1Lín ê上帝講，Lín tio̍h安慰，安慰我ê百姓。Lín ê Siōng-tè kóng, Lín tio̍h an-ùi, an-ùi Góa ê peh-sìⁿ.

2Tio̍h對耶路撒冷講好話，koh報伊知，伊ê交戰已經盡，伊ê罪過已經赦；伊為tio̍h伊一切ê罪，tùi耶和華ê手加倍受刑罰。Tio̍h tùi Iâ-lō͘-sat-léng kóng hó-ōe, koh pò i chai, i ê kau-chiàn í-keng chīn, i ê chōe-kòa í-keng sià; i ūi-tio̍h i it-chhè ê chōe, tùi Iâ-hô-hoa ê chhiú ka-pē siū hêng-hoa̍t.

3有聲叫講，Tī曠野備辦耶和華ê路，tī沙漠ê地，修平咱ê上帝ê大路。Ū siaⁿ kiò kóng, Tī khòng-iá pī-pān Iâ-hô-hoa ê lō͘, tī soa-bô͘ ê tōe, siu-pîⁿ lán ê Siōng-tè ê tōa-lō͘.

4Chiah-ê山谷lóng beh thūn hō͘伊tīⁿ，大細ê山頭lóng beh掘hō͘伊低；彎oat-ê，beh改hō͘伊直，坎坷ê，beh修hō͘伊平。Chiah ê soaⁿ-kok lóng beh thūn hō͘ i tīⁿ, tōa-sòe ê soaⁿ-thâu lóng beh ku̍t hō͘ i kē; oan-oat--ê, beh kóe hō͘ i ti̍t, khâm-khia̍t--ê, beh siu hō͘ i pîⁿ.

5耶和華ê榮光的確顯現，凡若有血氣ê beh lóng看見；因為這是耶和華親嘴講ê。Iâ-hô-hoa ê êng-kng tek-khak hián-hiān, hoān-nā ū hiat-khì-ê beh lóng khòaⁿ-kìⁿ; in-ūi che sī Iâ-hô-hoa chhin-chhùi kóng--ê.

6有聲講，你tio̍h叫，伊講，我tio̍h叫甚麼？見若有血氣ê lóng親像草，伊ê榮光lóng親像山裡ê花；草會乾，花會謝；Ū siaⁿ kóng, Lí tio̍h kiò, i kóng, Góa tio̍h kiò sím-mi̍h? kìⁿ-nā ū hiat-khì--ê lóng chhin-chhiūⁿ chháu, i ê êng-kng lóng chhin-chhiūⁿ soaⁿ--nih ê hoe; chháu ōe ta, hoe ōe siā;

7因為耶和華ê氣吹tī伊ê頂面；百姓真正是草。in-ūi Iâ-hô-hoa ê khì chhe tī i ê téng-bīn; peh-sìⁿ chin-chiàⁿ sī chháu.

8草會乾，花會謝；獨獨咱ê上帝ê話的確永遠tī-teh。Chháu ōe ta, hoe ōe siā; to̍k-to̍k lán ê Siōng-tè ê ōe tek-khak éng-oán tī-teh.

9報好消息hō͘錫安ê ah，你tio̍h 上高山；報好消息hō͘耶路撒冷ê ah，你tio̍h盡力出你ê聲；tio̍h出聲，m̄免驚；對猶大ê城講，看ah，lín ê上帝。Pò hó siau-sit hō͘ Sek-an--ê ah, lí tio̍h chiūⁿ koâiⁿ-soaⁿ; pò hó siau-sit hō͘ Iâ-lō͘-sat-léng--ê ah, lí tio̍h chīn-la̍t chhut lí ê siaⁿ; tio̍h chhut-siaⁿ, m̄-bián kiaⁿ; tùi Iû-tāi ê siâⁿ kóng, Khòaⁿ ah, lín ê Siōng-tè.

10看ah，主耶和華beh親像大權能ê臨到，祂ê手的確為祂掌權；看ah，祂ê賞賜tī祂hia，祂ê報答亦tī祂ê面前。Khòaⁿ ah, Chú Iâ-hô-hoa beh chhin-chhiūⁿ tōa koân-lêng--ê lîm-kàu , I ê chhiú tek-khak ūi I chiáng-koân; khòaⁿ ah, I ê siúⁿ-sù tī I hia, I ê pò-tap ia̍h tī I ê bīn-chêng.

11祂beh親像牧者顧伊ê羊群，祂beh用手âⁿ-óa羊á-kiáⁿ，抱伊tī胸前，慢慢chhōa hiah-ê hō͘羊á suh-lin-ê。I beh chhin-chhiūⁿ bo̍k-chiá kò͘ I ê iûⁿ-kûn, I beh ēng chhiú âⁿ-óa iûⁿ-á-kiáⁿ, phō i tī heng-chêng, bān-bān chhōa hiah-ê hō͘ iûⁿ-á suh-lin--ê.

12Chī-chūi bat用手心量chiah-ê水，用手虎口量穹蒼，用斗貯大地ê土粉，用秤(chhìn)秤山嶺，用天秤(phêng)秤山頭ah？Chī-chūi bat ēng chhiú-sim niû chiah ê chúi, ēng chhiú-hó͘-kháu niû kiong-chhong, ēng táu tóe tōa-tōe ê thô͘-hún, ēng chhìn chhìn soaⁿ-niá, ēng thian-phêng phêng soaⁿ-thâu ah?

13Chī-chūi bat測度耶和華ê心，á是做祂ê謀士來指教祂ah？Chī-chūi bat chhek-to̍k Iâ-hô-hoa ê sim, á-sī chòe I ê bô͘-sū lâi chí-kàu I ah?

14祂kap 是誰商量，是誰教示祂，將公平ê路指示祂，koh將智識教示祂，將通達ê道路指教祂ah？I kap chī-chūi siong-liông, chī-chūi kà-sī I, chiong kong-pêng ê lō͘ chí-sī I, koh chiong tì-sek kà-sī I, chiong thong-ta̍t ê tō-lō͘ chí-kàu I ah?

15看ah，萬百姓lóng親像水桶ê一滴水，koh親像天秤頂ê塵埃；祂the̍h chiah-ê海嶼起來親像極微細ê物。Khòaⁿ ah, bān peh-sìⁿ lóng chhin-chhiūⁿ chúi-tháng ê chi̍t-tih-chúi, koh chhin-chhiūⁿ thian-phêng-téng ê tîn-ai; I the̍h chiah ê hái-sū khí-lâi chhin-chhiūⁿ ke̍k bî-sòe ê mi̍h.

16黎巴嫩無夠額thang做火柴，其中ê走獸無夠額做燒祭。Lī-pa-lùn bô kàu-gia̍h thang chòe hé-chhâ, kî-tiong ê cháu-siù bô kàu-gia̍h chòe sio-chè.

17萬百姓tī祂ê面前親像無物；hō͘祂看極其無，就是空空。Bān peh-sìⁿ tī I ê bīn-chêng chhin-chhiūⁿ bô mi̍h; hō͘ I khòaⁿ ke̍k-kî bô, chiū-sī khang-khang.

18Lín究竟beh將是誰比並上帝？用甚麼形象kap上帝比並ah？Lín kiù-kèng beh chiong chī-chūi pí-phēng Siōng-tè? ēng sím-mi̍h hêng-siōng kap Siōng-tè pí-phēng ah?

19偶像是師傅鑄造，銀匠用金安伊，kā伊鑄銀鍊。Ngó͘-siōng sī sai-hū chù-chō, gûn-chhiūⁿ ēng kim an--i, kā i chù gûn-liān.

20Sòng-hiong人無力thang獻chit號物，就揀bōe會朽壞ê柴，為伊chhē奇巧ê師傅，chhāi bōe能搖動ê偶像。Sòng-hiong lâng bô la̍t thang hiàn chit-hō mi̍h, chiū kéng bōe-ōe hiú-hoāi ê chhâ, ūi i chhē kî-khiáu ê sai-hū, chhāi bōe-ōe iô-tāng ê ngó͘-siōng.

21Lín kiám未知mah？lín kiám未聽見mah？tùi起頭kiám無kā lín講mah？tùi設立地ê根基lín kiám無明白mah？Lín kiám bē chai mah? lín kiám bē thiaⁿ-kìⁿ mah? tùi khí-thâu kiám bô kā lín kóng mah? tùi siat-li̍p tōe ê kun-ki lín kiám bô bêng-pe̍k mah?

22主坐tī地ê大環，地上khiā起ê百姓親像草蜢；祂展開天親像帳幅，安置伊，親像thang khiā起ê布棚。Chú chē tī tōe ê tōa-khoân, tōe-chiūⁿ khiā-khí ê peh-sìⁿ chhin-chhiūⁿ chháu-meh; I tián-khui thiⁿ chhin-chhiūⁿ tiùⁿ-pak, an-tì i, chhin-chhiūⁿ thang khiā-khí ê pò͘-pîⁿ.

23祂hō͘君王歸tī無；hō͘地上ê審判官成做空虛。I hō͘ kun-ông kui tī bô; hō͘ tōe-chiūⁿ ê sím-phòaⁿ-koaⁿ chiâⁿ-chòe khang-hu.

24In是tú-á栽，tú-á種；伊ê叢tú-á釘根tī地裡；祂一下吹tī伊頂面，就lóng枯焦，捲螺風將伊吹去，親像草幼一樣。In sī tú-á chai, tú-á chèng; i ê châng tú-á tèng-kun tī tōe--nih; I chi̍t-ē chhe tī i téng-bīn, chiū lóng ko͘-tâ, kńg-lê-hong chiong i chhe--khì, chhin-chhiūⁿ chháu-iù chi̍t-iūⁿ.

25至聖ê講，Lín beh用是誰比並我，hō͘我kap伊平ah？Chì-sèng-ê kóng, Lín beh ēng chī-chūi pí-phēng Góa, hō͘ Góa kap i pîⁿ ah?

26Lín kia̍h目看頂面，看是誰創造chiah-ê，照賬目chhōa hiah-ê萬軍出來；祂一個一個稱in ê名；因為祂ê權能，koh因為祂ê大權能，大氣力，連一個亦無欠。Lín kia̍h-ba̍k khòaⁿ téng-bīn, khòaⁿ chī-chūi chhòng-chō chiah-ê, chiàu siàu-ba̍k chhōa hiah ê bān-kun chhut-lâi; I chi̍t-ê chi̍t-ê chheng in ê miâ; in-ūi I ê koân-lêng, koh in-ūi I ê tōa koân-lêng, tōa khùi-la̍t, liân chi̍t-ê ia̍h bô khiàm.

27雅各ah，你啥事講，以色列ah，你啥事講，我ê道路隱密tī耶和華，我ê案件無得tio̍h上帝料理。Ngá-kok ah, lí siáⁿ-sū kóng, Í-sek-lia̍t ah, lí siáⁿ-sū kóng, Góa ê tō-lō͘ ún-ba̍t tī Iâ-hô-hoa, góa ê àn-kiāⁿ bô tit-tio̍h Siōng-tè liāu-lí.

28你kiám未知mah？你kiám未聽見mah？永永tī-teh ê上帝，耶和華，創造地極ê，祂無厭，亦無倦；祂ê智慧無thang測度。Lí kiám bē chai mah? Lí kiám bē thiaⁿ-kìⁿ mah? éng-éng tī-teh ê Siōng-tè, Iâ-hô-hoa, chhòng-chō tōe-ke̍k--ê, I bô ià, ia̍h bô siān; I ê tì-hūi bô thang chhek-to̍k.

29厭倦ê祂hō͘伊能力；軟chiáⁿ-ê，祂加添伊ê氣力。Ià-siān--ê I hō͘ i lêng-le̍k; nńg-chiáⁿ-ê, I ke-thiⁿ i ê khùi-la̍t.

30少年人亦會厭會倦，勇壯ê人亦會跋倒。Siàu-liân lâng ia̍h ōe ià ōe siān, ióng-chòng ê lâng ia̍h ōe poa̍h-tó.

31獨獨óa靠耶和華ê beh得tio̍h新ê氣力；in beh親像鷹鳥thí翼飛高；in走，亦無厭；行亦無倦。To̍k-to̍k óa-khò Iâ-hô-hoa--ê beh tit-tio̍h sin ê khùi-la̍t; in beh chhin-chhiūⁿ eng-chiáu thí-si̍t pe-koâiⁿ; in cháu, ia̍h bô ià; kiâⁿ ia̍h bô siān.

1眾海嶼ah，tio̍h tī我ê面前靜靜；眾百姓tio̍h得tio̍h新ê氣力；lóng tio̍h近前來，chiah thang來講話；咱thang大家來辯論。Chèng hái-sū ah, tio̍h tī Góa ê bīn-chêng chēng-chēng; chèng peh-sìⁿ tio̍h tit-tio̍h sin ê khùi-la̍t; lóng tio̍h kūn-chêng lâi, chiah thang lâi kóng-ōe; lán thang tāi-ke lâi piān-lūn.

2Chī-chūi tùi東方興起一人，用公義召伊來到伊ê腳前ah？將列國交hō͘伊，hō͘伊管轄君王；將in親像塵埃交hō͘伊ê刀，親像風吹ê草á幼交hō͘伊ê弓。Chī-chūi tùi tang-hng heng-khí chi̍t-lâng, ēng kong-gī tiàu i lâi kàu I ê kha-chêng ah? chiong lia̍t-kok kau-hō͘ i, hō͘ i koán-hat kun-ông; chiong in chhin-chhiūⁿ tîn-ai kau hō͘ i ê to, chhin-chhiūⁿ hong-chhe ê chháu-á-iù kau-hō͘ i ê keng.

3伊追趕in，行伊所bē-bat行ê路，安然過去。I tui-kóaⁿ in, kiâⁿ i só͘ bē-bat kiâⁿ ê lō͘, an-jiân kè-khì.

4Chī-chūi做chit-ê來成伊，tùi起頭召歷代ah？我耶和華，是起頭ê，亦是路尾ê，我就是祂。Chī-chūi chòe chit-ê lâi chiâⁿ--i, tùi khí-thâu tiàu le̍k-tāi ah? Góa Iâ-hô-hoa, sī khí-thâu ê, ia̍h sī lō͘-bé--ê, Góa chiū-sī I.

5海嶼看見就驚惶；地極亦ngia̍uh-ngia̍uh-chhoah，就近óa來。Hái-sū khòaⁿ-kìⁿ chiū kiaⁿ-hiâⁿ; tōe-ke̍k ia̍h ngia̍uh-ngia̍uh-chhoah, chiū kūn-óa lâi.

6In ta̍k人相幫贊；對兄弟講，Tio̍h壯膽。In ta̍k-lâng saⁿ pang-chān; tùi hiaⁿ-tī kóng, Tio̍h chòng-táⁿ.

7木匠勉勵銀匠；用鎚phah光ê勉勵phah砧ê，論焊鑰(hōaⁿ-io̍h)ê工夫講，焊了好；koh用釘釘tiâu，hō͘伊無搖動。Ba̍k-chhiūⁿ bián-lē gûn-chhiūⁿ; ēng thûi phah-kng--ê bián-lē phah-tiam--ê, lūn hōaⁿ-io̍h ê kang-hu kóng, Hōaⁿ-liáu hó; koh ēng teng tèng-tiâu, hō͘ i bô iô-tāng.

8獨獨你，以色列，是我ê奴僕；雅各是我所揀選ê，我ê朋友亞伯拉罕ê後裔；To̍k-to̍k lí, Í-sek-lia̍t, sī Góa ê lô͘-po̍k; Ngá-kok sī Góa só͘ kéng-soán ê, Góa ê pêng-iú A-pek-la̍h-hán ê hō͘-è;

9你是我tùi地極所帶來ê，tùi地ê角頭所召來ê，koh對你講，你是我ê奴僕，我揀選你，亦無棄絕你。lí sī Góa tùi tōe-ke̍k só͘ tòa--lâi-ê, tùi tōe ê kak-thâu só͘ tiàu--lâi-ê, koh tùi lí kóng, Lí sī Góa ê lô͘-po̍k, Góa kéng-soán lí, ia̍h bô khì-choa̍t lí.

10你莫得驚惶，因為我kap你相kap tī-teh；莫得忍neh，因為我是你ê上帝；我的確堅固你，我的確幫贊你，我的確用我公義ê chiàⁿ手扶持你。Lí bo̍h-tit kiaⁿ-hiâⁿ, in-ūi Góa kap lí saⁿ-kap tī-teh; bo̍h-tit lún-neh, in-ūi Góa sī lí ê Siōng-tè; Góa tek-khak kian-kò͘ lí, Góa tek-khak pang-chān lí, Góa tek-khak ēng Góa kong-gī ê chiàⁿ-chhiú hû-chhî lí.

11看ah，凡若大受氣你ê，的確lóng漏氣見笑；kap你相爭ê的確親像無，亦beh滅無。Khòaⁿ ah, hoān-nā tōa siū-khì lí--ê, tek-khak lóng làu-khùi kiàn-siàu; kap lí saⁿ-chiⁿ--ê tek-khak chhin-chhiūⁿ bô, ia̍h beh bia̍t-bô.

12Kap你相爭ê，你beh chhē in，亦chhē無；kap你爭戰ê，beh親像無物，成做空虛。Kap lí saⁿ-chiⁿ--ê, lí beh chhē in, ia̍h chhē bô; kap lí cheng-chiàn--ê, beh chhin-chhiūⁿ bô mi̍h, chiâⁿ-chòe khang-hu.

13因為我耶和華，你ê上帝，beh牽你ê chiàⁿ手，kā你講，m̄免驚，我beh幫贊你。In-ūi Góa Iâ-hô-hoa, lí ê Siōng-tè, beh khan lí ê chiàⁿ-chhiú, kā lí kóng, M̄-bián kiaⁿ, Góa beh pang-chān lí.

14親像tō͘-ún ê雅各，kap lín以色列人，m̄免驚；耶和華講，我beh幫贊你，救贖你ê就是以色列ê聖ê。Chhin-chhiūⁿ tō͘-ún ê Ngá-kok, kap lín Í-sek-lia̍t lâng, m̄-bián kiaⁿ; Iâ-hô-hoa kóng, Góa beh pang-chān lí, kiù-sio̍k lí--ê chiū-sī Í-sek-lia̍t ê Sèng--ê.

15看ah，我beh hō͘你做phah五穀新ê器具，利koh有齒；你beh將山嶺phah到碎碎，hō͘山頭親像粗糠。Khòaⁿ ah, Góa beh hō͘ lí chòe phah gō͘-kak sin ê khì-kū, lāi koh ū-khí; lí beh chiong soaⁿ-niá phah kàu chhùi-chhùi, hō͘ soaⁿ-thâu chhin-chhiūⁿ chho͘-khng.

16你beh簸in，風beh kā in吹去，捲螺風beh kā in掃去；總是你beh因為耶和華來歡喜，因為以色列ê聖ê來誇口。Lí beh pòa--in, hong beh kā in chhe--khì, kńg-lê-hong beh kā in sàu--khì; chóng-sī lí beh in-ūi Iâ-hô-hoa lâi hoaⁿ-hí, in-ūi Í-sek-lia̍t ê Sèng--ê lâi khoa-kháu.

17Sòng-hiong困苦ê人chhē水，亦chhē無；in因為嘴渴(khoah)、舌乾；我耶和華beh應in，我以色列ê上帝的確無放sak in。Sòng-hiong khùn-khó͘ ê lâng chhē chúi, ia̍h chhē bô; in in-ūi chhùi khoah, chi̍h ta; Góa Iâ-hô-hoa beh ìn--in, Góa Í-sek-lia̍t ê Siōng-tè tek-khak bô pàng-sak in.

18我beh tī無草ê山開江河，tī山谷中開水泉；我beh hō͘沙漠變做水池，hō͘乾地變做水泉。Góa beh tī bô-chháu ê soaⁿ khui kang-hô, tī soaⁿ-kok-tiong khui chúi-chôaⁿ; Góa beh hō͘ soa-bô͘ pìⁿ-chòe chúi-tî, hō͘ ta-tōe pìⁿ-chòe chúi-chôaⁿ.

19我beh tī曠野栽柏香樹，chō-kiap樹，kong-liam樹，kap野橄欖樹；我tī沙漠beh將松樹、杉樹，kap黃楊樹做一下栽；Góa beh tī khòng-iá chai pek-hiuⁿ-chhiū, chō-kiap-chhiū, kong-liam-chhiū, kap iá kaⁿ-ná-chhiū; Góa tī soa-bô͘ beh chiong siông-chhiū, sam-chhiū, kap n̂g-iông-chhiū chòe chi̍t-ē chai;

20thang hō͘人來看，來知來想，相kap明白；這是耶和華ê手所做ê，是以色列ê聖ê所創造ê。thang hō͘ lâng lâi khòaⁿ, lâi chai lâi siūⁿ, saⁿ-kap bêng-pe̍k; che sī Iâ-hô-hoa ê chhiú só͘ chòe--ê, sī Í-sek-lia̍t ê Sèng--ê só͘ chhòng-chō--ê.

21耶和華講，Lín tio̍h提起lín ê案件；雅各ê人君講，Lín tio̍h排列lín有證據ê理由。Iâ-hô-hoa kóng, Lín tio̍h thê-khí lín ê àn-kiāⁿ; Ngá-kok ê Jîn-kun kóng, Lín tio̍h pâi-lia̍t lín ū chèng-kù ê lí-iû.

22In tio̍h排列伊，tio̍h hō͘阮知將來beh怎樣；hō͘阮知以前ê事是甚麼，hō͘阮thang講究，得tio̍h知事ê結局；á是將beh來ê事講hō͘阮聽。In tio̍h pâi-lia̍t i, tio̍h hō͘ goán chai chiong-lâi beh cháiⁿ-iūⁿ; hō͘ goán chai í-chêng ê sū sī sím-mi̍h, hō͘ goán thang káng-kiù, tit-tio̍h chai sū ê kiat-kio̍k; á-sī chiong beh lâi ê sū kóng hō͘ goán thiaⁿ.

23Tio̍h hō͘阮知將來ê事，thang hō͘阮知lín是上帝；或是好，或是pháiⁿ，lín tio̍h行伊，hō͘阮gông-ngia̍h來相kap看。Tio̍h hō͘ goán chai chiong-lâi ê sū, thang hō͘ goán chai lín sī siōng-tè; he̍k-sī hó, he̍k-sī pháiⁿ, lín tio̍h kiâⁿ i, hō͘ goán gông-ngia̍h lâi saⁿ-kap khòaⁿ.

24看ah，lín屬tī無，lín ê所做屬tī空虛；hit-ê揀選lín-ê是可惡。Khòaⁿ ah, lín sio̍k tī bô, lín ê só͘-chòe sio̍k tī khang-hu; hit-ê kéng-soán lín--ê sī khó-ò͘ⁿ.

25我tùi北方興起一人，伊就來；伊tùi日出ê所在求叫我ê名ê；伊beh踏掌權ê親像灰土，親像燒磁師傅踏土一樣。Góa tùi pak-hng heng-khí chi̍t-lâng, i chiū lâi; i tùi ji̍t-chhut ê só͘-chāi kiû-kiò Góa ê miâ--ê; i beh ta̍h chiáng-koân--ê chhin-chhiūⁿ he-thô͘, chhin-chhiūⁿ sio-hûi sai-hū ta̍h-thô͘ chi̍t-iūⁿ.

26Chī-chūi tùi起頭講明chit-ê事，hō͘阮知；是誰 tùi起頭講明，hō͘阮講，祂無錯ah？總是無有講明，無有排列，無有聽見lín ê話ê。Chī-chūi tùi khí-thâu kóng-bêng chit ê sū, hō͘ goán chai; chī-chūi tùi khí-thâu kóng-bêng, hō͘ goán kóng, I bô-chhò ah? chóng-sī bô ū kóng-bêng, bô ū pâi-lia̍t, bô ū thiaⁿ-kìⁿ lín ê ōe--ê.

27我事先對錫安講，看ah，看ah；我beh將一位報好消息ê賞賜耶路撒冷。Góa tāi-seng tùi Sek-an kóng, Khòaⁿ ah, khòaⁿ ah; Góa beh chiong chi̍t-ūi pò hó siau-sit--ê siúⁿ-sù Iâ-lō͘-sat-léng.

28我看伊，無一人；in中間亦無謀士，tī我問ê時，thang應一句。Góa khòaⁿ i, bô chi̍t-lâng; in tiong-kan ia̍h bô bô͘-sū, tī Góa mn̄g ê sî, thang ìn chi̍t-kù.

29看ah，in lóng是空虛，in ê所做是無物；in所鑄ê偶像lóng是風，lóng是空虛ê。Khòaⁿ ah, in lóng-sī khang-hu, in ê só͘-chòe sī bô-mi̍h; in só͘ chù ê ngó͘-siōng lóng-sī hong, lóng-sī khang-hu ê.

1看ah，我ê奴僕，我所扶持ê，我所揀選ê，我ê心所歡喜ê，我有將我ê神hō͘伊，伊beh將公理傳hō͘外邦。Khòaⁿ ah, Góa ê lô͘-po̍k, Góa só͘ hû-chhî ê, Góa só͘ kéng-soán ê, Góa ê sim só͘ hoaⁿ-hí--ê, Góa ū chiong Góa ê sîn hō͘ i, i beh chiong kong-lí thoân hō͘ gōa-pang.

2伊無喧嘩，無出聲，亦無hō͘街路裡聽見伊ê聲。I bô soan-hoa, bô chhut-siaⁿ, ia̍h bô hō͘ ke-lō͘--nih thiaⁿ-kìⁿ i ê siaⁿ.

3受傷ê蘆葦，伊無at折，beh hoa ê燈火，伊無phah熄；伊照真實，將公理傳播。Siū-siong ê lô͘-úi, i bô at-chi̍h, beh hoa ê teng-hé, i bô phah-sit; i chiàu chin-si̍t, chiong kong-lí thoân-pò͘.

4伊無凊(chhìn)心，亦無失膽，直到伊tī地上設立公理；海嶼lóng thèng候伊ê教示。I bô chhìn-sim, ia̍h bô sit-táⁿ, ti̍t-kàu i tī tōe-chiūⁿ siat-li̍p kong-lí; hái-sū lóng thèng-hāu i ê kà-sī.

5耶和華上帝，創造chiah-ê天來thí開伊，開闊地kap伊所出ê，用活氣hō͘地上ê眾百姓，用神魂hō͘行tī hit頂面ê人ê，講，Iâ-hô-hoa Siōng-tè, chhòng-chō chiah ê thiⁿ lâi thí-khui i, khui-khoah tōe kap i só͘-chhut--ê, ēng oa̍h-khì hō͘ tōe-chiūⁿ ê chèng peh-sìⁿ, ēng sîn-hûn hō͘ kiâⁿ tī hit téng-bīn ê lâng ê, kóng,

6我耶和華用公義召你，beh牽你ê手，保守你，hō͘你做百姓ê約ê中保，做外邦人ê光；Góa Iâ-hô-hoa ēng kong-gī tiàu--lí, beh khan lí ê chhiú, pó-siú lí, hō͘ lí chòe peh-sìⁿ ê iok ê tiong-pó, chòe gōa-pang lâng ê kng;

7來開chhiⁿ-mî ê目睭，chhōa受關ê出監；hō͘ tiàm tī烏暗ê出監牢。lâi khui chhiⁿ-mî ê ba̍k-chiu, chhōa siū-koaiⁿ--ê chhut-kaⁿ; hō͘ tiàm tī o͘-àm--ê chhut kaⁿ-lô.

8我是耶和華，這是我ê名，我無將我ê榮光歸hō͘別ê神，亦無將我ê名聲歸hō͘雕刻ê偶像。Góa sī Iâ-hô-hoa, che sī Góa ê miâ, Góa bô chiong Góa ê êng-kng kui hō͘ pa̍t ê sîn, ia̍h bô chiong Góa ê miâ-siaⁿ kui-hō͘ tiau-khek ê ngó͘-siōng.

9看ah，前ê事已經成，taⁿ我亦beh將新ê事講明；chiah-ê事未發起以前，我就講hō͘ lín聽。Khòaⁿ ah, chêng ê sū í-keng chiâⁿ, taⁿ Góa ia̍h beh chiong sin ê sū kóng-bêng; chiah ê sū bē hoat-khí í-chêng, Góa chiū kóng hō͘ lín thiaⁿ.

10過海ê，kap海內所有ê，海嶼kap其中khiā起ê百姓，lóng tio̍h ǹg耶和華唱新ê歌，tùi地極o-ló祂。Kè-hái-ê, kap hái-lāi só͘-ū--ê, hái-sū kap kî-tiong khiā-khí ê peh-sìⁿ, lóng tio̍h ǹg Iâ-hô-hoa chhiùⁿ sin ê koa, tùi tōe-ke̍k o-ló I.

11曠野kap其中ê城，kap Ki-ta̍t人khiā起ê鄉社，lóng tio̍h出聲；Se-la̍h khiā起ê百姓tio̍h唱歌，tī山頂ê tio̍h出大聲。Khòng-iá kap kî-tiong ê siâⁿ, kap Ki-ta̍t lâng khiā-khí ê hiuⁿ-siā, lóng tio̍h chhut-siaⁿ; Se-la̍h khiā-khí ê peh-sìⁿ tio̍h chhiùⁿ-koa, tī soaⁿ-téng--ê tio̍h chhut tōa-siaⁿ.

12In tio̍h將榮光歸hō͘耶和華，tī海嶼中報揚祂ê名聲。In tio̍h chiong êng-kng kui hō͘ Iâ-hô-hoa, tī hái-sū-tiong pò-iông I ê miâ-siaⁿ.

13耶和華beh親像勇猛ê人出去；beh親像交戰ê人激動熱心；beh喉叫，大聲hoah，beh用大氣力攻擊祂ê對敵。Iâ-hô-hoa beh chhin-chhiūⁿ ióng-béng ê lâng chhut-khì; beh chhin-chhiūⁿ kau-chiàn ê lâng kek-tōng jia̍t-sim ; beh âu-kiò, tōa-siaⁿ hoah, beh ēng tōa khùi-la̍t kong-kek I ê tùi-te̍k.

14我久久無開嘴，靜靜家己遏止；taⁿ我beh喉叫，親像beh生 ê婦人人；我beh hā-hā喘bōe接氣。Góa kú-kú bô khui-chhùi, chēng-chēng ka-kī at-chí; taⁿ Góa beh âu-kiò, chhin-chhiūⁿ beh siⁿ ê hū-jîn-lâng; Góa beh hā-hā-chhoán bōe chih khùi.

15我beh hō͘大山小山變做拋荒，hō͘ hit頂面ê花草lóng枯焦；我beh hō͘江河變做洲嶼，hō͘水池lóng乾去。Góa beh hō͘ tōa-soaⁿ sió-soaⁿ pìⁿ-chòe pha-hng, hō͘ hit téng-bīn ê hoe-chháu lóng ko͘-tâ; Góa beh hō͘ kang-hô pìⁿ-chòe chiu-sū, hō͘ chúi-tî lóng ta--khì.

16我beh chhōa chhiⁿ-mî-ê行in m̄-bat ê道路；chhōa in行m̄-bat ê路徑；tī in ê面前hō͘烏暗變做光明，hō͘彎曲變做平直。chiah-ê事我lóng beh行，亦無放sak in。Góa beh chhōa chhiⁿ-mî--ê kiâⁿ in m̄-bat ê tō-lō͘; chhōa in kiâⁿ m̄-bat ê lō͘-kèng; tī in ê bīn-chêng hō͘ o͘-àm pìⁿ-chòe kng-bêng, hō͘ oan-khiau pìⁿ-chòe pîⁿ-ti̍t. Chiah ê sū Góa lóng beh kiâⁿ, ia̍h bô pàng-sak in.

17óa靠雕刻ê偶像，tùi鑄造ê偶像講，你是阮ê上帝，chit號人受趕走，大見笑。Óa-khò tiau-khek ê ngó͘-siōng, tùi chù-chō ê ngó͘-siōng kóng, Lí sī goán ê Siōng-tè, chit-hō lâng siū kóaⁿ-cháu, tōa kiàn-siàu.

18Lín臭耳人ê tio̍h聽；lín chhiⁿ-mî-ê tio̍h看，hō͘ lín能看見。Lín chhàu-hī-lâng-ê tio̍h thiaⁿ; lín chhiⁿ-mî--ê tio̍h khòaⁿ, hō͘ lín ōe khòaⁿ-kìⁿ.

19我ê奴僕以外，是誰 chhiⁿ-mî ah？Chī-chūi臭耳人親像我所差ê使者ah？是誰 chhiⁿ-mî親像hit-ê kap我和好ê，á是chhiⁿ-mî親像耶和華ê奴僕ah？Góa ê lô͘-po̍k í-gōa, chī-chūi chhiⁿ-mî ah? Chī-chūi chháu-hī lâng chhin-chhiūⁿ Góa só͘ chhe ê sù-chiá ah? chī-chūi chhiⁿ-mî chhin-chhiūⁿ hit-ê kap Góa hô-hó--ê, á-sī chhiⁿ-mî chhin-chhiūⁿ Iâ-hô-hoa ê lô͘-po̍k ah?

20你看見chōe-chōe tāi-chì亦無注意；開耳孔，也無聽見。Lí khòaⁿ-kìⁿ chōe-chōe tāi-chì ia̍h bô chù-ì; khui hī-khang, iā bô thiaⁿ-kìⁿ.

21耶和華因為家己ê公義，歡喜hō͘律法最大做尊貴。Iâ-hô-hoa in-ūi ka-kī ê kong-gī, hoaⁿ-hí hō͘ lu̍t-hoat chòe tōa chòe chun-kùi.

22總是chit-ê百姓是受搶奪ê；tī山穴受當tio̍h，關密tī監裡；in hō͘人掠tio̍h，無人拯救；hō͘人搶掠去，無人講，放伊tò去。Chóng-sī chit ê peh-sìⁿ sī siū chhiúⁿ-toa̍t--ê; tī soaⁿ-hia̍t siū tng-tio̍h, koaiⁿ-ba̍t tī kaⁿ--nih; in hō͘ lâng lia̍h-tio̍h, bô lâng chín-kiù; hō͘ lâng chhiúⁿ-lia̍h--khì, bô lâng kóng, Pàng i tò--khì.

23Lín中間是誰肯俯耳孔聽這？是誰肯留心，後來聽thàn伊ah？Lín tiong-kan chī-chūi khéng àⁿ hī-khang thiaⁿ che? chī-chūi khéng liû-sim, āu-lâi thiaⁿ-thàn i ah?

24Chī-chūi將雅各交伊hō͘人搶，將以色列交hō͘賊ah？kiám-m̄是耶和華，咱所得罪ê mah？in m̄肯行伊ê道路，亦m̄肯聽thàn祂ê律法。Chī-chūi chiong Ngá-kok kau i hō͘ lâng chhiúⁿ, chiong Í-sek-lia̍t kau hō͘ chha̍t ah? kiám-m̄-sī Iâ-hô-hoa, lán só͘ tek-chōe--ê mah? in m̄-khéng kiâⁿ I ê tō-lō͘, ia̍h m̄-khéng thiaⁿ-thàn I ê lu̍t-hoat.

25所以伊將猛烈ê受氣，kap爭戰ê狠猛，piàⁿ tī伊ê身上；tī伊ê四圍親像火to̍h，伊iáu m̄知；火燒tio̍h伊，伊亦無掛意。Só͘-í I chiong béng-lia̍t ê siū-khì, kap cheng-chiàn ê hiông-béng, piàⁿ tī i ê sin-chiūⁿ; tī i ê sì-ûi chhin-chhiūⁿ hé-to̍h, i iáu m̄-chai; hé sio-tio̍h i, i ia̍h bô khòa-ì.