1O͘-se-a ê孫，Iok-thán ê kiáⁿ，猶大王A-hap-su坐位ê時，A-lân王Lī-sìn，kap以色列王Lī-má-lī ê kiáⁿ Pí-ka，上來攻擊耶路撒冷，總是攻bōe破。O͘-se-a ê sun, Iok-thán ê kiáⁿ, Iû-tāi ông A-hap-su chē-ūi ê sî, A-lân ông Lī-sìn, kap Í-sek-lia̍t ông Lī-má-lī ê kiáⁿ Pí-ka, chiūⁿ-lâi kong-kek Iâ-lō͘-sat-léng, chóng-sī kong bōe-phòa.

2有人kā大衛ê家講，A-lân kap Í-hoat-liân已經會盟；王ê心kap百姓ê心lóng搖動，親像樹林內ê樹hō͘風吹振動一樣。Ū lâng kā Tāi-pi̍t ê ke kóng, A-lân kap Í-hoat-liân í-keng hōe-bêng; ông ê sim kap peh-sìⁿ ê sim lóng iô-tāng, chhin-chhiūⁿ chhiū-nâ-lāi ê chhiū hō͘ hong chhe tín-tāng chi̍t-iūⁿ.

3耶和華對以賽亞講，Taⁿ你kap你ê kiáⁿ Si-a-ngá-su̍t出去到頂ê池ê水溝口，tī漂布師傅ê田ê大路，迎接A-hap-su；Iâ-hô-hoa tùi Í-sài-a kóng, Taⁿ lí kap lí ê kiáⁿ Si-a-ngá-su̍t chhut-khì kàu téng ê tî ê chúi-kau-kháu, tī phiò-pò͘ sai-hū ê chhân ê tōa-lō͘, ngiâ-chih A-hap-su;

4對伊講，你tio̍h謹慎安靜；莫得因為chit兩支出煙ê火把頭，就是A-lân ê Lī-sìn kap Lī-má-lī ê kiáⁿ，Lia̍t ê受氣來驚惶失膽。tùi i kóng, Lí tio̍h kín-sīn an-chēng; bo̍h-tit in-ūi chí(**chit) nn̄g-ki chhut-ian ê hé-pé-thâu, chiū-sī A-lân ê Lī-sìn kap Lī-má-lī ê kiáⁿ, lia̍t ê siū-khì lâi kiaⁿ-hiâⁿ sit-táⁿ.

5因為A-lân kap Í-hoat-liân kap Lī-má-lī ê kiáⁿ設pháiⁿ ê計謀害你，In-ūi A-lân kap Í-hoat-liân kap Lī-má-lī ê kiáⁿ siat pháiⁿ ê kè-bô͘ hāi lí,

6講，咱tio̍h上來去，攻擊猶大，擾亂伊，攻破伊，tī伊ê中間設立Tha-pí-le̍k ê kiáⁿ做王。kóng, Lán tio̍h chiūⁿ-lâi khì, kong-kek Iû-tāi, jiáu-loān i, kong-phòa i, tī i ê tiong-kan siat-li̍p Tha-pí-le̍k ê kiáⁿ chòe ông.

7主耶和華講，chit-ê計謀bōe建立，亦bōe成。Chú Iâ-hô-hoa kóng, Chit ê kè-bô͘ bōe kiàn-li̍p, ia̍h bōe sêng.

8因為大馬色做A-lân ê頭，Lī-sìn做大馬色ê頭；tī六十五年內，Í-hoat-liân的確破壞，致到bōe成做國。In-ūi Tāi-má-sek chòe A-lân ê thâu, Lī-sìn chòe Tāi-má-sek ê thâu; tī la̍k-cha̍p-gō͘ nî lāi, Í-hoat-liân tek-khak phò-hoāi, tì-kàu bōe chiâⁿ chòe kok.

9Koh撒馬利亞做Í-hoat-liân ê頭，Lī-má-lī ê kiáⁿ做撒馬利亞ê頭；設使lín m̄信，就的確bōe能khiā在。Koh Sat-má-lī-a chòe Í-hoat-liân ê thâu, Lī-má-lī ê kiáⁿ chòe Sat-má-lī-a ê thâu; siat-sú lín m̄-sìn, chiū tek-khak bōe-ōe khiā-chāi.

10耶和華koh吩咐A-hap-su講，Iâ-hô-hoa koh hoan-hù A-hap-su kóng,

11你tio̍h對耶和華你ê上帝求一個兆頭；thang求伊tī深淵á是極高ê天。Lí tio̍h tùi Iâ-hô-hoa lí ê Siōng-tè kiû chi̍t ê tiāu-thâu; thang kiû i tī chhim-ian á-sī ke̍k-koâiⁿ ê thiⁿ.

12A-hap-su講，我m̄求，亦m̄試耶和華。A-hap-su kóng, Góa m̄-kiû, ia̍h m̄-chhì Iâ-hô-hoa.

13以賽亞講，大衛ê家ah，lín tio̍h聽；lín hō͘人為難，kiám算做小khóa事，亦beh hō͘我ê上帝為難mah？Í-sài-a kóng, Tāi-pi̍t ê ke ah, lín tio̍h thiaⁿ; lín hō͘ lâng ûi-lân, kiám sǹg-chòe sió-khóa sū, ia̍h beh hō͘ góa ê Siōng-tè ûi-lân mah?

14因為án-ni，主本身beh hō͘ lín一個兆頭；看ah，有在室女beh懷孕生kiáⁿ，kā伊號名叫以馬內利。In-ūi án-ni, Chú pún-sin beh hō͘ lín chi̍t ê tiāu-thâu; khòaⁿ ah, ū chāi-sek-lú beh hoâi-īn siⁿ-kiáⁿ, kā i hō-miâ kiò Í-má-lōe-lī.

15到伊會曉得放sak pháiⁿ，揀好ê時，伊chiah beh食奶油kap蜜。Kàu i ōe hiáu-tit pàng-sak pháiⁿ, kéng hó ê sî, i chiah beh chia̍h lin-iû kap bi̍t.

16因為tī chit-ê gín-ná iáu未曉得放sak pháiⁿ揀好ê事先，你所驚 ê hit兩個王ê地beh tú-tio̍h放sak。In-ūi tī chit ê gín-ná iáu-bē hiáu-tit pàng-sak pháiⁿ kéng hó ê tāi-seng, lí só͘ kiaⁿ ê hit nn̄g ê ông ê tōe beh tú-tio̍h pàng-sak.

17耶和華beh hō͘患難ê日臨到你kap你ê百姓，以及你老父ê家，tùi Í-hoat-liân離開猶大以來，bē-bat有chit號ê日，就是亞述王來。Iâ-hô-hoa beh hō͘ hoān-lān ê ji̍t lîm-kàu lí kap lí ê peh-sìⁿ, í-ki̍p lí lāu-pē ê ke, tùi Í-hoat-liân lī-khui Iû-tāi í-lâi, bē-bat ū chit-hō ê ji̍t, chiū-sī A-su̍t ông lâi.

18Hit時耶和華beh出口號，招埃及江河ê源頭ê胡蠅，以及亞述地ê蜂。Hit-sî Iâ-hô-hoa beh chhut kháu-hō, chio Ai-ki̍p kang-hô ê goân-thâu ê hô͘-sîn, í-ki̍p A-su̍t tōe ê phang.

19Lóng beh飛來，歇tī拋荒ê山谷、石縫，kap一切ê刺phè，kap一切ê草場。Lóng beh pe--lâi, hioh tī pha-hng ê soaⁿ-kok, chio̍h-phāng, kap it-chhè ê chhì-phè, kap it-chhè ê chháu-tiûⁿ.

20Hit時主beh用tùi 河外雇chhiàⁿ ê剃頭刀，就是亞述王，來剃in ê頭，kap腳ê毛；亦beh一盡khun in ê嘴鬚。Hit-sî Chú beh ēng tùi Hô-gōa kò͘-chhiàⁿ ê thì-thâu-to, chiū-sī A-su̍t ông, lâi thì in ê thâu, kap kha ê mn̂g; ia̍h beh it-chīn khun in ê chhùi-chhiu.

21Hit時一人beh飼一隻牛母，兩隻綿羊母。Hit-sî chi̍t-lâng beh chhī chi̍t chiah gû-bú, nn̄g chiah mî-iûⁿ-bú.

22因為出奶chōe，伊beh食奶油；tī境內所chhun ê人lóng beh食奶油kap蜜。In-ūi chhut lin chōe, i beh chia̍h lin-iû; tī kéng-lāi só͘ chhun ê lâng lóng beh chia̍h lin-iû kap bi̍t.

23前凡若栽一千叢ê葡萄樹，值一千銀，到hit時beh生刺phè kap蒺藜。Chêng hoān-nā chai chi̍t-chheng châng ê phû-tô-chhiū, ta̍t chi̍t-chheng gûn, kàu hit-sî beh siⁿ chhì-phè kap chi̍t-lê.

24人上去hia，tio̍h帶弓箭，因為遍地滿滿刺phè kap蒺藜。Lâng chiūⁿ--khì hia, tio̍h tòa keng-chìⁿ, in-ūi piàn-tōe móa-móa chhì-phè kap chi̍t-lê.

25所有用鋤頭掘ê山地，你因為驚刺phè kap蒺藜m̄敢上去hia，不過做放牛ê所在，做羊thún踏ê位。Só͘ ū ēng ti(**tî)-thâu ku̍t ê soaⁿ-tōe, lí in-ūi kiaⁿ chhì-phè kap chi̍t-lê m̄-káⁿ chiūⁿ--khì hia, put-kò chòe pàng-gû ê só͘-chāi, chòe iûⁿ thún-ta̍h ê ūi.

1耶和華對我講，你the̍h一個大ê牌，用人通行ê字來寫，論起Má-hek-jíⁿ-sa-la̍h-le̍k-hap-si-pā-su。Iâ-hô-hoa tùi góa kóng, Lí the̍h chi̍t ê tōa ê pâi, ēng lâng thong-hêng ê jī lâi siá, Lūn-khí Má-hek-jíⁿ-sa-la̍h-le̍k-hap-si-pā-su.

2我beh叫誠實ê干證，就是祭司O͘-lī-a，kap Iâ-pí-lí-ka ê kiáⁿ撒迦利亞，來做干證。Góa beh kiò sêng-si̍t ê kan-chèng, chiū-sī chè-si O͘-lī-a, kap Iâ-pí-lí-ka ê kiáⁿ Sat-ka-lī-a, lâi chòe kan-chèng.

3我kap先知娘同房；伊懷孕生kiáⁿ。耶和華就對我講，kā伊號名叫Má-hek-jíⁿ-sa-la̍h-le̍k-hap-si-pā-su。Góa kap sian-ti-niû tâng-pâng; i hoâi-īn siⁿ-kiáⁿ. Iâ-hô-hoa chiū tùi góa kóng, Kā i hō-miâ kiò Má-hek-jíⁿ-sa-la̍h-le̍k-hap-si-pā-su.

4因為chit-ê嬰á bōe曉叫，阿爸，阿母，ê事先，大馬色ê財寶kap撒馬利亞受搶ê物lóng搬tī亞述王ê面前。In-ūi chit ê eⁿ-á bōe hiáu kiò, A-pa, A-bú, ê tāi-seng, Tāi-má-sek ê châi-pó kap Sat-má-lī-a siū-chhiúⁿ ê mi̍h lóng poaⁿ tī A-su̍t ông ê bīn-chêng.

5耶和華koh對我講，Iâ-hô-hoa koh tùi góa kóng,

6因為chit-ê百姓厭賤西羅亞慢慢流ê水，歡喜Lī-sìn kap Lī-má-lī ê kiáⁿ；In-ūi chit ê peh-sìⁿ iàm-chiān Se-lô-a bān-bān lâu ê chúi, hoaⁿ-hí Lī-sìn kap Lī-má-lī ê kiáⁿ;

7所以主beh hō͘ hit-ê 河真大真hiông ê水流來淹in，就是亞述王，kap伊一切ê榮光，beh pôaⁿ過伊一切ê水溝，漲滿伊chiah-ê岸；só͘-í Chú beh hō͘ hit ê Hô chin-tōa chin-hiông ê chúi lâu--lâi im--in, chiū-sī A-su̍t ông, kap i it-chhè ê êng-kng, beh pôaⁿ-kè i it-chhè ê chúi-kau, tiòng-móa i chiah ê hōaⁿ;

8beh衝入猶大，漲滿四界淹，高到頷頸；以馬內利ah，伊ê翼thí開，遍滿你ê地。beh chhiong-ji̍p Iû-tāi, tiòng-móa sì-kòe im, koâiⁿ kàu ām-kún; Í-má-lōe-lī ah, i ê si̍t thí-khui, piàn-móa lí ê tōe.

9列國ê百姓ah，chhut-chāi lín喧嘩，到尾的確破壞；遠ê人ah，tio̍h俯耳孔來聽；chhut-chāi lín hâ腰，的確beh破壞，chhut-chāi lín hâ腰，的確beh破壞。Lia̍t-kok ê peh-sìⁿ ah, chhut-chāi lín soan-hoa, kàu-bé tek-khak phò-hoāi; hn̄g ê lâng ah, tio̍h àⁿ hī-khang lâi thiaⁿ; chhut-chāi lín hâ-io, tek-khak beh phò-hoāi, chhut-chāi lín hâ-io, tek-khak beh phò-hoāi.

10Chhut-chāi lín設計謀，的確歸空空；chhut-chāi lín議論，的確bōe成立；因為上帝kap阮tī-teh。Chhut-chāi lín siat kè-bô͘, tek-khak kui khang-khang; chhut-chāi lín gī-lūn, tek-khak bōe sêng-li̍p; in-ūi Siōng-tè kap goán tī-teh.

11耶和華用大權能ê手指示我用話警戒我，講，M̄-thang行chit-ê百姓所行ê路，對我講，Iâ-hô-hoa ēng tōa koân-lêng ê chhiú chí-sī góa ēng ōe kéng-kài góa, kóng, M̄-thang kiâⁿ chit ê peh-sìⁿ só͘ kiâⁿ ê lō͘, tùi góa kóng,

12Chit-ê百姓所講叫做結黨ê，lín莫得講做結黨；in所驚ê，lín莫得驚，亦莫得忍。Chit ê peh-sìⁿ só͘ kóng kiò-chòe kiat-tóng ê, lín bo̍h-tit kóng chòe kiat-tóng; in só͘ kiaⁿ--ê, lín bo̍h-tit kiaⁿ, ia̍h bo̍h-tit lún.

13獨獨tio̍h尊萬軍ê耶和華做聖；伊是lín所tio̍h驚ê，所tio̍h忍ê。To̍k-to̍k tio̍h chun bān-kun ê Iâ-hô-hoa chòe-sèng; I sī lín só͘ tio̍h kiaⁿ--ê, só͘ tio̍h lún--ê.

14伊beh做聖所；亦beh ǹg以色列兩家做跋倒人ê石，窒礙人ê石磐；ǹg耶路撒冷khiā起ê百姓，做活tauh kap羅網。I beh chòe sèng-só͘; ia̍h beh ǹg Í-sek-lia̍t nn̄g-ke chòe poa̍h-tó lâng ê chio̍h, that-gāi lâng ê chio̍h-pôaⁿ; ǹg Iâ-lō͘-sat-léng khiā-khí ê peh-sìⁿ, chòe oa̍h-tauh kap lô-bāng.

15Chōe-chōe人beh tī hit頂面tio̍h-tak跋倒，跋到碎碎，亦hō͘伊網tio̍h掠tio̍h。Chōe-chōe lâng beh tī hit téng-bīn tio̍h-tak poa̍h-tó, poa̍h-kàu chhùi-chhùi, ia̍h hō͘ i bāng-tio̍h lia̍h-tio̍h.

16你tio̍h將干證ê話捲ân-ân，封密律法tī我學生ê中間。Lí tio̍h chiong kan-chèng ê ōe kńg ân-ân, hong-ba̍t lu̍t-hoat tī Góa ha̍k-seng ê tiong-kan.

17我beh thèng候耶和華，就是家己掩伊ê面tī雅各ê家ê，我亦beh ǹg望伊。Góa beh thèng-hāu Iâ-hô-hoa, chiū-sī ka-kī ng I ê bīn tī Ngá-kok ê ke--ê, góa ia̍h beh ǹg-bāng I.

18看ah，我kap耶和華所hō͘我ê kiáⁿ，lóng是萬軍ê耶和華，tiàm tī錫安山ê，所用做兆頭記號，tī以色列中ê。Khòaⁿ ah, góa kap Iâ-hô-hoa só͘ hō͘ góa ê kiáⁿ, lóng sī bān-kun ê Iâ-hô-hoa, tiàm tī Sek-an soaⁿ-ê, só͘ ēng chòe tiāu-thâu kì-hō, tī Í-sek-lia̍t tiong--ê.

19若有人對lín講，Lín tio̍h去問童乩kap行邪術ê，in ê聲音ki-ki kiu̍h-kiu̍h，言語細細；tio̍h應講，百姓kiám m̄-tio̍h問伊ê上帝mah？kiám thang為活人去問hiah-ê死ê mah？Nā ū lâng tùi lín kóng, Lín tio̍h khì mn̄g tâng-ki kap kiâⁿ siâ-su̍t--ê, in ê siaⁿ-im ki-ki kiu̍h-kiu̍h, giân-gú sòe-sòe; tio̍h ìn kóng, Peh-sìⁿ kiám m̄-tio̍h mn̄g i ê Siōng-tè mah? kiám thang ūi oa̍h-lâng khì mn̄g hiah ê sí--ê mah?

20人tio̍h照律法kap干證ê話；若無thàn chit-ê話來講，就bōe得tio̍h看見早起時ê光。Lâng tio̍h chiàu lu̍t-hoat kap kan-chèng ê ōe; nā bô thàn chit ê ōe lâi kóng, chiū bōe tit-tio̍h khòaⁿ-kìⁿ chá-khí-sî ê kng.

21In beh經過chit-ê地受艱苦受iau餓；iau餓ê時，心內家己受氣，咒詛in ê王，kap in ê上帝，In beh keng-kè chit ê tōe siū kan-khó͘ siū iau-gō; iau-gō ê sî, sim-lāi ka-kī siū-khì, chiù-chó͘ in ê ông, kap in ê Siōng-tè,

22kia̍h頭看天，俯落看地，無phah算一盡是艱苦烏暗，kap痛苦ê烏暗，受趕tī烏烏暗暗ê內面。kia̍h-thâu khòaⁿ thiⁿ, àⁿ-lo̍h khòaⁿ tōe, bô phah-sǹg it-chīn sī kan-khó͘ o͘-àm, kap thòng-khó͘ ê o͘-àm, siū kóaⁿ tī o͘-o͘ àm-àm ê lāi-bīn.

1總是hit-ê bat受痛苦ê地無koh tiàm-tī烏暗，前上帝hō͘ Se-pò͘-lûn kap Ná-hut-tha-lī ê地受看輕，後來就hō͘沿海ê路，約旦ê河外，外邦ê加利利，得tio̍h榮光。Chóng-sī hit-ê bat siū thòng-khó͘ ê tōe bô koh tiàm-tī o͘-àm. Chêng Siōng-tè hō͘ Se-pò͘-lûn kap Ná-hut-tha-lī ê tōe siū khòaⁿ-khin, āu-lâi chiū hō͘ iân-hái ê lō͘, Iok-tàn ê hô-gōa, gōa-pang ê Ka-lī-lī, tit-tio̍h êng-kng.

2行tī烏暗中ê百姓看見大光；khiā起tī死蔭ê地ê，有光照in。Kiâⁿ tī o͘-àm-tiong ê peh-sìⁿ khòaⁿ-kìⁿ tōa-kng; khiā-khí tī sí-ìm ê tōe--ê, ū kng chiò in.

3你hó͘ chit-ê國民chōe-chōe，亦加添in ê歡喜；in tī你ê面前歡喜，親像收割ê歡喜，親像人分所搶ê物，hit號ê快樂。Lí hó͘ chit ê kok-bîn chōe-chōe , ia̍h ke-thiⁿ in ê hoaⁿ-hí; in tī Lí ê bīn-chêng hoaⁿ-hí, chhin-chhiūⁿ siu-koah ê hoaⁿ-hí, chhin-chhiūⁿ lâng pun só͘ chhiúⁿ ê mi̍h, hit-hō ê khoài-lo̍k.

4因為伊所背重ê擔，kap肩頭頂ê柺，以及壓制伊ê ê槌，你lóng kā伊at折，親像tī米甸ê日一樣。In-ūi i só͘ pē tāng ê taⁿ, kap keng-thâu-téng ê koáiⁿ, í-ki̍p ap-chè i--ê ê thûi, Lí lóng kā i at-chi̍h, chhin-chhiūⁿ tī Bí-tiân ê ji̍t chi̍t-iūⁿ.

5因為交戰中穿甲ê人ê跟蹤，kap kō tī血內ê衫lóng beh受燒，做hiâⁿ火ê柴。In-ūi kau-chiàn-tiong chhēng-kah ê lâng ê kun-chong, kap kō tī huih-lāi ê saⁿ lóng beh siū sio, chòe hiâⁿ-hé ê chhâ.

6因為有一個嬰á為咱來出世，有一個kiáⁿ賞賜咱；伊beh負擔國政，伊ê名稱做奇妙，謀事，全能ê上帝，永遠tī-teh ê父，和平ê人君。In-ūi ū chi̍t ê eⁿ-á ūi lán lâi chhut--sì, ū chi̍t ê kiáⁿ siúⁿ-sù lán; i beh hū-tam kok-chèng, i ê miâ chheng-chòe Kî-biāu, Bô͘-sū, Choân-lêng ê Siōng-tè, Éng-oán tī-teh ê Pē, Hô-pêng ê Jîn-kun.

7伊ê國政kap平安beh加添無窮盡，就是tī大衛ê寶座kap伊ê國，beh用審判公義來建立伊，保護伊，tùi taⁿ到永遠。萬軍ê耶和華ê熱心beh成chit-ê事。I ê kok-chèng kap pêng-an beh ke-thiⁿ bû-kiông-chīn, chiū-sī tī Tāi-pi̍t ê pó-chō kap i ê kok, beh ēng sím-phòaⁿ kong-gī lâi kiàn-li̍p i, pó-hō͘ i, tùi taⁿ kàu éng-oán. Bān-kun ê Iâ-hô-hoa ê jia̍t-sim beh chiâⁿ chit ê sū.

8主發出一句話hō͘雅各家，hit-ê話亦臨到以色列族。Chú hoat-chhut chi̍t-kù-ōe hō͘ Ngá-kok ke, hit ê ōe ia̍h lîm-kàu Í-sek-lia̍t cho̍k.

9Chit-ê眾百姓，就是Í-hoat-liân kap khiā起tī撒馬利亞ê，lóng beh知；in照in驕傲自大ê心講，Chit ê chèng peh-sìⁿ, chiū-sī Í-hoat-liân kap khiā-khí tī Sat-má-lī-a--ê, lóng beh chai; in chiàu in kiau-ngō͘ chū-tōa ê sim kóng,

10磚甓已經倒，阮beh phah石來起；桑材樹已經剉，阮beh用柏香樹來替換。Chng-phia̍h í-keng tó, goán beh phah-chio̍h lâi khí; sng-châi-chhiū í-keng chhò, goán beh ēng pek-hiuⁿ-chhiū lâi thòe-ōaⁿ.

11所以耶和華beh起Lī-sìn ê對敵來攻擊伊，亦beh激動伊ê對敵；Só͘-í Iâ-hô-hoa beh khí Lī-sìn ê tùi-te̍k lâi kong-kek i, ia̍h beh kek-tōng i ê tùi-te̍k;

12東有A-lân人，西有腓利士人；in開嘴吞食以色列。雖然án-ni，耶和華ê受氣iáu未消，伊ê手iáu-kú 伸teh。tang ū A-lân lâng, sai ū Hui-lī-sū lâng; in khui-chhùi thun-chia̍h Í-sek-lia̍t. Sui-jiân án-ni, Iâ-hô-hoa ê siū-khì iáu-bē siau, I ê chhiú iáu-kú chhun-teh.

13Chit-ê百姓猶原無歸向phah in ê主，亦無chhē萬軍ê耶和華。Chit ê peh-sìⁿ iû-goân bô kui-ǹg phah in ê Chú, ia̍h bô chhē bān-kun ê Iâ-hô-hoa.

14所以耶和華tī一日ê中間beh對以色列斬斷頭kap馬，棕樹枝kap蘆葦。Só͘-í Iâ-hô-hoa tī chi̍t-ji̍t ê tiong-kan beh tùi Í-sek-lia̍t chām-tn̄g thâu kap bé, chang-chhiū-ki kap lô͘-úi.

15老大kap尊貴ê人就是頭，用白賊話教示人ê先知就是尾。Lāu-tōa kap chun-kùi ê lâng chiū-sī thâu, ēng pe̍h-chha̍t-ōe kà-sī lâng ê sian-ti chiū-sī bé.

16因為引chhōa chit-ê百姓ê，hō͘ in行叉路；hō͘ in引chhōa-ê lóng受吞滅。In-ūi ín-chhōa chit ê peh-sìⁿ--ê, hō͘ in kiâⁿ chha-lō͘; hō͘ in ín-chhōa--ê lóng siū thun-bia̍t.

17所以主無歡喜in ê少年人，亦無beh憐憫in ê孤兒寡婦；因為ta̍k人是褻瀆ê，是行pháiⁿ-ê，koh ta̍k人ê嘴lóng是講戇話。雖然án-ni，耶和華ê受氣iáu未消，伊ê手猶原伸teh。Só͘-í Chú bô hoaⁿ-hí in ê siàu-liân lâng, ia̍h bô beh lîn-bín in ê ko͘-jî kóaⁿ-hū; in-ūi ta̍k-lâng sī siat-to̍k--ê, sī kiâⁿ-pháiⁿ--ê, koh ta̍k-lâng ê chhùi lóng sī kóng gōng-ōe. Sui-jiân án-ni, Iâ-hô-hoa ê siū-khì iáu-bē siau, I ê chhiú iû-goân chhun--teh.

18因為邪惡親像火to̍h燒滅刺phè kap蒺藜；koh to̍h tī ām-ām ê樹林，成做煙柱，轉旋chhèng上高。In-ūi siâ-ok chhin-chhiūⁿ hé to̍h sio-bia̍t chhì-phè kap chi̍t-lê; koh to̍h tī ām-ām ê chhiū-nâ, chiâⁿ-chòe ian-thiāu, tńg-se̍h chhèng-chiūⁿ koâiⁿ.

19因為萬軍ê耶和華ê大受氣，地遍遍受燒；百姓成做火to̍h ê柴；兄弟無相可憐。In-ūi bān-kun ê Iâ-hô-hoa ê tōa siū-khì, tōe piàn-piàn siū-sio; peh-sìⁿ chiâⁿ-chòe hé-to̍h ê chhâ; hiaⁿ-tī bô saⁿ khó-lîn.

20人chiàⁿ-pêng搶the̍h，猶原是iau；tò-pêng吞咬，猶原bōe飽；ta̍k人咬伊家己手骨ê肉。Lâng chiàⁿ-pêng chhiúⁿ-the̍h, iû-goân sī iau; tò-pêng thun-kā, iû-goân bōe pá; ta̍k-lâng kā i ka-kī chhiú-kut ê bah.

21Má-ná-se攻 Í-hoat-liân，Í-hoat-liân攻Má-ná-se；兩族合攻猶大。雖然án-ni，耶和華ê受氣iáu未消，伊ê手iáu-kú 伸teh。Má-ná-se kong Í-hoat-liân, Í-hoat-liân kong Má-ná-se; nn̄g cho̍k ha̍p kong Iû-tāi. Sui-jiân án-ni, Iâ-hô-hoa ê siū-khì iáu-bē siau, I ê chhiú iáu-kú chhun--teh.