1平素未bat問我ê，taⁿ我hō͘ in問；未有chhē我ê，taⁿ我hō͘ in tú-tio̍h；未有求叫我ê名ê，我對in講，我tī-chia，我tī chia。Pêng-sò͘ bē bat mn̄g Góa--ê, taⁿ Góa hō͘ in mn̄g; bē ū chhē Góa--ê, taⁿ Góa hō͘ in tú-tio̍h; bē ū kiû-kiò Góa ê miâ--ê, Góa tùi in kóng, Góa tī-chia, Góa tī chia.

2我thong日伸手ǹg hiah-ê悖逆ê百姓；in chhut-chāi家己ê意思，行m̄好ê路。Góa thong-ji̍t chhun-chhiú ǹg hiah-ê pōe-ge̍k ê peh-sìⁿ; in chhut-chāi ka-kī ê ì-sù, kiâⁿ m̄-hó ê lō͘.

3Chiah-ê百姓常常當面惹tio̍h我ê受氣；tī園中獻祭，tī磚瓦頂燒香；Chiah ê peh-sìⁿ siông-siông tng-bīn jiá-tio̍h Góa ê siū-khì; tī hn̂g-tiong hiàn-chè, tī chng-hiā-téng sio-hiuⁿ;

4khiā起tī墓內，歇tī隱密ê所在，食豬肉，in ê器具內有可惡ê物做湯；khiā-khí tī bōng-lāi, hioh tī ún-ba̍t ê só͘-chāi, chia̍h ti-bah, in ê khì-kū-lāi ū khó-ò͘ⁿ ê mi̍h chòe thng;

5koh對人講，你tio̍h khiā開，m̄-thang óa近我，因為我比你khah聖；chiah-ê人是我鼻孔中ê火薰，是thong日teh-to̍h ê火。koh tùi lâng kóng, Lí tio̍h khiā-khui, m̄-thang óa-kūn góa, in-ūi góa pí lí khah-sèng; chiah ê lâng sī Góa phīⁿ-khang-tiong ê hé-hun, sī thong-ji̍t teh-to̍h ê hé.

6看ah，這lóng寫tī我ê面前；我無beh靜靜，的確beh行報應，報應tī in ê胸前。Khòaⁿ ah, che lóng siá tī Góa ê bīn-chêng; Góa bô-beh chēng-chēng, tek-khak beh kiâⁿ pò-èng, pò-èng tī in ê heng-chêng.

7耶和華講，因為lín ê罪惡，kap lín ê列祖ê罪惡，tī山裡燒香，tī嶺頂褻瀆我；所以我beh照in平素所行ê，報應tī in ê胸前。Iâ-hô-hoa kóng, In-ūi lín ê chōe-ok, kap lín ê lia̍t-chó͘ ê chōe-ok, tī soaⁿ--nih sio-hiuⁿ, tī niá-téng siat-to̍k Góa; só͘-í Góa beh chiàu in pêng-sò͘ só͘-kiâⁿ--ê, pò-èng tī in ê heng-chêng.

8耶和華án-ni講，親像tī葡萄pha內tú-tio̍h有新酒，有人講，M̄-thang毀壞，因為有福氣tī hit內面，我因為我chiah-ê奴僕ê緣故，亦beh照án-ni來行，無beh一盡滅in。Iâ-hô-hoa án-ni kóng, Chhin-chhiūⁿ tī phû-tô-pha-lāi tú-tio̍h ū sin-chiú, ū lâng kóng, M̄-thang húi-hoāi, in-ūi ū hok-khì tī hit lāi-bīn, Góa in-ūi Góa chiah ê lô͘-po̍k ê iân-kò͘, ia̍h beh chiàu án-ni lâi kiâⁿ, bô beh it-chīn bia̍t in.

9我beh tùi雅各ê中間chhōa出後裔，tùi猶大ê中間chhōa出承接我ê眾山ê；我揀ê百姓beh承接伊，我chiah-ê奴僕beh tī-hia khiā起。Góa beh tùi Ngá-kok ê tiong-kan chhōa-chhut hō͘-è, tùi Iû-tāi ê tiong-kan chhōa-chhut sêng-chiap Góa ê chèng-soaⁿ--ê; Góa kéng ê peh-sìⁿ beh sêng-chiap--i, Góa chiah ê lô͘-po̍k beh tī-hia khiā-khí.

10Sa-lûn beh成做飼羊ê所在，A-kat ê山谷beh成做牛群倒teh睏ê所在；lóng是beh hō͘ chhē我ê百姓所得tio̍h。Sa-lûn beh chiâⁿ-chòe chhī-iûⁿ ê só͘-chāi, A-kat ê soaⁿ-kok beh chiâⁿ-chòe gû-kûn tó teh-khùn ê só͘-chāi; lóng sī beh hō͘ chhē Góa ê peh-sìⁿ só͘ tit-tio̍h.

11總是lín chiah-ê放sak耶和華，bōe記得我ê聖山，kā Ka-tek辦桌，kā Bí-nî灌奠調和ê酒ê；Chóng-sī lín chiah-ê pàng-sak Iâ-hô-hoa, bōe-kì-tit Góa ê sèng-soaⁿ, kā Ka-tek pān-toh, kā Bí-nî koàn-tiān tiau-hô ê chiú--ê;

12我beh註定lín歸tī刀下，lóng beh屈身受thâi；因為我叫，lín無應，我講話，lín無聽thàn；反tńg行我目睭中看做pháiⁿ ê，揀我所無歡喜ê。Góa beh chù-tiāⁿ lín kui tī to-ē, lóng beh khut-sin siū-thâi; in-ūi Góa kiò, lín bô ìn, Góa kóng-ōe, lín bô thiaⁿ-thàn; hoán-tńg kiâⁿ Góa ba̍k-chiu-tiong khòaⁿ-chòe pháiⁿ ê, kéng Góa só͘ bô hoaⁿ-hí--ê.

13所以主耶和華án-ni講，看ah，我ê奴僕beh食，lín beh iau；看ah，我ê奴僕beh lim，lín beh嘴乾；看ah，我ê奴僕beh歡喜，lín beh見笑。Só͘-í Chú Iâ-hô-hoa án-ni kóng, Khòaⁿ ah, Góa ê lô͘-po̍k beh chia̍h, lín beh iau; khòaⁿ ah, Góa ê lô͘-po̍k beh lim, lín beh chhùi-ta; khòaⁿ ah, Góa ê lô͘-po̍k beh hoaⁿ-hí, lín beh kiàn-siàu.

14看ah，我ê奴僕，因為心快樂，出歡喜ê聲，lín beh因為心憂愁哀哭，koh因為心神憂傷哀哮。Khòaⁿ ah, Góa ê lô͘-po̍k, in-ūi sim khoài-lo̍k, chhut hoaⁿ-hí ê siaⁿ, lín beh in-ūi sim iu-chhiû ai-khàu, koh in-ūi sim-sîn iu-siong ai-háu.

15Lín beh留lín ê名，hō͘我揀ê百姓kí伊來咒詛；主耶和華beh thâi lín；另外用新ê名稱祂ê奴僕。Lín beh lâu lín ê miâ, hō͘ Góa kéng ê peh-sìⁿ kí i lâi chiù-chó͘; Chú Iâ-hô-hoa beh thâi lín; lēng-gōa ēng sin ê miâ chheng I ê lô͘-po̍k.

16Án-ni tī地上為家己求福氣ê，beh ǹg真實ê上帝求福氣；tī地上來chiù-chōa-ê，beh kí真實ê上帝來chiù-chōa；因為早前ê患難已經bōe記得，亦tùi我ê目睭前khǹg密。Án-ni tī tōe-chiūⁿ ūi ka-kī kiû hok-khì-ê, beh ǹg chin-si̍t ê Siōng-tè kiû hok-khì; tī tōe-chiūⁿ lâi chiù-chōa--ê, beh kí chin-si̍t ê Siōng-tè lâi chiù-chōa; in-ūi chá-chêng ê hoān-lān í-keng bōe-kì-tit, ia̍h tùi Góa ê ba̍k-chiu-chêng khǹg-ba̍t.

17看ah，我創造新天新地，以前ê事無koh記念，亦無koh追想。Khòaⁿ ah, Góa chhòng-chō sin-thiⁿ sin-tōe, í-chêng ê sū bô koh kì-liām, ia̍h bô koh tui-siūⁿ.

18Lín tio̍h因為我所創造ê來永遠歡喜快樂；因為我創造耶路撒冷做歡喜ê，創造伊ê百姓做快樂ê。Lín tio̍h in-ūi Góa só͘ chhòng-chō--ê lâi éng-oán hoaⁿ-hí khoài-lo̍k; in-ūi Góa chhòng-chō Iâ-lō͘-sat-léng chòe hoaⁿ-hí--ê, chhòng-chō i ê peh-sìⁿ chòe khoài-lo̍k--ê.

19我beh因為耶路撒冷來歡喜，因為我ê百姓來快樂；其中的確無koh聽見啼哭ê聲，kap哀哮ê聲。Góa beh in-ūi Iâ-lō͘-sat-léng lâi hoaⁿ-hí, in-ūi Góa ê peh-sìⁿ lâi khoài-lo̍k; kî-tiong tek-khak bô koh thiaⁿ-kìⁿ thî-khàu ê siaⁿ, kap ai-háu ê siaⁿ.

20其中的確無有幾日á死去ê嬰á，亦無有歲壽無滿足ê老人；因為一百歲死ê，iáu算是gín-ná，一百歲死ê罪人，iáu-kú是受咒詛ê。Kî-tiong tek-khak bô ū kúi-ji̍t-á sí-khì ê eⁿ-á, ia̍h bô ū hè-siū bô móa-chiok ê lāu-lâng; in-ūi chi̍t-pah hè sí--ê, iáu-sǹg sī gín-ná, chi̍t-pah hè sí ê chōe-jîn, iáu-kú sī siū chiù-chó͘ ê.

21In beh起厝，家己khiā起；栽種葡萄園來食伊ê果子。In beh khí-chhù, ka-kī khiā-khí; chai-chèng phû-tô-hn̂g lâi chia̍h i ê ké-chí.

22In無beh起造，hō͘別人khiā伊；in無beh栽種，hō͘別人食伊；因為我ê百姓ê日子beh親像樹ê日子；我揀ê百姓親手tio̍h磨得tio̍h-ê beh久長享受伊。In bô beh khí-chō, hō͘ pa̍t-lâng khiā i; in bô beh chai-chèng, hō͘ pa̍t-lâng chia̍h i; in-ūi Góa ê peh-sìⁿ ê ji̍t-chí beh chhin-chhiūⁿ chhiū ê ji̍t-chí; Góa kéng ê peh-sìⁿ chhin-chhiú tio̍h-bôa tit-tio̍h-ê beh kú-tn̂g hióng-siū i.

23In的確無空空tio̍h磨，所生ê亦無tú-tio̍h災害；因為in lóng是得tio̍h耶和華賜福ê ê後裔，in ê kiáⁿ孫亦beh kap伊有份。In tek-khak bô khang-khang tio̍h-bôa, só͘-siⁿ--ê ia̍h bô tú-tio̍h chai-hāi; in-ūi in lóng sī tit-tio̍h Iâ-hô-hoa sù-hok--ê ê hō͘-è, in ê kiáⁿ-sun ia̍h beh kap i ū-hūn.

24In iáu未求叫，我就應伊，tú-tú teh講ê時，我就聽伊。In iáu-bē kiû-kiò, Góa chiū ìn i, tú-tú teh kóng ê sî, Góa chiū thiaⁿ i.

25豺狼beh kap羊羔相kap食，獅beh食草親像牛；土粉beh做蛇ê食物。Tī我ê聖山遍地，lóng無損傷，無殘害；這是耶和華講ê。Chhâi-lông beh kap iûⁿ-ko saⁿ-kap chia̍h, sai beh chia̍h chháu chhin-chhiūⁿ gû; thô͘-hún beh chòe chôa ê chia̍h-mi̍h. Tī Góa ê sèng-soaⁿ piàn-tōe, lóng bô sún-siong, bô chân-hāi; che sī Iâ-hô-hoa kóng--ê.

1耶和華án-ni講，天是我ê座位，地是我ê腳踏椅；lín beh kā我起甚麼號ê厝？甚麼號ê所在，是做我安歇ê地方ah？Iâ-hô-hoa án-ni kóng, Thiⁿ sī Góa ê chō-ūi, tōe sī Góa ê kha-ta̍h-í; lín beh kā Góa khí sím-mi̍h hō ê chhù? sím-mi̍h hō ê só͘-chāi, sī chòe Góa an-hioh ê tōe-hng ah?

2耶和華講，Chiah-ê lóng是我ê手所創造ê，所以chiah-ê就lóng有；總是我所看顧ê，就是謙虛心痛悔，因為我ê話來ngia̍uh-ngia̍uh-chhoah ê人。Iâ-hô-hoa kóng, Chiah-ê lóng sī Góa ê chhiú só͘ chhòng-chō ê, só͘-í chiah-ê chiū lóng ū; chóng-sī Góa só͘ khòaⁿ-kò͘--ê, chiū-sī khiam-hu sim thòng-hóe, in-ūi Góa ê ōe lâi ngia̍uh-ngia̍uh-chhoah ê lâng.

3Thâi牛無各樣thâi人；獻羊無各樣kòng折狗頷頸；獻禮物無各樣獻豬血；燒乳香無各樣o-ló偶像；in揀家己ê道路，心歡喜in可惡ê事。Thâi-gû bô koh-iūⁿ thâi-lâng; hiàn iûⁿ bô koh-iūⁿ kòng-chi̍h káu ām-kún; hiàn lé-mi̍h bô koh-iūⁿ hiàn ti-huih; sio jú-hiuⁿ bô koh-iūⁿ o-ló ngó͘-siōng; in kéng ka-kī ê tō-lō͘, sim hoaⁿ-hí in khó-ò͘ⁿ ê sū.

4我亦揀迷惑in ê事，hō͘ in所驚惶ê臨到in；因為我叫，無人ìn；我講話，in無聽thàn；反tńg行我目睭中看做pháiⁿ-ê，揀我所無歡喜ê。Góa ia̍h kéng bê-he̍k in ê sū, hō͘ in só͘ kiaⁿ-hiâⁿ--ê lîm-kàu in; in-ūi Góa kiò, bô lâng ìn; Góa kóng-ōe, in bô thiaⁿ-thàn; hoán-tńg kiâⁿ Góa ba̍k-chiu-tiong khòaⁿ-chòe pháiⁿ--ê, kéng Góa só͘ bô hoaⁿ-hí--ê.

5Lín因為耶和華ê話來ngia̍uh-ngia̍uh-chhoah ê人，tio̍h聽伊ê話；Lín ê兄弟怨恨lín，因為我ê名革逐lín-ê，bat講，願耶和華得tio̍h榮光，hō͘阮得tio̍h看見lín ê歡喜；總是in beh tú-tio̍h見笑。Lín in-ūi Iâ-hô-hoa ê ōe lâi ngia̍uh-ngia̍uh-chhoah ê lâng, tio̍h thiaⁿ I ê ōe; Lín ê hiaⁿ-tī oàn-hūn lín, in-ūi Góa ê miâ kek-tio̍k lín--ê, bat kóng, Goān Iâ-hô-hoa tit-tio̍h êng-kng, hō͘ goán tit-tio̍h khòaⁿ-kìⁿ lín ê hoaⁿ-hí; chóng-sī in beh tú-tio̍h kiàn-siàu.

6有喧嘩ê聲tùi城內出，有聲tùi殿內出，就是耶和華報應祂ê對敵ê聲。Ū soan-hoa ê siaⁿ tùi siâⁿ-lāi chhut, ū siaⁿ tùi tiān-lāi chhut, chiū-sī Iâ-hô-hoa pò-èng I ê tùi-te̍k ê siaⁿ.

7錫安iáu未tú-tio̍h生kiáⁿ ê艱苦，就生產；iáu未知痛疼，就生ta-po͘-kiáⁿ。Sek-an iáu-bē tú-tio̍h siⁿ-kiáⁿ ê kan-khó͘, chiū seng-sán; iáu-bē chai thàng-thiàⁿ, chiū siⁿ ta-po͘-kiáⁿ.

8親像chit號事，是誰 bat聽見？chiah-ê事是誰 bat看見ah？kok kiám能一日來生？百姓kiám能 tiap-á久來出世？因為錫安一下tú-tio̍h生kiáⁿ ê艱苦，就生kiáⁿ兒。Chhin-chhiūⁿ chit-hō sū, chī-chūi bat thiaⁿ-kìⁿ? chiah ê sū chī-chūi bat khòaⁿ-kìⁿ ah? kok kiám-ōe chi̍t-ji̍t lâi siⁿ? peh-sìⁿ kiám-ōe tiap-á-kú lâi chhut-sì? in-ūi Sek-an chi̍t-ē tú-tio̍h siⁿ-kiáⁿ ê kan-khó͘, chiū siⁿ kiáⁿ-jî.

9耶和華講，我已經hō͘伊臨盆，kiám無hō͘伊生出mah？你ê上帝講，我hō͘人生kiáⁿ-ê，kiám關密伊ê胎mah？Iâ-hô-hoa kóng, Góa í-keng hō͘ i lîm-phûn, kiám-bô hō͘ i siⁿ-chhut mah? Lí ê Siōng-tè kóng, Góa hō͘ lâng siⁿ-kiáⁿ--ê, kiám koaiⁿ-ba̍t i ê thai mah?

10Lín chiah-ê疼耶路撒冷ê，tio̍h kap伊同快樂，為伊歡喜；lín為tio̍h伊悲哀ê，taⁿ tio̍h kap伊歡喜快樂。Lín chiah-ê thiàⁿ Iâ-lō͘-sat-léng--ê, tio̍h kap i tâng khoài-lo̍k, ūi i hoaⁿ-hí; lín ūi-tio̍h i pi-ai--ê, taⁿ tio̍h kap i hoaⁿ-hí khoài-lo̍k.

11致到lín thang suh伊ê安慰ê奶頭來得tio̍h飽；hō͘ lín得tio̍h伊豐盛ê榮光，親像chhē-tio̍h lín滿心歡喜。Tì-kàu lín thang suh i ê an-ùi ê lin-thâu lâi tit-tio̍h pá; hō͘ lín tit-tio̍h i hong-sēng ê êng-kng, chhin-chhiūⁿ chhē-tio̍h lín móa-sim hoaⁿ-hí.

12耶和華án-ni講，看ah，我beh hō͘平安開闊到tī伊，親像江河；hō͘列國ê榮光到tī伊，親像漲滿ê河；lín beh享受伊，lín beh得tio̍h抱tī身邊，搖tī腳頭u頂。Iâ-hô-hoa án-ni kóng, Khòaⁿ ah, Góa beh hō͘ pêng-an khui-khoah kàu tī i, chhin-chhiūⁿ kang-hô; hō͘ lia̍t-kok ê êng-kng kàu tī i, chhin-chhiūⁿ tiòng-móa ê hô; lín beh hióng-siū i, lín beh tit-tio̍h phō tī sin-piⁿ, iô tī kha-thâu-u-téng.

13親像人得tio̍h伊ê老母安慰伊，我亦beh án-ni安慰lín；lín亦beh tī耶路撒冷得tio̍h安慰。Chhin-chhiūⁿ lâng tit-tio̍h i ê lāu-bú an-ùi--i, Góa ia̍h beh án-ni an-ùi lín; lín ia̍h beh tī Iâ-lō͘-sat-léng tit-tio̍h an-ùi.

14Lín看見，心就快樂；lín ê骨beh得tio̍h潤澤，親像軟軟ê草一樣；koh耶和華ê手beh顯現tī祂ê奴僕；祂亦beh受氣祂ê對敵。Lín khòaⁿ-kìⁿ, sim chiū khoài-lo̍k; lín ê kut beh tit-tio̍h lūn-te̍k, chhin-chhiūⁿ nńg-nńg ê chháu chi̍t-iūⁿ; koh Iâ-hô-hoa ê chhiú beh hián-hiān tī I ê lô͘-po̍k; I ia̍h beh siū-khì I ê tùi-te̍k.

15看ah，耶和華beh tī火中降臨，伊ê車親像捲螺風，用大受氣行報應，用火焰行責罰。Khòaⁿ ah, Iâ-hô-hoa beh tī hé-tiong kàng-lîm, I ê chhia chhin-chhiūⁿ kńg-lê-hong, ēng tōa siū-khì kiâⁿ pò-èng, ēng hé-iām kiâⁿ chek-hoa̍t.

16因為耶和華beh用火用刀kap一切有血氣ê人爭戰，hō͘耶和華所thâi死ê chōe-chōe。In-ūi Iâ-hô-hoa beh ēng hé ēng to kap it-chhè ū hiat-khì ê lâng cheng-chiàn, hō͘ Iâ-hô-hoa só͘ thâi-sí-ê chōe-chōe.

17Hiah-ê分別做聖，清氣家己ê，進入tī園內，跟tè hit中間一個人ê後面，食豬肉kap可惡ê物kap老鼠；in beh做一下滅無；這是耶和華講ê。Hiah-ê hun-piat chòe-sèng, chheng-khì ka-kī--ê, chìn-ji̍p tī hn̂g-lāi, kun-tè hit tiong-kan chi̍t ê lâng ê āu-bīn, chia̍h ti-bah kap khó-ò͘ⁿ ê mi̍h kap niáu-chhú; in beh chòe chi̍t-ē bia̍t-bô; che sī Iâ-hô-hoa kóng--ê.

18因為我知in ê行做kap in ê念頭；時到我beh聚集萬百姓萬族；in beh來，beh看我ê榮光。In-ūi góa chai in ê kiâⁿ-chòe kap in ê liām-thâu; sî kàu Góa beh chū-chi̍p bān peh-sìⁿ bān-cho̍k; in beh lâi, beh khòaⁿ Góa ê êng-kng.

19我beh設記號tī in中間；逃走ê，我beh 差in到列國，就是到Tha-si、Phó͘-le̍k，開弓ê路得，kap Thó͘-pa、Ngá-oân，kap平素未有聽見我ê名聲，未有看見我ê榮光，遠遠ê海嶼；in beh將我ê榮光傳報tī列國中。Góa beh siat kì-hō tī in tiong-kan; tô-cháu--ê, Góa beh chhe in kàu lia̍t-kok, chiū-sī kàu Tha-si, Phó͘-le̍k, khui-keng ê Lō͘-tek, kap Thó͘-pa, Ngá-oân, kap pêng-sò͘ bē ū thiaⁿ-kìⁿ Góa ê miâ-siaⁿ, bē ū khòaⁿ-kìⁿ Góa ê êng-kng, hn̄g-hn̄g ê hái-sū; in beh chiong Góa ê êng-kng thoân-pò tī lia̍t-kok-tiong.

20In beh送lín ê眾兄弟tùi列國中tò來，hō͘ in有ê騎馬，有ê坐車，坐轎，騎騾，騎駱駝，到我ê聖山耶路撒冷，做禮物獻hō͘耶和華，親像以色列人用清氣ê器具貯禮物，獻tī耶和華ê厝；這是耶和華講ê。In beh sàng lín ê chèng hiaⁿ-tī tùi lia̍t-kok-tiong tò--lâi, hō͘ in ū-ê khiâ-bé, ū-ê chē-chhia, chē-kiō, khiâ-lô, khiâ lo̍k-tô, kàu Góa ê sèng-soaⁿ Iâ-lō͘-sat-léng, chòe lé-mi̍h hiàn-hō͘ Iâ-hô-hoa, chhin-chhiūⁿ Í-sek-lia̍t lâng ēng chheng-khì ê khì-kū tóe lé-mi̍h, hiàn tī Iâ-hô-hoa ê chhù; che sī Iâ-hô-hoa kóng--ê.

21耶和華講，我beh tùi in中間，取人做祭司，做利未人。Iâ-hô-hoa kóng, Góa beh tùi in tiong-kan, chhú lâng chòe chè-si, chòe Lī-bī lâng.

22耶和華講，因為我所造ê新天新地，tī我ê面前長長tī-teh；親像án-ni，lín ê後裔kap lín ê名字，亦beh長長tī-teh。Iâ-hô-hoa kóng, In-ūi Góa só͘ chō ê sin-thiⁿ sin-tōe, tī Góa ê bīn-chêng tn̂g-tn̂g tī-teh; chhin-chhiūⁿ án-ni, lín ê hō͘-è kap lín ê miâ-jī, ia̍h beh tn̂g-tn̂g tī-teh.

23Ta̍k-pái tú-tio̍h月ê初一，ta̍k-pái tú-tio̍h安歇日，見若有血氣ê，beh到我ê面前跪拜；這是耶和華講ê。Ta̍k-pái tú-tio̍h ge̍h ê chhoe-it, ta̍k-pái tú-tio̍h an-hioh-ji̍t, kìⁿ-nā ū hiat-khì--ê, beh kàu Góa ê bīn-chêng kūi-pài; che sī Iâ-hô-hoa kóng--ê.

24In beh出去看hiah-ê悖逆我ê人ê身屍；因為in ê蟲bōe死，in ê火bōe hoa；見有血氣ê lóng beh厭惡in。In beh chhut-khì khòaⁿ hiah ê pōe-ge̍k Góa ê lâng ê sin-si; in-ūi in ê thâng bōe sí, in ê hé bōe hoa; kìⁿ-ū hiat-khì--ê lóng beh iàm-ò͘ⁿ in.

1便雅憫地，A-ná-tu̍t城ê祭司中，Hi-le̍k-ka ê kiáⁿ，耶利米ê話記tī下底。Piān-ngá-bín tōe, A-ná-tu̍t siâⁿ ê chè-si tiong, Hi-le̍k-ka ê kiáⁿ, Iâ-lī-bí ê ōe kì tī ē-tóe.

2當猶大王A-bûn ê kiáⁿ約西亞坐位ê十三年，耶和華ê話臨到伊。Tng Iû-tāi ông A-bûn ê kiáⁿ Iok-se-a chē-ūi ê cha̍p-saⁿ--nî, Iâ-hô-hoa ê ōe lîm-kàu i.

3Koh tī猶大王約西亞ê kiáⁿ Iok-ngá-kèng坐位ê時，直到猶大王約西亞ê kiáⁿ Se-tí-ka十一年ê路尾；五月間，耶路撒冷人受掠ê時，耶和華ê話臨到伊。Koh tī Iû-tāi ông Iok-se-a ê kiáⁿ Iok-ngá-kèng chē-ūi ê sî, ti̍t-kàu Iû-tāi ông Iok-se-a ê kiáⁿ Se-tí-ka cha̍p-it--nî ê lō͘-bé; gō͘-ge̍h kan, Iâ-lō͘-sat-léng lâng siū-lia̍h ê sî, Iâ-hô-hoa ê ōe lîm-kàu i.

4耶和華ê話臨到我，講，Iâ-hô-hoa ê ōe lîm-kàu góa, kóng,

5我未創造你tī腹肚內ê事先，我bat你；你未出胎ê事先，我分別你做聖；設立你做列國ê先知。Góa bē chhòng-chō lí tī pak-tó͘-lāi ê tāi-seng, Góa bat lí; lí bē chhut-thai ê tāi-seng, Góa hun-piat lí chòe-sèng; siat-li̍p lí chòe lia̍t-kok ê sian-ti.

6我就講，害ah！主耶和華ah，你看，我bōe曉講，因為我是gín-ná。Góa chiū kóng, Hāi--ah! Chú Iâ-hô-hoa ah, lí khòaⁿ, góa bōe hiáu kóng, in-ūi góa sī gín-ná.

7總是耶和華對我講，你m̄-thang講，我是gín-ná；因為我見有差你，你tio̍h去；我見有吩咐你，你tio̍h講。Chóng-sī Iâ-hô-hoa tùi góa kóng, Lí m̄-thang kóng, Góa sī gín-ná; in-ūi Góa kìⁿ-ū chhe lí, lí tio̍h khì; Góa kìⁿ-ū hoan-hù lí, lí tio̍h kóng.

8你莫得驚in，因為我kap你tī-teh，beh救你；這是耶和華講ê。Lí bo̍h-tit kiaⁿ--in, in-ūi Góa kap lí tī-teh, beh kiù lí; che sī Iâ-hô-hoa kóng ê.

9耶和華就伸祂ê手摸我ê嘴。耶和華kā我講，你看，我有將我ê話，hē tī你ê嘴。Iâ-hô-hoa chiū chhun I ê chhiú bong góa ê chhùi. Iâ-hô-hoa kā góa kóng, Lí khòaⁿ, Góa ū chiong Góa ê ōe, hē tī lí ê chhùi.

10看ah，今á日我設立你tī列邦列國ê頂面；是為tio̍h beh拔出，beh拆毀，beh敗壞，beh chhia倒，beh建立，beh栽培。Khòaⁿ ah, kin-á-ji̍t Góa siat-li̍p lí tī lia̍t-pang lia̍t-kok ê téng-bīn; sī ūi-tio̍h beh pu̍ih-chhut, beh thiah-húi, beh pāi-hoāi, beh chhia-tó, beh kiàn-li̍p, beh chai-pôe.

11耶和華ê話koh臨到我講，耶利米ah，你看見甚麼？我講，我看見杏樹ê一支。Iâ-hô-hoa ê ōe koh lîm-kàu góa kóng, Iâ-lī-bí ah, lí khòaⁿ-kìⁿ sím-mi̍h? Góa kóng, Góa khòaⁿ-kìⁿ hēng-chhiū ê chi̍t-ki.

12耶和華就對我講，你所看是tio̍h；我teh關顧我ê話來成伊。Iâ-hô-hoa chiū tùi góa kóng, Lí só͘ khòaⁿ sī tio̍h; Góa teh koan-kò͘ Góa ê ōe lâi chiâⁿ--i.

13耶和華ê話第二pái臨到我講，你看見甚麼？我講，我看見一個鼎teh滾，伊ê面tùi北勢ǹg過來。Iâ-hô-hoa ê ōe tē-jī pái lîm-kàu góa kóng, Lí khòaⁿ-kìⁿ sím-mi̍h? Góa kóng, Góa khòaⁿ-kìⁿ chi̍t ê tiáⁿ teh kún, i ê bīn tùi pak--sì ǹg kè--lâi.

14耶和華就對我講，Beh有災厄tùi北方發出，臨到chit所在一切khiā起ê百姓。Iâ-hô-hoa chiū tùi góa kóng, Beh ū chai-ē tùi pak-hng hoat-chhut, lîm-kàu chit só͘-chāi it-chhè khiā-khí ê peh-sìⁿ.

15耶和華講，看ah，我beh召北方列國ê眾族；in beh來，ta̍k-ê安座位tī耶路撒冷chiah-ê城門口；周圍攻擊城牆，亦beh攻擊猶大一切ê城。Iâ-hô-hoa kóng, Khòaⁿ ah, Góa beh tiàu pak-hng lia̍t-kok ê chèng-cho̍k; in beh lâi, ta̍k-ê an chō-ūi tī Iâ-lō͘-sat-léng chiah ê siâⁿ-mn̂g-kháu; chiu-ûi kong-kek siâⁿ-chhiûⁿ, ia̍h beh kong-kek Iû-tāi it-chhè ê siâⁿ.

16論到chit-ê百姓一切ê pháiⁿ，就是離開我，ǹg別ê上帝燒香；跪拜in ê手所做ê；我beh講起我ê判斷來攻擊in。Lūn-kàu chit ê peh-sìⁿ it-chhè ê pháiⁿ, chiū-sī lī-khui Góa, ǹg pa̍t ê siōng-tè sio-hiuⁿ; kūi-pài in ê chhiú só͘ chòe--ê; Góa beh kóng-khí Góa ê phòaⁿ-toàn lâi kong-kek in.

17所以你tio̍h hâ腰，起來，將我所吩咐你一切ê話kā in講；莫得因為in來驚惶，驚了我hō͘你tī in ê面前來驚惶。Só͘-í lí tio̍h hâ-io, khí--lâi, chiong Góa só͘ hoan-hù lí it-chhè ê ōe kā in kóng; bo̍h-tit in-ūi in lâi kiaⁿ-hiâⁿ, kiaⁿ-liáu Góa hō͘ lí tī in ê bīn-chêng lâi kiaⁿ-hiâⁿ.

18看ah，因為我今á日hō͘你成做堅固ê城，做鐵柱，做銅牆，來抵擋全地，以及猶大ê列王、貴族、祭司，kap chit所在ê眾百姓。Khòaⁿ ah, in-ūi Góa kin-á-ji̍t hō͘ lí chiâⁿ-chòe kian-kò͘ ê siâⁿ, chòe thih-thiāu, chòe tâng-chhiûⁿ, lâi tí-tng choân-tōe, í-ki̍p Iû-tāi ê lia̍t-ông, kùi-cho̍k, chè-si, kap chit só͘-chāi ê chèng peh-sìⁿ.

19In beh攻擊你，總是bōe能贏你；因為我kap你tī-teh，beh拯救你；這是耶和華講ê。In beh kong-kek lí, chóng-sī bōe-ōe iâⁿ lí; in-ūi Góa kap lí tī-teh, beh chín-kiù lí; che sī Iâ-hô-hoa kóng--ê.