1Pí-le̍k屈落去，Nî-pho仆落去；in ê偶像馱(tô)tī獸kap cheng-siⁿ ê頂面；lín平素所扛ê，taⁿ成做重擔，hō͘厭倦ê cheng-siⁿ載。Pí-le̍k khut--lo̍h-khì, Nî-pho phak--lo̍h-khì; in ê ngó͘-siōng tô tī siù kap cheng-siⁿ ê téng-bīn; lín pêng-sò͘ só͘ kng--ê, taⁿ chiâⁿ-chòe tāng-tàⁿ, hō͘ ià-siān ê cheng-siⁿ chài.

2In lóng做一下仆落去，屈落去；bōe能顧in ê重擔，本身亦hō͘人掠去。In lóng chòe chi̍t-ē phak--lo̍h-khì, khut--lo̍h-khì; bōe-ōe kò͘ in ê tāng-tàⁿ, pún-sin ia̍h hō͘ lâng lia̍h-khì.

3雅各家，以色列家一切iáu chhun ê，tio̍h聽我ê話，lín tùi出世就hō͘我iāng lín，tùi出胎就hō͘我kûi抱。Ngá-kok ke, Í-sek-lia̍t ke it-chhè iáu chhun ê, tio̍h thiaⁿ Góa ê ōe, lín tùi chhut-sì chiū hō͘ Góa iāng lín, tùi chhut-thai chiū hō͘ Góa kûi-phō.

4到lín年老，我猶原是án-ni，到lín頭毛白，我猶原kûi抱lín；我已經造lín，亦beh iāng lín：我beh kûi抱lín，亦beh救lín。Kàu lín nî-lāu, Góa iû-goân sī án-ni, kàu lín thâu-mn̂g pe̍h, Góa iû-goân kûi-phō lín; Góa í-keng chō lín, ia̍h beh iāng lín: Góa beh kûi-phō lín, ia̍h beh kiù lín.

5Lín beh將是誰 kap我相比，kap我同等，thang kap我比並，hō͘阮相同ah？Lín beh chiong chī-chūi kap Góa saⁿ-pí, kap Góa tâng-téng, thang kap Góa pí-phēng, hō͘ goán saⁿ-tâng ah?

6Tùi袋á內piàⁿ出金，用天秤秤銀ê人，雇銀匠製造神佛，in亦仆落，亦跪拜。Tùi tē-á-lāi piàⁿ-chhut kim, ēng thian-phêng phêng gûn ê lâng, kò͘ gûn-chhiūⁿ chè-chō sîn-pu̍t, in ia̍h phak-lo̍h, ia̍h kūi-pài.

7In就扛伊tī肩頭頂，帶去chhāi tī伊ê所在，伊就定定khiā-teh；無離開伊ê本位；人求叫伊，伊bōe能應，亦bōe救人脫離患難。In chiū kng i tī keng-thâu-téng, tòa khì chhāi tī i ê só͘-chāi, i chiū tiāⁿ-tiāⁿ khiā--teh; bô lī-khui i ê pún-ūi; lâng kiû-kiò i, i bōe-ōe ìn, ia̍h bōe kiù lâng thoat-lī hoān-lān.

8Lín tio̍h siàu念chit-ê事，家己做大丈夫；悖逆ê人ah，tio̍h用心來想。Lín tio̍h siàu-liām chit ê sū, ka-kī chòe tāi-tiōng-hu; pōe-ge̍k ê lâng ah, tio̍h ēng sim lâi siūⁿ.

9Lín tio̍h追念第一古早ê事；因為我是上帝，以外無別ê；我是上帝，koh無別ê能比得我。Lín tio̍h tui-liām tē-it kó͘-chá ê sū; in-ūi Góa sī Siōng-tè, í-gōa bô pa̍t-ê; Góa sī Siōng-tè, koh bô pa̍t-ê ōe pí-tit Góa.

10我tùi起頭指明路尾ê事，tùi古早指明iáu未成ê事，講，我ê計畫的確khiā在，見若我所歡喜ê，我beh成伊。Góa tùi khí-thâu chí-bêng lō͘-bé ê sū, tùi kó͘-chá chí-bêng iáu-bē chiâⁿ ê sū, kóng, Góa ê kè-e̍k tek-khak khiā-chāi, kìⁿ-nā Góa só͘ hoaⁿ-hí ê, Góa beh chiâⁿ i.

11我召鷹鳥tùi東方來，召hit-ê成我ê計畫ê人tùi遠遠ê所在來，我已經講出的確成伊；我已經定tio̍h，亦的確做hō͘伊成。Góa tiàu eng-chiáu tùi tang-hng lâi, tiàu hit-ê chiâⁿ Góa ê kè-e̍k ê lâng tùi hn̄g-hn̄g ê só͘-chāi lâi, Góa í-keng kóng-chhut tek-khak chiâⁿ--i; Góa í-keng tiāⁿ-tio̍h, ia̍h tek-khak chòe hō͘ i chiâⁿ.

12Lín chiah-ê硬心，離開公義ê，tio̍h聽我ê話。Lín chiah ê ngī-sim, lī-khui kong-gī--ê, tio̍h thiaⁿ Góa ê ōe.

13我hō͘我ê公義近óa，的確無離開遠遠；我ê救恩的確無延chhiân；我beh施救恩tī錫安，kap我ê榮光tī以色列。Góa hō͘ Góa ê kong-gī kūn-óa, tek-khak bô lī-khui hn̄g-hn̄g; Góa ê kiù-un tek-khak bô iân-chhiân; Góa beh si kiù-un tī Sek-an, kap Góa ê êng-kng tī Í-sek-lia̍t.

1巴比倫ê在室女ah，落來坐tī塵埃；Ka-le̍k-tí ê cha-bó͘-gín-ná ah，無座位，tio̍h坐tī土腳；因為你無koh稱做軟chiáⁿ幼秀ê。Pa-pí-lûn ê chāi-sek-lú ah, lo̍h--lâi chē tī tîn-ai; Ka-le̍k-tí ê cha-bó͘-gín-ná ah, bô chō-ūi, tio̍h chē tī thô͘-kha; in-ūi lí bô koh chheng chòe nńg-chiáⁿ iù-siù ê.

2Tio̍h用石磨磨麥；除去你ê phè，thǹg你ê長衫，露現你ê腳腿，潦過溪。Tio̍h ēng chio̍h-bō bō be̍h; tû-khì lí ê phè, thǹg lí ê tn̂g-saⁿ, lō͘-hiān lí ê kha-thúi, liâu-kè khoe.

3你ê下體beh露現，你ê見笑beh hō͘人看見；我beh報仇，無寬容一人。Lí ê ē-thé beh lō͘-hiān, lí ê kiàn-siàu beh hō͘ lâng khòaⁿ-kìⁿ; Góa beh pò-siû, bô khoan-iông chi̍t-lâng.

4救贖阮ê主，祂ê名是萬軍ê耶和華，是以色列ê聖ê。Kiù-sio̍k goán ê Chú, I ê miâ sī bān-kun ê Iâ-hô-hoa, sī Í-sek-lia̍t ê Sèng-ê.

5Ka-le̍k-tí ê cha-bó͘-gín-ná ah，你tio̍h靜靜坐，入tī暗中；因為你無koh稱做列國ê主母。Ka-le̍k-tí ê cha-bó͘-gín-ná ah, lí tio̍h chēng-chēng chē, ji̍p tī àm-tiong; in-ūi lí bô koh chheng chòe lia̍t-kok ê chú-bú.

6我受氣我ê百姓，我hō͘我ê產業受凌辱，將in交tī你ê手；你lóng無憐憫in，將你極重ê擔掛tī老人ê身上。Góa siū-khì Góa ê peh-sìⁿ, Góa hō͘ Góa ê sán-gia̍p siū lêng-jio̍k, chiong in kau tī lí ê chhiú; lí lóng bô lîn-bín in, chiong lí ke̍k-tāng ê taⁿ kòa tī lāu-lâng ê sin-chiūⁿ.

7你家己講，我beh永永做主母；所以你無將chiah-ê事掛tī心裡，亦無想伊ê結局。Lí ka-kī kóng, Góa beh éng-éng chòe chú-bú; só͘-í lí bô chiong chiah ê sū khòa tī sim--nih, ia̍h bô siūⁿ i ê kiat-kio̍k.

8你chit-ê宴樂，安然坐ê，taⁿ tio̍h聽chit-ê話，你心內講，只有我，我以外無別ê；我的確無致到守寡，亦無tú-tio̍h死kiáⁿ ê事。Lí chit-ê iàn-lo̍k, an-jiân chē-ê, taⁿ tio̍h thiaⁿ chit ê ōe, lí sim-lāi kóng, Chí-ū góa, góa í-gōa bô pa̍t-ê; góa tek-khak bô tì-kàu chiú-kóaⁿ, ia̍h bô tú-tio̍h sí-kiáⁿ ê sū.

9總是死kiáⁿ守寡chit兩件事，tī一日目nih久ê中間beh臨到你；tī你行chōe-chōe邪術，大大畫符念咒ê時，chit兩項事beh全然臨到你。Chóng-sī sí-kiáⁿ chiú-kóaⁿ chit nn̄g kiāⁿ sū, tī chi̍t-ji̍t ba̍k-nih-kú ê tiong-kan beh lîm-kàu lí; tī lí kiâⁿ chōe-chōe siâ-su̍t, tōa-tōa ūi-hû liām-chiù ê sî, chí(**chit) nn̄g hāng sū beh choân-jiân lîm-kàu lí.

10你平素óa靠你ê pháiⁿ，講，無人看見我；你ê智慧聰明迷惑你；koh你心內講，只有我，我以外無別ê。Lí pêng-sò͘ óa-khò lí ê pháiⁿ, kóng, Bô lâng khòaⁿ-kìⁿ góa; lí ê tì-hūi chhang-miâ bê-he̍k lí; koh lí sim-lāi kóng, Chí-ū góa, góa í-gōa bô pa̍t-ê.

11因為án-ni災厄beh臨到你；你m̄知tùi toh-lo̍h來；災害到tī你，你亦bōe能除去；所以m̄知ê毀滅亦beh忽然臨到你。In-ūi án-ni chai-ē beh lîm-kàu lí; lí m̄-chai tùi toh-lo̍h lâi; chai-hāi kàu-tī lí, lí ia̍h bōe-ōe tû-khì; só͘-í m̄-chai ê húi-bia̍t ia̍h beh hut-jiân lîm-kàu lí.

12Tio̍h起來khiā，用你ê邪術kap你chōe-chōe ê符咒，就是對你少年所tio̍h磨學習ê，kiám-chhái會得tio̍h利益，á是得tio̍h khah贏。Tio̍h khí-lâi khiā, ēng lí ê siâ-su̍t kap lí chōe-chōe ê hû-chiù, chiū-sī tùi lí siàu-liân só͘ tio̍h-bôa ha̍k-si̍p--ê, kiám-chhái ōe tit-tio̍h lī-ek, á-sī tit-tio̍h khah-iâⁿ.

13你ê計畫太chōe，致到厭倦；taⁿ hō͘ hiah-ê觀天象ê，看星辰ê，tī月初講讖語ê，lóng起來，救你脫離所beh臨到你ê事。Lí ê kè-e̍k thài-chōe, tì-kàu ià-siān; taⁿ hō͘ hiah-ê koan thiⁿ-siōng--ê, khòaⁿ chhiⁿ-sîn--ê, tī ge̍h-chhoe kóng chhàm-gú ê, lóng khí-lâi, kiù lí thoat-lī só͘ beh lîm-kàu lí ê sū.

14看ah，in beh親像草á受火燒；bōe能救家己脫離火燄ê力；亦無火炭thang烘燒，亦無火thang坐tī伊ê面前。Khòaⁿ ah, in beh chhin-chhiūⁿ chháu-á siū hé sio; bōe-ōe kiù ka-kī thoat-lī hé-iām ê la̍t; ia̍h bô hé-thòaⁿ thang hang-sio, ia̍h bô hé thang chē tī i ê bīn-chêng.

15你所tio̍h磨學習ê事對tī你lóng beh親像án-ni；對你少年ê時kap你做seng-lí-ê亦ta̍k人tò去伊ê本所在，無人救你。Lí só͘ tio̍h-bôa ha̍k-si̍p ê sū tùi-tī lí lóng beh chhin-chhiūⁿ án-ni; tùi lí siàu-liân ê sî kap lí chòe seng-lí--ê ia̍h ta̍k-lâng tò-khì i ê pún só͘-chāi, bô lâng kiù lí.

1雅各ê家，用以色列ê名來稱呼ê，tùi猶大ê水源出來ê，lín tio̍h聽ah；lín kí耶和華ê名來chiù-chōa，稱呼以色列ê上帝，總是無用誠實，無用公義。Ngá-kok ê ke, ēng Í-sek-lia̍t ê miâ lâi chheng-ho͘--ê, tùi Iû-tāi ê chúi-goân chhut--lâi-ê, lín tio̍h thiaⁿ ah; lín kí Iâ-hô-hoa ê miâ lâi chiù-chōa, chheng-ho͘ Í-sek-lia̍t ê Siōng-tè, chóng-sī bô ēng sêng-si̍t, bô ēng kong-gī.

2因為in家己稱做聖城ê百姓，óa靠以色列ê上帝；名做萬軍ê耶和華。In-ūi in ka-kī chheng-chòe sèng-siâⁿ ê peh-sìⁿ, óa-khò Í-sek-lia̍t ê Siōng-tè; miâ chòe bān-kun ê Iâ-hô-hoa.

3以前ê事，我tùi古早講明；已經出我ê嘴，亦是我所指示ê；我忽然間做，tāi-chì就成。Í-chêng ê sū, Góa tùi kó͘-chá kóng-bêng; í-keng chhut Góa ê chhùi, ia̍h sī Góa só͘ chí-sī--ê; Góa hut-jiân-kan chòe, tāi-chì chiū chiâⁿ.

4因為我平素知你是硬心ê，你ê頷頸是鐵ê，你ê頭額是銅ê。In-ūi Góa pêng-sò͘ chai lí sī ngī-sim--ê, lí ê ām-kún sī thih--ê, lí ê thâu-hia̍h sī tâng--ê.

5所以我tùi古早kā你講明；tī iáu未成ê事先指示你；免得你講，chiah-ê事是我ê偶像所行ê，是我雕刻ê偶像，kap我鑄造ê偶像，所命令ê。Só͘-í Góa tùi kó͘-chá kā lí kóng-bêng; tī iáu-bē chiâⁿ ê tāi-seng chí-sī lí; bián-tit lí kóng, Chiah ê sū sī góa ê ngó͘-siōng só͘-kiâⁿ--ê, sī góa tiau-khek ê ngó͘-siōng, kap góa chù-chō ê ngó͘-siōng, só͘ bēng-lēng--ê.

6你已經聽見；taⁿ tio̍h lóng總看伊；lín kiám-m̄-tio̍h報揚mah？tùi taⁿ以後，我將新ê事，就是你所未知隱密ê事，指示你。Lí í-keng thiaⁿ-kìⁿ; taⁿ tio̍h lóng-chóng khòaⁿ i; lín kiám-m̄-tio̍h pò-iông mah? tùi taⁿ í-āu, Góa chiong sin ê sū, chiū-sī lí só͘ bē-chai ún-ba̍t ê sū, chí-sī lí.

7Chiah-ê事是現今創造ê，m̄是tùi早就有；tī今á日以前，你亦bē-bat聽見，免得你講，chiah-ê事我已經知lah。Chiah ê sū sī hiān-kim chhòng-chō--ê, m̄-sī tùi chá chiū ū; tī kin-á-ji̍t í-chêng, lí ia̍h bē-bat thiaⁿ-kìⁿ, bián-tit lí kóng, Chiah ê sū góa í-keng chai lah.

8你實在bē-bat聽見，你實在m̄知；你ê耳孔tùi起頭實在無開；我本知你行tāi-chì極其詭詐，你tùi出胎以來，就稱做悖逆ê。Lí si̍t-chāi bē-bat thiaⁿ-kìⁿ, lí si̍t-chāi m̄-chai; lí ê hī-khang tùi khí-thâu si̍t-chāi bô khui; Góa pún chai lí kiâⁿ tāi-chì ke̍k-kî khúi-chà, lí tùi chhut-thai í-lâi, chiū chheng-chòe pōe-ge̍k--ê.

9我為tio̍h我ê名延chhiân我ê受氣；為tio̍h我ê名聲寬容你，無kā你剪除。Góa ūi-tio̍h Góa ê miâ iân-chhiân Góa ê siū-khì; ūi-tio̍h Góa ê miâ-siaⁿ khoan-iông lí, bô kā lí chián-tû.

10看ah，我鍛鍊你亦m̄是親像銀；你tī苦難ê火爐中我揀你。Khòaⁿ ah, Góa thoàn-liān lí ia̍h m̄-sī chhin-chhiūⁿ gûn; lí tī khó͘-lān ê hé-lô͘-tiong Góa kéng lí.

11我為tio̍h家己ê緣故，為tio̍h家己ê緣故，beh成chit-ê tāi-chì；我kiám thang hō͘我ê名受凌辱？我無beh將我ê榮光歸hō͘別ê。Góa ūi-tio̍h ka-kī ê iân-kò͘, ūi-tio̍h ka-kī ê iân-kò͘, beh chiâⁿ chit ê tāi-chì; Góa kiám thang hō͘ Góa ê miâ siū lêng-jio̍k? Góa bô beh chiong Góa ê êng-kng kui hō͘ pa̍t-ê.

12雅各，我所召ê以色列ah，tio̍h聽我；我是耶和華；我是起頭ê，亦是路尾ê。Ngá-kok, Góa só͘ tiàu ê Í-sek-lia̍t ah, tio̍h thiaⁿ Góa; Góa sī Iâ-hô-hoa; Góa sī khí-thâu--ê, ia̍h sī lō͘-bé--ê.

13我ê手建立地ê地基，我ê chiàⁿ手展開chiah-ê天；我一下叫，就lóng起來khiā。Góa ê chhiú kiàn-li̍p tōe ê tōe-ki, Góa ê chiàⁿ-chhiú tián-khui chiah ê thiⁿ; Góa chi̍t-ē kiò, chiū lóng khí-lâi khiā.

14Lín lóng tio̍h聚集來聽；in中間是誰 bat講chiah-ê事？耶和華所疼ê beh tī巴比倫行祂所歡喜ê，祂ê手beh到tī Ka-le̍k-tí人。Lín lóng tio̍h chū-chi̍p lâi thiaⁿ; in tiong-kan chī-chūi bat kóng chiah ê sū? Iâ-hô-hoa só͘-thiàⁿ--ê beh tī Pa-pí-lûn kiâⁿ I só͘ hoaⁿ-hí ê, I ê chhiú beh kàu tī Ka-le̍k-tí lâng.

15獨獨我，我已經講，我亦揀召伊，chhōa伊來，伊ê路beh興通。To̍k-to̍k Góa, Góa í-keng kóng, Góa ia̍h kéng-tiàu i, chhōa i lâi, i ê lō͘ beh heng-thong.

16Lín tio̍h就近我來聽這；我tùi起頭bē-bat tī隱密ê所在來講；tùi有chit-ê事，我就tī-hia；taⁿ主耶和華差我kap祂ê神來。Lín tio̍h chiū-kūn Góa lâi thiaⁿ che; Góa tùi khí-thâu bē-bat tī ún-ba̍t ê só͘-chāi lâi kóng; tùi ū chit ê sū, Góa chiū tī-hia; taⁿ Chú Iâ-hô-hoa chhe góa kap I ê sîn lâi.

17救贖你ê主耶和華，以色列ê聖ê án-ni講，我是耶和華你ê上帝；我教示你，hō͘你得tio̍h利益，chhōa你tī應該行ê路。Kiù-sio̍k lí ê Chú Iâ-hô-hoa, Í-sek-lia̍t ê Sèng--ê án-ni kóng, Góa sī Iâ-hô-hoa lí ê Siōng-tè; Góa kà-sī lí, hō͘ lí tit-tio̍h lī-ek, chhōa lí tī eng-kai kiâⁿ ê lō͘.

18害ah，你未bat聽我ê命令；若聽，就你ê平安親像河水，你ê公義親像海湧；Hāi--ah, lí bē bat thiaⁿ Góa ê bēng-lēng; nā thiaⁿ, chiū lí ê pêng-an chhin-chhiūⁿ hô-chúi, lí ê kong-gī chhin-chhiūⁿ hái-éng;

19你ê後裔chōe親像沙，你ê腹肚內所生ê亦chōe，親像沙粒；伊ê名tī我ê面前的確無剪除，亦無滅絕。lí ê hō͘-è chōe chhin-chhiūⁿ soa, lí ê pak-tó͘-lāi só͘-siⁿ--ê ia̍h chōe, chhin-chhiūⁿ soa-lia̍p; i ê miâ tī Góa ê bīn-chêng tek-khak bô chián-tû, ia̍h bô bia̍t-choa̍t.

20Lín tio̍h tùi巴比倫出來，tùi Ka-le̍k-tí人ê中間走出；用歡喜大聲傳報hō͘人聽，講，耶和華救贖祂ê奴僕雅各；lín tio̍h將chit-ê報揚到地極。Lín tio̍h tùi Pa-pí-lûn chhut-lâi, tùi Ka-le̍k-tí lâng ê tiong-kan cháu-chhut; ēng hoaⁿ-hí tōa-siaⁿ thoân-pò hō͘ lâng thiaⁿ, kóng, Iâ-hô-hoa kiù-sio̍k I ê lô͘-po̍k Ngá-kok; lín tio̍h chiong chit-ê pò-iông kàu tōe-ke̍k.

21祂引chhōa in經過沙漠，in亦無嘴乾；祂為tio̍h in hō͘水tùi石磐流出；石磐裂開，水就chhèng出。耶和華講，pháiⁿ人的確bōe平安。I ín-chhōa in keng-kè soa-bô͘, in ia̍h bô chhùi-ta; I ūi-tio̍h in hō͘ chúi tùi chio̍h-pôaⁿ lâu-chhut; chio̍h-pôaⁿ li̍h-khui, chúi chiū chhèng-chhut. Iâ-hô-hoa kóng, Pháiⁿ-lâng tek-khak bōe pêng-an.