1我beh為tio̍h我所親疼ê唱歌，是我所疼ê ê歌，論伊ê葡萄園。我所親疼ê有葡萄園；tī真肥ê山頭。Góa beh ūi-tio̍h góa só͘ chhin-thiàⁿ--ê chhiùⁿ-koa, sī góa só͘-thiàⁿ--ê ê koa, lūn i ê phû-tô-hn̂g. Góa só͘ chhin-thiàⁿ-ê ū phû-tô-hn̂g; tī chin pûi ê soaⁿ-thâu.

2伊開墾hit-ê園，除去石頭，栽上等ê葡萄樹，tī園內起一座樓，koh掘酒窟tī-hia，ǹg望結好ê葡萄，無phah算結野葡萄。I khai-khún hit ê hn̂g, tû-khì chio̍h-thâu, chai siōng-téng ê phû-tô-chhiū, tī hn̂g-lāi khí chi̍t chō lâu, koh ku̍t chiú-khut tī-hia, ǹg-bāng kiat hó ê phû-tô, bô phah-sǹg kiat iá phû-tô.

3Lín khiā起耶路撒冷ê，kap猶大人ah，taⁿ請lín tī我kap我ê葡萄園中，判斷tio̍h m̄-tio̍h。Lín khiā-khí Iâ-lō͘-sat-léng--ê, kap Iû-tāi lâng ah, taⁿ chhiáⁿ lín tī góa kap góa ê phû-tô-hn̂g tiong, phòaⁿ-toàn tio̍h m̄-tio̍h.

4我為我ê葡萄園所做ê以外，iáu有甚麼thang做ah？我ǹg望結好ê葡萄，怎樣反tńg結野葡萄ah？Góa ūi Góa ê phû-tô-hn̂g só͘-chòe-ê í-gōa, iáu ū sím-mi̍h thang chòe ah? Góa ǹg-bāng kiat hó ê phû-tô, cháiⁿ-iūⁿ hoán-tńg kiat iá phû-tô ah?

5Taⁿ我kā lín講我beh對我ê葡萄園怎樣行；我beh拆去籬笆，hō͘伊受吞滅；拆毀圍牆，hō͘伊受thún踏。Taⁿ Góa kā lín kóng Góa beh tùi Góa ê phû-tô-hn̂g cháiⁿ-iūⁿ kiâⁿ; Góa beh thiah--khì lî-pa, hō͘ i siū thun-bia̍t; thiah-húi ûi-chhiûⁿ, hō͘ i siū thún-ta̍h.

6我beh hō͘伊荒廢，無koh修整，無koh 耡剷(thû-thóaⁿ)；反tńg發刺á kap蒺藜；我也beh命令雲無落雨tī伊ê頂面。Góa beh hō͘ i hong-hòe, bô koh siu-chéng, bô koh thû-thóaⁿ; hoán-tńg hoat chhì-á kap chi̍t-lê; Góa iā beh bēng-lēng hûn bô lo̍h-hō͘ tī i ê téng-bīn.

7因為萬軍ê耶和華ê葡萄園就是以色列家；伊所歡喜ê樹就是猶大人；伊所ǹg望ê是公平，反tńg有暴虐；所ǹg望ê是公義，反tńg有叫冤枉。In-ūi bān-kun ê Iâ-hô-hoa ê phû-tô-hn̂g chiū-sī Í-sek-lia̍t-ke; I só͘ hoaⁿ-hí ê chhiū chiū-sī Iû-tāi lâng; I só͘ ǹg-bāng--ê sī kong-pêng, hoán-tńg ū pō-gio̍k; só͘ ǹg-bāng--ê sī kong-gī, hoán-tńg ū kiò oan-óng.

8有災厄ah，hiah-ê用厝接厝，用田接田，致到無留空地ê；chhun lín家己khiā hit-ê境內。Ū chai-ē ah, hiah-ê ēng chhù chiap chhù, ēng chhân chiap chhân, tì-kàu bô lâu khàng-tōe--ê; chhun lín ka-kī khiā hit ê kéng-lāi.

9我親耳聽見萬軍ê耶和華講，的確有chōe-chōe大koh súi ê厝宅成做拋荒，無人khiā起。Góa chhin-hī thiaⁿ-kìⁿ bān-kun ê Iâ-hô-hoa kóng, Tek-khak ū chōe-chōe tōa koh súi ê chhù-the̍h chiâⁿ-chòe pha-hng, bô lâng khiā-khí.

10三十畝ê葡萄園只有出一pa-te̍k ê酒；一hō-mûi-jíⁿ ê種子只有收成一i-hoat ê米糧。Saⁿ-cha̍p bó͘ ê phû-tô-hn̂g chí-ū chhut chi̍t pa-te̍k ê chiú; chi̍t hō-mûi-jíⁿ ê chéng-chí chí-ū siu-sêng chi̍t i-hoat ê bí-niû.

11災厄ah，hiah-ê透早起來，放縱lim厚酒，直直到暝深，甚至到因為酒發狂。Chai-ē ah, hiah-ê thàu-chá khí-lâi, hòng-chhiòng lim kāu-chiú, ti̍t-ti̍t kàu mî chhim, sīm-chì kàu in-ūi chiú hoat-kông.

12In tī筵桌彈琴彈瑟、phah鼓、pûn笛á、lim酒，無想tio̍h耶和華ê所行，亦無留心伊ê手所做ê。In tī iân-toh tôaⁿ-khîm tôaⁿ-sek, phah-kó͘, pûn-ta̍t-á, lim-chiú, bô siūⁿ--tio̍h Iâ-hô-hoa ê só͘-kiâⁿ, ia̍h bô liû-sim I ê chhiú só͘-chòe-ê.

13所以我ê百姓因為無知受人掠去；in尊貴ê人真iau餓，kui陣ê百姓極其嘴乾。Só͘-í Góa ê peh-sìⁿ in-ūi bû-ti siū lâng lia̍h-khì; in chun-kùi ê lâng chin iau-gō, kui-tīn ê peh-sìⁿ ke̍k-kî chhùi-ta.

14因為陰間闊大伊ê所ài，開伊無限量ê嘴；in ê榮光，in ê眾人，in ê奢華，kap in中間快樂ê人，lóng落tī hit內面。In-ūi im-kan khoah-tōa i ê só͘ ài, khui i bô hān-liōng ê chhùi; in ê êng-kng, in ê chèng-lâng, in ê chhia-hôa, kap in tiong-kan khoài-lo̍k ê lâng, lóng lo̍h tī hit lāi-bīn.

15卑賤ê屈落，尊貴ê降低，目頭高ê人也降低；Pi-chiān--ê khut-lo̍h, chun-kùi--ê kàng-kē, ba̍k-thâu koâiⁿ ê lâng iā kàng-kē;

16只有萬軍ê耶和華tùi審判來尊做高，聖ê上帝tùi公義顯明做聖。chí ū bān-kun ê Iâ-hô-hoa tùi sím-phòaⁿ lâi chun-chòe koâiⁿ, sèng ê Siōng-tè tùi kong-gī hián-bêng chòe-sèng.

17Hit時羊á beh來食草親像tī家己ê草場；富人拋荒ê所在，出外人beh食伊。Hit-sî iûⁿ-á beh lâi chia̍h-chháu chhin-chhiūⁿ tī ka-kī ê chháu-tiûⁿ; pù-lâng pha-hng ê só͘-chāi, chhut-gōa lâng beh chia̍h i.

18有災厄ah，用虛假做索來引罪惡，koh親像用拖車ê索來khiú罪過。Ū chai-ē ah, ēng hu-ké chòe soh lâi ín chōe-ok, koh chhin-chhiūⁿ ēng thoa-chhia ê soh lâi khiú chōe-kòa.

19In講，願伊緊緊行，快快成伊ê所做，hō͘阮看見；願以色列ê聖ê所計畫ê逼óa來，hō͘阮知。In kóng, Goān I kín-kín kiâⁿ, khoài-khoài chiâⁿ I ê só͘-chòe, hō͘ goán khòaⁿ-kìⁿ; goān Í-sek-lia̍t ê Sèng--ê só͘ kè-e̍k--ê pek-óa lâi, hō͘ goán chai.

20有災厄ah，hiah-ê稱pháiⁿ做好，稱好做pháiⁿ，用暗做光，用光做暗，用苦做甜，用甜做苦ê。Ū chai-ē ah, hiah-ê chheng pháiⁿ chòe hó, chheng hó chòe pháiⁿ, ēng àm chòe kng, ēng kng chòe àm, ēng khó͘ chòe tiⁿ, ēng tiⁿ chòe khó͘ ê.

21有災厄ah，hiah-ê家己看做有智慧，家己看做通達ê。Ū chai-ē ah, hiah-ê ka-kī khòaⁿ-chòe ū tì-hūi, ka-kī khòaⁿ-chòe thong-ta̍t--ê.

22有災厄ah，hiah-ê勇敢tī lim酒，用能力調和厚酒ê。Ū chai-ē ah, hiah-ê ióng-kám tī lim-chiú, ēng lêng-le̍k tiau-hô kāu-chiú--ê.

23In因為受pò͘賂就稱pháiⁿ人做義，將義人ê義kā伊搶去。In in-ūi siū pò͘-lō͘ chiū chheng pháiⁿ-lâng chòe gī, chiong gī-lâng ê gī kā i chhiúⁿ--khì.

24所以親像火舌燒稻稿，乾草落tī火燄中，親像án-ni in ê根beh親像朽爛ê物，in ê花beh親像塵埃飛起來；因為in棄sak萬軍ê耶和華ê教示，看輕以色列ê聖ê ê話。Só͘-í chhin-chhiūⁿ hé-chi̍h sio tiū-kó, ta-chháu lo̍h tī hé-iām-tiong, chhin-chhiūⁿ án-ni in ê kun beh chhin-chhiūⁿ hiú-nōa ê mi̍h, in ê hoe beh chhin-chhiūⁿ tîn-ai pe--khí-lâi; in-ūi in khì-sak bān-kun ê Iâ-hô-hoa ê kà-sī, khòaⁿ-khin Í-sek-lia̍t ê Sèng--ê ê ōe.

25所以耶和華ê受氣對伊ê百姓發作，伊ê手伸出攻擊來phah in；chiah-ê山嶺就搖choah，in ê身屍tī街市親像糞土。雖然án-ni伊ê受氣iáu未消，伊ê手iáu 伸teh。Só͘-í Iâ-hô-hoa ê siū-khì tùi I ê peh-sìⁿ hoat-choh, I ê chhiú chhun-chhut kong-kek lâi phah in; chiah ê soaⁿ-niá chiū iô-choah, in ê sin-si tī koe-chhī chhin-chhiūⁿ pùn-thô͘. Sui-jiân án-ni I ê siū-khì iáu-bē siau, I ê chhiú iáu chhun--teh.

26伊beh出旗號，招遠遠ê百姓，出口號叫in tùi地極來；看ah，in beh緊緊走來。I beh chhut kî-hō, chio hn̄g-hn̄g ê peh-sìⁿ, chhut kháu-hō kiò in tùi tōe-ke̍k lâi; khòaⁿ ah, in beh kín-kín cháu--lâi.

27其中無有厭倦ê，無有跋倒ê，無有tuh眠ê，無有睏ê，腰帶也無放鬆，鞋帶也無phah斷。Kî-tiong bô ū ià-siān--ê, bô ū poa̍h-tó--ê, bô ū tuh-bîn--ê, bô ū khùn--ê, io-tòa iā bô pàng-sang, ôe-tòa iā bô phah-tn̄g.

28In ê箭真利，弓也piⁿ-ân；馬蹄親像tēng ê石，車輪親像捲螺風。In ê chìⁿ chin-lāi, keng iā piⁿ-ân; bé-tôe chhin-chhiūⁿ tēng ê chio̍h, chhia-lûn chhin-chhiūⁿ kńg-lê-hong.

29In beh哮親像母ê獅，亦親像細隻獅teh哮；in beh hm̄-hm̄哮，來la̍k in所咬ê物，拖到穩當ê所在，無人會救倒tńg。In beh háu chhin-chhiūⁿ bú ê sai, ia̍h chhin-chhiūⁿ sòe-chiah sai teh háu; in beh hm̄-hm̄-háu, lâi la̍k in só͘ kā ê mi̍h, thoa-kàu ún-tàng ê só͘-chāi, bô lâng ōe kiù tò-tńg.

30Hit日in beh對in hm̄-hm̄哮，親像海hōa-hōa哮；人若看落地，就看見有烏暗艱苦，光明tī雲內變做烏暗。Hit-ji̍t in beh tùi in hm̄-hm̄-háu, chhin-chhiūⁿ hái hōa-hōa-háu; lâng nā khòaⁿ lo̍h tōe, chiū khòaⁿ-kìⁿ ū o͘-àm kan-khó͘, kng-bêng tī hûn-lāi pìⁿ-chòe o͘-àm.

1當O͘-se-a王死hit年，我看見主坐tī高高ê寶座，伊ê衣服垂落滿殿。Tng O͘-se-a ông sí hit-nî, góa khòaⁿ-kìⁿ Chú chē tī koâiⁿ-koâiⁿ ê pó-chō, I ê i-ho̍k sûi-lo̍h móa-tiān.

2Tī伊ê頂面有se-la̍h兵跟隨teh khiā；各有六個翼，用兩個翼遮面，兩個翼遮腳，兩個翼teh飛。Tī I ê téng-bīn ū se-la̍h-peng kun-sûi teh khiā; kok ū la̍k ê si̍t, ēng nn̄g ê si̍t jia-bīn, nn̄g ê si̍t jia-kha, nn̄g ê si̍t teh-pe.

3Chit-ê唱，hit-ê和，講，聖哉，聖哉，聖哉，萬軍ê耶和華；伊ê榮光充滿全地。Chit-ê chhiùⁿ, hit-ê hō, kóng, Sèng--chài, sèng--chài, sèng--chài, bān-kun ê Iâ-hô-hoa; I ê êng-kng chhiong-móa choân-tōe.

4門框因為唱和ê聲來振動；殿就有煙雲滿滿。Mn̂g-kheng in-ūi chhiùⁿ-hō ê siaⁿ lâi tín-tāng; tiān chiū ū ian-hûn móa-móa.

5Hit時我講，我有災厄ah，我滅無lah；因為我是嘴唇無清氣ê人，koh tiàm tī嘴唇無清氣ê百姓中；因為我目睭有看見王，萬軍ê耶和華。Hit-sî góa kóng, Góa ū chai-ē ah, góa bia̍t-bô lah; in-ūi góa sī chhùi-tûn bô chheng-khì ê lâng, koh tiàm tī chhùi-tûn bô chheng-khì ê peh-sìⁿ tiong; in-ūi góa ba̍k-chiu ū khòaⁿ-kìⁿ Ông, bān-kun ê Iâ-hô-hoa.

6有一個se-la̍h兵飛來óa我，伊ê手the̍h熱熱ê炭，是用火擒tùi壇頂the̍h來ê。Ū chi̍t ê se-la̍h-peng pe--lâi óa góa, i ê chhiú the̍h jia̍t-jia̍t ê thòaⁿ, sī ēng hé-khîⁿ tùi tôaⁿ-téng the̍h--lâi-ê.

7將炭hē tī我ê嘴，講，看ah，chit-ê hē tī你ê嘴唇，你ê罪過就除去，你ê罪惡就赦免。Chiong thòaⁿ hē tī góa ê chhùi, kóng, Khòaⁿ ah, chit-ê hē tī lí ê chhùi-tûn, lí ê chōe-kòa chiū tû--khì, lí ê chōe-ok chiū sià-bián.

8我koh聽見主ê聲講，我thang差是誰 ah？是誰 beh為阮去？我就講，我tī-chia，thang差我。Góa koh thiaⁿ-kìⁿ Chú ê siaⁿ kóng, Góa thang chhe chī-chūi ah? chī-chūi beh ūi Goán khì? Góa chiū kóng, Góa tī-chia, thang chhe góa.

9伊講，你去kā chit-ê百姓講，Lín聽是beh聽，總是bōe明白；看是beh看，總是bōe曉得。I kóng, Lí khì kā chit ê peh-sìⁿ kóng, Lín thiaⁿ sī beh thiaⁿ, chóng-sī bōe bêng-pe̍k; khòaⁿ sī beh khòaⁿ, chóng-sī bōe hiáu--tit.

10Hō͘ chit-ê百姓心鈍，耳孔重，目睭khoeh密；免得in用目睭看見，用耳孔聽見，心曉悟，oa̍t倒tńg來得tio̍h醫好。Hō͘ chit ê peh-sìⁿ sim tūn, hī-khang tāng, ba̍k-chiu khoeh-ba̍t; bián-tit in ēng ba̍k-chiu khòaⁿ-kìⁿ, ēng hī-khang thiaⁿ-kìⁿ, sim hiáu-ngō͘, oa̍t-tò-tńg lâi tit-tio̍h i-hó.

11我就講，主ah，這beh jōa久ah？祂講，到chiah-ê城拋荒，無人khiā起，厝內無人，土地極其拋荒；Góa chiū kóng, Chú ah, che beh jōa-kú ah? I kóng, Kàu chiah ê siâⁿ pha-hng, bô lâng khiā-khí, chhù-lāi bô lâng, thó͘-tōe ke̍k-kî pha-hng;

12koh到耶和華遷徙hiah-ê人到遠遠，chit-ê地chōe-chōe放下teh。koh kàu Iâ-hô-hoa chhian-sóa hiah ê lâng kàu hn̄g-hn̄g, chit ê tōe chōe-chōe pàng-hē teh.

13Tī hit中間若iáu chhun十份ê一份，亦beh受吞滅，親像栗樹橡樹，雖然剉起來，總是樹頭iáu留teh；án-ni有chit-ê聖ê後裔，就是hit-ê樹頭。Tī hit tiong-kan nā iáu chhun cha̍p-hūn ê chi̍t-hūn, ia̍h beh siū thun-bia̍t, chhin-chhiūⁿ lek-chhiū siōng-chhiū, sui-jiân chhò--khí-lâi, chóng-sī chhiū-thâu iáu lâu-teh; án-ni ū chit ê sèng ê hō͘-è, chiū-sī hit ê chhiū-thâu.

1O͘-se-a ê孫，Iok-thán ê kiáⁿ，猶大王A-hap-su坐位ê時，A-lân王Lī-sìn，kap以色列王Lī-má-lī ê kiáⁿ Pí-ka，上來攻擊耶路撒冷，總是攻bōe破。O͘-se-a ê sun, Iok-thán ê kiáⁿ, Iû-tāi ông A-hap-su chē-ūi ê sî, A-lân ông Lī-sìn, kap Í-sek-lia̍t ông Lī-má-lī ê kiáⁿ Pí-ka, chiūⁿ-lâi kong-kek Iâ-lō͘-sat-léng, chóng-sī kong bōe-phòa.

2有人kā大衛ê家講，A-lân kap Í-hoat-liân已經會盟；王ê心kap百姓ê心lóng搖動，親像樹林內ê樹hō͘風吹振動一樣。Ū lâng kā Tāi-pi̍t ê ke kóng, A-lân kap Í-hoat-liân í-keng hōe-bêng; ông ê sim kap peh-sìⁿ ê sim lóng iô-tāng, chhin-chhiūⁿ chhiū-nâ-lāi ê chhiū hō͘ hong chhe tín-tāng chi̍t-iūⁿ.

3耶和華對以賽亞講，Taⁿ你kap你ê kiáⁿ Si-a-ngá-su̍t出去到頂ê池ê水溝口，tī漂布師傅ê田ê大路，迎接A-hap-su；Iâ-hô-hoa tùi Í-sài-a kóng, Taⁿ lí kap lí ê kiáⁿ Si-a-ngá-su̍t chhut-khì kàu téng ê tî ê chúi-kau-kháu, tī phiò-pò͘ sai-hū ê chhân ê tōa-lō͘, ngiâ-chih A-hap-su;

4對伊講，你tio̍h謹慎安靜；莫得因為chit兩支出煙ê火把頭，就是A-lân ê Lī-sìn kap Lī-má-lī ê kiáⁿ，Lia̍t ê受氣來驚惶失膽。tùi i kóng, Lí tio̍h kín-sīn an-chēng; bo̍h-tit in-ūi chí(**chit) nn̄g-ki chhut-ian ê hé-pé-thâu, chiū-sī A-lân ê Lī-sìn kap Lī-má-lī ê kiáⁿ, lia̍t ê siū-khì lâi kiaⁿ-hiâⁿ sit-táⁿ.

5因為A-lân kap Í-hoat-liân kap Lī-má-lī ê kiáⁿ設pháiⁿ ê計謀害你，In-ūi A-lân kap Í-hoat-liân kap Lī-má-lī ê kiáⁿ siat pháiⁿ ê kè-bô͘ hāi lí,

6講，咱tio̍h上來去，攻擊猶大，擾亂伊，攻破伊，tī伊ê中間設立Tha-pí-le̍k ê kiáⁿ做王。kóng, Lán tio̍h chiūⁿ-lâi khì, kong-kek Iû-tāi, jiáu-loān i, kong-phòa i, tī i ê tiong-kan siat-li̍p Tha-pí-le̍k ê kiáⁿ chòe ông.

7主耶和華講，chit-ê計謀bōe建立，亦bōe成。Chú Iâ-hô-hoa kóng, Chit ê kè-bô͘ bōe kiàn-li̍p, ia̍h bōe sêng.

8因為大馬色做A-lân ê頭，Lī-sìn做大馬色ê頭；tī六十五年內，Í-hoat-liân的確破壞，致到bōe成做國。In-ūi Tāi-má-sek chòe A-lân ê thâu, Lī-sìn chòe Tāi-má-sek ê thâu; tī la̍k-cha̍p-gō͘ nî lāi, Í-hoat-liân tek-khak phò-hoāi, tì-kàu bōe chiâⁿ chòe kok.

9Koh撒馬利亞做Í-hoat-liân ê頭，Lī-má-lī ê kiáⁿ做撒馬利亞ê頭；設使lín m̄信，就的確bōe能khiā在。Koh Sat-má-lī-a chòe Í-hoat-liân ê thâu, Lī-má-lī ê kiáⁿ chòe Sat-má-lī-a ê thâu; siat-sú lín m̄-sìn, chiū tek-khak bōe-ōe khiā-chāi.

10耶和華koh吩咐A-hap-su講，Iâ-hô-hoa koh hoan-hù A-hap-su kóng,

11你tio̍h對耶和華你ê上帝求一個兆頭；thang求伊tī深淵á是極高ê天。Lí tio̍h tùi Iâ-hô-hoa lí ê Siōng-tè kiû chi̍t ê tiāu-thâu; thang kiû i tī chhim-ian á-sī ke̍k-koâiⁿ ê thiⁿ.

12A-hap-su講，我m̄求，亦m̄試耶和華。A-hap-su kóng, Góa m̄-kiû, ia̍h m̄-chhì Iâ-hô-hoa.

13以賽亞講，大衛ê家ah，lín tio̍h聽；lín hō͘人為難，kiám算做小khóa事，亦beh hō͘我ê上帝為難mah？Í-sài-a kóng, Tāi-pi̍t ê ke ah, lín tio̍h thiaⁿ; lín hō͘ lâng ûi-lân, kiám sǹg-chòe sió-khóa sū, ia̍h beh hō͘ góa ê Siōng-tè ûi-lân mah?

14因為án-ni，主本身beh hō͘ lín一個兆頭；看ah，有在室女beh懷孕生kiáⁿ，kā伊號名叫以馬內利。In-ūi án-ni, Chú pún-sin beh hō͘ lín chi̍t ê tiāu-thâu; khòaⁿ ah, ū chāi-sek-lú beh hoâi-īn siⁿ-kiáⁿ, kā i hō-miâ kiò Í-má-lōe-lī.

15到伊會曉得放sak pháiⁿ，揀好ê時，伊chiah beh食奶油kap蜜。Kàu i ōe hiáu-tit pàng-sak pháiⁿ, kéng hó ê sî, i chiah beh chia̍h lin-iû kap bi̍t.

16因為tī chit-ê gín-ná iáu未曉得放sak pháiⁿ揀好ê事先，你所驚 ê hit兩個王ê地beh tú-tio̍h放sak。In-ūi tī chit ê gín-ná iáu-bē hiáu-tit pàng-sak pháiⁿ kéng hó ê tāi-seng, lí só͘ kiaⁿ ê hit nn̄g ê ông ê tōe beh tú-tio̍h pàng-sak.

17耶和華beh hō͘患難ê日臨到你kap你ê百姓，以及你老父ê家，tùi Í-hoat-liân離開猶大以來，bē-bat有chit號ê日，就是亞述王來。Iâ-hô-hoa beh hō͘ hoān-lān ê ji̍t lîm-kàu lí kap lí ê peh-sìⁿ, í-ki̍p lí lāu-pē ê ke, tùi Í-hoat-liân lī-khui Iû-tāi í-lâi, bē-bat ū chit-hō ê ji̍t, chiū-sī A-su̍t ông lâi.

18Hit時耶和華beh出口號，招埃及江河ê源頭ê胡蠅，以及亞述地ê蜂。Hit-sî Iâ-hô-hoa beh chhut kháu-hō, chio Ai-ki̍p kang-hô ê goân-thâu ê hô͘-sîn, í-ki̍p A-su̍t tōe ê phang.

19Lóng beh飛來，歇tī拋荒ê山谷、石縫，kap一切ê刺phè，kap一切ê草場。Lóng beh pe--lâi, hioh tī pha-hng ê soaⁿ-kok, chio̍h-phāng, kap it-chhè ê chhì-phè, kap it-chhè ê chháu-tiûⁿ.

20Hit時主beh用tùi 河外雇chhiàⁿ ê剃頭刀，就是亞述王，來剃in ê頭，kap腳ê毛；亦beh一盡khun in ê嘴鬚。Hit-sî Chú beh ēng tùi Hô-gōa kò͘-chhiàⁿ ê thì-thâu-to, chiū-sī A-su̍t ông, lâi thì in ê thâu, kap kha ê mn̂g; ia̍h beh it-chīn khun in ê chhùi-chhiu.

21Hit時一人beh飼一隻牛母，兩隻綿羊母。Hit-sî chi̍t-lâng beh chhī chi̍t chiah gû-bú, nn̄g chiah mî-iûⁿ-bú.

22因為出奶chōe，伊beh食奶油；tī境內所chhun ê人lóng beh食奶油kap蜜。In-ūi chhut lin chōe, i beh chia̍h lin-iû; tī kéng-lāi só͘ chhun ê lâng lóng beh chia̍h lin-iû kap bi̍t.

23前凡若栽一千叢ê葡萄樹，值一千銀，到hit時beh生刺phè kap蒺藜。Chêng hoān-nā chai chi̍t-chheng châng ê phû-tô-chhiū, ta̍t chi̍t-chheng gûn, kàu hit-sî beh siⁿ chhì-phè kap chi̍t-lê.

24人上去hia，tio̍h帶弓箭，因為遍地滿滿刺phè kap蒺藜。Lâng chiūⁿ--khì hia, tio̍h tòa keng-chìⁿ, in-ūi piàn-tōe móa-móa chhì-phè kap chi̍t-lê.

25所有用鋤頭掘ê山地，你因為驚刺phè kap蒺藜m̄敢上去hia，不過做放牛ê所在，做羊thún踏ê位。Só͘ ū ēng ti(**tî)-thâu ku̍t ê soaⁿ-tōe, lí in-ūi kiaⁿ chhì-phè kap chi̍t-lê m̄-káⁿ chiūⁿ--khì hia, put-kò chòe pàng-gû ê só͘-chāi, chòe iûⁿ thún-ta̍h ê ūi.