1Lín chiah-ê追jip公義，chhē耶和華ê，tio̍h聽我；lín tio̍h想看lín tùi hia phah出來ê石磐，tùi hia 掘出來ê土孔。Lín chiah ê tui-jip kong-gī, chhē Iâ-hô-hoa--ê, tio̍h thiaⁿ góa; lín tio̍h siūⁿ-khòaⁿ lín tùi hia phah--chhut-lâi ê chio̍h-pôaⁿ, tùi hia ku̍t--chhut-lâi ê thô͘-khang.

2Tio̍h想看lín ê祖公亞伯拉罕，kap 生lín ê撒拉，因為伊孤單一人ê時，我揀召伊，賜福伊，hō͘伊加添chōe-chōe。Tio̍h siūⁿ-khòaⁿ lín ê chó͘-kong A-pek-la̍h-hán, kap siⁿ lín ê Sat-la̍h, in-ūi i ko͘-toaⁿ chi̍t-lâng ê sî, Góa kéng-tiàu i, sù-hok i, hō͘ i ke-thiⁿ chōe-chōe.

3因為耶和華已經安慰錫安，亦安慰伊一切拋荒ê所在；hō͘伊ê曠野親像伊甸，hō͘沙漠親像耶和華ê園；tī in中間beh有歡喜快樂，感謝kap唱歌ê聲。In-ūi Iâ-hô-hoa í-keng an-ùi Sek-an, ia̍h an-ùi i it-chhè pha-hng ê só͘-chāi; hō͘ i ê khòng-iá chhin-chhiūⁿ Ai-tiân, hō͘ soa-bô͘ chhin-chhiūⁿ Iâ-hô-hoa ê hn̂g; tī in tiong-kan beh ū hoaⁿ-hí khoài-lo̍k, kám-siā kap chhiùⁿ-koa ê siaⁿ.

4我ê百姓ah，tio̍h注意聽我；我ê國民ah，tio̍h俯耳孔聽我；因為法律beh tùi我出，我beh立我ê 公理，來做列邦ê光。Góa ê peh-sìⁿ ah, tio̍h chù-ì thiaⁿ Góa; Góa ê kok-bîn ah, tio̍h àⁿ hī-khang thiaⁿ Góa; in-ūi hoat-lu̍t beh tùi Góa chhut, Góa beh li̍p Góa ê kong-lí, lâi chòe lia̍t-pang ê kng.

5我ê公義近lah，我ê救恩發出；我ê手beh判斷列邦；海嶼lóng beh thèng候我，koh beh óa靠我ê手。Góa ê kong-gī kūn--lah, Góa ê kiù-un hoat-chhut; Góa ê chhiú beh phòaⁿ-toàn lia̍t-pang; hái-sū lóng beh thèng-hāu Góa, koh beh óa-khò Góa ê chhiú.

6Lín tio̍h kia̍h目ǹg天，俯頭看地；因為chiah-ê天beh親像煙雲消散，地beh親像衫漸漸舊，伊ê khiā起ê百姓亦beh親像án-ni死無；只有我ê救恩永遠tī-teh，我ê公義亦無廢無。Lín tio̍h kia̍h-ba̍k ǹg thiⁿ, àⁿ-thâu khòaⁿ tōe; in-ūi chiah ê thiⁿ beh chhin-chhiūⁿ ian-hûn siau-sòaⁿ, tōe beh chhin-chhiūⁿ saⁿ chiām-chiām kū, i ê khiā-khí ê peh-sìⁿ ia̍h beh chhin-chhiūⁿ án-ni sí-bô; chí-ū Góa ê kiù-un éng-oán tī-teh, Góa ê kong-gī ia̍h bô hòe-bô.

7知識公義，存我ê教示tī心內ê百姓，tio̍h聽我ê話；莫得驚人ê譏刺，亦莫得因為人ê譭謗來驚惶。Chai-bat kong-gī, chûn Góa ê kà-sī tī sim-lāi ê peh-sìⁿ, tio̍h thiaⁿ Góa ê ōe; bo̍h-tit kiaⁿ lâng ê ki-chhì, ia̍h bo̍h-tit in-ūi lâng ê húi-pòng lâi kiaⁿ-hiâⁿ.

8因為蛀蟲beh食in，親像食衣裳；剪蟲beh食in，親像食羊毛；只有我ê公義永遠tī-teh，我ê救恩直到萬代。In-ūi chiù-thâng beh chia̍h in, chhin-chhiūⁿ chia̍h i-chiûⁿ; chián-thâng beh chia̍h in, chhin-chhiūⁿ chia̍h iûⁿ-mn̂g; chí-ū Góa ê kong-gī éng-oán tī-teh, Góa ê kiù-un ti̍t-kàu bān-tāi.

9耶和華ê手ah，起來，起來，施出大氣力；起來，親像早時ê年日，古早ê世代一樣。從前phah碎La̍h-hap-pek，鑿透龍ê，kiám-m̄是你mah？Iâ-hô-hoa ê chhiú ah, khí-lâi, khí-lâi, si-chhut tōa khùi-la̍t; khí-lâi, chhin-chhiūⁿ chá-sî ê nî-ji̍t, kó͘-chá ê sè-tāi chi̍t-iūⁿ. Chiông-chiân phah-chhùi La̍h-hap-pek, chha̍k-thàu lêng--ê, kiám-m̄-sī lí mah?

10Hō͘海kap深淵ê水乾去，hō͘海深ê所在變做路，hō͘受贖ê百姓經過ê，kiám-m̄是你mah？Hō͘ hái kap chhim-ian ê chúi ta--khì, hō͘ hái chhim ê só͘-chāi pìⁿ chòe lō͘, hō͘ siū-sio̍k ê peh-sìⁿ keng-kè--ê, kiám-m̄-sī lí mah?

11耶和華救贖ê百姓beh 倒tńg來，beh唱歌來到錫安，得tio̍h永遠ê歡喜做冕旒；in beh歡喜快樂，憂悶吐氣lóng beh走去。Iâ-hô-hoa kiù-sio̍k ê peh-sìⁿ beh tò-tńg-lâi, beh chhiùⁿ-koa lâi kàu Sek-an, tit-tio̍h éng-oán ê hoaⁿ-hí chòe bián-liû; in beh hoaⁿ-hí khoài-lo̍k, iu-būn thó͘-khùi lóng beh cháu--khì.

12我，我是安慰lín ê；你是甚麼人，竟然驚hit-ê beh死ê人，驚hit-ê beh變做親像草ê世間人？Góa, Góa sī an-ùi lín ê; lí sī sím-mi̍h lâng, kéng-jiân kiaⁿ hit-ê beh-sí ê lâng, kiaⁿ hit-ê beh pìⁿ-chòe chhin-chhiūⁿ chháu ê sè-kan lâng?

13亦bōe記得thí開chiah-ê天，安定地ê地基，創造你ê耶和華，thong日因為暴虐ê ê大受氣來驚惶，照伊圖謀beh毀滅ê情形？其實hit-ê暴虐ê ê大受氣tī toh-lo̍h ah？Ia̍h bōe-kì-tit thí-khui chiah ê thiⁿ, an-tiāⁿ tōe ê tōe-ki, chhòng-chō lí ê Iâ-hô-hoa, thong-ji̍t in-ūi pō-gio̍k-ê ê tōa siū-khì lâi kiaⁿ-hiâⁿ, chiàu i tô͘-bô͘ beh húi-bia̍t ê chêng-hêng? kî-si̍t hit-ê pō-gio̍k-ê ê tōa siū-khì tī toh-lo̍h ah?

14受壓迫ê beh緊緊得tio̍h tháu放；的確無死來落穴，伊ê米糧亦無絕。Siū ap-pek-ê beh kín-kín tit-tio̍h tháu-pàng; tek-khak bô sí lâi lo̍h hia̍t, i ê bí-niû ia̍h bô choa̍t.

15我是耶和華你ê上帝，搖動大海，hō͘伊ê湧hōa-hōa哮；萬軍ê耶和華是伊ê名。Góa sī Iâ-hô-hoa lí ê Siōng-tè, iô-tāng tōa-hái, hō͘ i ê éng hōa-hōa-háu; bān-kun ê Iâ-hô-hoa sī I ê miâ.

16我將我ê話hē tī你ê嘴，用我ê手ê影遮蓋你，為tio̍h beh開天闢地，koh對錫安講，你是我ê百姓。Góa chiong Góa ê ōe hē tī lí ê chhùi, ēng Góa ê chhiú ê iáⁿ jia-khàm lí, ūi-tio̍h beh khai-thian pi̍t-tōe, koh tùi Sek-an kóng, Lí sī Góa ê peh-sìⁿ.

17耶路撒冷ah，起來，起來，khiā-teh，你tùi耶和華ê手中lim伊大受氣ê杯；lim hit-ê hō͘人顛顛倒倒ê杯盞，lim到乾乾，Iâ-lō͘-sat-léng ah, khí-lâi, khí-lâi, khiā-teh, lí tùi Iâ-hô-hoa ê chhiú-tiong lim I tōa siū-khì ê poe; lim hit-ê hō͘ lâng tian-tian tó-tó ê poe-chóaⁿ, lim kàu ta-ta,

18伊所生chiah-ê kiáⁿ ê中間，無一個引chhōa伊；伊所養飼大漢chiah-ê kiáⁿ ê中間，無一個牽伊ê手。I só͘-siⁿ chiah ê kiáⁿ ê tiong-kan, bô chi̍t-ê ín-chhōa i; i só͘ iúⁿ-chhī tōa-hàn chiah ê kiáⁿ ê tiong-kan, bô chi̍t-ê khan i ê chhiú.

19Chit兩項臨到你；是誰會替你哀傷ah？就是有衰敗kap滅無，飢荒kap劍；我beh怎樣安慰你？Chí(**Chit) nn̄g-hāng lîm-kàu lí; chī-chūi ōe thòe lí ai-siong ah? chiū-sī ū soe-pāi kap bia̍t-bô, ki-hng kap kiàm; Góa beh cháiⁿ-iūⁿ an-ùi lí?

20你chiah-ê kiáⁿ暈去，倒tī ta̍k ê街路口，親像鹿tī羅網ê中間；受耶和華滿滿ê受氣，你ê上帝ê責備。Lí chiah ê kiáⁿ hūn--khì, tó tī ta̍k ê ke-lō͘-kháu, chhin-chhiūⁿ lo̍k tī lô-bāng ê tiong-kan; siū Iâ-hô-hoa móa-móa ê siū-khì, lí ê Siōng-tè ê chek-pī.

21所以你chit-ê困苦koh醉ê，卻m̄是因為酒來醉，你tio̍h聽。Só͘-í lí chit ê khùn-khó͘ koh chùi-ê, khiok m̄-sī in-ūi chiú lâi chùi, lí tio̍h thiaⁿ.

22你ê主耶和華，就是為tio̍h伊ê百姓申冤ê上帝，án-ni講，看ah，我已經將hit-ê hō͘人顛顛倒倒ê杯，就是我大受氣ê杯盞，對你ê手the̍h出來，你的確m̄免koh lim。Lí ê Chú Iâ-hô-hoa, chiū-sī ūi-tio̍h I ê peh-sìⁿ sin-oan ê Siōng-tè, án-ni kóng, Khòaⁿ ah, Góa í-keng chiong hit-ê hō͘ lâng tian-tian tó-tó ê poe, chiū-sī Góa tōa siū-khì ê poe-chóaⁿ, tùi lí ê chhiú the̍h--chhut-lâi, lí tek-khak m̄-bián koh lim.

23我beh將chit-ê杯hē tī pháiⁿ款待你ê人ê手中；in bat對你講，你tio̍h俯落去，chhut-chāi阮踏過去；你就用ka-chiah-phiaⁿ做親像地，親像街路，chhut-chāi人經過。Góa beh chiong chit ê poe hē tī pháiⁿ khoán-thāi lí ê lâng ê chhiú-tiong; in bat tùi lí kóng, Lí tio̍h àⁿ--lo̍h-khì, chhut-chāi goán ta̍h-kè--khì; lí chiū ēng ka-chiah-phiaⁿ chòe chhin-chhiūⁿ tōe, chhin-chhiūⁿ ke-lō͘, chhut-chāi lâng keng-kè.

1錫安ah，起來，起來，穿你ê大氣力；聖城耶路撒冷ah，穿你súi ê衣服；因為tùi-taⁿ以後，無受割禮，無清氣ê，的確無koh入你ê中間。Sek-an ah, khí-lâi, khí-lâi, chhēng lí ê tōa khùi-la̍t; sèng-siâⁿ Iâ-lō͘-sat-léng ah, chhēng lí súi ê i-ho̍k; in-ūi tùi-taⁿ í-āu, bô siū kat-lé, bô chheng-khì-ê, tek-khak bô koh ji̍p lí ê tiong-kan.

2耶路撒冷ah，tio̍h拌去塵埃；起來坐；錫安受掠ê百姓ah，tio̍h tháu開你頷頸ê鎖鏈。Iâ-lō͘-sat-léng ah, tio̍h pōaⁿ--khì tîn-ai; khí-lâi chē; Sek-an siū-lia̍h ê peh-sìⁿ ah, tio̍h tháu-khui lí ām-kún ê só-liān.

3耶和華án-ni講，Lín受賣無the̍h人錢，得tio̍h贖回亦無用銀。Iâ-hô-hoa án-ni kóng, Lín siū-bōe bô the̍h lâng chîⁿ, tit-tio̍h sio̍k-hôe ia̍h bô ēng gûn.

4主耶和華án-ni講，起頭我ê百姓落去埃及，tī-hia寄腳；koh有亞述人無緣故壓制in。Chú Iâ-hô-hoa án-ni kóng, Khí-thâu Góa ê peh-sìⁿ lo̍h-khì Ai-ki̍p, tī-hia kià-kha; koh ū A-su̍t lâng bô iân-kò͘ ap-chè in.

5耶和華講，我ê百姓既然無因端hō͘人掠去，taⁿ我tī-chia做甚麼ah？耶和華講，管轄in ê人hōa-hōa哮teh叫，我ê名thong日受褻瀆。Iâ-hô-hoa kóng, Góa ê peh-sìⁿ kì-jiân bô in-toaⁿ hō͘ lâng lia̍h--khì, taⁿ Góa tī-chia chòe sím-mi̍h ah? Iâ-hô-hoa kóng, Koán-hat in ê lâng hōa-hōa-háu teh kiò, Góa ê miâ thong-ji̍t siū siat-to̍k.

6所以我ê百姓beh知我ê名；到hit日，in beh知teh講ê就是我；看ah，是我。Só͘-í Góa ê peh-sìⁿ beh chai Góa ê miâ; kàu hit-ji̍t in beh chai teh-kóng-ê chiū-sī Góa; khòaⁿ ah, sī Góa.

7報好消息，傳和平，報福氣ê好消息，傳救恩ê，對錫安講，你ê上帝做王lah，Chit人ê腳上山頂，到chiah súi！Pò hó siau-sit, thoân hô-pêng, pò hok-khì ê hó siau-sit, thoân kiù-un-ê, tùi Sek-an kóng, Lí ê Siōng-tè chòe-ông lah, chit-lâng ê kha chiūⁿ soaⁿ-téng, kàu chiah súi!

8聽ah，你守望ê人ê聲！in出大聲，相kap唱歌；因為耶和華tò來錫安ê時，in beh當頭對面看見。Thiaⁿ ah, lí siú-bāng ê lâng ê siaⁿ! in chhut tōa-siaⁿ, saⁿ-kap chhiùⁿ-koa; in-ūi Iâ-hô-hoa tò--lâi Sek-an ê sî, in beh tng-thâu tùi-bīn khòaⁿ-kìⁿ.

9耶路撒冷拋荒ê所在ah，tio̍h出歡喜ê聲，相kap唱歌；因為耶和華安慰祂ê百姓，救贖耶路撒冷。Iâ-lō͘-sat-léng pha-hng ê só͘-chāi ah, tio̍h chhut hoaⁿ-hí ê siaⁿ, saⁿ-kap chhiùⁿ-koa; in-ūi Iâ-hô-hoa an-ùi I ê peh-sìⁿ, kiù-sio̍k Iâ-lō͘-sat-léng.

10耶和華tī萬國ê目睭前lu̍t伊ê聖手；地極ê人lóng看見咱ê上帝ê拯救。Iâ-hô-hoa tī bān-kok ê ba̍k-chiu-chêng lu̍t I ê sèng-chhiú; tōe-ke̍k ê lâng lóng khòaⁿ-kìⁿ lán ê Siōng-tè ê chín-kiù.

11Lín tio̍h離開伊，離開伊，tùi-hia出來，莫得摸無清氣ê物；tùi in中間出來；lín扛耶和華器具ê人ah，tio̍h家己清氣。Lín tio̍h lī-khui i, lī-khui i, tùi-hia chhut-lâi, bo̍h-tit bong bô chheng-khì ê mi̍h; tùi in tiong-kan chhut-lâi; lín kng Iâ-hô-hoa khì-kū ê lâng ah, tio̍h ka-kī chheng-khì.

12Lín出來m̄免著急，也m̄免逃走；因為耶和華的確tī lín ê頭前行，以色列ê上帝的確做lín後面ê保護。Lín chhut-lâi m̄-bián tio̍h-kip, iā m̄-bián tô-cháu; in-ūi Iâ-hô-hoa tek-khak tī lín ê thâu-chêng kiâⁿ, Í-sek-lia̍t ê Siōng-tè tek-khak chòe lín āu-bīn ê pó-hō͘.

13看ah，我ê奴僕beh用智慧行tāi-chì，beh受舉起升高，koh beh成做真高。Khòaⁿ ah, góa ê lô͘-po̍k beh ēng tì-hūi kiâⁿ tāi-chì, beh siū kú-khí seng-koâiⁿ, koh beh chiâⁿ-chòe chin koâiⁿ.

14Chōe-chōe人為你gông-ngia̍h，(伊ê面貌比別人khah有損傷，伊ê形狀比世間人khah有損害；)Chōe-chōe lâng ūi lí gông-ngia̍h, ( i ê bīn-māu pí pa̍t-lâng khah ū sún-siong, i ê hêng-chōng pí sè-kan lâng khah ū sún-hāi;)

15親像án-ni伊也beh激動chōe-chōe國ê百姓；列王beh對伊來掩in ê嘴；因為所bē-bat對in講ê，in beh看見；bē-bat聽見ê，in beh明白。chhin-chhiūⁿ án-ni i iā beh kek-tōng chōe-chōe kok ê peh-sìⁿ; lia̍t-ông beh tùi i lâi ng in ê chhùi; in-ūi só͘ bē-bat tùi in kóng--ê, in beh khòaⁿ-kìⁿ; bē-bat thiaⁿ-kìⁿ--ê, in beh bêng-pe̍k.

1咱所聽見ê，有是誰信ah？耶和華ê手ǹg 是誰顯明ah？Lán só͘ thiaⁿ-kìⁿ-ê, ū chī-chūi sìn ah? Iâ-hô-hoa ê chhiú ǹg chī-chūi hián-bêng ah?

2因為伊tī祂ê面前生長親像chíⁿ-chíⁿ ê íⁿ，亦親像根發tī乾地；伊無好形狀無威儀；咱看見伊亦無好形容，thang hō͘咱欣慕伊。In-ūi i tī I ê bīn-chêng seng-tióng chhin-chhiūⁿ chíⁿ-chíⁿ ê íⁿ, ia̍h chhin-chhiūⁿ kun hoat tī ta-tōe; i bô hó hêng-chōng bô ui-gî; lán khòaⁿ-kìⁿ i ia̍h bô hó hêng-iông, thang hō͘ lán him-bō͘ i.

3伊受看輕，hō͘人放sak，受chōe-chōe苦痛，常常tú-tio̍h憂悶；伊受看輕，親像hō͘人掩面m̄看ê一樣；咱亦無尊重伊。I siū khòaⁿ-khin, hō͘ lâng pàng-sak, siū chōe-chōe khó͘-thàng, siông-siông tú-tio̍h iu-būn; i siū khòaⁿ-khin, chhin-chhiūⁿ hō͘ lâng ng-bīn m̄-khòaⁿ-ê chi̍t-iūⁿ; lán ia̍h bô chun-tiōng i.

4伊實在擔當咱ê憂悶，背咱ê苦痛；總是咱掠做伊受責罰，hō͘上帝phah，koh受苦楚。I si̍t-chāi tam-tng lán ê iu-būn, pē lán ê khó͘-thàng; chóng-sī lán lia̍h-chòe i siū chek-hoa̍t, hō͘ Siōng-tè phah, koh siū khó͘-chhó͘.

5但是伊為tio̍h咱ê過失受傷，為tio̍h咱ê罪過受害；伊擔當刑罰，咱得tio̍h平安；伊受鞭phah，咱得tio̍h醫好。Nā-sī i ūi-tio̍h lán ê kè-sit siū siong, ūi-tio̍h lán ê chōe-kòa siū-hāi; i tam-tng hêng-hoa̍t, lán tit-tio̍h pêng-an; i siū piⁿ-phah, lán tit-tio̍h i-hó.

6咱lóng親像羊迷路；ta̍k人行家己ê偏路；耶和華hō͘咱眾人ê罪lóng歸tī伊身上。Lán lóng chhin-chhiūⁿ iûⁿ bê-lō͘; ta̍k-lâng kiâⁿ ka-kī ê phian-lō͘; Iâ-hô-hoa hō͘ lán chèng-lâng ê chōe lóng kui tī i sin-chiūⁿ.

7伊受壓迫tú-tio̍h艱苦，iáu-kú無開嘴；伊親像羊á牽到受thâi ê地；koh親像羊tī剪毛ê人ê面前無出聲，伊亦án-ni無開嘴。I siū ap-pek tú-tio̍h kan-khó͘, iáu-kú bô khui-chhùi; i chhin-chhiūⁿ iûⁿ-á khan kàu siū-thâi ê tōe; koh chhin-chhiūⁿ iûⁿ tī chián-mn̂g ê lâng ê bīn-chêng bô chhut-siaⁿ, i ia̍h án-ni bô khui-chhùi.

8伊tùi壓迫kap審判受取去；tī伊ê世代，是誰想tio̍h伊tùi活人ê地受剪除？á是因為我ê百姓ê罪過受phah ah？I tùi ap-pek kap sím-phòaⁿ siū chhú--khì; tī i ê sè-tāi, chī-chūi siūⁿ-tio̍h i tùi oa̍h-lâng ê tōe siū chián-tû? á-sī in-ūi Góa ê peh-sìⁿ ê chōe-kòa siū-phah ah?

9伊雖然無行強暴，嘴也無有詭詐，iáu-kú tī伊ê死kap pháiⁿ人同墓，也kap富人相kap。I sui-jiân bô kiâⁿ kiông-pō, chhùi iā bô ū khúi-chà, iáu-kú tī i ê sí kap pháiⁿ-lâng tâng-bōng, iā kap pù-lâng saⁿ-kap.

10總是耶和華歡喜損害伊，hō͘伊受苦痛；伊ê活命做贖罪ê祭，hit時伊beh看見後裔，koh加添歲壽，耶和華所歡喜ê事beh tī伊ê手中興通。Chóng-sī Iâ-hô-hoa hoaⁿ-hí sún-hāi i, hō͘ i siū khó͘-thàng; i ê oa̍h-miā chòe sio̍k-chōe ê chè, hit-sî i beh khòaⁿ-kìⁿ hō͘-è, koh ke-thiⁿ hè-siū, Iâ-hô-hoa só͘ hoaⁿ-hí ê sū beh tī i ê chhiú-tiong heng-thong.

11伊beh看見本身勞苦ê效果，就心滿意足；我義ê奴僕beh用伊ê知bat hō͘ chōe-chōe人得tio̍h稱做義；也伊beh擔當in ê罪過。I beh khòaⁿ-kìⁿ pún-sin lô-khó͘ ê hāu-kó, chiū sim-móa ì-chiok; Góa gī ê lô͘-po̍k beh ēng i ê chai-bat hō͘ chōe-chōe lâng tit-tio̍h chheng-chòe-gī; iā i beh tam-tng in ê chōe-kòa.

12所以我beh hō͘伊kap坐高位ê分份額，kap強猛ê分所搶ê物；因為伊放sak性命到死，伊也列tī罪犯ê中間；總是伊擔當chōe-chōe人ê罪，koh替罪犯祈禱。Só͘-í Góa beh hō͘ i kap chē koâiⁿ-ūi--ê pun hūn-gia̍h, kap kiông-béng--ê pun só͘ chhiúⁿ ê mi̍h; in-ūi i pàng-sak sìⁿ-miā kàu-sí, i iā lia̍t tī chōe-hoān ê tiong-kan; chóng-sī i tam-tng chōe-chōe lâng ê chōe, koh thòe chōe-hoān kî-tó.