1錫安ah，起來，起來，穿你ê大氣力；聖城耶路撒冷ah，穿你súi ê衣服；因為tùi-taⁿ以後，無受割禮，無清氣ê，的確無koh入你ê中間。Sek-an ah, khí-lâi, khí-lâi, chhēng lí ê tōa khùi-la̍t; sèng-siâⁿ Iâ-lō͘-sat-léng ah, chhēng lí súi ê i-ho̍k; in-ūi tùi-taⁿ í-āu, bô siū kat-lé, bô chheng-khì-ê, tek-khak bô koh ji̍p lí ê tiong-kan.

2耶路撒冷ah，tio̍h拌去塵埃；起來坐；錫安受掠ê百姓ah，tio̍h tháu開你頷頸ê鎖鏈。Iâ-lō͘-sat-léng ah, tio̍h pōaⁿ--khì tîn-ai; khí-lâi chē; Sek-an siū-lia̍h ê peh-sìⁿ ah, tio̍h tháu-khui lí ām-kún ê só-liān.

3耶和華án-ni講，Lín受賣無the̍h人錢，得tio̍h贖回亦無用銀。Iâ-hô-hoa án-ni kóng, Lín siū-bōe bô the̍h lâng chîⁿ, tit-tio̍h sio̍k-hôe ia̍h bô ēng gûn.

4主耶和華án-ni講，起頭我ê百姓落去埃及，tī-hia寄腳；koh有亞述人無緣故壓制in。Chú Iâ-hô-hoa án-ni kóng, Khí-thâu Góa ê peh-sìⁿ lo̍h-khì Ai-ki̍p, tī-hia kià-kha; koh ū A-su̍t lâng bô iân-kò͘ ap-chè in.

5耶和華講，我ê百姓既然無因端hō͘人掠去，taⁿ我tī-chia做甚麼ah？耶和華講，管轄in ê人hōa-hōa哮teh叫，我ê名thong日受褻瀆。Iâ-hô-hoa kóng, Góa ê peh-sìⁿ kì-jiân bô in-toaⁿ hō͘ lâng lia̍h--khì, taⁿ Góa tī-chia chòe sím-mi̍h ah? Iâ-hô-hoa kóng, Koán-hat in ê lâng hōa-hōa-háu teh kiò, Góa ê miâ thong-ji̍t siū siat-to̍k.

6所以我ê百姓beh知我ê名；到hit日，in beh知teh講ê就是我；看ah，是我。Só͘-í Góa ê peh-sìⁿ beh chai Góa ê miâ; kàu hit-ji̍t in beh chai teh-kóng-ê chiū-sī Góa; khòaⁿ ah, sī Góa.

7報好消息，傳和平，報福氣ê好消息，傳救恩ê，對錫安講，你ê上帝做王lah，Chit人ê腳上山頂，到chiah súi！Pò hó siau-sit, thoân hô-pêng, pò hok-khì ê hó siau-sit, thoân kiù-un-ê, tùi Sek-an kóng, Lí ê Siōng-tè chòe-ông lah, chit-lâng ê kha chiūⁿ soaⁿ-téng, kàu chiah súi!

8聽ah，你守望ê人ê聲！in出大聲，相kap唱歌；因為耶和華tò來錫安ê時，in beh當頭對面看見。Thiaⁿ ah, lí siú-bāng ê lâng ê siaⁿ! in chhut tōa-siaⁿ, saⁿ-kap chhiùⁿ-koa; in-ūi Iâ-hô-hoa tò--lâi Sek-an ê sî, in beh tng-thâu tùi-bīn khòaⁿ-kìⁿ.

9耶路撒冷拋荒ê所在ah，tio̍h出歡喜ê聲，相kap唱歌；因為耶和華安慰祂ê百姓，救贖耶路撒冷。Iâ-lō͘-sat-léng pha-hng ê só͘-chāi ah, tio̍h chhut hoaⁿ-hí ê siaⁿ, saⁿ-kap chhiùⁿ-koa; in-ūi Iâ-hô-hoa an-ùi I ê peh-sìⁿ, kiù-sio̍k Iâ-lō͘-sat-léng.

10耶和華tī萬國ê目睭前lu̍t伊ê聖手；地極ê人lóng看見咱ê上帝ê拯救。Iâ-hô-hoa tī bān-kok ê ba̍k-chiu-chêng lu̍t I ê sèng-chhiú; tōe-ke̍k ê lâng lóng khòaⁿ-kìⁿ lán ê Siōng-tè ê chín-kiù.

11Lín tio̍h離開伊，離開伊，tùi-hia出來，莫得摸無清氣ê物；tùi in中間出來；lín扛耶和華器具ê人ah，tio̍h家己清氣。Lín tio̍h lī-khui i, lī-khui i, tùi-hia chhut-lâi, bo̍h-tit bong bô chheng-khì ê mi̍h; tùi in tiong-kan chhut-lâi; lín kng Iâ-hô-hoa khì-kū ê lâng ah, tio̍h ka-kī chheng-khì.

12Lín出來m̄免著急，也m̄免逃走；因為耶和華的確tī lín ê頭前行，以色列ê上帝的確做lín後面ê保護。Lín chhut-lâi m̄-bián tio̍h-kip, iā m̄-bián tô-cháu; in-ūi Iâ-hô-hoa tek-khak tī lín ê thâu-chêng kiâⁿ, Í-sek-lia̍t ê Siōng-tè tek-khak chòe lín āu-bīn ê pó-hō͘.

13看ah，我ê奴僕beh用智慧行tāi-chì，beh受舉起升高，koh beh成做真高。Khòaⁿ ah, góa ê lô͘-po̍k beh ēng tì-hūi kiâⁿ tāi-chì, beh siū kú-khí seng-koâiⁿ, koh beh chiâⁿ-chòe chin koâiⁿ.

14Chōe-chōe人為你gông-ngia̍h，(伊ê面貌比別人khah有損傷，伊ê形狀比世間人khah有損害；)Chōe-chōe lâng ūi lí gông-ngia̍h, ( i ê bīn-māu pí pa̍t-lâng khah ū sún-siong, i ê hêng-chōng pí sè-kan lâng khah ū sún-hāi;)

15親像án-ni伊也beh激動chōe-chōe國ê百姓；列王beh對伊來掩in ê嘴；因為所bē-bat對in講ê，in beh看見；bē-bat聽見ê，in beh明白。chhin-chhiūⁿ án-ni i iā beh kek-tōng chōe-chōe kok ê peh-sìⁿ; lia̍t-ông beh tùi i lâi ng in ê chhùi; in-ūi só͘ bē-bat tùi in kóng--ê, in beh khòaⁿ-kìⁿ; bē-bat thiaⁿ-kìⁿ--ê, in beh bêng-pe̍k.

1咱所聽見ê，有是誰信ah？耶和華ê手ǹg 是誰顯明ah？Lán só͘ thiaⁿ-kìⁿ-ê, ū chī-chūi sìn ah? Iâ-hô-hoa ê chhiú ǹg chī-chūi hián-bêng ah?

2因為伊tī祂ê面前生長親像chíⁿ-chíⁿ ê íⁿ，亦親像根發tī乾地；伊無好形狀無威儀；咱看見伊亦無好形容，thang hō͘咱欣慕伊。In-ūi i tī I ê bīn-chêng seng-tióng chhin-chhiūⁿ chíⁿ-chíⁿ ê íⁿ, ia̍h chhin-chhiūⁿ kun hoat tī ta-tōe; i bô hó hêng-chōng bô ui-gî; lán khòaⁿ-kìⁿ i ia̍h bô hó hêng-iông, thang hō͘ lán him-bō͘ i.

3伊受看輕，hō͘人放sak，受chōe-chōe苦痛，常常tú-tio̍h憂悶；伊受看輕，親像hō͘人掩面m̄看ê一樣；咱亦無尊重伊。I siū khòaⁿ-khin, hō͘ lâng pàng-sak, siū chōe-chōe khó͘-thàng, siông-siông tú-tio̍h iu-būn; i siū khòaⁿ-khin, chhin-chhiūⁿ hō͘ lâng ng-bīn m̄-khòaⁿ-ê chi̍t-iūⁿ; lán ia̍h bô chun-tiōng i.

4伊實在擔當咱ê憂悶，背咱ê苦痛；總是咱掠做伊受責罰，hō͘上帝phah，koh受苦楚。I si̍t-chāi tam-tng lán ê iu-būn, pē lán ê khó͘-thàng; chóng-sī lán lia̍h-chòe i siū chek-hoa̍t, hō͘ Siōng-tè phah, koh siū khó͘-chhó͘.

5但是伊為tio̍h咱ê過失受傷，為tio̍h咱ê罪過受害；伊擔當刑罰，咱得tio̍h平安；伊受鞭phah，咱得tio̍h醫好。Nā-sī i ūi-tio̍h lán ê kè-sit siū siong, ūi-tio̍h lán ê chōe-kòa siū-hāi; i tam-tng hêng-hoa̍t, lán tit-tio̍h pêng-an; i siū piⁿ-phah, lán tit-tio̍h i-hó.

6咱lóng親像羊迷路；ta̍k人行家己ê偏路；耶和華hō͘咱眾人ê罪lóng歸tī伊身上。Lán lóng chhin-chhiūⁿ iûⁿ bê-lō͘; ta̍k-lâng kiâⁿ ka-kī ê phian-lō͘; Iâ-hô-hoa hō͘ lán chèng-lâng ê chōe lóng kui tī i sin-chiūⁿ.

7伊受壓迫tú-tio̍h艱苦，iáu-kú無開嘴；伊親像羊á牽到受thâi ê地；koh親像羊tī剪毛ê人ê面前無出聲，伊亦án-ni無開嘴。I siū ap-pek tú-tio̍h kan-khó͘, iáu-kú bô khui-chhùi; i chhin-chhiūⁿ iûⁿ-á khan kàu siū-thâi ê tōe; koh chhin-chhiūⁿ iûⁿ tī chián-mn̂g ê lâng ê bīn-chêng bô chhut-siaⁿ, i ia̍h án-ni bô khui-chhùi.

8伊tùi壓迫kap審判受取去；tī伊ê世代，是誰想tio̍h伊tùi活人ê地受剪除？á是因為我ê百姓ê罪過受phah ah？I tùi ap-pek kap sím-phòaⁿ siū chhú--khì; tī i ê sè-tāi, chī-chūi siūⁿ-tio̍h i tùi oa̍h-lâng ê tōe siū chián-tû? á-sī in-ūi Góa ê peh-sìⁿ ê chōe-kòa siū-phah ah?

9伊雖然無行強暴，嘴也無有詭詐，iáu-kú tī伊ê死kap pháiⁿ人同墓，也kap富人相kap。I sui-jiân bô kiâⁿ kiông-pō, chhùi iā bô ū khúi-chà, iáu-kú tī i ê sí kap pháiⁿ-lâng tâng-bōng, iā kap pù-lâng saⁿ-kap.

10總是耶和華歡喜損害伊，hō͘伊受苦痛；伊ê活命做贖罪ê祭，hit時伊beh看見後裔，koh加添歲壽，耶和華所歡喜ê事beh tī伊ê手中興通。Chóng-sī Iâ-hô-hoa hoaⁿ-hí sún-hāi i, hō͘ i siū khó͘-thàng; i ê oa̍h-miā chòe sio̍k-chōe ê chè, hit-sî i beh khòaⁿ-kìⁿ hō͘-è, koh ke-thiⁿ hè-siū, Iâ-hô-hoa só͘ hoaⁿ-hí ê sū beh tī i ê chhiú-tiong heng-thong.

11伊beh看見本身勞苦ê效果，就心滿意足；我義ê奴僕beh用伊ê知bat hō͘ chōe-chōe人得tio̍h稱做義；也伊beh擔當in ê罪過。I beh khòaⁿ-kìⁿ pún-sin lô-khó͘ ê hāu-kó, chiū sim-móa ì-chiok; Góa gī ê lô͘-po̍k beh ēng i ê chai-bat hō͘ chōe-chōe lâng tit-tio̍h chheng-chòe-gī; iā i beh tam-tng in ê chōe-kòa.

12所以我beh hō͘伊kap坐高位ê分份額，kap強猛ê分所搶ê物；因為伊放sak性命到死，伊也列tī罪犯ê中間；總是伊擔當chōe-chōe人ê罪，koh替罪犯祈禱。Só͘-í Góa beh hō͘ i kap chē koâiⁿ-ūi--ê pun hūn-gia̍h, kap kiông-béng--ê pun só͘ chhiúⁿ ê mi̍h; in-ūi i pàng-sak sìⁿ-miā kàu-sí, i iā lia̍t tī chōe-hoān ê tiong-kan; chóng-sī i tam-tng chōe-chōe lâng ê chōe, koh thòe chōe-hoān kî-tó.

1你無懷孕無生kiáⁿ ê，tio̍h唱歌；你bē-bat經過生kiáⁿ艱苦ê，tio̍h出聲唱歌，出歡喜ê聲；因為家己tiàm ê婦人人比有丈夫ê，生kiáⁿ khah-chōe；這是耶和華講ê。Lí bô hoâi-īn bô siⁿ-kiáⁿ ê, tio̍h chhiùⁿ-koa; lí bē-bat keng-kè siⁿ-kiáⁿ kan-khó͘ ê, tio̍h chhut-siaⁿ chhiùⁿ-koa, chhut hoaⁿ-hí ê siaⁿ; in-ūi ka-kī tiàm ê hū-jîn-lâng pí ū tiōng-hu--ê, siⁿ-kiáⁿ khah-chōe; che sī Iâ-hô-hoa kóng ê.

2Tio̍h開闊你布棚ê地，放大你khiā起ê帳幅；m̄-thang限定；tio̍h牽長你ê索，堅固你ê杙á。Tio̍h khui-khoah lí pò͘-pîⁿ ê tōe, pàng-tōa lí khiā-khí ê tiùⁿ-pak; m̄-thang hān-tiāⁿ; tio̍h khan-tn̂g lí ê soh, kian-kò͘ lí ê khi̍t-á.

3因為你beh ǹg左ǹg右來開闊；你ê後裔的確得tio̍h列國做業；koh hō͘拋荒ê城有人khiā起。In-ūi lí beh ǹg-chó ǹg-iū lâi khui-khoah; lí ê hō͘-è tek-khak tit-tio̍h lia̍t-kok chòe-gia̍p; koh hō͘ pha-hng ê siâⁿ ū lâng khiā-khí.

4莫得驚惶；因為你的確無致到見笑；亦莫得畏小人；因為你無致到受凌辱；你的確bōe記得少年ê時ê見笑；無koh記念你守寡ê時ê凌辱。Bo̍h-tit kiaⁿ-hiâⁿ; in-ūi lí tek-khak bô tì-kàu kiàn-siàu; ia̍h bo̍h-tit ùi siáu-jîn; in-ūi lí bô tì-kàu siū lêng-jio̍k; lí tek-khak bōe kì-tit siàu-liân ê sî ê kiàn-siàu; bô koh kì-liām lí chiú-kóaⁿ ê sî ê lêng-jio̍k.

5因為創造你ê是你ê丈夫；萬軍ê耶和華是祂ê名；救贖你ê，是以色列ê聖ê；祂的確稱做全地ê上帝。In-ūi chhòng-chō lí-ê sī lí ê tiōng-hu; bān-kun ê Iâ-hô-hoa sī I ê miâ; kiù-sio̍k lí-ê, sī Í-sek-lia̍t ê Sèng--ê; I tek-khak chheng-chòe choân-tōe ê Siōng-tè.

6耶和華召你，親像召受棄sak心內憂傷ê bó͘，就是少年ê時所娶，受棄sak ê bó͘；這是你ê上帝所講ê。Iâ-hô-hoa tiàu--lí, chhin-chhiūⁿ tiàu siū khì-sak sim-lāi iu-siong ê bó͘, chiū-sī siàu-liân ê sî só͘ chhōa, siū khì-sak ê bó͘; che sī lí ê Siōng-tè só͘ kóng ê.

7我放離你不過tiap-á久，總是beh用大慈悲收你倒tńg。Góa pàng-lī lí put-kò tiap-á-kú, chóng-sī beh ēng tōa chû-pi siu lí tò-tńg.

8我發出受氣，暫時對你掩面；總是beh用永遠ê慈愛憐憫你；這是耶和華，救贖你ê主，講ê。Góa hoat-chhut siū-khì, chiām-sî tùi lí ng-bīn; chóng-sī beh ēng éng-oán ê chû-ài lîn-bín lí; che sī Iâ-hô-hoa, kiù-sio̍k lí ê Chú, kóng ê.

9因為這在我看親像挪亞ê大水；我怎樣chiù-chōa無koh hō͘挪亞ê大水氾濫遍地，我亦照án-ni chiù-chōa，無koh受氣你，責備你。In-ūi che chāi Góa khòaⁿ chhin-chhiūⁿ Ná-a ê tōa-chúi; Góa cháiⁿ-iūⁿ chiù-chōa bô koh hō͘ Ná-a ê tōa-chúi hoàn-lām piàn-tōe, Góa ia̍h chiàu án-ni chiù-chōa, bô koh siū-khì lí, chek-pī lí.

10大山會徙開，小山會移徙，獨獨我ê慈愛的確無離開你，我平安ê約亦無移徙；這是憐憫你ê耶和華講ê。Tōa-soaⁿ ōe sóa-khui, sió-soaⁿ ōe î-sóa, to̍k-to̍k Góa ê chû-ài tek-khak bô lī-khui lí, Góa pêng-an ê iok ia̍h bô î-sóa; che sī lîn-bín lí ê Iâ-hô-hoa kóng ê.

11你chit-ê受困苦，hō͘大風搖動bōe得tio̍h安慰ê人ah，我beh用彩色安置你ê石頭，用藍色ê寶石hē你ê地基。Lí chit-ê siū khùn-khó͘, hō͘ tōa-hong iô-tāng bōe tit-tio̍h an-ùi ê lâng--ah, Góa beh ēng chhái-sek an-tì lí ê chio̍h-thâu, ēng lâm-sek ê pó-chio̍h hē lí ê tōe-ki.

12Koh用紅寶石造你ê城鉈子，用紅玉造你ê城門，用寶石造你四圍ê邊界。Koh ēng âng-pó-chio̍h chō lí ê siâⁿ-tó-chí, ēng âng-ge̍k chō lí ê siâⁿ-mn̂g, ēng pó-chio̍h chō lí sì-ûi ê pian-kài.

13你ê kiáⁿ兒lóng beh hō͘耶和華教示；你ê kiáⁿ兒beh得tio̍h大平安。Lí ê kiáⁿ-jî lóng beh hō͘ Iâ-hô-hoa kà-sī; lí ê kiáⁿ-jî beh tit-tio̍h tōa pêng-an.

14你beh因為公義得tio̍h khiā在，beh離開制壓遠遠，無致到驚惶；你beh離開災厄遠遠，因為伊的確無近óa你。Lí beh in-ūi kong-gī tit-tio̍h khiā-chāi, beh lī-khui chè-ap hn̄g-hn̄g, bô tì-kàu kiaⁿ-hiâⁿ; lí beh lī-khui chai-ē hn̄g-hn̄g, in-ūi i tek-khak bô kūn-óa lí.

15就kiám-chhái有人聚集，總是m̄是tùi我；見若聚集攻擊你ê，beh因為你來跋倒。Chiū kiám-chhái ū lâng chū-chi̍p, chóng-sī m̄-sī tùi Góa; kìⁿ-nā chū-chi̍p kong-kek lí ê, beh in-ūi lí lâi poa̍h-tó.

16鐵匠pûn火炭，製造合用ê器械ê，是我所創造；我也創造陷害人ê，hō͘伊行剿滅。Thih-chhiūⁿ pûn hé-thòaⁿ, chè-chō ha̍p-ēng ê khì-hâi--ê, sī Góa só͘ chhòng-chō; Góa iā chhòng-chō hām-hāi lâng ê, hō͘ i kiâⁿ châu-bia̍t.

17見若為tio̍h攻擊你來造ê器械的確無成路用；見若tī審判ê時起來攻擊你ê舌，你beh定伊ê罪；這是耶和華ê奴僕ê產業，也是in tùi我所得tio̍h ê義；這是耶和華講ê。Kìⁿ-nā ūi-tio̍h kong-kek lí lâi chō ê khì-hâi tek-khak bô chiâⁿ lō͘-ēng; kìⁿ-nā tī sím-phòaⁿ ê sî khí-lâi kong-kek lí ê chi̍h, lí beh tēng i ê chōe; che sī Iâ-hô-hoa ê lô͘-po̍k ê sán-gia̍p, iā sī in tùi Góa só͘ tit-tio̍h ê gī; che sī Iâ-hô-hoa kóng ê.