1因為，兄弟，lín家己知阮前到lín中間m̄是空空；In-ūi, hiaⁿ-tī, lín ka-kī chai goán chêng kàu lín tiong-kan m̄ sī khang-khang;

2獨獨tī腓立比已經事先受苦tú-tio̍h凌辱，照lín所知ê，阮tī chōe-chōe爭戰ê中間，óa靠咱ê上帝，得tio̍h好膽tùi lín講上帝ê福音。to̍k-to̍k tī Hui-li̍p-pí í-keng tāi-seng siū khó͘ tú-tio̍h lêng-jio̍k, chiàu lín só͘ chai ê, goán tī chōe-chōe cheng-chiàn ê tiong-kan, óa-khò lán ê Siōng-tè, tit-tio̍h hó-táⁿ tùi lín kóng Siōng-tè ê hok-im.

3因為阮ê勸勉m̄是出tī差謬，m̄是出tī無清氣，也m̄是用奸詐，In-ūi goán ê khoàn-bián m̄ sī chhut tī chha-biū, m̄ sī chhut tī bô chheng-khì, iā m̄ sī ēng kan-chà,

4就是阮hō͘上帝驗過，chiah用福音託重阮，阮就照án-ni來講，m̄是親像hō͘人歡喜ê，就是hō͘驗阮ê心ê上帝歡喜。chiū-sī goán hō͘ Siōng-tè giām-kè, chiah ēng hok-im thok-tiōng goán, goán chiū chiàu án-ni lâi kóng, m̄ sī chhin-chhiūⁿ hō͘ lâng hoaⁿ-hí ê, chiū-sī hō͘ giām goán ê sim ê Siōng-tè hoaⁿ-hí.

5因為阮lóng未bat用諂媚ê話，照lín所知ê，也無用裝飾來遮蓋貪心，上帝做干證。In-ūi goán lóng bē bat ēng thiám-mī ê ōe, chiàu lín só͘ chai ê, iā bô ēng chng-thāⁿ lâi jia-khàm tham-sim, Siōng-tè chòe kan-chèng.

6阮做基督ê使徒，雖然thang kah人敬重阮，總是m̄-bat自人求榮光，也無對lín，也無對別人。Goán chòe Ki-tok ê sù-tô͘, sui-jiân thang kah lâng kèng-tiōng goán, chóng-sī m̄ bat tùi lâng kiû êng-kng, iā bô tùi lín, iā bô tùi pa̍t lâng.

7阮就是溫柔tī lín中間，親像奶母io家己ê kiáⁿ兒。Goán chiū-sī un-jiû tī lín tiong-kan, chhin-chhiūⁿ lin-bú io ka-kī ê kiáⁿ-jî.

8親像án-ni，阮因為戀慕lín，就m̄-nā上帝ê福音，連家己ê性命也歡喜hō͘ lín；因為lín是阮所疼痛ê。Chhin-chhiūⁿ án-ni goán in-ūi loân-bō͘ lín, chiū m̄ nā Siōng-tè ê hok-im, liân ka-kī ê sìⁿ-miā iā hoaⁿ-hí hō͘ lín; in-ūi lín sī goán só͘ thiàⁿ-thàng ê.

9兄弟ah，lín記得阮ê tio̍h磨kap艱苦，ài免得拖累lín一人，就暝日做工，來傳上帝ê福音hō͘ lín。Hiaⁿ-tī ah, lín kì-tit goán ê tio̍h-bôa kap kan-khó͘, ài bián-tit thoa-lūi lín chi̍t lâng, chiū mî-ji̍t chòe kang, lâi thoân Siōng-tè ê hok-im hō͘ lín.

10Lín做干證，上帝也做干證，阮對lín信ê人，做人是怎樣聖潔、公義，無thang嫌；Lín chòe kan-chèng, Siōng-tè iā chòe kan-chèng, goán tùi lín sìn ê lâng, chòe-lâng sī cháiⁿ-iūⁿ sèng-kiat, kong-gī, bô thang hiâm;

11親像lín知阮怎樣款待lín ta̍k人，親像老父款待家己ê kiáⁿ兒，有勸勉lín，也安慰，也干證；chhin-chhiūⁿ lín chai goán cháiⁿ-iūⁿ khoán-thāi lín ta̍k lâng chhin-chhiūⁿ lāu-pē khoán-thāi ka-kī ê kiáⁿ-jî, ū khoàn-bián lín, iā an-ùi, iā kan-chèng;

12是beh hō͘ lín行tāi-chì合tī上帝，就是召lín入伊ê國kap榮光ê。sī beh hō͘ lín kiâⁿ tāi-chì ha̍p tī Siōng-tè, chiū-sī tiàu lín ji̍p I ê kok kap êng-kng ê.

13所以阮也感謝上帝無soah，因為lín tùi阮承受所聽上帝ê道理ê時，lín接納伊，無掠做人ê道理，就是掠做上帝ê道理，(實在真正是) ，這就是出力行tī lín信ê人ê中間。Só͘-í goán iā kám-siā Siōng-tè bô soah, in-ūi lín tùi goán sêng-siū só͘ thiaⁿ Siōng-tè ê tō-lí ê sî, lín chiap-la̍p i, bô lia̍h-chòe lâng ê tō-lí, chiū-sī lia̍h-chòe Siōng-tè ê tō-lí, (si̍t-chāi chin-chiàⁿ sī), che chiū-sī chhut-la̍t kiâⁿ tī lín sìn ê lâng ê tiong-kan.

14因為，兄弟ah，lín有學猶太地，tiàm-tī基督耶穌，上帝chiah-ê教會，因為lín受tio̍h lín同族ê陷害，親像in受tio̍h猶太人陷害一樣。In-ūi, hiaⁿ-tī ah, lín ū o̍h Iû-thài tōe, tiàm-tī Ki-tok Iâ-so͘, Siōng-tè chiah ê kàu-hōe, in-ūi lín siū-tio̍h lín tâng cho̍k ê hām-hāi, chhin-chhiūⁿ in siū-tio̍h Iû-thài lâng hām-hāi chi̍t iūⁿ.

15猶太人害死主耶穌kap chiah-ê先知，也激tio̍k阮；in無hō͘上帝歡喜，koh kap眾人做對敵；Iû-thài lâng hāi-sí Chú Iâ-so͘ kap chiah ê sian-ti, iā kek-tio̍k goán; in bô hō͘ Siōng-tè hoaⁿ-hí, koh kap chèng lâng chòe tùi-te̍k;

16阮教示外邦人，beh hō͘ in得tio̍h救，in阻擋阮，致到in ê罪惡時時teh灌滿；但是受氣到tī in已經極頭。goán kà-sī gōa-pang lâng, beh hō͘ in tit-tio̍h kiù, in chó͘-tòng goán, tì-kàu in ê chōe-ok sî-sî teh koàn-móa; nā-sī siū-khì kàu tī in í-keng ke̍k-thâu.

17兄弟ah，阮暫時kap lín離別，身軀離別，心無離別，就慇勤ná切，真ài見tio̍h lín ê面。Hiaⁿ-tī ah, goán chiām-sî kap lín lī-pia̍t, seng-khu lī-pia̍t sim bô lī-pia̍t, chiū un-khûn ná chhiat chin ài kìⁿ-tio̍h lín ê bīn.

18因為阮ài就近lín，我保羅一pái koh一pái ài去，但是撒旦阻擋阮。In-ūi goán ài chiū-kūn lín, góa Pó-lô chi̍t pái koh chi̍t pái ài khì, nā-sī Sat-tàn chó͘-tòng goán.

19因為阮ê ǹg望kap歡喜，以及所誇口ê冕旒是甚麼？Kiám m̄是lín當咱ê主耶穌koh來ê時，tī伊ê面前mah？In-ūi goán ê ǹg-bāng kap hoaⁿ-hí, í-ki̍p só͘ khoa-kháu ê bián-liû sī sím-mi̍h? Kiám m̄ sī lín tng lán ê Chú Iâ-so͘ koh-lâi ê sî, tī I ê bīn-chêng mah?

20因為lín是阮ê榮光kap歡喜。In- ūi lín sī goán ê êng-kng kap hoaⁿ-hí.

1所以阮已經忍bōe tiâu，就定tio̍h beh單身tòa tī雅典，Só͘-í goán í-keng lún bōe tiâu, chiū tiāⁿ-tio̍h beh toaⁿ-sin tòa tī Ngá-tián,

2差阮ê兄弟提摩太，伊tī基督ê福音做上帝ê差用，來堅固lín，koh為tio̍h lín ê信來安慰lín，chhe goán ê hiaⁿ-tī Thê-mô͘-thài, i tī Ki-tok ê hok-im chòe Siōng-tè ê chhe-ēng, lâi kian-kò͘ lín, koh ūi-tio̍h lín ê sìn lâi an-ùi lín,

3免得有人hō͘ hiah-ê患難所搖動，因為lín家己知，咱tú-tio̍h這是本定tio̍h teh。bián-tit ū lâng hō͘ hiah ê hoān-lān só͘ iô-tāng, in-ūi lín ka-kī chai lán tú-tio̍h che sī pún tiāⁿ-tio̍h teh.

4因為阮kap lín tī-teh ê時，bat事先kā lín講，咱會tú-tio̍h患難，後來果然án-ni，是lín所知。In-ūi goán kap lín tī-teh ê sî bat tāi-seng kā lín kóng, lán ōe tú-tio̍h hoān-lān, āu-lâi kó-jiân án-ni, sī lín só͘ chai.

5所以我既然bōe koh忍得，就差人ài知lín ê信怎樣，驚了hit-ê試ê有所試lín，就阮ê tio̍h磨歸tī空空。Só͘-í góa kì-jiân bōe koh lún-tit, chiū chhe lâng ài chai lín ê sìn cháiⁿ-iūⁿ, kiaⁿ-liáu hit ê chhì-ê ū só͘ chhì lín, chiū goán ê tio̍h-bôa kui tī khang-khang.

6總是taⁿ提摩太tùi lín hia來到阮chia，將lín ê信kap疼ê好消息報阮知，koh講起lín常常siàu念阮，欣慕beh見tio̍h阮，親像阮ài見tio̍h lín一樣；Chóng-sī taⁿ Thê-mô͘-thài tùi lín hia lâi kàu goán chia, chiong lín ê sìn kap thiàⁿ ê hó siau-sit pò goán chai, koh kóng-khí lín siông-siông siàu-liām goán, him-bō͘ beh kìⁿ-tio̍h goán, chhin-chhiūⁿ goán ài kìⁿ-tio̍h lín chi̍t iūⁿ;

7所以，兄弟ah，阮tī一切困迫患難ê中間，tùi lín ê信，為tio̍h lín受安慰。só͘-í, hiaⁿ-tī ah, goán tī it-chhè khùn-pek hoān-lān ê tiong-kan, tùi lín ê sìn, ūi-tio̍h lín siū an-ùi.

8因為lín若khiā在tī主，阮就活。In-ūi lín nā khiā-chāi tī Chú, goán chiū oa̍h.

9阮tī咱ê上帝ê面前為tio̍h lín真歡喜，阮為tio̍h chit-ê一切ê歡喜，會用甚麼ê感謝為tio̍h lín報答上帝ah？Goán tī lán ê Siōng-tè ê bīn-chêng ūi-tio̍h lín chin hoaⁿ-hí, goán ūi-tio̍h chit ê it-chhè ê hoaⁿ-hí, ōe ēng sím-mi̍h ê kám-siā ūi-tio̍h lín pò-tap Siōng-tè ah?

10阮暝日切切祈禱，ài見tio̍h lín ê面，來補滿lín ê信所無夠。goán mî-ji̍t chhiat-chhiat kî-tó, ài kìⁿ-tio̍h lín ê bīn, lâi pó͘-móa lín ê sìn só͘ bô kàu.

11願咱ê父上帝，kap咱ê主耶穌引chhōa阮平坦ê路就近lín。Goān lán ê Pē Siōng-tè, kap lán ê Chú Iâ-so͘ ín-chhōa goán pîⁿ-tháⁿ ê lō͘ chiū-kūn lín.

12也願主hō͘ lín相疼，續疼眾人益發充滿，親像阮ê疼lín，Iā goān Chú hō͘ lín saⁿ-thiàⁿ, sòa thiàⁿ chèng lâng it-hoat chhiong-móa, chhin-chhiūⁿ goán ê thiàⁿ lín,

13致到堅固lín ê心成聖，無thang嫌，tī咱ê父上帝ê面前，tī咱ê主耶穌kap伊lóng總ê聖徒koh來ê時。tì-kàu kian-kò͘ lín ê sim chiâⁿ-sèng bô thang hiâm, tī lán ê Pē Siōng-tè ê bīn-chêng, tī lán ê Chú Iâ-so͘ kap I lóng-chóng ê sèng-tô͘ koh lâi ê sî.

1兄弟ah，結尾來講，阮tī主耶穌求lín勸lín，照lín前所bat tùi阮受，tio̍h怎樣行來hō͘上帝歡喜ê，lín已經teh行，taⁿ tio̍h koh-khah出力行。Hiaⁿ-tī ah, kiat-bé lâi kóng, goán tī Chú Iâ-so͘ kiû lín khǹg lín, chiàu lín chêng só͘ bat tùi goán siū, tio̍h cháiⁿ-iūⁿ kiâⁿ lâi hō͘ Siōng-tè hoaⁿ-hí ê, lín í-keng teh kiâⁿ, taⁿ tio̍h koh khah chhut-la̍t kiâⁿ.

2因為lín知，阮tùi主耶穌有甚麼命令hō͘ lín。In-ūi lín chai goán tùi Chú Iâ-so͘ ū sím-mi̍h bēng-lēng hō͘ lín.

3因為上帝ê旨意，就是lín ê成聖，是ài lín離開淫亂。In-ūi Siōng-tè ê chí-ì, chiū-sī lín ê chiâⁿ-sèng, sī ài lín lī-khui îm-loān.

4Ài lín ta̍k人會曉得用聖潔kap尊貴守家己ê身軀，Ài lín ta̍k lâng ōe hiáu-tit ēng sèng-kiat kap chun-kùi siú ka-kī ê seng-khu,

5無用私慾ê情，親像m̄-bat上帝ê外邦人；bô ēng su-io̍k ê chêng, chhin-chhiūⁿ m̄ bat Siōng-tè ê gōa-pang lâng;

6tī chit層事也無過界，侵犯伊ê兄弟；因為見若chit號事主是伸冤ê，親像阮bat kā lín講來干證ê。tī chit chân sū iā bô kè-kài, chhim-hoān i ê hiaⁿ-tī; in-ūi kìⁿ-nā chit hō sū Chú sī sin-oan ê, chhin-chhiūⁿ goán bat kā lín kóng lâi kan-chèng ê.

7因為上帝召咱，m̄是致到污穢，就是tī成聖。In-ūi Siōng-tè tiàu lán, m̄ sī tì-kàu ù-òe, chiū-sī tī chiâⁿ-sèng.

8所以拒絕ê m̄是拒絕人，是拒絕上帝，就是用伊ê聖神hō͘ lín ê。Só͘-í kū-choa̍t ê m̄ sī kū-choa̍t lâng, sī kū-choa̍t Siōng-tè, chiū-sī ēng I ê Sèng Sîn hō͘ lín ê.

9論疼兄弟，m̄免寫phoe hō͘ lín，因為lín家己受tio̍h上帝ê教示，hō͘ lín大家相疼，Lūn thiàⁿ hiaⁿ-tī m̄ bián siá phoe hō͘ lín, in-ūi lín ka-kī siū-tio̍h Siōng-tè ê kà-sī, hō͘ lín tāi-ke saⁿ-thiàⁿ,

10是lín果然有行伊tī thong馬其頓ê眾兄弟。總是，兄弟ah，阮勸lín tio̍h益發án-ni；sī lín kó-jiân ū kiâⁿ i tī thong Má-kî-tùn ê chèng hiaⁿ-tī. Chóng-sī, hiaⁿ-tī ah, goán khǹg lín tio̍h it-hoat án-ni;

11也tio̍h對重恬靜，來做家己ê事，親手做lín ê工，照阮所bat吩咐lín ê，iā tio̍h tùi-tiōng thiâm-chēng, lâi chòe ka-kī ê sū, chhin-chhiú chòe lín ê kang, chiàu goán só͘ bat hoan-hù lín ê,

12hō͘ lín ǹg外面人端正來行，也家己無所欠缺。hō͘ lín ǹg gōa-bīn lâng toan-chiàⁿ lâi kiâⁿ, iā ka-kī bô só͘ khiàm-kheh.

13兄弟ah，論到teh睏ê人，阮m̄ ài lín m̄知，免得lín憂悶親像hiah-ê無ǹg望ê人一樣。Hiaⁿ-tī ah, lūn-kàu teh khùn ê lâng goán m̄ ài lín m̄ chai, bián-tit lín iu-būn chhin-chhiūⁿ hiah ê bô ǹg-bāng ê lâng chi̍t iūⁿ.

14因為咱若信耶穌有死有koh活，就屬耶穌來睏ê人，上帝也beh án-ni chhōa in kap耶穌saⁿ-kap來。In-ūi lán nā sìn Iâ-so͘ ū sí ū koh-oa̍h, chiū sio̍k Iâ-so͘ lâi khùn ê lâng, Siōng-tè iā beh án-ni chhōa in kap Iâ-so͘ saⁿ-kap lâi.

15因為阮奉主ê命令，用chit-ê kā lín講，就是主koh來ê時，咱chiah-ê iáu活teh ê人，bōe會事先hiah-ê teh睏ê人。In-ūi goán hōng Chú ê bēng-lēng, ēng chit-ê kā lín kóng, chiū-sī Chú koh lâi ê sî, lán chiah-ê iáu oa̍h-teh ê lâng, bōe-ōe tāi-seng hiah ê teh khùn ê lâng.

16因為主beh本身tùi天落來，有大喉叫，有至大天使ê聲，也有上帝ê哨角，就hiah-ê屬基督已經死ê人beh事先起來。In-ūi Chú beh pún-sin tùi thiⁿ lo̍h-lâi, ū tōa âu-kiò, ū chì tōa thiⁿ-sài ê siaⁿ, iā ū Siōng-tè ê sàu-kak, chiū hiah ê sio̍k Ki-tok í-keng sí ê lâng beh tāi-seng khí-lâi.

17後來咱iáu活teh ê人beh kap in受接納tī雲內，入空中迎接主；án-ni咱就永遠kap主saⁿ-kap tī-teh。Āu-lâi lán iáu oa̍h-teh ê lâng beh kap in siū chiap-la̍p tī hûn-lāi, ji̍p khong-tiong ngiâ-chih Chú; án-ni lán chiū éng-oán kap Chú saⁿ-kap tī-teh.

18所以tio̍h用chiah-ê話相安慰。Só͘-í tio̍h ēng chiah ê ōe saⁿ an-ùi.