1義人死無，無人掛tī心頭；虔誠ê人過世，無人想到chit-ê義人過世是脫離將來ê災厄。Gī-lâng sí-bô, bô lâng khòa tī sim-thâu; khiân-sêng ê lâng kè-sì, bô lâng siūⁿ-kàu chit ê gī-lâng kè-sì sī thoat-lī chiong-lâi ê chai-ē.

2行tī正直ê人，伊beh進入平安ê所在，安然歇tī伊ê床。Kiâⁿ tī chèng-ti̍t ê lâng, i beh chìn-ji̍p pêng-an ê só͘-chāi, an-jiân hioh tī i ê chhn̂g.

3Lín chiah-ê紅姨ê kiáⁿ，姦夫kap妓女ê種類，lóng tio̍h進前來。Lín chiah ê ang-î ê kiáⁿ, kan-hu kap kī-lú ê chéng-lūi, lóng tio̍h chìn-chêng lâi.

4Lín 對是誰戲弄，對是誰開嘴吐舌ah？lín kiám m̄是悖逆ê kiáⁿ兒，白賊ê種類mah？Lín tùi chī-chūi hì-lāng, tùi chī-chūi khui-chhùi thó͘-chi̍h ah? lín kiám m̄-sī pōe-ge̍k ê kiáⁿ-jî, pe̍h-chha̍t ê chéng-lūi mah?

5Lín tī橡樹ê中間，tī ta̍k叢青翠ê樹腳，慾火攻心，tī山谷裡，tī石孔內thâi gín-ná。Lín tī siōng-chhiū ê tiong-kan, tī ta̍k châng chhiⁿ-chhùi ê chhiū-kha, io̍k-hé kong-sim, tī soaⁿ-kok--nih, tī chio̍h-khang-lāi thâi gín-ná.

6Tī山谷內，光滑ê石頭中，有你ê份額；chiah-ê就是你所得tio̍h ê業；你亦對伊灌奠，獻禮物；因為chiah-ê，我kiám會安心mah？Tī soaⁿ-kok-lāi, kng-ku̍t ê chio̍h-thâu tiong, ū lí ê hūn-gia̍h; chiah-ê chiū-sī lí só͘ tit-tio̍h ê gia̍p; lí ia̍h tùi i koàn-tiān, hiàn lé-mi̍h; in-ūi chiah-ê, Góa kiám ōe an-sim mah?

7你tī高高ê山頂安設眠床，亦上去獻祭。Lí tī koâiⁿ-koâiⁿ ê soaⁿ-téng an-siat bîn-chhn̂g, ia̍h chiūⁿ-khì hiàn-chè.

8你tī門後，門khiā後，khiā你ê記念；對別人露現身體來上去；開闊你ê眠床，kap in立約；你tī-hia看見in ê眠床，就真意愛。Lí tī mn̂g-āu, mn̂g-khiā-āu, khiā lí ê kì-liām; tùi pa̍t-lâng lō͘-hiān sin-thé lâi chiūⁿ-khì; khui-khoah lí ê bîn-chhn̂g, kap in li̍p-iok; lí tī-hia khòaⁿ-kìⁿ in ê bîn-chhn̂g, chiū chin ì-ài.

9你將油帶到王hia，koh加添你ê香料，差使者去遠遠ê所在，家己卑賤，直到陰間。Lí chiong iû tòa kàu ông hia, koh ke-thiⁿ lí ê hiuⁿ-liāu, chhe sù-chiá khì hn̄g-hn̄g ê só͘-chāi, ka-kī pi-chiān, ti̍t-kàu im-kan.

10你因為路遠厭倦，總是無講，這是空空；你有koh得tio̍h氣力，所以m̄知軟弱。Lí in-ūi lō͘ hn̄g ià-siān, chóng-sī bô kóng, Che sī khang-khang; lí ū koh tit-tio̍h khùi-la̍t, só͘-í m̄-chai loán-jio̍k.

11你因為是誰來忍neh驚惶，致到講白賊，無記念我，亦無掛tī你ê心頭？我kiám-m̄是tùi古早靜靜，你chiah無驚我mah？Lí in-ūi chī-chūi lâi lún-neh kiaⁿ-hiâⁿ, tì-kàu kóng pe̍h-chha̍t, bô kì-liām Góa, ia̍h bô khòa tī lí ê sim-thâu? Góa kiám-m̄-sī tùi kó͘-chá chēng-chēng, lí chiah bô kiaⁿ Góa mah?

12我beh指明你ê公義；論到你ê所行，lóng無利益你。Góa beh chí-bêng lí ê kong-gī; lūn-kàu lí ê só͘-kiâⁿ, lóng bô lī-ek lí.

13你喉叫ê時，thang hō͘你所聚集ê救你；風beh kā in吹散；氣beh kā in pûn去；總是hit-ê óa靠我ê beh得tio̍h土地，beh承受我ê聖山做業。Lí âu-kiò ê sî, thang hō͘ lí só͘ chū-chi̍p-ê kiù lí; hong beh kā in chhe-sòaⁿ; khì beh kā in pûn--khì; chóng-sī hit-ê óa-khò Góa--ê beh tit-tio̍h thó͘-tōe, beh sêng-siū Góa ê sèng-soaⁿ chòe gia̍p.

14有聲講，Thūn高，thūn高，備辦路，tùi我ê百姓ê路中除去窒礙。Ū siaⁿ kóng, Thūn-koâiⁿ, thūn-koâiⁿ, pī-pān lō͘, tùi Góa ê peh-sìⁿ ê lō͘-tiong tû-khì that-gāi.

15因為hit-ê至koân至尊，永遠tī-teh，名叫做聖ê，án-ni講，我khiā起tī至koân至聖ê所在，亦kap心神痛悔謙卑ê人相kap khiā起，beh hō͘謙卑ê人ê心神koh活，亦hō͘痛悔ê人ê心koh活。In-ūi hit-ê chì-koâiⁿ chì-chun, éng-oán tī-teh, miâ kiò-chòe Sèng--ê, án-ni kóng, Góa khiā-khí tī chì-koâiⁿ chì-sèng ê só͘-chāi, ia̍h kap sim-sîn thòng-hóe khiam-pi ê lâng saⁿ-kap khiā-khí, beh hō͘ khiam-pi ê lâng ê sim-sîn koh-oa̍h, ia̍h hō͘ thòng-hóe ê lâng ê sim koh-oa̍h.

16我的確無永遠爭辯，亦無久長受氣；驚了我所創造ê人，in ê心kap靈魂tī我ê面前衰lám。Góa tek-khak bô éng-oán cheng-piān, ia̍h bô kú-tn̂g siū-khì; kiaⁿ-liáu Góa só͘ chhòng-chō ê lâng, in ê sim kap lêng-hûn tī Góa ê bīn-chêng soe-lám.

17因為伊貪心ê罪過，我就受氣phah伊，我掩面受氣；伊猶原悖逆，照伊ê心意去行。In-ūi i tham-sim ê chōe-kòa, Góa chiū siū-khì phah i, Góa ng-bīn siū-khì; i iû-goân pōe-ge̍k, chiàu i ê sim-ì khì kiâⁿ.

18我看伊所行ê路，亦beh醫好伊；koh beh chhōa伊，hō͘伊kap hiah-ê相kap傷心ê人，koh得tio̍h安慰。Góa khòaⁿ i só͘ kiâⁿ ê lō͘, ia̍h beh i-hó i; koh beh chhōa i, hō͘ i kap hiah-ê saⁿ-kap siong-sim ê lâng, koh tit-tio̍h an-ùi.

19我造beh hō͘ in ê嘴講出o-ló ê話，平安，平安歸hō͘遠kap近ê人；koh我beh醫好伊；這是耶和華講ê。Góa chō beh hō͘ in ê chhùi kóng-chhut o-ló ê ōe, Pêng-an, pêng-an kui hō͘ hn̄g kap kūn ê lâng; koh Góa beh i-hó i; che sī Iâ-hô-hoa kóng ê.

20獨獨pháiⁿ人親像giâ湧ê海，bōe能平靜；伊ê水chhèng出污穢kap土糜。To̍k-to̍k pháiⁿ-lâng chhin-chhiūⁿ giâ-éng ê hái, bōe-ōe pêng-chēng; i ê chúi chhèng-chhut ù-òe kap thô͘-bê.

21我ê上帝講，Pháiⁿ人的確bōe平安。Góa ê Siōng-tè kóng, Pháiⁿ-lâng tek-khak bōe pêng-an.

1你tio̍h大聲喉叫，m̄-thang限止，出大聲親像pûn哨角，對我ê百姓講明in ê過失，對雅各ê家講明in ê罪惡。Lí tio̍h tōa-siaⁿ âu-kiò, m̄-thang hān-chí, chhut tōa-siaⁿ chhin-chhiūⁿ pûn sàu-kak, tùi Góa ê peh-sìⁿ kóng-bêng in ê kè-sit, tùi Ngá-kok ê ke kóng-bêng in ê chōe-ok.

2In日日chhē我，歡喜知我ê道路，親像行義ê百姓，無離開in ê上帝ê法律；in求我照公義ê審判，歡喜親近上帝。In ji̍t-ji̍t chhē Góa, hoaⁿ-hí chai Góa ê tō-lō͘, chhin-chhiūⁿ kiâⁿ-gī ê peh-sìⁿ, bô lī-khui in ê Siōng-tè ê hoat-lu̍t; in kiû Góa chiàu kong-gī ê sím-phòaⁿ, hoaⁿ-hí chhin-kūn Siōng-tè.

3In講，阮禁食，你啥事無看見？阮刻苦阮ê心，你啥事m̄知ah？看ah，lín禁食ê日，iáu-kú家己安樂，強迫人kā lín做苦工。In kóng, Goán kìm-chia̍h, Lí siáⁿ-sū bô khòaⁿ-kìⁿ? goán khek-khó͘ goán ê sim, Lí siáⁿ-sū m̄-chai ah? Khòaⁿ ah, lín kìm-chia̍h ê ji̍t, iáu-kú ka-kī an-lo̍k, kiông-pek lâng kā lín chòe khó͘-kang.

4看ah，lín禁食是beh相爭，相冤家，用兇惡ê拳頭母phah人；lín今á日禁食，bōe能hō͘ lín ê聲聽到頂面。Khòaⁿ ah, lín kìm-chia̍h sī beh saⁿ-chiⁿ, saⁿ oan-ke, ēng hiong-ok ê kûn-thâu-bú phah--lâng; lín kin-á-ji̍t kìm-chia̍h, bōe-ōe hō͘ lín ê siaⁿ thiaⁿ kàu téng-bīn.

5Chit款ê禁食，kiám是我所揀，hō͘人刻苦伊ê心ê日mah？Kiám是hō͘人俯頭親像蘆竹，用麻布kap火灰鋪tī伊ê身軀下mah？這kiám thang稱做禁食hō͘耶和華所歡喜ê日mah？Chit-khoán ê kìm-chia̍h, kiám-sī Góa só͘ kéng, hō͘ lâng khek-khó͘ i ê sim ê ji̍t mah? Kiám-sī hō͘ lâng àⁿ-thâu chhin-chhiūⁿ lô͘-tek, ēng môa-pò͘ kap hé-hu pho͘ tī i ê seng-khu-ē mah? che kiám thang chheng chòe kìm-chia̍h hō͘ Iâ-hô-hoa só͘ hoaⁿ-hí ê ji̍t mah?

6我所揀ê禁食，kiám-m̄是tháu開兇惡ê索，tháu放背擔ê索，hō͘受制壓ê得tio̍h自由，kòng折一切ê擔mah？Góa só͘ kéng ê kìm-chia̍h, kiám-m̄-sī tháu-khui hiong-ok ê soh, tháu-pàng pē-taⁿ ê soh, hō͘ siū chè-ap-ê tit-tio̍h chū-iû, kòng-chi̍h it-chhè ê taⁿ mah?

7Kiám-m̄是將你ê米糧分hō͘ iau餓ê人，將四界流ê sòng-hiong人接納tī你ê家？看見thǹg-pak-theh ê人hō͘伊穿，tùi家己ê骨肉亦無閃去bih mah？Kiám-m̄-sī chiong lí ê bí-niû pun hō͘ iau-gō ê lâng, chiong sì-kòe liû ê sòng-hiong lâng chiap-la̍p tī lí ê ke? khòaⁿ-kìⁿ thǹg-pak-theh ê lâng hō͘ i chhēng, tùi ka-kī ê kut-jio̍k ia̍h bô siám-khì bih mah?

8Án-ni，你ê光beh發出親像天光早ê光，你ê傷beh緊緊得tio̍h好；你ê公義beh行tī你ê頭前；耶和華ê榮光beh做你後面ê保護。Án-ni, lí ê kng beh hoat-chhut chhin-chhiūⁿ thiⁿ-kng-chá ê kng, lí ê siong beh kín-kín tit-tio̍h hó; lí ê kong-gī beh kiâⁿ tī lí ê thâu-chêng; Iâ-hô-hoa ê êng-kng beh chòe lí āu-bīn ê pó-hō͘.

9Hit時你求叫，耶和華beh聽你；你懇求，伊beh講，我tī-chia。你若對你中間除去重ê擔，kap kí-to̍h人ê指頭á，以及lām-sám講ê話；Hit-sî lí kiû-kiò, Iâ-hô-hoa beh thiaⁿ lí; lí khún-kiû, I beh kóng, Góa tī-chia. Lí nā tùi lí tiong-kan tû--khì tāng ê taⁿ, kap kí-to̍h-lâng ê chńg-thâu-á, í-ki̍p lām-sám kóng ê ōe;

10你ê心若憐憫iau餓ê人，hō͘困苦ê人得tio̍h滿足，你ê光就beh tī烏暗中發現，你ê烏暗beh變親像日中晝。lí ê sim nā lîn-bín iau-gō ê lâng, hō͘ khùn-khó͘ ê lâng tit-tio̍h móa-chiok, lí ê kng chiū beh tī o͘-àm-tiong hoat-hiān, lí ê o͘-àm beh pìⁿ chhin-chhiūⁿ ji̍t-tiong-tàu.

11耶和華亦beh常常引chhōa你，tī炕旱ê地，hō͘你心滿意足，骨頭勇壯；你beh親像灌ak ê園，koh親像流bōe乾ê水泉。Iâ-hô-hoa ia̍h beh siông-siông ín-chhōa lí, tī khòng-hān ê tōe, hō͘ lí sim-móa ì-chiok, kut-thâu ióng-chòng; lí beh chhin-chhiūⁿ koàn-ak ê hn̂g, koh chhin-chhiūⁿ lâu-bōe-ta ê chúi-chôaⁿ.

12Hiah-ê對你出ê人，beh起造久久已經荒廢ê所在；你beh建立歷代毀壞ê地基；你beh稱做補破隙ê，kap koh修理路，hō͘人khiā起ê。Hiah-ê tùi lí chhut ê lâng, beh khí-chō kú-kú í-keng hong-hòe ê só͘-chāi; lí beh kiàn-li̍p le̍k-tāi húi-hoāi ê tōe-ki; lí beh chheng-chòe Pó͘ phòa-khiah--ê, kap Koh siu-lí lō͘, hō͘ lâng khiā-khí--ê.

13你若對安歇日禁止你ê腳，tī我ê聖日無做家己所歡喜ê，稱安歇日做thang歡喜ê，稱耶和華ê聖日做thang尊重ê；亦koh尊敬伊，無辦家己ê私事，無thàn家己ê私意，無講私khia話；Lí nā tùi an-hioh-ji̍t kìm-chí lí ê kha, tī Góa ê sèng-ji̍t bô chòe ka-kī só͘ hoaⁿ-hí--ê, chheng an-hioh-ji̍t chòe thang hoaⁿ-hí--ê, chheng Iâ-hô-hoa ê sèng-ji̍t chòe thang chun-tiōng--ê; ia̍h koh chun-kèng i, bô pān ka-kī ê su-sū, bô thàn ka-kī ê su-ì, bô kóng su-khia ōe;

14你就beh因為耶和華來歡喜；我beh hō͘你上到地上高ê所在；koh用你ê祖雅各ê產業養飼你；這是耶和華親嘴講ê。lí chiū beh in-ūi Iâ-hô-hoa lâi hoaⁿ-hí; Góa beh hō͘ lí chiūⁿ kàu tōe-chiūⁿ koâiⁿ ê só͘-chāi; koh ēng lí ê chó͘ Ngá-kok ê sán-gia̍p iúⁿ-chhī lí; che sī Iâ-hô-hoa chhin-chhùi kóng ê.

1看ah，耶和華ê手m̄是短，bōe能拯救；耳孔m̄是重，bōe能聽。Khòaⁿ ah, Iâ-hô-hoa ê chhiú m̄-sī té, bōe-ōe chín-kiù; hī-khang m̄-sī tāng, bōe-ōe thiaⁿ.

2就是lín ê罪過hō͘ lín kap上帝隔斷，lín ê罪惡hō͘祂對lín掩面，無聽。Chiū-sī lín ê chōe-kòa hō͘ lín kap Siōng-tè keh-tn̄g, lín ê chōe-ok hō͘ I tùi lín ng-bīn, bô thiaⁿ.

3因為lín ê手bak-tio̍h血，lín ê指頭á bak-tio̍h罪惡，lín ê嘴唇講白賊，lín ê舌講出pháiⁿ話。In-ūi lín ê chhiú bak--tio̍h huih, lín ê chńg-thâu-á bak-tio̍h chōe-ok, lín ê chhùi-tûn kóng pe̍h-chha̍t, lín ê chi̍h kóng-chhut pháiⁿ-ōe.

4無人用公義來稟明，無人照誠實來辯護；lóng是óa靠虛假，講白賊；所懷孕ê是殘害，所生ê是邪癖。Bô lâng ēng kong-gī lâi pín-bêng, bô lâng chiàu sêng-si̍t lâi piān-hō͘; lóng sī óa-khò hu-ké, kóng pe̍h-chha̍t; só͘ hoâi-īn--ê sī chân-hāi, só͘ siⁿ--ê sī siâ-phiah.

5In孵毒蛇ê卵，kiⁿ蜘蛛網，人食伊ê卵的確死，chit-ê卵若踏破的確出惡蛇。In pū to̍k-chôa ê nn̄g, kiⁿ ti-tu bāng, lâng chia̍h i ê nn̄g tek-khak sí, chit ê nn̄g nā ta̍h-phòa tek-khak chhut ok-chôa.

6In所kiⁿ ê網bōe能成做衣服，in所做ê bōe能家己遮蓋；in所行ê lóng是罪惡，in ê手所做ê lóng是強暴。In só͘ kiⁿ ê bāng bōe-ōe chiâⁿ-chòe i-ho̍k, in só͘-chòe--ê bōe-ōe ka-kī jia-khàm; in só͘-kiâⁿ--ê lóng sī chōe-ok, in ê chhiú só͘ chòe--ê lóng sī kiông-pō.

7In ê腳走來行pháiⁿ，in緊緊beh流無罪ê人ê血；in ê念頭lóng是邪癖ê念頭；所經過ê大路，lóng是拋荒毀滅。In ê kha cháu lâi kiâⁿ-pháiⁿ, in kín-kín beh lâu bô-chōe ê lâng ê huih; in ê liām-thâu lóng sī siâ-phiah ê liām-thâu; só͘ keng-kè ê tōa-lō͘, lóng sī pha-hng húi-bia̍t.

8平安ê路in m̄知，所行ê路徑無有公平；in為tio̍h本身造彎曲ê路，見若行伊ê，lóng bōe曉得平安。Pêng-an ê lō͘ in m̄-chai, só͘ kiâⁿ ê lō͘-kèng bô ū kong-pêng; in ūi-tio̍h pún-sin chō oan-khiau ê lō͘, kìⁿ-nā kiâⁿ-i--ê, lóng bōe hiáu-tit pêng-an.

9因為án-ni，公平離開阮遠遠，公義追阮無tio̍h；阮ǹg望光亮，反tńg是烏暗；ǹg望光明，反tńg行tī暗中。In-ūi án-ni, kong-pêng lī-khui goán hn̄g-hn̄g, kong-gī tui goán bô-tio̍h; goán ǹg-bāng kng-liāng, hoán-tńg sī o͘-àm; ǹg-bāng kng-bêng, hoán-tńg kiâⁿ tī àm-tiong.

10阮摸牆，óa壁，親像chhiⁿ-mî人；阮四界摸，親像無目睭ê人；阮日中晝顛顛倒倒，親像黃昏ê時一樣；阮tī勇壯ê人ê中間；親像死人一樣。Goán bong chhiûⁿ, óa piah, chhin-chhiūⁿ chhiⁿ-mî lâng; goán sì-kòe bong, chhin-chhiūⁿ bô ba̍k-chiu ê lâng; goán ji̍t-tiong-tàu tian-tian tó-tó, chhin-chhiūⁿ hông-hun ê sî chi̍t-iūⁿ; goán tī ióng-chòng ê lâng ê tiong-kan; chhin-chhiūⁿ sí-lâng chi̍t-iūⁿ.

11阮哮親像熊，哀哀chhan親像ka-chui；ǹg望公平，總是lóng無；ǹg望救恩，總是離開阮遠遠。Goán háu chhin-chhiūⁿ hîm, ai-ai-chhan chhin-chhiūⁿ ka-chui; ǹg-bāng kong-pêng, chóng-sī lóng bô; ǹg-bāng kiù-un, chóng-sī lī-khui goán hn̄g-hn̄g.

12阮ê過失tī你ê面前加添chōe-chōe，罪惡做干證告阮；罪過kap阮相kap tī-teh，論到阮ê罪過，阮lóng知；Goán ê kè-sit tī Lí ê bīn-chêng ke-thiⁿ chōe-chōe, chōe-ok chòe kan-chèng kò goán; chōe-kòa kap goán saⁿ-kap tī-teh, lūn-kàu goán ê chōe-kòa, goán lóng chai;

13就是悖逆m̄認耶和華，oat倒tńg m̄-tè阮ê上帝，講出制壓kap悖逆ê話，心想白賊話，就續講出。chiū-sī pōe-ge̍k m̄-jīn Iâ-hô-hoa, oat-tò-tńg m̄-tè goán ê Siōng-tè, kóng-chhut chè-ap kap pōe-ge̍k ê ōe, sim siūⁿ pe̍h-chha̍t ōe, chiū sòa kóng-chhut.

14Koh公平轉tńg退後，公義khiā tī遠遠；誠實跋倒tī街路，正直亦bōe進入。Koh kong-pêng choán-tńg thè-āu, kong-gī khiā tī hn̄g-hn̄g; sêng-si̍t poa̍h-tó tī ke-lō͘, chèng-ti̍t ia̍h bōe chìn ji̍p.

15誠實少少；離開pháiⁿ-ê反tńg成做受搶ê物；hit時耶和華看見，因為無公義，就不止無歡喜。Sêng-si̍t chió-chió; lī-khui pháiⁿ--ê hoán-tńg chiâⁿ-chòe siū-chhiúⁿ ê mi̍h; hit-sî Iâ-hô-hoa khòaⁿ-kìⁿ, in-ūi bô kong-gī, chiū put-chí bô hoaⁿ-hí.

16伊看無人拯救，無人替求，不止gông-ngia̍h；就用家己ê手來救家己；用伊ê公義扶持本身。I khòaⁿ bô lâng chín-kiù, bô lâng thòe-kiû, put-chí gông-ngia̍h; chiū ēng ka-kī ê chhiú lâi kiù ka-kī; ēng I ê kong-gī hû-chhî pún-sin.

17伊用公義做盔甲來穿，用拯救做頭盔來戴；用報仇讎做衣服來穿，用熱心做外袍來moa。I ēng kong-gī chòe khoe-kah lâi chhēng, ēng chín-kiù chòe thâu-khoe lâi tì; ēng pò kiû-siû chòe i-ho̍k lâi chhēng, ēng jia̍t-sim chòe gōa-phàu lâi moa.

18伊beh照in ê行做來報應，受氣伊ê對敵，報應伊ê仇讎；對眾海嶼行報應。I beh chiàu in ê kiâⁿ-chòe lâi pò-èng, siū-khì I ê tùi-te̍k, pò-èng I ê kiû-siû; tùi chèng hái-sū kiâⁿ pò-èng.

19Án-ni人tùi日落ê所在beh敬畏耶和華ê名；tùi日出ê地方，亦beh敬畏祂ê榮光；因為祂beh來，親像緊流ê河水，是耶和華ê氣所催逼ê。Án-ni lâng tùi ji̍t-lo̍h ê só͘-chāi beh kèng-ùi Iâ-hô-hoa ê miâ; tùi ji̍t-chhut ê tōe-hng, ia̍h beh kèng-ùi I ê êng-kng; in-ūi I beh lâi, chhin-chhiūⁿ kín-lâu ê hô-chúi, sī Iâ-hô-hoa ê khì só͘ chhui-pek--ê.

20Beh有一位救贖ê主來到錫安，亦到雅各族中離開過失ê人hia；這是耶和華講ê。Beh ū chi̍t-ūi kiù-sio̍k ê chú lâi kàu Sek-an, ia̍h kàu Ngá-kok cho̍k-tiong lī-khui kè-sit ê lâng hia; che sī Iâ-hô-hoa kóng--ê.

21耶和華講，論到我，我kap in所立ê約就是án-ni；我ê神tī你ê頂面ê，我ê話，我所hē tī你ê嘴ê，無beh離開你ê嘴，無離開你ê kiáⁿ孫ê嘴，亦無離開你ê kiáⁿ-kiáⁿ孫孫ê嘴，tùi-taⁿ到永遠；這是耶和華講ê。Iâ-hô-hoa kóng, Lūn-kàu Góa, Góa kap in só͘ li̍p ê iok chiū-sī án-ni; Góa ê Sîn tī lí ê téng-bīn--ê, Góa ê ōe, Góa só͘ hē tī lí ê chhùi--ê, bô beh lī-khui lí ê chhùi, bô lī-khui lí ê kiáⁿ-sun ê chhùi, ia̍h bô lī-khui lí ê kiáⁿ-kiáⁿ sun-sun ê chhùi, tùi-taⁿ kàu éng-oán; che sī Iâ-hô-hoa kóng--ê.