Í-hoat-liân soaⁿ-tōe, kap Sa-lī-sa ê tōe, lóng chhē-bô; koh keng-kè Sa-lîm ê tōe, iā bô tī-hia; koh keng-kè Piān-ngá-bín ê tōe, iā chhē-bô.

5到So͘-hut ê地，掃羅kā跟tè伊ê奴僕講，來ah，咱tò來去，驚了我ê老父無掛慮驢，來煩惱咱。Kàu So͘-hut ê tōe, Sò-lô kā kun-tè i ê lô͘-po̍k kóng, Lâi-ah, lán tò-lâi-khì, kiaⁿ-liáu góa ê lāu-pē bô khòa-lū lû, lâi hoân-ló lán.

6奴僕講，看ah，chit-ê城裡有一個上帝ê奴僕，是人所尊重ê，見伊所講ê lóng的確應驗；咱m̄值tio̍h去伊hia；kiám-chhái伊會指示咱所行ê路。Lô͘-po̍k kóng, Khòaⁿ ah, chit ê siâⁿ-nih ū chi̍t-ê Siōng-tè ê lô͘-po̍k, sī lâng só͘ chun-tiōng ê, kìⁿ i só͘-kóng-ê lóng tek-khak èng-giām; lán m̄-ta̍t-tio̍h khì i hia; kiám-chhái i ōe chí-sī lán só͘ kiâⁿ ê lō͘.

7掃羅kā奴僕講，咱若去，有甚麼thang送hit人ah？因為咱袋á內ê食物lóng了lah，也無禮物thang送hit-ê上帝ê奴僕；咱身邊iáu有甚麼物無？Sò-lô kā lô͘-po̍k kóng, Lán nā khì, ū sím-mi̍h thang sàng hit-lâng ah? in-ūi lán tē-á-lāi ê chia̍h-mi̍h lóng liáu lah, iā bô lé-mi̍h thang sàng hit ê Siōng-tè ê lô͘-po̍k; lán sin-piⁿ iáu ū sím-mi̍h mi̍h bô?

8奴僕koh應掃羅講，我手裡有銀一sià-khek-le̍k ê四份一；我將chit-ê來送hit-ê上帝ê奴僕，請伊指示咱所行ê路。Lô͘-po̍k koh ìn Sò-lô kóng, Góa chhiú-nih ū gûn chi̍t sià-khek-le̍k ê sì-hūn-chi̍t; góa chiong chit-ê lâi sàng hit-ê Siōng-tè ê lô͘-po̍k, chhiáⁿ i chí-sī lán só͘ kiâⁿ ê lō͘.

9(前以色列中，若有人去問上帝，就講，咱來去見先見；因為現今稱先知，前稱先見。)(Chêng Í-sek-lia̍t tiong, nā ū lâng khì mn̄g Siōng-tè, chiū kóng, Lán lâi khì kìⁿ sian-kiàn; in-ūi hiān-kim chheng sian-ti, chêng chheng sian-kiàn.)

10掃羅kā奴僕講，你所講ê話好；來ah，咱來去；in就去上帝ê人所tiàm ê城。Sò-lô kā lô͘-po̍k kóng, Lí só͘ kóng ê ōe hó; lâi-ah, lán lâi-khì; in chiū khì Siōng-tè ê lâng só͘ tiàm ê siâⁿ.

11In上山phiâⁿ beh入城，就tú-tio̍h kúi-nā ê少年ê cha-bó͘-gín-ná出來鎗7水，問in講，先見tī-chia無？In chiūⁿ soaⁿ-phiâⁿ beh ji̍p siâⁿ, chiū tú-tio̍h kúi-nā ê siàu-liân ê cha-bó͘-gín-ná chhut-lâi chhiūⁿ-chúi, mn̄g in kóng, Sian-kiàn tī-chia bô?

12Cha-bó͘-gín-ná應講，是lah，tī-chia；看ah，伊tī你ê頭前；趕緊去，伊今á日tú-á到城；因為今á日百姓tī山頭壇獻祭；Cha-bó͘-gín-ná ìn kóng, Sī lah, tī-chia; khòaⁿ ah, i tī lí ê thâu-chêng; kóaⁿ-kín khì, i kin-á-ji̍t tú-á kàu siâⁿ; in-ūi kin-á-ji̍t peh-sìⁿ tī soaⁿ-thâu-tôaⁿ hiàn-chè;

13tī伊iáu未上去山頭壇beh食桌ê事先，lín一下入城就會tú-tio̍h伊；因為伊iáu未到，百姓無事先食；的確thèng候伊事先祝福祭物，然後所請ê人客chiah食；taⁿ lín上去，chit時會tú-tio̍h伊。tī i iáu-bē chiūⁿ-khì soaⁿ-thâu-tôaⁿ beh chia̍h-toh ê tāi-seng, lín chi̍t-ē ji̍p siâⁿ chiū ōe tú-tio̍h i; in-ūi i iáu-bē kàu, peh-sìⁿ bô tāi-seng chia̍h; tek-khak thèng-hāu i tāi-seng chiok-hok chè-mi̍h, jiân-āu só͘ chhiáⁿ ê lâng-kheh chiah chia̍h; taⁿ lín chiūⁿ-khì, chit-sî ōe tú-tio̍h i.

14兩人就上城；已經入城，撒母耳出來，beh上高ê所在，就tú-tio̍h in。Nn̄g-lâng chiū chiūⁿ siâⁿ; í-keng ji̍p siâⁿ, Sat-bó͘-jíⁿ chhut-lâi, beh chiūⁿ koâiⁿ ê só͘-chāi, chiū tú-tio̍h in.

15掃羅未到ê前一日，耶和華已經啟示撒母耳講，Sò-lô bē kàu ê chêng chi̍t-ji̍t, Iâ-hô-hoa í-keng khé-sī Sat-bó͘-jíⁿ kóng,

16明á載chit時，我beh差一人tùi便雅憫地到你chia；你tio̍h kā伊抹油做我ê百姓以色列ê頭；伊beh救我ê百姓脫離腓利士人ê手；因為我ê百姓哀求ê聲透到我，我看顧in。Bîn-á-chài chit-sî, Góa beh chhe chi̍t-lâng tùi Piān-ngá-bín tōe kàu lí chia; lí tio̍h kā i boah-iû chòe Góa ê peh-sìⁿ Í-sek-lia̍t ê thâu; i beh kiù Góa ê peh-sìⁿ thoat-lī Hui-lī-sū lâng ê chhiú; in-ūi Góa ê peh-sìⁿ ai-kiû ê siaⁿ thàu-kàu Góa, Góa khòaⁿ-kò͘ in.

17撒母耳看見掃羅ê時，耶和華kā伊講，看ah，chit人就是我所kā你講ê，伊beh管理我ê百姓。Sat-bó͘-jíⁿ khòaⁿ-kìⁿ Sò-lô ê sî, Iâ-hô-hoa kā i kóng, Khòaⁿ ah, chit-lâng chiū-sī Góa só͘ kā lí kóng ê, i beh koán-lí Góa ê peh-sìⁿ.

18掃羅tī城門裡óa近撒母耳講，請kā我講，先見ê厝tī toh落？Sò-lô tī siâⁿ-mn̂g-nih óa-kūn Sat-bó͘-jíⁿ kóng, Chhiáⁿ kā góa kóng, sian-kiàn ê chhù tī toh-lo̍h?

19撒母耳應掃羅講，我就是先見；你tī我ê頭前上去高ê所在，因為lín今á日beh kap我食；明á早起我beh hō͘你去；你心內ê事lóng beh kā你講。Sat-bó͘-jíⁿ ìn Sò-lô kóng, Góa chiū-sī sian-kiàn; lí tī góa ê thâu-chêng chiūⁿ-khì koâiⁿ ê só͘-chāi, in-ūi lín kin-á-ji̍t beh kap góa chia̍h; bîn-á-chá-khí góa beh hō͘ lí khì; lí sim-lāi ê sū lóng beh kā lí kóng.

20你三日前phah-m̄見hiah-ê驢母，你m̄免掛意，已經chhē-tio̍h lah。以色列眾人所欣慕ê歸是誰 ah？kiám m̄是歸你，kap你ê老父ê家mah？Lí saⁿ-ji̍t chêng phah-m̄-kìⁿ hiah ê lû-bú, lí m̄-bián khòa-ì, í-keng chhē-tio̍h lah. Í-sek-lia̍t chèng-lâng só͘ him-bō͘-ê kui chī-chūi ah? kiám m̄-sī kui lí, kap lí ê lāu-pē ê ke mah?

21掃羅應講，我kiám m̄是便雅憫人，以色列支派中極小khóa ê mah？便雅憫支派chiah-ê家ê中間，我ê家kiám m̄是極微細mah？你啥事對我講chit號話？Sò-lô ìn kóng, Góa kiám m̄-sī Piān-ngá-bín lâng, Í-sek-lia̍t chi-phài tiong ke̍k sió-khóa ê mah? Piān-ngá-bín chi-phài chiah ê ke ê tiong-kan, góa ê ke kiám m̄-sī ke̍k bî-sòe mah? Lí siáⁿ-sū tùi góa kóng chit hō ōe?

22撒母耳chhōa掃羅kap跟tè伊ê人入客廳，hō͘ in tī所請ê人ê中間坐大位；所請ê約略有三十人。Sat-bó͘-jíⁿ chhōa Sò-lô kap kun-tè i ê lâng ji̍p kheh-thiaⁿ, hō͘ in tī só͘ chhiáⁿ ê lâng ê tiong-kan chē tōa-ūi; só͘-chhiáⁿ-ê iok-lio̍k ū saⁿ-cha̍p lâng.

23撒母耳kā廚房講，我所交代你，kah你tio̍h收teh hit份，taⁿ thang捧來。Sat-bó͘-jíⁿ kā tû-pâng kóng, Góa só͘ kau-tài lí, kah lí tio̍h siu-teh hit-hūn, taⁿ thang phâng-lâi.

24廚房就捧hit腿，kap頂面所有ê，hē tī掃羅ê面前。撒母耳講，你看，chit-ê所留ê，你tio̍h the̍h起來食；因為我請百姓ê時，tiâu故意kā你留teh到定tio̍h ê日。Hit日掃羅就kap撒母耳相kap食。Tû-pâng chiū phâng hit-thúi, kap téng-bīn só͘ ū-ê, hē tī Sò-lô ê bīn-chêng. Sat-bó͘-jíⁿ kóng, Lí khòaⁿ, chit-ê só͘ lâu-ê, lí tio̍h the̍h-khí-lâi chia̍h; in-ūi góa chhiáⁿ peh-sìⁿ ê sî, tiâu-kò͘-ì kā lí lâu-teh kàu tiāⁿ-tio̍h ê ji̍t. Hit-ji̍t Sò-lô chiū kap Sat-bó͘-jíⁿ saⁿ-kap chia̍h.

25In tùi高ê所在落來，入城，撒母耳kap掃羅tī厝頂講話。In tùi koâiⁿ ê só͘-chāi lo̍h-lâi, ji̍p siâⁿ, Sat-bó͘-jíⁿ kap Sò-lô tī chhù-téng kóng-ōe.

26In早早起來，phah-phú光ê時，撒母耳tī厝頂叫掃羅講，起來ah，我beh送你tò去。掃羅就起來；伊kap撒母耳兩人出去外面。In chá-chá khí-lâi, phah-phú-kng ê sî, Sat-bó͘-jíⁿ tī chhù-téng kiò Sò-lô kóng, Khí-lâi ah, góa beh sàng lí tò-khì. Sò-lô chiū khí-lâi; i kap Sat-bó͘-jíⁿ nn̄g-lâng chhut-khì gōa-bīn.

27In落去到城ê角頭，撒母耳kā掃羅講，Tio̍h吩咐奴僕事先咱去；奴僕就去；koh講，你請khiā-teh，我beh hō͘你聽上帝ê話。In lo̍h-khì kàu siâⁿ ê kak-thâu, Sat-bó͘-jíⁿ kā Sò-lô kóng, Tio̍h hoan-hù lô͘-po̍k tāi-seng lán khì; lô͘-po̍k chiū khì; koh kóng, Lí chhiáⁿ khiā-teh, góa beh hō͘ lí thiaⁿ Siōng-tè ê ōe.

1撒母耳the̍h一瓶油，倒tī掃羅ê頭殼，kā伊chim，講，這kiám m̄是耶和華抹你做伊ê業ê頭人mah？Sat-bó͘-jíⁿ the̍h chi̍t pân iû, tò tī Sò-lô ê thâu-khak, kā i chim, kóng, Che kiám m̄-sī Iâ-hô-hoa boah lí chòe I ê gia̍p ê thâu-lâng mah?

2今á日你離開我了後，tī便雅憫交界ê Siat-sat，近拉結ê墓，beh tú-tio̍h兩人；in beh kā你講，你去chhē hiah-ê驢母，已經chhē-tio̍h；taⁿ你ê老父無teh掛慮驢，是teh煩惱你，講，我為tio̍h我ê kiáⁿ beh怎樣ah？Kin-á-ji̍t lí lī-khui góa liáu-āu, tī Piān-ngá-bín kau-kài ê Siat-sat, kūn La̍h-kiat ê bōng, beh tú-tio̍h nn̄g-lâng; in beh kā lí kóng, Lí khì chhē hiah ê lû-bú, í-keng chhē-tio̍h; taⁿ lí ê lāu-pē bô teh khòa-lū lû, sī teh hoân-ló lí, kóng, Góa ūi-tio̍h góa ê kiáⁿ beh cháiⁿ-iūⁿ ah?

3你beh tùi-hia去，到Tha-po̍k ê橡樹hia，beh有三人tú-tio̍h你，in是beh去Pek-te̍k-lī到上帝hia，一個帶三隻山羊á，一個帶三個餅，一個帶一皮袋ê酒；Lí beh tùi-hia khì, kàu Tha-po̍k ê siōng-chhiū hia, beh ū saⁿ-lâng tú-tio̍h lí, in sī beh khì Pek-te̍k-lī kàu Siōng-tè hia, chi̍t-ê tòa saⁿ chiah soaⁿ-iûⁿ-á, chi̍t-ê tòa saⁿ ê piáⁿ, chi̍t-ê tòa chi̍t phê-tē ê chiú;

4in beh問你平安，用兩個餅hō͘你；你就tùi in ê手接(chih)來。in beh mn̄g lí pêng-an, ēng nn̄g ê piáⁿ hō͘ lí; lí chiū tùi in ê chhiú chih-lâi.

5Chit-tia̍p了後，你beh到上帝ê山，tī-hia有腓利士人防守ê兵；你到城ê時，beh tú-tio̍h一陣先知tùi高ê所在落來；tī in ê頭前有瑟，有lin-long鼓，有笛á，有琴；in lóng講先知話。Chit-tia̍p liáu-āu lí beh kàu Siōng-tè ê soaⁿ, tī-hia ū Hui-lī-sū lâng hông-siú ê peng; lí kàu siâⁿ ê sî, beh tú-tio̍h chi̍t tīn sian-ti tùi koâiⁿ ê só͘-chāi lo̍h-lâi; tī in ê thâu-chêng ū sek, ū lin-long-kó͘, ū ta̍t-á, ū khîm; in lóng kóng sian-ti ōe.

6耶和華ê神beh大大臨到你，你也beh kap in講先知話，你beh變做新ê人。Iâ-hô-hoa ê Sîn beh tōa-tōa lîm-kàu lí, lí iā beh kap in kóng sian-ti ōe, lí beh piàn-chòe sin ê lâng.

7chiah-ê兆頭臨到你，你tio̍h thàn機會來做，因為上帝kap你tī-teh。Chiah ê tiāu-thâu lîm-kàu lí, lí tio̍h thàn ki-hōe lâi chòe, in-ūi Siōng-tè kap lí tī-teh.

8你tio̍h事先我落去Kiat-kah，我也beh落去你hia，獻燒祭kap謝恩祭；你tio̍h thèng候七日，thèng候我到你hia，指示你tio̍h行ê事。Lí tio̍h tāi-seng góa lo̍h-khì Kiat-kah, góa iā beh lo̍h-khì lí hia, hiàn sio-chè kap siā-un-chè; lí tio̍h thèng-hāu chhit-ji̍t, thèng-hāu góa kàu lí hia, chí-sī lí tio̍h kiâⁿ ê sū.

9伊oa̍t-tńg身beh離開撒母耳，上帝換新伊ê心；當hit日chiah-ê兆頭lóng應驗。I oa̍t-tńg-sin beh lī-khui Sat-bó͘-jíⁿ, Siōng-tè ōaⁿ-sin i ê sim; tng hit-ji̍t chiah ê tiāu-thâu lóng èng-giām.

10In已經到hit-ê山，有一陣先知人tú-tio̍h伊；上帝ê神大大臨到掃羅，伊就tī in中間講先知話。In í-keng kàu hit ê soaⁿ, ū chi̍t tīn sian-ti-lâng tú-tio̍h i; Siōng-tè ê Sîn tōa-tōa lîm-kàu Sò-lô, i chiū tī in tiong-kan kóng sian-ti ōe.

11平素bat伊ê人，看伊tī先知中teh講先知話，就相kap講，Ki-sū ê kiáⁿ tú-tio̍h án-ni是怎樣？掃羅也列tī先知中mah？Pêng-sò͘ bat i ê lâng, khòaⁿ i tī sian-ti-tiong teh kóng sian-ti ōe, chiū saⁿ-kap kóng, Ki-sū ê kiáⁿ tú-tio̍h án-ni sī cháiⁿ-iūⁿ? Sò-lô iā lia̍t tī sian-ti-tiong mah?

12Hit所在有一人應講，hiah-ê人ê老父是是誰 ah？Tùi án-ni，有一句俗語講，掃羅也列tī先知中mah？Hit só͘-chāi ū chi̍t lâng ìn kóng, Hiah ê lâng ê lāu-pē sī chī-chūi ah? Tùi án-ni ū chi̍t-kù sio̍k-gú kóng, Sò-lô iā lia̍t tī sian-ti-tiong mah?

13掃羅講先知話明白，就上去高ê所在。Sò-lô kóng sian-ti ōe bêng-pe̍k, chiū chiūⁿ-khì koâiⁿ ê só͘-chāi.

14掃羅ê叔問掃羅kap伊ê奴僕講，lín去toh落？應講，去chhē驢母；chhē伊無，就去撒母耳hia。Sò-lô ê chek mn̄g Sò-lô kap i ê lô͘-po̍k kóng, Lín khì toh-lo̍h? Ìn kóng, Khì chhē lû-bú; chhē i bô, chiū khì Sat-bó͘-jíⁿ hia.

15掃羅ê叔講，請你kā我講，撒母耳kā lín講甚麼。Sò-lô ê chek kóng, Chhiáⁿ lí kā góa kóng, Sat-bó͘-jíⁿ kā lín kóng sím-mi̍h.

16掃羅kā伊ê叔講，伊明明kā阮講驢母已經chhē-tio̍h lah。論到撒母耳所講國ê事，伊無kā伊講。Sò-lô kā i ê chek kóng, I bêng-bêng kā goán kóng lû-bú í-keng chhē-tio̍h lah. Lūn-kàu Sat-bó͘-jíⁿ só͘ kóng kok ê sū, i bô kā i kóng.

17撒母耳招集百姓到Bí-su-pa耶和華hia；Sat-bó͘-jíⁿ chio-chi̍p peh-sìⁿ kàu Bí-su-pa Iâ-hô-hoa hia;

18kā以色列人講，耶和華以色列ê上帝án-ni講，我chhōa以色列出埃及，救lín脫離埃及人ê手，也脫離lóng總hiah-ê制壓lín國ê手。kā Í-sek-lia̍t lâng kóng, Iâ-hô-hoa Í-sek-lia̍t ê Siōng-tè án-ni kóng, Góa chhōa Í-sek-lia̍t chhut Ai-ki̍p, kiù lín thoat-lī Ai-ki̍p lâng ê chhiú, iā thoat-lī lóng-chóng hiah ê chè-ap lín kok ê chhiú.

19總是lín今á日有棄sak lín ê上帝，就是本身救lín脫離一切患難艱苦ê；lín也對伊講，tio̍h設立王管理阮。Taⁿ lín tio̍h照lín ê支派，lín ê宗族，來khiā tī耶和華ê面前。Chóng-sī lín kin-á-ji̍t ū khì-sak lín ê Siōng-tè, chiū-sī pún-sin kiù lín thoat-lī it-chhè hoān-lān kan-khó͘ ê; lín iā tùi I kóng, tio̍h siat-li̍p ông koán-lí goán. Taⁿ lín tio̍h chiàu lín ê chi-phài, lín ê chong-cho̍k, lâi khiā tī Iâ-hô-hoa ê bīn-chêng.

20Tùi án-ni，撒母耳hō͘以色列眾支派近前來，就取tio̍h便雅憫ê支派；Tùi án-ni Sat-bó͘-jíⁿ hō͘ Í-sek-lia̍t chèng chi-phài kūn-chêng lâi, chiū chhú-tio̍h Piān-ngá-bín ê chi-phài;

21koh hō͘便雅憫ê支派照in ê宗族近前來，就取tio̍h Má-te̍k-lī族；tùi hit中間koh取tio̍h Ki-su7e5 kiáⁿ掃羅；人chhē伊，也chhē-bōe-tio̍h。koh hō͘ Piān-ngá-bín ê chi-phài chiàu in ê chong-cho̍k kūn-chêng lâi, chiū chhú-tio̍h Má-te̍k-lī cho̍k; tùi hit tiong-kan koh chhú-tio̍h Ki-sū ê kiáⁿ Sò-lô; lâng chhē i, iā chhē-bōe-tio̍h.

22所以就koh問耶和華講，hit人有來chia á-bē？耶和華講，伊bih tī雜物ê中間。Só͘-í chiū koh mn̄g Iâ-hô-hoa kóng, Hit-lâng ū lâi chia á-bē? Iâ-hô-hoa kóng, I bih tī cha̍p-mi̍h ê tiong-kan.

23In就走去，tùi-hia chhōa伊出來；伊khiā tī百姓ê中間，比眾百姓khah高一個頭殼。In chiū cháu-khì, tùi-hia chhōa i chhut-lâi; i khiā tī peh-sìⁿ ê tiong-kan, pí chèng peh-sìⁿ khah koâiⁿ chi̍t ê thâu-khak.

24撒母耳kā眾百姓講，耶和華所揀ê人，tī百姓中無一個能比得伊，lín看見mah？眾百姓就大聲叫講，願王萬歲。Sat-bó͘-jíⁿ kā chèng peh-sìⁿ kóng, Iâ-hô-hoa só͘ kéng ê lâng, tī peh-sìⁿ-tiong bô chi̍t-ê ōe pí-tit i, lín khòaⁿ-kìⁿ mah? Chèng peh-sìⁿ chiū tōa-siaⁿ kiò kóng, Goān ông bān-sòe.

25撒母耳將國法對百姓講明，koh記tī冊裡，hē tī耶和華ê面前；然後撒母耳四散眾人，ta̍k-ê tò去in ê家。Sat-bó͘-jíⁿ chiong kok-hoat tùi peh-sìⁿ kóng-bêng, koh kì tī chheh-nih, hē tī Iâ-hô-hoa ê bīn-chêng; jiân-āu Sat-bó͘-jíⁿ sì-sòaⁿ chèng-lâng, ta̍k-ê tò-khì in ê ke.

26掃羅也tò去Ki-pí-a，到伊ê家；有一陣人，hō͘上帝感動伊ê心ê，tè伊去。Sò-lô iā tò-khì Ki-pí-a, kàu i ê ke; ū chi̍t tīn lâng, hō͘ Siōng-tè kám-tōng i ê sim ê, tè i khì.

27Hiah-ê匪類講，Chit人thái能救咱ah？就藐視掃羅，無送伊禮物；總是掃羅靜靜。Hiah ê húi-lūi kóng, Chit-lâng thái ōe kiù lán ah? Chiū biáu-sī Sò-lô, bô sàng i lé-mi̍h; chóng-sī Sò-lô chēng-chēng.