1當O͘-se-a、Iok-thán、A-hap-su、Hi-se-ka，做猶大王ê時，A-mô͘-su ê kiáⁿ，以賽亞所得tio̍h論猶大kap耶路撒冷ê默示。Tng O͘-se-a, Iok-thán, A-hap-su, Hi-se-ka, chòe Iû-tāi ông ê sî, A-mô͘-su ê kiáⁿ, Í-sài-a só͘ tit-tio̍h lūn Iû-tāi kap Iâ-lō͘-sat-léng ê be̍k-sī.

2天ah，tio̍h聽，地ah，tio̍h俯耳孔，因為耶和華有講，我bat養飼kiáⁿ兒，培養in大漢，in竟然悖逆我。Thiⁿ ah, tio̍h thiaⁿ, tōe ah, tio̍h àⁿ hī-khang, in-ūi Iâ-hô-hoa ū kóng, Góa bat iúⁿ-chhī kiáⁿ-jî, pôe-ióng in tōa-hàn, in kéng-jiân pōe-ge̍k Góa.

3牛bat伊ê主人，驢bat伊ê主人ê槽；總是以色列m̄-bat，我ê百姓bōe曉想。Gû bat i ê chú-lâng, lû bat i ê chú-lâng ê chô; chóng-sī Í-sek-lia̍t m̄-bat, Góa ê peh-sìⁿ bōe hiáu siūⁿ.

4害ah，犯罪ê國，背罪ê百姓，行pháiⁿ ê種類，敗壞ê kiáⁿ兒；in離開耶和華，看輕以色列ê聖ê，kap伊生疏，oa̍t倒tńg去。Hāi ah, hoān-chōe ê kok, pē-chōe ê peh-sìⁿ, kiâⁿ-pháiⁿ ê chéng-lūi, pāi-hoāi ê kiáⁿ-jî; in lī-khui Iâ-hô-hoa, khòaⁿ-khin Í-sek-lia̍t ê Sèng--ê, kap I chhiⁿ-so͘, oa̍t-tò-tńg khì.

5Lín ta̍uh-ta̍uh悖逆，是ài koh受phah mah？滿頭殼已經痛疼，滿心衰弱。Lín ta̍uh-ta̍uh pōe-ge̍k, sī ài koh siū phah mah? Móa thâu-khak í-keng thàng-thiàⁿ, móa-sim soe-jio̍k.

6Tùi kha-chiah底到頭殼頂，無一塊好肉；lóng是傷嘴，烏青腫，kap新phah ê傷；lóng未有收嘴，未有包密，也無用油潤澤。Tùi kha-chioh-tóe kàu thâu-khak-téng, bô chi̍t-tè hó-bah; lóng sī siong-chhùi, o͘-chhiⁿ-chéng, kap sin-phah ê siong; lóng bē ū siu-chhùi, bē ū pau-ba̍t, iā bô ēng iû lūn-te̍k.

7Lín ê地已經拋荒；lín ê城受火燒毀；lín ê田園tī lín ê面前hō͘外邦人所侵吞；已經拋荒，親像hō͘外邦人所敗壞ê。Lín ê tōe í-keng pha-hng; lín ê siâⁿ siū hé sio-húi; lín ê chhân-hn̂g tī lín ê bīn-chêng hō͘ gōa-pang lâng só͘ chhim-thun; í-keng pha-hng, chhin-chhiūⁿ hō͘ gōa-pang lâng só͘ pāi-hoāi-ê.

8只有留錫安城，親像葡萄園ê草寮，瓜á田ê草厝，受圍困ê城。Chí-ū lâu Sek-an siâⁿ, chhin-chhiūⁿ phû-tô-hn̂g ê chháu-liâu, koe-á-chhân ê chháu-chhù, siū ûi-khùn ê siâⁿ.

9若m̄是萬軍ê耶和華kā咱留淡薄chhun ê百姓，咱就已經親像所多瑪，親像蛾摩拉一樣。Nā m̄-sī bān-kun ê Iâ-hô-hoa kā lán lâu tām-po̍h chhun ê peh-sìⁿ, lán chiū í-keng chhin-chhiūⁿ Só͘-to-má, chhin-chhiūⁿ Gô-mô͘-la̍h chi̍t-iūⁿ.

10Lín所多瑪ê官長ah，tio̍h聽耶和華ê話；lín蛾摩拉ê百姓ah，tio̍h 俯耳孔聽咱ê上帝ê教示。Lín Só͘-to-má ê koaⁿ-tiúⁿ ah, tio̍h thiaⁿ Iâ-hô-hoa ê ōe; lín Gô-mô͘-la̍h ê peh-sìⁿ ah, tio̍h àⁿ hī-khang thiaⁿ lán ê Siōng-tè ê kà-sī.

11耶和華講，Lín獻hiah-chōe祭物hō͘我有甚麼利益？公綿羊ê燒祭kap肥ê cheng-siⁿ ê油，我已經飽厭lah；牛káng ê血，羊á ê血，山羊káng ê血，我lóng無歡喜。Iâ-hô-hoa kóng, Lín hiàn hiah-chōe chè-mi̍h hō͘ Góa ū sím-mi̍h lī-ek? kang mî-iûⁿ ê sio-chè kap pûi ê cheng-siⁿ ê iû, Góa í-keng pá-ià lah; gû-káng ê huih, iûⁿ-á ê huih, soaⁿ-iûⁿ-káng ê huih, Góa lóng bô hoaⁿ-hí.

12Lín來朝見我，是誰 tùi lín討chit-ê，來thún踏我ê院ah？Lín lâi tiâu-kìⁿ Góa, chī-chūi tùi lín thó chit-ê, lâi thún-ta̍h Góa ê īⁿ ah?

13莫得koh獻空空ê禮物；香料是我所厭惡ê；月ê初一，安歇日，召集ê聚會，是行pháiⁿ；守嚴肅會我忍bōe-tiâu。Bo̍h-tit koh hiàn khang-khang ê lé-mi̍h; hiuⁿ-liāu sī Góa só͘ iàm-ò͘ⁿ--ê; ge̍h ê chhoe-it, an-hioh-ji̍t, tiàu-chi̍p ê chū-hōe, sī kiâⁿ-pháiⁿ; siú giâm-siok-hōe Góa lún-bōe-tiâu.

14Lín ta̍k月ê初一kap節期，我ê心怨恨，看伊做重擔，hō͘我擔bōe起。Lín ta̍k-ge̍h ê chhoe-it kap choeh-kî, Góa ê sim oàn-hūn, khòaⁿ i chòe tāng-tàⁿ, hō͘ Góa taⁿ-bōe-khí.

15Lín kia̍h起手，我beh掩目睭m̄看lín；lín chōe-chōe祈禱，我也m̄聽；lín ê手滿滿thâi人ê血。Lín kia̍h-khí chhiú, Góa beh ng ba̍k-chiu m̄-khòaⁿ lín; lín chōe-chōe kî-tó, Góa iā m̄-thiaⁿ; lín ê chhiú móa-móa thâi lâng ê huih.

16Lín tio̍h洗來家己清氣；tùi我ê目睭前除去lín所行ê pháiⁿ；soah lín ê做pháiⁿ；Lín tio̍h sóe lâi ka-kī chheng-khì; tùi Góa ê ba̍k-chiu-chêng tû--khì lín só͘ kiâⁿ ê pháiⁿ; soah lín ê chòe-pháiⁿ;

17學習行好，chhē公平，拯救受壓制ê，kā無父ê kiáⁿ申冤，為守寡人辯護。ha̍k-si̍p kiâⁿ-hó, chhē kong-pêng, chín-kiù siū ap-chè-ê, kā bô-pē ê kiáⁿ sin-oan, ūi chiú-kóaⁿ-lâng piān-hō͘.

18耶和華講，Lín來，咱相kap辯論；lín ê罪雖然親像朱紅，beh變白親像雪；雖然紅親像胭脂，beh白親像羊毛。Iâ-hô-hoa kóng, Lín lâi, lán saⁿ-kap piān-lūn; lín ê chōe sui-jiân chhin-chhiūⁿ chu-âng, beh piàn-pe̍h chhin-chhiūⁿ seh; sui-jiân âng chhin-chhiūⁿ ian-chi, beh pe̍h chhin-chhiūⁿ iûⁿ-mn̂g.

19Lín若甘心聽thàn，beh得tio̍h食地上ê好物。Lín nā kam-sim thiaⁿ-thàn, beh tit-tio̍h chia̍h tōe-chiūⁿ ê hó-mi̍h.

20若m̄聽thàn，反tńg悖逆，beh受刀劍吞滅；因為耶和華親嘴講伊。Nā m̄ thiaⁿ-thàn, hoán-tńg pōe-ge̍k, beh siū to-kiàm thun-bia̍t; in-ūi Iâ-hô-hoa chhin-chhùi kóng i.

21害ah，忠信ê城變做娼妓；從前充滿公平，公義tiàm hit內面；現今是兇手khiā起。Hāi ah, tiong-sìn ê siâⁿ pìⁿ-chòe chhiong-ki; chiông-chêng chhiong-móa kong-pêng, kong-gī tiàm hit lāi-bīn; hiān-kim sī hiong-siú khiā-khí.

22你ê銀變做渣滓；你ê酒thàu水。Lí ê gûn pìⁿ-chòe che-tái; lí ê chiú thàu-chúi.

23你ê官長犯法，kap賊tàu伴；ta̍k-ê ài受pò͘賂，siàu想謝禮；in無為tio̍h無父ê kiáⁿ申冤，守寡人ê案件bōe得tio̍h到伊ê面前。Lí ê koaⁿ-tiúⁿ hoān-hoat, kap chha̍t tàu-phōaⁿ; ta̍k-ê ài siū pò͘-lō͘, siàu-siūⁿ siā-lé; in bô ūi-tio̍h bô-pē ê kiáⁿ sin-oan, chiú-kóaⁿ lâng ê àn-kiāⁿ bōe tit-tio̍h kàu i ê bīn-chêng.

24因為án-ni，主，萬軍ê耶和華，以色列ê英雄ê講，Ho͘h，我beh除我ê仇讎，hō͘家己khah-ōe 安得；beh對我ê對敵來報仇。In-ūi án-ni, Chú, bān-kun ê Iâ-hô-hoa, Í-sek-lia̍t ê eng-hiông--ê kóng, Ho͘h, Góa beh tû Góa ê kiû-siû, hō͘ ka-kī khah-ōe an-tit; beh tùi Góa ê tùi-te̍k lâi pò-siû.

25我beh koh下手tī你ê身上，一盡鍛鍊你ê渣滓，除清你ê雜質。Góa beh koh hē-chhiú tī lí ê sin-chiūⁿ, it-chīn thoàn-liān lí ê che-tái, tû-chheng lí ê cha̍p-chit.

26我beh koh設立你ê審判官親像起頭，設立你ê謀士親像早日；然後你beh稱做公義ê城，忠信ê城。Góa beh koh siat-li̍p lí ê sím-phòaⁿ-koaⁿ chhin-chhiūⁿ khí-thâu, siat-li̍p lí ê bô͘-sū chhin-chhiūⁿ chá-ji̍t; jiân-āu lí beh chheng-chòe kong-gī ê siâⁿ, tiong-sìn ê siâⁿ.

27錫安beh因為公平得tio̍h救贖；in 倒tńg來ê人beh因為公義得tio̍h救贖。Sek-an beh in-ūi kong-pêng tit-tio̍h kiù-sio̍k; in tò-tńg-lâi ê lâng beh in-ūi kong-gī tit-tio̍h kiù-sio̍k.

28悖逆ê kap犯罪ê beh做一下敗壞；放sak耶和華ê，的確消滅。Pōe-ge̍k--ê kap hoān-chōe--ê beh chòe chi̍t-ē pāi-hoāi; pàng-sak Iâ-hô-hoa--ê, tek-khak siau-bia̍t.

29Hiah-ê人beh因為lín所歡喜ê橡樹來漏氣；lín beh因為所揀ê園來見笑。Hiah ê lâng beh in-ūi lín só͘ hoaⁿ-hí ê siōng-chhiū lâi làu-khùi; lín beh in-ūi só͘ kéng ê hn̂g lâi kiàn-siàu.

30因為lín beh親像葉乾去ê橡樹；beh親像無水ê園。In-ūi lín beh chhin-chhiūⁿ hio̍h ta--khì ê siōng-chhiū; beh chhin-chhiūⁿ bô chúi ê hn̂g.

31有權勢ê beh親像麻屑，伊ê所做親像火星；lóng做一下to̍h，無人phah-hoa。Ū koân-sè-ê beh chhin-chhiūⁿ môa-sut, i ê só͘-chòe chhin-chhiūⁿ hé-chhiⁿ; lóng chòe chi̍t-ē to̍h, bô lâng phah-hoa.

1A-mô͘-su ê kiáⁿ以賽亞所得tio̍h論猶大kap耶路撒冷ê默示。A-mô͘-su ê kiáⁿ Í-sài-a só͘ tit-tio̍h lūn Iû-tāi kap Iâ-lō͘-sat-léng ê be̍k-sī.

2到hiah-ê日ê了後，耶和華殿ê山beh建立tī chiah-ê山ê頂面，pôaⁿ過lóng總ê山嶺；萬國lóng beh來歸伊。Kàu hiah ê ji̍t ê liáu-āu, Iâ-hô-hoa tiān ê soaⁿ beh kiàn-li̍p tī chiah ê soaⁿ ê téng-bīn, pôaⁿ-kè lóng-chóng ê soaⁿ-niá; bān-kok lóng beh lâi kui i.

3有chōe-chōe國ê百姓beh去，講，來ah，咱上耶和華ê山，到雅各ê上帝ê殿；伊beh用伊ê道路教示咱，咱亦beh行伊ê路；因為律法beh tùi錫安出，耶和華ê話beh tùi耶路撒冷傳播。Ū chōe-chōe kok ê peh-sìⁿ beh khì, kóng, Lâi ah, lán chiūⁿ Iâ-hô-hoa ê soaⁿ, kàu Ngá-kok ê Siōng-tè ê tiān; I beh ēng I ê tō-lō͘ kà-sī lán, lán ia̍h beh kiâⁿ I ê lō͘; in-ūi lu̍t-hoat beh tùi Sek-an chhut, Iâ-hô-hoa ê ōe beh tùi Iâ-lō͘-sat-léng thoân-pò͘.

4伊beh tī列國中來審判，為tio̍h chōe-chōe百姓來解決；in beh將in ê刀phah做犁頭，將in ê鎗phah做鐮á；chit國無kia̍h刀攻擊hit國，in亦無koh學習交戰。I beh tī lia̍t-kok-tiong lâi sím-phòaⁿ, ūi-tio̍h chōe-chōe peh-sìⁿ lâi kái-koat; in beh chiong in ê to phah-chòe lôe-thâu, chiong in ê chhiuⁿ phah-chòe liâm-á; chit-kok bô kia̍h-to kong-kek hit-kok, in ia̍h bô koh ha̍k-si̍p kau-chiàn.

5雅各ê家ah，tio̍h來，咱tio̍h tī耶和華ê光明中來行。Ngá-kok ê ke ah, tio̍h lâi, lán tio̍h tī Iâ-hô-hoa ê kng-bêng-tiong lâi kiâⁿ.

6耶和華，你有放sak你ê百姓，雅各ê家，因為in充滿東方ê風俗，行邪術ê，親像腓利士人；也kap外邦人結約。Iâ-hô-hoa, Lí ū pàng-sak Lí ê peh-sìⁿ, Ngá-kok ê ke, in-ūi in chhiong-móa tang-hng ê hong-sio̍k, kiâⁿ siâ-su̍t ê, chhin-chhiūⁿ Hui-lī-sū lâng; iā kap gōa-pang lâng kiat-iok.

7伊ê地有金銀滿滿，伊ê財寶bōe算得；伊ê地有馬滿滿，伊ê車也bōe算得。I ê tōe ū kim-gûn móa-móa, i ê châi-pó bōe-sǹg--tit; i ê tōe ū bé móa-móa, i ê chhia iā bōe-sǹg--tit.

8伊ê地有偶像滿滿，in跪拜家己手所造ê，就是家己ê指頭á所做ê。I ê tōe ū ngó͘-siōng móa-móa, in kūi-pài ka-kī chhiú só͘-chō--ê, chiū-sī ka-kī ê chńg-thâu-á só͘-chòe-ê.

9卑賤ê屈落，尊貴ê降低；你莫得赦免伊。Pi-chiān--ê khut-lo̍h, chun-kùi--ê kàng-kē; Lí bo̍h-tit sià-bián i.

10你tio̍h入石洞，bih tī土裡，閃避耶和華ê顯赫kap伊威嚴ê榮光。Lí tio̍h ji̍p chio̍h-tōng, bih tī thô͘--nih, siám-pī Iâ-hô-hoa ê hián-hek kap I ui-giâm ê êng-kng.

11到hit日，目頭高ê人beh降做低，驕傲ê人beh受屈落，獨獨耶和華至尊無對。Kàu hit-ji̍t, ba̍k-thâu koâiⁿ ê lâng beh kàng chòe kē, kiau-ngō͘ ê lâng beh siū khut-lo̍h, to̍k-to̍k Iâ-hô-hoa chì-chun bû-tùi.

12因為萬軍ê耶和華有一日beh攻擊一切驕傲自高ê，kap一切升高ê，lóng降做低；In-ūi bān-kun ê Iâ-hô-hoa ū chi̍t-ji̍t beh kong-kek it-chhè kiau-ngō͘ chū-ko--ê, kap it-chhè seng-koâiⁿ--ê, lóng kàng chòe-kē;

13koh攻擊黎巴嫩一切高大ê柏香樹，kap Pa-san一切ê橡樹；koh kong-kek Lī-pa-lùn it-chhè koâiⁿ-tōa ê pek-hiuⁿ-chhiū, kap Pa-san it-chhè ê siōng-chhiū;

14koh攻擊一切ê高山，kap一切大ê山嶺。koh kong-kek it-chhè ê koâiⁿ-soaⁿ, kap it-chhè tōa ê soaⁿ-niá.

15Koh攻擊一切ê高台，kap一切堅固ê城牆；Koh kong-kek it-chhè ê koâiⁿ-tâi, kap it-chhè kian-kò͘ ê siâⁿ-chhiûⁿ;

16koh攻擊Tha-si一切ê船隻，kap一切thang意愛súi ê物。koh kong-kek Tha-si it-chhè ê chûn-chiah, kap it-chhè thang ì-ài súi ê mi̍h.

17驕傲ê人beh受屈落，自高ê人beh降做低；tī hit日獨獨耶和華至尊無對。Kiau-ngō͘ ê lâng beh siū khut-lo̍h, chū-ko ê lâng beh kàng chòe-kē; tī hit-ji̍t to̍k-to̍k Iâ-hô-hoa chì-chun bû-tùi.

18偶像beh做一下無去。Ngó͘-siōng beh chòe chi̍t-ē bô--khì.

19耶和華起來，hō͘地大振動ê時，人就入石洞，入土孔，閃避耶和華ê顯赫，kap伊威嚴ê榮光。Iâ-hô-hoa khí--lâi, hō͘ tōe tōa tín-tāng ê sî, lâng chiū ji̍p chio̍h-tōng, ji̍p thô͘-khang, siám-pī Iâ-hô-hoa ê hián-hek, kap I ui-giâm ê êng-kng.

20到hit日，人beh將所造來拜銀ê偶像，金ê偶像，hiat hō͘ 田鼠kap蜜婆。Kàu hit-ji̍t lâng beh chiong só͘-chō lâi pài gûn ê ngó͘-siōng, kim ê ngó͘-siōng, hiat hō͘ chhân-chhú kap bi̍t-pô.

21到耶和華起來，hō͘地大振動ê時，人beh入石磐縫kap山洞，閃避耶和華ê顯赫，kap伊威嚴ê榮光。Kàu Iâ-hô-hoa khí-lâi, hō͘ tōe tōa tín-tāng ê sî, lâng beh ji̍p chio̍h-pôaⁿ-phāng kap soaⁿ-tōng, siám-pī Iâ-hô-hoa ê hián-hek, kap I ui-giâm ê êng-kng.

22Lín莫得óa靠世間人，不過有一條氣tī鼻孔；thang算做甚麼ah？Lín bo̍h-tit óa-khò sè-kan lâng, put-kò ū chi̍t-tiâu khùi tī phīⁿ-khang; thang sǹg-chòe sím-mi̍h ah?

1看ah，因為主，萬軍ê耶和華，tùi耶路撒冷kap猶大除去in所óa靠ê，所依óa ê，就是所óa靠ê米糧，所óa靠ê水；Khòaⁿ ah, in-ūi Chú, bān-kun ê Iâ-hô-hoa, tùi Iâ-lō͘-sat-léng kap Iû-tāi tû--khì in só͘ óa-khò ê, só͘ i-óa ê, chiū-sī só͘ óa-khò ê bí-niû, só͘ óa-khò ê chúi;

2除去勇士，kap戰士，審判官kap先知，占卜ê kap長老；tû--khì ióng-sū, kap chiàn-sū, sím-phòaⁿ-koaⁿ kap sian-ti, chiam-pok--ê kap tiúⁿ-ló;

3五十夫長kap尊貴ê人，謀士kap khiáu ê師傅，以及gâu行法術ê。ngó͘-si̍p-hu-tióng kap chun-kùi ê lâng, bô͘-sū kap khiáu ê sai-hū, í-ki̍p gâu kiâⁿ hoat-su̍t ê.

4我beh hō͘ gín-ná做in ê領袖，hō͘嬰á管轄in。Góa beh hō͘ gín-ná chòe in ê léng-siù, hō͘ eⁿ-á koán-hat in.

5百姓beh大家相壓制，ta̍k人受厝邊ê壓制；少年人beh侮慢老人，卑賤ê人beh侮慢尊貴ê人。Peh-sìⁿ beh tāi-ke saⁿ ap-chè, ta̍k-lâng siū chhù-piⁿ ê ap-chè; siàu-liân lâng beh bú-bān lāu-lâng, pi-chiān ê lâng beh bú-bān chun-kùi ê lâng.

6人beh tī伊ê老父ê家，khiú伊ê兄弟，講，你有衣服，tio̍h做阮ê官長；chit-ê倒壞ê景況，thang歸你ê手料理。Lâng beh tī i ê lāu-pē ê ke, khiú i ê hiaⁿ-tī, kóng, Lí ū i-ho̍k, tio̍h chòe goán ê koaⁿ-tiúⁿ; chit-ê tó-hoāi ê kéng-hóng, thang kui lí ê chhiú liāu-lí.

7Hit時伊beh大聲講，我無beh做醫治lín ê；因為我ê家無米糧，也無衣服；lín m̄-thang設立我做百姓ê官長。Hit-sî i beh tōa-siaⁿ kóng, Góa bô beh chòe i-tī lín ê; in-ūi góa ê ke bô bí-niû, iā bô i-ho̍k; lín m̄-thang siat-li̍p góa chòe peh-sìⁿ ê koaⁿ-tiúⁿ.

8耶路撒冷衰敗，猶大倒壞；因為in ê嘴舌以及行做kap耶和華反對，惹tio̍h伊榮光ê目睭。Iâ-lō͘-sat-léng soe-pāi, Iû-tāi tó-hoāi; in-ūi in ê chhùi-chi̍h í-ki̍p kiâⁿ-chòe kap Iâ-hô-hoa hoán-tùi, jiá--tio̍h I êng-kng ê ba̍k-chiu.

9In ê面色干證家己ê無正直；in講起家己ê罪惡，並無隱瞞，親像所多瑪一樣。In有災厄ah，因為in家己取災害。In ê bīn-sek kan-chèng ka-kī ê bô chèng-ti̍t; in kóng-khí ka-kī ê chōe-ok, pēng-bô ún-môa, chhin-chhiūⁿ Só͘-to-má chi̍t-iūⁿ. In ū chai-ē ah, in-ūi in ka-kī chhú chai-hāi.

10論義人lín tio̍h講，伊有福氣，因為beh食家己行做所結ê果子。Lūn gī-lâng lín tio̍h kóng, I ū hok-khì, in-ūi beh chia̍h ka-kī kiâⁿ-chòe só͘ kiat ê ké-chí.

11pháiⁿ人有災厄ah，伊beh tú-tio̍h災難；因為beh照伊所行ê受報應。Pháiⁿ-lâng ū chai-ē ah, i beh tú-tio̍h chai-lān; in-ūi beh chiàu i só͘-kiâⁿ-ê siū pò-èng.

12論到我ê百姓，gín-ná壓制in，婦人人管轄in。我ê百姓ah，引chhōa你ê hō͘你行差錯，koh毀壞你所行ê道路。Lūn-kàu Góa ê peh-sìⁿ, gín-ná ap-chè in, hū-jîn-lâng koán-hat in. Góa ê peh-sìⁿ ah, ín-chhōa lí--ê hō͘ lí kiâⁿ chha-chhok, koh húi-hoāi lí só͘-kiâⁿ ê tō-lō͘.

13耶和華起來爭辯，khiā-teh審判hiah-ê百姓。Iâ-hô-hoa khí-lâi cheng-piān, khiā-teh sím-phòaⁿ hiah ê peh-sìⁿ.

14耶和華beh審問伊百姓中ê長老，kap in ê領袖，講，食了葡萄園ê果子ê就是lín；tùi sòng-hiong人所搶ê lóng tī lín ê家。Iâ-hô-hoa beh sím-mn̄g I peh-sìⁿ-tiong ê tiúⁿ-ló, kap in ê léng-siù, kóng, chia̍h-liáu phû-tô-hn̂g ê ké-chí-ê chiū-sī lín; tùi sòng-hiong lâng só͘-chhiúⁿ-ê lóng tī lín ê ke.

15Lín啥事壓制我ê百姓，掃sòng-hiong人ê面皮？這是主，萬軍ê耶和華，講ê。Lín siáⁿ-sū ap-chè Góa ê peh-sìⁿ, sàu sòng-hiong lâng ê bīn-phê? che sī Chú, bān-kun ê Iâ-hô-hoa, kóng ê.

16耶和華koh講，因為錫安hiah-ê cha-bó͘-kiáⁿ驕傲，行路頷頸伸長長，看人使目尾，liam腳行，腳環khin-khiang哮；Iâ-hô-hoa koh kóng, In-ūi Sek-an hiah ê cha-bó͘-kiáⁿ kiau-ngō͘, kiâⁿ-lō͘ ām-kún chhun tn̂g-tn̂g, khòaⁿ lâng sái ba̍k-bé, liam-kha kiâⁿ, kha-khoân khin-khiang háu;

17所以主beh hō͘錫安hiah-ê cha-bó͘-kiáⁿ臭頭堅疕；耶和華koh hō͘ in赤身露體。só͘-í Chú beh hō͘ Sek-an hiah ê cha-bó͘-kiáⁿ chhàu-thâu kian-phí; Iâ-hô-hoa koh hō͘ in chhiah-sin lō͘-thé.

18到hit日，主beh除去in súi ê腳環、頭毛網、月簪；Kàu hit-ji̍t, Chú beh tû--khì in súi ê kha-khoân, thâu-mn̂g bāng, ge̍h-chiam;

19耳環、手so̍h、罩面ê phè；hī-khoân, chhiú-so̍h, tà-bīn ê phè;

20花帽、腳鏈、花帶、香盒、苻袋；hoe-bō, kha-liān, hoe-tòa, hiuⁿ-a̍h, hû-tē;

21手指、鼻環；chhiú-chí, phīⁿ-khoân;

22禮服、外套、披肩、荷包；lé-ho̍k, gōa-thò, phi-kian, hô-pau;

23手鏡、幼苧衫、包頭ê巾，遮身軀ê phè。chhiú-kiàⁿ, iù-tōe saⁿ, pau-thâu ê kun, jia seng-khu ê phè.

24Beh有臭氣來替芳味；索á來替腰帶；頭殼光khō-khō來替súi ê頭毛；麻布hâ腰來替súi ê衣服；用火ê灸(kù)傷來替伊súi ê面貌。Beh ū chhàu-khì lâi thòe phang-bī; soh-á lâi thòe io-tòa; thâu-khak kng-khō-khō lâi thòe súi ê thâu-mn̂g; môa-pò͘ hâ-io lâi thòe súi ê i-ho̍k; ēng hé ê kù-siong lâi thòe i súi ê bīn-māu.

25你ê ta-po͘丁beh倒tī刀下；你ê勇士beh死tī戰陣。Lí ê ta-po͘-teng beh tó tī to-ē; lí ê ióng-sū beh sí tī chiàn-tīn.

26伊ê城門beh悲傷哀叫；伊beh冷靜坐tī土腳。I ê siâⁿ-mn̂g beh pi-siong ai-kiò; i beh léng-chēng chē tī thô͘-kha.