1耶和華對我講，你the̍h一個大ê牌，用人通行ê字來寫，論起Má-hek-jíⁿ-sa-la̍h-le̍k-hap-si-pā-su。Iâ-hô-hoa tùi góa kóng, Lí the̍h chi̍t ê tōa ê pâi, ēng lâng thong-hêng ê jī lâi siá, Lūn-khí Má-hek-jíⁿ-sa-la̍h-le̍k-hap-si-pā-su.

2我beh叫誠實ê干證，就是祭司O͘-lī-a，kap Iâ-pí-lí-ka ê kiáⁿ撒迦利亞，來做干證。Góa beh kiò sêng-si̍t ê kan-chèng, chiū-sī chè-si O͘-lī-a, kap Iâ-pí-lí-ka ê kiáⁿ Sat-ka-lī-a, lâi chòe kan-chèng.

3我kap先知娘同房；伊懷孕生kiáⁿ。耶和華就對我講，kā伊號名叫Má-hek-jíⁿ-sa-la̍h-le̍k-hap-si-pā-su。Góa kap sian-ti-niû tâng-pâng; i hoâi-īn siⁿ-kiáⁿ. Iâ-hô-hoa chiū tùi góa kóng, Kā i hō-miâ kiò Má-hek-jíⁿ-sa-la̍h-le̍k-hap-si-pā-su.

4因為chit-ê嬰á bōe曉叫，阿爸，阿母，ê事先，大馬色ê財寶kap撒馬利亞受搶ê物lóng搬tī亞述王ê面前。In-ūi chit ê eⁿ-á bōe hiáu kiò, A-pa, A-bú, ê tāi-seng, Tāi-má-sek ê châi-pó kap Sat-má-lī-a siū-chhiúⁿ ê mi̍h lóng poaⁿ tī A-su̍t ông ê bīn-chêng.

5耶和華koh對我講，Iâ-hô-hoa koh tùi góa kóng,

6因為chit-ê百姓厭賤西羅亞慢慢流ê水，歡喜Lī-sìn kap Lī-má-lī ê kiáⁿ；In-ūi chit ê peh-sìⁿ iàm-chiān Se-lô-a bān-bān lâu ê chúi, hoaⁿ-hí Lī-sìn kap Lī-má-lī ê kiáⁿ;

7所以主beh hō͘ hit-ê 河真大真hiông ê水流來淹in，就是亞述王，kap伊一切ê榮光，beh pôaⁿ過伊一切ê水溝，漲滿伊chiah-ê岸；só͘-í Chú beh hō͘ hit ê Hô chin-tōa chin-hiông ê chúi lâu--lâi im--in, chiū-sī A-su̍t ông, kap i it-chhè ê êng-kng, beh pôaⁿ-kè i it-chhè ê chúi-kau, tiòng-móa i chiah ê hōaⁿ;

8beh衝入猶大，漲滿四界淹，高到頷頸；以馬內利ah，伊ê翼thí開，遍滿你ê地。beh chhiong-ji̍p Iû-tāi, tiòng-móa sì-kòe im, koâiⁿ kàu ām-kún; Í-má-lōe-lī ah, i ê si̍t thí-khui, piàn-móa lí ê tōe.

9列國ê百姓ah，chhut-chāi lín喧嘩，到尾的確破壞；遠ê人ah，tio̍h俯耳孔來聽；chhut-chāi lín hâ腰，的確beh破壞，chhut-chāi lín hâ腰，的確beh破壞。Lia̍t-kok ê peh-sìⁿ ah, chhut-chāi lín soan-hoa, kàu-bé tek-khak phò-hoāi; hn̄g ê lâng ah, tio̍h àⁿ hī-khang lâi thiaⁿ; chhut-chāi lín hâ-io, tek-khak beh phò-hoāi, chhut-chāi lín hâ-io, tek-khak beh phò-hoāi.

10Chhut-chāi lín設計謀，的確歸空空；chhut-chāi lín議論，的確bōe成立；因為上帝kap阮tī-teh。Chhut-chāi lín siat kè-bô͘, tek-khak kui khang-khang; chhut-chāi lín gī-lūn, tek-khak bōe sêng-li̍p; in-ūi Siōng-tè kap goán tī-teh.

11耶和華用大權能ê手指示我用話警戒我，講，M̄-thang行chit-ê百姓所行ê路，對我講，Iâ-hô-hoa ēng tōa koân-lêng ê chhiú chí-sī góa ēng ōe kéng-kài góa, kóng, M̄-thang kiâⁿ chit ê peh-sìⁿ só͘ kiâⁿ ê lō͘, tùi góa kóng,

12Chit-ê百姓所講叫做結黨ê，lín莫得講做結黨；in所驚ê，lín莫得驚，亦莫得忍。Chit ê peh-sìⁿ só͘ kóng kiò-chòe kiat-tóng ê, lín bo̍h-tit kóng chòe kiat-tóng; in só͘ kiaⁿ--ê, lín bo̍h-tit kiaⁿ, ia̍h bo̍h-tit lún.

13獨獨tio̍h尊萬軍ê耶和華做聖；伊是lín所tio̍h驚ê，所tio̍h忍ê。To̍k-to̍k tio̍h chun bān-kun ê Iâ-hô-hoa chòe-sèng; I sī lín só͘ tio̍h kiaⁿ--ê, só͘ tio̍h lún--ê.

14伊beh做聖所；亦beh ǹg以色列兩家做跋倒人ê石，窒礙人ê石磐；ǹg耶路撒冷khiā起ê百姓，做活tauh kap羅網。I beh chòe sèng-só͘; ia̍h beh ǹg Í-sek-lia̍t nn̄g-ke chòe poa̍h-tó lâng ê chio̍h, that-gāi lâng ê chio̍h-pôaⁿ; ǹg Iâ-lō͘-sat-léng khiā-khí ê peh-sìⁿ, chòe oa̍h-tauh kap lô-bāng.

15Chōe-chōe人beh tī hit頂面tio̍h-tak跋倒，跋到碎碎，亦hō͘伊網tio̍h掠tio̍h。Chōe-chōe lâng beh tī hit téng-bīn tio̍h-tak poa̍h-tó, poa̍h-kàu chhùi-chhùi, ia̍h hō͘ i bāng-tio̍h lia̍h-tio̍h.

16你tio̍h將干證ê話捲ân-ân，封密律法tī我學生ê中間。Lí tio̍h chiong kan-chèng ê ōe kńg ân-ân, hong-ba̍t lu̍t-hoat tī Góa ha̍k-seng ê tiong-kan.

17我beh thèng候耶和華，就是家己掩伊ê面tī雅各ê家ê，我亦beh ǹg望伊。Góa beh thèng-hāu Iâ-hô-hoa, chiū-sī ka-kī ng I ê bīn tī Ngá-kok ê ke--ê, góa ia̍h beh ǹg-bāng I.

18看ah，我kap耶和華所hō͘我ê kiáⁿ，lóng是萬軍ê耶和華，tiàm tī錫安山ê，所用做兆頭記號，tī以色列中ê。Khòaⁿ ah, góa kap Iâ-hô-hoa só͘ hō͘ góa ê kiáⁿ, lóng sī bān-kun ê Iâ-hô-hoa, tiàm tī Sek-an soaⁿ-ê, só͘ ēng chòe tiāu-thâu kì-hō, tī Í-sek-lia̍t tiong--ê.

19若有人對lín講，Lín tio̍h去問童乩kap行邪術ê，in ê聲音ki-ki kiu̍h-kiu̍h，言語細細；tio̍h應講，百姓kiám m̄-tio̍h問伊ê上帝mah？kiám thang為活人去問hiah-ê死ê mah？Nā ū lâng tùi lín kóng, Lín tio̍h khì mn̄g tâng-ki kap kiâⁿ siâ-su̍t--ê, in ê siaⁿ-im ki-ki kiu̍h-kiu̍h, giân-gú sòe-sòe; tio̍h ìn kóng, Peh-sìⁿ kiám m̄-tio̍h mn̄g i ê Siōng-tè mah? kiám thang ūi oa̍h-lâng khì mn̄g hiah ê sí--ê mah?

20人tio̍h照律法kap干證ê話；若無thàn chit-ê話來講，就bōe得tio̍h看見早起時ê光。Lâng tio̍h chiàu lu̍t-hoat kap kan-chèng ê ōe; nā bô thàn chit ê ōe lâi kóng, chiū bōe tit-tio̍h khòaⁿ-kìⁿ chá-khí-sî ê kng.

21In beh經過chit-ê地受艱苦受iau餓；iau餓ê時，心內家己受氣，咒詛in ê王，kap in ê上帝，In beh keng-kè chit ê tōe siū kan-khó͘ siū iau-gō; iau-gō ê sî, sim-lāi ka-kī siū-khì, chiù-chó͘ in ê ông, kap in ê Siōng-tè,

22kia̍h頭看天，俯落看地，無phah算一盡是艱苦烏暗，kap痛苦ê烏暗，受趕tī烏烏暗暗ê內面。kia̍h-thâu khòaⁿ thiⁿ, àⁿ-lo̍h khòaⁿ tōe, bô phah-sǹg it-chīn sī kan-khó͘ o͘-àm, kap thòng-khó͘ ê o͘-àm, siū kóaⁿ tī o͘-o͘ àm-àm ê lāi-bīn.

1總是hit-ê bat受痛苦ê地無koh tiàm-tī烏暗，前上帝hō͘ Se-pò͘-lûn kap Ná-hut-tha-lī ê地受看輕，後來就hō͘沿海ê路，約旦ê河外，外邦ê加利利，得tio̍h榮光。Chóng-sī hit-ê bat siū thòng-khó͘ ê tōe bô koh tiàm-tī o͘-àm. Chêng Siōng-tè hō͘ Se-pò͘-lûn kap Ná-hut-tha-lī ê tōe siū khòaⁿ-khin, āu-lâi chiū hō͘ iân-hái ê lō͘, Iok-tàn ê hô-gōa, gōa-pang ê Ka-lī-lī, tit-tio̍h êng-kng.

2行tī烏暗中ê百姓看見大光；khiā起tī死蔭ê地ê，有光照in。Kiâⁿ tī o͘-àm-tiong ê peh-sìⁿ khòaⁿ-kìⁿ tōa-kng; khiā-khí tī sí-ìm ê tōe--ê, ū kng chiò in.

3你hó͘ chit-ê國民chōe-chōe，亦加添in ê歡喜；in tī你ê面前歡喜，親像收割ê歡喜，親像人分所搶ê物，hit號ê快樂。Lí hó͘ chit ê kok-bîn chōe-chōe , ia̍h ke-thiⁿ in ê hoaⁿ-hí; in tī Lí ê bīn-chêng hoaⁿ-hí, chhin-chhiūⁿ siu-koah ê hoaⁿ-hí, chhin-chhiūⁿ lâng pun só͘ chhiúⁿ ê mi̍h, hit-hō ê khoài-lo̍k.

4因為伊所背重ê擔，kap肩頭頂ê柺，以及壓制伊ê ê槌，你lóng kā伊at折，親像tī米甸ê日一樣。In-ūi i só͘ pē tāng ê taⁿ, kap keng-thâu-téng ê koáiⁿ, í-ki̍p ap-chè i--ê ê thûi, Lí lóng kā i at-chi̍h, chhin-chhiūⁿ tī Bí-tiân ê ji̍t chi̍t-iūⁿ.

5因為交戰中穿甲ê人ê跟蹤，kap kō tī血內ê衫lóng beh受燒，做hiâⁿ火ê柴。In-ūi kau-chiàn-tiong chhēng-kah ê lâng ê kun-chong, kap kō tī huih-lāi ê saⁿ lóng beh siū sio, chòe hiâⁿ-hé ê chhâ.

6因為有一個嬰á為咱來出世，有一個kiáⁿ賞賜咱；伊beh負擔國政，伊ê名稱做奇妙，謀事，全能ê上帝，永遠tī-teh ê父，和平ê人君。In-ūi ū chi̍t ê eⁿ-á ūi lán lâi chhut--sì, ū chi̍t ê kiáⁿ siúⁿ-sù lán; i beh hū-tam kok-chèng, i ê miâ chheng-chòe Kî-biāu, Bô͘-sū, Choân-lêng ê Siōng-tè, Éng-oán tī-teh ê Pē, Hô-pêng ê Jîn-kun.

7伊ê國政kap平安beh加添無窮盡，就是tī大衛ê寶座kap伊ê國，beh用審判公義來建立伊，保護伊，tùi taⁿ到永遠。萬軍ê耶和華ê熱心beh成chit-ê事。I ê kok-chèng kap pêng-an beh ke-thiⁿ bû-kiông-chīn, chiū-sī tī Tāi-pi̍t ê pó-chō kap i ê kok, beh ēng sím-phòaⁿ kong-gī lâi kiàn-li̍p i, pó-hō͘ i, tùi taⁿ kàu éng-oán. Bān-kun ê Iâ-hô-hoa ê jia̍t-sim beh chiâⁿ chit ê sū.

8主發出一句話hō͘雅各家，hit-ê話亦臨到以色列族。Chú hoat-chhut chi̍t-kù-ōe hō͘ Ngá-kok ke, hit ê ōe ia̍h lîm-kàu Í-sek-lia̍t cho̍k.

9Chit-ê眾百姓，就是Í-hoat-liân kap khiā起tī撒馬利亞ê，lóng beh知；in照in驕傲自大ê心講，Chit ê chèng peh-sìⁿ, chiū-sī Í-hoat-liân kap khiā-khí tī Sat-má-lī-a--ê, lóng beh chai; in chiàu in kiau-ngō͘ chū-tōa ê sim kóng,

10磚甓已經倒，阮beh phah石來起；桑材樹已經剉，阮beh用柏香樹來替換。Chng-phia̍h í-keng tó, goán beh phah-chio̍h lâi khí; sng-châi-chhiū í-keng chhò, goán beh ēng pek-hiuⁿ-chhiū lâi thòe-ōaⁿ.

11所以耶和華beh起Lī-sìn ê對敵來攻擊伊，亦beh激動伊ê對敵；Só͘-í Iâ-hô-hoa beh khí Lī-sìn ê tùi-te̍k lâi kong-kek i, ia̍h beh kek-tōng i ê tùi-te̍k;

12東有A-lân人，西有腓利士人；in開嘴吞食以色列。雖然án-ni，耶和華ê受氣iáu未消，伊ê手iáu-kú 伸teh。tang ū A-lân lâng, sai ū Hui-lī-sū lâng; in khui-chhùi thun-chia̍h Í-sek-lia̍t. Sui-jiân án-ni, Iâ-hô-hoa ê siū-khì iáu-bē siau, I ê chhiú iáu-kú chhun-teh.

13Chit-ê百姓猶原無歸向phah in ê主，亦無chhē萬軍ê耶和華。Chit ê peh-sìⁿ iû-goân bô kui-ǹg phah in ê Chú, ia̍h bô chhē bān-kun ê Iâ-hô-hoa.

14所以耶和華tī一日ê中間beh對以色列斬斷頭kap馬，棕樹枝kap蘆葦。Só͘-í Iâ-hô-hoa tī chi̍t-ji̍t ê tiong-kan beh tùi Í-sek-lia̍t chām-tn̄g thâu kap bé, chang-chhiū-ki kap lô͘-úi.

15老大kap尊貴ê人就是頭，用白賊話教示人ê先知就是尾。Lāu-tōa kap chun-kùi ê lâng chiū-sī thâu, ēng pe̍h-chha̍t-ōe kà-sī lâng ê sian-ti chiū-sī bé.

16因為引chhōa chit-ê百姓ê，hō͘ in行叉路；hō͘ in引chhōa-ê lóng受吞滅。In-ūi ín-chhōa chit ê peh-sìⁿ--ê, hō͘ in kiâⁿ chha-lō͘; hō͘ in ín-chhōa--ê lóng siū thun-bia̍t.

17所以主無歡喜in ê少年人，亦無beh憐憫in ê孤兒寡婦；因為ta̍k人是褻瀆ê，是行pháiⁿ-ê，koh ta̍k人ê嘴lóng是講戇話。雖然án-ni，耶和華ê受氣iáu未消，伊ê手猶原伸teh。Só͘-í Chú bô hoaⁿ-hí in ê siàu-liân lâng, ia̍h bô beh lîn-bín in ê ko͘-jî kóaⁿ-hū; in-ūi ta̍k-lâng sī siat-to̍k--ê, sī kiâⁿ-pháiⁿ--ê, koh ta̍k-lâng ê chhùi lóng sī kóng gōng-ōe. Sui-jiân án-ni, Iâ-hô-hoa ê siū-khì iáu-bē siau, I ê chhiú iû-goân chhun--teh.

18因為邪惡親像火to̍h燒滅刺phè kap蒺藜；koh to̍h tī ām-ām ê樹林，成做煙柱，轉旋chhèng上高。In-ūi siâ-ok chhin-chhiūⁿ hé to̍h sio-bia̍t chhì-phè kap chi̍t-lê; koh to̍h tī ām-ām ê chhiū-nâ, chiâⁿ-chòe ian-thiāu, tńg-se̍h chhèng-chiūⁿ koâiⁿ.

19因為萬軍ê耶和華ê大受氣，地遍遍受燒；百姓成做火to̍h ê柴；兄弟無相可憐。In-ūi bān-kun ê Iâ-hô-hoa ê tōa siū-khì, tōe piàn-piàn siū-sio; peh-sìⁿ chiâⁿ-chòe hé-to̍h ê chhâ; hiaⁿ-tī bô saⁿ khó-lîn.

20人chiàⁿ-pêng搶the̍h，猶原是iau；tò-pêng吞咬，猶原bōe飽；ta̍k人咬伊家己手骨ê肉。Lâng chiàⁿ-pêng chhiúⁿ-the̍h, iû-goân sī iau; tò-pêng thun-kā, iû-goân bōe pá; ta̍k-lâng kā i ka-kī chhiú-kut ê bah.

21Má-ná-se攻 Í-hoat-liân，Í-hoat-liân攻Má-ná-se；兩族合攻猶大。雖然án-ni，耶和華ê受氣iáu未消，伊ê手iáu-kú 伸teh。Má-ná-se kong Í-hoat-liân, Í-hoat-liân kong Má-ná-se; nn̄g cho̍k ha̍p kong Iû-tāi. Sui-jiân án-ni, Iâ-hô-hoa ê siū-khì iáu-bē siau, I ê chhiú iáu-kú chhun--teh.

1有災厄ah，hiah-ê設立不義ê律例ê，kap記載奸詐ê判詞ê；Ū chai-ē ah, hiah ê siat-li̍p put-gī ê lu̍t-lē--ê, kap kì-chài kan-chà ê phòaⁿ-sû ê;

2枉屈sòng-hiong人ê案件，搶奪我ê百姓中困苦ê人ê情理，用寡婦準做所搶ê物，用孤兒準做所劫 ê物。óng-khut sòng-hiong lâng ê àn-kiāⁿ, chhiúⁿ-toa̍t Góa ê peh-sìⁿ-tiong khùn-khó͘ ê lâng ê chêng-lí, ēng kóaⁿ-hū chún-chòe só͘-chhiúⁿ ê mi̍h, ēng ko͘-jî chún-chòe só͘ kiap ê mi̍h.

3當降刑罰ê日，有災厄tùi遠遠臨到，hit時lín beh怎樣？lín beh走去求甚麼人救lín ah？lín ê財寶beh留tī甚麼所在？Tng kàng hêng-hoa̍t ê ji̍t, ū chai-ē tùi hn̄g-hn̄g lîm-kàu, hit-sî lín beh cháiⁿ-iūⁿ? lín beh cháu--khì kiû sím-mi̍h lâng kiù--lín ah? lín ê châi-pó beh lâu tī sím-mi̍h só͘-chāi?

4In只有屈身tī受掠ê人ê下面，倒tī受thâi ê人ê下面。雖然án-ni，耶和華ê受氣iáu未消，伊ê手猶原伸teh。In chí-ū khut-sin tī siū-lia̍h ê lâng ê ē-bīn, tó tī siū-thâi ê lâng ê ē-bīn. Sui-jiân án-ni, Iâ-hô-hoa ê siū-khì iáu-bē siau, I ê chhiú iû-goân chhun--teh.

5有災厄ah，亞述是我受氣ê槌，手中kia̍h我ê痛恨做柺。Ū chai-ē ah, A-su̍t sī Góa siū-khì ê thûi, chhiú-tiong kia̍h Góa ê thòng-hūn chòe koáiⁿ.

6我beh差伊攻擊邪惡ê邦國，吩咐伊攻擊我所受氣ê百姓，搶伊所搶ê，掠伊所掠ê，將in thún踏親像街路ê土糜一樣。Góa beh chhe i kong-kek siâ-ok ê pang-kok, hoan-hù i kong-kek Góa só͘ siū-khì ê peh-sìⁿ, chhiúⁿ i só͘ chhiúⁿ--ê, lia̍h i só͘-lia̍h--ê, chiong in thún-ta̍h chhin-chhiūⁿ ke-lō͘ ê thô͘-bê chi̍t-iūⁿ.

7總是伊m̄是chit號意思，伊ê心亦m̄是chit-ê打算；伊ê心內反tńg想毀滅，剿滅chōe-chōe國。Chóng-sī i m̄-sī chit-hō ì-sù, i-ê sim ia̍h m̄-sī chit ê táⁿ-sǹg; i ê sim-lāi hoán-tńg siūⁿ húi-bia̍t, châu-bia̍t chōe-chōe kok.

8因為伊講，我ê人臣kiám無lóng是王mah？In-ūi i kóng, Góa ê jîn-sîn kiám bô lóng sī ông mah?

9Ka-le̍k-lô kiám-m̄是親像Ka-ki-bí-si mah？Hap-má kiám-m̄是親像A-ní-poa̍t mah？撒馬利亞kiám-m̄是親像大馬色mah？Ka-le̍k-lô kiám-m̄-sī chhin-chhiūⁿ Ka-ki-bí-si mah? Hap-má kiám-m̄-sī chhin-chhiūⁿ A-ní-poa̍t mah? Sat-má-lī-a kiám-m̄-sī chhin-chhiūⁿ Tāi-má-sek mah?

10我ê手已經到偶像ê國，in雕刻ê偶像贏過耶路撒冷kap撒馬利亞ê偶像；Góa ê chhiú í-keng kàu ngó͘-siōng ê kok, in tiau-khek ê ngó͘-siōng iâⁿ-kè Iâ-lō͘-sat-léng kap Sat-má-lī-a ê ngó͘-siōng;

11我怎樣款待撒馬利亞kap其中ê偶像，kiám bōe照án-ni款待耶路撒冷kap其中ê偶像mah？góa cháiⁿ-iūⁿ khoán-thāi Sat-má-lī-a kap kî-tiong ê ngó͘-siōng, kiám bōe chiàu án-ni khoán-thāi Iâ-lō͘-sat-léng kap kî-tiong ê ngó͘-siōng mah?

12主tī錫安山kap耶路撒冷成祂一切所做ê ê時，講，我beh刑罰亞述王心驕ê行做，kap伊目頭高ê榮光。Chú tī Sek-an soaⁿ kap Iâ-lō͘-sat-léng chiâⁿ I it-chhè só͘-chòe--ê ê sî, kóng, Góa beh hêng-hoa̍t A-su̍t ông sim-kiau ê kiâⁿ-chòe, kap i ba̍k-thâu koâiⁿ ê êng-kng.

13因為伊講，我所成ê事，是用我ê手ê能力，kap我ê智慧；我本有聰明；我移徙列國ê地界，搶in ê財寶，koh我親像勇士hō͘坐高位ê降做低。In-ūi i kóng, Góa só͘ chiâⁿ ê sū, sī ēng góa ê chhiú ê lêng-le̍k, kap góa ê tì-hūi; góa pún ū chhang-miâ; góa î-sóa lia̍t-kok ê tōe-kài, chhiúⁿ in ê châi-pó, koh góa chhin-chhiūⁿ ióng-sū hō͘ chē koâiⁿ-ūi-ê kàng chòe kē.

14我ê手the̍h-tio̍h列國ê財寶，親像the̍h鳥á-siū；我得tio̍h全地，親像拾tio̍h所放sak ê鳥á卵；無有phia̍t翼ê，無有開嘴ê，無有哮叫ê。Góa ê chhiú the̍h-tio̍h lia̍t-kok ê châi-pó, chhin-chhiūⁿ the̍h chiáu-á-siū; góa tit-tio̍h choân-tōe, chhin-chhiūⁿ khioh-tio̍h só͘ pàng-sak ê chiáu-á-nn̄g; bô ū phia̍t-si̍t ê, bô ū khui-chhùi ê, bô ū háu-kiò ê.

15Taⁿ斧頭kiám會對用伊來剉材ê家己誇口mah？鋸á kiám會對hit-ê 拖鋸ê家己phín-phóng mah？這是親像槌á運轉hit-ê kia̍h伊ê，親像柺á kia̍h起hit-ê m̄是柴ê。Taⁿ pó͘-thâu kiám ōe tùi ēng i lâi chhò-chhâ--ê ka-kī khoa-kháu mah? kù-á kiám ōe tùi hit ê thoa kù--ê ka-kī phín-phóng mah? che sī chhin-chhiūⁿ thûi-á ūn-choán hit ê kia̍h--i-ê, chhin-chhiūⁿ koáiⁿ-á kia̍h-khí hit ê m̄-sī chhâ--ê.

16因為án-ni，主，萬軍ê主，beh hō͘伊肥ê變做瘦；tī伊榮光ê下面beh有火to̍h起來，親像火燒一樣。In-ūi án-ni Chú, bān-kun ê Chú, beh hō͘ i pûi-ê pìⁿ-chòe sán; tī i êng-kng ê ē-bīn beh ū hé to̍h--khí-lâi, chhin-chhiūⁿ hé sio chi̍t-iūⁿ.

17以色列ê光beh做火，伊ê聖ê beh做火燄；tī一日ê中間，將伊ê刺phè kap蒺藜燒了了。Í-sek-lia̍t ê kng beh chòe hé, i ê Sèng--ê beh chòe hé-iām; tī chi̍t-ji̍t ê tiong-kan, chiong i ê chhì-phè kap chi̍t-lê sio liáu-liáu.

18Koh將伊ê樹林kap肥地ê榮光，tùi神魂到肉體，lóng燒滅伊；勢面親像破病人漸漸衰敗。Koh chiong i ê chhiū-nâ kap pûi-tōe ê êng-kng, tùi sîn-hûn kàu jio̍k-thé, lóng sio-bia̍t i; sè-bīn chhin-chhiūⁿ phòa-pīⁿ lâng chiām-chiām soe-pāi.

19伊ê樹林chhun ê樹無幾叢，gín-ná亦會記伊ê數額。I ê chhiū-nâ chhun ê chhiū bô kúi châng, gín-ná ia̍h ōe kì i ê siàu-gia̍h.

20到hit日，以色列所chhun-ê，kap雅各家所逃脫ê，無koh óa靠hit-ê phah in ê；是beh誠實óa靠耶和華，以色列ê聖ê。Kàu hit-ji̍t Í-sek-lia̍t só͘ chhun-ê, kap Ngá-kok ke só͘ tô-thoat-ê, bô koh óa-khò hit ê phah in ê; sī beh sêng-si̍t óa-khò Iâ-hô-hoa, Í-sek-lia̍t ê Sèng--ê.

21所chhun-ê beh倒tńg來，就是雅各家所chhun-ê，歸tī全能ê上帝。Só͘-chhun-ê beh tò-tńg-lâi, chiū-sī Ngá-kok ke só͘-chhun-ê, kui tī choân-lêng ê Siōng-tè.

22以色列ah，你ê百姓雖然chōe親像海沙，只有chhun-ê倒tńg來；衰敗ê事已經定tio̍h，用公義來充滿。Í-sek-lia̍t ah, lí ê peh-sìⁿ sui-jiân chōe chhin-chhiūⁿ hái-soa, chí-ū chhun-ê tò-tńg--lâi; soe-pāi ê sū í-keng tiāⁿ-tio̍h, ēng kong-gī lâi chhiong-móa.

23因為主，萬軍ê耶和華，tī全地中beh行所定tio̍h ê滅無。In-ūi Chú, bān-kun ê Iâ-hô-hoa, tī choân-tōe-tiong beh kiâⁿ só͘ tiāⁿ-tio̍h ê bia̍t-bô.

24所以主，萬軍ê耶和華，án-ni講，khiā起錫安，我ê百姓ah，亞述雖然用槌phah lín，koh親像埃及ê款，kia̍h柺á攻擊你，你m̄免驚伊。Só͘-í Chú, bān-kun ê Iâ-hô-hoa, án-ni kóng, Khiā-khí Sek-an, Góa ê peh-sìⁿ ah, A-su̍t sui-jiân ēng thûi phah lín, koh chhin-chhiūⁿ Ai-ki̍p ê khoán, kia̍h koáiⁿ-á kong-kek lí, lí m̄-bián kiaⁿ i.

25因為koh tiap-á久受氣就beh明白，koh我ê受氣beh tùi in ê滅無來soah。In-ūi koh tiap-á-kú siū-khì chiū beh bêng-pe̍k, koh Góa ê siū-khì beh tùi in ê bia̍t-bô lâi soah.

26萬軍ê耶和華beh kia̍h起鞭來phah伊，親像tī Gô-li̍p ê石磐phah米甸；伊ê柺á beh伸tī海頂，伊beh kia̍h起親像tī埃及一樣。Bān-kun ê Iâ-hô-hoa beh kia̍h-khí piⁿ lâi phah i, chhin-chhiūⁿ tī Gô-li̍p ê chio̍h-pôaⁿ phah Bí-tiân; I ê koáiⁿ-á beh chhun tī hái-téng, I beh kia̍h-khí chhin-chhiūⁿ tī Ai-ki̍p chi̍t-iūⁿ.

27到hit日，亞述ê重擔beh離開你ê肩頭，伊ê擔beh離開你ê頷頸，伊ê擔也beh因為抹油ê緣故來毀壞。Kàu hit-ji̍t A-su̍t ê tāng-tàⁿ beh lī-khui lí ê keng-thâu, i ê taⁿ beh lī-khui lí ê ām-kún, i ê taⁿ iā beh in-ūi boah-iû ê iân-kò͘ lâi húi-hoāi.

28亞述到A-ia̍p，經過Bí-ki-lûn，放行李tī Bi̍t-boa̍t；in經過隘口；A-su̍t kàu A-ia̍p, keng-kè Bí-ki-lûn, pàng hêng-lí tī Bi̍t-boa̍t; in keng-kè ài-kháu;

29tī Ka-pa歇暝；La̍h-má人驚惶；掃羅ê Ki-pì-a人逃走。tī Ka-pa hioh-mî; La̍h-má lâng kiaⁿ-hiâⁿ; Sò-lô ê Ki-pì-a lâng tô-cháu.

30Ka-lîm khiā起ê百姓ah，tio̍h大聲喉叫；來soah ê人ah，tio̍h 俯耳孔；慘ah，困苦ê A-ná-tu̍t ah！Ka-lîm khiā-khí ê peh-sìⁿ ah, tio̍h tōa-siaⁿ âu-kiò; Lâi-soah ê lâng ah, tio̍h àⁿ hī-khang; chhám--ah, khùn-khó͘ ê A-ná-tu̍t ah!

31Má-tek-bí-ná人閃避；Ki-pèng khiā起ê百姓逃走。Má-tek-bí-ná lâng siám-pī; Ki-pèng khiā-khí ê peh-sìⁿ tô-cháu.

32Hit日伊紮兵tī Lô-pek；比手ǹg錫安城ê山，就是耶路撒冷ê山頭。Hit-ji̍t i chat-peng tī Lô-pek; pí chhiú ǹg Sek-an siâⁿ ê soaⁿ, chiū-sī Iâ-lō͘-sat-léng ê soaⁿ-thâu.

33看ah，主，萬軍ê耶和華，用hō͘人驚 ê威嚴來剉樹枝；長ê beh受剉，高ê beh降低；Khòaⁿ ah, Chú, bān-kun ê Iâ-hô-hoa, ēng hō͘ lâng kiaⁿ ê ui-giâm lâi chhò chhiū-ki; tn̂g--ê beh siū-chhò, koâiⁿ--ê beh kàng-kē;

34ām ê樹林，伊beh用鐵器剉伊；koh黎巴嫩beh tùi大權能ê來倒落去。ām ê chhiū-nâ, I beh ēng thih-khì chhò i; koh Lī-pa-lùn beh tùi tōa koân-lêng--ê lâi tó--lo̍h-khì.