1莫得責備老人，tio̍h勸伊親像老父；少年人親像兄弟；Bo̍h-tit chek-pī lāu lâng, tio̍h khǹg i chhin-chhiūⁿ lāu-pē; siàu-liân lâng chhin-chhiūⁿ hiaⁿ-tī;

2老婦人人親像老母；少年婦人人親像姊妹，tio̍h專務清氣。lāu hū-jîn-lâng chhin-chhiūⁿ lāu-bú; siàu-liân hū-jîn-lâng chhin-chhiūⁿ chí-bē, tio̍h choan-bū chheng-khì.

3真正守寡ê寡婦tio̍h尊敬伊。Chin-chiàⁿ chiú-kóaⁿ ê kóaⁿ-hū tio̍h chun-kèng i.

4但是守寡婦人人有kiáⁿ á是孫，intioh8事先學有孝tī伊家己ê家，來報答in ê序大人，因為這是得tio̍h接納tī上帝ê面前。Nā-sī chiú-kóaⁿ hū-jîn-lâng ū kiáⁿ á-sī sun, in tio̍h tāi-seng o̍h iú-hàu tī i ka-kī ê ke, lâi pò-tap in ê sī-tōa lâng, in-ūi che sī tit-tio̍h chiap-la̍p tī Siōng-tè ê bīn-chêng.

5真正做寡婦無依óa ê，只有ǹg望上帝，暝日常常teh求叫祈禱。Chin-chiàⁿ chòe kóaⁿ-hū bô i-óa ê, chí-ū ǹg-bāng Siōng-tè, mî-ji̍t siông-siông teh kiû-kiò kî-tó.

6但是奢侈ê，雖然活已經死。Nā-sī chhia-chhí ê, sui-jiân oa̍h í-keng sí.

7Chiah-ê事tio̍h吩咐，hō͘ in無毛病。Chiah ê sū tio̍h hoan-hù, hō͘ in bô mâu-pēng.

8人若無顧親人，甚至無顧家己ê家，這就是悖謬道理，比m̄信ê人koh-khah pháiⁿ。Lâng nā bô kò͘ chhin-lâng, sīm-chì bô kò͘ ka-kī ê ke, che chiū-sī pōe-biū tō-lí, pí m̄ sìn ê lâng koh khah pháiⁿ.

9寡婦記tī冊裡ê，的確tio̍h上六十歲，bat做一個丈夫ê婦人人，Kóaⁿ-hū kì tī chheh-ni̍h ê, tek-khak tio̍h chiūⁿ la̍k-cha̍p hè, bat chòe chi̍t ê tiōng-hu ê hū-jîn-lâng,

10koh有好所行ê證據，bat養飼kiáⁿ兒，接待人客，洗聖徒ê腳，賑濟受患難ê人，thàn一切ê好所行。koh ū hó só͘ kiâⁿ ê chèng-kù, bat iúⁿ-chhī kiáⁿ-jî, chiap-thāi lâng-kheh, sóe sèng-tô͘ ê kha, chín-chè siū hoān-lān ê lâng, thàn it-chhè ê hó só͘ kiâⁿ.

11但是少年ê寡婦tio̍h辭伊；因為in到動起情慾來逆基督ê時，就想beh嫁；Nā-sī siàu-liân ê kóaⁿ-hū tio̍h sî i; in-ūi in kàu tōng-khí chêng-io̍k lâi ge̍k Ki-tok ê sî, chiū siūⁿ beh kè;

12因為in放sak起頭ê信，就受擬斷。in-ūi in pàng-sak khí-thâu ê sìn, chiū siū gí-toàn.

13Koh學pîn-tōaⁿ，過厝過宅；m̄-nā pîn-tōaⁿ，也kāu話，ài插事，講所m̄應該講ê。Koh o̍h pîn-tōaⁿ, kè chhù kè the̍h; m̄ nā pîn-tōaⁿ, iā kāu ōe, ài chhap sū, kóng só͘ m̄ eng-kai kóng ê.

14所以我ài少年ê寡婦koh嫁，生kiáⁿ，料理家，無hō͘對敵有機會thang講pháiⁿ話。Só͘-í góa ài siàu-liân ê kóaⁿ-hū koh kè, siⁿ kiáⁿ, liāu-lí ke, bô hō͘ tùi-te̍k ū ki-hōe thang kóng pháiⁿ ōe.

15因為已經有人oa̍t-tńg，去tè撒旦。In-ūi í-keng ū lâng oa̍t-tńg, khì tè Sat-tàn.

16但是信主ê婦人人，伊ê該親有寡婦，就tio̍h幫贊伊，免致連累教會，hō͘教會thang幫贊hiah-ê真正做寡婦ê。Nā-sī sìn Chú ê hū-jîn-lâng i ê kai-chhin ū kóaⁿ-hū, chiū tio̍h pang-chān i, bián-tì liân-lūi kàu-hōe, hō͘ kàu-hōe thang pang-chān hiah ê chin-chiàⁿ chòe kóaⁿ-hū ê.

17Gâu治理教會ê長老tio̍h加倍尊敬伊，hiah-ê tio̍h磨tī講道理kap教示ê，koh-khah tio̍h án-ni。Gâu tī-lí kàu-hōe ê tiúⁿ-ló tio̍h ka-pē chun-kèng i, hiah ê tio̍h-bôa tī káng tō-lí kap kà-sī ê, koh khah tio̍h án-ni.

18因為聖經講，磨五穀ê牛，莫得láng伊ê嘴。Koh，做工ê堪得受伊ê工錢。In-ūi sèng-keng kóng, Bō ngó͘-kok ê gû, bo̍h-tit láng i ê chhùi. Koh, chòe-kang ê kham-tit siū i ê kang-chîⁿ.

19有告長老ê，若m̄是有兩三個做干證，就莫得接納。Ū kò tiúⁿ-ló ê, nā m̄ sī ū nn̄g saⁿ ê chòe kan-chèng, chiū bo̍h-tit chiap-la̍p.

20犯罪ê tio̍h當眾人ê面前責備in，hō͘其餘ê也thang驚惶。Hoān-chōe ê tio̍h tng chèng lâng ê bīn-chêng chek-pī in, hō͘ kî-û ê iā thang kiaⁿ-hiâⁿ.

21我tī上帝kap基督耶穌以及受揀ê天使ê面前，命令你，tio̍h守chiah-ê事，莫得固執所存ê意見，行tāi-chì莫得偏私。Góa tī Siōng-tè kap Ki-tok Iâ-so͘ í-ki̍p siū kéng ê thiⁿ-sài ê bīn-chêng, bēng-lēng lí, tio̍h siú chiah ê sū, bo̍h-tit kò͘-chip só͘ chûn ê ì-kiàn, kiâⁿ tāi-chì bo̍h-tit phian-su.

22莫得趕緊kā人按手，也莫得有份tī別人ê罪；家己tio̍h顧清氣。Bo̍h-tit kóaⁿ-kín kā lâng hōaⁿ chhiú, iā bo̍h-tit ū hūn tī pa̍t lâng ê chōe; ka-kī tio̍h kò͘ chheng-khì.

23莫得koh kan-ta lim水；tio̍h用淡薄酒，因為你ê脾胃，kap你ê kāu破病ê緣故。Bo̍h-tit koh kan-ta lim chúi; tio̍h ēng tām-po̍h chiú, in-ūi lí ê pî-ūi, kap lí ê kāu phòa-pīⁿ ê iân-kò͘.

24有人in ê罪露現，做頭前行到tī審判；有ê in ê罪tè in ê後面。Ū lâng in ê chōe lō͘-hiān, chòe thâu-chêng kiâⁿ kàu tī sím-phòaⁿ; ū-ê in ê chōe tè in ê āu-bīn.

25親像án-ni好ê所行也有露現ê；hiah-ê m̄是án-ni ê也蓋bōe密。Chhin-chhiūⁿ án-ni hó ê só͘ kiâⁿ iā ū lō͘-hiān ê; hiah ê m̄ sī án-ni ê iā khàm bōe ba̍t.

1見若tī人ê轄下做奴僕ê，tio̍h看家己ê主人堪得受齊全ê尊敬，免得上帝ê名kap道理tú-tio̍h譭謗。Kìⁿ-nā tī lâng ê hat-ē chòe lô͘-po̍k ê, tio̍h khòaⁿ ka-kī ê chú-lâng kham-tit siū chiâu-chn̂g ê chun-kèng, bián-tit Siōng-tè ê miâ kap tō-lí tú-tio̍h húi-pòng.

2設使伊ê主人是信道理ê，就m̄-thang因為伊是兄弟來看輕伊；反tńg koh-khah tio̍h服事伊，因為受利益ê就是信kap得tio̍h疼ê。你tio̍h用chiah-ê教示來苦勸in。Siat-sú i ê chú-lâng sī sìn tō-lí ê, chiū m̄ thang in-ūi i sī hiaⁿ-tī lâi khòaⁿ-khin i; hoán-tńg koh khah tio̍h ho̍k-sāi i, in-ūi siū lī-ek ê chiū-sī sìn kap tit-tio̍h thiàⁿ ê. Lí tio̍h ēng chiah-ê kà-sī lâi khó͘-khǹg in.

3若有人傳別樣ê教，無順服咱ê主耶穌基督端正ê話，kap照敬虔ê教訓ê；Nā ū lâng thoân pa̍t iūⁿ ê kàu, bô sūn-ho̍k lán ê Chú Iâ-so͘ Ki-tok toan-chèng ê ōe, kap chiàu kèng-khiân ê kàu-hùn ê;

4伊是家己phòng-hong，m̄知半項，有好辯論kap相chìⁿ話ê弊病；i sī ka-kī phòng-hong, m̄ chai pòaⁿ-hāng, ū hò͘ⁿ piān-lūn kap saⁿ-chìⁿ ōe ê pē-pēng;

5tùi án-ni就生起怨妒、相爭、譭謗、pháiⁿ念頭，以及心志敗壞喪失真理ê人ê冤家；in掠敬虔做lī-lō͘。tùi án-ni chiū siⁿ-khí oàn-tò͘, saⁿ-chiⁿ, húi-pòng, pháiⁿ liām-thâu, í-ki̍p sim-chì pāi-hoāi sòng-sit chin-lí ê lâng ê oan-ke; in lia̍h kèng-khiân chòe lī-lō͘.

6但是敬虔kiam知足就是大利路。Nā-sī kèng-khiân kiam ti-chiok chiū-sī tōa lī-lō͘.

7因為咱出世無帶甚麼來，過世也bōe-ōe帶甚麼去。In-ūi lán chhut-sì bô tòa sím-mi̍h lâi, kè-sì iā bōe-ōe tòa sím-mi̍h khì.

8但是有thang食穿，咱就beh知足。Nā-sī ū thang chia̍h chhēng, lán chiū beh ti-chiok.

9獨獨hiah-ê想beh發財ê，就陷落迷惑kap羅網，以及chōe-chōe戇戇有損害ê私慾，就是hō͘人沉落tī敗壞kap滅無ê。To̍k-to̍k hiah ê siūⁿ beh hoat-châi ê, chiū hām-lo̍h bê-he̍k kap lô-bāng, í-ki̍p chōe-chōe gōng-gōng ū sún-hāi ê su-io̍k, chiū-sī hō͘ lâng tîm-lo̍h tī pāi-hoāi kap bia̍t-bô ê.

10因為貪財是萬惡ê根源；有人戀慕伊，就受迷惑來離開道理，用chōe-chōe艱苦家己刺鑿。In-ūi tham-châi sī bān ok ê kun-goân; ū lâng loân-bō͘ i, chiū siū bê-he̍k lâi lī-khui tō-lí, ēng chōe-chōe kan-khó͘ ka-kī chhì-chha̍k.

11獨獨你，屬上帝ê人ah，tio̍h閃避chiah-ê；來追jip義、敬虔、信、仁愛、吞忍、溫柔。To̍k-to̍k lí, sio̍k Siōng-tè ê lâng ah, tio̍h siám-pī chiah-ê; lâi tui-jip gī, kèng-khiân, sìn, jîn-ài, thun-lún, un-jiû.

12Tio̍h爭戰信ê好爭戰；將永活擒tiâu-tiâu，你ê受召就是為tio̍h chit-ê；你也bat承認好ê志願tī chōe-chōe干證ê人ê面前。Tio̍h cheng-chiàn sìn ê hó cheng-chiàn; chiong éng-oa̍h khîⁿ tiâu-tiâu, lí ê siū tiàu chiū-sī ūi-tio̍h chit-ê; lí iā bat sêng-jīn hó ê chì-goān tī chōe-chōe kan-chèng ê lâng ê bīn-chêng.

13我tī賞賜活命hō͘萬項有ê上帝ê面前，以及對本丟彼拉多做好ê干證ê基督耶穌ê面前，吩咐你，Góa tī siúⁿ-sù oa̍h-miā hō͘ bān-hāng-ū ê Siōng-tè ê bīn-chêng, í-ki̍p tùi Pún-tiu Pí-lia̍p-to chòe hó ê kan-chèng ê Ki-tok Iâ-so͘ ê bīn-chêng, hoan-hù lí,

14tio̍h守chit-ê命令，無瑕疵，無thang嫌，到咱ê主耶穌基督ê顯現。tio̍h siú chit ê bēng-lēng, bô hâ-chhû, bô thang hiâm, kàu lán ê Chú Iâ-so͘ Ki-tok ê hián-hiān.

15到期大福氣，獨一有權能，萬王ê王，萬主ê主，beh顯明伊，Kàu kî tōa hok-khì, to̍k-it ū koân-lêng, bān ông ê Ông, bān chú ê Chú, beh hián-bêng i,

16就是獨一bōe死，tiàm-tī bōe-thang近óa ê光，人所未bat看見，也bōe-ōe看見ê；願尊貴kap永遠ê權勢歸tī伊。À-bēng。chiū-sī to̍k-it bōe sí, tiàm-tī bōe thang kūn-óa ê kng, lâng só͘ bē bat khòaⁿ-kìⁿ, iā bōe-ōe khòaⁿ-kìⁿ ê; goān chun-kùi kap éng-oán ê koân-sè kui tī I. À-bēng.

17今世好額ê人，你tio̍h吩咐in，心志莫得自高，莫得hē in ê ǹg望tī無定tio̍h ê錢財，tio̍h hē tī將萬物滿滿hō͘咱享受ê上帝；Kim-sè hó-gia̍h ê lâng lí tio̍h hoan-hù in, sim-chì bo̍h-tit chū-ko, bo̍h-tit hē in ê ǹg-bāng tī bô tiāⁿ-tio̍h ê chîⁿ-châi, tio̍h hē tī chiong bān mi̍h móa-móa hō͘ lán hióng-siū ê Siōng-tè;

18koh吩咐in行好事，好額tī好所行，歡喜賑濟，甘願分hō͘人，koh hoan-hù in kiâⁿ hó sū, hó-gia̍h tī hó só͘ kiâⁿ, hoaⁿ-hí chín-chè, kam-goān pun hō͘ lâng,

19為tio̍h家己積聚好ê地基，備辦後來ê事，hō͘ in擒tiâu真ê活命。ūi-tio̍h ka-kī chek-chū hó ê tōe-ki, pī-pān āu-lâi ê sū, hō͘ in khîⁿ-tiâu chin ê oa̍h-miā.

20提摩太ah，所交託你ê，你tio̍h保守伊，離開有名無實ê智慧chiah-ê粗俗ê虛詞，kap相比較ê辯論，Thê-mô͘-thài ah, só͘ kau-thok lí ê, lí tio̍h pó-siú i, lī-khui ū miâ bô si̍t ê tì-hūi chiah ê chho͘-sio̍k ê hu-sû, kap saⁿ pí-kàu ê piān-lūn,

21有人自稱有chit號智慧，就已經差謬道理lah。 願恩典kap lín tī-teh。ū lâng chū-chheng ū chit hō tì-hūi, chiū í-keng chha-biū tō-lí lah. Goān un-tián kap lín tī-teh.

1Tùi上帝ê旨意，照tī基督耶穌活命ê應允，做基督耶穌ê使徒保羅，Tùi Siōng-tè ê chí-ì, chiàu tī Ki-tok Iâ-so͘ oa̍h-miā ê èng-ún, chòe Ki-tok Iâ-so͘ ê sù-tô͘ Pó-lô,

2phoe寄hō͘我所疼ê kiáⁿ提摩太；願你tùi父上帝kap咱ê主基督耶穌得tio̍h恩典、憐憫、平安。phoe kià hō͘ góa só͘ thiàⁿ ê kiáⁿ Thê-mô͘-thài; goān lí tùi Pē Siōng-tè kap lán ê Chú Ki-tok Iâ-so͘ tit-tio̍h un-tián, lîn-bín, pêng-an.

3我感謝上帝，就是我續接列祖，用清氣ê良心所服事ê，tī祈禱ê時我siàu念你無soah，Góa kám-siā Siōng-tè, chiū-sī góa sòa-chiap lia̍t-chó͘, ēng chheng-khì ê liông-sim só͘ ho̍k-sāi ê, tī kî-tó ê sî góa siàu-liām lí bô soah,

4記得你ê流目屎，暝日欣慕見tio̍h你，hō͘我滿心歡喜；kì-tit lí ê lâu ba̍k-sái, mî-ji̍t him-bō͘ kìⁿ-tio̍h lí, hō͘ góa móa-sim hoaⁿ-hí;

5念tio̍h你心內無假ê信，chit-ê信是事先tiàm-tī你ê外媽Lô-í，kap你ê老母Iú-nî-ki，我深信chit-ê信也是tiàm-tī你。liām-tio̍h lí sim-lāi bô ké ê sìn, chit ê sìn sī tāi-seng tiàm-tī lí ê gōa-má Lô-í, kap lí ê lāu-bú Iú-nî-ki, góa chhim sìn chit ê sìn iā sī tiàm-tī lí.

6為tio̍h chit-ê緣故我點醒你，ài你將上帝tùi我ê按手所hō͘你ê恩賜koh奮志，親像hō͘火koh燄一樣。Ūi-tio̍h chit ê iân-kò͘ góa tiám-chhíⁿ lí, ài lí chiong Siōng-tè tùi góa ê hōaⁿ chhiú só͘ hō͘ lí ê un-sù koh hùn-chì, chhin-chhiūⁿ hō͘ hé koh iām chi̍t iūⁿ.

7因為上帝所賞賜咱ê，m̄是驚惶ê心神，就是權能、仁愛、守己ê心神。In-ūi Siōng-tè só͘ siúⁿ-sù lán ê, m̄ sī kiaⁿ-hiâⁿ ê sim-sîn, chiū-sī koân-lêng, jîn-ài, siú-kí ê sim-sîn.

8所以kā咱ê主做干證，莫得掠做見笑，也莫得掠我做主ê囚犯來見笑；tio̍h照上帝ê權能為tio̍h福音saⁿ-kap受苦；Só͘-í kā lán ê Chú chòe kan-chèng, bo̍h-tit lia̍h-chòe kiàn-siàu, iā bo̍h-tit lia̍h góa chòe Chú ê siû-hoān lâi kiàn-siàu; tio̍h chiàu Siōng-tè ê koân-lêng ūi-tio̍h hok-im saⁿ-kap siū-khó͘;

9伊救咱，用聖ê召召咱，m̄是照咱ê行做，是照伊家己ê旨意kap恩典，chit-ê恩典就是永世代ê事先tī基督耶穌賞賜咱ê，I kiù lán, ēng sèng ê tiàu tiàu lán, m̄ sī chiàu lán ê kiâⁿ-chòe, sī chiàu I ka-kī ê chí-ì kap un-tián, chit ê un-tián chiū-sī éng sè-tāi ê tāi-seng tī Ki-tok Iâ-so͘ siúⁿ-sù lán ê,

10但是現今對咱ê救主基督耶穌ê顯現來表明ê。伊已經廢無死，koh tùi福音hō͘活命kap bōe敗壞ê lóng顯明；nā-sī hiān-kim tùi lán ê Kiù-chú Ki-tok Iâ-so͘ ê hián-hiān lâi piáu-bêng ê. I í-keng hòe-bô sí, koh tùi hok-im hō͘ oa̍h-miā kap bōe pāi-hoāi ê lóng hián-bêng;

11我為tio̍h chit-ê受設立做宣傳ê，做使徒，做教師。góa ūi-tio̍h chit-ê siū siat-li̍p chòe soan-thoân ê, chòe sù-tô͘, chòe kàu-su.

12為tio̍h chit-ê緣故我也受chiah-ê艱苦；但是我無掠做見笑；因為我bat我所信ê，也深信伊會保守我所交託伊ê，到tī hit日。Ūi-tio̍h chit ê iân-kò͘ góa iā siū chiah ê kan-khó͘; nā-sī góa bô lia̍h-chòe kiàn-siàu; in-ūi góa bat góa só͘ sìn ê, iā chhim sìn I ōe pó-siú góa só͘ kau-thok I ê, kàu tī hit ji̍t.

13你tùi我所聽見hiah-ê端正ê話ê模樣，tio̍h用tī基督耶穌ê信kap仁愛來執守伊。Lí tùi góa só͘ thiaⁿ-kìⁿ hiah ê toan-chèng ê ōe ê bô͘-iūⁿ, tio̍h ēng tī Ki-tok Iâ-so͘ ê sìn kap jîn-ài lâi chip-siú i.

14所交託你ê好事，你tio̍h óa靠tiàm-tī咱ê聖神來顧守伊。Só͘ kau-thok lí ê hó-sū, lí tio̍h óa-khò tiàm-tī lán ê Sèng Sîn lâi kò͘-siú i.

15凡若tī亞西亞ê人已經背我，這是你所知；其中有Hui-kiat-lō͘、Hek-mô͘-kî-nî。Hoān-nā tī A-se-a ê lâng í-keng pōe góa, che sī lí só͘ chai; kî-tiong ū Hui-kiat-lō͘ Hek-mô͘-kî-nî.

16願主憐憫O-nî-sek-hut ê家，因為伊ta̍uh-ta̍uh補我ê精神，也無掠我掛鐵鍊做見笑。Goān Chú lîn-bín O-nî-sek-hut ê ke, in-ūi i ta̍uh-ta̍uh pó͘ góa ê cheng-sîn, iā bô lia̍h góa kòa thih-liān chòe kiàn-siàu.

17伊tī羅馬ê時，慇勤chhē我到見tio̍h，I tī Lô-má ê sî un-khûn chhē góa kàu kìⁿ-tio̍h,

18(願主hō͘伊tī hit日tùi主來得tio̍h憐憫) ；也伊tī以弗所用jōa-chōe項服事我，你也明明知。(goān Chú hō͘ i tī hit ji̍t tùi Chú lâi tit-tio̍h lîn-bín); iā i tī Í-hut-só͘ ēng jōa chōe hāng ho̍k-sāi góa, lí iā bêng-bêng chai.