1列國ah，lín tio̍h近前來聽；眾百姓ah，lín tio̍h 俯耳孔來聽；地kap伊所充滿ê，世界kap見若對伊來出ê，lóng tio̍h聽。Lia̍t-kok ah, lín tio̍h kūn-chêng lâi thiaⁿ; chèng peh-sìⁿ ah, lín tio̍h àⁿ hī-khang lâi thiaⁿ; tōe kap i só͘ chhiong-móa--ê, sè-kài kap kìⁿ-nā tùi i lâi chhut--ê, lóng tio̍h thiaⁿ.

2因為耶和華受氣到列國，大受氣in ê全軍；擬定lóng滅伊，將in交hō͘人thâi。In-ūi Iâ-hô-hoa siū-khì kàu lia̍t-kok, tōa siū-khì in ê choân-kun; gí-tiāⁿ lóng bia̍t i, chiong in kau hō͘ lâng thâi.

3In受thâi-ê的確hiat-ka̍k，身屍ê臭味chhèng起來，chiah-ê山受in ê血熔化。In siū-thâi-ê tek-khak hiat-ka̍k, sin-si ê chhàu-bī chhèng--khí-lâi, chiah ê soaⁿ siū in ê huih iûⁿ-hòa.

4天ê萬象beh消無，天beh親像chhak捲起來；伊ê萬象beh衰敗，親像葡萄樹ê葉衰敗，koh親像無花果樹ê衰敗一樣。Thiⁿ ê bān-siōng beh siau-bô, thiⁿ beh chhin-chhiūⁿ chhak kńg--khí-lâi; i ê bān-siōng beh soe-pāi, chhin-chhiūⁿ phû-tô-chhiū ê hio̍h soe-pāi, koh chhin-chhiūⁿ bû-hoa-kó-chhiū ê soe-pāi chi̍t-iūⁿ.

5因為我ê刀tī天裡已經lim夠額；看ah，chit-ê刀beh到Í-tong，以及我所擬定beh滅無ê百姓，來審判伊。In-ūi Góa ê to tī thiⁿ--nih í-keng lim kàu-gia̍h; khòaⁿ ah, chit ê to beh kàu Í-tong, í-ki̍p Góa só͘ gí-tiāⁿ beh bia̍t-bô ê peh-sìⁿ, lâi sím-phòaⁿ i.

6耶和華ê刀有血滿滿，bak-tio̍h油kap羊á-kiáⁿ kap山羊ê血，以及公ê綿羊腰子ê油；因為耶和華tī Pho-su-la̍h有祭祀，tī Í-tong地有大thâi人ê事。Iâ-hô-hoa ê to ū huih móa-móa, bak-tio̍h iû kap iûⁿ-á-kiáⁿ kap soaⁿ-iûⁿ ê huih, í-ki̍p kang ê mî-iûⁿ io-chí ê iû; in-ūi Iâ-hô-hoa tī Pho-su-la̍h ū chè-sū, tī Í-tong tōe ū tōa thâi-lâng ê sū.

7野牛beh kap in落來，牛á kap公ê牛亦是án-ni；in ê地因為血來醉，in ê土粉因為油來肥。Iá-gû beh kap in lo̍h--lâi, gû-á kap kang ê gû ia̍h sī án-ni; in ê tōe in-ūi huih lâi chùi, in ê thô͘-hún in-ūi iû lâi pûi.

8因為耶和華有報仇ê日，為tio̍h錫安ê案件，有報應ê年。In-ūi Iâ-hô-hoa ū pò-siû ê ji̍t, ūi-tio̍h Sek-an ê àn-kiāⁿ, ū pò-èng ê nî.

9Í-tong chiah-ê溪beh變做瀝青，土粉beh變做琉磺，伊ê地成做已經to̍h ê瀝青。Í-tong chiah ê khoe beh pìⁿ-chòe le̍k-chhiⁿ, thô͘-hún beh pìⁿ-chòe jiû-n̂g, i ê tōe chiâⁿ-chòe í-keng to̍h ê le̍k-chhiⁿ.

10暝日lóng無熄；伊ê煙永遠chhèng起來，代代拋荒；永遠無人經過。Mî-ji̍t lóng bô sit; i ê ian éng-oán chhèng--khí-lâi, tāi-tāi pha-hng; éng-oán bô lâng keng-kè.

11Thê-ô͘河豬beh得tio̍h做業；貓頭鷹烏鴉beh tiàm tī hit中間；伊beh將荒廢ê準繩，渾沌ê 墜線，牽tī伊ê頂面。Thê-ô͘ hô-ti beh tit-tio̍h chòe-gia̍p; niau-thâu-eng o͘-a beh tiàm tī hit tiong-kan; I beh chiong hong-hòe ê chún-chîn, hūn-tūn ê tūi-sòaⁿ, khan tī i ê téng-bīn.

12In beh叫尊貴ê人來治理國，tī-hia lóng無一個，貴族亦lóng無。In beh kiò chun-kùi ê lâng lâi tī-lí kok, tī-hia lóng bô chi̍t-ê, kùi-cho̍k ia̍h lóng bô.

13In ê 宮殿beh發刺phè，衛所beh發蒺藜kap草刺；beh做山狗ê穴，鴕鳥ê siū。In ê keng-tiān beh hoat chhì-phè, ōe-só͘ beh hoat chi̍t-lê kap chháu-chhì; beh chòe soaⁿ-káu ê hia̍t, tô-chiáu ê siū.

14野獸kap豺狼相tú-tio̍h；野山羊beh kap伊ê伴對叫；暝時ê妖怪beh tī-hia歇，家己chhē安歇ê所在。Iá-siù kap chhâi-lông saⁿ tú-tio̍h; iá-soaⁿ-iûⁿ beh kap i ê phōaⁿ tùi-kiò; mî--sî ê iau-koài beh tī-hia hioh, ka-kī chhē an-hioh ê só͘-chāi.

15箭蛇beh tī-hia作siū、生卵、孵卵、出kiáⁿ，koh聚集kiáⁿ tī伊ê腹肚下；鷹鳥kui對聚集tī-hia。Chìⁿ-chôa beh tī-hia choh siū, siⁿ-nn̄g, pū-nn̄g, chhut-kiáⁿ, koh chū-chi̍p kiáⁿ tī i ê pak-tó͘-ē; eng-chiáu kui-tùi chū-chi̍p tī-hia.

16Lín tio̍h講究耶和華ê冊來讀伊；其中無欠一項無一隻無匹配；因為我ê嘴已經出命令，伊ê神已經聚集in。Lín tio̍h káng-kiù Iâ-hô-hoa ê chheh lâi tha̍k i; kî-tiong bô-khiàm chi̍t-hāng bô chi̍t-chiah bô phit-phòe; in-ūi Góa ê chhùi í-keng chhut bēng-lēng, I ê sîn í-keng chū-chi̍p in.

17伊亦為in liam-khau，koh親手用準繩kā in分地；in beh永遠得tio̍h伊做業，ta̍k世代tiàm tī-hia。I ia̍h ūi in liam-khau, koh chhin-chhiú ēng chún-chîn kā in pun-tōe; in beh éng-oán tit-tio̍h i chòe-gia̍p, ta̍k sè-tāi tiàm tī-hia.

1曠野kap乾燥ê地的確歡喜；沙漠亦beh快樂，koh親像玫瑰開花。Khòng-iá kap ta-sò ê tōe tek-khak hoaⁿ-hí; soa-bô͘ ia̍h beh khoài-lo̍k, koh chhin-chhiūⁿ mûi-kùi khui-hoe.

2伊beh開花茂盛，來歡喜，beh有歡喜kap唱歌；黎巴嫩ê榮光，Ka-bi̍t kap Sa-lûn ê súi，beh歸伊；in beh看見耶和華ê榮光，咱ê上帝ê美妙。I beh khui-hoe bō͘-sēng, lâi hoaⁿ-hí, beh ū hoaⁿ-hí kap chhiùⁿ-koa; Lī-pa-lùn ê êng-kng, Ka-bi̍t kap Sa-lûn ê súi, beh kui i; in beh khòaⁿ-kìⁿ Iâ-hô-hoa ê êng-kng, lán ê Siōng-tè ê bí-biāu.

3Lín tio̍h hō͘軟弱ê手勇壯，無力ê腳頭u自在。Lín tio̍h hō͘ loán-jio̍k ê chhiú ióng-chòng, bô-la̍t ê kha-thâu-u chū-chāi.

4對小膽 ê人講，Lín tio̍h剛強，m̄免驚；看ah，lín ê上帝beh來報仇，beh來行極大ê報應；祂beh來拯救lín。Tùi sió-táⁿ ê lâng kóng, Lín tio̍h kong-kiông, m̄-bián kiaⁿ; khòaⁿ ah, lín ê Siōng-tè beh lâi pò-siû, beh lâi kiâⁿ ke̍k-tōa ê pò-èng; I beh lâi chín-kiù lín.

5Hit時chhiⁿ-mî人ê目睭beh開，臭耳人ê耳孔beh利。Hit-sî chhiⁿ-mî lâng ê ba̍k-chiu beh khui, chhàu-hī-lâng ê hī-khang beh lāi.

6Hit時跛腳ê beh tiô跳親像鹿，啞口ê舌beh唱歌；因為水chhèng出tī曠野，溪流chhèng出tī沙漠。Hit-sî pái-kha--ê beh tiô-thiàu chhin-chhiūⁿ lo̍k, é-káu ê chi̍h beh chhiùⁿ-koa; in-ūi chúi chhèng-chhut tī khòng-iá, khoe-lâu chhèng-chhut tī soa-bô͘.

7發出光ê沙，beh變做水池，乾燥ê地beh變做水泉；tī山狗tó teh睏ê所在beh有青草蘆葦kap蒲草。Hoat-chhut-kng ê soa, beh pìⁿ-chòe chúi-tî, ta-sò ê tōe beh pìⁿ-chòe chúi-chôaⁿ; tī soaⁿ-káu tó teh-khùn ê só͘-chāi beh ū chhiⁿ-chháu lô͘-úi kap pô͘-chháu.

8Tī-hia beh有一條高ê路，chit條路beh稱做聖ê路；污穢ê人bōe得thang經過；專專beh做in ê路用；行路ê人，雖然愚戇，亦bōe行錯。Tī-hia beh ū chi̍t tiâu koâiⁿ ê lō͘, chit tiâu lō͘ beh chheng-chòe Sèng ê lō͘; ù-òe ê lâng bōe-tit-thang keng-kè; choan-choan beh chòe in ê lō͘-ēng; kiâⁿ-lō͘ ê lâng, sui-jiân gû-gōng, ia̍h bōe kiâⁿ-chhò.

9Tī-hia的確無獅，猛獸亦無上chit條路；tī-hia lóng無tú-tio̍h in；獨獨得tio̍h贖回ê百姓tī-hia行。Tī-hia tek-khak bô sai, béng-siù ia̍h-bô chiūⁿ chit tiâu lō͘; tī-hia lóng bô tú-tio̍h in; to̍k-to̍k tit-tio̍h sio̍k-hôe ê peh-sìⁿ tī-hia kiâⁿ.

10Koh耶和華救贖ê百姓beh倒tńg來，beh唱歌來到錫安；得tio̍h永遠ê歡喜做冕旒；in beh歡喜快樂，憂悶吐氣lóng beh走去。Koh Iâ-hô-hoa kiù-sio̍k ê peh-sìⁿ beh tò-tńg--lâi, beh chhiùⁿ-koa lâi kàu Sek-an; tit-tio̍h éng-oán ê hoaⁿ-hí chòe bián-liû; in beh hoaⁿ-hí khoài-lo̍k, iu-būn thó͘-khùi lóng beh cháu--khì.

1Hi-se-ka王十四年，亞述王Se-ná-ki-li̍p上來攻擊猶大一切堅固ê城來取伊。Hi-se-ka ông cha̍p-sì nî, A-su̍t ông Se-ná-ki-li̍p chiūⁿ lâi kong-kek Iû-tāi it-chhè kian-kò͘ ê siâⁿ lâi chhú i.

2亞述王tùi拉結差La̍h-pek-sa-ki chhōa大隊兵去耶路撒冷，到Hi-se-ka王hia；伊就khiā tī 頂池 ê水溝邊，tī漂布師傅ê田ê大路。A-su̍t ông tùi La̍h-kiat chhe La̍h-pek-sa-ki chhōa tōa-tūi peng khì Iâ-lō͘-sat-léng, kàu Hi-se-ka ông hia; i chiū khiā tī téng-tî ê chúi-kau-piⁿ, tī phiò-pò͘ sai-hū ê chhân ê tōa-lō͘.

3Hit-tia̍p有管家ê Hi-le̍k-ka ê kiáⁿ Í-lī-a-kèng，kap書記Sià-pek-ná，kap史官A-sat ê kiáⁿ Iok-a，出來見伊。Hit-tia̍p ū koán-ke ê Hi-le̍k-ka ê kiáⁿ Í-lī-a-kèng, kap su-kì Sià-pek-ná, kap sú-koaⁿ A-sat ê kiáⁿ Iok-a, chhut-lâi kìⁿ i.

4La̍h-pek-sa-ki對in講，lín去kā Hi-se-ka講，亞述王大王án-ni講，你所óa靠ê，是óa靠甚麼？La̍h-pek-sa-ki tùi in kóng, Lín khì kā Hi-se-ka kóng, A-su̍t ông tāi-ông án-ni kóng, Lí só͘ óa-khò ê, sī óa-khò sím-mi̍h?

5你講，有計謀有氣力thang交戰；我講這是空空ê話nā-tiāⁿ；你到底óa靠是誰 chiah背叛我ah？Lí kóng, Ū kè-bô͘ ū khùi-la̍t thang kau-chiàn; góa kóng che sī khang-khang ê ōe nā-tiāⁿ; lí tàu-tí óa-khò chī-chūi chiah pōe-poān góa ah?

6看ah，你所óa靠ê埃及是hit-ê pit破ê蘆竹稈；人若òa伊，就會刺入伊ê手；埃及王法老對一切óa靠伊ê人亦是án-ni。Khòaⁿ ah, lí só͘ óa-khò ê Ai-ki̍p sī hit ê pit-phòa ê lô͘-tek-koáiⁿ; lâng nā òa i, chiū ōe chhiah-ji̍p i ê chhiú; Ai-ki̍p ông Hoat-ló tùi it-chhè óa-khò i ê lâng ia̍h sī án-ni.

7你若kā我講，我óa靠耶和華阮ê上帝；chit-ê耶和華kiám-m̄是Hi-se-ka bat廢祂ê山頭壇kap祂ê祭壇，亦bat對猶大kap耶路撒冷ê人講，Lín tio̍h tī chit-ê壇前敬拜ê mah？Lí nā kā góa kóng, Góa óa-khò Iâ-hô-hoa goán ê Siōng-tè; chit ê Iâ-hô-hoa kiám-m̄-sī Hi-se-ka bat hòe I ê soaⁿ-thâu-tôaⁿ kap I ê chè-tôaⁿ, ia̍h bat tùi Iû-tāi kap Iâ-lō͘-sat-léng ê lâng kóng, Lín tio̍h tī chit ê tôaⁿ-chêng kèng-pài--ê mah?

8Taⁿ請你用準當hō͘我ê主亞述王，我hō͘你兩千隻馬，看你hit面能備辦人騎伊á-bōe。Taⁿ chhiáⁿ lí ēng chún-tǹg hō͘ góa ê chú A-su̍t ông, góa hō͘ lí nn̄g-chheng chiah bé, khòaⁿ lí hit-bīn ōe pī-pān lâng khiâ i á-bōe.

9若bōe，thái-thó能phah退我ê主chiah-ê第一細ê奴僕中一個軍長，亦竟然óa靠埃及，ài得tio̍h戰車kap馬兵ah？Nā bōe, thái-thó ōe phah-thè góa ê chú chiah ê tē-it sòe ê lô͘-po̍k-tiong chi̍t ê kun-tiúⁿ, ia̍h kéng-jiân óa-khò Ai-ki̍p, ài tit-tio̍h chiàn-chhia kap bé-peng ah?

10Taⁿ我上來攻擊毀滅chit-ê地，kiám無耶和華ê意思mah？耶和華吩咐我講，你上去攻擊毀滅chit-ê地。Taⁿ góa chiūⁿ-lâi kong-kek húi-bia̍t chit ê tōe, kiám bô Iâ-hô-hoa ê ì-sù mah? Iâ-hô-hoa hoan-hù góa kóng, Lí chiūⁿ-khì kong-kek húi-bia̍t chit ê tōe.

11Í-lī-a-kèng、Sià-pek-ná、Iok-a對La̍h-pek-sa-ki講，求你用A-lân ê話kap你ê奴僕講；因為阮會曉聽；m̄-thang用猶大ê話kap阮講，hō͘城頂ê百姓耳孔聽見。Í-lī-a-kèng, Sià-pek-ná, Iok-a tùi La̍h-pek-sa-ki kóng, Kiû lí ēng A-lân ê ōe kap lí ê lô͘-po̍k kóng; in-ūi goán ōe hiáu thiaⁿ; m̄-thang ēng Iû-tāi ê ōe kap goán kóng, hō͘ siâⁿ-téng ê peh-sìⁿ hī-khang thiaⁿ-kìⁿ.

12La̍h-pek-sa-ki講，我ê主差我來，kiám是對你ê主kap你講chiah-ê話mah？kiám-m̄是對坐tī城頂ê人講，hō͘ in kap lín平平食家己ê糞，lim家己ê尿mah？La̍h-pek-sa-ki kóng, Góa ê chú chhe góa lâi, kiám-sī tùi lí ê chú kap lí kóng chiah ê ōe mah? kiám-m̄-sī tùi chē tī siâⁿ-téng ê lâng kóng, hō͘ in kap lín pîⁿ-pîⁿ chia̍h ka-kī ê pùn, lim ka-kī ê jiō mah?

13La̍h-pek-sa-ki就khiā-teh，用猶大ê話大聲叫講，Lín tio̍h聽亞述王大王ê話。La̍h-pek-sa-ki chiū khiā--teh, ēng Iû-tāi ê ōe tōa-siaⁿ kiò kóng, Lín tio̍h thiaⁿ A-su̍t ông tāi-ông ê ōe.

14王án-ni講，Lín m̄-thang hō͘ Hi-se-ka所騙；因為伊bōe能救lín；Ông án-ni kóng, Lín m̄-thang hō͘ Hi-se-ka só͘ phiàn; in-ūi i bōe-ōe kiù lín;

15亦莫得聽Hi-se-ka kah lín óa靠耶和華，講，耶和華的確beh救咱，chit-ê城的確無交tī亞述王ê手。ia̍h bo̍h-tit thiaⁿ Hi-se-ka kah lín óa-khò Iâ-hô-hoa, kóng, Iâ-hô-hoa tek-khak beh kiù lán, chit ê siâⁿ tek-khak bô kau tī A-su̍t ông ê chhiú.

16莫得聽Hi-se-ka ê話；因為亞述王án-ni講，Lín tio̍h kap我和好，出來投降我，ta̍k人就thang食家己ê葡萄樹kap無花果樹ê果子，lim家己ê井水；Bo̍h-tit thiaⁿ Hi-se-ka ê ōe; in-ūi A-su̍t ông án-ni kóng, Lín tio̍h kap góa hô-hó, chhut-lâi tâu-hâng góa, ta̍k-lâng chiū thang chia̍h ka-kī ê phû-tô-chhiū kap bû-hoa-kó-chhiū ê ké-chí, lim ka-kī ê chíⁿ-chúi;

17thèng候我chhōa lín到一個地kap lín本地無各樣，就是有五穀kap新酒ê地，有米糧kap葡萄園ê地。thèng-hāu góa chhōa lín kàu chi̍t ê tōe kap lín pún-tōe bô koh-iūⁿ, chiū-sī ū gō͘-kak kap sin-chiú ê tōe, ū bí-niû kap phû-tô-hn̂g ê tōe.

18Lín tio̍h謹慎持防，驚了Hi-se-ka引誘lín講，耶和華的確救咱。列國ê上帝kiám有一個bat救伊ê國脫離亞述王ê手ah？Lín tio̍h kín-sīn tî-hông, kiaⁿ-liáu Hi-se-ka ín-iú lín kóng, Iâ-hô-hoa tek-khak kiù lán. Lia̍t-kok ê siōng-tè kiám ū chi̍t-ê bat kiù i ê kok thoat-lī A-su̍t ông ê chhiú ah?

19Hap-má kap A-ní-poa̍t ê上帝tī toh-lo̍h ah？Se-hoat-óa-im ê上帝tī toh-lo̍h ah？in kiám bat救撒馬利亞脫離我ê手mah？Hap-má kap A-ní-poa̍t ê siōng-tè tī toh-lo̍h ah? Se-hoat-óa-im ê siōng-tè tī toh-lo̍h ah? in kiám bat kiù Sat-má-lī-a thoat-lī góa ê chhiú mah?

20Chiah-ê國ê上帝有是誰 bat救家己ê國脫離我ê手ah，莫kioh耶和華kiám會救耶路撒冷脫離我ê手mah？Chiah ê kok ê siōng-tè ū chī-chūi bat kiù ka-kī ê kok thoat-lī góa ê chhiú ah, bo̍h-kioh Iâ-hô-hoa kiám ōe kiù Iâ-lō͘-sat-léng thoat-lī góa ê chhiú mah?

21In靜靜，亦無應一句；因為王bat吩咐講，莫得應伊。In chēng-chēng, ia̍h bô ìn chi̍t-kù; in-ūi ông bat hoan-hù kóng, Bo̍h-tit ìn i.

22Hit時Hi-le̍k-ka ê kiáⁿ管家ê Í-lī-a-kèng，kap書記Sià-pek-ná，kap史官A-sat ê kiáⁿ Iok-a，lóng拆裂衫來到Hi-se-ka hia，將La̍h-pek-sa-ki ê話kā伊講。Hit-sî Hi-le̍k-ka ê kiáⁿ koán-ke ê Í-lī-a-kèng, kap su-kì Sià-pek-ná, kap sú-koaⁿ A-sat ê kiáⁿ Iok-a, lóng thiah-li̍h saⁿ lâi kàu Hi-se-ka hia, chiong La̍h-pek-sa-ki ê ōe kā i kóng.