1A-mô͘-su ê kiáⁿ以賽亞所看見論巴比倫ê默示。A-mô͘-su ê kiáⁿ Í-sài-a só͘ khòaⁿ-kìⁿ lūn Pa-pí-lûn ê be̍k-sī.

2Lín tio̍h tī光khō-khō ê山khiā大旗，tùi in出聲ia̍t手，hō͘ in入貴族ê門。Lín tio̍h tī kng-khō-khō ê soaⁿ khiā tōa-kî, tùi in chhut-siaⁿ ia̍t-chhiú, hō͘ in ji̍p kùi-cho̍k ê mn̂g.

3我吩咐我所揀出來ê人，我已經為tio̍h我ê受氣，來召我ê勇士，就是hiah-ê phín-phóng自高ê人。Góa hoan-hù Góa só͘ kéng--chhut-lâi ê lâng, Góa í-keng ūi-tio̍h Góa ê siū-khì, lâi tiàu Góa ê ióng-sū, chiū-sī hiah ê phín-phóng chū-ko ê lâng.

4山裡有chōe-chōe人ê聲，親像大陣ê百姓，有chōe-chōe國ê百姓聚集hōa-hōa哮ê聲；這是萬軍ê耶和華點齊軍隊，beh交戰。Soaⁿ--nih ū chōe-chōe lâng ê siaⁿ, chhin-chhiūⁿ tōa-tīn ê peh-sìⁿ, ū chōe-chōe kok ê peh-sìⁿ chū-chi̍p hōa-hōa-háu ê siaⁿ; che sī bān-kun ê Iâ-hô-hoa tiám-chôe kun-tūi, beh kau-chiàn.

5In tùi遠ê所在來，tùi天邊來，就是耶和華kap行祂ê受氣ê ke-si，beh毀滅chit-ê全地。In tùi hn̄g ê só͘-chāi lâi, tùi thiⁿ-piⁿ lâi, chiū-sī Iâ-hô-hoa kap kiâⁿ I ê siū-khì ê ke-si, beh húi-bia̍t chit ê choân-tōe.

6Lín tio̍h哀哭，因為耶和華ê日子近lah，親像毀滅tùi全能ê來。Lín tio̍h ai-khàu, in-ūi Iâ-hô-hoa ê ji̍t-chí kūn--lah, chhin-chhiūⁿ húi-bia̍t tùi Choân-lêng-ê lâi.

7所以lóng總ê手beh軟落去，眾人ê心beh消溶。Só͘-í lóng-chóng ê chhiú beh nńg--lo̍h-khì, chèng-lâng ê sim beh siau-iûⁿ.

8In beh驚惶；痛疼艱苦beh擒tio̍h in；in 攪絞親像beh生kiáⁿ ê婦人人；大家gông-ngia̍h相看，面親像火燄ê面。In beh kiaⁿ-hiâⁿ; thàng-thiàⁿ kan-khó͘ beh khîⁿ-tio̍h in; in kiau(**kiáu)-ká chhin-chhiūⁿ beh siⁿ-kiáⁿ ê hū-jîn-lâng; tāi-ke gông-ngia̍h saⁿ-khòaⁿ, bīn chhin-chhiūⁿ hé-iām ê bīn.

9看ah，耶和華ê日臨到，beh有殘忍、痛恨、大受氣；hō͘ chit-ê地拋荒，tùi hit中間除滅有罪ê人。Khòaⁿ ah, Iâ-hô-hoa ê ji̍t lîm-kàu, beh ū chân-jím, thòng-hūn, tōa siū-khì; hō͘ chit ê tōe pha-hng, tùi hit tiong-kan tû-bia̍t ū-chōe ê lâng.

10天頂ê眾星 列宿lóng無發出光，日頭tú-á出就變烏暗，月亦無發出伊ê光。Thiⁿ-téng ê chèng-chhiⁿ lia̍t-siù lóng bô hoat-chhut kng, ji̍t-thâu tú-á chhut chiū piàn o͘-àm, ge̍h ia̍h bô hoat-chhut i ê kng.

11我beh因為邪惡刑罰世界，因為罪孽刑罰pháiⁿ人；hō͘驕傲ê人ê lām-sám soah去，壓制強暴ê人ê自高。Góa beh in-ūi siâ-ok hêng-hoa̍t sè-kài, in-ūi chōe-gia̍t hêng-hoa̍t pháiⁿ-lâng; hō͘ kiau-ngō͘ ê lâng ê lām-sám soah--khì, ap-chè kiông-pō ê lâng ê chū-ko.

12我beh hō͘人比好金khah少，hō͘人比O-hui ê金khah少。Góa beh hō͘ lâng pí hó-kim khah-chió, hō͘ lâng pí O-hui ê kim khah-chió.

13所以我beh hō͘天振動，hō͘地搖choah，離開伊ê本位，就是tī萬軍ê耶和華ê痛恨kap祂大受氣ê日。Só͘-í Góa beh hō͘ thiⁿ tín-tāng, hō͘ tōe iô-choah, lī-khui i ê pún-ūi, chiū-sī tī bān-kun ê Iâ-hô-hoa ê thòng-hūn kap I tōa siū-khì ê ji̍t.

14In beh親像受追趕ê鹿，親像無人聚集ê羊；ta̍k人tò去本族，ta̍k人逃走到本所在。In beh chhin-chhiūⁿ siū tui-kóaⁿ ê lo̍k, chhin-chhiūⁿ bô lâng chū-chi̍p ê iûⁿ; ta̍k-lâng tò--khì pún-cho̍k, ta̍k-lâng tô-cháu kàu pún só͘-chāi.

15見若hō͘伊tú-tio̍h-ê beh受鑿thàng，見若hō͘伊掠tio̍h-ê beh hō͘刀thâi死。Kìⁿ-nā hō͘ i tú-tio̍h-ê beh siū chha̍k-thàng, kìⁿ-nā hō͘ i lia̍h-tio̍h-ê beh hō͘ to thâi-sí.

16In ê嬰á beh tī in ê目前hō͘人siak死，in ê厝beh hō͘人搶奪，in ê bó͘ beh hō͘人凌辱。In ê eⁿ-á beh tī in ê ba̍k-chêng hō͘ lâng siak-sí, in ê chhù beh hō͘ lâng chhiúⁿ-toa̍t, in ê bó͘ beh hō͘ lâng lêng-jio̍k.

17我beh激動Bí-thài人來攻擊in，in無對重銀，亦無ài ti̍h金。Góa beh kek-tōng Bí-thài lâng lâi kong-kek in, in bô tùi-tiōng gûn, ia̍h bô ài ti̍h kim.

18In ê弓beh phah死伊ê少年人，無憐憫婦人人ê胎孕，in ê目睭也無可憐gín-ná。In ê keng beh phah-sí i ê siàu-liân lâng, bô lîn-bín hū-jîn-lâng ê thai-īn, in ê ba̍k-chiu iā bô khó-lîn gín-ná.

19巴比倫平素做列國ê榮光，做Ka-le̍k-tí人驕傲ê裝飾，beh親像所多瑪蛾摩拉hō͘上帝所毀壞。Pa-pí-lûn pêng-sò͘ chòe lia̍t-kok ê êng-kng, chòe Ka-le̍k-tí lâng kiau-ngō͘ ê chng-thāⁿ, beh chhin-chhiūⁿ Só͘-to-má Gô-mô͘-la̍h hō͘ Siōng-tè só͘ húi-hoāi.

20伊ê內面的確永永無人tòa，代代無人khiā起；阿拉伯人無tī-hia搭布棚；顧羊ê人亦無hō͘羊群倒tī-hia。I ê lāi-bīn tek-khak éng-éng bô lâng tòa, tāi-tāi bô lâng khiā-khí; A-la̍h-pek lâng bô tī-hia tah pò͘-pîⁿ; kò͘-iûⁿ ê lâng ia̍h bô hō͘ iûⁿ-kûn tó tī-hia.

21只有曠野ê走獸倒tī-hia，hm̄-hm̄哮ê獸滿厝間；鴕鳥tiàm tī-hia，野山羊tī-hia跳舞。Chí-ū khòng-iá ê cháu-siù tó tī-hia, hm̄-hm̄-háu ê siù móa chhù-keng; tô-chiáu tiàm tī-hia, iá-soaⁿ-iûⁿ tī-hia thiàu-bú.

22豺狼beh哮tī伊ê營盤，山狗beh哮tī伊宴樂ê宮殿；伊ê時近lah，伊ê日子無久長。Chhâi-lông beh háu tī i ê iâⁿ-pôaⁿ, soaⁿ-káu beh háu tī i iàn-lo̍k ê kiong-tiān; i ê sî kūn--lah, i ê ji̍t-chí bô kú-tn̂g.

1耶和華beh憐憫雅各，beh koh揀以色列，將in安置tī本所在，寄腳ê beh歸óa in，kap雅各家連合。Iâ-hô-hoa beh lîn-bín Ngá-kok, beh koh kéng Í-sek-lia̍t, chiong in an-tì tī pún só͘-chāi, kià-kha-ê beh kui-óa in, kap Ngá-kok ke liân-ha̍p.

2列邦beh將in帶tò來本所在；以色列家beh tī耶和華ê地得tio̍h in做奴僕女婢，亦beh搶掠前搶掠in-ê，管轄前壓制in-ê。Lia̍t-pang beh chiong in tòa-tò--lâi pún só͘-chāi; Í-sek-lia̍t ke beh tī Iâ-hô-hoa ê tōe tit-tio̍h in chòe lô͘-po̍k lú-pī, ia̍h beh chhiúⁿ-lia̍h chêng chhiúⁿ-lia̍h in--ê, koán-hat chêng ap-chè in--ê.

3當耶和華hō͘你脫離艱苦煩惱，kap人勉強你做ê苦工，得tio̍h平安ê日，Tng Iâ-hô-hoa hō͘ lí thoat-lī kan-khó͘ hoân-ló, kap lâng bián-kióng lí chòe ê khó͘-kang, tit-tio̍h pêng-an ê ji̍t,

4你beh做chit-ê歌論巴比倫王，講，制壓人ê，怎樣竟然無去！勒索人ê，怎樣竟然無去！lí beh chòe chit ê koa lūn Pa-pí-lûn ông, kóng, Chè-ap lâng-ê, cháiⁿ-iūⁿ kéng-jiân bô--khì! le̍k-sek lâng ê, cháiⁿ-iūⁿ kéng-jiân bô-khì!

5耶和華有at折pháiⁿ人ê柺，kap管轄人ê ê權柄，Iâ-hô-hoa ū at-chi̍h pháiⁿ-lâng ê koáiⁿ, kap koán-hat lâng--ê ê koân-pèng,

6就是tī受氣中連連phah chiah-ê百姓ê，tī受氣中管轄列國，行窘迫無人阻止ê。chiū-sī tī siū-khì-tiong liân-liân phah chiah ê peh-sìⁿ ê, tī siū-khì-tiong koán-hat lia̍t-kok, kiâⁿ khún-pek bô lâng chó͘-chí ê.

7Taⁿ全地得tio̍h安歇平靜；人lóng出歡喜ê聲。Taⁿ choân-tōe tit-tio̍h an-hioh pêng-chēng; lâng lóng chhut hoaⁿ-hí ê siaⁿ.

8松樹kap黎巴嫩ê柏香樹，lóng因為你歡喜，講，對你倒落去，無人koh上來剉阮。Siông-chhiū kap Lī-pa-lùn ê pek-hiuⁿ-chhiū, lóng in-ūi lí hoaⁿ-hí, kóng, Tùi lí tó--lo̍h-khì, bô lâng koh chiūⁿ-lâi chhò goán.

9你落去ê時，陰間就為你振動，來迎接你；koh因為你驚動hiah-ê bat tī世間做領袖ê陰魂；亦hō͘ hiah-ê bat做列國ê君王ê lóng對伊ê座位khiā起來。Lí lo̍h--khì ê sî, im-kan chiū ūi lí tín-tāng, lâi ngiâ-chih lí; koh in-ūi lí keng-tāng hiah ê bat tī sè-kan chòe léng-siù ê im-hûn; ia̍h hō͘ hiah ê bat chòe lia̍t-kok ê kun-ông ê lóng tùi i ê chō-ūi khiā--khí-lâi.

10In lóng beh應你講，你亦變做軟弱親像阮mah？你亦kap阮相親像mah？In lóng beh ìn lí kóng, Lí ia̍h pìⁿ-chòe loán-jio̍k chhin-chhiūⁿ goán mah? lí ia̍h kap goán saⁿ-chhin-chhiūⁿ mah?

11你ê威風kap你ê琴瑟ê聲，lóng落到陰間；鋪tī你ê下面ê是蟲，蓋tī你ê頂面ê是蛆(chhu)。Lí ê ui-hong kap lí ê khîm-sek ê siaⁿ, lóng lo̍h kàu im-kan; pho͘ tī lí ê ē-bīn--ê sī thâng, khàm tī lí ê téng-bīn--ê sī chhu.

12天光早ê啟明星ah，你怎樣tùi天墜落！你chit-ê攻破列國ê，怎樣受砍倒tī地上。Thiⁿ-kng-chá ê khé-bêng-chhiⁿ ah, lí cháiⁿ-iūⁿ tùi thiⁿ tūi-lo̍h! lí chit-ê kong-phòa lia̍t-kok--ê, cháiⁿ-iūⁿ siū khám-tó tī tōe-chiūⁿ.

13你ê心內bat講，我beh上到天頂，我beh舉起我ê座位tī上帝眾星ê頂面；我beh坐tī聚會ê山，tī北方ê極頭。Lí ê sim-lāi bat kóng, Góa beh chiūⁿ-kàu thiⁿ-téng, góa beh kú-khí góa ê chō-ūi tī Siōng-tè chèng-chhiⁿ ê téng-bīn; góa beh chē tī chū-hōe ê soaⁿ, tī pak-hng ê ke̍k-thâu.

14我beh上到比雲khah高ê頂面；我beh kap至koânê平等。Góa beh chiūⁿ-kàu pí hûn khah-koâiⁿ ê téng-bīn; góa beh kap Chì-koâiⁿ-ê pîⁿ-téng.

15總是你beh墜落陰間，到深坑ê極頭。Chóng-sī lí beh tūi-lo̍h im-kan, kàu chhim khiⁿ ê ke̍k-thâu.

16凡若看見你ê lóng beh注目看你，留心想你，講，Hoān-nā khòaⁿ-kìⁿ lí-ê lóng beh chù-ba̍k khòaⁿ lí, liû-sim siūⁿ lí, kóng,

17Hō͘大地搖choah，hō͘列國振動，hō͘世界拋荒，hō͘城牆chhia倒，無tháu放受掠ê人tò去in tau，是chit-ê人mah？Hō͘ tōa-tōe iô-choah, hō͘ lia̍t-kok tín-tāng, hō͘ sè-kài pha-hng, hō͘ siâⁿ-chhiûⁿ chhia-tó, bô tháu-pàng siū-lia̍h ê lâng tò--khì in tau, sī chit ê lâng mah?

18列國ê君王lóng ta̍k-ê有榮光，睏tī伊ê墓。Lia̍t-kok ê kun-ông lóng ta̍k-ê ū êng-kng, khùn tī i ê bōng.

19獨獨你受hiat-ka̍k，bōe得tio̍h入你ê墓，親像thang厭賤ê枝，用受thâi ê人做衫，就是受刀鑿死，墜落坑中石頭hit位ê；你koh親像受thún踏ê身屍。To̍k-to̍k lí siū hiat-ka̍k, bōe tit-tio̍h ji̍p lí ê bōng, chhin-chhiūⁿ thang iàm-chiān ê ki, ēng siū-thâi ê lâng chòe saⁿ, chiū-sī siū to chha̍k-sí, tūi-lo̍h khiⁿ-tiong chio̍h-thâu hit-ūi--ê; lí koh chhin-chhiūⁿ siū thún-ta̍h ê sin-si.

20你bōe得tio̍h kap in同埋葬，因為你敗壞你ê國，thâi死你ê百姓；pháiⁿ人ê後裔的確永遠無名。Lí bōe tit-tio̍h kap in tâng bâi-chòng, in-ūi lí pāi-hoāi lí ê kok, thâi-sí lí ê peh-sìⁿ; pháiⁿ-lâng ê hō͘-è tek-khak éng-oán bô-miâ.

21因為祖公ê罪，tio̍h備辦thâi死in ê kiáⁿ孫，免得in興起來佔地，起城遍世間。In-ūi chó͘-kong ê chōe, tio̍h pī-pān thâi-sí in ê kiáⁿ-sun, bián-tit in heng-khí lâi chiàm-tōe, khí siâⁿ piàn sè-kan.

22萬軍ê耶和華講，我beh起來攻擊in，beh tùi巴比倫除滅伊ê名，kap所chhun-ê，以及伊ê kiáⁿ伊ê孫；這是耶和華講ê。Bān-kun ê Iâ-hô-hoa kóng, Góa beh khí-lâi kong-kek in, beh tùi Pa-pí-lûn tû-bia̍t i ê miâ, kap só͘-chhun-ê, í-ki̍p i ê kiáⁿ i ê sun; che sī Iâ-hô-hoa kóng ê.

23我beh hō͘伊ê地做河豬所tiàm ê位，koh變做水池；我beh用滅無ê掃帚(chhiú)掃除伊；這是萬軍ê耶和華講ê。Góa beh hō͘ i ê tōe chòe hô-ti só͘ tiàm ê ūi, koh pìⁿ-chòe chúi-tî; Góa beh ēng bia̍t-bô ê sàu-chiú(**chhiú) sàu-tû i; che sī bān-kun ê Iâ-hô-hoa kóng ê.

24萬軍ê耶和華有chiù-chōa講，我所想ê決斷beh成；我所定tio̍h-ê決斷建立。Bān-kun ê Iâ-hô-hoa ū chiù-chōa kóng, Góa só͘ siūⁿ-ê koat-toàn beh chiâⁿ; Góa só͘ tiāⁿ-tio̍h-ê koat-toàn kiàn-li̍p.

25我beh phah敗亞述人tī我ê地，thún踏伊tī我ê山；伊ê擔beh離開我ê百姓；伊ê重擔beh離開我ê百姓ê肩頭。Góa beh phah-pāi A-su̍t lâng tī Góa ê tōe, thún-ta̍h i tī Góa ê soaⁿ; i ê taⁿ beh lī-khui Góa ê peh-sìⁿ; i ê tāng-tàⁿ beh lī-khui Góa ê peh-sìⁿ ê keng-thâu.

26這是已經定tio̍h beh行tī全地ê旨意；這是伸tī萬國頂面ê手。Che sī í-keng tiāⁿ-tio̍h beh kiâⁿ tī choân-tōe ê chí-ì; che sī chhun tī bān-kok téng-bīn ê chhiú.

27萬軍ê耶和華已經定tio̍h旨意，是誰能廢無伊？伊ê手已經伸出，是誰能hō͘伊kiu倒tńg？Bān-kun ê Iâ-hô-hoa í-keng tiāⁿ-tio̍h chí-ì, chī-chūi ōe hòe-bô i? I ê chhiú í-keng chhun-chhut, chī-chūi ōe hō͘ i kiu tò-tńg?

28A-hap-su王死hit年，有chit-ê默示。A-hap-su ông sí hit-nî, ū chit ê be̍k-sī.

29腓利士ê全地ah，莫得因為phah你ê柺已經折(chi̍h)來歡喜；因為tùi蛇ê卵beh生出毒蛇，伊所生ê是飛ê火蛇。Hui-lī-sū ê choân-tōe ah, bo̍h-tit in-ūi phah lí ê koáiⁿ í-keng chi̍h lâi hoaⁿ-hí; in-ūi tùi chôa ê nn̄g beh siⁿ-chhut to̍k-chôa, i só͘-siⁿ-ê sī pe ê hé-chôa.

30Sòng-hiong人ê大kiáⁿ beh得tio̍h食，欠缺ê人beh安然倒teh；我beh用飢荒餓死你ê種類，伊beh thâi死你所chhun-ê。Sòng-hiong lâng ê tōa-kiáⁿ beh tit-tio̍h chia̍h, khiàm-kheh ê lâng beh an-jiân tó-teh; Góa beh ēng ki-hng gō-sí lí ê chéng-lūi, i beh thâi-sí lí só͘-chhun-ê.

31門ah，tio̍h啼哭；城ah，tio̍h喉叫；腓利士全地ah，你消無lah；因為有煙tùi北勢來，伊ê兵丁無一個落(làu)陣。Mn̂g--ah, tio̍h thî-khàu; siâⁿ--ah, tio̍h âu-kiò; Hui-lī-sū choân-tōe ah, lí siau-bô lah; in-ūi ū ian tùi pak--sì lâi, i ê peng-teng bô chi̍t-ê làu-tīn.

32Beh怎樣應列國ê使者ah？Tio̍h講，耶和華建立錫安，祂ê百姓中困苦ê人beh投歇tī hit內面。Beh cháiⁿ-iūⁿ ìn lia̍t-kok ê sù-chiá ah? Tio̍h kóng, Iâ-hô-hoa kiàn-li̍p Sek-an, I ê peh-sìⁿ-tiong khùn-khó͘ ê lâng beh tâu-hioh tī hit lāi-bīn.

1論Mô͘-ap ê默示。 因為一暝ê中間Mô͘-ap ê A-jíⁿ變做荒廢，無去；因為一暝ê中間Mô͘-ap ê Ki-jíⁿ變做荒廢，無去。Lūn Mô͘-ap ê be̍k-sī. In-ūi chi̍t-mî ê tiong-kan Mô͘-ap ê A-jíⁿ pìⁿ-chòe hong-hòe, bô--khì; in-ūi chi̍t-mî ê tiong-kan Mô͘-ap ê Ki-jíⁿ pìⁿ-chòe hong-hòe, bô--khì.

2伊上到Pa-ek，koh去Tí-pún，到高ê所在啼哭；Mô͘-ap人因為Nî-pho kap Bí-tí-pa哀哭，ta̍k-ê頭殼光溜溜，嘴鬚剃了了。I chiūⁿ kàu Pa-ek, koh khì Tí-pún, kàu koâiⁿ ê só͘-chāi thî-khàu; Mô͘-ap lâng in-ūi Nî-pho kap Bí-tí-pa ai-khàu, ta̍k-ê thâu-khak kng-liu-liu, chhùi-chhiu thì-liáu-liáu.

3In tī街市裡腰lóng hâ麻布；tī厝頂kap hit-ê寬闊ê所在，ta̍k人lóng啼哭，目屎直直流。In tī koe-chhī--nih io lóng hâ môa-pò͘; tī chhù-téng kap hit ê khoan-khoah ê só͘-chāi, ta̍k-lâng lóng thî-khàu, ba̍k-sái ti̍t-ti̍t lâu.

4Hi-si̍t-pún kap Í-lī-a-lī，悲哀ê聲聽到Ngá-cha̍p；所以Mô͘-ap帶軍器ê大聲hoah-hiàm；伊ê心ngia̍uh-ngia̍uh-chhoah。Hi-si̍t-pún kap Í-lī-a-lī, pi-ai ê siaⁿ thiaⁿ kàu Ngá-cha̍p; só͘-í Mô͘-ap tòa kun-khì-ê tōa-siaⁿ hoah-hiàm; i ê sim ngia̍uh-ngia̍uh-chhoah.

5我ê心為tio̍h Mô͘-ap悲哀；伊ê貴族走到Só-jíⁿ，到Í-ki-la̍h Si-lī-si-a；in上Lō͘-hi ê路，ná行ná哮；tī Hô-lô-liām ê路，因為毀滅出哀哭ê聲。Góa ê sim ūi-tio̍h Mô͘-ap pi-ai; i ê kùi-cho̍k cháu kàu Só-jíⁿ, kàu Í-ki-la̍h Si-lī-si-a; in chiūⁿ Lō͘-hi ê lō͘, ná-kiâⁿ ná-háu; tī Hô-lô-liām ê lō͘, in-ūi húi-bia̍t chhut ai-khàu ê siaⁿ.

6因為Lêng-lîm ê水beh乾去；因為青翠ê草枯焦；烏幼ê菜蔬滅無，青翠ê物lóng無去。In-ūi Lêng-lîm ê chúi beh ta--khì; in-ūi chhiⁿ-chhùi ê chháu ko͘-tâ; o͘-iù ê chhài-soe bia̍t-bô, chhiⁿ-chhùi ê mi̍h lóng bô--khì.

7因為án-ni， Mô͘-ap人所得tio̍h ê財物kap所積聚ê，lóng beh 帶過柳樹溪；In-ūi án-ni Mô͘-ap lâng só͘ tit-tio̍h ê châi-bu̍t kap só͘ chek-chū-ê, lóng beh tòa kè liú-chhiū khoe;

8因為哀慘ê聲遍滿Mô͘-ap ê四境，哀哭ê聲聽到Í-ki-liân，哀哭ê聲聽到Pí-jíⁿ-í-lîm。in-ūi ai-chhám ê siaⁿ piàn-móa Mô͘-ap ê sì-kéng, ai-khàu ê siaⁿ thiaⁿ kàu Í-ki-liân, ai-khàu ê siaⁿ thiaⁿ kàu Pí-jíⁿ-í-lîm.

9因為Tí-bûn ê水有血滿滿；我beh加添Tí-bûn ê災難，hō͘獅來追jip Mô͘-ap逃脫ê百姓，kap hit所在所chhun ê人。In-ūi Tí-bûn ê chúi ū huih móa-móa; Góa beh ke-thiⁿ Tí-bûn ê chai-lān, hō͘ sai lâi tui-jip Mô͘-ap tô-thoat ê peh-sìⁿ, kap hit só͘-chāi só͘-chhun ê lâng.