1你tio̍h大聲喉叫，m̄-thang限止，出大聲親像pûn哨角，對我ê百姓講明in ê過失，對雅各ê家講明in ê罪惡。Lí tio̍h tōa-siaⁿ âu-kiò, m̄-thang hān-chí, chhut tōa-siaⁿ chhin-chhiūⁿ pûn sàu-kak, tùi Góa ê peh-sìⁿ kóng-bêng in ê kè-sit, tùi Ngá-kok ê ke kóng-bêng in ê chōe-ok.

2In日日chhē我，歡喜知我ê道路，親像行義ê百姓，無離開in ê上帝ê法律；in求我照公義ê審判，歡喜親近上帝。In ji̍t-ji̍t chhē Góa, hoaⁿ-hí chai Góa ê tō-lō͘, chhin-chhiūⁿ kiâⁿ-gī ê peh-sìⁿ, bô lī-khui in ê Siōng-tè ê hoat-lu̍t; in kiû Góa chiàu kong-gī ê sím-phòaⁿ, hoaⁿ-hí chhin-kūn Siōng-tè.

3In講，阮禁食，你啥事無看見？阮刻苦阮ê心，你啥事m̄知ah？看ah，lín禁食ê日，iáu-kú家己安樂，強迫人kā lín做苦工。In kóng, Goán kìm-chia̍h, Lí siáⁿ-sū bô khòaⁿ-kìⁿ? goán khek-khó͘ goán ê sim, Lí siáⁿ-sū m̄-chai ah? Khòaⁿ ah, lín kìm-chia̍h ê ji̍t, iáu-kú ka-kī an-lo̍k, kiông-pek lâng kā lín chòe khó͘-kang.

4看ah，lín禁食是beh相爭，相冤家，用兇惡ê拳頭母phah人；lín今á日禁食，bōe能hō͘ lín ê聲聽到頂面。Khòaⁿ ah, lín kìm-chia̍h sī beh saⁿ-chiⁿ, saⁿ oan-ke, ēng hiong-ok ê kûn-thâu-bú phah--lâng; lín kin-á-ji̍t kìm-chia̍h, bōe-ōe hō͘ lín ê siaⁿ thiaⁿ kàu téng-bīn.

5Chit款ê禁食，kiám是我所揀，hō͘人刻苦伊ê心ê日mah？Kiám是hō͘人俯頭親像蘆竹，用麻布kap火灰鋪tī伊ê身軀下mah？這kiám thang稱做禁食hō͘耶和華所歡喜ê日mah？Chit-khoán ê kìm-chia̍h, kiám-sī Góa só͘ kéng, hō͘ lâng khek-khó͘ i ê sim ê ji̍t mah? Kiám-sī hō͘ lâng àⁿ-thâu chhin-chhiūⁿ lô͘-tek, ēng môa-pò͘ kap hé-hu pho͘ tī i ê seng-khu-ē mah? che kiám thang chheng chòe kìm-chia̍h hō͘ Iâ-hô-hoa só͘ hoaⁿ-hí ê ji̍t mah?

6我所揀ê禁食，kiám-m̄是tháu開兇惡ê索，tháu放背擔ê索，hō͘受制壓ê得tio̍h自由，kòng折一切ê擔mah？Góa só͘ kéng ê kìm-chia̍h, kiám-m̄-sī tháu-khui hiong-ok ê soh, tháu-pàng pē-taⁿ ê soh, hō͘ siū chè-ap-ê tit-tio̍h chū-iû, kòng-chi̍h it-chhè ê taⁿ mah?

7Kiám-m̄是將你ê米糧分hō͘ iau餓ê人，將四界流ê sòng-hiong人接納tī你ê家？看見thǹg-pak-theh ê人hō͘伊穿，tùi家己ê骨肉亦無閃去bih mah？Kiám-m̄-sī chiong lí ê bí-niû pun hō͘ iau-gō ê lâng, chiong sì-kòe liû ê sòng-hiong lâng chiap-la̍p tī lí ê ke? khòaⁿ-kìⁿ thǹg-pak-theh ê lâng hō͘ i chhēng, tùi ka-kī ê kut-jio̍k ia̍h bô siám-khì bih mah?

8Án-ni，你ê光beh發出親像天光早ê光，你ê傷beh緊緊得tio̍h好；你ê公義beh行tī你ê頭前；耶和華ê榮光beh做你後面ê保護。Án-ni, lí ê kng beh hoat-chhut chhin-chhiūⁿ thiⁿ-kng-chá ê kng, lí ê siong beh kín-kín tit-tio̍h hó; lí ê kong-gī beh kiâⁿ tī lí ê thâu-chêng; Iâ-hô-hoa ê êng-kng beh chòe lí āu-bīn ê pó-hō͘.

9Hit時你求叫，耶和華beh聽你；你懇求，伊beh講，我tī-chia。你若對你中間除去重ê擔，kap kí-to̍h人ê指頭á，以及lām-sám講ê話；Hit-sî lí kiû-kiò, Iâ-hô-hoa beh thiaⁿ lí; lí khún-kiû, I beh kóng, Góa tī-chia. Lí nā tùi lí tiong-kan tû--khì tāng ê taⁿ, kap kí-to̍h-lâng ê chńg-thâu-á, í-ki̍p lām-sám kóng ê ōe;

10你ê心若憐憫iau餓ê人，hō͘困苦ê人得tio̍h滿足，你ê光就beh tī烏暗中發現，你ê烏暗beh變親像日中晝。lí ê sim nā lîn-bín iau-gō ê lâng, hō͘ khùn-khó͘ ê lâng tit-tio̍h móa-chiok, lí ê kng chiū beh tī o͘-àm-tiong hoat-hiān, lí ê o͘-àm beh pìⁿ chhin-chhiūⁿ ji̍t-tiong-tàu.

11耶和華亦beh常常引chhōa你，tī炕旱ê地，hō͘你心滿意足，骨頭勇壯；你beh親像灌ak ê園，koh親像流bōe乾ê水泉。Iâ-hô-hoa ia̍h beh siông-siông ín-chhōa lí, tī khòng-hān ê tōe, hō͘ lí sim-móa ì-chiok, kut-thâu ióng-chòng; lí beh chhin-chhiūⁿ koàn-ak ê hn̂g, koh chhin-chhiūⁿ lâu-bōe-ta ê chúi-chôaⁿ.

12Hiah-ê對你出ê人，beh起造久久已經荒廢ê所在；你beh建立歷代毀壞ê地基；你beh稱做補破隙ê，kap koh修理路，hō͘人khiā起ê。Hiah-ê tùi lí chhut ê lâng, beh khí-chō kú-kú í-keng hong-hòe ê só͘-chāi; lí beh kiàn-li̍p le̍k-tāi húi-hoāi ê tōe-ki; lí beh chheng-chòe Pó͘ phòa-khiah--ê, kap Koh siu-lí lō͘, hō͘ lâng khiā-khí--ê.

13你若對安歇日禁止你ê腳，tī我ê聖日無做家己所歡喜ê，稱安歇日做thang歡喜ê，稱耶和華ê聖日做thang尊重ê；亦koh尊敬伊，無辦家己ê私事，無thàn家己ê私意，無講私khia話；Lí nā tùi an-hioh-ji̍t kìm-chí lí ê kha, tī Góa ê sèng-ji̍t bô chòe ka-kī só͘ hoaⁿ-hí--ê, chheng an-hioh-ji̍t chòe thang hoaⁿ-hí--ê, chheng Iâ-hô-hoa ê sèng-ji̍t chòe thang chun-tiōng--ê; ia̍h koh chun-kèng i, bô pān ka-kī ê su-sū, bô thàn ka-kī ê su-ì, bô kóng su-khia ōe;

14你就beh因為耶和華來歡喜；我beh hō͘你上到地上高ê所在；koh用你ê祖雅各ê產業養飼你；這是耶和華親嘴講ê。lí chiū beh in-ūi Iâ-hô-hoa lâi hoaⁿ-hí; Góa beh hō͘ lí chiūⁿ kàu tōe-chiūⁿ koâiⁿ ê só͘-chāi; koh ēng lí ê chó͘ Ngá-kok ê sán-gia̍p iúⁿ-chhī lí; che sī Iâ-hô-hoa chhin-chhùi kóng ê.

1看ah，耶和華ê手m̄是短，bōe能拯救；耳孔m̄是重，bōe能聽。Khòaⁿ ah, Iâ-hô-hoa ê chhiú m̄-sī té, bōe-ōe chín-kiù; hī-khang m̄-sī tāng, bōe-ōe thiaⁿ.

2就是lín ê罪過hō͘ lín kap上帝隔斷，lín ê罪惡hō͘祂對lín掩面，無聽。Chiū-sī lín ê chōe-kòa hō͘ lín kap Siōng-tè keh-tn̄g, lín ê chōe-ok hō͘ I tùi lín ng-bīn, bô thiaⁿ.

3因為lín ê手bak-tio̍h血，lín ê指頭á bak-tio̍h罪惡，lín ê嘴唇講白賊，lín ê舌講出pháiⁿ話。In-ūi lín ê chhiú bak--tio̍h huih, lín ê chńg-thâu-á bak-tio̍h chōe-ok, lín ê chhùi-tûn kóng pe̍h-chha̍t, lín ê chi̍h kóng-chhut pháiⁿ-ōe.

4無人用公義來稟明，無人照誠實來辯護；lóng是óa靠虛假，講白賊；所懷孕ê是殘害，所生ê是邪癖。Bô lâng ēng kong-gī lâi pín-bêng, bô lâng chiàu sêng-si̍t lâi piān-hō͘; lóng sī óa-khò hu-ké, kóng pe̍h-chha̍t; só͘ hoâi-īn--ê sī chân-hāi, só͘ siⁿ--ê sī siâ-phiah.

5In孵毒蛇ê卵，kiⁿ蜘蛛網，人食伊ê卵的確死，chit-ê卵若踏破的確出惡蛇。In pū to̍k-chôa ê nn̄g, kiⁿ ti-tu bāng, lâng chia̍h i ê nn̄g tek-khak sí, chit ê nn̄g nā ta̍h-phòa tek-khak chhut ok-chôa.

6In所kiⁿ ê網bōe能成做衣服，in所做ê bōe能家己遮蓋；in所行ê lóng是罪惡，in ê手所做ê lóng是強暴。In só͘ kiⁿ ê bāng bōe-ōe chiâⁿ-chòe i-ho̍k, in só͘-chòe--ê bōe-ōe ka-kī jia-khàm; in só͘-kiâⁿ--ê lóng sī chōe-ok, in ê chhiú só͘ chòe--ê lóng sī kiông-pō.

7In ê腳走來行pháiⁿ，in緊緊beh流無罪ê人ê血；in ê念頭lóng是邪癖ê念頭；所經過ê大路，lóng是拋荒毀滅。In ê kha cháu lâi kiâⁿ-pháiⁿ, in kín-kín beh lâu bô-chōe ê lâng ê huih; in ê liām-thâu lóng sī siâ-phiah ê liām-thâu; só͘ keng-kè ê tōa-lō͘, lóng sī pha-hng húi-bia̍t.

8平安ê路in m̄知，所行ê路徑無有公平；in為tio̍h本身造彎曲ê路，見若行伊ê，lóng bōe曉得平安。Pêng-an ê lō͘ in m̄-chai, só͘ kiâⁿ ê lō͘-kèng bô ū kong-pêng; in ūi-tio̍h pún-sin chō oan-khiau ê lō͘, kìⁿ-nā kiâⁿ-i--ê, lóng bōe hiáu-tit pêng-an.

9因為án-ni，公平離開阮遠遠，公義追阮無tio̍h；阮ǹg望光亮，反tńg是烏暗；ǹg望光明，反tńg行tī暗中。In-ūi án-ni, kong-pêng lī-khui goán hn̄g-hn̄g, kong-gī tui goán bô-tio̍h; goán ǹg-bāng kng-liāng, hoán-tńg sī o͘-àm; ǹg-bāng kng-bêng, hoán-tńg kiâⁿ tī àm-tiong.

10阮摸牆，óa壁，親像chhiⁿ-mî人；阮四界摸，親像無目睭ê人；阮日中晝顛顛倒倒，親像黃昏ê時一樣；阮tī勇壯ê人ê中間；親像死人一樣。Goán bong chhiûⁿ, óa piah, chhin-chhiūⁿ chhiⁿ-mî lâng; goán sì-kòe bong, chhin-chhiūⁿ bô ba̍k-chiu ê lâng; goán ji̍t-tiong-tàu tian-tian tó-tó, chhin-chhiūⁿ hông-hun ê sî chi̍t-iūⁿ; goán tī ióng-chòng ê lâng ê tiong-kan; chhin-chhiūⁿ sí-lâng chi̍t-iūⁿ.

11阮哮親像熊，哀哀chhan親像ka-chui；ǹg望公平，總是lóng無；ǹg望救恩，總是離開阮遠遠。Goán háu chhin-chhiūⁿ hîm, ai-ai-chhan chhin-chhiūⁿ ka-chui; ǹg-bāng kong-pêng, chóng-sī lóng bô; ǹg-bāng kiù-un, chóng-sī lī-khui goán hn̄g-hn̄g.

12阮ê過失tī你ê面前加添chōe-chōe，罪惡做干證告阮；罪過kap阮相kap tī-teh，論到阮ê罪過，阮lóng知；Goán ê kè-sit tī Lí ê bīn-chêng ke-thiⁿ chōe-chōe, chōe-ok chòe kan-chèng kò goán; chōe-kòa kap goán saⁿ-kap tī-teh, lūn-kàu goán ê chōe-kòa, goán lóng chai;

13就是悖逆m̄認耶和華，oat倒tńg m̄-tè阮ê上帝，講出制壓kap悖逆ê話，心想白賊話，就續講出。chiū-sī pōe-ge̍k m̄-jīn Iâ-hô-hoa, oat-tò-tńg m̄-tè goán ê Siōng-tè, kóng-chhut chè-ap kap pōe-ge̍k ê ōe, sim siūⁿ pe̍h-chha̍t ōe, chiū sòa kóng-chhut.

14Koh公平轉tńg退後，公義khiā tī遠遠；誠實跋倒tī街路，正直亦bōe進入。Koh kong-pêng choán-tńg thè-āu, kong-gī khiā tī hn̄g-hn̄g; sêng-si̍t poa̍h-tó tī ke-lō͘, chèng-ti̍t ia̍h bōe chìn ji̍p.

15誠實少少；離開pháiⁿ-ê反tńg成做受搶ê物；hit時耶和華看見，因為無公義，就不止無歡喜。Sêng-si̍t chió-chió; lī-khui pháiⁿ--ê hoán-tńg chiâⁿ-chòe siū-chhiúⁿ ê mi̍h; hit-sî Iâ-hô-hoa khòaⁿ-kìⁿ, in-ūi bô kong-gī, chiū put-chí bô hoaⁿ-hí.

16伊看無人拯救，無人替求，不止gông-ngia̍h；就用家己ê手來救家己；用伊ê公義扶持本身。I khòaⁿ bô lâng chín-kiù, bô lâng thòe-kiû, put-chí gông-ngia̍h; chiū ēng ka-kī ê chhiú lâi kiù ka-kī; ēng I ê kong-gī hû-chhî pún-sin.

17伊用公義做盔甲來穿，用拯救做頭盔來戴；用報仇讎做衣服來穿，用熱心做外袍來moa。I ēng kong-gī chòe khoe-kah lâi chhēng, ēng chín-kiù chòe thâu-khoe lâi tì; ēng pò kiû-siû chòe i-ho̍k lâi chhēng, ēng jia̍t-sim chòe gōa-phàu lâi moa.

18伊beh照in ê行做來報應，受氣伊ê對敵，報應伊ê仇讎；對眾海嶼行報應。I beh chiàu in ê kiâⁿ-chòe lâi pò-èng, siū-khì I ê tùi-te̍k, pò-èng I ê kiû-siû; tùi chèng hái-sū kiâⁿ pò-èng.

19Án-ni人tùi日落ê所在beh敬畏耶和華ê名；tùi日出ê地方，亦beh敬畏祂ê榮光；因為祂beh來，親像緊流ê河水，是耶和華ê氣所催逼ê。Án-ni lâng tùi ji̍t-lo̍h ê só͘-chāi beh kèng-ùi Iâ-hô-hoa ê miâ; tùi ji̍t-chhut ê tōe-hng, ia̍h beh kèng-ùi I ê êng-kng; in-ūi I beh lâi, chhin-chhiūⁿ kín-lâu ê hô-chúi, sī Iâ-hô-hoa ê khì só͘ chhui-pek--ê.

20Beh有一位救贖ê主來到錫安，亦到雅各族中離開過失ê人hia；這是耶和華講ê。Beh ū chi̍t-ūi kiù-sio̍k ê chú lâi kàu Sek-an, ia̍h kàu Ngá-kok cho̍k-tiong lī-khui kè-sit ê lâng hia; che sī Iâ-hô-hoa kóng--ê.

21耶和華講，論到我，我kap in所立ê約就是án-ni；我ê神tī你ê頂面ê，我ê話，我所hē tī你ê嘴ê，無beh離開你ê嘴，無離開你ê kiáⁿ孫ê嘴，亦無離開你ê kiáⁿ-kiáⁿ孫孫ê嘴，tùi-taⁿ到永遠；這是耶和華講ê。Iâ-hô-hoa kóng, Lūn-kàu Góa, Góa kap in só͘ li̍p ê iok chiū-sī án-ni; Góa ê Sîn tī lí ê téng-bīn--ê, Góa ê ōe, Góa só͘ hē tī lí ê chhùi--ê, bô beh lī-khui lí ê chhùi, bô lī-khui lí ê kiáⁿ-sun ê chhùi, ia̍h bô lī-khui lí ê kiáⁿ-kiáⁿ sun-sun ê chhùi, tùi-taⁿ kàu éng-oán; che sī Iâ-hô-hoa kóng--ê.

1起來ah，發出光；因為你ê光已經到，耶和華ê榮光發現，照tī你ê頂面。Khí-lâi ah, hoat-chhut kng; in-ūi lí ê kng í-keng kàu, Iâ-hô-hoa ê êng-kng hoat-hiān, chiò tī lí ê téng-bīn.

2看ah，烏暗beh蓋全地，烏烏暗暗遮蓋列國；總是耶和華beh發現照你，祂ê榮光beh出現tī你ê身上。Khòaⁿ ah, o͘-àm beh khàm choân-tōe, o͘-o͘ àm-àm jia-khàm lia̍t-kok; chóng-sī Iâ-hô-hoa beh hoat-hiān chiò lí, I ê êng-kng beh chhut-hiān tī lí ê sin-chiūⁿ.

3列國beh來就近你ê光，君王beh來就近你發現ê大光。Lia̍t-kok beh lâi chiū-kūn lí ê kng, kun-ông beh lâi chiū-kūn lí hoat-hiān ê tōa-kng.

4你kia̍h目看四方，in lóng聚集來你chia；你ê眾kiáⁿ tùi遠遠來，你ê眾cha-bó͘-kiáⁿ亦beh hō͘人抱來。Lí kia̍h-ba̍k khòaⁿ sì-hng, in lóng chū-chi̍p lâi lí chia; lí ê chèng-kiáⁿ tùi hn̄g-hn̄g lâi, lí ê chèng cha-bó͘-kiáⁿ ia̍h beh hō͘ lâng phō--lâi.

5Hit時你看見就有榮光，你ê心大gông-ngia̍h，大開闊；因為大海豐盛ê財物beh轉tńg來歸你，列國ê財寶亦beh來歸你。Hit-sî lí khòaⁿ-kìⁿ chiū ū êng-kng, lí ê sim tōa gông-ngia̍h, tōa khui-khoah; in-ūi tōa-hái hong-sēng ê châi-bu̍t beh choán-tńg lâi kui lí, lia̍t-kok ê châi-pó ia̍h beh lâi kui lí.

6Kui陣ê駱駝，kap米甸以及Í-hoat單陵ê駱駝，beh遍滿你ê境內；Sī-pa ê眾人lóng beh到；beh帶黃金乳香來，亦beh報傳耶和華ê名聲。Kui-tīn ê lo̍k-tô, kap Bí-tiân í-ki̍p Í-hoat toaⁿ-niā ê lo̍k-tô, beh piàn-móa lí ê kéng-lāi; Sī-pa ê chèng-lâng lóng beh kàu; beh tòa n̂g-kim jú-hiuⁿ lâi, ia̍h beh pò-thoân Iâ-hô-hoa ê miâ-siaⁿ.

7Ki-ta̍t ê羊群lóng beh聚集到你chia，Nî-pâi-iok公ê綿羊beh做你ê路用，tī我ê壇頂beh得tio̍h接納；我榮光ê厝，我beh榮光伊。Ki-ta̍t ê iûⁿ-kûn lóng beh chū-chi̍p kàu lí chia, Nî-pâi-iok kang ê mî-iûⁿ beh chòe lí ê lō͘-ēng, tī Góa ê tôaⁿ-téng beh tit-tio̍h chiap-la̍p; Góa êng-kng ê chhù, Góa beh êng-kng--i.

8Hiah-ê飛來親像雲，koh親像鴿飛來伊ê siū-ê，是是誰 ah？Hiah-ê pe--lâi chhin-chhiūⁿ hûn, koh chhin-chhiūⁿ kap pe--lâi i ê siū--ê, sī chī-chūi ah?

9Chiah-ê海嶼beh thèng候我；Tha-si ê船隻beh做頭，將你ê眾kiáⁿ，連in ê金銀，tùi遠遠做一下帶來，lóng為tio̍h耶和華你ê上帝ê名，koh為tio̍h以色列ê聖ê，因為祂已經榮光你。Chiah ê hái-sū beh thèng-hāu Góa; Tha-si ê chûn-chiah beh chòe-thâu, chiong lí ê chèng-kiáⁿ, liân in ê kim-gûn, tùi hn̄g-hn̄g chòe chi̍t-ē tòa--lâi, lóng ūi-tio̍h Iâ-hô-hoa lí ê Siōng-tè ê miâ, koh ūi-tio̍h Í-sek-lia̍t ê Sèng--ê, in-ūi I í-keng êng-kng lí.

10外邦人beh起你ê城牆，in ê王beh服事你；我bat受氣phah你，taⁿ beh施恩憐憫你。Gōa-pang lâng beh khí lí ê siâⁿ-chhiûⁿ, in ê ông beh ho̍k-sāi lí; Góa bat siū-khì phah lí, taⁿ beh si-un lîn-bín lí.

11你ê城門beh常常開，日暝無關，hō͘人將列國ê財寶帶來歸你，亦將in ê君王牽來。Lí ê siâⁿ-mn̂g beh siông-siông khui, ji̍t-mî bô koaiⁿ, hō͘ lâng chiong lia̍t-kok ê châi-pó tòa lâi kui lí, ia̍h chiong in ê kun-ông khan--lâi.

12因為見若百姓kap國m̄服事你ê beh滅無；hiah-ê百姓beh全然荒廢。In-ūi kìⁿ-nā peh-sìⁿ kap kok m̄ ho̍k-sāi lí--ê beh bia̍t-bô; hiah ê peh-sìⁿ beh choân-jiân hong-hòe.

13黎巴嫩ê榮光，就是榕樹，衫樹，黃楊樹，lóng beh相kap歸你，為tio̍h beh裝飾我ê聖所；我亦beh hō͘我腳踏ê所在得tio̍h榮光。Lī-pa-lùn ê êng-kng, chiū-sī chhêng-chhiū, sam-chhiū, n̂g-iông-chhiū, lóng beh saⁿ-kap kui lí, ūi-tio̍h beh chng-thāⁿ Góa ê sèng-só͘; Góa ia̍h beh hō͘ Góa kha-ta̍h ê só͘-chāi tit-tio̍h êng-kng.

14平素苦楚你ê，in ê kiáⁿ孫lóng beh到你ê面前俯腰；看輕你ê lóng beh tī你ê腳下跪拜；in beh稱你做耶和華ê城，做以色列ê聖ê ê錫安。Pêng-sò͘ khó͘-chhó͘ lí--ê, in ê kiáⁿ-sun lóng beh kàu lí ê bīn-chêng àⁿ-io; khòaⁿ-khin lí--ê lóng beh tī lí ê kha-ē kūi-pài; in beh chheng lí chòe Iâ-hô-hoa ê siâⁿ, chòe Í-sek-lia̍t ê Sèng--ê ê Sek-an.

15你前受放sak，受厭惡，甚至無人經過，taⁿ我beh hō͘你變做永遠ê榮華，成做歷代ê喜樂。Lí chêng siū pàng-sak, siū iàm-ò͘ⁿ, sīm-chì bô lâng keng-kè, taⁿ Góa beh hō͘ lí pìⁿ-chòe éng-oán ê êng-hôa, chiâⁿ-chòe le̍k-tāi ê hí-lo̍k.

16你beh食萬國ê奶，koh suh chiah-ê君王ê奶頭；就知我耶和華是你ê救主，是救贖你ê主，雅各ê大權能ê。Lí beh chia̍h bān-kok ê lin, koh suh chiah ê kun-ông ê lin-thâu; chiū chai Góa Iâ-hô-hoa sī lí ê Kiù-chú, sī kiù-sio̍k lí ê Chú, Ngá-kok ê tōa koân-lêng--ê.

17我beh帶金來替銅，帶銀來替鐵，銅來替柴，鐵來替石；亦beh用和平做你ê官長，用公義做你ê監督。Góa beh tòa kim lâi thòe tâng, tòa gûn lâi thòe thih, tâng lâi thòe chhâ, thih lâi thòe chio̍h; ia̍h beh ēng hô-pêng chòe lí ê koaⁿ-tiúⁿ, ēng kong-gī chòe lí ê kam(**kàm)-tok.

18你ê地方無koh聽見強暴，境內無koh聽見拋荒毀滅ê事；你beh稱你ê牆做拯救，稱你ê門做O-ló。Lí ê tōe-hng bô koh thiaⁿ-kìⁿ kiông-pō, kéng-lāi bô koh thiaⁿ-kìⁿ pha-hng húi-bia̍t ê sū; lí beh chheng lí ê chhiûⁿ chòe Chín-kiù, chheng lí ê mn̂g chòe O-ló.

19日頭無koh做你日時ê光，月亦無koh發光照你；因為耶和華beh做你永遠ê光，你ê上帝beh做你ê榮耀。Ji̍t-thâu bô koh chòe lí ji̍t--sî ê kng, ge̍h ia̍h bô koh hoat-kng chiò lí; in-ūi Iâ-hô-hoa beh chòe lí éng-oán ê kng, lí ê Siōng-tè beh chòe lí ê êng-iāu.

20你ê日頭無koh落，你ê月亦無kiu無去；因為耶和華beh做你永遠ê光，你悲哀ê日亦明白lah。Lí ê ji̍t-thâu bô koh lo̍h, lí ê ge̍h ia̍h bô kiu-bô--khì; in-ūi Iâ-hô-hoa beh chòe lí éng-oán ê kng, lí pi-ai ê ji̍t ia̍h bêng-pe̍k lah.

21你ê百姓lóng成做義人，永遠得tio̍h地做業；是我所種ê樹栽，我ê手所做ê，hō͘我得tio̍h榮光。Lí ê peh-sìⁿ lóng chiâⁿ-chòe gī-lâng, éng-oán tit-tio̍h tōe chòe-gia̍p; sī Góa só͘ chèng ê chhiū-chai, Góa ê chhiú só͘-chòe--ê, hō͘ Góa tit-tio̍h êng-kng.

22至細ê beh成做一千，極卑微ê beh成做強ê國；我耶和華beh照定tio̍h ê期，緊緊成伊。Chì-sòe--ê beh chiâⁿ-chòe chi̍t-chheng, ke̍k pi-bî--ê beh chiâⁿ-chòe kiông ê kok; Góa Iâ-hô-hoa beh chiàu tiāⁿ-tio̍h ê kî, kín-kín chiâⁿ i.