1人若欣慕監督e5chit，伊是it-tio̍h好ê工，chit句話是真實。Lâng nā him-bō͘ kàm-tok ê chit, i sī it-tio̍h hó ê kang, chit kù ōe sī chin-si̍t.

2所以做監督ê應該tio̍h無thang嫌，做一個婦人人ê丈夫，m̄-thang好酒，tio̍h守己，toan-眾，好款待出外人，Só͘-í chòe kàm-tok ê eng-kai tio̍h bô thang hiâm, chòe chi̍t ê hū-jîn-lâng ê tiōng-hu, m̄ thang hò͘ⁿ chiú, tio̍h siú-kí, toan-chèng, hó khoán-thāi chhut-gōa lâng,

3gâu教示，無因為酒khí事，無phah人，tio̍h溫柔，無相爭，無貪財；gâu kà-sī, bô in-ūi chiú khí sū, bô phah lâng, tio̍h un-jiû, bô saⁿ-chiⁿ, bô tham châi;

4gâu整齊家己ê家，用端莊hō͘ kiáⁿ兒順服。gâu chéng-chôe ka-kī ê ke, ēng toan-chong hō͘ kiáⁿ-jî sūn-ho̍k.

5因為人若bōe曉得整齊家己ê家，beh怎樣照顧上帝ê教會ah？In-ūi lâng nā bōe hiáu-tit chéng-chôe ka-kī ê ke, beh cháiⁿ-iūⁿ chiàu-kò͘ Siōng-tè ê kàu-hōe ah?

6Tú-á入教ê m̄-thang hō͘伊做監督，驚了家己phín-phóng，來陷落tī魔鬼所受ê審判。Tú-á ji̍p kàu ê m̄ thang hō͘ i chòe kàm-tok, kiaⁿ-liáu ka-kī phín-phóng, lâi hām-lo̍h tī Mô͘-kúi só͘ siū ê sím-phòaⁿ.

7Koh tī教會外tio̍h有好名聲，驚了tú-tio̍h人ê詈罵，陷落魔鬼ê活tauh。Koh tī kàu-hōe gōa tio̍h ū hó miâ-siaⁿ, kiaⁿ-liáu tú-tio̍h lâng ê lóe-mē, hām-lo̍h Mô͘-kúi ê oa̍h-tauh.

8Án-ni做執事ê也tio̍h端莊，無兩樣話，無ài lim chōe-chōe酒，無tham不義ê錢，Án-ni chòe chip-sū ê iā tio̍h toan-chong, bô nn̄g iūⁿ ōe, bô ài lim chōe-chōe chiú, bô tham put-gī ê chîⁿ,

9tio̍h存清氣ê良心，顧守信道ê奧妙。tio̍h chûn chheng-khì ê liông-sim, kò͘-siú sìn-tō ê ò-biāu.

10親像chit號人tio̍h事先試驗伊；若無thang嫌，chiah thang hō͘ in做執事。Chhin-chhiūⁿ chit hō lâng tio̍h tāi-seng chhì-giām i; nā bô thang hiâm, chiah thang hō͘ in chòe chip-sū.

11Án-ni婦人人也tio̍h端莊，無譭謗，無好酒，凡事忠信。Án-ni hū-jîn-lâng iā tio̍h toan-chong, bô húi-pòng, bô hò͘ⁿ chiú, hoān sū tiong-sìn.

12執事tio̍h做一個婦人人ê丈夫，gâu整齊in ê kiáⁿ兒kap家己ê家。Chip-sū tio̍h chòe chi̍t ê hū-jîn-lâng ê tiōng-hu, gâu chéng-chôe in ê kiáⁿ-jî kap ka-kī ê ke.

13因為gâu做執事ê，家己得tio̍h好ê地位，koh tī基督耶穌ê道理有大大好膽。In-ūi gâu chòe chip-sū ê, ka-kī tit-tio̍h hó ê tōe-ūi, koh tī Ki-tok Iâ-so͘ ê tō-lí ū tōa-tōa hó-táⁿ.

14我寫chiah-ê hō͘你，是ǹg望本身緊緊到你hia；Góa siá chiah ê hō͘ lí, sī ǹg-bāng pún-sin kín-kín kàu lí hia;

15設使若延chhiân，也是hō͘你thang知應該tio̍h怎樣行tī上帝ê厝，就是真活上帝ê教會，真理ê柱石kap地基。siat-sú nā iân-chhiân, iā sī hō͘ lí thang chai eng-kai tio̍h cháiⁿ-iūⁿ kiâⁿ tī Siōng-tè ê chhù, chiū-sī chin-oa̍h Siōng-tè ê kàu-hōe, chin-lí ê thiāu-chio̍h kap tōe-ki.

16大ah，敬虔ê奧妙，無人m̄掠做tio̍h：就是伊顯現tī肉體，稱做義tī神，出現tī天使，宣傳tī外邦，hō͘人信tī世間，接納tī榮光。Tōa ah, kèng-khiân ê ò-biāu, bô lâng m̄ lia̍h chòe tio̍h: chiū-sī I hián-hiān tī jio̍k-thé, chheng-chòe-gī tī sîn, chhut-hiān tī thiⁿ-sài, soan-thoân tī gōa-pang, hō͘ lâng sìn tī sè-kan, chiap-la̍p tī êng-kng.

1但是聖神明明講，tī後來ê時期beh有人悖謬信，意向hiah-ê迷惑人ê神，kap鬼ê教示，Nā-sī Sèng Sîn bêng-bêng kóng, tī āu-lâi ê sî-kî beh ū lâng pōe-biū sìn, ì-hiòng hiah ê bê-he̍k lâng ê sîn, kap kúi ê kà-sī,

2對白賊人ê假好，in ê良心親像hō͘熱ê鐵kù-tio̍h，tùi pe̍h-chha̍t lâng ê ké-hó, in ê liông-sim chhin-chhiūⁿ hō͘ jia̍t ê thih kù-tio̍h,

3禁止嫁娶，禁戒食物，就是上帝所創造，hō͘信來明白真理ê人，用祝謝來享受ê。kìm-chí kè-chhōa, kìm-kài chia̍h-mi̍h, chiū-sī Siōng-tè só͘ chhòng-chō, hō͘ sìn lâi bêng-pe̍k chin-lí ê lâng, ēng chiok-siā lâi hióng-siū ê.

4因為上帝所創造ê物lóng是好，若祝謝來領受伊，就無一項thang棄sak。In-ūi Siōng-tè só͘ chhòng-chō ê mi̍h lóng sī hó, nā chiok-siā lâi niá-siū i, chiū bô chi̍t hāng thang khì-sak.

5因為tùi上帝ê話kap祈禱就成聖。In-ūi tùi Siōng-tè ê ōe kap kî-tó chiū chiâⁿ-sèng.

6若將chiah-ê事點醒兄弟，就你beh做基督耶穌好ê差用，用信道ê話kap你所順thàn好ê教示ê話來得tio̍h培養。Nā chiong chiah ê sū tiám-chhíⁿ hiaⁿ-tī, chiū lí beh chòe Ki-tok Iâ-so͘ hó ê chhe-ēng, ēng sìn-tō ê ōe kap lí só͘ sūn-thàn hó ê kà-sī ê ōe lâi tit-tio̍h pôe-iúⁿ.

7Tio̍h棄sak粗俗ê話kap老婦人人ê冇古。Tio̍h家己練習到tī敬虔。Tio̍h khì-sak chho͘-sio̍k ê ōe kap lāu hū-jîn-lâng ê phàⁿ-kó͘. Tio̍h ka-kī liān-si̍p kàu tī kèng-khiân.

8因為練習身軀hit-ê利益是小khóa，但是敬虔就凡事有利益；因為有現時kap將來活命ê應允。In-ūi liān-si̍p seng-khu hit ê lī-ek sī sió-khóa, nā-sī kèng-khiân chiū hoān sū ū lī-ek; in-ūi ū hiān-sî kap chiong-lâi oa̍h-miā ê èng-ún.

9chit句話是thang信，thang齊全接納ê。Chit kù ōe sī thang sìn, thang chiâu-chn̂g chiap-la̍p ê.

10因為咱tio̍h磨出力是為tio̍h chit-ê，因為咱ê ǹg望在tī真活ê上帝，伊是眾人ê救主，tī chiah-ê信ê人koh-khah是。In-ūi lán tio̍h-bôa chhut-la̍t sī ūi-tio̍h chit-ê, in-ūi lán ê ǹg-bāng chāi-tī chin-oa̍h ê Siōng-tè, I sī chèng lâng ê Kiù-chú, tī chiah ê sìn ê lâng koh khah sī.

11Chiah-ê事你tio̍h命令來教示。Chiah ê sū lí tio̍h bēng-lēng lâi kà-sī.

12莫得因為你ê少年hō͘人看輕；tio̍h tī講話，tī行做，tī仁愛，tī信，tī清氣，做信ê人ê模樣。Bo̍h-tit in-ūi lí ê siàu-liân hō͘ lâng khòaⁿ-khin; tio̍h tī kóng ōe, tī kiâⁿ chòe, tī jîn-ài, tī sìn, tī chheng-khì, chòe sìn ê lâng ê bô͘-iūⁿ.

13Tio̍h致意讀冊，勸勉教示，到tī我來。Tio̍h tì-ì tha̍k-chheh, khoàn-bián kà-sī, kàu tī góa lâi.

14你心內ê恩賜，tùi先知ê話kap長老會按手來hō͘你ê，你m̄-thang忽略。Lí sim-lāi ê un-sù, tùi sian-ti ê ōe kap tiúⁿ-ló-hōe hōaⁿ chhiú lâi hō͘ lí ê, lí m̄ thang hut-lio̍k.

15你tio̍h致意專心tī chiah-ê事，hō͘你ê進步顯明tī眾人。Lí tio̍h tì-ì choan-sim tī chiah ê sū, hō͘ lí ê chìn-pō͘ hián-bêng tī chèng lâng.

16Tio̍h謹慎你本身以及你ê教示，常常關心tī chiah-ê事；因為án-ni行，就beh救你本身kap聽你ê人。Tio̍h kín-sīn lí pún-sin í-ki̍p lí ê kà-sī, siông-siông koan-sim tī chiah ê sū; in-ūi án-ni kiâⁿ, chiū beh kiù lí pún-sin kap thiaⁿ lí ê lâng.

1莫得責備老人，tio̍h勸伊親像老父；少年人親像兄弟；Bo̍h-tit chek-pī lāu lâng, tio̍h khǹg i chhin-chhiūⁿ lāu-pē; siàu-liân lâng chhin-chhiūⁿ hiaⁿ-tī;

2老婦人人親像老母；少年婦人人親像姊妹，tio̍h專務清氣。lāu hū-jîn-lâng chhin-chhiūⁿ lāu-bú; siàu-liân hū-jîn-lâng chhin-chhiūⁿ chí-bē, tio̍h choan-bū chheng-khì.

3真正守寡ê寡婦tio̍h尊敬伊。Chin-chiàⁿ chiú-kóaⁿ ê kóaⁿ-hū tio̍h chun-kèng i.

4但是守寡婦人人有kiáⁿ á是孫，intioh8事先學有孝tī伊家己ê家，來報答in ê序大人，因為這是得tio̍h接納tī上帝ê面前。Nā-sī chiú-kóaⁿ hū-jîn-lâng ū kiáⁿ á-sī sun, in tio̍h tāi-seng o̍h iú-hàu tī i ka-kī ê ke, lâi pò-tap in ê sī-tōa lâng, in-ūi che sī tit-tio̍h chiap-la̍p tī Siōng-tè ê bīn-chêng.

5真正做寡婦無依óa ê，只有ǹg望上帝，暝日常常teh求叫祈禱。Chin-chiàⁿ chòe kóaⁿ-hū bô i-óa ê, chí-ū ǹg-bāng Siōng-tè, mî-ji̍t siông-siông teh kiû-kiò kî-tó.

6但是奢侈ê，雖然活已經死。Nā-sī chhia-chhí ê, sui-jiân oa̍h í-keng sí.

7Chiah-ê事tio̍h吩咐，hō͘ in無毛病。Chiah ê sū tio̍h hoan-hù, hō͘ in bô mâu-pēng.

8人若無顧親人，甚至無顧家己ê家，這就是悖謬道理，比m̄信ê人koh-khah pháiⁿ。Lâng nā bô kò͘ chhin-lâng, sīm-chì bô kò͘ ka-kī ê ke, che chiū-sī pōe-biū tō-lí, pí m̄ sìn ê lâng koh khah pháiⁿ.

9寡婦記tī冊裡ê，的確tio̍h上六十歲，bat做一個丈夫ê婦人人，Kóaⁿ-hū kì tī chheh-ni̍h ê, tek-khak tio̍h chiūⁿ la̍k-cha̍p hè, bat chòe chi̍t ê tiōng-hu ê hū-jîn-lâng,

10koh有好所行ê證據，bat養飼kiáⁿ兒，接待人客，洗聖徒ê腳，賑濟受患難ê人，thàn一切ê好所行。koh ū hó só͘ kiâⁿ ê chèng-kù, bat iúⁿ-chhī kiáⁿ-jî, chiap-thāi lâng-kheh, sóe sèng-tô͘ ê kha, chín-chè siū hoān-lān ê lâng, thàn it-chhè ê hó só͘ kiâⁿ.

11但是少年ê寡婦tio̍h辭伊；因為in到動起情慾來逆基督ê時，就想beh嫁；Nā-sī siàu-liân ê kóaⁿ-hū tio̍h sî i; in-ūi in kàu tōng-khí chêng-io̍k lâi ge̍k Ki-tok ê sî, chiū siūⁿ beh kè;

12因為in放sak起頭ê信，就受擬斷。in-ūi in pàng-sak khí-thâu ê sìn, chiū siū gí-toàn.

13Koh學pîn-tōaⁿ，過厝過宅；m̄-nā pîn-tōaⁿ，也kāu話，ài插事，講所m̄應該講ê。Koh o̍h pîn-tōaⁿ, kè chhù kè the̍h; m̄ nā pîn-tōaⁿ, iā kāu ōe, ài chhap sū, kóng só͘ m̄ eng-kai kóng ê.

14所以我ài少年ê寡婦koh嫁，生kiáⁿ，料理家，無hō͘對敵有機會thang講pháiⁿ話。Só͘-í góa ài siàu-liân ê kóaⁿ-hū koh kè, siⁿ kiáⁿ, liāu-lí ke, bô hō͘ tùi-te̍k ū ki-hōe thang kóng pháiⁿ ōe.

15因為已經有人oa̍t-tńg，去tè撒旦。In-ūi í-keng ū lâng oa̍t-tńg, khì tè Sat-tàn.

16但是信主ê婦人人，伊ê該親有寡婦，就tio̍h幫贊伊，免致連累教會，hō͘教會thang幫贊hiah-ê真正做寡婦ê。Nā-sī sìn Chú ê hū-jîn-lâng i ê kai-chhin ū kóaⁿ-hū, chiū tio̍h pang-chān i, bián-tì liân-lūi kàu-hōe, hō͘ kàu-hōe thang pang-chān hiah ê chin-chiàⁿ chòe kóaⁿ-hū ê.

17Gâu治理教會ê長老tio̍h加倍尊敬伊，hiah-ê tio̍h磨tī講道理kap教示ê，koh-khah tio̍h án-ni。Gâu tī-lí kàu-hōe ê tiúⁿ-ló tio̍h ka-pē chun-kèng i, hiah ê tio̍h-bôa tī káng tō-lí kap kà-sī ê, koh khah tio̍h án-ni.

18因為聖經講，磨五穀ê牛，莫得láng伊ê嘴。Koh，做工ê堪得受伊ê工錢。In-ūi sèng-keng kóng, Bō ngó͘-kok ê gû, bo̍h-tit láng i ê chhùi. Koh, chòe-kang ê kham-tit siū i ê kang-chîⁿ.

19有告長老ê，若m̄是有兩三個做干證，就莫得接納。Ū kò tiúⁿ-ló ê, nā m̄ sī ū nn̄g saⁿ ê chòe kan-chèng, chiū bo̍h-tit chiap-la̍p.

20犯罪ê tio̍h當眾人ê面前責備in，hō͘其餘ê也thang驚惶。Hoān-chōe ê tio̍h tng chèng lâng ê bīn-chêng chek-pī in, hō͘ kî-û ê iā thang kiaⁿ-hiâⁿ.

21我tī上帝kap基督耶穌以及受揀ê天使ê面前，命令你，tio̍h守chiah-ê事，莫得固執所存ê意見，行tāi-chì莫得偏私。Góa tī Siōng-tè kap Ki-tok Iâ-so͘ í-ki̍p siū kéng ê thiⁿ-sài ê bīn-chêng, bēng-lēng lí, tio̍h siú chiah ê sū, bo̍h-tit kò͘-chip só͘ chûn ê ì-kiàn, kiâⁿ tāi-chì bo̍h-tit phian-su.

22莫得趕緊kā人按手，也莫得有份tī別人ê罪；家己tio̍h顧清氣。Bo̍h-tit kóaⁿ-kín kā lâng hōaⁿ chhiú, iā bo̍h-tit ū hūn tī pa̍t lâng ê chōe; ka-kī tio̍h kò͘ chheng-khì.

23莫得koh kan-ta lim水；tio̍h用淡薄酒，因為你ê脾胃，kap你ê kāu破病ê緣故。Bo̍h-tit koh kan-ta lim chúi; tio̍h ēng tām-po̍h chiú, in-ūi lí ê pî-ūi, kap lí ê kāu phòa-pīⁿ ê iân-kò͘.

24有人in ê罪露現，做頭前行到tī審判；有ê in ê罪tè in ê後面。Ū lâng in ê chōe lō͘-hiān, chòe thâu-chêng kiâⁿ kàu tī sím-phòaⁿ; ū-ê in ê chōe tè in ê āu-bīn.

25親像án-ni好ê所行也有露現ê；hiah-ê m̄是án-ni ê也蓋bōe密。Chhin-chhiūⁿ án-ni hó ê só͘ kiâⁿ iā ū lō͘-hiān ê; hiah ê m̄ sī án-ni ê iā khàm bōe ba̍t.