1有災厄ah，hiah-ê設立不義ê律例ê，kap記載奸詐ê判詞ê；Ū chai-ē ah, hiah ê siat-li̍p put-gī ê lu̍t-lē--ê, kap kì-chài kan-chà ê phòaⁿ-sû ê;

2枉屈sòng-hiong人ê案件，搶奪我ê百姓中困苦ê人ê情理，用寡婦準做所搶ê物，用孤兒準做所劫 ê物。óng-khut sòng-hiong lâng ê àn-kiāⁿ, chhiúⁿ-toa̍t Góa ê peh-sìⁿ-tiong khùn-khó͘ ê lâng ê chêng-lí, ēng kóaⁿ-hū chún-chòe só͘-chhiúⁿ ê mi̍h, ēng ko͘-jî chún-chòe só͘ kiap ê mi̍h.

3當降刑罰ê日，有災厄tùi遠遠臨到，hit時lín beh怎樣？lín beh走去求甚麼人救lín ah？lín ê財寶beh留tī甚麼所在？Tng kàng hêng-hoa̍t ê ji̍t, ū chai-ē tùi hn̄g-hn̄g lîm-kàu, hit-sî lín beh cháiⁿ-iūⁿ? lín beh cháu--khì kiû sím-mi̍h lâng kiù--lín ah? lín ê châi-pó beh lâu tī sím-mi̍h só͘-chāi?

4In只有屈身tī受掠ê人ê下面，倒tī受thâi ê人ê下面。雖然án-ni，耶和華ê受氣iáu未消，伊ê手猶原伸teh。In chí-ū khut-sin tī siū-lia̍h ê lâng ê ē-bīn, tó tī siū-thâi ê lâng ê ē-bīn. Sui-jiân án-ni, Iâ-hô-hoa ê siū-khì iáu-bē siau, I ê chhiú iû-goân chhun--teh.

5有災厄ah，亞述是我受氣ê槌，手中kia̍h我ê痛恨做柺。Ū chai-ē ah, A-su̍t sī Góa siū-khì ê thûi, chhiú-tiong kia̍h Góa ê thòng-hūn chòe koáiⁿ.

6我beh差伊攻擊邪惡ê邦國，吩咐伊攻擊我所受氣ê百姓，搶伊所搶ê，掠伊所掠ê，將in thún踏親像街路ê土糜一樣。Góa beh chhe i kong-kek siâ-ok ê pang-kok, hoan-hù i kong-kek Góa só͘ siū-khì ê peh-sìⁿ, chhiúⁿ i só͘ chhiúⁿ--ê, lia̍h i só͘-lia̍h--ê, chiong in thún-ta̍h chhin-chhiūⁿ ke-lō͘ ê thô͘-bê chi̍t-iūⁿ.

7總是伊m̄是chit號意思，伊ê心亦m̄是chit-ê打算；伊ê心內反tńg想毀滅，剿滅chōe-chōe國。Chóng-sī i m̄-sī chit-hō ì-sù, i-ê sim ia̍h m̄-sī chit ê táⁿ-sǹg; i ê sim-lāi hoán-tńg siūⁿ húi-bia̍t, châu-bia̍t chōe-chōe kok.

8因為伊講，我ê人臣kiám無lóng是王mah？In-ūi i kóng, Góa ê jîn-sîn kiám bô lóng sī ông mah?

9Ka-le̍k-lô kiám-m̄是親像Ka-ki-bí-si mah？Hap-má kiám-m̄是親像A-ní-poa̍t mah？撒馬利亞kiám-m̄是親像大馬色mah？Ka-le̍k-lô kiám-m̄-sī chhin-chhiūⁿ Ka-ki-bí-si mah? Hap-má kiám-m̄-sī chhin-chhiūⁿ A-ní-poa̍t mah? Sat-má-lī-a kiám-m̄-sī chhin-chhiūⁿ Tāi-má-sek mah?

10我ê手已經到偶像ê國，in雕刻ê偶像贏過耶路撒冷kap撒馬利亞ê偶像；Góa ê chhiú í-keng kàu ngó͘-siōng ê kok, in tiau-khek ê ngó͘-siōng iâⁿ-kè Iâ-lō͘-sat-léng kap Sat-má-lī-a ê ngó͘-siōng;

11我怎樣款待撒馬利亞kap其中ê偶像，kiám bōe照án-ni款待耶路撒冷kap其中ê偶像mah？góa cháiⁿ-iūⁿ khoán-thāi Sat-má-lī-a kap kî-tiong ê ngó͘-siōng, kiám bōe chiàu án-ni khoán-thāi Iâ-lō͘-sat-léng kap kî-tiong ê ngó͘-siōng mah?

12主tī錫安山kap耶路撒冷成祂一切所做ê ê時，講，我beh刑罰亞述王心驕ê行做，kap伊目頭高ê榮光。Chú tī Sek-an soaⁿ kap Iâ-lō͘-sat-léng chiâⁿ I it-chhè só͘-chòe--ê ê sî, kóng, Góa beh hêng-hoa̍t A-su̍t ông sim-kiau ê kiâⁿ-chòe, kap i ba̍k-thâu koâiⁿ ê êng-kng.

13因為伊講，我所成ê事，是用我ê手ê能力，kap我ê智慧；我本有聰明；我移徙列國ê地界，搶in ê財寶，koh我親像勇士hō͘坐高位ê降做低。In-ūi i kóng, Góa só͘ chiâⁿ ê sū, sī ēng góa ê chhiú ê lêng-le̍k, kap góa ê tì-hūi; góa pún ū chhang-miâ; góa î-sóa lia̍t-kok ê tōe-kài, chhiúⁿ in ê châi-pó, koh góa chhin-chhiūⁿ ióng-sū hō͘ chē koâiⁿ-ūi-ê kàng chòe kē.

14我ê手the̍h-tio̍h列國ê財寶，親像the̍h鳥á-siū；我得tio̍h全地，親像拾tio̍h所放sak ê鳥á卵；無有phia̍t翼ê，無有開嘴ê，無有哮叫ê。Góa ê chhiú the̍h-tio̍h lia̍t-kok ê châi-pó, chhin-chhiūⁿ the̍h chiáu-á-siū; góa tit-tio̍h choân-tōe, chhin-chhiūⁿ khioh-tio̍h só͘ pàng-sak ê chiáu-á-nn̄g; bô ū phia̍t-si̍t ê, bô ū khui-chhùi ê, bô ū háu-kiò ê.

15Taⁿ斧頭kiám會對用伊來剉材ê家己誇口mah？鋸á kiám會對hit-ê 拖鋸ê家己phín-phóng mah？這是親像槌á運轉hit-ê kia̍h伊ê，親像柺á kia̍h起hit-ê m̄是柴ê。Taⁿ pó͘-thâu kiám ōe tùi ēng i lâi chhò-chhâ--ê ka-kī khoa-kháu mah? kù-á kiám ōe tùi hit ê thoa kù--ê ka-kī phín-phóng mah? che sī chhin-chhiūⁿ thûi-á ūn-choán hit ê kia̍h--i-ê, chhin-chhiūⁿ koáiⁿ-á kia̍h-khí hit ê m̄-sī chhâ--ê.

16因為án-ni，主，萬軍ê主，beh hō͘伊肥ê變做瘦；tī伊榮光ê下面beh有火to̍h起來，親像火燒一樣。In-ūi án-ni Chú, bān-kun ê Chú, beh hō͘ i pûi-ê pìⁿ-chòe sán; tī i êng-kng ê ē-bīn beh ū hé to̍h--khí-lâi, chhin-chhiūⁿ hé sio chi̍t-iūⁿ.

17以色列ê光beh做火，伊ê聖ê beh做火燄；tī一日ê中間，將伊ê刺phè kap蒺藜燒了了。Í-sek-lia̍t ê kng beh chòe hé, i ê Sèng--ê beh chòe hé-iām; tī chi̍t-ji̍t ê tiong-kan, chiong i ê chhì-phè kap chi̍t-lê sio liáu-liáu.

18Koh將伊ê樹林kap肥地ê榮光，tùi神魂到肉體，lóng燒滅伊；勢面親像破病人漸漸衰敗。Koh chiong i ê chhiū-nâ kap pûi-tōe ê êng-kng, tùi sîn-hûn kàu jio̍k-thé, lóng sio-bia̍t i; sè-bīn chhin-chhiūⁿ phòa-pīⁿ lâng chiām-chiām soe-pāi.

19伊ê樹林chhun ê樹無幾叢，gín-ná亦會記伊ê數額。I ê chhiū-nâ chhun ê chhiū bô kúi châng, gín-ná ia̍h ōe kì i ê siàu-gia̍h.

20到hit日，以色列所chhun-ê，kap雅各家所逃脫ê，無koh óa靠hit-ê phah in ê；是beh誠實óa靠耶和華，以色列ê聖ê。Kàu hit-ji̍t Í-sek-lia̍t só͘ chhun-ê, kap Ngá-kok ke só͘ tô-thoat-ê, bô koh óa-khò hit ê phah in ê; sī beh sêng-si̍t óa-khò Iâ-hô-hoa, Í-sek-lia̍t ê Sèng--ê.

21所chhun-ê beh倒tńg來，就是雅各家所chhun-ê，歸tī全能ê上帝。Só͘-chhun-ê beh tò-tńg-lâi, chiū-sī Ngá-kok ke só͘-chhun-ê, kui tī choân-lêng ê Siōng-tè.

22以色列ah，你ê百姓雖然chōe親像海沙，只有chhun-ê倒tńg來；衰敗ê事已經定tio̍h，用公義來充滿。Í-sek-lia̍t ah, lí ê peh-sìⁿ sui-jiân chōe chhin-chhiūⁿ hái-soa, chí-ū chhun-ê tò-tńg--lâi; soe-pāi ê sū í-keng tiāⁿ-tio̍h, ēng kong-gī lâi chhiong-móa.

23因為主，萬軍ê耶和華，tī全地中beh行所定tio̍h ê滅無。In-ūi Chú, bān-kun ê Iâ-hô-hoa, tī choân-tōe-tiong beh kiâⁿ só͘ tiāⁿ-tio̍h ê bia̍t-bô.

24所以主，萬軍ê耶和華，án-ni講，khiā起錫安，我ê百姓ah，亞述雖然用槌phah lín，koh親像埃及ê款，kia̍h柺á攻擊你，你m̄免驚伊。Só͘-í Chú, bān-kun ê Iâ-hô-hoa, án-ni kóng, Khiā-khí Sek-an, Góa ê peh-sìⁿ ah, A-su̍t sui-jiân ēng thûi phah lín, koh chhin-chhiūⁿ Ai-ki̍p ê khoán, kia̍h koáiⁿ-á kong-kek lí, lí m̄-bián kiaⁿ i.

25因為koh tiap-á久受氣就beh明白，koh我ê受氣beh tùi in ê滅無來soah。In-ūi koh tiap-á-kú siū-khì chiū beh bêng-pe̍k, koh Góa ê siū-khì beh tùi in ê bia̍t-bô lâi soah.

26萬軍ê耶和華beh kia̍h起鞭來phah伊，親像tī Gô-li̍p ê石磐phah米甸；伊ê柺á beh伸tī海頂，伊beh kia̍h起親像tī埃及一樣。Bān-kun ê Iâ-hô-hoa beh kia̍h-khí piⁿ lâi phah i, chhin-chhiūⁿ tī Gô-li̍p ê chio̍h-pôaⁿ phah Bí-tiân; I ê koáiⁿ-á beh chhun tī hái-téng, I beh kia̍h-khí chhin-chhiūⁿ tī Ai-ki̍p chi̍t-iūⁿ.

27到hit日，亞述ê重擔beh離開你ê肩頭，伊ê擔beh離開你ê頷頸，伊ê擔也beh因為抹油ê緣故來毀壞。Kàu hit-ji̍t A-su̍t ê tāng-tàⁿ beh lī-khui lí ê keng-thâu, i ê taⁿ beh lī-khui lí ê ām-kún, i ê taⁿ iā beh in-ūi boah-iû ê iân-kò͘ lâi húi-hoāi.

28亞述到A-ia̍p，經過Bí-ki-lûn，放行李tī Bi̍t-boa̍t；in經過隘口；A-su̍t kàu A-ia̍p, keng-kè Bí-ki-lûn, pàng hêng-lí tī Bi̍t-boa̍t; in keng-kè ài-kháu;

29tī Ka-pa歇暝；La̍h-má人驚惶；掃羅ê Ki-pì-a人逃走。tī Ka-pa hioh-mî; La̍h-má lâng kiaⁿ-hiâⁿ; Sò-lô ê Ki-pì-a lâng tô-cháu.

30Ka-lîm khiā起ê百姓ah，tio̍h大聲喉叫；來soah ê人ah，tio̍h 俯耳孔；慘ah，困苦ê A-ná-tu̍t ah！Ka-lîm khiā-khí ê peh-sìⁿ ah, tio̍h tōa-siaⁿ âu-kiò; Lâi-soah ê lâng ah, tio̍h àⁿ hī-khang; chhám--ah, khùn-khó͘ ê A-ná-tu̍t ah!

31Má-tek-bí-ná人閃避；Ki-pèng khiā起ê百姓逃走。Má-tek-bí-ná lâng siám-pī; Ki-pèng khiā-khí ê peh-sìⁿ tô-cháu.

32Hit日伊紮兵tī Lô-pek；比手ǹg錫安城ê山，就是耶路撒冷ê山頭。Hit-ji̍t i chat-peng tī Lô-pek; pí chhiú ǹg Sek-an siâⁿ ê soaⁿ, chiū-sī Iâ-lō͘-sat-léng ê soaⁿ-thâu.

33看ah，主，萬軍ê耶和華，用hō͘人驚 ê威嚴來剉樹枝；長ê beh受剉，高ê beh降低；Khòaⁿ ah, Chú, bān-kun ê Iâ-hô-hoa, ēng hō͘ lâng kiaⁿ ê ui-giâm lâi chhò chhiū-ki; tn̂g--ê beh siū-chhò, koâiⁿ--ê beh kàng-kē;

34ām ê樹林，伊beh用鐵器剉伊；koh黎巴嫩beh tùi大權能ê來倒落去。ām ê chhiū-nâ, I beh ēng thih-khì chhò i; koh Lī-pa-lùn beh tùi tōa koân-lêng--ê lâi tó--lo̍h-khì.

1Tùi耶西ê樹頭beh發一支íⁿ，對伊ê根所生ê枝beh結果子。Tùi Iâ-se ê chhiū-thâu beh hoat chi̍t ki íⁿ, tùi i ê kun só͘ siⁿ ê ki beh kiat ké-chí.

2耶和華ê神beh tiàm tī伊，就是智慧kap聰明ê神，計畫kap能力ê神，智識kap敬畏耶和華ê神；Iâ-hô-hoa ê sîn beh tiàm tī i, chiū-sī tì-hūi kap chhang-miâ ê sîn, kè-e̍k kap lêng-le̍k ê sîn, tì-sek kap kèng-ùi Iâ-hô-hoa ê sîn;

3伊beh掠敬畏耶和華做歡喜；伊m̄是憑目睭所看見來審判，亦m̄是憑耳孔所聽見來擬斷；i beh lia̍h kèng-ùi Iâ-hô-hoa chòe hoaⁿ-hí; i m̄-sī pîn ba̍k-chiu só͘ khòaⁿ-kìⁿ lâi sím-phòaⁿ, ia̍h m̄-sī pîn hī-khang só͘ thiaⁿ-kìⁿ lâi gí-toàn;

4伊beh用公義審判sòng-hiong人，用正直擬斷世上謙卑ê人；用嘴中ê柺phah世界，用嘴唇ê氣thâi死pháiⁿ人。i beh ēng kong-gī sím-phòaⁿ sòng-hiong lâng, ēng chèng-ti̍t gí-toàn sè-chiūⁿ khiam-pi ê lâng; ēng chhùi-tiong ê koáiⁿ phah sè-kài, ēng chhùi-tûn ê khì thâi-sí pháiⁿ-lâng.

5公義beh做伊ê腰帶，信實beh做伊ê身軀ê帶。Kong-gī beh chòe i ê io-tòa, sìn-si̍t beh chòe i ê seng-khu ê tòa.

6豺狼beh kap綿羊á相kap tòa，豹kap山羊kiáⁿ相kap倒teh；牛á kap細隻獅kap肥ê cheng-siⁿ，做細漢ê gín-ná beh牽in。Chhâi-lông beh kap mî-iûⁿ-á saⁿ-kap tòa, pà kap soaⁿ-iûⁿ-kiáⁿ saⁿ-kap tó--teh; gû-á kap sòe-chiah sai kap pûi ê cheng-siⁿ, chòe sòe-hàn ê gín-ná beh khan in.

7牛kap熊beh相kap食，in ê kiáⁿ beh相kap倒teh；獅beh食草親像牛。Gû kap hîm beh saⁿ-kap chia̍h, in ê kiáⁿ beh saⁿ-kap tó-teh; sai beh chia̍h chháu chhin-chhiūⁿ gû.

8食奶ê gín-ná beh thit-thô tī惡蛇ê孔口；斷奶ê gín-ná beh下手tī毒蛇ê穴。Chia̍h-lin ê gín-ná beh thit-thô tī ok-chôa ê khang-kháu; tn̄g-lin ê gín-ná beh hē chhiú tī to̍k-chôa ê hia̍t.

9Tī我ê聖山ê遍地，的確無損傷無陷害；因為認bat耶和華ê知batbeh充滿地上，親像水淹滿tī洋海。Tī Góa ê sèng-soaⁿ ê piàn-tōe, tek-khak bô sún-siong bô hām-hāi; in-ūi jīn-bat Iâ-hô-hoa ê chai-bat beh chhiong-móa tōe-chiūⁿ, chhin-chhiūⁿ chúi im-móa tī iûⁿ-hái.

10到hit日，耶西ê根頭khiā做萬百姓ê大旗，列邦beh歸óa伊；伊安歇ê所在有大榮光。Kàu hit-ji̍t Iâ-se ê kun-thâu khiā chòe bān peh-sìⁿ ê tōa-kî, lia̍t-pang beh kui-óa I; I an-hioh ê só͘-chāi ū tōa êng-kng.

11當hit日，主beh第二pái伸手救贖伊ê百姓中所chhun-ê，tùi亞述、埃及、Pa-thek-lô、Kó͘-si̍t、Í-lân、Sī-ná、Hap-má，kap眾海嶼tò來。Tng hit-ji̍t Chú beh tē-jī pái chhun-chhiú kiù-sio̍k I ê peh-sìⁿ-tiong só͘ chhun--ê, tùi A-su̍t, Ai-ki̍p, Pa-thek-lô, Kó͘-si̍t, Í-lân, Sī-ná, Hap-má, kap chèng hái-sū tò--lâi.

12伊beh ǹg列國khiā大旗，招集以色列受趕散ê人，聚集猶大四散ê人，tùi地ê四極來。I beh ǹg lia̍t-kok khiā tōa-kî, chio-chi̍p Í-sek-lia̍t siū kóaⁿ-sòaⁿ ê lâng, chū-chi̍p Iû-tāi sì-sòaⁿ ê lâng, tùi tōe ê sì-ke̍k lâi.

13Í-hoat-liân ê怨妒beh消無，猶大ê對敵beh除滅；Í-hoat-liân無beh怨妒猶大，猶大無beh對敵Í-hoat-liân。Í-hoat-liân ê oàn-tò͘ beh siau-bô, Iû-tāi ê tùi-te̍k beh tû-bia̍t; Í-hoat-liân bô beh oàn-tò͘ Iû-tāi, Iû-tāi bô beh tùi-te̍k Í-hoat-liân.

14In beh ǹg西飛去，phah tī腓利士人ê肩頭頂，相kap搶東方ê人；伸手tī Í-tong kap Mô͘-ap；A-bûn族也beh順服in。In beh ǹg-sai pe--khì, phah tī Hui-lī-sū lâng ê keng-thâu-téng, saⁿ-kap chhiúⁿ tang-hng ê lâng; chhun-chhiú tī Í-tong kap Mô͘-ap; A-bûn cho̍k iā beh sūn-ho̍k in.

15耶和華beh hō͘埃及海ê港乾去；用大風ia̍t伊ê手tī大河ê頂面，hō͘河分做七條，人拖鞋能得過去。Iâ-hô-hoa beh hō͘ Ai-ki̍p hái ê káng ta--khì; ēng tōa-hong ia̍t I ê chhiú tī Tōa-hô ê téng-bīn, hō͘ hô pun-chòe chhit-tiâu, lâng thoa-ôe ōe--tit kè--khì.

16為tio̍h伊所chhun ê百姓，就是tùi亞述chhun tò來ê，beh有一條大路親像當日為tio̍h以色列tùi埃及地上來ê一樣。Ūi-tio̍h I só͘ chhun ê peh-sìⁿ, chiū-sī tùi A-su̍t chhun tò-lâi--ê, beh ū chi̍t-tiâu tōa-lō͘ chhin-chhiūⁿ tong-ji̍t ūi-tio̍h Í-sek-lia̍t tùi Ai-ki̍p tōe chiūⁿ-lâi--ê chi̍t-iūⁿ.

1到hit日，你beh講，耶和華ah，我beh感謝祢，因為祢雖然bat受氣我，taⁿ祢ê受氣已經soah，祢亦安慰我。Kàu hit-ji̍t, lí beh kóng, Iâ-hô-hoa ah, góa beh kám-siā Lí, in-ūi Lí sui-jiân bat siū-khì góa, taⁿ Lí ê siū-khì í-keng soah, Lí ia̍h an-ùi góa.

2看ah，上帝是拯救我ê；我beh óa靠伊，亦無驚；因為主耶和華是我ê氣力，是我ê詩歌；伊亦成做救我ê。Khòaⁿ ah, Siōng-tè sī chín-kiù góa-ê; góa beh óa-khò I, ia̍h bô kiaⁿ; in-ūi Chú Iâ-hô-hoa sī góa ê khùi-la̍t, sī góa ê si-koa; I ia̍h chiâⁿ-chòe kiù-góa--ê.

3Lín beh tùi救恩ê水泉歡喜來chhiūⁿ水。Lín beh tùi kiù-un ê chúi-chôaⁿ hoaⁿ-hí lâi chhiūⁿ chúi.

4Tī hit日lín beh講，Tio̍h感謝耶和華，求叫祂ê名，將祂所行ê報揚tī列邦中，講起祂ê名已經受尊做高。Tī hit-ji̍t lín beh kóng, Tio̍h kám-siā Iâ-hô-hoa, kiû-kiò I ê miâ, chiong I só͘-kiâⁿ--ê pò-iông tī lia̍t-pang-tiong, kóng-khí I ê miâ í-keng siū chun chòe-koâiⁿ.

5Lín tio̍h唱歌o-ló耶和華；因為伊所行ê真顯赫；願chit-ê tāi-chì遍傳tī天下。Lín tio̍h chhiùⁿ-koa o-ló Iâ-hô-hoa; in-ūi I só͘-kiâⁿ--ê chin hián-hek; goān chit ê tāi-chì piàn-thoân tī thiⁿ-ē.

6錫安khiā起ê百姓ah，lín tio̍h出大歡喜ê聲，因為以色列ê聖ê tī lín ê中間做大。Sek-an khiā-khí ê peh-sìⁿ ah, lín tio̍h chhut tōa hoaⁿ-hí ê siaⁿ, in-ūi Í-sek-lia̍t ê Sèng--ê tī lín ê tiong-kan chòe-tōa.