1Hi-se-ka王聽見，就拆裂伊ê衫，穿麻布，入耶和華ê殿。Hi-se-ka ông thiaⁿ-kìⁿ, chiū thiah-li̍h i ê saⁿ, chhēng môa-pò͘, ji̍p Iâ-hô-hoa ê tiān.

2差管家ê Í-lī-a-kèng，kap書記Sià-pek-ná，kap祭司中ê老輩ê，lóng穿麻布，去見A-mô͘-su ê kiáⁿ先知以賽亞。Chhe koán-ke ê Í-lī-a-kèng, kap su-kì Sià-pek-ná, kap chè-si tiong ê ló-pòe--ê, lóng chhēng môa-pò͘, khì kìⁿ A-mô͘-su ê kiáⁿ sian-ti Í-sài-a.

3對伊講，Hi-se-ka án-ni講，今á日是患難、責罰、凌辱ê日，是親像kiáⁿ beh出世，亦無力thang生出。Tùi i kóng, Hi-se-ka án-ni kóng, Kin-á-ji̍t sī hoān-lān, chek-hoa̍t, lêng-jio̍k ê ji̍t, sī chhin-chhiūⁿ kiáⁿ beh chhut-sì, ia̍h bô la̍t thang siⁿ-chhut.

4Kiám-chhái耶和華，你ê上帝，聽見La̍h-pek-sa-ki ê話，就是伊ê主亞述王差伊來侮慢永活上帝ê話，kiám-chhái耶和華，你ê上帝，為tio̍h聽見chiah-ê話，就beh責備伊；所以求你為tio̍h iáu chhun ê百姓出聲祈禱。Kiám-chhái Iâ-hô-hoa, lí ê Siōng-tè, thiaⁿ-kìⁿ La̍h-pek-sa-ki ê ōe, chiū-sī i ê chú A-su̍t ông chhe i lâi bú-bān éng-oa̍h Siōng-tè ê ōe, kiám-chhái Iâ-hô-hoa, lí ê Siōng-tè, ūi-tio̍h thiaⁿ-kìⁿ chiah ê ōe, chiū beh chek-pī i; só͘-í kiû lí ūi-tio̍h iáu chhun ê peh-sìⁿ chhut-siaⁿ kî-tó.

5Hi-se-ka王ê人臣就去見以賽亞。Hi-se-ka ông ê jîn-sîn chiū khì kìⁿ Í-sài-a.

6以賽亞對in講，Tio̍h án-ni對lín ê主講，耶和華án-ni講，你聽見亞述王ê奴僕褻瀆我ê話，m̄免驚in。Í-sài-a tùi in kóng, Tio̍h án-ni tùi lín ê chú kóng, Iâ-hô-hoa án-ni kóng, Lí thiaⁿ-kìⁿ A-su̍t ông ê lô͘-po̍k siat-to̍k Góa ê ōe, m̄-bián kiaⁿ in.

7看ah，我beh用一個神入伊ê心，伊beh聽見風聲，就倒tńg去本所在；我beh hō͘伊tī本所在倒tī刀下。Khòaⁿ ah, Góa beh ēng chi̍t ê sîn ji̍p i ê sim, i beh thiaⁿ-kìⁿ hong-siaⁿ, chiū tò-tńg-khì pún só͘-chāi; Góa beh hō͘ i tī pún só͘-chāi tó tī to-ē.

8La̍h-pek-sa-ki tò去，tú-tio̍h亞述王teh phah Li̍p-ná；是因為伊有聽見亞述王有撤營，離開拉結。La̍h-pek-sa-ki tò-khì, tú-tio̍h A-su̍t ông teh phah Li̍p-ná; sī in-ūi i ū thiaⁿ-kìⁿ A-su̍t ông ū thiat-iâⁿ, lī-khui La̍h-kiat.

9王聽見講，Kó͘-si̍t王Te̍k-hap-ka出來beh kap你交戰；伊一下聽見就差使者去見Hi-se-ka，吩咐in，講，Ông thiaⁿ-kìⁿ kóng, Kó͘-si̍t ông Te̍k-hap-ka chhut-lâi beh kap lí kau-chiàn; i chi̍t-ē thiaⁿ-kìⁿ chiū chhe sù-chiá khì kìⁿ Hi-se-ka, hoan-hù in, kóng,

10Tio̍h kā猶大王Hi-se-ka án-ni講，你所óa靠你ê上帝講，耶路撒冷的確無交tī亞述王ê手，你莫得hō͘伊欺騙。Tio̍h kā Iû-tāi ông Hi-se-ka án-ni kóng, Lí só͘ óa-khò lí ê Siōng-tè kóng, Iâ-lō͘-sat-léng tek-khak bô kau tī A-su̍t ông ê chhiú, lí bo̍h-tit hō͘ I khi-phiàn.

11看ah，你總有聽見亞述chiah-ê王對列國所行ê，是一盡滅in；總無你iáu會得tio̍h救mah？Khòaⁿ ah, lí chóng ū thiaⁿ-kìⁿ A-su̍t chiah ê ông tùi lia̍t-kok só͘-kiâⁿ--ê, sī it-chīn bia̍t in; chóng bô lí iáu ōe tit-tio̍h kiù mah?

12我ê列祖所毀滅ê，就是Ko-sàn、哈蘭、Lī-sek，kap屬Thê-la̍h-sat ê伊甸人；chiah-ê國ê上帝kiám bat救伊mah？Góa ê lia̍t-chó͘ só͘ húi-bia̍t--ê, chiū-sī Ko-sàn, Hap-lân, Lī-sek, kap sio̍k Thê-la̍h-sat ê Ai-tiân lâng; chiah ê kok ê siōng-tè kiám bat kiù i mah?

13Hap-má ê王、A-ní-poa̍t ê王、Se-hoat-óa-im城ê王、Hi-ná kap Í-óa ê王，lóng tī toh-lo̍h？Hap-má ê ông, A-ní-poa̍t ê ông, Se-hoat-óa-im siâⁿ ê ông, Hi-ná kap Í-óa ê ông, lóng tī toh-lo̍h?

14Hi-se-ka tùi使者ê手接tio̍h phoe，讀伊；Hi-se-ka就上去耶和華ê殿，將phoe排tī耶和華ê面前。Hi-se-ka tùi sù-chiá ê chhiú chih-tio̍h phoe, tha̍k i; Hi-se-ka chiū chiūⁿ--khì Iâ-hô-hoa ê tiān, chiong phoe pâi tī Iâ-hô-hoa ê bīn-chêng.

15Hi-se-ka對耶和華祈禱講，Hi-se-ka tùi Iâ-hô-hoa kî-tó kóng,

16坐tī ki-lō͘兵ê中間，萬軍ê耶和華，以色列ê上帝ah，獨獨你做天下萬國ê上帝；你bat創造天地。Chē tī ki-lō͘-peng ê tiong-kan, bān-kun ê Iâ-hô-hoa, Í-sek-lia̍t ê Siōng-tè ah, to̍k-to̍k Lí chòe thiⁿ-ē bān-kok ê Siōng-tè; Lí bat chhòng-chō thiⁿ tōe.

17耶和華ah，求你俯耳孔來聽，耶和華ah，求你開目睭來看；tio̍h聽Se-ná-ki-li̍p一切ê話，是差使者來侮慢永活上帝ê。Iâ-hô-hoa ah, kiû Lí àⁿ hī-khang lâi thiaⁿ, Iâ-hô-hoa ah, kiû Lí khui ba̍k-chiu lâi khòaⁿ; tio̍h thiaⁿ Se-ná-ki-li̍p it-chhè ê ōe, sī chhe sù-chiá lâi bú-bān éng-oa̍h Siōng-tè ê.

18耶和華ah，亞述chiah-ê王果然hō͘列國kap伊ê地變做拋荒，Iâ-hô-hoa ah, A-su̍t chiah ê ông kó-jiân hō͘ lia̍t-kok kap i ê tōe pìⁿ-chòe pha-hng,

19也將in ê上帝hiat tī火裡；因為in m̄是上帝，是人ê手所造ê，是柴ê，石ê；in就剿滅in。iā chiong in ê siōng-tè hiat tī hé--nih; in-ūi in m̄-sī Siōng-tè, sī lâng ê chhiú só͘-chō--ê, sī chhâ--ê, chio̍h--ê; in chiū châu-bia̍t--in.

20耶和華阮ê上帝ah，taⁿ求祢救阮脫離伊ê手，hō͘天下萬國lóng知獨獨你是耶和華。Iâ-hô-hoa goán ê Siōng-tè ah, taⁿ kiû Lí kiù goán thoat-lī i ê chhiú, hō͘ thiⁿ-ē bān-kok lóng chai to̍k-to̍k Lí sī Iâ-hô-hoa.

21A-mô͘-su ê kiáⁿ以賽亞就差人去見Hi-se-ka講，耶和華以色列ê上帝án-ni講，你既然因為亞述王Se-ná-ki-li̍p ê緣故祈求我；A-mô͘-su ê kiáⁿ Í-sài-a chiū chhe lâng khì kìⁿ Hi-se-ka kóng, Iâ-hô-hoa Í-sek-lia̍t ê Siōng-tè án-ni kóng, Lí kì-jiân in-ūi A-su̍t ông Se-ná-ki-li̍p ê iân-kò͘ kî-kiû Góa;

22taⁿ論到伊，耶和華有án-ni講，錫安ê在室女藐視你，恥笑你；耶路撒冷ê cha-bó͘-gín-ná對你搖頭。taⁿ lūn-kàu i, Iâ-hô-hoa ū án-ni kóng, Sek-an ê chāi-sek-lú biáu-sī lí, thí-chhiò lí; Iâ-lō͘-sat-léng ê cha-bó͘-gín-ná tùi lí iô-thâu.

23你凌辱侮慢是誰？出大聲，目睭niah高高，攻擊是誰 ah？就是攻擊以色列ê聖ê。Lí lêng-jio̍k bú-bān chī-chūi? chhut tōa-siaⁿ, ba̍k-chiu niah koâiⁿ-koâiⁿ, kong-kek chī-chūi ah? chiū-sī kong-kek Í-sek-lia̍t ê Sèng--ê.

24你差你ê奴僕侮慢主講，我chhōa chōe-chōe戰車上到山尖，到黎巴嫩極深ê所在；我beh剉hit-tè高大ê柏香柴，kap siōng好ê松樹；我beh 上極高ê所在，kap伊肥地ê樹林。Lí chhe lí ê lô͘-po̍k bú-bān Chú kóng, Góa chhōa chōe-chōe chiàn-chhia chiūⁿ-kàu soaⁿ-chiam, kàu Lī-pa-lùn ke̍k-chhim ê só͘-chāi; góa beh chhò hit-tè koâiⁿ-tōa ê pek-hiuⁿ-chhâ, kap siōng-hó ê siông-chhiū; góa beh chiūⁿ ke̍k-koâiⁿ ê só͘-chāi, kap i pûi-tōe ê chhiū-nâ.

25我已經開井lim外邦ê水，我用腳掌踏埃及一切ê河，hō͘伊乾去。Góa í-keng khui-chíⁿ lim gōa-pang ê chúi, góa ēng kha-chiúⁿ ta̍h Ai-ki̍p it-chhè ê hô, hō͘ i ta--khì.

26耶和華講，你kiám bē-bat聽見我tī源起頭所做ê，tī古早所定tio̍h-ê mah？taⁿ我成伊，是hō͘你毀壞堅固ê城，變做瓦phiaⁿ-phè。Iâ-hô-hoa kóng, Lí kiám bē-bat thiaⁿ-kìⁿ Góa tī goân-khí-thâu só͘-chòe--ê, tī kó͘-chá só͘ tiāⁿ-tio̍h--ê mah? taⁿ Góa chiâⁿ i, sī hō͘ lí húi-hoāi kian-kò͘ ê siâⁿ, pìⁿ-chòe hāu-phiaⁿ-phè.

27所以其中khiā起ê百姓氣力真少，驚惶見笑；in親像曠野ê草，青翠ê菜，親像厝頂ê草，親像田裡bē大叢ê稻á。Só͘-í kî-tiong khiā-khí ê peh-sìⁿ khùi-la̍t chin-chió, kiaⁿ-hiâⁿ kiàn-siàu; in chhin-chhiūⁿ khòng-iá ê chháu, chhiⁿ-chhùi ê chhài, chhin-chhiūⁿ chhù-téng ê chháu, chhin-chhiūⁿ chhân--nih bē tōa-châng ê tiū-á.

28你坐落去，你出去，你入來，你ê大受氣我，我lóng知。Lí chē-lo̍h-khì, lí chhut-khì, lí ji̍p-lâi, lí ê tōa siū-khì Góa, Góa lóng chai.

29因為你大受氣我，koh因為你驕傲ê話thàng到我ê耳孔，我就beh用我ê鉤鉤你ê鼻，用我ê馬咬韁掛tī你ê嘴，hō͘你tùi原路tò去。In-ūi lí tōa siū-khì Góa, koh in-ūi lí kiau-ngō͘ ê ōe thàng-kàu Góa ê hī-khang, Góa chiū beh ēng Góa ê kau kau lí ê phīⁿ, ēng Góa ê bé-kā-kiuⁿ kòa tī lí ê chhùi, hō͘ lí tùi goân-lō͘ tò--khì.

30Hi-se-ka ah，chit-ê hō͘你做兆頭；今年lín beh食家己發ê物，明年beh食tùi hit-ê所出ê；到第三年，lín tio̍h種作收割，栽種葡萄園，來食伊ê果子。Hi-se-ka ah, chit-ê hō͘ lí chòe tiāu-thâu; kin-nî lín beh chia̍h ka-kī hoat ê mi̍h, mê-nî beh chia̍h tùi hit-ê só͘-chhut-ê; kàu tē-saⁿ nî, lín tio̍h chèng-choh siu-koah, chai-chèng phû-tô-hn̂g, lâi chia̍h i ê ké-chí.

31猶大家脫離患難所chhun ê百姓beh猶原下面釘根，頂面結果子。Iû-tāi ke thoat-lī hoān-lān só͘-chhun ê peh-sìⁿ beh iû-goân ē-bīn tèng-kun, téng-bīn kiat ké-chí.

32因為beh有chhun ê百姓tùi耶路撒冷出來，beh有逃走ê人tùi錫安山來；萬軍ê耶和華ê熱心beh成chit-ê事。In-ūi beh ū chhun ê peh-sìⁿ tùi Iâ-lō͘-sat-léng chhut--lâi, beh ū tô-cháu ê lâng tùi Sek-an soaⁿ lâi; bān-kun ê Iâ-hô-hoa ê jia̍t-sim beh chiâⁿ chit ê sū.

33所以耶和華論亞述王講，伊的確bōe到chit-ê城，亦bōe tī-chia射箭，bōe能giâ藤牌到城前，亦bōe起土堆來攻擊伊。Só͘-í Iâ-hô-hoa lūn A-su̍t ông kóng, I tek-khak bōe kàu chit ê siâⁿ, ia̍h bōe tī-chia siā-chìⁿ, bōe-ōe giâ tîn-pâi kàu siâⁿ-chêng, ia̍h bōe khí thô͘-tui lâi kong-kek i.

34伊tùi hit條路來，beh tùi hit條路tò去，bōe能來到chit-ê城，這是耶和華講ê。I tùi hit tiâu lō͘ lâi, beh tùi hit tiâu lō͘ tò-khì, bōe-ōe lâi kàu chit ê siâⁿ, che sī Iâ-hô-hoa kóng ê.

35因為我為tio̍h家己ê緣故，koh為tio̍h我ê奴僕大衛ê緣故，beh保護chit-ê城，來拯救伊。In-ūi Góa ūi-tio̍h ka-kī ê iân-kò͘, koh ūi-tio̍h Góa ê lô͘-po̍k Tāi-pi̍t ê iân-kò͘, beh pó-hō͘ chit ê siâⁿ, lâi chín-kiù i.

36耶和華ê使者出去，tī亞述營中phah死十八萬五千人；到天光早起來ê時，看ah，lóng是死ê身屍。Iâ-hô-hoa ê sù-chiá chhut--khì, tī A-su̍t iâⁿ-tiong phah-sí cha̍p-poeh-bān gō͘-chheng lâng; kàu thiⁿ-kng-chá khí--lâi ê sî, khòaⁿ ah, lóng sī sí ê sin-si.

37亞述王Se-ná-ki-li̍p就離開tò去，tiàm tī尼尼微。A-su̍t ông Se-ná-ki-li̍p chiū lī-khui tò-khì, tiàm tī Nî-nî-bî.

38Tī伊ê上帝Nî-su-lo̍k ê廟跪拜ê時，伊ê kiáⁿ，A-tek-bí-le̍k kap Sa-lī-sek，用刀thâi伊；in就走到A-la̍h-lia̍p ê地。伊ê kiáⁿ Í-sat-hap-tùn續接伊做王。Tī i ê siōng-tè Nî-su-lo̍k ê biō kūi-pài ê sî, i ê kiáⁿ, A-tek-bí-le̍k kap Sa-lī-sek, ēng to thâi i; in chiū cháu kàu A-la̍h-lia̍p ê tōe. I ê kiáⁿ Í-sat-hap-tùn sòa-chiap i chòe-ông.

1Hiah-ê日ê中間，Hi-se-ka破病teh-beh死。A-mô͘-su ê kiáⁿ，先知以賽亞，去見伊，對伊講，耶和華án-ni講，你tio̍h設法你ê家事，因為你teh-beh死，bōe活。Hiah ê ji̍t ê tiong-kan, Hi-se-ka phòa-pīⁿ teh-beh sí. A-mô͘-su ê kiáⁿ, sian-ti Í-sài-a, khì kìⁿ i, tùi i kóng, Iâ-hô-hoa án-ni kóng, Lí tio̍h siat-hoat lí ê ke-sū, in-ūi lí teh-beh sí, bōe-oa̍h.

2Hi-se-ka就oa̍t-tńg面ǹg壁，祈禱耶和華，講，Hi-se-ka chiū oa̍t-tńg bīn ǹg piah, kî-tó Iâ-hô-hoa, kóng,

3耶和華ah，求祢記念我tī祢ê面前怎樣存完全ê心，照誠實來行，koh做祢所看做好ê。Hi-se-ka就大聲啼哭。Iâ-hô-hoa ah, kiû Lí kì-liām góa tī Lí ê bīn-chêng cháiⁿ-iūⁿ chûn oân-choân ê sim, chiàu sêng-si̍t lâi kiâⁿ, koh chòe Lí só͘ khòaⁿ-chòe hó--ê. Hi-se-ka chiū tōa-siaⁿ thî-khàu.

4Tùi án-ni，耶和華ê話臨到以賽亞講，Tùi án-ni Iâ-hô-hoa ê ōe lîm-kàu Í-sài-a kóng,

5你去kā Hi-se-ka講，你ê祖大衛ê上帝耶和華án-ni講，我已經聽見你ê祈禱，看見你ê目屎；看ah，我beh加添你ê歲壽十五年。Lí khì kā Hi-se-ka kóng, Lí ê chó͘ Tāi-pi̍t ê Siōng-tè Iâ-hô-hoa án-ni kóng, Góa í-keng thiaⁿ-kìⁿ lí ê kî-tó, khòaⁿ-kìⁿ lí ê ba̍k-sái; khòaⁿ ah, Góa beh ke-thiⁿ lí ê hè-siū cha̍p-gō͘ nî.

6Koh我beh救你kap chit-ê城脫離亞述王ê手；亦beh保護chit-ê城。Koh Góa beh kiù lí kap chit ê siâⁿ thoat-lī A-su̍t ông ê chhiú; ia̍h beh pó-hō͘ chit ê siâⁿ.

7耶和華beh成祂所講ê，這是耶和華beh hō͘你ê兆頭；Iâ-hô-hoa beh chiâⁿ I só͘ kóng--ê, che sī Iâ-hô-hoa beh hō͘ lí ê tiāu-thâu;

8看ah，A-hap-su ê日圭tè日進前ê影，我beh hō͘伊退後十度。Tùi án-ni，進前ê日影，果然tī日圭ê頂面，退後十度。khòaⁿ ah, A-hap-su ê ji̍t-kui tè-ji̍t chìn-chêng ê iáⁿ, Góa beh hō͘ i thè-āu cha̍p-tō͘. Tùi án-ni chìn-chêng ê ji̍t-iáⁿ, kó-jiân tī ji̍t-kui ê téng-bīn, thè-āu cha̍p-tō͘.

9猶大王Hi-se-ka破病已經好，就做詩，講：Iû-tāi ông Hi-se-ka phòa-pīⁿ í-keng hó, chiū chòe si, kóng:

10我講，tú-tú tī我中年ê日，beh入陰間ê門；　　bōe得thang享受我iáu chhun ê年。Góa kóng, tú-tú tī góa tiong-liân ê ji̍t, beh ji̍p im-kan ê mn̂g;Bōe-tit-thang hióng-siū góa iáu chhun ê nî.

11我講，我bōe見tio̍h耶和華，就是tī活人ê地，bōe見tio̍h耶和華；　　我bōe得thang kap tiàm地上ê百姓相kap看人ê面。Góa kóng, Góa bōe kìⁿ--tio̍h Iâ-hô-hoa, chiū-sī tī oa̍h-lâng ê tōe, bōe kìⁿ-tio̍h Iâ-hô-hoa;Góa bōe-tit-thang kap tiàm tōe-chiūⁿ ê peh-sìⁿ saⁿ-kap khòaⁿ lâng ê bīn.

12我khiā起ê所在受遷徙離開我，親像顧羊ê人ê布棚一樣；　　我將性命捲起來，親像織布ê人捲布一樣；伊beh將我tùi布機頭剪斷。　　Tùi早起到ê-hng，你beh hō͘我結局。Góa khiā-khí ê só͘-chāi siū chhian-sóa lī-khui góa, chhin-chhiūⁿ kò͘-iûⁿ ê lâng ê pò͘-pîⁿ chi̍t-iūⁿ;Góa chiong sìⁿ-miā kńg--khí-lâi, chhin-chhiūⁿ chit-pò͘ ê lâng kńg-pò͘ chi̍t-iūⁿ; I beh chiong góa tùi pò͘-kui-thâu chián-tn̄g.Tùi chá-khí kàu ê-hng, Lí beh hō͘ góa kiat-kio̍k.

13我hō͘家己安靜到天光；伊親像獅at折我一切ê骨頭；　　Tùi早起到ê-hng，祢beh hō͘我結局。Góa hō͘ ka-kī an-chēng kàu thiⁿ-kng; I chhin-chhiūⁿ sai at-chi̍h góa it-chhè ê kut-thâu;Tùi chá-khí kàu ê-hng, Lí beh hō͘ góa kiat-kio̍k.

14我親像燕á，親像白鶴，gí-bú gí-ngiáu；koh親像ka-chui哀叫；　　我因為kia̍h頭看，目睭煙暈。　　耶和華ah，我受壓制，求祢kā我保認。Góa chhin-chhiūⁿ ìⁿ-á, chhin-chhiūⁿ pe̍h-ho̍h, gí-bú gí-ngiáu; koh chhin-chhiūⁿ ka-chui ai-kiò;Góa in-ūi kia̍h-thâu khòaⁿ, ba̍k-chiu ian-n̄g.Iâ-hô-hoa ah, góa siū ap-chè, kiû Lí kā góa pó-jīn.

15我beh講甚麼ah？伊kā我講ê，亦kā我成lah；　　我因為心內ê苦楚，tī一生ê年日，beh ûn-ûn-á行。Góa beh kóng sím-mi̍h ah? I kā góa kóng--ê, ia̍h kā góa chiâⁿ--lah;Góa in-ūi sim-lāi ê khó͘-chhó͘, tī it-seng ê nî-ji̍t, beh ûn-ûn-á kiâⁿ.

16主ah，人得tio̍h活是在tī chiah-ê，　　我ê心神活teh，亦lóng是tùi án-ni；　　所以求祢hō͘我koh好，猶原活teh。Chú ah, lâng tit-tio̍h oa̍h sī chāi-tī chiah-ê,Góa ê sim-sîn oa̍h--teh, ia̍h lóng sī tùi án-ni;Só͘-í kiû Lí hō͘ góa koh-hó, iû-goân oa̍h--teh.

17看ah，我受真大ê艱苦，是為tio̍h beh hō͘我得tio̍h平安；　　祢因為疼我ê靈魂，就救我脫離滅無ê坑；　　因為祢將我一切ê罪，hiat tī祢ê ka-chiah後。Khòaⁿ ah, góa siū chin-tōa ê kan-khó͘, sī ūi-tio̍h beh hō͘ góa tit-tio̍h pêng-an;Lí in-ūi thiàⁿ góa ê lêng-hûn, chiū kiù góa thoat-lī bia̍t-bô ê khiⁿ;In-ūi Lí chiong góa it-chhè ê chōe, hiat tī Lí ê ka-chiah-āu.

18因為陰間bōe會感謝祢，死無bōe會o-ló祢；　　落墳墓ê人bōe會ǹg望祢ê誠實。In-ūi im-kan bōe-ōe kám-siā Lí, sí-bô bōe-ōe o-ló Lí;Lo̍h hûn-bōng ê lâng bōe-ōe ǹg-bāng Lí ê sêng-si̍t.

19只有活人，活人beh感謝祢，親像我今á日感謝祢一樣；　　做老父ê beh hō͘ kiáⁿ兒知祢ê誠實。Chí-ū oa̍h-lâng, oa̍h-lâng beh kám-siā Lí, chhin-chhiūⁿ góa kin-á-ji̍t kám-siā Lí chi̍t-iūⁿ;Chòe lāu-pē-ê beh hō͘ kiáⁿ-jî chai Lí ê sêng-si̍t.

20耶和華便便beh救我，　　所以阮在生ê日beh tī耶和華ê厝，　　用絲絃ê樂器，唱我ê詩歌。Iâ-hô-hoa piān-piān beh kiù góa, Só͘-í goán chāi-siⁿ ê ji̍t beh tī Iâ-hô-hoa ê chhù,Ēng si-hiân ê ga̍k-khì, chhiùⁿ góa ê si-koa.

21以賽亞bat講，Tio̍h the̍h一塊無花果餅，來貼tī粒á。王就得tio̍h好。Í-sài-a bat kóng, Tio̍h the̍h chi̍t tè bû-hoa-kó-piáⁿ, lâi tah tī lia̍p-á. Ông chiū tit-tio̍h hó.

22Hi-se-ka也bat講，我能上耶和華ê厝，有甚麼兆頭？Hi-se-ka iā bat kóng, Góa ōe chiūⁿ Iâ-hô-hoa ê chhù, ū sím-mi̍h tiāu-thâu?

1當時巴比倫王，Pa-la̍h-tàn ê kiáⁿ Bí-lô-ta̍t-pa-la̍h-tàn聽見Hi-se-ka bat破病，就送phoe信kap禮物hō͘ Hi-se-ka。Tng-sî Pa-pí-lûn ông, Pa-la̍h-tàn ê kiáⁿ Bí-lô-ta̍t-pa-la̍h-tàn thiaⁿ-kìⁿ Hi-se-ka bat phòa-pīⁿ, chiū sàng phoe-sìn kap lé-mi̍h hō͘ Hi-se-ka.

2Hi-se-ka因為使者來歡喜，就將伊khǹg寶物ê厝，金、銀、香料、貴氣ê油，kap伊ê軍裝局，kap府庫內一切所有ê，lóng hō͘ in看；伊ê家中kap全國ê內面，Hi-se-ka無一項無hō͘ in看。Hi-se-ka in-ūi sù-chiá lâi hoaⁿ-hí, chiū chiong i khǹg pó-mi̍h ê chhù, kim, gûn, hiuⁿ-liāu, kùi-khì ê iû, kap i ê kun-chong-ke̍k, kap hú-khò͘-lāi it-chhè só͘ ū--ê, lóng hō͘ in khòaⁿ; i ê ke-tiong kap choân-kok ê lāi-bīn, Hi-se-ka bô chi̍t-hāng bô hō͘ in khòaⁿ.

3Tùi án-ni，先知以賽亞來見Hi-se-ka王，問伊講，chiah-ê人講甚麼？in tùi toh-lo̍h來見你？Hi-se-ka講，In tùi遠遠ê所在，就是tùi巴比倫，來見我。Tùi án-ni sian-ti Í-sài-a lâi kìⁿ Hi-se-ka ông, mn̄g i kóng, Chiah ê lâng kóng sím-mi̍h? in tùi toh-lo̍h lâi kìⁿ lí? Hi-se-ka kóng, In tùi hn̄g-hn̄g ê só͘-chāi, chiū-sī tùi Pa-pí-lûn, lâi kìⁿ góa.

4以賽亞講，In tī你ê家看見甚麼？Hi-se-ka講，凡若我家中所有ê，in lóng有看見；我ê財寶ê中間無一項無hō͘ in看見。Í-sài-a kóng, In tī lí ê ke khòaⁿ-kìⁿ sím-mi̍h? Hi-se-ka kóng, Hoān-nā góa ke-tiong só͘-ū--ê, in lóng ū khòaⁿ-kìⁿ; góa ê châi-pó ê tiong-kan bô chi̍t-hāng bô hō͘ in khòaⁿ-kìⁿ.

5以賽亞對Hi-se-ka講，你tio̍h聽萬軍ê耶和華ê話。Í-sài-a tùi Hi-se-ka kóng, Lí tio̍h thiaⁿ bān-kun ê Iâ-hô-hoa ê ōe.

6看ah，日子beh到，凡若你家內所有ê，kap你ê列祖積聚到現今ê lóng beh受搶到巴比倫，無留一項；這是耶和華講ê。Khòaⁿ ah, ji̍t-chí beh kàu, hoān-nā lí ke-lāi só͘-ū--ê, kap lí ê lia̍t-chó͘ chek-chū kàu hiān-kim--ê lóng beh siū-chhiúⁿ kàu Pa-pí-lûn, bô lâu chi̍t-hāng; che sī Iâ-hô-hoa kóng--ê.

7Koh對你本身生ê kiáⁿ孫，其中有ê beh受掠去，tī巴比倫ê王宮當太監。Koh tùi lí pún-sin siⁿ ê kiáⁿ-sun, kî-tiong ū-ê beh siū-lia̍h--khì, tī Pa-pí-lûn ê ông-kiong tng thài-kàm.

8Hi-se-ka對以賽亞講，你所傳耶和華ê話是好。Koh講，因為tī我年日ê中間beh有太平kap堅固。Hi-se-ka tùi Í-sài-a kóng, Lí só͘ thoân Iâ-hô-hoa ê ōe sī hó. Koh kóng, In-ūi tī góa nî-ji̍t ê tiong-kan beh ū thài-pêng kap kian-kò͘.