1論大馬色ê默示。 看ah，大馬色已經受廢棄，無koh做城，的確變做瓦phiaⁿ-phè ê堆。Lūn Tāi-má-sek ê be̍k-sī. Khòaⁿ ah, Tāi-má-sek í-keng siū hòe--khì, bô koh chòe siâⁿ, tek-khak pìⁿ-chòe hāu-phiaⁿ-phè ê tui.

2A-lô-jíⁿ ê城已經受放sak，的確成做飼羊ê所在；羊倒tī-hia，無人phah驚in。A-lô-jíⁿ ê siâⁿ í-keng siū pàng-sak, tek-khak chiâⁿ-chòe chhī-iûⁿ ê só͘-chāi; iûⁿ tó tī-hia, bô lâng phah-kiaⁿ in.

3Í-hoat-liân ê山寨，大馬色ê國權，A-lân所chhun ê百姓，lóng beh親像以色列ê榮光無去；這是萬軍ê耶和華講ê。Í-hoat-liân ê soaⁿ-chē, Tāi-má-sek ê kok-koân, A-lân só͘ chhun ê peh-sìⁿ, lóng beh chhin-chhiūⁿ Í-sek-lia̍t ê êng-kng bô--khì; che sī bān-kun ê Iâ-hô-hoa kóng ê.

4到hit日，雅各ê榮光beh衰薄，伊ê肥ê身體beh消瘦。Kàu hit-ji̍t Ngá-kok ê êng-kng beh soe-po̍h, i ê pûi ê sin-thé beh siau-sán.

5就beh親像收割ê人收五穀，用手割hiah-ê穗；koh親像人tī Lī-hoa̍t-im ê山谷拾麥屑。Chiū beh chhin-chhiūⁿ siu-koah ê lâng siu gō͘-kak, ēng chhiú koah hiah ê sūi; koh chhin-chhiūⁿ lâng tī Lī-hoa̍t-im ê soaⁿ-kok khioh be̍h-seh.

6In中間所chhun-ê無lōa-chōe，親像人摃橄欖樹，Tī地 益高ê枝尾，只有兩三粒，tī果子樹伸遠ê枝尾，只有四五粒；這是耶和華以色列ê上帝講ê。In tiong-kan só͘ chhun--ê bô lōa-chōe, chhin-chhiūⁿ lâng kòng kaⁿ-ná-chhiū, tī tē-it-koâiⁿ ê ki-bé, chí-ū nn̄g saⁿ lia̍p, tī ké-chí-chhiū chhun-hn̄g ê ki-bé, chí-ū sì gō͘ lia̍p; che sī Iâ-hô-hoa Í-sek-lia̍t ê Siōng-tè kóng ê.

7當hit日，人beh仰望造化伊ê主，目睭beh觀看以色列ê聖ê。Tng hit-ji̍t lâng beh gióng-bōng chō-hòa i ê Chú, ba̍k-chiu beh koan-khòaⁿ Í-sek-lia̍t ê Sèng--ê.

8In無koh仰望家己ê手所起ê祭壇，無koh觀看家己ê指頭á所造ê柴柱，á是日ê像。In bô koh gióng-bōng ka-kī ê chhiú só͘ khí ê chè-tôaⁿ, bô koh koan-khòaⁿ ka-kī ê chńg-thâu-á só͘-chō ê chhâ-thiāu, á-sī ji̍t ê siōng.

9Tī hit日，in堅固ê城beh親像樹林內kap山尾溜所棄sak ê所在，就是in早前tī以色列人ê面前所棄sak-ê；án-ni地就拋荒。Tī hit-ji̍t in kian-kò͘ ê siâⁿ beh chhin-chhiūⁿ chhiū-nâ-lāi kap soaⁿ-bé-liu só͘ khì-sak ê só͘-chāi, chiū-sī in chá-chêng tī Í-sek-lia̍t lâng ê bīn-chêng só͘ khì-sak--ê; án-ni tōe chiū pha-hng.

10因為你bōe記得救你ê上帝，無記念做你ê氣力ê石磐；所以你栽真心適ê樹á栽，亦種別樣ê種。In-ūi lí bōe kì--tit kiù lí ê Siōng-tè, bô kì-liām chòe lí ê khùi-la̍t ê chio̍h-pôaⁿ; só͘-í lí chai chin sim-sek ê chhiū-á-chai, ia̍h chèng pa̍t-iūⁿ ê chéng.

11栽種ê日，你kā伊圍籬笆；到早起時，hō͘你所種ê開花；總是tī憂苦絕望痛疼ê日，所收割ê lóng飛飛去。Chai-chèng ê ji̍t lí kā i ûi lî-pa; kàu chá-khí sî, hō͘ lí só͘-chèng-ê khui-hoe; chóng-sī tī iu-khó͘ choa̍t-bāng thàng-thiàⁿ ê ji̍t, só͘ siu-koah-ê lóng pe-le(**pe)--khì.

12聽ah，有chōe-chōe百姓ê聲，in hōa-hōa哮親像海ê hōa-hōa哮；有列國ê走chông，in走chông親像大水ê走chông。Thiaⁿ ah, ū chōe-chōe peh-sìⁿ ê siaⁿ, in hōa-hōa-háu chhin-chhiūⁿ hái ê hōa-hōa-háu; ū lia̍t-kok ê cháu-chông, in cháu-chông chhin-chhiūⁿ tōa-chúi ê cháu-chông.

13列邦走chông，親像chōe-chōe水ê走chông；總是上帝hoah in，in就走去遠遠koh受追趕，親像山頂風前ê粗糠，koh親像大風頭前teh捲ê物。Lia̍t-pang cháu-chông, chhin-chhiūⁿ chōe-chōe chúi ê cháu-chông; chóng-sī Siōng-tè hoah in, in chiū cháu--khì hn̄g-hn̄g koh siū tui-kóaⁿ, chhin-chhiūⁿ soaⁿ-téng hong-chêng ê chho͘-khng, koh chhin-chhiūⁿ tōa-hong thâu-chêng teh kńg ê mi̍h.

14Ê-hng時有驚惶；天iáu未光，in就無去；這是搶阮ê人所得tio̍h ê份，是劫阮ê人ê報應。Ê-hng sî ū kiaⁿ-hiâⁿ; thiⁿ iáu-bē kng, in chiū bô--khì; che sī chhiúⁿ goán ê lâng só͘ tit-tio̍h ê hūn, sī kiap goán ê lâng ê pò-èng.

1Hā ah，Kó͘-si̍t chiah-ê河外，伊ê翼phia̍t-phia̍t哮ê地。Hā ah, Kó͘-si̍t chiah ê hô-gōa, i ê si̍t phia̍t-phia̍t háu ê tōe.

2伊差使者過海，坐蘆葦ê船tī水面，講，Lín chiah-ê 緊快ê使者，tio̍h到高大光滑ê百姓hia，tùi開國以來，hiah-ê百姓極其thang驚，是分地界thún踏人ê，in ê地有江河分開。I chhe sù-chiá kè-hái, chē lô͘-úi ê chûn tī chúi-bīn, kóng, Lín chiah ê kín-khoài ê sù-chiá, tio̍h kàu koâiⁿ-tōa kng-ku̍t ê peh-sìⁿ hia, tùi khai-kok í-lâi, hiah ê peh-sìⁿ ke̍k-kî thang kiaⁿ, sī pun tōe-kài thún-ta̍h lâng ê, in ê tōe ū kang-hô pun-khui.

3世上一切khiā起ê百姓，kap tiàm tī地上ê人ah，山頂khiā大旗ê時lín tio̍h看，pûn哨角ê時lín tio̍h聽。Sè-chiūⁿ it-chhè khiā-khí ê peh-sìⁿ, kap tiàm tī tōe-chiūⁿ ê lâng ah, soaⁿ-téng khiā tōa-kî ê sî lín tio̍h khòaⁿ, pûn sàu-kak ê sî lín tio̍h thiaⁿ.

4因為耶和華對我án-ni講，當日時有天氣ê炎熱，收割ê熱天有露水ê雲霧ê時，我tī我khiā起ê所在beh靜靜坐teh看。In-ūi Iâ-hô-hoa tùi góa án-ni kóng, Tng ji̍t-sî ū thiⁿ-khì ê iām-jia̍t, siu-koah ê joa̍h-thiⁿ ū lō͘-chúi ê hûn-bū ê sî, Góa tī Góa khiā-khí ê só͘-chāi beh chēng-chēng chē teh-khòaⁿ.

5收割ê事先，花已經開謝，花亦結成beh熟ê葡萄，伊beh用鐮á割去軟ê枝，koh beh剪除ām-ām ê藤。Siu-koah ê tāi-seng, hoe í-keng khui siā, hoe ia̍h kiat-chiâⁿ beh se̍k ê phû-tô, i beh ēng liâm-á koah-khì nńg ê ki, koh beh chián-tû ām-ām ê tîn.

6Lóng beh hiat hō͘山間ê鷹鳥，kap地上ê野獸；夏天ê鷹鳥beh歇tī-hia，冬天ê野獸lóng beh倒tī-hia。Lóng beh hiat hō͘ soaⁿ-kan ê eng-chiáu, kap tōe-chiūⁿ ê iá-siù; hē-thiⁿ ê eng-chiáu beh hioh tī-hia, tang-thiⁿ ê iá-siù lóng beh tó tī-hia.

7到hit時，chit-ê高大光滑ê百姓，就是tùi開國以來極其thang驚，分地界thún踏人ê，in ê地有江河分開，in beh將禮物獻hō͘萬軍ê耶和華，就是獻到錫安山，耶和華安置祂ê名ê所在。Kàu hit-sî chit ê koâiⁿ-tōa kng-ku̍t ê peh-sìⁿ, chiū-sī tùi khai-kok í-lâi ke̍k-kî thang kiaⁿ, pun tōe-kài thún-ta̍h lâng ê, in ê tōe ū kang-hô pun-khui, in beh chiong lé-mi̍h hiàn hō͘ bān-kun ê Iâ-hô-hoa, chiū-sī hiàn-kàu Sek-an soaⁿ, Iâ-hô-hoa an-tì I ê miâ ê só͘-chāi.

1論埃及ê默示。 看ah，耶和華坐緊緊ê雲臨到埃及；埃及ê偶像tī祂ê面前ngia̍uh-ngia̍uh-chhoah；埃及人ê心tī內面消溶。Lūn Ai-ki̍p ê be̍k-sī. Khòaⁿ ah, Iâ-hô-hoa chē kín-kín ê hûn lîm-kàu Ai-ki̍p; Ai-ki̍p ê ngó͘-siōng tī I ê bīn-chêng ngia̍uh-ngia̍uh-chhoah; Ai-ki̍p lâng ê sim tī lāi-bīn siau-iûⁿ.

2我beh激動埃及人攻擊埃及人，兄弟攻擊兄弟，厝邊攻擊厝邊，城攻擊城，國攻擊國。Góa beh kek-tōng Ai-ki̍p lâng kong-kek Ai-ki̍p lâng, hiaⁿ-tī kong-kek hiaⁿ-tī, chhù-piⁿ kong-kek chhù-piⁿ, siâⁿ kong-kek siâⁿ, kok kong-kek kok.

3埃及人ê心神beh tī內面失膽；我beh敗壞in ê計謀；in beh求偶像kap念咒ê，做童乩ê，行邪術ê。Ai-ki̍p lâng ê sim-sîn beh tī lāi-bīn sit-táⁿ; Góa beh pāi-hoāi in ê kè-bô͘; in beh kiû ngó͘-siōng kap liām-chiù--ê, chòe tâng-ki ê, kiâⁿ siâ-su̍t ê.

4我beh將埃及人交tī殘忍ê主ê手，強暴ê王beh管轄in；這是主萬軍ê耶和華講ê。Góa beh chiong Ai-ki̍p lâng kau tī chân-jím ê chú ê chhiú, kiông-pō ê ông beh koán-hat in; che sī Chú bān-kun ê Iâ-hô-hoa kóng ê.

5海中ê水beh絕斷，河水beh消無乾去。Hái-tiong ê chúi beh choa̍t-tn̄g, hô-chúi beh siau-bô ta--khì.

6江河beh變臭味，埃及ê河水beh減少，乾乾去；蘆葦kap蘆竹lóng枯焦。Kang-hô beh pìⁿ chhàu-bī, Ai-ki̍p ê hô-chúi beh kiám-chió, ta-la--khì; lô͘-úi kap lô͘-tek lóng ko͘-tâ.

7河邊kap河口ê草埔，以及河邊所栽種ê lóng枯焦，受掃除無去。Hô-piⁿ kap Hô(**hô)-kháu ê chháu-po͘, í-ki̍p Hô-piⁿ só͘ chai-chèng--ê lóng ko͘-tâ, siū sàu-tû bô--khì.

8討魚ê beh啼哭，放釣tī河裡ê beh悲傷；拋網tī水裡ê beh衰敗。Thó-hî--ê beh thî-khàu, pàng-tiò tī Hô--nih-ê beh pi-siong; pha-bāng tī chúi--nih-ê beh soe-pāi.

9績(cheh)幼苧ê，kap織白布ê，lóng beh見笑。Cheh iù-tōe ê, kap chit pe̍h-pò͘ ê, lóng beh kiàn-siàu.

10國家ê柱石beh tú-tio̍h phah碎，所有ê chhiàⁿ工人心beh煩惱。Kok-ka ê thiāu-chio̍h beh tú-tio̍h phah-chhùi, só͘ ū ê chhiàⁿ-kang lâng sim beh hoân-ló.

11Só-an ê首領極其愚戇；法老大智慧ê謀士所計畫ê成做愚蠢。Lín thái-thó敢對法老講，我是智慧人ê kiáⁿ孫，我是先王ê kiáⁿ孫？Só-an ê siú-léng ke̍k-kî gû-gōng; Hoat-ló tōa tì-hūi ê bô͘-sū só͘ kè-e̍k--ê chiâⁿ-chòe gû-chhún. Lín thái-thó káⁿ tùi Hoat-ló kóng, Góa sī tì-hūi lâng ê kiáⁿ-sun, góa sī sian-ông ê kiáⁿ-sun?

12你ê智慧ê人tī toh-lo̍h？萬軍ê耶和華論埃及所定tio̍h ê旨意，in thang來知，thang kā你講lah。Lí ê tì-hūi ê lâng tī toh-lo̍h? bān-kun ê Iâ-hô-hoa lūn Ai-ki̍p só͘ tiāⁿ-tio̍h ê chí-ì, in thang lâi chai, thang kā lí kóng lah.

13Só-an ê首領lóng變做戇，Lô-hut ê首領lóng受迷惑；埃及支派厝角頭ê石chhōa伊ê百姓tī迷路。Só-an ê siú-léng lóng pìⁿ-chòe gōng, Lô-hut ê siú-léng lóng siū bê-he̍k; Ai-ki̍p chi-phài chhù-kak-thâu ê chio̍h chhōa i ê peh-sìⁿ tī bê-lō͘.

14耶和華用乖謬ê神參入tī in中間，致到in chhōa埃及一切所行ê lóng差錯，親像食酒醉ê人嘔吐ê時，東倒西歪一樣。Iâ-hô-hoa ēng koāi-biū ê sîn chham-ji̍p tī in tiong-kan, tì-kàu in chhōa Ai-ki̍p it-chhè só͘-kiâⁿ-ê lóng chha-chhok, chhin-chhiūⁿ chia̍h-chiú-chùi ê lâng áu-thò͘ ê sî, tang-tó sai-oai chi̍t-iūⁿ.

15埃及ê中間，無論頭kap尾，棕枝kap蘆葦所做ê工，無一項能成。Ai-ki̍p ê tiong-kan, bô-lūn thâu kap bé, chang-ki kap lô͘-úi só͘ chòe ê kang, bô chi̍t-hāng ōe chiâⁿ.

16到hit日，埃及beh親像婦人人一樣，koh beh驚惶ngia̍uh-ngia̍uh-chhoah，因為萬軍ê耶和華ê手ê舞弄，就是祂tī in ê頂面所舞弄ê。Kàu hit-ji̍t Ai-ki̍p beh chhin-chhiūⁿ hū-jîn-lâng chi̍t-iūⁿ, koh beh kiaⁿ-hiâⁿ ngia̍uh-ngia̍uh-chhoah, in-ūi bān-kun ê Iâ-hô-hoa ê chhiú ê bú-lāng, chiū-sī I tī in ê téng-bīn só͘ bú-lāng ê.

17猶大地beh做埃及所驚惶ê；見若對伊講起猶大地伊就驚惶；這是萬軍ê耶和華對tī埃及所定tio̍h ê旨意。Iû-tāi tōe beh chòe Ai-ki̍p só͘ kiaⁿ-hiâⁿ ê; kìⁿ-nā tùi i kóng-khí Iû-tāi tōe i chiū kiaⁿ-hiâⁿ; che sī bān-kun ê Iâ-hô-hoa tùi tī Ai-ki̍p só͘ tiāⁿ-tio̍h ê chí-ì.

18當hit日，埃及地beh有五個城講迦南ê腔口，koh kí萬軍ê耶和華來chiù-chōa；beh有一個稱做滅無ê城。Tng hit-ji̍t Ai-ki̍p tōe beh ū gō͘ ê siâⁿ kóng Ka-lâm ê khiuⁿ-kháu, koh kí bān-kun ê Iâ-hô-hoa lâi chiù-chōa; beh ū chi̍t-ê chheng-chòe bia̍t-bô ê siâⁿ.

19當hit日，tī埃及地ê中間，beh為tio̍h耶和華起一座壇；tī埃及ê邊界，beh為耶和華khiā一支柱。Tng hit-ji̍t tī Ai-ki̍p tōe ê tiong-kan, beh ūi-tio̍h Iâ-hô-hoa khí chi̍t-chō-tôaⁿ; tī Ai-ki̍p ê pian-kài, beh ūi Iâ-hô-hoa khiā chi̍t-ki thiāu.

20這lóng beh tī埃及地為萬軍ê耶和華做記號kap證據；埃及人因為受人ê制壓，哀求耶和華，祂就差一位拯救ê，就是有才能ê來拯救in。Che lóng beh tī Ai-ki̍p tōe ūi bān-kun ê Iâ-hô-hoa chòe kì-hō kap chèng-kù; Ai-ki̍p lâng in-ūi siū lâng ê chè-ap, ai-kiû Iâ-hô-hoa, I chiū chhe chi̍t-ūi chín-kiù--ê, chiū-sī ū châi-lêng--ê lâi chín-kiù in.

21耶和華beh hō͘埃及人bat祂；tī hit日埃及人的確bat耶和華，亦beh獻祭物kap禮物敬拜祂；koh對耶和華下願謝願。Iâ-hô-hoa beh hō͘ Ai-ki̍p lâng bat I; tī hit-ji̍t Ai-ki̍p lâng tek-khak bat Iâ-hô-hoa, ia̍h beh hiàn chè-mi̍h kap lé-mi̍h kèng-pài I; koh tùi Iâ-hô-hoa hē-goān siā-goān.

22耶和華beh phah埃及，亦phah，亦醫治伊；in beh歸向耶和華，祂beh聽in ê祈禱，來醫治in。Iâ-hô-hoa beh phah Ai-ki̍p, ia̍h phah, ia̍h i-tī i; in beh kui-ǹg Iâ-hô-hoa, I beh thiaⁿ in ê kî-tó, lâi i-tī in.

23當hit日，beh有大路tùi埃及透到亞述；亞述人beh入埃及，埃及人亦beh入亞述；埃及人beh kap亞述人相kap服事耶和華。Tng hit-ji̍t beh ū tōa-lō͘ tùi Ai-ki̍p thàu-kàu A-su̍t; A-su̍t lâng beh ji̍p Ai-ki̍p, Ai-ki̍p lâng ia̍h beh ji̍p A-su̍t; Ai-ki̍p lâng beh kap A-su̍t lâng saⁿ-kap ho̍k-sāi Iâ-hô-hoa.

24當hit日，以色列beh kap埃及參亞述，三個平列，hō͘地上ê人得tio̍h福氣。Tng hit-ji̍t Í-sek-lia̍t beh kap Ai-ki̍p chham A-su̍t, saⁿ-ê pîⁿ-lia̍t, hō͘ tōe-chiūⁿ ê lâng tit-tio̍h hok-khì.

25因為萬軍ê耶和華賜福in，講，埃及我ê百姓，亞述我ê手所造ê，以色列我ê產業，lóng有福氣。In-ūi bān-kun ê Iâ-hô-hoa sù-hok in, kóng, Ai-ki̍p Góa ê peh-sìⁿ, A-su̍t Góa ê chhiú só͘-chō-ê, Í-sek-lia̍t Góa ê sán-gia̍p, lóng ū hok-khì.