1看ah，我ê奴僕，我所扶持ê，我所揀選ê，我ê心所歡喜ê，我有將我ê神hō͘伊，伊beh將公理傳hō͘外邦。Khòaⁿ ah, Góa ê lô͘-po̍k, Góa só͘ hû-chhî ê, Góa só͘ kéng-soán ê, Góa ê sim só͘ hoaⁿ-hí--ê, Góa ū chiong Góa ê sîn hō͘ i, i beh chiong kong-lí thoân hō͘ gōa-pang.

2伊無喧嘩，無出聲，亦無hō͘街路裡聽見伊ê聲。I bô soan-hoa, bô chhut-siaⁿ, ia̍h bô hō͘ ke-lō͘--nih thiaⁿ-kìⁿ i ê siaⁿ.

3受傷ê蘆葦，伊無at折，beh hoa ê燈火，伊無phah熄；伊照真實，將公理傳播。Siū-siong ê lô͘-úi, i bô at-chi̍h, beh hoa ê teng-hé, i bô phah-sit; i chiàu chin-si̍t, chiong kong-lí thoân-pò͘.

4伊無凊(chhìn)心，亦無失膽，直到伊tī地上設立公理；海嶼lóng thèng候伊ê教示。I bô chhìn-sim, ia̍h bô sit-táⁿ, ti̍t-kàu i tī tōe-chiūⁿ siat-li̍p kong-lí; hái-sū lóng thèng-hāu i ê kà-sī.

5耶和華上帝，創造chiah-ê天來thí開伊，開闊地kap伊所出ê，用活氣hō͘地上ê眾百姓，用神魂hō͘行tī hit頂面ê人ê，講，Iâ-hô-hoa Siōng-tè, chhòng-chō chiah ê thiⁿ lâi thí-khui i, khui-khoah tōe kap i só͘-chhut--ê, ēng oa̍h-khì hō͘ tōe-chiūⁿ ê chèng peh-sìⁿ, ēng sîn-hûn hō͘ kiâⁿ tī hit téng-bīn ê lâng ê, kóng,

6我耶和華用公義召你，beh牽你ê手，保守你，hō͘你做百姓ê約ê中保，做外邦人ê光；Góa Iâ-hô-hoa ēng kong-gī tiàu--lí, beh khan lí ê chhiú, pó-siú lí, hō͘ lí chòe peh-sìⁿ ê iok ê tiong-pó, chòe gōa-pang lâng ê kng;

7來開chhiⁿ-mî ê目睭，chhōa受關ê出監；hō͘ tiàm tī烏暗ê出監牢。lâi khui chhiⁿ-mî ê ba̍k-chiu, chhōa siū-koaiⁿ--ê chhut-kaⁿ; hō͘ tiàm tī o͘-àm--ê chhut kaⁿ-lô.

8我是耶和華，這是我ê名，我無將我ê榮光歸hō͘別ê神，亦無將我ê名聲歸hō͘雕刻ê偶像。Góa sī Iâ-hô-hoa, che sī Góa ê miâ, Góa bô chiong Góa ê êng-kng kui hō͘ pa̍t ê sîn, ia̍h bô chiong Góa ê miâ-siaⁿ kui-hō͘ tiau-khek ê ngó͘-siōng.

9看ah，前ê事已經成，taⁿ我亦beh將新ê事講明；chiah-ê事未發起以前，我就講hō͘ lín聽。Khòaⁿ ah, chêng ê sū í-keng chiâⁿ, taⁿ Góa ia̍h beh chiong sin ê sū kóng-bêng; chiah ê sū bē hoat-khí í-chêng, Góa chiū kóng hō͘ lín thiaⁿ.

10過海ê，kap海內所有ê，海嶼kap其中khiā起ê百姓，lóng tio̍h ǹg耶和華唱新ê歌，tùi地極o-ló祂。Kè-hái-ê, kap hái-lāi só͘-ū--ê, hái-sū kap kî-tiong khiā-khí ê peh-sìⁿ, lóng tio̍h ǹg Iâ-hô-hoa chhiùⁿ sin ê koa, tùi tōe-ke̍k o-ló I.

11曠野kap其中ê城，kap Ki-ta̍t人khiā起ê鄉社，lóng tio̍h出聲；Se-la̍h khiā起ê百姓tio̍h唱歌，tī山頂ê tio̍h出大聲。Khòng-iá kap kî-tiong ê siâⁿ, kap Ki-ta̍t lâng khiā-khí ê hiuⁿ-siā, lóng tio̍h chhut-siaⁿ; Se-la̍h khiā-khí ê peh-sìⁿ tio̍h chhiùⁿ-koa, tī soaⁿ-téng--ê tio̍h chhut tōa-siaⁿ.

12In tio̍h將榮光歸hō͘耶和華，tī海嶼中報揚祂ê名聲。In tio̍h chiong êng-kng kui hō͘ Iâ-hô-hoa, tī hái-sū-tiong pò-iông I ê miâ-siaⁿ.

13耶和華beh親像勇猛ê人出去；beh親像交戰ê人激動熱心；beh喉叫，大聲hoah，beh用大氣力攻擊祂ê對敵。Iâ-hô-hoa beh chhin-chhiūⁿ ióng-béng ê lâng chhut-khì; beh chhin-chhiūⁿ kau-chiàn ê lâng kek-tōng jia̍t-sim ; beh âu-kiò, tōa-siaⁿ hoah, beh ēng tōa khùi-la̍t kong-kek I ê tùi-te̍k.

14我久久無開嘴，靜靜家己遏止；taⁿ我beh喉叫，親像beh生 ê婦人人；我beh hā-hā喘bōe接氣。Góa kú-kú bô khui-chhùi, chēng-chēng ka-kī at-chí; taⁿ Góa beh âu-kiò, chhin-chhiūⁿ beh siⁿ ê hū-jîn-lâng; Góa beh hā-hā-chhoán bōe chih khùi.

15我beh hō͘大山小山變做拋荒，hō͘ hit頂面ê花草lóng枯焦；我beh hō͘江河變做洲嶼，hō͘水池lóng乾去。Góa beh hō͘ tōa-soaⁿ sió-soaⁿ pìⁿ-chòe pha-hng, hō͘ hit téng-bīn ê hoe-chháu lóng ko͘-tâ; Góa beh hō͘ kang-hô pìⁿ-chòe chiu-sū, hō͘ chúi-tî lóng ta--khì.

16我beh chhōa chhiⁿ-mî-ê行in m̄-bat ê道路；chhōa in行m̄-bat ê路徑；tī in ê面前hō͘烏暗變做光明，hō͘彎曲變做平直。chiah-ê事我lóng beh行，亦無放sak in。Góa beh chhōa chhiⁿ-mî--ê kiâⁿ in m̄-bat ê tō-lō͘; chhōa in kiâⁿ m̄-bat ê lō͘-kèng; tī in ê bīn-chêng hō͘ o͘-àm pìⁿ-chòe kng-bêng, hō͘ oan-khiau pìⁿ-chòe pîⁿ-ti̍t. Chiah ê sū Góa lóng beh kiâⁿ, ia̍h bô pàng-sak in.

17óa靠雕刻ê偶像，tùi鑄造ê偶像講，你是阮ê上帝，chit號人受趕走，大見笑。Óa-khò tiau-khek ê ngó͘-siōng, tùi chù-chō ê ngó͘-siōng kóng, Lí sī goán ê Siōng-tè, chit-hō lâng siū kóaⁿ-cháu, tōa kiàn-siàu.

18Lín臭耳人ê tio̍h聽；lín chhiⁿ-mî-ê tio̍h看，hō͘ lín能看見。Lín chhàu-hī-lâng-ê tio̍h thiaⁿ; lín chhiⁿ-mî--ê tio̍h khòaⁿ, hō͘ lín ōe khòaⁿ-kìⁿ.

19我ê奴僕以外，是誰 chhiⁿ-mî ah？Chī-chūi臭耳人親像我所差ê使者ah？是誰 chhiⁿ-mî親像hit-ê kap我和好ê，á是chhiⁿ-mî親像耶和華ê奴僕ah？Góa ê lô͘-po̍k í-gōa, chī-chūi chhiⁿ-mî ah? Chī-chūi chháu-hī lâng chhin-chhiūⁿ Góa só͘ chhe ê sù-chiá ah? chī-chūi chhiⁿ-mî chhin-chhiūⁿ hit-ê kap Góa hô-hó--ê, á-sī chhiⁿ-mî chhin-chhiūⁿ Iâ-hô-hoa ê lô͘-po̍k ah?

20你看見chōe-chōe tāi-chì亦無注意；開耳孔，也無聽見。Lí khòaⁿ-kìⁿ chōe-chōe tāi-chì ia̍h bô chù-ì; khui hī-khang, iā bô thiaⁿ-kìⁿ.

21耶和華因為家己ê公義，歡喜hō͘律法最大做尊貴。Iâ-hô-hoa in-ūi ka-kī ê kong-gī, hoaⁿ-hí hō͘ lu̍t-hoat chòe tōa chòe chun-kùi.

22總是chit-ê百姓是受搶奪ê；tī山穴受當tio̍h，關密tī監裡；in hō͘人掠tio̍h，無人拯救；hō͘人搶掠去，無人講，放伊tò去。Chóng-sī chit ê peh-sìⁿ sī siū chhiúⁿ-toa̍t--ê; tī soaⁿ-hia̍t siū tng-tio̍h, koaiⁿ-ba̍t tī kaⁿ--nih; in hō͘ lâng lia̍h-tio̍h, bô lâng chín-kiù; hō͘ lâng chhiúⁿ-lia̍h--khì, bô lâng kóng, Pàng i tò--khì.

23Lín中間是誰肯俯耳孔聽這？是誰肯留心，後來聽thàn伊ah？Lín tiong-kan chī-chūi khéng àⁿ hī-khang thiaⁿ che? chī-chūi khéng liû-sim, āu-lâi thiaⁿ-thàn i ah?

24Chī-chūi將雅各交伊hō͘人搶，將以色列交hō͘賊ah？kiám-m̄是耶和華，咱所得罪ê mah？in m̄肯行伊ê道路，亦m̄肯聽thàn祂ê律法。Chī-chūi chiong Ngá-kok kau i hō͘ lâng chhiúⁿ, chiong Í-sek-lia̍t kau hō͘ chha̍t ah? kiám-m̄-sī Iâ-hô-hoa, lán só͘ tek-chōe--ê mah? in m̄-khéng kiâⁿ I ê tō-lō͘, ia̍h m̄-khéng thiaⁿ-thàn I ê lu̍t-hoat.

25所以伊將猛烈ê受氣，kap爭戰ê狠猛，piàⁿ tī伊ê身上；tī伊ê四圍親像火to̍h，伊iáu m̄知；火燒tio̍h伊，伊亦無掛意。Só͘-í I chiong béng-lia̍t ê siū-khì, kap cheng-chiàn ê hiông-béng, piàⁿ tī i ê sin-chiūⁿ; tī i ê sì-ûi chhin-chhiūⁿ hé-to̍h, i iáu m̄-chai; hé sio-tio̍h i, i ia̍h bô khòa-ì.

1雅各ah，創造你ê耶和華，以色列ah，hit-ê造成你ê，án-ni講，你m̄-sái驚，因為我救贖你；我bat叫你ê名，召你；你是我ê。Ngá-kok ah, chhòng-chō lí ê Iâ-hô-hoa, Í-sek-lia̍t ah, hit ê chō-chiâⁿ lí--ê, án-ni kóng, Lí m̄-sái kiaⁿ, in-ūi Góa kiù-sio̍k lí; Góa bat kiò lí ê miâ, tiàu lí; lí sī Góa-ê.

2你tùi水中經過，我的確kap你相kap tī-teh；你經過江河，水的確無淹密你；你tùi火中行過去，的確無受燒；火燄亦無to̍h tī你ê身上。Lí tùi chúi-tiong keng-kè, Góa tek-khak kap lí saⁿ-kap tī-teh; lí keng-kè kang-hô, chúi tek-khak bô im-ba̍t lí; lí tùi hé-tiong kiâⁿ-kè--khì, tek-khak bô siū sio; hé-iām ia̍h bô to̍h tī lí ê sin-chiūⁿ.

3因為我是耶和華你ê上帝，是以色列ê聖ê，你ê救主；我已經hō͘埃及做你贖回ê價錢，hō͘ Kó͘-si̍t kap Se-pa做你ê替身。In-ūi Góa sī Iâ-hô-hoa lí ê Siōng-tè, sī Í-sek-lia̍t ê Sèng--ê, lí ê Kiù-chú; Góa í-keng hō͘ Ai-ki̍p chòe lí sio̍k-hôe ê kè-chîⁿ, hō͘ Kó͘-si̍t kap Se-pa chòe lí ê thòe-sin.

4因為我看你做寶貝，做尊貴，koh因為我疼你，所以我hō͘人替你，hō͘列國ê人替你ê性命。In-ūi Góa khòaⁿ lí chòe pó-pòe, chòe chun-kùi, koh in-ūi Góa thiàⁿ lí, só͘-í Góa hō͘ lâng thòe lí, hō͘ lia̍t-kok ê lâng thòe lí ê sìⁿ-miā.

5莫得驚，因為我kap你相kap tī-teh；我beh chhōa你ê後裔tùi東方來，koh tùi西方招集你。Bo̍h-tit kiaⁿ, in-ūi Góa kap lí saⁿ-kap tī-teh; Góa beh chhōa lí ê hō͘-è tùi tang-hng lâi, koh tùi sai-hng chio-chi̍p lí.

6我beh對北方講，放出來；對南方講，莫得拘留；將我ê眾kiáⁿ tùi遠遠chhōa來，將我ê眾cha-bó͘-kiáⁿ tùi地極chhōa tò來。Góa beh tùi pak-hng kóng, Pàng--chhut-lâi; tùi lâm-hng kóng, Bo̍h-tit khu-liû; chiong Góa ê chèng-kiáⁿ tùi hn̄g-hn̄g chhōa--lâi, chiong Góa ê chèng cha-bó͘-kiáⁿ tùi tōe-ke̍k chhōa tò-lâi.

7見若用我ê名來稱ê是我為tio̍h家己ê榮光創造ê；是我所做成，所創造ê。Kìⁿ-nā ēng Góa ê miâ lâi chheng--ê sī Góa ūi-tio̍h ka-kī ê êng-kng chhòng-chō--ê; sī Góa só͘ chòe-chiâⁿ, só͘ chhòng-chō ê.

8你tio̍h將有目睭亦chhiⁿ-mî，有耳孔亦臭耳人ê百姓，lóng總chhōa伊出來。Lí tio̍h chiong ū ba̍k-chiu ia̍h chhiⁿ-mî, ū hī-khang ia̍h chhàu-hī-lâng ê peh-sìⁿ, lóng-chóng chhōa i chhut-lâi.

9萬國tio̍h聚集，眾百姓tio̍h聚會；其中是誰能將chit-ê講明，亦將前ê事講hō͘阮聽ah？in thang chhōa干證來，家己顯明in做tio̍h，á是in聽見就講，這是真實。Bān-kok tio̍h chū-chi̍p, chèng peh-sìⁿ tio̍h chū-hōe; kî-tiong chī-chūi ōe chiong chit-ê kóng-bêng, ia̍h chiong chêng ê sū kóng hō͘ goán thiaⁿ ah? in thang chhōa kan-chèng lâi, ka-kī hián-bêng in chòe-tio̍h, á-sī in thiaⁿ-kìⁿ chiū kóng, Che sī chin-si̍t.

10耶和華講，Lín是我ê干證ê，是我所揀ê奴僕；hō͘ lín知來信我，koh明白我就是耶和華；tī我ê事先無有受造ê上帝，tī我ê以後亦無。Iâ-hô-hoa kóng, Lín sī Góa ê kan-chèng ê, sī Góa só͘ kéng ê lô͘-po̍k; hō͘ lín chai lâi sìn Góa, koh bêng-pe̍k Góa chiū-sī Iâ-hô-hoa; tī Góa ê tāi-seng bô-ū siū-chō ê Siōng-tè, tī Góa ê í-āu ia̍h-bô.

11只有我，我是耶和華；除我以外無有救主。Chí-ū Góa, Góa sī Iâ-hô-hoa; tû Góa í-gōa bô ū kiù-chú.

12我bat指示，我bat拯救，我bat講明，koh tī lín中間無有別樣ê上帝；所以耶和華講，Lín是我ê干證，我就是上帝。Góa bat chí-sī, Góa bat chín-kiù, Góa bat kóng-bêng, koh tī lín tiong-kan bô ū pa̍t-iūⁿ ê Siōng-tè; só͘-í Iâ-hô-hoa kóng, Lín sī Góa ê kan-chèng, Góa chiū-sī Siōng-tè.

13Tùi有日子以來，我就是耶和華；無一個能救人脫離我ê手；我beh行tāi-chì，是誰能阻止ah？Tùi ū ji̍t-chí í-lâi, Góa chiū-sī Iâ-hô-hoa; bô chi̍t-ê ōe kiù lâng thoat-lī Góa ê chhiú; Góa beh kiâⁿ tāi-chì, chī-chūi ōe chó͘-chí ah?

14救贖lín ê主耶和華，以色列ê聖ê，án-ni講，因為lín ê緣故，我已經差人到巴比倫，koh我beh hō͘ Ka-le̍k-tí人敗落，親像逃走ê百姓，lóng坐in hōa-hōa哮ê船。Kiù-sio̍k lín ê Chú Iâ-hô-hoa, Í-sek-lia̍t ê Sèng--ê, án-ni kóng, In-ūi lín ê iân-kò͘, Góa í-keng chhe lâng kàu Pa-pí-lûn, koh Góa beh hō͘ Ka-le̍k-tí lâng pāi-lo̍h, chhin-chhiūⁿ tô-cháu ê peh-sìⁿ, lóng chē in hōa-hōa-háu ê chûn.

15我是耶和華lín ê聖ê，是創造以色列ê，是lín ê君王。Góa sī Iâ-hô-hoa lín ê Sèng--ê, sī chhòng-chō Í-sek-lia̍t--ê, sī lín ê Kun-ông.

16耶和華tī大海中開路，tī大水中開路；Iâ-hô-hoa tī tōa-hái-tiong khui-lō͘, tī tōa-chúi-tiong khui-lō͘;

17hō͘車、馬、兵丁，勇猛ê人lóng出來；(in做一下倒落去，bōe koh起來；in滅無親像失去ê火；)hō͘ chhia, bé, peng-teng, ióng-béng ê lâng lóng chhut-lâi; (in chòe chi̍t-ē tó--lo̍h-khì, bōe koh khí--lâi; in bia̍t-bô chhin-chhiūⁿ sit--khì ê hé;)

18耶和華án-ni講，Lín m̄-thang記念前ê事，亦m̄-thang想早時ê tāi-chì。Iâ-hô-hoa án-ni kóng, Lín m̄-thang kì-liām chêng ê sū, ia̍h m̄-thang siūⁿ chá-sî ê tāi-chì.

19看ah，我beh做一項新ê事，taⁿ teh發現，lín kiám m̄知mah？我beh tī曠野開道路，tī沙漠開江河。Khòaⁿ ah, Góa beh chòe chi̍t-hāng sin ê sū, taⁿ teh hoat-hiān, lín kiám m̄-chai mah? Góa beh tī khòng-iá khui tō-lō͘, tī soa-bô͘ khui kang-hô.

20山裡ê走獸beh尊重我，山狗kap鴕鳥亦beh án-ni；因為我hō͘曠野有水，hō͘沙漠有河，thang hō͘我ê百姓，我所揀ê，lim。Soaⁿ--nih ê cháu-siù beh chun-tiōng Góa, soaⁿ-káu kap tô-chiáu ia̍h beh án-ni; in-ūi Góa hō͘ khòng-iá ū chúi, hō͘ soa-bô͘ ū hô, thang hō͘ Góa ê peh-sìⁿ, Góa só͘-kéng--ê, lim.

21Chit-ê百姓是我為tio̍h家己所造ê，beh報揚我ê名聲。Chit ê peh-sìⁿ sī Góa ūi-tio̍h ka-kī só͘ chō--ê, beh pò-iông Góa ê miâ-siaⁿ.

22雅各ah，你無有求叫我；以色列ah，你反tńg厭煩我。Ngá-kok ah, lí bô ū kiû-kiò Góa; Í-sek-lia̍t ah, lí hoán-tńg iàm-hoân Góa.

23你無帶你ê羊做燒祭來hō͘我；亦無有用祭物尊敬我。我無因為所獻ê物hō͘你tio̍h磨，亦無因為乳香hō͘你厭倦。Lí bô tòa lí ê iûⁿ chòe sio-chè lâi hō͘ Góa; ia̍h bô ū ēng chè-mi̍h chun-kèng Góa. Góa bô in-ūi só͘-hiàn ê mi̍h hō͘ lí tio̍h-bôa, ia̍h bô in-ūi jú-hiuⁿ hō͘ lí ià-siān.

24你無用銀為我買菖蒲，亦無用祭物ê油hō͘我飽足；反tńg hō͘我因為你ê罪惡tio̍h磨，hō͘我因為你ê罪過厭倦。Lí bô ēng gûn ūi Góa bóe chhiong-pô͘, ia̍h bô ēng chè-mi̍h ê iû hō͘ Góa pá-chiok; hoán-tńg hō͘ Góa in-ūi lí ê chōe-ok tio̍h-bôa, hō͘ Góa in-ūi lí ê chōe-kòa ià-siān.

25只有我因為家己ê緣故，擦滅你chiah-ê過失；我亦無記念你chiah-ê罪惡。Chí-ū Góa in-ūi ka-kī ê iân-kò͘, chhat-bia̍t lí chiah ê kè-sit; Góa ia̍h bô kì-liām lí chiah ê chōe-ok.

26你tio̍h點醒我；你我thang相kap辯論；你thang排列你ê情理，thang得tio̍h稱做義。Lí tio̍h tiám-chhíⁿ Góa; lí Góa thang saⁿ-kap piān-lūn; lí thang pâi-lia̍t lí ê chêng-lí, thang tit-tio̍h chheng-chòe-gī.

27你開基ê祖犯罪，你ê中保悖逆我。Lí khai-ki ê chó͘ hoān-chōe, lí ê tiong-pó pōe-ge̍k Góa.

28所以我beh凌辱聖所ê首領，hō͘雅各受咒詛，hō͘以色列受詈罵。Só͘-í Góa beh lêng-jio̍k sèng-só͘ ê siú-léng, hō͘ Ngá-kok siū chiù-chó͘, hō͘ Í-sek-lia̍t siū lóe-mē.

1我ê奴僕雅各，我所揀ê以色列ah，taⁿ你tio̍h聽。Góa ê lô͘-po̍k Ngá-kok, Góa só͘ kéng ê Í-sek-lia̍t ah, taⁿ lí tio̍h thiaⁿ.

2造成你，koh tùi胎裡造就你，亦beh幫贊你ê耶和華án-ni講，我ê奴僕雅各，我所揀ê Iâ-su-lûn ah，m̄免驚。Chō-chiâⁿ lí, koh tùi thai--nih chō-chiū lí, ia̍h beh pang-chān lí ê Iâ-hô-hoa án-ni kóng, Góa ê lô͘-po̍k Ngá-kok, Góa só͘ kéng ê Iâ-su-lûn ah, m̄-bián kiaⁿ.

3因為我beh將水piàⁿ hō͘嘴乾ê人，將河水灌ak乾地；我beh將我ê神降落tī你ê後裔，將我ê福氣降落tī你ê kiáⁿ孫。In-ūi Góa beh chiong chúi piàⁿ hō͘ chhùi-ta ê lâng, chiong hô-chúi koàn-ak ta-tōe; Góa beh chiong Góa ê sîn kàng-lo̍h tī lí ê hō͘-è, chiong Góa ê hok-khì kàng-lo̍h tī lí ê kiáⁿ-sun.

4In beh發生tī草中，親像溪邊ê柳樹。In beh hoat-siⁿ tī chháu-tiong, chhin-chhiūⁿ khoe-piⁿ ê liú-chhiū.

5Chit-ê beh講，我是屬耶和華ê；hit-ê beh用雅各ê名家己稱；koh chit-ê beh親手寫，歸tī耶和華ê；亦beh用以色列ê名家己稱。Chit-ê beh kóng, Góa sī sio̍k Iâ-hô-hoa--ê; hit-ê beh ēng Ngá-kok ê miâ ka-kī chheng; koh chit-ê beh chhin-chhiú siá, kui tī Iâ-hô-hoa--ê; ia̍h beh ēng Í-sek-lia̍t ê miâ ka-kī chheng.

6耶和華，以色列ê王，救贖ê主，萬軍ê耶和華án-ni講，我是起頭ê，我是路尾ê；我以外無有上帝。Iâ-hô-hoa, Í-sek-lia̍t ê ông, kiù-sio̍k ê Chú, bān-kun ê Iâ-hô-hoa án-ni kóng, Góa sī khí-thâu--ê, Góa sī lō͘-bé--ê; Góa í-gōa bô ū Siōng-tè.

7Tùi我設立古早ê百姓ê時是誰能親像我叫伊，講明伊，kā我排列ah？hō͘ in將未來ê事kap beh成ê tāi-chì講明。Tùi Góa siat-li̍p kó͘-chá ê peh-sìⁿ ê sî chī-chūi ōe chhin-chhiūⁿ Góa kiò i, kóng-bêng--i, kā Góa pâi-lia̍t ah? hō͘ in chiong bē-lâi ê sū kap beh-chiâⁿ ê tāi-chì kóng-bêng.

8Lín m̄免忍，亦m̄免驚；我kiám-m̄是tùi古早就講明，指示你mah？koh lín是我ê干證，我以外kiám有上帝mah？實在無有石磐；我m̄-bat有別ê。Lín m̄-bián lún, ia̍h m̄-bián kiaⁿ; Góa kiám-m̄-sī tùi kó͘-chá chiū kóng-bêng, chí-sī lí mah? koh lín sī Góa ê kan-chèng, Góa í-gōa kiám ū Siōng-tè mah? si̍t-chāi bô ū Chio̍h-pôaⁿ; Góa m̄-bat ū pa̍t-ê.

9製造雕刻ê偶像ê一盡空虛；in所歡喜ê lóng無利益；in ê干證無看見亦m̄知，致到in見笑。Chè-chō tiau-khek ê ngó͘-siōng--ê it-chīn khang-hu; in só͘ hoaⁿ-hí--ê lóng bô lī-ek; in ê kan-chèng bô khòaⁿ-kìⁿ ia̍h m̄-chai, tì-kàu in kiàn-siàu.

10Chī-chūi製造神佛，鑄造無利益ê偶像？Chī-chūi chè-chō sîn-pu̍t, chù-chō bô lī-ek ê ngó͘-siōng?

11看ah，伊ê同伴lóng beh見笑；工匠不過是人；chhut-chāi in聚會，chhut-chāi in khiā-teh；lóng beh驚惶，相kap見笑。Khòaⁿ ah, i ê tâng-phōaⁿ lóng beh kiàn-siàu; kang-chhiūⁿ put-kò sī lâng; chhut-chāi in chū-hōe, chhut-chāi in khiā--teh; lóng beh kiaⁿ-hiâⁿ, saⁿ-kap kiàn-siàu.

12鐵匠造斧頭，用火炭鍛鍊，用鎚phah伊，用伊有力ê手來tûi伊致到iau無力；無lim水來厭倦。Thih-chhiūⁿ chō pó͘-thâu, ēng hé-thòaⁿ thoàn-liān, ēng thûi phah i, ēng i ū-la̍t ê chhiú lâi tûi i tì-kàu iau bô la̍t; bô lim-chúi lâi ià-siān.

13木匠牽準線；用筆畫伊，用利刀刻伊，用圓尺畫模，仿人ê形，做親像人ê súi，tiàm tī厝內。Ba̍k-chhiūⁿ khan chîn-sòaⁿ; ēng pit ūi i, ēng lāi-to khek i, ēng îⁿ-chhioh ūi-bô͘, hóng lâng ê hêng, chòe chhin-chhiūⁿ lâng ê súi, tiàm tī chhù-lāi.

14伊剉柏香樹，koh取栗樹，kap橡樹；tī樹林內揀定tio̍h一叢；伊栽種榕樹，得tio̍h雨ak大叢。I chhò pek-hiuⁿ-chhiū, koh chhú lek-chhiū, kap siōng-chhiū; tī chhiū-nâ-lāi kéng tiāⁿ-tio̍h chi̍t-châng; i chai-chèng chhêng-chhiū, tit-tio̍h hō͘ ak tōa-châng.

15Chit號樹人用來hiâⁿ火；用伊來烘燒；koh燒伊來pek餅；亦koh裝神佛來跪拜；刻偶像來kha̍p頭拜。Chit-hō chhiū lâng ēng lâi hiâⁿ-hé; ēng i lâi hang-sio; koh sio i lâi pek-piáⁿ; ia̍h koh chng sîn-pu̍t lâi kūi-pài; khek ngó͘-siōng lâi kha̍p-thâu pài.

16用一份燒tī火裡；用一份煮肉來食；pek肉來食飽；家己烘燒講，A-hā，我烘燒lah，我見tio̍h火lah。Ēng chi̍t-hūn sio tī hé--nih; ēng chi̍t-hūn chú bah lâi chia̍h; pek bah lâi chia̍h-pá; ka-kī hang-sio kóng, A-hā, góa hang-sio lah, góa kìⁿ-tio̍h hé lah.

17伊用chhun-ê裝一sian神佛，就是雕刻ê偶像；伊仆落拜伊，祈禱伊講，求你救我，因為你是我ê上帝。I ēng chhun--ê chng chi̍t-sian sîn-pu̍t, chiū-sī tiau-khek ê ngó͘-siōng; i phak-lo̍h pài i, kî-tó i kóng, Kiû lí kiù góa, in-ūi lí sī góa ê siōng-tè.

18In m̄知，亦bōe想，因為伊糊in ê目睭，hō͘ in bōe看見，塞密in ê心，hō͘ in bōe明白。In m̄-chai, ia̍h bōe siūⁿ, in-ūi I kô͘ in ê ba̍k-chiu, hō͘ in bōe khòaⁿ-kìⁿ, that-ba̍t in ê sim, hō͘ in bōe bêng-pe̍k.

19無人曉悟，無智識，無聰明，會曉講，我bat the̍h一份tī火裡燒，tī伊火炭頂pek餅，燒肉來食；chit-ê chhun-ê，我kiám thang做可惡ê物mah？我kiám thang tùi柴頭kha̍p拜mah？Bô lâng hiáu-ngō͘, bô tì-sek, bô chhang-miâ, ōe hiáu kóng, Góa bat the̍h chi̍t-hūn tī hé--nih sio, tī i hé-thòaⁿ-téng pek piáⁿ, sio-bah lâi chia̍h; chit ê chhun--ê, góa kiám thang chòe khó-ò͘ⁿ ê mi̍h mah? góa kiám thang tùi chhâ-thâu kha̍p-pài mah?

20伊用火灰做食物；伊ê心昏迷，hō͘伊差謬，伊bōe能家己救，亦bōe能講，我ê chiàⁿ手內kiám m̄是有白賊mah？I ēng hé-hu chòe chia̍h-mi̍h; i ê sim hun-bê, hō͘ i chha-biū, i bōe-ōe ka-kī kiù, ia̍h bōe-ōe kóng, Góa ê chiàⁿ-chhiú-lāi kiám m̄-sī ū pe̍h-chha̍t mah?

21雅各ah，以色列ah，因為你是我ê奴僕，tio̍h記得chiah-ê事；以色列ah，你是我ê奴僕，我造就你，的確無bōe記得你。Ngá-kok ah, Í-sek-lia̍t ah, in-ūi lí sī Góa ê lô͘-po̍k, tio̍h kì-tit chiah ê sū; Í-sek-lia̍t ah, lí sī Góa ê lô͘-po̍k, Góa chō-chiū lí, tek-khak bô bōe-kì-tit lí.

22我擦滅你ê過失，親像密雲消散；我擦滅你ê罪惡，親像薄雲無去；你tio̍h歸向我；因為我救贖你。Góa chhat-bia̍t lí ê kè-sit, chhin-chhiūⁿ ba̍t-hûn siau-sòaⁿ; Góa chhat-bia̍t lí ê chōe-ok, chhin-chhiūⁿ po̍h-hûn bô--khì; lí tio̍h kui-ǹg Góa; in-ūi Góa kiù-sio̍k lí.

23Chiah-ê天ah，應該tio̍h唱歌，因為耶和華已經做成伊；地ê深ê所在ah，應該出歡喜ê聲；chiah-ê山應該出聲唱歌；樹林kap其中所有ê樹lóng tio̍h án-ni；因為耶和華有救贖雅各，亦beh tī以色列得tio̍h榮光。Chiah ê thiⁿ ah, eng-kai tio̍h chhiùⁿ-koa, in-ūi Iâ-hô-hoa í-keng chòe-chiâⁿ i; tōe ê chhim ê só͘-chāi ah, eng-kai chhut hoaⁿ-hí ê siaⁿ; chiah ê soaⁿ eng-kai chhut-siaⁿ chhiùⁿ-koa; chhiū-nâ kap kî-tiong só͘-ū ê chhiū lóng tio̍h án-ni; in-ūi Iâ-hô-hoa ū kiù-sio̍k Ngá-kok, ia̍h beh tī Í-sek-lia̍t tit-tio̍h êng-kng.

24Tùi胎裡造就你ê，救贖你ê耶和華án-ni講，我耶和華是造成萬物ê，是家己展開chiah-ê天，開闊大地ê；(是誰 kap我tī-teh ah？)Tùi thai--nih chō-chiū lí--ê, kiù-sio̍k lí ê Iâ-hô-hoa án-ni kóng, Góa Iâ-hô-hoa sī chō-chiâⁿ bān-mi̍h--ê, sī ka-kī tián-khui chiah ê thiⁿ, khui-khoah tōa-tōe--ê; (chī-chūi kap Góa tī-teh ah?)

25Hō͘講假話ê兆頭無功效，hō͘占卜ê人顛狂；hō͘智慧ê人退後，hō͘伊ê智識變做愚戇；hō͘ kóng ké-ōe ê tiāu-thâu bô kong-hāu, hō͘ chiam-pok ê lâng tian-kông; hō͘ tì-hūi ê lâng thè-āu, hō͘ i ê tì-sek pìⁿ-chòe gû-gōng;

26hō͘我ê奴僕ê話應驗，我ê使者ê計畫得tio̍h成；論到耶路撒冷講，的確有人khiā起；論到猶大ê城講，的確受起造；伊拋荒ê所在我beh hō͘伊興起；hō͘ Góa ê lô͘-po̍k ê ōe èng-giām, Góa ê sù-chiá ê kè-e̍k tit-tio̍h chiâⁿ; lūn-kàu Iâ-lō͘-sat-léng kóng, Tek-khak ū lâng khiā-khí; lūn-kàu Iû-tāi ê siâⁿ kóng, Tek-khak siū khí-chō; i pha-hng ê só͘-chāi Góa beh hō͘ i heng-khí;

27對深淵講，你tio̍h乾去，我亦beh hō͘你ê江河乾乾去；tùi chhim-ian kóng, Lí tio̍h ta--khì, Góa ia̍h beh hō͘ lí ê kang-hô ta-la--khì;

28論Kó͘-lia̍t講，伊是我所用ê牧者，beh成我所歡喜ê；論耶路撒冷伊就講，伊beh受起造，殿堂ê地基亦beh建立。lūn Kó͘-lia̍t kóng, I sī Góa só͘-ēng ê bo̍k-chiá, beh chiâⁿ Góa só͘ hoaⁿ-hí--ê; lūn Iâ-lō͘-sat-léng i chiū kóng, I beh siū khí-chō, tiān-tn̂g ê tōe-ki ia̍h beh kiàn-li̍p.