1災厄ah，Í-hoat-liân ê醉漢驕傲ê冕旒，kap伊súi ê裝飾teh謝ê花，就是戴tī hiah-ê hō͘酒所困苦ê，in ê肥ê山谷ê頭。Chai-ē ah, Í-hoat-liân ê chùi-hàn kiau-ngō͘ ê bián-liû, kap i súi ê chng-thāⁿ teh siā ê hoe, chiū-sī tì tī hiah-ê hō͘ chiú só͘ khùn-khó͘--ê, in ê pûi ê soaⁿ-kok ê thâu.

2看，主有一個大權能大氣力ê，親像一陣ê大雹，親像毀滅ê狂風，親像洶流ê大水，伊beh用大力hiat伊tī地裡。Khòaⁿ, Chú ū chi̍t-ê tōa koân-lêng tōa khùi-la̍t--ê, chhin-chhiūⁿ chi̍t-chūn ê tōa-pha̍uh, chhin-chhiūⁿ húi-bia̍t ê kông-hong, chhin-chhiūⁿ hiong-lâu ê tōa-chúi, I beh ēng tōa-la̍t hiat i tī tōe--nih.

3Í-hoat-liân ê醉漢驕傲ê冕旒beh受踏tī腳下。Í-hoat-liân ê chùi-hàn kiau-ngō͘ ê bián-liû beh siū ta̍h tī kha-ē.

4伊súi ê裝飾teh謝ê花就是tī肥ê山谷ê頭，beh親像夏天以前起頭熟ê無花果；見若看見ê就注意看，一下到手就吞落去。I súi ê chng-thāⁿ teh siā ê hoe chiū-sī tī pûi ê soaⁿ-kok ê thâu, beh chhin-chhiūⁿ hē-thiⁿ í-chêng khí-thâu se̍k ê bû-hoa-kó; kìⁿ-nā khòaⁿ-kìⁿ--ê chiū chù-ì khòaⁿ, chi̍t-ē kàu-chhiú chiū thun--lo̍h-khì.

5當hit日，萬軍ê耶和華beh做伊hiah-ê所chhun ê百姓榮光ê帽，súi ê冕旒。Tng hit-ji̍t bān-kun ê Iâ-hô-hoa beh chòe I hiah-ê só͘ chhun ê peh-sìⁿ êng-kng ê bō, súi ê bián-liû.

6亦做坐位來審判ê公義ê神，亦做城門口phah退對敵ê ê氣力。Ia̍h chòe chē-ūi lâi sím-phòaⁿ--ê kong-gī ê sîn, ia̍h chòe siâⁿ-mn̂g-kháu phah-thè tùi-te̍k--ê ê khùi-la̍t.

7獨獨chit號人tùi酒來差謬，tùi厚酒來迷路；祭司kap先知lóng tùi厚酒來差謬，hō͘酒所吞食，tùi厚酒來迷路；對tī默示就差錯，對tī審判無平穩。To̍k-to̍k chit-hō lâng tùi chiú lâi chha-biū, tùi kāu-chiú lâi bê-lō͘; chè-si kap sian-ti lóng tùi kāu-chiú lâi chha-biū, hō͘ chiú só͘ thun-chia̍h, tùi kāu-chiú lâi bê-lō͘; tùi-tī be̍k-sī chiū chha-chhok, tùi tī sím-phòaⁿ bô pêng-ún.

8因為ta̍k塊桌lâ-sâm，吐到滿滿，無一位清氣。In-ūi ta̍k tè toh lâ-sâm, thò͘ kàu móa-móa, bô chi̍t-ūi chheng-khì.

9伊beh用智慧教示是誰 ah？beh hō͘ 是誰明白所傳ê ah？是hit號tú-á斷奶離開胸前ê mah？I beh ēng tì-hūi kà-sī chī-chūi ah? beh hō͘ chī-chūi bêng-pe̍k só͘-thoân-ê ah? sī hit-hō tú-á tn̄g-lin lī-khui heng-chêng--ê mah?

10因為命令koh命令，命令koh命令；律例koh律例，律例koh律例，chit位淡薄，hit位淡薄。In-ūi bēng-lēng koh bēng-lēng, bēng-lēng koh bēng-lēng; lu̍t-lē koh lu̍t-lē, lu̍t-lē koh lu̍t-lē, chit-ūi tām-po̍h, hit-ūi tām-po̍h.

11Bōe-lah；主beh用別樣ê嘴唇kap無siâng類ê舌，對chit-ê百姓講話。Bōe--lah; Chú beh ēng pa̍t-iūⁿ ê chhùi-tûn kap bô siâng-lūi ê chi̍h, tùi chit ê peh-sìⁿ kóng-ōe.

12伊bat對in講，Chit-ê就是安歇，lín tio̍h hō͘厭倦ê人得tio̍h安歇；koh講，Chit-ê就是khùiⁿ活；總是in m̄肯聽。I bat tùi in kóng, Chit-ê chiū-sī an-hioh, lín tio̍h hō͘ ià-siān ê lâng tit-tio̍h an-hioh; koh kóng, Chit-ê chiū-sī khùiⁿ-oa̍h; chóng-sī in m̄-khéng thiaⁿ.

13所以耶和華對in講ê話，是命令koh命令，命令koh命令；律例koh律例，律例koh律例；Chit位淡薄，hit位淡薄；致到in去，就hiàⁿ後跋倒，koh跋到碎碎，陷落羅網，受掠tio̍h。Só͘-í Iâ-hô-hoa tùi in kóng ê ōe, sī bēng-lēng koh bēng-lēng, bēng-lēng koh bēng-lēng; lu̍t-lē koh lu̍t-lē, lu̍t-lē koh lu̍t-lē; chit-ūi tām-po̍h, hit-ūi tām-po̍h; tì-kàu in khì, chiū hiàⁿ-āu poa̍h-tó, koh poa̍h kàu chhùi-chhùi, hām-lo̍h lô-bāng, siū lia̍h-tio̍h.

14所以lín chiah-ê侮慢ê人，就是管轄tiàm tī耶路撒冷chiah-ê百姓ê，tio̍h聽耶和華ê話。Só͘-í lín chiah ê bú-bān ê lâng, chiū-sī koán-hat tiàm tī Iâ-lō͘-sat-léng chiah ê peh-sìⁿ--ê, tio̍h thiaⁿ Iâ-hô-hoa ê ōe.

15因為lín bat講，阮kap死無立約，kap陰府結盟，災厄大流行ê時的確無到tī阮；因為阮用白賊做閃避ê所在，tī虛假ê所在家己bih。In-ūi lín bat kóng, Goán kap sí-bô li̍p-iok, kap im-hú kiat-bêng, chai-ē tōa liû-hêng ê sî tek-khak bô kàu tī goán; in-ūi goán ēng pe̍h-chha̍t chòe siám-pī ê só͘-chāi, tī hu-ké ê só͘-chāi ka-kī bih.

16所以主耶和華án-ni講，看ah，我tī錫安hē一塊石做地基，是已經試驗ê石，堅固ê地基，寶貴ê厝角；óa靠伊ê人的確無著急。Só͘-í Chú Iâ-hô-hoa án-ni kóng, Khòaⁿ ah, Góa tī Sek-an hē chi̍t tè chio̍h chòe tōe-ki, sī í-keng chhì-giām ê chio̍h, kian-kò͘ ê tōe-ki, pó-kùi ê chhù-kak; óa-khò i ê lâng tek-khak bô tio̍h-kip.

17我beh用公平做準繩，用公義做墜線；冰雹beh phah倒虛假閃避ê所在，大水beh淹密閃bih ê所在。Góa beh ēng kong-pêng chòe chún-chîn ēng kong-gī chòe tūi-sòaⁿ; peng-pha̍uh beh phah-tó hu-ké siám-pī ê só͘-chāi, tōa-chúi beh im-ba̍t siám-bih ê só͘-chāi.

18Lín kap死無所立ê約的確廢無，kap陰府所結ê盟的確khiā-bōe-tiâu；災厄大流行ê時，lín beh受伊thún踏。Lín kap sí-bô só͘ li̍p ê iok tek-khak hòe-bô, kap im-hú só͘ kiat ê bêng tek-khak khiā-bōe-tiâu; chai-ē tōa liû-hêng ê sî, lín beh siū i thún-ta̍h.

19Ta̍k-pái經過，beh將lín掠去；因為ta̍k早起伊beh經過，無làng日暝；明白所傳ê，kan-ta驚惶。Ta̍k-pái keng-kè, beh chiong lín lia̍h-khì; in-ūi ta̍k chá-khí i beh keng-kè, bô làng ji̍t-mî; bêng-pe̍k só͘-thoân-ê, kan-ta kiaⁿ-hiâⁿ.

20眠床短，hō͘人bōe伸直；棉被狹，hō͘人kah bōe密。Bîn-chhn̂g té, hō͘ lâng bōe chhun-ti̍t; mî-phē oe̍h, hō͘ lâng kah bōe-ba̍t.

21因為耶和華beh起來，親像tī Pí-la̍h-sim山，伊beh受氣親像tī Ki-piàn ê山谷；thang做祂ê工，就是罕得做ê工，thang成祂ê事，就是奇異ê事。In-ūi Iâ-hô-hoa beh khí-lâi, chhin-chhiūⁿ tī Pí-la̍h-sim soaⁿ, I beh siū-khì chhin-chhiūⁿ tī Ki-piàn ê soaⁿ-kok; thang chòe I ê kang, chiū-sī hán-tit chòe ê kang, thang chiâⁿ I ê sū, chiū-sī kî-īⁿ ê sū.

22Taⁿ lín m̄-thang侮慢，驚了縛lín ê索綑khah-ân；因為我tùi主，萬軍ê耶和華聽見，已經決斷beh tī全地上行所定tio̍h滅無ê事。Taⁿ lín m̄-thang bú-bān, kiaⁿ-liáu pa̍k lín ê soh khún khah-ân; in-ūi góa tùi Chú, bān-kun ê Iâ-hô-hoa thiaⁿ-kìⁿ, í-keng koat-toàn beh tī choân-tōe-chiūⁿ kiâⁿ só͘ tiāⁿ-tio̍h bia̍t-bô ê sū.

23Lín tio̍h 俯耳孔聽我ê聲，留心聽我ê話。Lín tio̍h àⁿ hī-khang thiaⁿ góa ê siaⁿ, liû-sim thiaⁿ góa ê ōe.

24Hit-ê犁園beh掖種ê，kiám是常常teh犁mah？kiám是常常teh掘來耙(pē)伊ê土mah？Hit-ê lôe-hn̂g beh iā-chéng--ê, kiám-sī siông-siông teh lôe mah? kiám-sī siông-siông teh ku̍t lâi pē i ê thô͘ mah?

25伊已經chhòng平土面，kiám無掖八角，栽má-khûn，照chōa種小麥，tī定tio̍h ê所在種大麥，tī園邊種粗麥mah？I í-keng chhòng-pîⁿ thô͘-bīn, kiám bô iā poeh-kak, chai má-khûn, chiàu-chōa chèng sió-be̍h, tī tiāⁿ-tio̍h ê só͘-chāi chèng tōa-be̍h, tī hn̂g-piⁿ chèng chho͘-be̍h mah?

26因為伊ê上帝用合宜ê法度指點伊，koh教示伊。In-ūi i ê Siōng-tè ēng ha̍p-gî ê hoat-tō͘ chí-tiám i, koh kà-sī i.

27八角m̄是用利ê器具phah-ê，má-khûn m̄是用車輪lún ê；就是用槌á phah八角，用柺á phah má-khûn。Poeh-kak m̄-sī ēng lāi ê khì-kū phah--ê, má-khûn m̄-sī ēng chhia-lûn lún--ê; chiū-sī ēng thûi-á phah poeh-kak, ēng koáiⁿ-á phah má-khûn.

28做餅ê五穀kiám khoeh hō͘伊碎mah？無lah，無長長phah伊；雖然用車輪馬蹄phah散伊，亦無hō͘伊碎去。Chòe-piáⁿ ê gō͘-kak kiám khoeh hō͘ i chhùi mah? Bô--lah, bô tn̂g-tn̂g phah i; sui-jiân ēng chhia-lûn bé-tôe phah-sòaⁿ i, ia̍h bô hō͘ i chhùi--khì.

29這亦出tī萬軍ê耶和華；伊ê計畫奇妙，伊ê智慧闊大。Che ia̍h chhut tī bān-kun ê Iâ-hô-hoa; I ê kè-e̍k kî-biāu, I ê tì-hūi khoah-tōa.

1Ai-ah，A-lī-i-le̍k，A-lī-i-le̍k，大衛安營ê城，lín一年過一年，節期照常輪流。Ai--ah, A-lī-i-le̍k, A-lī-i-le̍k, Tāi-pi̍t an-iâⁿ ê siâⁿ, lín chi̍t-nî kè chi̍t-nî, choeh-kî chiàu-siông lûn-liû.

2我beh hō͘ A-lī-i-le̍k困難，伊beh有悲傷哀哭；總是我beh看伊做A-lī-i-le̍k。Góa beh hō͘ A-lī-i-le̍k khùn-lân, i beh ū pi-siong ai-khàu; chóng-sī Góa beh khòaⁿ i chòe A-lī-i-le̍k.

3我beh四圍安營攻擊你，起土堆phah你，起高台攻擊你。Góa beh sì-ûi an-iâⁿ kong-kek lí, khí thô͘-tui phah lí, khí koâiⁿ-tâi kong-kek lí.

4你beh降低，對地中講話，你ê言語beh細細，tùi塵埃出來；你ê聲音，beh親像鬼 上身ê ê聲音tùi地出來，你ê言語kiū-kiū哮tùi塵埃出。Lí beh kàng-kē, tùi tōe-tiong kóng-ōe, lí ê giân-gú beh sòe-sòe, tùi tîn-ai chhut-lâi; lí ê siaⁿ-im, beh chhin-chhiūⁿ kúi chiūⁿ-sin--ê ê siaⁿ-im tùi tōe chhut-lâi, lí ê giân-gú kiū-kiū-háu tùi tîn-ai chhut.

5你ê對敵ê大隊beh親像幼ê土粉，強暴人ê大隊beh親像飛ê粗糠；chit-ê事beh tiap-á久ê中間忽然臨到。Lí ê tùi-te̍k ê tōa-tūi beh chhin-chhiūⁿ iù ê thô͘-hún, kiông-pō lâng ê tōa-tūi beh chhin-chhiūⁿ pe ê chho͘-khng; chit ê sū beh tiap-á-kú ê tiong-kan hut-jiân lîm-kàu.

6萬軍ê耶和華beh用雷tân、地動、大聲、捲螺風、大風，kap吞滅ê火燄臨到伊。Bān-kun ê Iâ-hô-hoa beh ēng lûi-tân, tōe-tāng, tōa-siaⁿ, kńg-lê-hong, tōa-hong, kap thun-bia̍t ê hé-iām lîm-kàu i.

7Hit時攻擊A-lī-i-le̍k眾國ê大隊，就是一切攻擊伊kap伊ê衛所，kap苦楚伊ê，beh親像夢見，親像暝時ê異象。Hit-sî kong-kek A-lī-i-le̍k chèng-kok ê tōa-tūi, chiū-sī it-chhè kong-kek i kap i ê ōe-só͘, kap khó͘-chhó͘ i ê, beh chhin-chhiūⁿ bāng-kìⁿ, chhin-chhiūⁿ mî-sî ê īⁿ-siōng.

8Beh親像iau ê人夢見teh食，到精神心猶原知空空；á是親像嘴乾ê人夢見teh lim，到精神猶原厭倦，想beh lim；眾國ê大隊kap錫安山交戰ê，亦beh親像án-ni。Beh chhin-chhiūⁿ iau ê lâng bāng-kìⁿ teh-chia̍h, kàu cheng-sîn sim iû-goân chai khang-khang; á-sī chhin-chhiūⁿ chhùi-ta ê lâng bāng-kìⁿ teh lim, kàu cheng-sîn iû-goân ià-siān, siūⁿ beh lim; chèng-kok ê tōa-tūi kap Sek-an soaⁿ kau-chiàn--ê, ia̍h beh chhin-chhiūⁿ án-ni.

9Lín tio̍h gông-ngia̍h奇怪，lín tio̍h家己遮蔽來chhiⁿ-mî。In醉，m̄是因為酒，in顛來顛去，m̄是因為厚酒。Lín tio̍h gông-ngia̍h kî-koài, lín tio̍h ka-kī jia-pè lâi chhiⁿ-mî. In chùi, m̄-sī in-ūi chiú, in tian-lâi tian-khì, m̄-sī in-ūi kāu-chiú.

10因為耶和華將睏重眠ê神灌tī lín ê頂面，封密lín ê目睭，蓋密lín ê頭殼；lín ê目睭就是先知，lín ê頭殼就是先見ê。In-ūi Iâ-hô-hoa chiong khùn tāng-bîn ê sîn koàn tī lín ê téng-bīn, hong-ba̍t lín ê ba̍k-chiu, khàm-ba̍t lín ê thâu-khak; lín ê ba̍k-chiu chiū-sī sian-ti, lín ê thâu-khak chiū-sī sian-kiàn--ê.

11所有ê默示對tī lín親像封teh ê字樣；人將chit-ê字樣交hō͘ bat字 ê人，講，請讀伊；伊講，我bōe能，因為封teh。Só͘-ū ê be̍k-sī tùi-tī lín chhin-chhiūⁿ hong--teh ê jī-iūⁿ; lâng chiong chit ê jī-iūⁿ kau hō͘ bat-jī ê lâng, kóng, Chhiáⁿ tha̍k i; i kóng, Góa bōe-ōe, in-ūi hong--teh.

12Koh將chit-ê字樣交hō͘ m̄-bat字 ê人，講，請讀伊；伊講，我m̄-bat字。Koh chiong chit ê jī-iūⁿ kau hō͘ m̄-bat-jī ê lâng, kóng, Chhiáⁿ tha̍k i; i kóng, Góa m̄-bat jī.

13主講，因為chit-ê百姓親近我，用嘴，用嘴唇尊敬我，心就離開我遠遠；in ê尊敬我，不過是thàn人所教示ê命令nā-tiāⁿ；Chú kóng, In-ūi chit ê peh-sìⁿ chhin-kūn Góa, ēng chhùi, ēng chhùi-tûn chun-kèng Góa, sim chiū lī-khui Góa hn̄g-hn̄g; in ê chun-kèng Góa, put-kò sī thàn lâng só͘ kà-sī ê bēng-lēng nā-tiāⁿ;

14所以我beh koh用奇妙ê事款待chit-ê百姓，hit-ê事就是奇妙koh奇異；in智慧人ê智慧beh消無，in聰明人ê聰明beh蓋密。só͘-í Góa beh koh ēng kî-biāu ê sū khoán-thāi chit ê peh-sìⁿ, hit ê sū chiū-sī kî-biāu koh kî-īⁿ; in tì-hūi lâng ê tì-hūi beh siau-bô, in chhong-bêng lâng ê chhong-bêng beh khàm-ba̍t.

15災厄ah，hiah-ê ǹg耶和華深深khǹg in ê計謀，koh tī暗中行tāi-chì-ê，講，Chī-chūi看見阮？是誰知阮ah？Chai-ē ah, hiah-ê ǹg Iâ-hô-hoa chhim-chhim khǹg in ê kè-bô͘, koh tī àm-tiong kiâⁿ tāi-chì-ê, kóng, Chī-chūi khòaⁿ-kìⁿ goán? chī-chūi chai goán ah?

16害ah，lín悖謬lah！Kiám thang看燒磁人親像土mah？受造ê物kiám thang論造伊ê，講，伊無造我mah？á是受做ê物件，kiám thang論做伊ê講，伊無聰明mah？Hāi ah, lín pōe-biū lah! Kiám thang khòaⁿ sio-hûi lâng chhin-chhiūⁿ thô͘ mah? siū-chō ê mi̍h kiám thang lūn chō-i--ê, kóng, I bô chō góa mah? á-sī siū-chòe ê mi̍h-kiāⁿ, kiám thang lūn chòe-i--ê kóng, I bô chhang-miâ mah?

17Kiám m̄是tiap-á久ê時，黎巴嫩變做好ê田，好ê田看做樹林mah？Kiám m̄-sī tiap-á-kú ê sî, Lī-pa-lùn piàn-chòe hó ê chhân, hó ê chhân khòaⁿ-chòe chhiū-nâ mah?

18Hit日臭耳人ê beh聽見冊內ê話，chhiⁿ-mî人ê目睭beh tùi濛霧烏暗中得tio̍h看見，Hit-ji̍t chhàu-hī-lâng--ê beh thiaⁿ-kìⁿ chheh-lāi ê ōe, chhiⁿ-mî-lâng ê ba̍k-chiu beh tùi bông-bū o͘-àm-tiong tit-tio̍h khòaⁿ-kìⁿ,

19謙卑ê人beh因為耶和華來加添in ê歡喜；人間ê sòng-hiong人beh因為以色列ê聖ê來快樂。Khiam-pi ê lâng beh in-ūi Iâ-hô-hoa lâi ke-thiⁿ in ê hoaⁿ-hí; jîn-kan ê sòng-hiong lâng beh in-ūi Í-sek-lia̍t ê Sèng--ê lâi khoài-lo̍k.

20因為強暴人已經歸tī無，侮慢ê人已經滅絕；一切chhē機會做pháiⁿ ê人lóng受剪除。In-ūi kiông-pō lâng í-keng kui tī bô, bú-bān ê lâng í-keng bia̍t-choa̍t; it-chhè chhē ki-hōe chòe-pháiⁿ ê lâng lóng siū chián-tû.

21In為tio̍h一句話來責罪人，設活tauh來陷害tī城門督責人ê，用無影ê事枉屈義人。In ūi-tio̍h chi̍t-kù-ōe lâi chek-chōe lâng, siat oa̍h-tauh lâi hām-hāi tī siâⁿ-mn̂g tok-chek lâng--ê, ēng bô-iáⁿ ê sū óng-khut gī-lâng.

22所以救贖亞伯拉罕ê耶和華論雅各ê家án-ni講，雅各taⁿ的確無koh見笑，伊ê面亦無變色。Só͘-í kiù-sio̍k A-pek-la̍h-hán ê Iâ-hô-hoa lūn Ngá-kok ê ke án-ni kóng, Ngá-kok taⁿ tek-khak bô koh kiàn-siàu, i ê bīn ia̍h bô piàn-sek.

23總是伊看見伊ê眾kiáⁿ，就是我ê手所做ê，tī伊ê中間，in beh尊我ê名做聖，beh尊雅各ê聖ê做聖，beh敬畏以色列ê上帝。Chóng-sī i khòaⁿ-kìⁿ i ê chèng-kiáⁿ, chiū-sī Góa ê chhiú só͘ chòe--ê, tī i ê tiong-kan, in beh chun Góa ê miâ chòe-sèng, beh chun Ngá-kok ê Sèng--ê chòe-sèng, beh kèng-ùi Í-sek-lia̍t ê Siōng-tè.

24心內胡塗ê beh得tio̍h明白，m̄甘願ê beh受教訓。Sim-lāi hô͘-tô͘-ê beh tit-tio̍h bêng-pe̍k, m̄ kam-goān--ê beh siū kàu-hùn.

1耶和華講，災厄ah，chiah-ê悖逆ê kiáⁿ，in相kap計謀，無tùi我ê意思，in結盟約無tùi我ê神，致到罪上加罪。Iâ-hô-hoa kóng, Chai-ē ah, chiah ê pōe-ge̍k ê kiáⁿ, in saⁿ-kap kè-bô͘, bô tùi Góa ê ì-sù, in kiat bêng-io̍k bô tùi Góa ê sîn, tì-kàu chōe-siōng ka-chōe.

2起身落去埃及，並無請問我，beh óa靠法老ê勢力，加添家己ê勢力，亦閃bih tī埃及ê致蔭下。Khí-sin lo̍h-khì Ai-ki̍p, pēng-bô chhéng-mn̄g Góa, beh óa-khò Hoat-ló ê sè-le̍k, ke-thiⁿ ka-kī ê sè-le̍k, ia̍h siám-bih tī Ai-ki̍p ê tì-ìm-ē.

3所以法老ê勢力beh做lín ê見笑；閃bih tī埃及ê致蔭下beh做lín ê漏氣。Só͘-í Hoat-ló ê sè-le̍k beh chòe lín ê kiàn-siàu; siám-bih tī Ai-ki̍p ê tì-ìm-ē beh chòe lín ê làu-khùi.

4伊ê首領已經到Só-an，伊ê使者已經到Hap-lōe-su。I ê siú-léng í-keng kàu Só-an, i ê sù-chiá í-keng kàu Hap-lōe-su.

5In beh因為bōe利益in ê百姓來見笑，hit-ê百姓m̄是做幫贊，亦m̄是做利益，獨獨是做見笑，做凌辱。In beh in-ūi bōe lī-ek in ê peh-sìⁿ lâi kiàn-siàu, hit ê peh-sìⁿ m̄-sī chòe pang-chān, ia̍h m̄-sī chòe lī-ek, to̍k-to̍k sī chòe kiàn-siàu, chòe lêng-jio̍k.

6論南方ê cheng-siⁿ ê默示。In將財物駝tī驢á ka-chiah頂，將寶物載tī駱駝ê niā，經過艱難困苦ê地，就是母ê獅，公ê獅，毒蛇kap火燄飛ê龍ê地，去hit-ê無利益in ê百姓hia。Lūn lâm-hng ê cheng-siⁿ ê be̍k-sī. In chiong châi-bu̍t tô tī lû-á ka-chiah-téng, chiong pó-mi̍h chài tī lo̍k-tô ê niā, keng-kè kan-lân khùn-khó͘ ê tōe, chiū-sī bú ê sai, kang ê sai, to̍k-chôa kap hé-iām pe ê lêng ê tōe, khì hit ê bô lī-ek in ê peh-sìⁿ hia.

7埃及ê幫贊是空空無利益；所以我稱伊做坐teh bōe振動ê La̍h-hap-pek。Ai-ki̍p ê pang-chān sī khang-khang bô lī-ek; só͘-í góa chheng i chòe chē-teh bōe tín-tāng ê La̍h-hap-pek.

8Taⁿ你去，tī in ê面前，將chit-ê話寫tī牌裡，記tī冊裡，留tī後代，到永遠。Taⁿ lí khì, tī in ê bīn-chêng, chiong chit ê ōe siá tī pâi--nih, kì tī chheh--nih, lâu tī āu-tāi, kàu éng-oán.

9因為in是悖逆ê百姓，講白賊ê kiáⁿ兒，m̄肯聽thàn耶和華ê教示ê kiáⁿ兒。In-ūi in sī pōe-ge̍k ê peh-sìⁿ, kóng pe̍h-chha̍t ê kiáⁿ-jî, m̄-khéng thiaⁿ-thàn Iâ-hô-hoa ê kà-sī ê kiáⁿ-jî.

10In對先見ê講，莫得先見；對先知講，莫得對阮講正直ê話，tio̍h對阮講柔軟ê話，講虛假ê事；In tùi sian-kiàn--ê kóng, Bo̍h--tit sian-kiàn; tùi sian-ti kóng, Bo̍h-tit tùi goán kóng chèng-ti̍t ê ōe, tio̍h tùi goán kóng jiû-loán ê ōe, kóng hu-ké ê sū;

11lín tio̍h放sak正路，離開正直ê路，m̄-thang tī阮ê面前koh提起以色列ê聖ê。lín tio̍h pàng-sak chiàⁿ-lō͘, lī-khui chèng-ti̍t ê lō͘, m̄-thang tī goán ê bīn-chêng koh thê-khí Í-sek-lia̍t ê Sèng--ê.

12所以以色列ê聖ê án-ni講，因為lín棄sak chit-ê話，憑信暴虐kap乖僻，來óa靠伊；Só͘-í Í-sek-lia̍t ê Sèng--ê án-ni kóng, In-ūi lín khì-sak chit ê ōe, pîn-sìn pō-gio̍k kap koāi-phiah, lâi óa-khò i;

13所以chit-ê罪惡tī lín ê身上，親像beh倒ê裂痕，phòng出tī高牆ê；tiap-á久ê中間忽然間倒壞。só͘-í chit ê chōe-ok tī lín ê sin-chiūⁿ, chhin-chhiūⁿ beh-tó ê li̍h-hûn, phòng-chhut tī koâiⁿ-chhiûⁿ--ê; tiap-á-kú ê tiong-kan hut-jiân-kan tó-hoāi.

14伊beh毀壞伊，親像人毀壞燒磁人ê磁器，kòng碎亦無保惜；致到碎塊ê中間，chhē無一片thang tùi火爐來取火，tùi池內來iúⁿ水。I beh húi-hoāi i, chhin-chhiūⁿ lâng húi-hoāi sio-hûi lâng ê hûi-khì, kòng-chhùi ia̍h bô pó-sioh; tì-kàu chhùi-tè ê tiong-kan, chhē bô chi̍t-phìⁿ thang tùi hé-lô͘ lâi chhú hé, tùi tî-lāi lâi iúⁿ chúi.

15主耶和華，以色列ê聖ê，bat án-ni講，Lín ê得tio̍h救在tī oa̍t倒tńg kap安歇；lín得tio̍h氣力在tī平靜kap信靠；總是lín無beh。Chú Iâ-hô-hoa, Í-sek-lia̍t ê Sèng--ê, bat án-ni kóng, Lín ê tit-tio̍h kiù chāi-tī oa̍t-tò-tńg kap an-hioh; lín tit-tio̍h khùi-la̍t chāi-tī pêng-chēng kap sìn-khò; chóng-sī lín bô beh.

16Lín講，無ah，阮beh騎馬來走，所以lín得beh走；koh講，阮beh騎hit-ê真gâu走ê cheng-siⁿ，所以追趕lín-ê亦beh真gâu走。Lín kóng, Bô--ah, goán beh khiâ-bé lâi cháu, só͘-í lín tit-beh cháu; koh kóng, Goán beh khiâ hit-ê chin gâu-cháu ê cheng-siⁿ, só͘-í tui-kóaⁿ lín-ê ia̍h beh chin gâu cháu.

17一人háng-hoah，就一千人逃走；五人háng-hoah，就lín lóng beh逃走；致到所chhun-ê親像山頂ê旗桿，山頭ê大旗。Chi̍t-lâng háng-hoah, chiū chi̍t-chheng lâng tô-cháu; gō͘-lâng háng-hoah, chiū lín lóng beh tô-cháu; tì-kàu só͘ chhun-ê chhin-chhiūⁿ soaⁿ-téng ê kî-koaⁿ, soaⁿ-thâu ê tōa-kî.

18耶和華因為án-ni beh thèng候來施恩惠hō͘ lín，koh因為án-ni beh起來憐憫lín；因為耶和華是公平ê上帝；凡若thèng候伊ê，lóng有福氣。Iâ-hô-hoa in-ūi án-ni beh thèng-hāu lâi si un-hūi hō͘ lín, koh in-ūi án-ni beh khí-lâi lîn-bín lín; in-ūi Iâ-hô-hoa sī kong-pêng ê Siōng-tè; hoān-nā thèng-hāu I--ê, lóng ū hok-khì.

19Lín chiah-ê khiā起tī錫安，tī耶路撒冷ê百姓ah，你的確無koh啼哭；主beh因為你哀求ê聲大施恩hō͘你；伊聽見就beh應你。Lín chiah-ê khiā-khí tī Sek-an, tī Iâ-lō͘-sat-léng ê peh-sìⁿ ah, lí tek-khak bô koh thî-khàu; Chú beh in-ūi lí ai-kiû ê siaⁿ tōa si-un hō͘ lí; I thiaⁿ-kìⁿ chiū beh ìn lí.

20主beh hō͘ lín tī患難中有餅，tī艱苦中有水；lín ê先生無koh閃bih；你beh親目看見你ê先生。Chú beh hō͘ lín tī hoān-lān-tiong ū piáⁿ, tī kan-khó͘-tiong ū chúi; lín ê sian-siⁿ bô koh siám-bih; lí beh chhin-ba̍k khòaⁿ-kìⁿ lí ê sian-siⁿ.

21你偏tī左偏tī右ê時，耳孔內beh聽見有聲tī你ê後面講，這就是路，你tio̍h行伊。Lí phian tī chó phian tī iū ê sî, hī-khang-lāi beh thiaⁿ-kìⁿ ū siaⁿ tī lí ê āu-bīn kóng, Che chiū-sī lō͘, lí tio̍h kiâⁿ i.

22你所雕刻ê偶像，用銀鑲ê，所鑄造ê偶像用金鍍ê，你beh phah lâ-sâm伊，beh棄sak伊，親像污穢ê物；對伊講，去ah。Lí só͘ tiau-khek ê ngó͘-siōng, ēng gûn siuⁿ--ê, só͘ chù-chō ê ngó͘-siōng ēng kim tō͘--ê, lí beh phah lâ-sâm i, beh khì-sak i, chhin-chhiūⁿ ù-òe ê mi̍h; tùi i kóng, Khì--ah.

23你掖種子tī地裡，伊beh kā伊落雨，亦beh hō͘地所出ê米糧真好，真豐盛；到hit時你ê cheng-siⁿ beh tī寬闊ê草場食草。Lí iā chéng-chí tī tōe--nih, I beh kā i lo̍h-hō͘, ia̍h beh hō͘ tōe só͘ chhut ê bí-niû chin-hó, chin hong-sēng; kàu hit-sî lí ê cheng-siⁿ beh tī khoan-khoah ê chháu-tiûⁿ chia̍h-chháu.

24犁園ê牛kap驢á-kiáⁿ beh食soah鹽ê料；chit-ê料是用風鼓kap簸箕過颺(chhiûⁿ)ê。Lôe hn̂g ê gû kap lû-á-kiáⁿ beh chia̍h soah-iâm ê liāu; chit ê liāu sī ēng hong-kó͘ kap pòa-ki kè chhiûⁿ--ê.

25Tī大thâi人，守更樓倒壞ê日，ta̍k ê高山大嶺beh有河水溪流。Tī tōa-thâi lâng, chiú-kiⁿ-lâu tó-hoāi ê ji̍t, ta̍k ê koâiⁿ-soaⁿ tōa-niá beh ū hô-chúi khoe-lâu.

26當耶和華包伊ê百姓損傷ê所在，醫治伊ê百姓phah傷ê日，月ê光beh親像日ê光，日ê光beh加七倍，親像七個日ê光一樣。Tng Iâ-hô-hoa pau I ê peh-sìⁿ sún-siong ê só͘-chāi, i-tī I ê peh-sìⁿ phah-siong ê ji̍t, ge̍h ê kng beh chhin-chhiūⁿ ji̍t ê kng, ji̍t ê kng beh ke chhit-pē, chhin-chhiūⁿ chhit ê ji̍t ê kng chi̍t-iūⁿ.

27看ah，耶和華ê名tùi遠遠來，受氣to̍h起來，密密ê煙chhèng高；伊ê嘴唇有受氣滿滿；伊ê舌親像吞滅ê火。Khòaⁿ ah, Iâ-hô-hoa ê miâ tùi hn̄g-hn̄g lâi, siū-khì to̍h--khí-lâi, ba̍t-ba̍t ê ian chhèng-koâiⁿ; I ê chhùi-tûn ū siū-khì móa-móa; I ê chi̍h chhin-chhiūⁿ thun-bia̍t ê hé.

28伊ê氣親像漲滿ê河水，漲到頷頸；beh用毀滅ê篩來篩萬國；koh tī眾百姓ê嘴內，beh有hō͘人行錯誤ê馬咬韁。I ê khì chhin-chhiūⁿ tiòng-móa ê hô-chúi, tiòng kàu ām-kún; beh ēng húi-bia̍t ê thai lâi thai bān-kok; koh tī chèng peh-sìⁿ ê chhùi-lāi, beh ū hō͘ lâng kiâⁿ chhò-gō͘ ê bé-kā-kiuⁿ.

29Lín beh唱歌，親像守聖節ê暝；koh心內歡喜，親像人pûn笛á 上耶和華ê山，到以色列ê石磐hia。Lín beh chhiùⁿ-koa, chhin-chhiūⁿ siú sèng-choeh ê mî; koh sim-lāi hoaⁿ-hí, chhin-chhiūⁿ lâng pûn ta̍t-á chiūⁿ Iâ-hô-hoa ê soaⁿ, kàu Í-sek-lia̍t ê Chio̍h-pôaⁿ hia.

30耶和華beh hō͘人聽伊威嚴ê聲，koh hō͘人看見伊ê手phah落去，kap受氣中ê受氣，吞滅ê火燄、脆雷、大風、冰雹。Iâ-hô-hoa beh hō͘ lâng thiaⁿ I ui-giâm ê siaⁿ, koh hō͘ lâng khòaⁿ-kìⁿ I ê chhiú phah--lo̍h-khì, kap siū-khì-tiong ê siū-khì, thun-bia̍t ê hé-iām, chhè-lûi, tōa-hong, peng-pha̍uh.

31所以亞述人beh因為耶和華ê聲大驚惶；伊beh用柺á來phah伊。Só͘-í A-su̍t lâng beh in-ūi Iâ-hô-hoa ê siaⁿ tōa kiaⁿ-hiâⁿ; I beh ēng koáiⁿ-á lâi phah i.

32耶和華beh將定tio̍h ê柺á，到tī伊ê身上；ta̍k-pái phah落去，就聽見彈琴phah鼓ê聲；交戰ê時，耶和華動起伊ê手kap伊交戰。Iâ-hô-hoa beh chiong tiāⁿ-tio̍h ê koáiⁿ-á, kàu tī i ê sin-chiūⁿ; ta̍k-pái phah--lo̍h-khì, chiū thiaⁿ-kìⁿ tôaⁿ-khîm phah-kó͘ ê siaⁿ; kau-chiàn ê sî, Iâ-hô-hoa tāng-khí I ê chhiú kap i kau-chiàn.

33因為Tô-hui-te̍k tùi早就設立；為tio̍h王來備辦深koh闊；其中kui堆ê是火kap chōe-chōe柴；耶和華ê氣，親像一條ê琉磺火，hō͘伊to̍h起來。In-ūi Tô-hui-te̍k tùi chá chiū siat-li̍p; ūi-tio̍h ông lâi pī-pān chhim koh khoah; kî-tiong kui-tui--ê sī hé kap chōe-chōe chhâ; Iâ-hô-hoa ê khì, chhin-chhiūⁿ chi̍t-tiâu ê jiû-n̂g hé, hō͘ i to̍h--khí-lâi.