1論異象ê山谷ê默示。 有甚麼tāi-chì，hō͘你ê百姓lóng上厝頂ah？Lūn īⁿ-siōng ê soaⁿ-kok ê be̍k-sī. Ū sím-mi̍h tāi-chì, hō͘ lí ê peh-sìⁿ lóng chiūⁿ chhù-téng ah?

2你滿四界hoah-hiàm，大大喧嘩ê城，歡喜ê城ah，你中間受thâi-ê m̄是hō͘刀thâi，亦m̄是為tio̍h交戰來死。Lí móa-sì-kòe hoah-hiàm, tōa-tōa soan-hoa ê siâⁿ, hoaⁿ-hí ê siâⁿ ah, lí tiong-kan siū-thâi--ê m̄-sī hō͘ to thâi, ia̍h m̄-sī ūi-tio̍h kau-chiàn lâi sí.

3你所有ê官長做一下逃走，lóng hō͘ kia̍h弓ê人所綑縛；lín中間一切hō͘人chhē-tio̍h ê，做一下受綑縛，in本是走去遠遠ê。Lí só͘ ū ê koaⁿ-tiúⁿ chòe chi̍t-ē tô-cháu, lóng hō͘ kia̍h-keng ê lâng só͘ khún-pa̍k; lín tiong-kan it-chhè hō͘ lâng chhē--tio̍h ê, chòe chi̍t-ē siū khún-pa̍k, in pún sī cháu-khì hn̄g-hn̄g--ê.

4所以我講，Lín oa̍t走無看我，我beh痛心啼哭；莫得因為我ê百姓受毀壞，來勉強安慰我。Só͘-í góa kóng, Lín oa̍t-cháu bô khòaⁿ góa, góa beh thòng-sim thî-khàu; bo̍h-tit in-ūi góa ê peh-sìⁿ siū húi-hoāi, lâi bián-kióng an-ùi góa.

5因為主，萬軍ê耶和華，hō͘異象ê山谷有攪擾thún踏迷亂ê日，城tú-tio̍h攻破，哀叫ê聲透到山間。In-ūi Chú, bān-kun ê Iâ-hô-hoa, hō͘ īⁿ-siōng ê soaⁿ-kok ū kiáu-jiáu thún-ta̍h bê-loān ê ji̍t, siâⁿ tú-tio̍h kong-phòa, ai-kiò ê siaⁿ thàu-kàu soaⁿ-kan.

6Í-lân帶箭袋，koh有載兵ê車kap馬兵；Kiat-jíⁿ the̍h出藤牌。Í-lân tòa chìⁿ-tē, koh ū chài-peng ê chhia kap bé-peng; Kiat-jíⁿ the̍h-chhut tîn-pâi.

7你súi ê山谷，戰車滿滿，亦有馬兵tī城門前排列。Lí súi ê soaⁿ-kok, chiàn-chhia móa-móa, ia̍h ū bé-peng tī siâⁿ-mn̂g chêng pâi-lia̍t.

8伊除去猶大ê jia遮；hit日你就查看軍裝局ê軍器；I tû-khì Iû-tāi ê jia-cha̍h; hit-ji̍t lí chiū chhâ-khòaⁿ kun-chong-ke̍k ê kun-khì;

9lín看見大衛ê城ê破隙真chōe；就積聚下池ê水。lín khòaⁿ-kìⁿ Tāi-pi̍t ê siâⁿ ê phòa-khiah chin-chōe; chiū chek-chū ē-tî ê chúi.

10Koh算耶路撒冷ê厝宅，將厝拆毀來修補城牆。Koh sǹg Iâ-lō͘-sat-léng ê chhù-the̍h, chiong chhù thiah-húi lâi siu-pó͘ siâⁿ-chhiûⁿ.

11Koh tī兩個牆ê中間開一個潭，來貯舊池ê水；總是lín無仰望做伊ê，也無想tio̍h tùi古早成伊ê。Koh tī nn̄g ê chhiûⁿ ê tiong-kan khui chi̍t ê thâm, lâi tóe kū-tî ê chúi; chóng-sī lín bô gióng-bōng chòe i ê, iā bô siūⁿ-tio̍h tùi kó͘-chá chiâⁿ i ê.

12當hit日，主萬軍ê耶和華kah人啼哭，哀傷剃頭毛，hâ麻布；Tng hit-ji̍t Chú bān-kun ê Iâ-hô-hoa kah lâng thî-khàu, ai-siong thì thâu-mn̂g, hâ môa-pò͘;

13看ah，有歡喜快樂，thâi牛倒羊，食肉lim酒，講，做咱食做咱lim，因為明á日beh死lah。khòaⁿ ah, ū hoaⁿ-hí khoài-lo̍k, thâi-gû tó iûⁿ, chia̍h-bah lim-chiú, kóng, Chòe lán chia̍h chòe lán lim, in-ūi bîn-á-ji̍t beh sí--lah.

14萬軍ê耶和華對我ê耳孔指示我，講，Lín chit-ê罪決斷bōe赦免得，直到lín死；這是主，萬軍ê耶和華講ê。Bān-kun ê Iâ-hô-hoa tùi góa ê hī-khang chí-sī góa, kóng, Lín chit ê chōe koat-toàn bōe sià-bián--tit, ti̍t-kàu lín sí; che sī Chú, bān-kun ê Iâ-hô-hoa kóng ê.

15主，萬軍ê耶和華，án-ni講，去ah，你去見chit-ê掌庫房ê ，就是管家ê Siā-pek-ná，對伊講你tī-chia啥事？Chú, bān-kun ê Iâ-hô-hoa, án-ni kóng, Khì ah, lí khì kìⁿ chit ê chiáng khò͘-pâng ê , chiū-sī koán-ke ê Siā-pek-ná, tùi i kóng Lí tī-chia siáⁿ-sū?

16你tī-chia有甚麼人，hō͘你tī-chia為tio̍h家己phah墳墓？伊tī高ê所在為家己phah墳墓，為家己tī石磐造一個khiā起ê所在。Lí tī-chia ū sím-mi̍h lâng, hō͘ lí tī-chia ūi-tio̍h ka-kī phah hûn-bōng? I tī koâiⁿ ê só͘-chāi ūi ka-kī phah hûn-bōng, ūi ka-kī tī chio̍h-pôaⁿ chō chi̍t ê khiā-khí ê só͘-chāi.

17看ah，耶和華beh親像大力ê人盡力kā你血氣；也beh kā你包密密；伊beh將你捲成一捲，hiat tī開闊ê所在親像hiat球。Khòaⁿ ah, Iâ-hô-hoa beh chhin-chhiūⁿ tōa-la̍t ê lâng chīn-la̍t kā lí hiat--khì; iā beh kā lí pau ba̍t-ba̍t; I beh chiong lí kńg chiâⁿ chi̍t-kńg, hiat tī khui-khoah ê só͘-chāi chhin-chhiūⁿ hiat kiû.

18你做主人ê家ê凌辱ê，beh死tī-hia；你榮光ê車也beh tī-hia。Lí chòe chú-lâng ê ke ê lêng-jio̍k--ê, beh sí tī-hia; lí êng-kng ê chhia iā beh tī-hia.

19我beh革你ê職，lut你ê位。Góa beh kek lí ê chit, lut lí ê ūi.

20到hit日，我beh召我ê奴僕，Hi-le̍k-ka ê kiáⁿ Í-lī-a-kèng，來；Kàu hit-ji̍t Góa beh tiàu Góa ê lô͘-po̍k, Hi-le̍k-ka ê kiáⁿ Í-lī-a-kèng, lâi;

21我beh將你ê外袍hō͘伊穿，將你ê腰帶hō͘伊hâ，將你ê政事ê權，交伊ê手；伊beh做耶路撒冷khiā起ê百姓kap猶大ê家ê父。Góa beh chiong lí ê gōa-phàu hō͘ i chhēng, chiong lí ê io-tòa hō͘ i hâ, chiong lí ê chèng-sū ê koân, kau i ê chhiú; i beh chòe Iâ-lō͘-sat-léng khiā-khí ê peh-sìⁿ kap Iû-tāi ê ke ê pē.

22我beh將大衛ê家ê choān匙tī伊ê肩頭；伊開，就無人會關，伊關，就無人會開。Góa beh chiong Tāi-pi̍t ê ke ê choān-sî hē tī i ê keng-thâu; i khui, chiū bô lâng ōe koaiⁿ, i koaiⁿ, chiū bô lâng ōe khui.

23我beh建立伊親像釘釘tī堅固ê所在；伊beh kā伊ê老父ê家做榮光ê座位。Góa beh kiàn-li̍p i chhin-chhiūⁿ teng tèng tī kian-kò͘ ê só͘-chāi; i beh kā i ê lāu-pē ê ke chòe êng-kng ê chō-ūi.

24人beh將伊ê老父ê家chiah-ê榮光kiáⁿ kap孫，凡若器具ê細ê，tùi盤到瓶ê器具，lóng吊tī伊ê頂面。Lâng beh chiong i ê lāu-pē ê ke chiah ê êng-kng kiáⁿ kap sun, hoān-nā khì-kū ê sòe-ê, tùi pôaⁿ kàu pân ê khì-kū, lóng tiàu tī i ê téng-bīn.

25萬軍ê耶和華講，當hit日，釘tī堅固ê所在ê燈beh垂落去；beh受剉斷ka-la̍uh去，召tī伊ê頂面ê物beh無去；因為這是耶和華講ê。Bān-kun ê Iâ-hô-hoa kóng, Tng hit-ji̍t tèng tī kian-kò͘ ê só͘-chāi ê teng beh sê--lo̍h-khì; beh siū chhò-tn̄g ka-la̍uh lo̍h-khì, tiàu tī i ê téng-bīn ê mi̍h beh bô--khì; in-ūi che sī Iâ-hô-hoa kóng ê.

1論Chhui-lô ê默示。 Tha-si ê船ah，lín tio̍h哀哭，因為Chhui-lô已經拋荒lah，甚至無厝宅，也無teh出入；tùi Ki-thê ê地方有報in chit-ê消息。Lūn Chhui-lô ê be̍k-sī. Tha-si ê chûn ah, lín tio̍h ai-khàu, in-ūi Chhui-lô í-keng pha-hng lah, sīm-chì bô chhù-the̍h, iā bô teh chhut-ji̍p; tùi Ki-thê ê tōe-hng ū pò in chit ê siau-sit.

2海墘khiā起ê百姓ah，早時Se-tùn ê seng-lí人過海hō͘ lín得tio̍h昌盛，taⁿ lín tio̍h靜靜無話。Hái-kîⁿ khiā-khí ê peh-sìⁿ ah, chá-sî Se-tùn ê seng-lí lâng kè-hái hō͘ lín tit-tio̍h chhiong-sēng, taⁿ lín tio̍h chēng-chēng bô ōe.

3Tī大水ê頂面，Se-hat ê米糧，尼羅河ê五穀是Chhui-lô所進入ê，伊做列國ê埠頭。Tī tōa-chúi ê téng-bīn, Se-hat ê bí-niû, Nî-lô hô ê ngó͘-kok sī Chhui-lô só͘ chìn-ji̍p--ê, i chòe lia̍t-kok ê po͘-thâu.

4Se-tùn ah，你tio̍h見笑，因為大海講，就是海墘ê衛所講，我無懷孕，也無有生kiáⁿ，無有養飼ta-po͘-kiáⁿ也無有撫養在室女。Se-tùn ah, lí tio̍h kiàn-siàu, in-ūi tōa-hái kóng, chiū-sī hái-kîⁿ ê ōe-só͘ kóng, Góa bô hoâi-īn, iā bô ū siⁿ-kiáⁿ, bô ū iúⁿ-chhī ta-po͘-kiáⁿ iā bô ū bú-ióng chāi-sek-lú.

5Chit-ê風聲傳到埃及，in beh為tio̍h Chhui-lô ê風聲極其痛疼。Chit ê hong-siaⁿ thoân kàu Ai-ki̍p, in beh ūi-tio̍h Chhui-lô ê hong-siaⁿ ke̍k-kî thàng-thiàⁿ.

6Lín tio̍h過去Tha-si；海墘khiā起ê百姓ah，lín tio̍h哀哭。Lín tio̍h kè-khì Tha-si; hái-kîⁿ khiā-khí ê peh-sìⁿ ah, lín tio̍h ai-khàu.

7這是lín快樂ê城mah？伊ê頂世代就是tùi古早以來，伊ê腳bat徙伊到遠遠khiā起。Che sī lín khoài-lo̍k ê siâⁿ mah? i ê téng sè-tāi chiū-sī tùi kó͘-chá í-lâi, i ê kha bat sóa i kàu hn̄g-hn̄g khiā-khí.

8Chī-chūi定tio̍h chit-ê意思攻擊Chhui-lô ah？伊本是發出冕旒ê，伊ê seng-lí人是王親，伊ê買賣ê是世上ê貴族。Chī-chūi tiāⁿ-tio̍h chit ê ì-sù kong-kek Chhui-lô ah? i pún sī hoat-chhut bián-liû ê, i ê seng-lí-lâng sī ông-chhin, i ê bóe-bōe-ê sī sè-chiūⁿ ê kùi-cho̍k.

9萬軍ê耶和華定tio̍h伊，beh凌辱一切榮光ê驕傲，hō͘世上一切ê貴族tú-tio̍h看輕。Bān-kun ê Iâ-hô-hoa tiāⁿ-tio̍h i, beh lêng-jio̍k it-chhè êng-kng ê kiau-ngō͘, hō͘ sè-chiūⁿ it-chhè ê kùi-cho̍k tú-tio̍h khòaⁿ-khin.

10Tha-si ê百姓ah，你tio̍h遍行你ê地方親像尼羅河，無koh有拘束。Tha-si ê peh-sìⁿ ah, lí tio̍h piàn-kiâⁿ lí ê tōe-hng chhin-chhiūⁿ Nî-lô hô, bô koh ū khu-sok.

11伊已經伸伊ê手tī海裡，hō͘列國振動。論到迦南，耶和華bat吩咐tio̍h毀壞伊ê衛所。I í-keng chhun I ê chhiú tī hái--nih, hō͘ lia̍t-kok tín-tāng. Lūn-kàu Ka-lâm, Iâ-hô-hoa bat hoan-hù tio̍h húi-hoāi i ê ōe-só͘.

12伊講，你受凌辱ê在室女，Se-tùn ê cha-bó͘-kiáⁿ ah，你的確無koh得tio̍h快樂lah；起來過去Ki-thê，就tī-hia也無得tio̍h安歇。I kóng, Lí siū lêng-jio̍k ê chāi-sek-lú, Se-tùn ê cha-bó͘-kiáⁿ ah, lí tek-khak bô koh tit-tio̍h khoài-lo̍k lah; khí-lâi kè--khì Ki-thê, chiū tī-hia iā bô tit-tio̍h an-hioh.

13看ah，Ka-le̍k-tí人ê地，chit-ê百姓taⁿ無lah；亞述人hō͘伊做野獸khiā起ê所在；in起in ê守更樓毀壞in ê宮殿，hō͘伊做拋荒。Khòaⁿ ah, Ka-le̍k-tí lâng ê tōe, chit ê peh-sìⁿ taⁿ bô--lah; A-su̍t lâng hō͘ i chòe iá-siù khiā-khí ê só͘-chāi; in khí in ê chiú-kiⁿ-lâu húi-hoāi in ê keng-tiān, hō͘ i chòe pha-hng.

14Tha-si ê船隻ah，lín tio̍h哀哭；因為lín ê衛所變做拋荒ê所在。Tha-si ê chûn-chiah ah, lín tio̍h ai-khàu; in-ūi lín ê ōe-só͘ pìⁿ-chòe pha-hng ê só͘-chāi.

15當hit日，Chhui-lô beh hō͘人bōe記得歷過七十年，照一個王ê日子；七十年後Chhui-lô ê景況beh親像妓女所唱ê歌。Tng hit-ji̍t Chhui-lô beh hō͘ lâng bōe-kì--tit le̍k-kè chhit-cha̍p nî, chiàu chi̍t ê ông ê ji̍t-chí; chhit-cha̍p nî āu Chhui-lô ê kéng-hóng beh chhin-chhiūⁿ kī-lú só͘ chhiùⁿ ê koa.

16你chit-ê hō͘人bōe記得ê妓女ah，the̍h琴四界行城內；彈好聽，唱chōe-chōe，hō͘人koh記得你。Lí chit ê hō͘ lâng bōe-kì--tit ê kī-lú ah, the̍h khîm sì-kòe kiâⁿ siâⁿ-lāi; tôaⁿ hó-thiaⁿ, chhiùⁿ chōe-chōe, hō͘ lâng koh kì-tit lí.

17七十年後，耶和華beh眷顧Chhui-lô，伊就beh koh thàn錢，kap世上ê萬國kau-koan。Chhit-cha̍p nî āu, Iâ-hô-hoa beh koàn-kò͘ Chhui-lô, i chiū beh koh thàn chîⁿ, kap sè-chiūⁿ ê bān-kok kau-koan.

18伊ê貨物kap所thàn ê錢beh做聖，歸hō͘耶和華，無beh khǹg-teh，無beh積聚；因為伊ê貨物beh hō͘ tiàm tī耶和華面前ê人，hō͘ in食飽，koh穿擋得久久ê衫。I ê hè-mi̍h kap só͘ thàn ê chîⁿ beh chòe sèng, kui hō͘ Iâ-hô-hoa, bô beh khǹg--teh, bô beh chek-chū; in-ūi i ê hè-mi̍h beh hō͘ tiàm tī Iâ-hô-hoa bīn-chêng ê lâng, hō͘ in chia̍h-pá, koh chhēng tòng--tit kú-kú ê saⁿ.

1看ah，耶和華hō͘地空虛，變做拋荒，koh將大地翻lìn-tńg，hō͘ khiā起ê百姓四散。Khòaⁿ ah, Iâ-hô-hoa hō͘ tōe khang-hu, pìⁿ-chòe pha-hng, koh chiong tōa-tōe hoan-lìn-tńg, hō͘ khiā-khí ê peh-sìⁿ sì-sòaⁿ.

2Hit時百姓怎樣，祭司亦是án-ni；奴僕怎樣，主人亦是án-ni；女婢怎樣，主母亦是án-ni；買物ê怎樣，賣物ê亦是án-ni；放債ê怎樣，借債ê亦是án-ni；the̍h利息ê怎樣，出利息ê亦是án-ni。Hit-sî peh-sìⁿ cháiⁿ-iūⁿ, chè-si ia̍h-sī án-ni; lô͘-po̍k cháiⁿ-iūⁿ, chú-lâng ia̍h-sī án-ni; lú-pī cháiⁿ-iūⁿ, chú-bú ia̍h-sī án-ni; bóe-mi̍h--ê cháiⁿ-iūⁿ, bōe-mi̍h--ê ia̍h-sī án-ni; pàng-chè--ê cháiⁿ-iūⁿ, chioh-chè-ê ia̍h-sī án-ni; the̍h lī-sek--ê cháiⁿ-iūⁿ, chhut lī-sek--ê ia̍h-sī án-ni.

3地beh做一下空虛，lóng tú-tio̍h搶劫；因為chit-ê話是耶和華講ê。Tōe beh chòe-chi̍t-ē khang-hu, lóng tú-tio̍h chhiúⁿ-kiap; in-ūi chit ê ōe sī Iâ-hô-hoa kóng--ê.

4地上悲哀衰退，世界腐敗衰退，地上tiàm-tī高位ê人亦腐敗。Tōe-chiūⁿ pi-ai soe-thè, sè-kài hú-pāi soe-thè, tōe-chiūⁿ tiàm-tī koâiⁿ-ūi ê lâng ia̍h hú-pāi.

5地hō͘ khiā起hit-ê頂面ê百姓phah lâ-sâm，因為in犯tio̍h hiah-ê律法，廢無律例，悖謬永遠ê約。Tōe hō͘ khiā-khí hit ê téng-bīn ê peh-sìⁿ phah lâ-sâm, in-ūi in hoān-tio̍h hiah ê lu̍t-hoat, hòe-bô lu̍t-lē, pōe-biū éng-oán ê iok.

6所以地hō͘咒詛吞滅，khiā起tī hit頂面ê受擬罪；地上khiā起ê百姓受燒，所chhun ê人少少。Só͘-í tōe hō͘ chiù-chó͘ thun-bia̍t, khiā-khí tī hit téng-bīn--ê siū gí-chōe; tōe-chiūⁿ khiā-khí ê peh-sìⁿ siū-sio, só͘-chhun ê lâng chió-chió.

7新ê酒悲哀，葡萄樹毀壞；心內快樂ê lóng總吐氣。Sin ê chiú pi-ai, phû-tô-chhiū húi-hoāi; sim-lāi khoài-lo̍k--ê lóng-chóng thó͘-khùi.

8Phah鼓ê快樂靜靜，宴樂ê ê聲音lóng soah；彈琴ê快樂亦靜靜。Phah-kó͘ ê khoài-lo̍k chēng-chēng, iàn-lo̍k--ê ê siaⁿ-im lóng soah; tôaⁿ-khîm ê khoài-lo̍k ia̍h chēng-chēng.

9In bōe得tio̍h唱歌lim酒；厚酒對tī lim ê人beh成做苦。In bōe tit-tio̍h chhiùⁿ-koa lim-chiú; kāu-chiú tùi tī lim ê lâng beh chiâⁿ-chòe khó͘.

10拋荒ê城已經拆毀；ta̍k間厝lóng關門，人lóng bōe得入。Pha-hng ê siâⁿ í-keng thiah-húi; ta̍k-keng chhù lóng koaiⁿ-mn̂g, lâng lóng bōe-tit ji̍p.

11Tī街路因為酒有悲哀ê聲；一切ê歡喜變做烏暗，地上ê快樂lóng無去。Tī ke-lō͘ in-ūi chiú ū pi-ai ê siaⁿ; it-chhè ê hoaⁿ-hí pìⁿ-chòe o͘-àm, tōe-chiūⁿ ê khoài-lo̍k lóng bô--khì.

12城內已經拋荒，城門lóng毀壞。Siâⁿ-lāi í-keng pha-hng, siâⁿ-mn̂g lóng húi-hoāi.

13因為tī地上，萬百姓ê中間，beh親像phah過了ê橄欖樹，koh親像葡萄挽了iáu chhun-ê一樣。In-ūi tī tōe-chiūⁿ, bān peh-sìⁿ ê tiong-kan, beh chhin-chhiūⁿ phah-kè-liáu ê kaⁿ-ná-chhiū, koh chhin-chhiūⁿ phû-tô bán-liáu iáu chhun--ê chi̍t-iūⁿ.

14Chiah-ê人beh出大聲，beh歡喜叫；in為tio̍h耶和華ê威嚴，tùi海裡來喉叫。Chiah ê lâng beh chhut tōa-siaⁿ, beh hoaⁿ-hí kiò; in ūi-tio̍h Iâ-hô-hoa ê ui-giâm, tùi hái--nih lâi âu-kiò.

15因為án-ni lín tio̍h tī東方榮光耶和華；tī chiah-ê海嶼榮光耶和華以色列上帝ê名。In-ūi án-ni lín tio̍h tī tang-hng êng-kng Iâ-hô-hoa; tī chiah ê hái-sū êng-kng Iâ-hô-hoa Í-sek-lia̍t Siōng-tè ê miâ.

16阮聽見tùi地極有人唱歌，講，榮光歸tī義ê人。總是我講，我消滅lah，我消滅lah；我有災厄ah，詭詐ê行詭詐，詭詐ê大行詭詐。Goán thiaⁿ-kìⁿ tùi tōe-ke̍k ū lâng chhiùⁿ-koa, kóng, Êng-kng kui tī gī ê lâng. Chóng-sī góa kóng, Góa siau-bia̍t lah, góa siau-bia̍t lah; góa ū chai-ē ah, khúi-chà--ê kiâⁿ khúi-chà, khúi-chà-ê tōa kiâⁿ khúi-chà.

17地上khiā起ê百姓ah，驚惶、陷坑、活tauh lóng臨到你。Tōe-chiūⁿ khiā-khí ê peh-sìⁿ ah, kiaⁿ-hiâⁿ, hām-khiⁿ, oa̍h-tauh lóng lîm-kàu lí.

18閃避驚惶ê聲ê，beh跋落陷坑；tùi陷坑起來ê beh hō͘活tauh tauh-tio̍h；因為天頂ê窗á lóng開，地ê根基亦振動。Siám-pī kiaⁿ-hiâⁿ ê siaⁿ--ê, beh poa̍h-lo̍h hām-khiⁿ; tùi hām-khiⁿ khí-lâi--ê beh hō͘ oa̍h-tauh tauh-tio̍h; in-ūi thiⁿ-téng ê thang-á lóng khui, tōe ê kun-ki ia̍h tín-tāng.

19地做一下破壞，地一盡崩裂，地大大搖choah。Tōe chòe chi̍t-ē phò-hoāi, tōe it-chīn pang-li̍h, tōe tōa-tōa iô-choah.

20地beh顛顛倒倒，親像酒醉ê人；koh搖來搖去，親像吊床；罪過重重teh-in，的確倒落去，bōe能koh起來。Tōe beh tian-tian tó-tó, chhin-chhiūⁿ chiú-chùi ê lâng; koh iô-lâi iô-khì, chhin-chhiūⁿ tiàu-chhn̂g; chōe-kòa tāng-tāng teh--in, tek-khak tó--lo̍h-khì, bōe-ōe koh khí-lâi.

21到hit日，耶和華tī高ê所在責罰高ê所在ê眾軍兵；tī地上beh責罰地上ê列王。Kàu hit-ji̍t Iâ-hô-hoa tī koâiⁿ ê só͘-chāi chek-hoa̍t koâiⁿ ê só͘-chāi ê chèng kun-peng; tī tōe-chiūⁿ beh chek-hoa̍t tōe-chiūⁿ ê lia̍t-ông.

22In beh受聚集，親像犯人受聚集tī陷坑；亦beh受關tī監內；chōe-chōe日了後，就beh有臨到in-ê。In beh siū chū-chi̍p, chhin-chhiūⁿ hoān-lâng siū chū-chi̍p tī hām-khiⁿ; ia̍h beh siū koaiⁿ tī kaⁿ-lāi; chōe-chōe ji̍t liáu-āu, chiū beh ū lîm-kàu in--ê.

23Hit時月beh見笑，日beh漏氣；因為萬軍ê耶和華beh tī錫安山tī耶路撒冷做王，tī伊ê長老ê面前beh有榮光。Hit-sî ge̍h beh kiàn-siàu, ji̍t beh làu-khùi; in-ūi bān-kun ê Iâ-hô-hoa beh tī Sek-an soaⁿ tī Iâ-lō͘-sat-léng chòe-ông, tī I ê tióng-ló ê bīn-chêng beh ū êng-kng.