1Chiah-ê海嶼ah，tio̍h聽我ê話；chiah-ê百姓ah，tio̍h留心tùi遠遠來聽。Tùi我tī胎裡，耶和華就揀召我；tùi我tī老母ê腹肚祂就叫我ê名。Chiah ê hái-sū ah, tio̍h thiaⁿ Góa ê ōe; chiah ê peh-sìⁿ ah, tio̍h liû-sim tùi hn̄g-hn̄g lâi thiaⁿ. Tùi góa tī-thai--nih, Iâ-hô-hoa chiū kéng-tiàu góa; tùi góa tī lāu-bú ê pak-tó͘ I chiū kiò góa ê miâ.

2祂hō͘我ê嘴親像利刀，將我khǹg tī祂ê手ê致蔭下；koh hō͘我成做磨光ê箭，將我khǹg tī祂ê箭袋。I hō͘ góa ê chhùi chhin-chhiūⁿ lāi-to, chiong góa khǹg tī I ê chhiú ê tì-ìm-ē; koh hō͘ góa chiâⁿ-chòe bôa-kng ê chìⁿ, chiong góa khǹg tī I ê chìⁿ-tē.

3對我講，你是我ê奴僕以色列，我beh因為你得tio̍h榮光。Tùi góa kóng, Lí sī Góa ê lô͘-po̍k Í-sek-lia̍t, Góa beh in-ūi lí tit-tio̍h êng-kng.

4我就講，我tio̍h磨是空空，我盡力是無利益也無chhái-kang；但是我ê判斷在tī耶和華，我ê報賞在tī我ê上帝。Góa chiū kóng, Góa tio̍h-bôa sī khang-khang, góa chīn-la̍t sī bô lī-ek iā bô chhái-kang; nā-sī góa ê phòaⁿ-toàn chāi-tī Iâ-hô-hoa, góa ê pò-siúⁿ chāi-tī góa ê Siōng-tè.

5耶和華tùi胎裡造就我做祂ê奴僕，beh hō͘雅各歸向祂，hō͘以色列聚集tī祂hia；(因為耶和華看我做尊貴，我ê上帝也成做我ê氣力；)Iâ-hô-hoa tùi thai--nih chō-chiū góa chòe I ê lô͘-po̍k, beh hō͘ Ngá-kok kui-ǹg I, hō͘ Í-sek-lia̍t chū-chi̍p tī I hia; (in-ūi Iâ-hô-hoa khòaⁿ góa chòe chun-kùi, góa ê Siōng-tè iā chiâⁿ-chòe góa ê khùi-la̍t;)

6祂有講，你做我ê奴僕振興雅各ê支派，hō͘以色列中得tio̍h保全ê倒tńg來，這iáu是小khóa事；我beh設立你做列邦ê光，做我ê拯救ê，到tī地極。I ū kóng, Lí chòe Góa ê lô͘-po̍k chín-heng Ngá-kok ê chi-phài, hō͘ Í-sek-lia̍t tiong tit-tio̍h pó-choân-ê tò-tńg--lâi, che iáu sī sió-khóa sū; Góa beh siat-li̍p lí chòe lia̍t-pang ê kng, chòe Góa ê chín-kiù--ê, kàu tī tōe-ke̍k.

7救贖以色列ê聖主耶和華，對hit-ê hō͘人所看輕，百姓所厭惡，官長所壓制ê，án-ni講，君王beh看見你，就起來khiā，首領也beh跪拜；這lóng是為tio̍h耶和華是真實ê，就是以色列ê聖ê有揀你。Kiù-sio̍k Í-sek-lia̍t ê sèng-chú Iâ-hô-hoa, tùi hit ê hō͘ lâng só͘ khòaⁿ-khin, peh-sìⁿ só͘ iàm-ò͘ⁿ, koaⁿ-tiúⁿ só͘ ap-chè ê, án-ni kóng, Kun-ông beh khòaⁿ-kìⁿ lí, chiū khí-lâi khiā, siú-léng iā beh kūi-pài; che lóng sī ūi-tio̍h Iâ-hô-hoa sī chin-si̍t ê, chiū-sī Í-sek-lia̍t ê Sèng--ê ū kéng lí.

8耶和華án-ni講，Tī得tio̍h接納ê時我有聽你，tī拯救ê日我有幫贊你；我beh保護你，hō͘你做百姓ê約ê中保，koh興起土地，hō͘人承接拋荒ê地做業；Iâ-hô-hoa án-ni kóng, Tī tit-tio̍h chiap-la̍p ê sî Góa ū thiaⁿ lí, tī chín-kiù ê ji̍t Góa ū pang-chān lí; Góa beh pó-hō͘ lí, hō͘ lí chòe peh-sìⁿ ê iok ê tiong-pó, koh heng-khí thó͘-tōe, hō͘ lâng sêng-chiap pha-hng ê tōe chòe gia̍p;

9也對受綑縛ê人講，Lín tio̍h出來；對hiah-ê tiàm tī烏暗ê人講，Lín tio̍h顯現。In beh tī路裡得tio̍h食，tī一切無草ê山得tio̍h糧草。iā tùi siū khún-pa̍k ê lâng kóng, Lín tio̍h chhut--lâi; tùi hiah ê tiàm tī o͘-àm ê lâng kóng, Lín tio̍h hián-hiān. In beh tī lō͘--nih tit-tio̍h chia̍h, tī it-chhè bô chháu ê soaⁿ tit-tio̍h niû-chháu.

10In無iau無嘴乾；熱氣kap 炎日無beh傷害in；因為憐憫in-ê beh chhōa in，牽in到水泉邊。In bô iau bô chhùi-ta; jia̍t-khì kap iām-ji̍t bô beh siong-hāi in; in-ūi lîn-bín in--ê beh chhōa in, khan in kàu chúi-chôaⁿ-piⁿ.

11我beh hō͘我ê眾山成做路，我ê大路也beh thūn高。Góa beh hō͘ Góa ê chèng soaⁿ chiâⁿ-chòe lō͘, Góa ê tōa-lō͘ iā beh thūn-koâiⁿ.

12看ah，chiah-ê人beh tùi遠遠來；看ah，chiah-ê人beh tùi北方西方來；也chiah-ê人beh tùi Chîn國來。Khòaⁿ ah, chiah ê lâng beh tùi hn̄g-hn̄g lâi; khòaⁿ ah, chiah ê lâng beh tùi pak-hng sai-hng lâi; iā chiah ê lâng beh tùi Chîn-kok lâi.

13Chiah-ê天ah，應該出歡喜ê聲；地ah，應該快樂；眾山應該出聲唱歌；因為耶和華有安慰祂ê百姓，也beh憐憫祂hiah-ê困苦ê。Chiah ê thiⁿ ah, eng-kai chhut hoaⁿ-hí ê siaⁿ; tōe ah, eng-kai khoài-lo̍k; chèng-soaⁿ eng-kai chhut-siaⁿ chhiùⁿ-koa; in-ūi Iâ-hô-hoa ū an-ùi I ê peh-sìⁿ, iā beh lîn-bín I hiah ê khùn-khó͘--ê.

14錫安講，耶和華有棄sak我，主已經bōe記得我。Sek-an kóng, Iâ-hô-hoa ū khì-sak góa, Chú í-keng bōe-kì-tit góa.

15婦人人kiám會bōe記得伊食奶ê嬰á，無憐憫伊所生ê kiáⁿ？in kiám-chhái有bōe記得ê，總是我無bōe記得你。Hū-jîn-lâng kiám ōe bōe-kì-tit i chia̍h-lin ê eⁿ-á, bô lîn-bín i só͘ siⁿ ê kiáⁿ? in kiám-chhái ū bōe-kì-tit-ê, chóng-sī Góa bô bōe-kì-tit lí.

16看ah，我將你刻tī我ê手掌，你ê城牆常常tī我ê目睭前。Khòaⁿ ah, Góa chiong lí khek tī Góa ê chhiú-chiúⁿ, lí ê siâⁿ-chhiûⁿ siông-siông tī Góa ê ba̍k-chiu-chêng.

17你ê kiáⁿ兒beh緊緊tò來；毀壞你ê kap hō͘你拋荒ê，beh離開你出去。Lí ê kiáⁿ-jî beh kín-kín tò--lâi; húi-hoāi lí-ê kap hō͘ lí pha-hng ê, beh lī-khui lí chhut--khì.

18你tio̍h kia̍h目四界看；in眾人lóng聚集來歸óa你。耶和華講，我kí我ê活命來講，你beh用in一切做裝飾來穿伊，koh用in做帶來hâ腰，親像新娘一般樣。Lí tio̍h kia̍h-ba̍k sì-kòe khòaⁿ; in chèng-lâng lóng chū-chi̍p lâi kui-óa lí. Iâ-hô-hoa kóng, Góa kí Góa ê oa̍h-miā lâi kóng, Lí beh ēng in it-chhè chòe chng-thāⁿ lâi chhēng i, koh ēng in chòe tòa lâi hâ-io, chhin-chhiūⁿ sin-niû chi̍t-poaⁿ-iūⁿ.

19論到你拋荒冷靜ê所在kap你受毀壞ê地，taⁿ百姓chōe，khiā起siuⁿ狹；吞滅你ê beh離開你遠遠。Lūn-kàu lí pha-hng léng-chēng ê só͘-chāi kap lí siū húi-hoāi ê tōe, taⁿ peh-sìⁿ chōe, khiā-khí siuⁿ oe̍h; thun-bia̍t lí-ê beh lī-khui lí hn̄g-hn̄g.

20你失落kiáⁿ以後所生hiah-ê kiáⁿ beh對你講，chit-ê所在我khiā起siuⁿ狹；求你hō͘我有所在thang khiā起。Lí sit-lo̍h kiáⁿ í-āu só͘ siⁿ hiah ê kiáⁿ beh tùi lí kóng, Chit ê só͘-chāi góa khiā-khí siuⁿ oe̍h; kiû lí hō͘ góa ū só͘-chāi thang khiā-khí.

21Hit時你心內beh講，我已經失落kiáⁿ，家己khiā起，是受掠ê，漂流tī外面，是誰 kā我生chiah-ê？是誰將chiah-ê養飼到大漢？看ah，我孤單ê時，chiah-ê tī toh-lo̍h？Hit-sî lí sim-lāi beh kóng, Góa í-keng sit-lo̍h kiáⁿ, ka-kī khiā-khí, sī siū-lia̍h ê, phiau-liû tī gōa-bīn, chī-chūi kā góa siⁿ chiah-ê? chī-chūi chiong chiah-ê iúⁿ-chhī kàu tōa-hàn? Khòaⁿ ah, góa ko͘-toaⁿ ê sî, chiah-ê tī toh-lo̍h?

22主耶和華講，看ah，我beh ǹg列國kia̍h手，ǹg萬百姓khiā大旗；in beh將你ê眾kiáⁿ抱來，將你ê眾cha-bó͘-kiáⁿ iāng來。Chú Iâ-hô-hoa kóng, Khòaⁿ ah, Góa beh ǹg lia̍t-kok kia̍h-chhiú, ǹg bān peh-sìⁿ khiā tōa-kî; in beh chiong lí ê chèng-kiáⁿ phō--lâi, chiong lí ê chèng cha-bó͘-kiáⁿ iāng--lâi.

23列王beh做你ê養父，王后beh做你ê奶母；in beh將面俯落地，ǹg你跪拜，koh舐(chī)你ê腳ê土粉；你就知我是耶和華；凡若ǹg望我ê的確無見笑。Lia̍t-ông beh chòe lí ê iúⁿ-pē, ông-hō͘ beh chòe lí ê lin-bú; in beh chiong bīn àⁿ-lo̍h tōe, ǹg lí kūi-pài, koh chī lí ê kha ê thô͘-hún; lí chiū chai Góa sī Iâ-hô-hoa; hoān-nā ǹg-bāng Góa-ê tek-khak bô kiàn-siàu.

24猛人搶去ê，kiám會搶倒tńg？強ê人所搶掠ê，kiám會救伊mah？Béng-lâng chhiúⁿ--khì ê, kiám ōe chhiúⁿ tò-tńg? kiông ê lâng só͘ chhiúⁿ-lia̍h-ê, kiám ōe kiù i mah?

25總是耶和華án-ni講，猛人所搶掠ê beh搶倒tńg，強ê人所搶ê beh得tio̍h救；kap你相爭ê我beh kap伊相爭，我也beh救你ê kiáⁿ兒。Chóng-sī Iâ-hô-hoa án-ni kóng, Béng-lâng só͘ chhiúⁿ-lia̍h--ê beh chhiúⁿ tò-tńg, kiông ê lâng só͘ chhiúⁿ--ê beh tit-tio̍h kiù; kap lí saⁿ-chiⁿ--ê Góa beh kap i saⁿ-chiⁿ, Góa iā beh kiù lí ê kiáⁿ-jî.

26Koh我beh hō͘ hiah-ê壓制你ê食家己ê肉；in亦beh lim家己ê血到醉，親像lim甜酒一樣；見若有血氣ê，beh lóng知我耶和華是你ê救主，是救贖你ê主，是雅各ê大權能ê。Koh Góa beh hō͘ hiah ê ap-chè lí-ê chia̍h ka-kī ê bah; in ia̍h beh lim ka-kī ê huih kàu-chùi, chhin-chhiūⁿ lim tiⁿ-chiú chi̍t-iūⁿ; kìⁿ-nā ū hiat-khì ê, beh lóng chai Góa Iâ-hô-hoa sī lí ê kiù-chú, sī kiù-sio̍k lí ê Chú, sī Ngá-kok ê tōa koân-lêng--ê.

1耶和華án-ni講，我離出lín ê老母，離書tī toh-lo̍h ah？我將lín賣hō͘我toh-lo̍h一個債主ah？看ah，lín受賣是因為lín ê罪過，lín ê老母受離出，是因為lín ê過失。Iâ-hô-hoa án-ni kóng, Góa lî-chhut lín ê lāu-bú, lî-su tī toh-lo̍h ah? Góa chiong lín bōe hō͘ Góa toh-lo̍h chi̍t ê chè-chú ah? Khòaⁿ ah, lín siū-bōe sī in-ūi lín ê chōe-kòa, lín ê lāu-bú siū lî-chhut, sī in-ūi lín ê kè-sit.

2我來ê時，無人tī-teh是怎樣？我叫ê時，無人應是怎樣？我ê手kiám是短，bōe能救贖mah？我kiám無拯救ê力mah？看ah，我一下hoah，海就乾去；我hō͘江河變做沙漠，其中ê魚，因為無水，臭爛，嘴乾就死。Góa lâi ê sî, bô lâng tī-teh sī cháiⁿ-iūⁿ? Góa kiò ê sî, bô lâng ìn sī cháiⁿ-iūⁿ? Góa ê chhiú kiám-sī té, bōe-ōe kiù-sio̍k mah? Góa kiám bô chín-kiù ê la̍t mah? Khòaⁿ ah, Góa chi̍t-ē hoah, hái chiū ta--khì; Góa hō͘ kang-hô pìⁿ-chòe soa-bô͘, kî-tiong ê hî, in-ūi bô chúi, chhàu-nōa, chhùi-ta chiū sí.

3我hō͘ chiah-ê天用烏暗做衣服，用麻布做遮蓋。Góa hō͘ chiah ê thiⁿ ēng o͘-àm chòe i-ho̍k, ēng môa-pò͘ chòe jia-khàm.

4主耶和華賞賜我受教示ê ê舌，hō͘我知怎樣用言語扶助厭倦ê人；主ta̍k早起叫醒，叫醒我ê耳孔，hō͘我能聽，親像受教示ê人一樣。Chú Iâ-hô-hoa siúⁿ-sù góa siū kà-sī--ê ê chi̍h, hō͘ góa chai cháiⁿ-iūⁿ ēng giân-gú hû-chō͘ ià-siān ê lâng; Chú ta̍k chá-khí kiò-chhíⁿ, kiò-chhíⁿ góa ê hī-khang, hō͘ góa ōe thiaⁿ, chhin-chhiūⁿ siū kà-sī ê lâng chi̍t-iūⁿ.

5主耶和華開通我ê耳孔，我並無違逆，亦無退後。Chú Iâ-hô-hoa khai-thong góa ê hī-khang, góa pēng-bô ûi-ke̍h, ia̍h bô thè-āu.

6人phah我ê ka-chiah-phiaⁿ，我chhut-chāi伊phah；人chhoah我嘴phóe ê嘴鬚，我chhut-chāi伊chhoah；人凌辱我，kā我phùi-nōa，我亦無掩面。Lâng phah góa ê ka-chiah-phiaⁿ, góa chhut-chāi i phah; lâng chhoah góa chhùi-phóe ê chhùi-chhiu, góa chhut-chāi i chhoah; lâng lêng-jio̍k góa, kā góa phùi-nōa, góa ia̍h bô ng-bīn.

7因為主耶和華的確幫贊我，所以我無見笑；為tio̍h án-ni，我hō͘我ê面硬親像tēng石；我亦知我的確無致到漏氣。In-ūi Chú Iâ-hô-hoa tek-khak pang-chān góa, só͘-í góa bô kiàn-siàu; ūi-tio̍h án-ni, góa hō͘ góa ê bīn ngī chhin-chhiūⁿ tēng-chio̍h; góa ia̍h chai góa tek-khak bô tì-kàu làu-khùi.

8稱我做義ê近lah；是誰 kap我相爭？伊thang kap我相kap khiā；是誰做我ê對敵？伊thang就近我。Chheng góa chòe gī--ê kūn--lah; chī-chūi kap góa saⁿ-chiⁿ? i thang kap góa saⁿ-kap khiā; chī-chūi chòe góa ê tùi-te̍k? i thang chiū-kūn góa.

9看ah，主耶和華beh幫贊我，是誰能定我有罪ah？看ah，in lóng親像衫漸漸舊，hō͘蛀蟲所食。Khòaⁿ ah, Chú Iâ-hô-hoa beh pang-chān góa, chī-chūi ōe tēng góa ū-chōe ah? khòaⁿ ah, in lóng chhin-chhiūⁿ saⁿ chiām-chiām kū, hō͘ chiù-thâng só͘ chia̍h.

10Lín中間是誰敬畏耶和華，聽thàn祂ê奴僕ê話ah？行tī烏暗無有光明ê，tio̍h óa靠耶和華ê名，óa靠伊ê上帝。Lín tiong-kan chī-chūi kèng-ùi Iâ-hô-hoa, thiaⁿ-thàn I ê lô͘-po̍k ê ōe ah? kiâⁿ tī o͘-àm bô-ū kng-bêng--ê, tio̍h óa-khò Iâ-hô-hoa ê miâ, óa-khò i ê Siōng-tè.

11看ah，凡若lín點火，用火把圍家己ê，thang來行tī lín ê火燄內，kap lín所點ê火把中。這是我ê手所定tio̍h ê；lín beh倒tī艱苦ê中間。Khòaⁿ ah, hoān-nā lín tiám-hé, ēng hé-pé ûi ka-kī--ê, thang lâi kiâⁿ tī lín ê hé-iām lāi, kap lín só͘ tiám ê hé-pé tiong. Che sī Góa ê chhiú só͘ tiāⁿ-tio̍h ê ; lín beh tó tī kan-khó͘ ê tiong-kan.

1Lín chiah-ê追jip公義，chhē耶和華ê，tio̍h聽我；lín tio̍h想看lín tùi hia phah出來ê石磐，tùi hia 掘出來ê土孔。Lín chiah ê tui-jip kong-gī, chhē Iâ-hô-hoa--ê, tio̍h thiaⁿ góa; lín tio̍h siūⁿ-khòaⁿ lín tùi hia phah--chhut-lâi ê chio̍h-pôaⁿ, tùi hia ku̍t--chhut-lâi ê thô͘-khang.

2Tio̍h想看lín ê祖公亞伯拉罕，kap 生lín ê撒拉，因為伊孤單一人ê時，我揀召伊，賜福伊，hō͘伊加添chōe-chōe。Tio̍h siūⁿ-khòaⁿ lín ê chó͘-kong A-pek-la̍h-hán, kap siⁿ lín ê Sat-la̍h, in-ūi i ko͘-toaⁿ chi̍t-lâng ê sî, Góa kéng-tiàu i, sù-hok i, hō͘ i ke-thiⁿ chōe-chōe.

3因為耶和華已經安慰錫安，亦安慰伊一切拋荒ê所在；hō͘伊ê曠野親像伊甸，hō͘沙漠親像耶和華ê園；tī in中間beh有歡喜快樂，感謝kap唱歌ê聲。In-ūi Iâ-hô-hoa í-keng an-ùi Sek-an, ia̍h an-ùi i it-chhè pha-hng ê só͘-chāi; hō͘ i ê khòng-iá chhin-chhiūⁿ Ai-tiân, hō͘ soa-bô͘ chhin-chhiūⁿ Iâ-hô-hoa ê hn̂g; tī in tiong-kan beh ū hoaⁿ-hí khoài-lo̍k, kám-siā kap chhiùⁿ-koa ê siaⁿ.

4我ê百姓ah，tio̍h注意聽我；我ê國民ah，tio̍h俯耳孔聽我；因為法律beh tùi我出，我beh立我ê 公理，來做列邦ê光。Góa ê peh-sìⁿ ah, tio̍h chù-ì thiaⁿ Góa; Góa ê kok-bîn ah, tio̍h àⁿ hī-khang thiaⁿ Góa; in-ūi hoat-lu̍t beh tùi Góa chhut, Góa beh li̍p Góa ê kong-lí, lâi chòe lia̍t-pang ê kng.

5我ê公義近lah，我ê救恩發出；我ê手beh判斷列邦；海嶼lóng beh thèng候我，koh beh óa靠我ê手。Góa ê kong-gī kūn--lah, Góa ê kiù-un hoat-chhut; Góa ê chhiú beh phòaⁿ-toàn lia̍t-pang; hái-sū lóng beh thèng-hāu Góa, koh beh óa-khò Góa ê chhiú.

6Lín tio̍h kia̍h目ǹg天，俯頭看地；因為chiah-ê天beh親像煙雲消散，地beh親像衫漸漸舊，伊ê khiā起ê百姓亦beh親像án-ni死無；只有我ê救恩永遠tī-teh，我ê公義亦無廢無。Lín tio̍h kia̍h-ba̍k ǹg thiⁿ, àⁿ-thâu khòaⁿ tōe; in-ūi chiah ê thiⁿ beh chhin-chhiūⁿ ian-hûn siau-sòaⁿ, tōe beh chhin-chhiūⁿ saⁿ chiām-chiām kū, i ê khiā-khí ê peh-sìⁿ ia̍h beh chhin-chhiūⁿ án-ni sí-bô; chí-ū Góa ê kiù-un éng-oán tī-teh, Góa ê kong-gī ia̍h bô hòe-bô.

7知識公義，存我ê教示tī心內ê百姓，tio̍h聽我ê話；莫得驚人ê譏刺，亦莫得因為人ê譭謗來驚惶。Chai-bat kong-gī, chûn Góa ê kà-sī tī sim-lāi ê peh-sìⁿ, tio̍h thiaⁿ Góa ê ōe; bo̍h-tit kiaⁿ lâng ê ki-chhì, ia̍h bo̍h-tit in-ūi lâng ê húi-pòng lâi kiaⁿ-hiâⁿ.

8因為蛀蟲beh食in，親像食衣裳；剪蟲beh食in，親像食羊毛；只有我ê公義永遠tī-teh，我ê救恩直到萬代。In-ūi chiù-thâng beh chia̍h in, chhin-chhiūⁿ chia̍h i-chiûⁿ; chián-thâng beh chia̍h in, chhin-chhiūⁿ chia̍h iûⁿ-mn̂g; chí-ū Góa ê kong-gī éng-oán tī-teh, Góa ê kiù-un ti̍t-kàu bān-tāi.

9耶和華ê手ah，起來，起來，施出大氣力；起來，親像早時ê年日，古早ê世代一樣。從前phah碎La̍h-hap-pek，鑿透龍ê，kiám-m̄是你mah？Iâ-hô-hoa ê chhiú ah, khí-lâi, khí-lâi, si-chhut tōa khùi-la̍t; khí-lâi, chhin-chhiūⁿ chá-sî ê nî-ji̍t, kó͘-chá ê sè-tāi chi̍t-iūⁿ. Chiông-chiân phah-chhùi La̍h-hap-pek, chha̍k-thàu lêng--ê, kiám-m̄-sī lí mah?

10Hō͘海kap深淵ê水乾去，hō͘海深ê所在變做路，hō͘受贖ê百姓經過ê，kiám-m̄是你mah？Hō͘ hái kap chhim-ian ê chúi ta--khì, hō͘ hái chhim ê só͘-chāi pìⁿ chòe lō͘, hō͘ siū-sio̍k ê peh-sìⁿ keng-kè--ê, kiám-m̄-sī lí mah?

11耶和華救贖ê百姓beh 倒tńg來，beh唱歌來到錫安，得tio̍h永遠ê歡喜做冕旒；in beh歡喜快樂，憂悶吐氣lóng beh走去。Iâ-hô-hoa kiù-sio̍k ê peh-sìⁿ beh tò-tńg-lâi, beh chhiùⁿ-koa lâi kàu Sek-an, tit-tio̍h éng-oán ê hoaⁿ-hí chòe bián-liû; in beh hoaⁿ-hí khoài-lo̍k, iu-būn thó͘-khùi lóng beh cháu--khì.

12我，我是安慰lín ê；你是甚麼人，竟然驚hit-ê beh死ê人，驚hit-ê beh變做親像草ê世間人？Góa, Góa sī an-ùi lín ê; lí sī sím-mi̍h lâng, kéng-jiân kiaⁿ hit-ê beh-sí ê lâng, kiaⁿ hit-ê beh pìⁿ-chòe chhin-chhiūⁿ chháu ê sè-kan lâng?

13亦bōe記得thí開chiah-ê天，安定地ê地基，創造你ê耶和華，thong日因為暴虐ê ê大受氣來驚惶，照伊圖謀beh毀滅ê情形？其實hit-ê暴虐ê ê大受氣tī toh-lo̍h ah？Ia̍h bōe-kì-tit thí-khui chiah ê thiⁿ, an-tiāⁿ tōe ê tōe-ki, chhòng-chō lí ê Iâ-hô-hoa, thong-ji̍t in-ūi pō-gio̍k-ê ê tōa siū-khì lâi kiaⁿ-hiâⁿ, chiàu i tô͘-bô͘ beh húi-bia̍t ê chêng-hêng? kî-si̍t hit-ê pō-gio̍k-ê ê tōa siū-khì tī toh-lo̍h ah?

14受壓迫ê beh緊緊得tio̍h tháu放；的確無死來落穴，伊ê米糧亦無絕。Siū ap-pek-ê beh kín-kín tit-tio̍h tháu-pàng; tek-khak bô sí lâi lo̍h hia̍t, i ê bí-niû ia̍h bô choa̍t.

15我是耶和華你ê上帝，搖動大海，hō͘伊ê湧hōa-hōa哮；萬軍ê耶和華是伊ê名。Góa sī Iâ-hô-hoa lí ê Siōng-tè, iô-tāng tōa-hái, hō͘ i ê éng hōa-hōa-háu; bān-kun ê Iâ-hô-hoa sī I ê miâ.

16我將我ê話hē tī你ê嘴，用我ê手ê影遮蓋你，為tio̍h beh開天闢地，koh對錫安講，你是我ê百姓。Góa chiong Góa ê ōe hē tī lí ê chhùi, ēng Góa ê chhiú ê iáⁿ jia-khàm lí, ūi-tio̍h beh khai-thian pi̍t-tōe, koh tùi Sek-an kóng, Lí sī Góa ê peh-sìⁿ.

17耶路撒冷ah，起來，起來，khiā-teh，你tùi耶和華ê手中lim伊大受氣ê杯；lim hit-ê hō͘人顛顛倒倒ê杯盞，lim到乾乾，Iâ-lō͘-sat-léng ah, khí-lâi, khí-lâi, khiā-teh, lí tùi Iâ-hô-hoa ê chhiú-tiong lim I tōa siū-khì ê poe; lim hit-ê hō͘ lâng tian-tian tó-tó ê poe-chóaⁿ, lim kàu ta-ta,

18伊所生chiah-ê kiáⁿ ê中間，無一個引chhōa伊；伊所養飼大漢chiah-ê kiáⁿ ê中間，無一個牽伊ê手。I só͘-siⁿ chiah ê kiáⁿ ê tiong-kan, bô chi̍t-ê ín-chhōa i; i só͘ iúⁿ-chhī tōa-hàn chiah ê kiáⁿ ê tiong-kan, bô chi̍t-ê khan i ê chhiú.

19Chit兩項臨到你；是誰會替你哀傷ah？就是有衰敗kap滅無，飢荒kap劍；我beh怎樣安慰你？Chí(**Chit) nn̄g-hāng lîm-kàu lí; chī-chūi ōe thòe lí ai-siong ah? chiū-sī ū soe-pāi kap bia̍t-bô, ki-hng kap kiàm; Góa beh cháiⁿ-iūⁿ an-ùi lí?

20你chiah-ê kiáⁿ暈去，倒tī ta̍k ê街路口，親像鹿tī羅網ê中間；受耶和華滿滿ê受氣，你ê上帝ê責備。Lí chiah ê kiáⁿ hūn--khì, tó tī ta̍k ê ke-lō͘-kháu, chhin-chhiūⁿ lo̍k tī lô-bāng ê tiong-kan; siū Iâ-hô-hoa móa-móa ê siū-khì, lí ê Siōng-tè ê chek-pī.

21所以你chit-ê困苦koh醉ê，卻m̄是因為酒來醉，你tio̍h聽。Só͘-í lí chit ê khùn-khó͘ koh chùi-ê, khiok m̄-sī in-ūi chiú lâi chùi, lí tio̍h thiaⁿ.

22你ê主耶和華，就是為tio̍h伊ê百姓申冤ê上帝，án-ni講，看ah，我已經將hit-ê hō͘人顛顛倒倒ê杯，就是我大受氣ê杯盞，對你ê手the̍h出來，你的確m̄免koh lim。Lí ê Chú Iâ-hô-hoa, chiū-sī ūi-tio̍h I ê peh-sìⁿ sin-oan ê Siōng-tè, án-ni kóng, Khòaⁿ ah, Góa í-keng chiong hit-ê hō͘ lâng tian-tian tó-tó ê poe, chiū-sī Góa tōa siū-khì ê poe-chóaⁿ, tùi lí ê chhiú the̍h--chhut-lâi, lí tek-khak m̄-bián koh lim.

23我beh將chit-ê杯hē tī pháiⁿ款待你ê人ê手中；in bat對你講，你tio̍h俯落去，chhut-chāi阮踏過去；你就用ka-chiah-phiaⁿ做親像地，親像街路，chhut-chāi人經過。Góa beh chiong chit ê poe hē tī pháiⁿ khoán-thāi lí ê lâng ê chhiú-tiong; in bat tùi lí kóng, Lí tio̍h àⁿ--lo̍h-khì, chhut-chāi goán ta̍h-kè--khì; lí chiū ēng ka-chiah-phiaⁿ chòe chhin-chhiūⁿ tōe, chhin-chhiūⁿ ke-lō͘, chhut-chāi lâng keng-kè.