1當hit日，tī猶大地，人的確唱chit-ê歌，講，阮有堅固ê城；祂beh用救恩立做城牆，做外重城。Tng hit-ji̍t tī Iû-tāi tōe, lâng tek-khak chhiùⁿ chit ê koa, kóng, Goán ū kian-kò͘ ê siâⁿ; I beh ēng kiù-un li̍p chòe siâⁿ-chhiûⁿ, chòe gōa-têng-siâⁿ.

2Tio̍h開chiah-ê門，hō͘守信實義ê百姓得tio̍h進入。Tio̍h khui chiah ê mn̂g, hō͘ siú sìn-si̍t gī ê peh-sìⁿ tit-tio̍h chìn-ji̍p.

3堅心óa靠你ê，你beh保守伊十分平安，因為伊óa靠你。Kian-sim óa-khò Lí ê, Lí beh pó-siú i cha̍p-hun pêng-an, in-ūi i óa-khò Lí.

4Lín tio̍h óa靠耶和華直到永遠；因為主耶和華是永遠ê石磐。Lín tio̍h óa-khò Iâ-hô-hoa ti̍t-kàu éng-oán; in-ūi Chú Iâ-hô-hoa sī éng-oán ê chio̍h-pôaⁿ.

5祂hō͘ tiàm tī高ê所在ê kap高ê城做一下敗落去；祂beh chhia倒伊tī地裡，落到塵埃。I hō͘ tiàm tī koâiⁿ ê só͘-chāi--ê kap koâiⁿ ê siâⁿ chòe chi̍t-ē pāi--lo̍h-khì; I beh chhia-tó i tī tōe--nih, lo̍h kàu tîn-ai.

6腳beh thún踏伊，就是sòng-hiong人ê腳，困苦ê人ê腳步。Kha beh thún-ta̍h i, chiū-sī sòng-hiong lâng ê kha, khùn-khó͘ ê lâng ê kha-pō͘.

7義人路是正直；你正直ê ah，修平義人ê路。Gī-lâng lō͘ sī chèng-ti̍t; Lí chèng-ti̍t--ê ah, siu-pîⁿ gī-lâng ê lō͘.

8耶和華ah，阮tī祢審判ê路thèng候祢；阮ê心所欣慕ê，是祢ê名kap記念祢。Iâ-hô-hoa ah, goán tī Lí sím-phòaⁿ ê lō͘ thèng-hāu Lí; goán ê sim só͘ him-bō͘--ê, sī Lí ê miâ kap kì-liām Lí.

9我用我ê心暝間欣慕祢；亦用我ê神天光早chhē祢；因為祢審判世上ê時，就地上ê百姓beh學習義。Góa ēng góa ê sim mî-kan him-bō͘ Lí; ia̍h ēng góa ê sîn thiⁿ-kng-chá chhē Lí; in-ūi Lí sím-phòaⁿ sè-chiūⁿ ê sî, chiū tōe-chiūⁿ ê peh-sìⁿ beh ha̍k-si̍p gī.

10用恩惠款待pháiⁿ人，伊猶原m̄學習義；tī正直ê地方，伊beh行不義，亦無注意耶和華ê威嚴。Ēng un-hūi khoán-thāi pháiⁿ-lâng, i iû-goân m̄ ha̍k-si̍p gī; tī chèng-ti̍t ê tōe-hng, i beh kiâⁿ put-gī, ia̍h bô chù-ì Iâ-hô-hoa ê ui-giâm.

11耶和華ah，祢ê手kia̍h高，in猶原m̄看；in beh看見祢為tio̍h百姓ê熱心來見笑；koh有火燒滅祢ê對敵。Iâ-hô-hoa ah, Lí ê chhiú kia̍h-koâiⁿ, in iû-goân m̄-khòaⁿ; in beh khòaⁿ-kìⁿ Lí ūi-tio̍h peh-sìⁿ ê jia̍t-sim lâi kiàn-siàu; koh ū hé sio-bia̍t Lí ê tùi-te̍k.

12耶和華ah，祢beh註定阮得tio̍h平安，因為阮所做一切ê事，lóng是祢kā阮成ê。Iâ-hô-hoa ah, Lí beh chù-tiāⁿ goán tit-tio̍h pêng-an, in-ūi goán só͘ chòe it-chhè ê sū, lóng sī Lí kā goán chiâⁿ-ê.

13耶和華阮ê上帝ah，祢以外bat有別ê主管轄阮；總是阮beh專專óa靠祢，記念祢ê名。Iâ-hô-hoa goán ê Siōng-tè ah, Lí í-gōa bat ū pa̍t ê chú koán-hat goán; chóng-sī goán beh choan-choan óa-khò Lí, kì-liām Lí ê miâ.

14In死了的確bōe能koh活；in ê陰魂bōe koh起來；因為祢臨到in，剿滅in，hō͘ in ê名lóng無去。In sí-liáu tek-khak bōe-ōe koh-oa̍h; in ê im-hûn bōe koh khí-lâi; in-ūi Lí lîm-kàu in, châu-bia̍t in, hō͘ in ê miâ lóng bô--khì.

15耶和華ah，祢加添國民，祢加添國民；祢得tio̍h榮光；koh開闊chit-ê地四面ê境界。Iâ-hô-hoa ah, Lí ke-thiⁿ kok-bîn, Lí ke-thiⁿ kok-bîn; Lí tit-tio̍h êng-kng; koh khui-khoah chit ê tōe sì-bīn ê kéng-kài.

16耶和華ah，in tī患難中chhē祢；祢ê境界到in身上，in就拚心祈禱祢。Iâ-hô-hoa ah, in tī hoān-lān-tiong chhē Lí; Lí ê kéng-kài kàu in sin-chiūⁿ, in chiū piàⁿ-sim kî-tó Lí.

17親像婦人人懷孕，beh生ê時，就攪絞，tī痛苦ê時喉叫；耶和華ah，阮tī祢ê面前亦是án-ni。Chhin-chhiūⁿ hū-jîn-lâng hoâi-īn, beh siⁿ ê sî, chiū kiáu-ká, tī thòng-khó͘ ê sî âu-kiò; Iâ-hô-hoa ah, goán tī Lí ê bīn-chêng ia̍h sī án-ni.

18阮亦bat懷孕bat 攪絞，所生ê竟然親像風；阮tī地裡bē-bat行甚麼拯救ê事；世上khiā起ê百姓亦無跋落。Goán ia̍h bat hoâi-īn bat kiáu-ká, só͘-siⁿ--ê kéng-jiân chhin-chhiūⁿ hong; goán tī tōe--nih bē-bat kiâⁿ sím-mi̍h chín-kiù ê sū; sè-chiūⁿ khiā-khí ê peh-sìⁿ ia̍h bô poa̍h-lo̍h.

19祢ê死人beh koh活；我chiah-ê身屍beh koh起來；倒tī塵埃ê ah，lín tio̍h精神起來唱歌；因為祢ê露水親像草菜頂ê露水，地亦beh交出陰魂。Lí ê sí-lâng beh koh-oa̍h; góa chiah ê sin-si beh koh khí--lâi; tó tī tîn-ai--ê ah, lín tio̍h cheng-sîn khí-lâi chhiùⁿ-koa; in-ūi Lí ê lō͘-chúi chhin-chhiūⁿ chháu-chhài-téng ê lō͘-chúi, tōe ia̍h beh kau-chhut im-hûn.

20我ê百姓ah，lín tio̍h入密房關你ê門，bih tiap-á久，thèng候受氣過去。Góa ê peh-sìⁿ ah, lín tio̍h ji̍p ba̍t-pâng koaiⁿ lí ê mn̂g, bih tiap-á-kú, thèng-hāu siū-khì kè-khì.

21因為耶和華tùi祂ê所在出來，beh刑罰地上khiā起ê百姓ê罪惡；地亦beh露出伊所有ê血，無koh遮蓋受thâi ê人。In-ūi Iâ-hô-hoa tùi I ê só͘-chāi chhut-lâi, beh hêng-hoa̍t tōe-chiūⁿ khiā-khí ê peh-sìⁿ ê chōe-ok; tōe ia̍h beh lō͘-chhut i só͘ ū ê huih, bô koh jia-khàm siū-thâi ê lâng.

1到hit日，耶和華beh用伊剛硬有力ê大支刀刑罰鱷魚，就是hit號gâu走ê蛇，刑罰鱷魚就是hit號彎彎oat-oat ê蛇；亦beh thâi死海中ê靈。Kàu hit-ji̍t Iâ-hô-hoa beh ēng I kong-ngī ū-la̍t ê tōa ki to hêng-hoa̍t go̍k-hî, chiū-sī hit-hō gâu-cháu ê chôa, hêng-hoa̍t go̍k-hî chiū-sī hit-hō oan-oan oat-oat ê chôa; ia̍h beh thâi-sí hái-tiong ê lêng.

2當hit日，有出好酒ê葡萄園，lín tio̍h kí chit-ê園唱歌，Tng hit-ji̍t ū chhut hó-chiú ê phû-tô-hn̂g, lín tio̍h kí chit ê hn̂g chhiùⁿ-koa,

3講，我耶和華是顧守葡萄園ê；我時刻灌ak伊，暝日顧守伊，免得人損害伊。kóng, Góa Iâ-hô-hoa sī kò͘-siú phû-tô-hn̂g--ê; Góa sî-khek koàn-ak i, mî-ji̍t kò͘-siú i, bián-tit lâng sún-hāi i.

4我無存受氣；願有刺phè蒺藜kap我交戰，我就好膽進前去chhē伊，kā伊做一下燒去。Góa bô chûn siū-khì; goān ū chhì-phè chi̍t-lê kap Góa kau-chiàn, Góa chiū hó-táⁿ chìn-chêng khì chhē i, kā i chòe chi̍t-ē sio--khì.

5若無án-ni，hō͘伊擒tio̍h我ê能力，來kap我和好；願伊kap我和好。Nā-bô án-ni, hō͘ i khîⁿ-tio̍h Góa ê lêng-le̍k, lâi kap Góa hô-hó; goān i kap Góa hô-hó.

6將來雅各beh釘伊ê根，以色列beh發芽開花；in ê果子beh充滿世界。Chiong-lâi Ngá-kok beh tèng i ê kun, Í-sek-lia̍t beh hoat-gê khui-hoe; in ê ké-chí beh chhiong-móa sè-kài.

7主phah伊，kiám親像phah hiah-ê bat phah伊ê人mah？伊受thâi，kiám親像hiah-ê thâi伊ê ê受thâi mah？Chú phah i, kiám chhin-chhiūⁿ phah hiah-ê bat phah-i ê lâng mah? i siū-thâi, kiám chhin-chhiūⁿ hiah-ê thâi-i--ê ê siū-thâi mah?

8你差in去，是照所合宜kap in相爭；起東風ê日，就用大風kā in趕去。Lí chhe in khì, sī chiàu só͘ ha̍p-gî kap in saⁿ-chiⁿ; khí tang-hong ê ji̍t, chiū ēng tōa-hong kā in kóaⁿ--khì.

9所以雅各ê罪惡beh án-ni得tio̍h洗除，伊ê罪過得tio̍h除去ê效果，在tī chit-ê；hit時伊hō͘祭壇ê石頭變做phah碎ê灰石；致到柴柱kap日像無koh khiā-teh。Só͘-í Ngá-kok ê chōe-ok beh án-ni tit-tio̍h sóe-tû, i ê chōe-kòa tit-tio̍h tû--khì ê hāu-kó, chāi-tī chit-ê; hit-sî i hō͘ chè-tôaⁿ ê chio̍h-thâu pìⁿ-chòe phah-chhùi ê he-chio̍h; tì-kàu chhâ-thiāu kap ji̍t-siōng bô koh khiā--teh.

10因為堅固ê城變做悽凊；陋家散宅親像曠野；牛á beh食草tī-hia，倒tī-hia，亦beh食完伊ê樹枝。In-ūi kian-kò͘ ê siâⁿ pìⁿ-chòe chhiⁿ-chhìn; lō͘-ke sòaⁿ-the̍h chhin-chhiūⁿ khòng-iá; gû-á beh chia̍h-chháu tī-hia, tó tī-hia, ia̍h beh chia̍h-oân i ê chhiū-ki.

11伊ê枝枯焦受at折，婦人人beh來kā伊燒lio去；因為chiah-ê百姓戇戇；所以造化in-ê，無beh憐憫in，造成in-ê，無beh施恩hō͘ in。I ê ki ko͘-tâ siū at-chi̍h, hū-jîn-lâng beh lâi kā i sio-lio--khì; in-ūi chiah ê peh-sìⁿ gōng-gōng; só͘-í chō-hòa in--ê, bô beh lîn-bín in, chō-chiâⁿ in--ê, bô beh si-un hō͘ in.

12到hit日，耶和華beh 敲伊ê果子，tùi大河到埃及ê溪；lín以色列人一個一個hō͘伊收拾。Kàu hit-ji̍t Iâ-hô-hoa beh khà i ê ké-chí, tùi Tōa-hô kàu Ai-ki̍p ê khoe; lín Í-sek-lia̍t lâng chi̍t-ê chi̍t-ê hō͘ I siu-khioh.

13當hit日，beh pûn大ê號頭；見若漂流tī亞述地，kap受趕tī埃及地ê，lóng beh來tī聖山，tī耶路撒冷，敬拜耶和華。Tng hit-ji̍t beh pûn tōa ê hō-thâu; kìⁿ-nā phiau-liû tī A-su̍t tōe, kap siū-kóaⁿ tī Ai-ki̍p tōe-ê, lóng beh lâi tī sèng-soaⁿ, tī Iâ-lō͘-sat-léng, kèng-pài Iâ-hô-hoa.

1災厄ah，Í-hoat-liân ê醉漢驕傲ê冕旒，kap伊súi ê裝飾teh謝ê花，就是戴tī hiah-ê hō͘酒所困苦ê，in ê肥ê山谷ê頭。Chai-ē ah, Í-hoat-liân ê chùi-hàn kiau-ngō͘ ê bián-liû, kap i súi ê chng-thāⁿ teh siā ê hoe, chiū-sī tì tī hiah-ê hō͘ chiú só͘ khùn-khó͘--ê, in ê pûi ê soaⁿ-kok ê thâu.

2看，主有一個大權能大氣力ê，親像一陣ê大雹，親像毀滅ê狂風，親像洶流ê大水，伊beh用大力hiat伊tī地裡。Khòaⁿ, Chú ū chi̍t-ê tōa koân-lêng tōa khùi-la̍t--ê, chhin-chhiūⁿ chi̍t-chūn ê tōa-pha̍uh, chhin-chhiūⁿ húi-bia̍t ê kông-hong, chhin-chhiūⁿ hiong-lâu ê tōa-chúi, I beh ēng tōa-la̍t hiat i tī tōe--nih.

3Í-hoat-liân ê醉漢驕傲ê冕旒beh受踏tī腳下。Í-hoat-liân ê chùi-hàn kiau-ngō͘ ê bián-liû beh siū ta̍h tī kha-ē.

4伊súi ê裝飾teh謝ê花就是tī肥ê山谷ê頭，beh親像夏天以前起頭熟ê無花果；見若看見ê就注意看，一下到手就吞落去。I súi ê chng-thāⁿ teh siā ê hoe chiū-sī tī pûi ê soaⁿ-kok ê thâu, beh chhin-chhiūⁿ hē-thiⁿ í-chêng khí-thâu se̍k ê bû-hoa-kó; kìⁿ-nā khòaⁿ-kìⁿ--ê chiū chù-ì khòaⁿ, chi̍t-ē kàu-chhiú chiū thun--lo̍h-khì.

5當hit日，萬軍ê耶和華beh做伊hiah-ê所chhun ê百姓榮光ê帽，súi ê冕旒。Tng hit-ji̍t bān-kun ê Iâ-hô-hoa beh chòe I hiah-ê só͘ chhun ê peh-sìⁿ êng-kng ê bō, súi ê bián-liû.

6亦做坐位來審判ê公義ê神，亦做城門口phah退對敵ê ê氣力。Ia̍h chòe chē-ūi lâi sím-phòaⁿ--ê kong-gī ê sîn, ia̍h chòe siâⁿ-mn̂g-kháu phah-thè tùi-te̍k--ê ê khùi-la̍t.

7獨獨chit號人tùi酒來差謬，tùi厚酒來迷路；祭司kap先知lóng tùi厚酒來差謬，hō͘酒所吞食，tùi厚酒來迷路；對tī默示就差錯，對tī審判無平穩。To̍k-to̍k chit-hō lâng tùi chiú lâi chha-biū, tùi kāu-chiú lâi bê-lō͘; chè-si kap sian-ti lóng tùi kāu-chiú lâi chha-biū, hō͘ chiú só͘ thun-chia̍h, tùi kāu-chiú lâi bê-lō͘; tùi-tī be̍k-sī chiū chha-chhok, tùi tī sím-phòaⁿ bô pêng-ún.

8因為ta̍k塊桌lâ-sâm，吐到滿滿，無一位清氣。In-ūi ta̍k tè toh lâ-sâm, thò͘ kàu móa-móa, bô chi̍t-ūi chheng-khì.

9伊beh用智慧教示是誰 ah？beh hō͘ 是誰明白所傳ê ah？是hit號tú-á斷奶離開胸前ê mah？I beh ēng tì-hūi kà-sī chī-chūi ah? beh hō͘ chī-chūi bêng-pe̍k só͘-thoân-ê ah? sī hit-hō tú-á tn̄g-lin lī-khui heng-chêng--ê mah?

10因為命令koh命令，命令koh命令；律例koh律例，律例koh律例，chit位淡薄，hit位淡薄。In-ūi bēng-lēng koh bēng-lēng, bēng-lēng koh bēng-lēng; lu̍t-lē koh lu̍t-lē, lu̍t-lē koh lu̍t-lē, chit-ūi tām-po̍h, hit-ūi tām-po̍h.

11Bōe-lah；主beh用別樣ê嘴唇kap無siâng類ê舌，對chit-ê百姓講話。Bōe--lah; Chú beh ēng pa̍t-iūⁿ ê chhùi-tûn kap bô siâng-lūi ê chi̍h, tùi chit ê peh-sìⁿ kóng-ōe.

12伊bat對in講，Chit-ê就是安歇，lín tio̍h hō͘厭倦ê人得tio̍h安歇；koh講，Chit-ê就是khùiⁿ活；總是in m̄肯聽。I bat tùi in kóng, Chit-ê chiū-sī an-hioh, lín tio̍h hō͘ ià-siān ê lâng tit-tio̍h an-hioh; koh kóng, Chit-ê chiū-sī khùiⁿ-oa̍h; chóng-sī in m̄-khéng thiaⁿ.

13所以耶和華對in講ê話，是命令koh命令，命令koh命令；律例koh律例，律例koh律例；Chit位淡薄，hit位淡薄；致到in去，就hiàⁿ後跋倒，koh跋到碎碎，陷落羅網，受掠tio̍h。Só͘-í Iâ-hô-hoa tùi in kóng ê ōe, sī bēng-lēng koh bēng-lēng, bēng-lēng koh bēng-lēng; lu̍t-lē koh lu̍t-lē, lu̍t-lē koh lu̍t-lē; chit-ūi tām-po̍h, hit-ūi tām-po̍h; tì-kàu in khì, chiū hiàⁿ-āu poa̍h-tó, koh poa̍h kàu chhùi-chhùi, hām-lo̍h lô-bāng, siū lia̍h-tio̍h.

14所以lín chiah-ê侮慢ê人，就是管轄tiàm tī耶路撒冷chiah-ê百姓ê，tio̍h聽耶和華ê話。Só͘-í lín chiah ê bú-bān ê lâng, chiū-sī koán-hat tiàm tī Iâ-lō͘-sat-léng chiah ê peh-sìⁿ--ê, tio̍h thiaⁿ Iâ-hô-hoa ê ōe.

15因為lín bat講，阮kap死無立約，kap陰府結盟，災厄大流行ê時的確無到tī阮；因為阮用白賊做閃避ê所在，tī虛假ê所在家己bih。In-ūi lín bat kóng, Goán kap sí-bô li̍p-iok, kap im-hú kiat-bêng, chai-ē tōa liû-hêng ê sî tek-khak bô kàu tī goán; in-ūi goán ēng pe̍h-chha̍t chòe siám-pī ê só͘-chāi, tī hu-ké ê só͘-chāi ka-kī bih.

16所以主耶和華án-ni講，看ah，我tī錫安hē一塊石做地基，是已經試驗ê石，堅固ê地基，寶貴ê厝角；óa靠伊ê人的確無著急。Só͘-í Chú Iâ-hô-hoa án-ni kóng, Khòaⁿ ah, Góa tī Sek-an hē chi̍t tè chio̍h chòe tōe-ki, sī í-keng chhì-giām ê chio̍h, kian-kò͘ ê tōe-ki, pó-kùi ê chhù-kak; óa-khò i ê lâng tek-khak bô tio̍h-kip.

17我beh用公平做準繩，用公義做墜線；冰雹beh phah倒虛假閃避ê所在，大水beh淹密閃bih ê所在。Góa beh ēng kong-pêng chòe chún-chîn ēng kong-gī chòe tūi-sòaⁿ; peng-pha̍uh beh phah-tó hu-ké siám-pī ê só͘-chāi, tōa-chúi beh im-ba̍t siám-bih ê só͘-chāi.

18Lín kap死無所立ê約的確廢無，kap陰府所結ê盟的確khiā-bōe-tiâu；災厄大流行ê時，lín beh受伊thún踏。Lín kap sí-bô só͘ li̍p ê iok tek-khak hòe-bô, kap im-hú só͘ kiat ê bêng tek-khak khiā-bōe-tiâu; chai-ē tōa liû-hêng ê sî, lín beh siū i thún-ta̍h.

19Ta̍k-pái經過，beh將lín掠去；因為ta̍k早起伊beh經過，無làng日暝；明白所傳ê，kan-ta驚惶。Ta̍k-pái keng-kè, beh chiong lín lia̍h-khì; in-ūi ta̍k chá-khí i beh keng-kè, bô làng ji̍t-mî; bêng-pe̍k só͘-thoân-ê, kan-ta kiaⁿ-hiâⁿ.

20眠床短，hō͘人bōe伸直；棉被狹，hō͘人kah bōe密。Bîn-chhn̂g té, hō͘ lâng bōe chhun-ti̍t; mî-phē oe̍h, hō͘ lâng kah bōe-ba̍t.

21因為耶和華beh起來，親像tī Pí-la̍h-sim山，伊beh受氣親像tī Ki-piàn ê山谷；thang做祂ê工，就是罕得做ê工，thang成祂ê事，就是奇異ê事。In-ūi Iâ-hô-hoa beh khí-lâi, chhin-chhiūⁿ tī Pí-la̍h-sim soaⁿ, I beh siū-khì chhin-chhiūⁿ tī Ki-piàn ê soaⁿ-kok; thang chòe I ê kang, chiū-sī hán-tit chòe ê kang, thang chiâⁿ I ê sū, chiū-sī kî-īⁿ ê sū.

22Taⁿ lín m̄-thang侮慢，驚了縛lín ê索綑khah-ân；因為我tùi主，萬軍ê耶和華聽見，已經決斷beh tī全地上行所定tio̍h滅無ê事。Taⁿ lín m̄-thang bú-bān, kiaⁿ-liáu pa̍k lín ê soh khún khah-ân; in-ūi góa tùi Chú, bān-kun ê Iâ-hô-hoa thiaⁿ-kìⁿ, í-keng koat-toàn beh tī choân-tōe-chiūⁿ kiâⁿ só͘ tiāⁿ-tio̍h bia̍t-bô ê sū.

23Lín tio̍h 俯耳孔聽我ê聲，留心聽我ê話。Lín tio̍h àⁿ hī-khang thiaⁿ góa ê siaⁿ, liû-sim thiaⁿ góa ê ōe.

24Hit-ê犁園beh掖種ê，kiám是常常teh犁mah？kiám是常常teh掘來耙(pē)伊ê土mah？Hit-ê lôe-hn̂g beh iā-chéng--ê, kiám-sī siông-siông teh lôe mah? kiám-sī siông-siông teh ku̍t lâi pē i ê thô͘ mah?

25伊已經chhòng平土面，kiám無掖八角，栽má-khûn，照chōa種小麥，tī定tio̍h ê所在種大麥，tī園邊種粗麥mah？I í-keng chhòng-pîⁿ thô͘-bīn, kiám bô iā poeh-kak, chai má-khûn, chiàu-chōa chèng sió-be̍h, tī tiāⁿ-tio̍h ê só͘-chāi chèng tōa-be̍h, tī hn̂g-piⁿ chèng chho͘-be̍h mah?

26因為伊ê上帝用合宜ê法度指點伊，koh教示伊。In-ūi i ê Siōng-tè ēng ha̍p-gî ê hoat-tō͘ chí-tiám i, koh kà-sī i.

27八角m̄是用利ê器具phah-ê，má-khûn m̄是用車輪lún ê；就是用槌á phah八角，用柺á phah má-khûn。Poeh-kak m̄-sī ēng lāi ê khì-kū phah--ê, má-khûn m̄-sī ēng chhia-lûn lún--ê; chiū-sī ēng thûi-á phah poeh-kak, ēng koáiⁿ-á phah má-khûn.

28做餅ê五穀kiám khoeh hō͘伊碎mah？無lah，無長長phah伊；雖然用車輪馬蹄phah散伊，亦無hō͘伊碎去。Chòe-piáⁿ ê gō͘-kak kiám khoeh hō͘ i chhùi mah? Bô--lah, bô tn̂g-tn̂g phah i; sui-jiân ēng chhia-lûn bé-tôe phah-sòaⁿ i, ia̍h bô hō͘ i chhùi--khì.

29這亦出tī萬軍ê耶和華；伊ê計畫奇妙，伊ê智慧闊大。Che ia̍h chhut tī bān-kun ê Iâ-hô-hoa; I ê kè-e̍k kî-biāu, I ê tì-hūi khoah-tōa.