1有災厄ah，hiah-ê落去埃及求幫贊ê，in óa靠馬；亦óa靠車，因為伊chōe；óa靠馬兵，因為伊強；總是無意向以色列ê聖ê，亦無求耶和華。Ū chai-ē ah, hiah-ê lo̍h-khì Ai-ki̍p kiû pang-chān--ê, in óa-khò bé; ia̍h óa-khò chhia, in-ūi i chōe; óa-khò bé-peng, in-ūi i kiông; chóng-sī bô ì-hiòng Í-sek-lia̍t ê Sèng--ê, ia̍h bô kiû Iâ-hô-hoa.

2耶和華其實有智慧，伊beh降災厄，無收倒tńg伊ê話；beh起來攻擊hiah-ê pháiⁿ人ê家，koh攻擊hiah-ê幫贊人做pháiⁿ-ê。Iâ-hô-hoa kî-si̍t ū tì-hūi, I beh kàng chai-ē, bô siu tò-tńg I ê ōe; beh khí-lâi kong-kek hiah ê pháiⁿ-lâng ê ke, koh kong-kek hiah-ê pang-chān lâng chòe pháiⁿ--ê.

3埃及人不過是人，m̄是上帝；in ê馬不過是肉，m̄是神；耶和華一下伸手，hit-ê幫贊人ê beh觸tio̍h，hit-ê受幫贊ê beh跋倒，lóng相kap滅無。Ai-ki̍p lâng put-kò sī lâng, m̄-sī Siōng-tè; in ê bé put-kò sī bah, m̄-sī sîn; Iâ-hô-hoa chi̍t-ē chhun-chhiú, hit ê pang-chān lâng--ê beh tak--tio̍h, hit-ê siū pang-chān--ê beh poa̍h-tó, lóng saⁿ-kap bia̍t-bô.

4因為耶和華對我án-ni講，親像獅kap細隻獅顧伊所抓tio̍h ê物，就hm̄-hm̄哮，雖然召集chōe-chōe牧者來攻擊伊，伊lóng無因為in ê聲來驚惶，亦無因為in ê喧嘩來屈服；親像án-ni，萬軍ê耶和華beh臨到，交戰tī錫安山kap伊ê山嶺。In-ūi Iâ-hô-hoa tùi góa án-ni kóng, Chhin-chhiūⁿ sai kap sòe-chiah sai kò͘ i só͘ jiàu--tio̍h ê mi̍h, chiū hm̄-hm̄-háu, sui-jiân tiàu-chi̍p chōe-chōe bo̍k-chiá lâi kong-kek i, i lóng bô in-ūi in ê siaⁿ lâi kiaⁿ-hiâⁿ, ia̍h bô in-ūi in ê soan-hoa lâi khut-ho̍k; chhin-chhiūⁿ án-ni, bān-kun ê Iâ-hô-hoa beh lîm-kàu, kau-chiàn tī Sek-an soaⁿ kap i ê soaⁿ-niá.

5親像鳥thí開翼，án-ni萬軍ê耶和華beh保護耶路撒冷；koh保護伊，koh牽救伊，koh pôaⁿ過來救伊。Chhin-chhiūⁿ chiáu thí-khui si̍t, án-ni bān-kun ê Iâ-hô-hoa beh pó-hō͘ Iâ-lō͘-sat-léng; koh pó-hō͘ i, koh khan-kiù i, koh pôaⁿ-kè lâi kiù i.

6以色列ê kiáⁿ孫ah，lín所深深悖逆ê，taⁿ tio̍h歸向祂。Í-sek-lia̍t ê kiáⁿ-sun ah, lín só͘ chhim-chhim pōe-ge̍k-ê, taⁿ tio̍h kui-ǹg I.

7因為到hit日，ta̍k人beh將伊銀ê偶像，金ê偶像，就是lín ê手所造，陷落lín tī罪ê，lóng放sak伊。In-ūi kàu hit-ji̍t, ta̍k-lâng beh chiong i gûn ê ngó͘-siōng, kim ê ngó͘-siōng, chiū-sī lín ê chhiú só͘ chō, hām-lo̍h lín tī chōe--ê, lóng pàng-sak i.

8亞述人beh死tī刀下，m̄是對tī人，亦m̄是平常人ê刀beh滅伊；伊beh tùi刀ê面前來逃閃，伊ê少年人beh做苦工。A-su̍t lâng beh sí tī to-ē, m̄-sī tùi-tī lâng, ia̍h m̄-sī pêng-siông lâng ê to beh bia̍t i; i beh tùi to ê bīn-chêng lâi tô-siám, i ê siàu-liân lâng beh chòe khó͘-kang.

9伊ê石磐beh因為驚惶來無去；伊ê首領beh因為大旗來驚惶；這是hit-ê有火tī錫安，有爐tī耶路撒冷ê耶和華講ê。I ê chio̍h-pôaⁿ beh in-ūi kiaⁿ-hiâⁿ lâi bô--khì; i ê siú-léng beh in-ūi tōa-kî lâi kiaⁿ-hiâⁿ; che sī hit ê ū hé tī Sek-an, ū lô͘ tī Iâ-lō͘-sat-léng ê Iâ-hô-hoa kóng ê.

1看ah，beh有一個王照公義來做王，beh有首領照公平來掌權。Khòaⁿ ah, beh ū chi̍t ê ông chiàu kong-gī lâi chòe-ông, beh ū siú-léng chiàu kong-pêng lâi chiáng-koân.

2Beh有人做親像閃避風ê所在，做bih大雨ê位；親像溪流ê水tī乾地，親像大石ê蔭影tī厭倦ê所在。Beh ū lâng chòe chhin-chhiūⁿ siám-pī hong ê só͘-chāi, chòe bih tōa-hō͘ ê ūi; chhin-chhiūⁿ khoe-lâu ê chúi tī ta-tōe, chhin-chhiūⁿ tōa-chio̍h ê ìm-ńg tī ià-siān ê só͘-chāi.

3Hit-ê能看見ê人，目睭無koh煙暈(n̄g)；能聽ê人，耳孔beh俯teh聽；Hit-ê ōe khòaⁿ-kìⁿ ê lâng, ba̍k-chiu bô koh ian-n̄g; ōe thiaⁿ ê lâng, hī-khang beh àⁿ teh-thiaⁿ;

4躁性人ê心beh明白智識；tioh舌根ê人ê舌beh講話緊koh明。sò-sèng lâng ê sim beh bêng-pe̍k tì-sek; tioh-chi̍h-kun ê lâng ê chi̍h beh kóng-ōe kín koh bêng.

5戇人無koh稱做高明，堅吝ê人無koh稱做大量。Gōng-lâng bô koh chheng-chòe ko-bêng, kian-līn ê lâng bô koh chheng chòe tōa-liōng.

6因為戇人beh講戇話，心想做pháiⁿ，慣勢行褻瀆ê事，講差謬ê話攻擊耶和華，hō͘ iau ê人無物thang食，嘴乾ê人無水thang lim。In-ūi gōng-lâng beh kóng gōng-ōe, sim siūⁿ chòe-pháiⁿ, koàiⁿ-sì kiâⁿ siat-to̍k ê sū, kóng chha-biū ê ōe kong-kek Iâ-hô-hoa, hō͘ iau ê lâng bô mi̍h thang chia̍h, chhùi-ta ê lâng bô chúi thang lim.

7堅吝ê人所用ê法度是pháiⁿ-ê，伊設計謀，用白賊話毀滅艱苦人；sòng-hiong ê人講論公理ê時，伊亦猶原行毀滅；Kian-līn ê lâng só͘ ēng ê hoat-tō͘ sī pháiⁿ--ê, i siat kè-bô͘, ēng pe̍h-chha̍t ōe húi-bia̍t kan-khó͘ lâng; sòng-hiong ê lâng káng-lūn kong-lí ê sî, i ia̍h iû-goân kiâⁿ húi-bia̍t;

8總是高明ê人計畫高明ê事，亦長長tiàm tī高明。chóng-sī ko-bêng ê lâng kè-e̍k ko-bêng ê sū, ia̍h tn̂g-tn̂g tiàm tī ko-bêng.

9清閒ê婦人人ah，tio̍h起來聽我ê聲；無掛慮ê cha-bó͘-kiáⁿ ah，tio̍h 俯耳孔聽我ê話。Chheng-êng ê hū-jîn-lâng ah, tio̍h khí-lâi thiaⁿ góa ê siaⁿ; bô khòa-lū ê cha-bó͘-kiáⁿ ah, tio̍h àⁿ hī-khang thiaⁿ góa ê ōe.

10無掛慮ê cha-bó͘-kiáⁿ ah，koh過一年khah加，beh驚惶；因為無葡萄thang挽，無果子thang收成。Bô khòa-lū ê cha-bó͘-kiáⁿ ah, koh kè chi̍t-nî khah-ke, beh kiaⁿ-hiâⁿ; in-ūi bô phû-tô thang bán, bô ké-chí thang siu-sêng.

11清閒ê婦人人ah，tio̍h ngia̍uh-ngia̍uh-chhoah；無掛慮ê cha-bó͘-kiáⁿ ah，tio̍h驚惶，thǹg衫赤theh，腰hâ麻布。Chheng-êng ê hū-jîn-lâng ah, tio̍h ngia̍uh-ngia̍uh-chhoah; bô khòa-lū ê cha-bó͘-kiáⁿ ah, tio̍h kiaⁿ-hiâⁿ, thǹg-saⁿ chhiah-theh, io hâ môa-pò͘.

12In beh為tio̍h好ê田地kap茂盛ê葡萄樹搥胸。In beh ūi-tio̍h hó ê chhân-tōe kap bō͘-sēng ê phû-tô-chhiū tûi-heng.

13刺phè蒺藜beh發生tī我ê百姓ê地；亦beh發生tī歡喜ê城，快樂ê厝。Chhì-phè chi̍t-lê beh hoat-siⁿ tī Góa ê peh-sìⁿ ê tōe; ia̍h beh hoat-siⁿ tī hoaⁿ-hí ê siâⁿ, khoài-lo̍k ê chhù.

14因為王宮beh荒廢，鬧熱ê城beh冷靜；山頭kap守更樓永遠做山洞，做野驢歡喜ê所在，做kui陣cheng-siⁿ ê草場。In-ūi ông-kiong beh hong-hòe, lāu-jia̍t ê siâⁿ beh léng-chēng; soaⁿ-thâu kap chiú-kiⁿ-lâu éng-oán chòe soaⁿ-tōng, chòe iá-lû hoaⁿ-hí ê só͘-chāi, chòe kui-tīn cheng-siⁿ ê chháu-tiûⁿ.

15Thèng候聖ê神tùi頂面piàⁿ落tī咱，曠野變做肥ê田，肥ê田看做親像樹林。Thèng-hāu sèng ê Sîn tùi téng-bīn piàⁿ-lo̍h tī lán, khòng-iá piàn-chòe pûi ê chhân, pûi ê chhân khòaⁿ-chòe chhin-chhiūⁿ chhiū-nâ.

16Hit時公平beh tòa tī曠野，公義beh tiàm tī肥ê田。Hit-sî kong-pêng beh tòa tī khòng-iá, kong-gī beh tiàm tī pûi ê chhân.

17義ê功效是平安，義ê效驗是平靜安穩，到tī永遠。Gī ê kong-hāu sī pêng-an, gī ê hāu-giām sī pêng-chēng an-ún, kàu tī éng-oán.

18我ê百姓beh tiàm tī平安ê宅，安穩ê厝，清靜歇睏ê所在。Góa ê peh-sìⁿ beh tiàm tī pêng-an ê the̍h, an-ún ê chhù, chheng-chēng hioh-khùn ê só͘-chāi.

19獨獨樹林倒落去ê時beh落雹；koh hit-ê城beh降落到真低。To̍k-to̍k chhiū-nâ tó--lo̍h-khì ê sî beh lo̍h-pha̍uh; koh hit ê siâⁿ beh kàng-lo̍h kàu chin-kē.

20Lín chiah-ê掖種tī ta̍k ê水邊ê，放牛驢tī-hia ê，有福氣。Lín chiah-ê iā-chéng tī ta̍k ê chúi-piⁿ--ê, pàng gû lû tī-hia ê, ū hok-khì.

1災厄ah，你chit-ê搶奪人ê，家己無受搶奪；行tāi-chì詭詐ê，人無用詭詐款待你！你搶奪tú-á soah，家己beh受搶奪；你行詭詐tú-á soah，人beh用詭詐款待你。Chai-ē ah, lí chit-ê chhiúⁿ-toa̍t lâng--ê, ka-kī bô siū chhiúⁿ-toa̍t; kiâⁿ tāi-chì khúi-chà--ê, lâng bô ēng khúi-chà khoán-thāi lí! Lí chhiúⁿ-toa̍t tú-á soah, ka-kī beh siū chhiúⁿ-toa̍t; lí kiâⁿ khúi-chà tú-á soah, lâng beh ēng khúi-chà khoán-thāi lí.

2耶和華ah，求你施恩hō͘阮；阮thèng候你，求你ta̍k早起做阮ê手，tú-tio̍h患難ê時，做阮ê拯救。Iâ-hô-hoa ah, kiû Lí si-un hō͘ goán; goán thèng-hāu Lí, kiû Lí ta̍k chá-khí chòe goán ê chhiú, tú-tio̍h hoān-lān ê sî, chòe goán ê chín-kiù.

3喧嘩ê聲一下發，眾百姓逃走；祢一下起來，列國四散。Soan-hoa ê siaⁿ chi̍t-ē hoat, chèng peh-sìⁿ tô-cháu; Lí chi̍t-ē khí-lâi, lia̍t-kok sì-sòaⁿ.

4Lín所搶ê beh hō͘人收拾，親像剪á蟲ê收拾物；人走去hia，親像草蜢跳來跳去。Lín só͘-chhiúⁿ--ê beh hō͘ lâng siu-si̍p, chhin-chhiūⁿ chián-á-thâng ê siu-si̍p mi̍h; lâng cháu--khì hia, chhin-chhiūⁿ chháu-meh thiàu-lâi thiàu-khì.

5耶和華受尊做高；因為伊tiàm tī高ê所在；伊用公平公義充滿錫安。Iâ-hô-hoa siū chun-chòe koâiⁿ; in-ūi I tiàm tī koâiⁿ ê só͘-chāi; I ēng kong-pêng kong-gī chhiong-móa Sek-an.

6你一生一世beh得tio̍h安穩，有豐盛ê救恩，kap智慧kap知識；敬畏耶和華做你ê寶貝。Lí it-seng it-sì beh tit-tio̍h an-ún, ū hong-sēng ê kiù-un, kap tì-hūi kap chai-bat; kèng-ùi Iâ-hô-hoa chòe lí ê pó-pòe.

7看ah，in ê豪傑tī外面哀傷；求和ê使者痛心啼哭。Khòaⁿ ah, in ê hô-kia̍t tī gōa-bīn ai-siong; kiû-hô ê sù-chiá thòng-sim thî-khàu.

8大路拋荒，lóng無人過路；伊背約，看輕chiah-ê城，無要緊百姓。Tōa-lō͘ pha-hng, lóng bô lâng kè-lō͘; i pōe-iok, khòaⁿ-khin chiah ê siâⁿ, bô iàu-kín peh-sìⁿ.

9地上悲哀衰退；黎巴嫩見笑枯焦；Sa-lûn親像曠野；Pa-san kap Ka-bi̍t ê樹木lak光光。Tōe-chiūⁿ pi-ai soe-thè; Lī-pa-lùn kiàn-siàu ko͘-tâ; Sa-lûn chhin-chhiūⁿ khòng-iá; Pa-san kap Ka-bi̍t ê chhiū-ba̍k lak kng-kng.

10耶和華講，Taⁿ我beh起來；taⁿ我beh興起；taⁿ我beh家己高。Iâ-hô-hoa kóng, Taⁿ Góa beh khí-lâi; taⁿ Góa beh heng-khí; taⁿ Góa beh ka-kī koâiⁿ.

11Lín懷孕粗糠來生稻稿；lín ê氣beh親像火來吞滅lín。Lín hoâi-īn chho͘-khng lâi siⁿ tiū-kó; lín ê khì beh chhin-chhiūⁿ hé lâi thun-bia̍t lín.

12列邦beh親像已經燒ê石灰；親像已經割ê刺phè，受燒tī火中。Lia̍t-pang beh chhin-chhiūⁿ í-keng sio ê chio̍h-he; chhin-chhiūⁿ í-keng koah ê chhì-phè, siū-sio tī hé-tiong.

13Lín遠ê人，tio̍h聽我所行ê，lín近ê人tio̍h知我ê大權能。Lín hn̄g ê lâng, tio̍h thiaⁿ Góa só͘-kiâⁿ--ê, lín kūn ê lâng tio̍h chai Góa ê tōa koân-lêng.

14錫安中ê罪人lóng驚惶，無敬虔ê人beh直直chhoah。咱中間是誰能kap吞滅ê火相kap tòa？咱中間是誰能kap永遠ê燒毀相kap tòa ah？Sek-an tiong ê chōe-jîn lóng kiaⁿ-hiâⁿ, bô kèng-khiân ê lâng beh ti̍t-ti̍t chhoah. Lán tiong-kan chī-chūi ōe kap thun-bia̍t ê hé saⁿ-kap tòa? Lán tiong-kan chī-chūi ōe kap éng-oán ê sio-húi saⁿ-kap tòa ah?

15行tāi-chì公義，講話正直，怨恨勒索ê財利，搖手無受pò͘賂，塞密耳孔無聽流血ê話，khoeh目睭無看pháiⁿ-tāi-ê；Kiâⁿ tāi-chì kong-gī, kóng-ōe chèng-ti̍t, oàn-hūn le̍k-sek ê châi-lī, iô chhiú bô siū pò͘-lō͘, that-ba̍t hī-khang bô thiaⁿ lâu-huih ê ōe, khoeh ba̍k-chiu bô khòaⁿ pháiⁿ-tāi--ê;

16伊beh tiàm tī高ê所在；堅固ê石磐做伊ê衛所；beh有米糧供給伊，伊ê水的確bōe絕斷。i beh tiàm tī koâiⁿ ê só͘-chāi; kian-kò͘ ê chio̍h-pôaⁿ chòe i ê ōe-só͘; beh ū bí-niû kiong-kip i, i ê chúi tek-khak bōe choa̍t-tn̄g.

17你ê目睭beh看見王ê súi，beh看見開闊ê地。Lí ê ba̍k-chiu beh khòaⁿ-kìⁿ ông ê súi, beh khòaⁿ-kìⁿ khui-khoah ê tōe.

18你ê心beh siàu念hit-ê驚惶ê事；管賬ê tī toh-lo̍h？秤(phêng)貢銀ê tī toh-lo̍h？算守更樓ê tī toh-lo̍h？Lí ê sim beh siàu-liām hit ê kiaⁿ-hiâⁿ ê sū; koán-siàu--ê tī toh-lo̍h? phêng kòng-gûn ê tī toh-lo̍h? sǹg chiú-kiⁿ-lâu--ê tī toh-lo̍h?

19你的確無看見強猛ê百姓，就是講話oh聽，你bōe明白；言語gí-bú gí-ngiáu，你bōe曉得ê。Lí tek-khak bô khòaⁿ-kìⁿ kiông-béng ê peh-sìⁿ, chiū-sī kóng-ōe oh-thiaⁿ, lí bōe bêng-pe̍k; giân-gú gí-bú gí-ngiáu, lí bōe hiáu-tit--ê.

20你tio̍h看錫安，咱守聖節ê城，你ê目睭beh看見耶路撒冷做安靜ê厝宅，做無移徙ê布棚，伊ê杙(khi̍t)永無拔出，伊ê索lóng無斷。Lí tio̍h khòaⁿ Sek-an, lán siú sèng-choeh ê siâⁿ, lí ê ba̍k-chiu beh khòaⁿ-kìⁿ Iâ-lō͘-sat-léng chòe an-chēng ê chhù-the̍h, chòe bô î-sóa ê pò͘-pîⁿ, i ê khi̍t éng bô pu̍ih-chhut, i ê soh lóng bô tn̄g.

21Tī-hia耶和華beh顯明威嚴kap咱相kap tī-teh，親像江河開闊ê地；hit中間的確無有划槳ê船往來，亦無有威風ê船經過。Tī-hia Iâ-hô-hoa beh hián-bêng ui-giâm kap lán saⁿ-kap tī-teh, chhin-chhiūⁿ kang-hô khui-khoah ê tōe; hit tiong-kan tek-khak bô ū kò-chiúⁿ ê chûn óng-lâi, ia̍h bô ū ui-hong ê chûn keng-kè.

22因為耶和華是咱ê審判司，耶和華是kā咱設律法ê；耶和華是咱ê王；祂beh拯救咱。In-ūi Iâ-hô-hoa sī lán ê sím-phòaⁿ-si, Iâ-hô-hoa sī kā lán siat lu̍t-hoat--ê; Iâ-hô-hoa sī lán ê ông; I beh chín-kiù lán.

23你ê帆索lóng lut去；船桅khiā-bōe在；風帆chhia bōe起來；hit時chōe-chōe搶來ê物hō͘人分去；跛腳ê亦搶tio̍h物。Lí ê phâng-soh lóng lut--khì; chûn-ûi khiā-bōe-chāi; hong-phâng chhia bōe-khí-lâi; hit-sî chōe-chōe chhiúⁿ--lâi ê mi̍h hō͘ lâng pun--khì; pái-kha--ê ia̍h chhiúⁿ-tio̍h mi̍h.

24Khiā起ê百姓的確無講，我有破病；其中khiā起ê百姓，罪過lóng赦免。Khiā-khí ê peh-sìⁿ tek-khak bô kóng, Góa ū phòa-pīⁿ; kî-tiong khiā-khí ê peh-sìⁿ, chōe-kòa lóng sià-bián.