1兄弟ê相疼tio̍h久長。Hiaⁿ-tī ê saⁿ-thiàⁿ tio̍h kú-tn̂g.

2莫得bōe記得接待人客；因為tùi án-ni，bat有接待tio̍h天使，亦m̄知ê。Bo̍h-tit bōe kì-tit chiap-thāi lâng-kheh; in-ūi tùi án-ni, bat ū chiap-thāi-tio̍h thiⁿ-sài, ia̍h m̄ chai ê.

3Tio̍h siàu念chiah-ê受關ê，親像kap in相同關；siàu念受暴虐 ê，是lín亦有身軀。Tio̍h siàu-liām chiah ê siū koaiⁿ ê, chhin-chhiūⁿ kap in saⁿ-tâng koaiⁿ; siàu-liām siū pō-gio̍k ê, sī lín ia̍h ū seng-khu.

4婚姻人人tio̍h尊重，床無lâ-sâm；因為私通行淫ê人，上帝beh審判伊。Hun-in lâng-lâng tio̍h chun-tiōng, chhn̂g bô lâ-sâm; in-ūi su-thong kiâⁿ-îm ê lâng, Siōng-tè beh sím-phòaⁿ i.

5心志m̄-thang貪財；掠所有ê做夠額；因為上帝有講，我決斷無放sak你，決斷無離開你。Sim-chì m̄ thang tham châi; lia̍h só͘ ū ê chòe kàu-gia̍h; in-ūi Siōng-tè ū kóng, Góa koat-toàn bô pàng-sak lí, koat-toàn bô lī-khui lí.

6所以咱thang好膽講， 主就是幫贊我ê，我無beh驚惶， 人beh啥法得我ta-ôa？"Só͘-í lán thang hó-táⁿ kóng, Chú chiū-sī pang-chān góa ê, góa bô beh kiaⁿ-hiâⁿ, Lâng beh siáⁿ hoat-tit góa ta-ôa?"

7前引chhōa lín，用上帝ê道理傳hō͘ lín ê人，lín tio̍h siàu念in；看in行做ê結局，來學in ê信。Chêng ín-chhōa lín, ēng Siōng-tè ê tō-lí thoân hō͘ lín ê lâng, lín tio̍h siàu-liām in; khòaⁿ in kiâⁿ-chòe ê kiat-kio̍k, lâi o̍h in ê sìn.

8耶穌基督昨日、今á日同一樣，直到代代。Iâ-so͘ Ki-tok chā-ji̍t kin-á-ji̍t tâng chi̍t iūⁿ, ti̍t kàu tāi-tāi.

9Lín莫得hō͘ chhap雜各樣ê教所遷徙；因為心tùi恩典來堅固chiah是好；m̄是tùi hiah-ê食物；因為用工tī hiah-ê物ê，無利益。Lín bo̍h-tit hō͘ chhap-cha̍p koh-iūⁿ ê kàu só͘ chhian-sóa; in-ūi sim tùi un-tián lâi kian-kò͘ chiah sī hó; m̄ sī tùi hiah ê chia̍h-mi̍h; in-ūi ēng kang tī hiah ê mi̍h ê, bô lī-ek.

10咱有祭壇，服事tī會幕ê無權thang食伊。Lán ū chè-tôaⁿ, ho̍k-sāi tī hōe-bō͘ ê bô koân thang chia̍h i.

11因為cheng-siⁿ ê血hō͘祭司頭帶入聖所來贖罪，hiah-ê cheng-siⁿ ê身體就燒tī營外。In-ūi cheng-siⁿ ê huih hō͘ chè-si-thâu tòa ji̍p sèng-só͘ lâi sio̍k chōe, hiah ê cheng-siⁿ ê sin-thé chiū sio tī iâⁿ-gōa.

12所以耶穌因為beh用家己ê血hō͘百姓成聖，亦受苦tī城門外。Só͘-í Iâ-so͘ in-ūi beh ēng ka-kī ê huih hō͘ peh-sìⁿ chiâⁿ-sèng, ia̍h siū khó͘ tī siâⁿ mn̂g gōa.

13Án-ni咱亦tio̍h出營外來就近伊，受伊所受ê凌辱。Án-ni lán ia̍h tio̍h chhut iâⁿ gōa lâi chiū-kūn I, siū I só͘ siū ê lêng-jio̍k.

14因為tī chia咱無久長tī-teh ê城，是chhē hit-ê將來ê。In-ūi tī chia lán bô kú-tn̂g tī-teh ê siâⁿ, sī chhē hit ê chiong-lâi ê.

15所以tio̍h對耶穌常常用o-ló做祭，獻hō͘上帝；這就是承認主名ê嘴唇所結ê果子。Só͘-í tio̍h tùi Iâ-so͘ siông-siông ēng o-ló chòe chè, hiàn hō͘ Siōng-tè; che chiū-sī sêng-jīn Chú miâ ê chhùi-tûn só͘ kiat ê ké-chí.

16獨獨行好，kap相供給，lín m̄-thang bōe記得，因為chit號ê祭是上帝所歡喜ê。To̍k-to̍k kiâⁿ hó, kap saⁿ kiong-kip, lín m̄ thang bōe kì-tit, in-ūi chit hō ê chè sī Siōng-tè só͘ hoaⁿ-hí ê.

17引chhōa lín ê，lín tio̍h聽thàn順服in；因為in為tio̍h lín ê靈魂警醒，是將來tio̍h家己排列ê；lín tio̍h hō͘ in用歡喜來做，無用吐氣；因為chit-ê無利益lín。Ín-chhōa lín ê, lín tio̍h thiaⁿ-thàn sūn-ho̍k in; in-ūi in ūi-tio̍h lín ê lêng-hûn kéng-séng, sī chiong-lâi tio̍h ka-kī pâi-lia̍t ê; lín tio̍h hō͘ in ēng hoaⁿ-hí lâi chòe, bô ēng thó͘-khùi; in-ūi chit-ê bô lī-ek lín.

18Lín tio̍h替阮祈禱；阮信家己有照良心，凡事ài照正直來行。Lín tio̍h thòe goán kî-tó; goán sìn ka-kī ū chiàu liông-sim, hoān sū ài chiàu chèng-ti̍t lâi kiâⁿ.

19我益發勸lín行án-ni，hō͘我thang khah緊koh就近lín。Góa it-hoat khǹg lín kiâⁿ án-ni, hō͘ góa thang khah kín koh chiū-kūn lín.

20Taⁿ願平安ê上帝，就是bat tī永遠ê約ê血，tùi死人中chhōa羊群ê大牧者，咱ê主耶穌，koh起來，Taⁿ goān pêng-an ê Siōng-tè, chiū-sī bat tī éng-oán ê iok ê huih tùi sí-lâng tiong chhōa iûⁿ-kûn ê tōa bo̍k-chiá, lán ê Chú Iâ-so͘, koh khí-lâi,

21hō͘ lín tī ta̍k項好事完全，來行伊ê旨意，koh對耶穌基督，tī咱ê心內，行tāi-chì，得tio̍h歡喜tī伊ê面前；願榮光歸tī伊，代代無soah。À-bēng。hō͘ lín tī ta̍k hāng hó sū oân-choân, lâi kiâⁿ I ê chí-ì, koh tùi Iâ-so͘ Ki-tok, tī lán ê sim-lāi, kiâⁿ tāi-chì, tit-tio̍h hoaⁿ-hí tī I ê bīn-chêng; goān êng-kng kui tī I, tāi-tāi bô soah. À-bēng.

22兄弟ah，我寫短短ê phoe hō͘ lín；勸lín接納我勸勉ê話。Hiaⁿ-tī ah, góa siá té-té ê phoe hō͘ lín; khǹg lín chiap-la̍p góa khoàn-bián ê ōe.

23Lín tio̍h知咱ê兄弟提摩太已經得tio̍h tháu放；伊若緊緊來，我beh kap伊去見lín。Lín tio̍h chai lán ê hiaⁿ-tī Thê-mô͘-thài í-keng tit-tio̍h tháu-pàng; i nā kín-kín lâi, góa beh kap i khì kìⁿ lín.

24請lín請安chiah-ê引chhōa lín ê人kap眾聖徒。有意大利ê人請安lín。Chhiáⁿ lín chhéng-an chiah ê ín-chhōa lín ê lâng kap chèng sèng-tô͘. Ū Í-tāi-lī ê lâng chhéng-an lín.

25願恩典kap lín眾人tī-teh。À-bēng。Goān un-tián kap lín chèng-lâng tī-teh. À-bēng.

1上帝kap主耶穌基督ê奴僕， 雅各請安十二支派四散khiā起ê。Siōng-tè kap Chú Iâ-so͘ Ki-tok ê lô͘-po̍k, Ngá-kok chhéng-an cha̍p-jī chi-phài sì-sòaⁿ khiā-khí ê.

2我ê兄弟ah，lín陷落tī chōe-chōe樣ê試煉，tio̍h lóng掠做歡喜，Góa ê hiaⁿ-tī ah, lín hām-lo̍h tī chōe-chōe iūⁿ ê chhì-liān, tio̍h lóng lia̍h chòe hoaⁿ-hí,

3因為知lín信ê經驗能生出吞忍，in-ūi chai lín sìn ê keng-giām ōe siⁿ-chhut thun-lún,

4獨獨吞忍tio̍h hō͘伊到成功，hō͘ lín完全齊備，無所欠缺。To̍k-to̍k thun-lún tio̍h hō͘ i kàu sêng-kong, hō͘ lín oân-choân chiâu-pī, bô só͘ khiàm-kheh.

5Lín中間若有人欠缺智慧，tio̍h對hit-ê白白hō͘眾人，也無嫌人，ê上帝祈求，就beh hō͘伊。Lín tiong-kan nā ū lâng khiàm-kheh tì-hūi, tio̍h tùi hit ê pe̍h-pe̍h hō͘ chèng lâng, iā bô hiâm lâng, ê Siōng-tè kî-kiû, chiū beh hō͘ i.

6獨獨tio̍h用信來求，lóng無僥疑；因為僥疑ê人譬喻親像海湧hō͘風phah，來起落。To̍k-to̍k tio̍h ēng sìn lâi kiû, lóng bô giâu-gî; in-ūi giâu-gî ê lâng phì-jū chhin-chhiūⁿ hái-éng hō͘ hong phah, lâi khí-lo̍h.

7Hit號人免phah算tùi主有thang得tio̍h甚麼；Hit hō lâng bián phah-sǹg tùi Chú ū thang tit-tio̍h sím-mi̍h;

8兩樣心ê人，tī所行一切ê路無定準。nn̄g iūⁿ sim ê lâng, tī só͘ kiâⁿ it-chhè ê lō͘ bô tēng-chún.

9卑微ê兄弟tio̍h tùi伊ê高升來誇口；Pi-bî ê hiaⁿ-tī tio̍h tùi i ê ko-seng lâi khoa-kháu;

10好額ê tùi伊ê卑微也tio̍h án-ni；因為伊beh過去親像草ê花。hó-gia̍h ê tùi i ê pi-bî iā tio̍h án-ni; in-ūi i beh kè-khì chhin-chhiūⁿ chháu ê hoe.

11因為日出kap燒ê風，hō͘ hit-ê草乾，花謝，伊ê súi就無去；好額人tī伊ê所行也beh án-ni衰退。In-ūi ji̍t chhut kap sio ê hong, hō͘ hit ê chháu ta, hoe siā, i ê súi chiū bô-khì; hó-gia̍h lâng tī i ê só͘ kiâⁿ iā beh án-ni soe-thè.

12Tú-tio̍h試來忍受ê人有福氣，因為既然經過試驗beh得tio̍h活命ê冕旒，就是主所應允hō͘疼伊ê人ê。Tú-tio̍h chhì lâi jím-siū ê lâng ū hok-khì, in-ūi kì-jiân keng-kè chhì-giām beh tit-tio̍h oa̍h-miā ê bián-liû, chiū-sī Chú só͘ èng-ún hō͘ thiàⁿ I ê lâng ê.

13Tú-tio̍h試ê人莫得講，我是hō͘上帝所試；因為上帝無hō͘ pháiⁿ所試，伊家己也無試人。Tú-tio̍h chhì ê lâng bo̍h-tit kóng, Góa sī hō͘ Siōng-tè só͘ chhì; in-ūi Siōng-tè bô hō͘ pháiⁿ só͘ chhì, I ka-kī iā bô chhì lâng.

14獨獨ta̍k人tú-tio̍h試，lóng是hō͘家己私慾所迷所釣。To̍k-to̍k ta̍k lâng tú-tio̍h chhì, lóng sī hō͘ ka-kī su-io̍k só͘ bê só͘ tiò.

15私慾已經懷孕，就生罪惡，罪惡已經長成，就生出死無。Su-io̍k í-keng hoâi-īn, chiū siⁿ chōe-ok, chōe-ok í-keng tióng-sêng, chiū siⁿ chhut sí-bô.

16我所疼ê兄弟ah，莫得錯誤。Góa só͘ thiàⁿ ê hiaⁿ-tī ah, bo̍h-tit chhò -gō͘.

17見若好ê賞賜，kap完全ê恩賜，lóng是tùi頂面，tùi眾項光ê父落來。伊無變換，也無轉旋ê影。Kìⁿ-nā hó ê siúⁿ-sù, kap oân-choân ê un-sù, lóng sī tùi téng-bīn, tùi chèng hāng kng ê Pē lo̍h-lâi. I bô piàn-ōaⁿ, iā bô tńg-se̍h ê iáⁿ.

18伊照家己ê意思bat用真理ê道生咱，beh hō͘咱tī伊所造ê ê中間，做親像頭水ê果子。I chiàu ka-kī ê ì-sù bat ēng chin-lí ê tō siⁿ lán, beh hō͘ lán tī I só͘ chō ê ê tiong-kan, chòe chhin-chhiūⁿ thâu-chúi ê ké-chí.

19我所疼ê兄弟ah，lín知chit-ê。但是ta̍k人論到聽tio̍h緊，講話tio̍h慢，受氣也tio̍h慢。Góa só͘ thiàⁿ ê hiaⁿ-tī ah, lín chai chit-ê. Nā-sī ta̍k lâng lūn-kàu thiaⁿ tio̍h kín, kóng ōe tio̍h bān, siū-khì iā tio̍h bān.

20因為人ê受氣無成上帝ê義。In-ūi lâng ê siū-khì bô chiâⁿ Siōng-tè ê gī.

21所以lín除去lóng總am-cham，kap過額ê惡毒，tio̍h用溫柔來接納所眾tī內面ê道理，就是能救lín ê靈魂ê。Só͘-í lín tû-khì lóng-chóng am-cham, kap kè-gia̍h ê ok-to̍k, tio̍h ēng un-jiû lâi chiap-la̍p só͘ chèng tī lāi-bīn ê tō-lí, chiū-sī ōe kiù lín ê lêng-hûn ê.

22Lín tio̍h做行道理ê，m̄是kan-ta聽ê，來家己騙。Lín tio̍h chòe kiâⁿ tō-lí ê, m̄ sī kan-ta thiaⁿ ê, lâi ka-kī phiàn.

23因為聽道理，若無行ê，譬喻親像人tī鏡裡詳細看伊本然ê面；In-ūi thiaⁿ tō-lí, nā bô kiâⁿ ê, phì-jū chhin-chhiūⁿ lâng tī kiàⁿ-ni̍h siông-sè khòaⁿ i pún-jiân ê bīn;

24看過了就做伊去，liâm-piⁿ bōe記得伊生做甚麼款。Khòaⁿ kè-liáu chiū chòe i khì, liâm-piⁿ bōe kì-tit i siⁿ-chòe sím-mi̍h khoán.

25但是人注神tī hit-ê齊全ê律法，就是hō͘人自由ê，也長長tòa tī hit-ê，m̄是聽了bōe記得ê，是實在teh用工ê，chit號人tī伊ê所做beh有福氣。Nā-sī lâng chù-sîn tī hit ê chiâu-chn̂g ê lu̍t-hoat, chiū-sī hō͘ lâng chū-iû ê, iā tn̂g-tn̂g tòa tī hit-ê, m̄ sī thiaⁿ-liáu bōe kì-tit ê, sī si̍t-chāi teh ēng kang ê, chit hō lâng tī i ê só͘ chòe beh ū hok-khì.

26若有人掠家己做敬虔，也無約束伊ê舌，就是騙伊家己ê心，chit號人ê敬虔是空空。Nā ū lâng lia̍h ka-kī chòe kèng-khiân, iā bô iok-sok i ê chi̍h, chiū-sī phiàn i ka-kī ê sim, chit hō lâng ê kèng-khiân sī khang-khang.

27獨獨眷顧孤兒寡婦tī in ê患難中，koh家己守，無hō͘世俗bak-tio̍h，這tī父上帝ê面前就是做清氣無lâ-sâm ê敬虔。To̍k-to̍k koàn-kò͘ ko͘-jî kóaⁿ-hū tī in ê hoān-lān tiong, koh ka-kī siú, bô hō͘ sè-sio̍k bak-tio̍h, che tī Pē Siōng-tè ê bīn-chêng chiū-sī chòe chheng-khì bô lâ-sâm ê kèng-khiân.

1我ê兄弟ah，lín守咱ê主耶穌基督榮光ê主ê信，m̄-thang用外貌取人。Góa ê hiaⁿ-tī ah, lín siú lán ê Chú Iâ-so͘ Ki-tok êng-kng ê Chú ê sìn, m̄ thang ēng gōa-māu chhú lâng.

2若有人掛金手指，穿súi衫，入lín ê會堂，也有sòng-hiong人穿破爛ê衫平平入，Nā ū lâng kòa kim chhiú-chí, chhēng súi saⁿ, ji̍p lín ê hōe-tn̂g, iā ū sòng-hiong lâng chhēng phòa-nōa ê saⁿ pîⁿ-pîⁿ ji̍p,

3lín就看穿súi衫ê，kā伊講，你坐chit-ê頂位；也kā sòng-hiong ê講，你khiā hit位，á是坐我ê腳踏椅下；lín chiū khòaⁿ chhēng súi saⁿ ê, kā i kóng, Lí chē chit ê téng ūi; iā kā sòng-hiong ê kóng, Lí khiā hit ūi, á-sī chē góa ê kha-ta̍h-í ē;

4這kiám m̄是心內有cheng-choa̍h，用pháiⁿ念頭來分別mah？che kiám m̄ sī sim-lāi ū cheng-choa̍h, ēng pháiⁿ liām-thâu lâi hun-piat mah?

5我所疼ê兄弟，tio̍h聽ah；上帝kiám m̄是揀世間sòng-hiong ê，hō͘ in tī信做好額，來承接伊所應允beh hō͘疼伊ê人ê國mah？Góa só͘ thiàⁿ ê hiaⁿ-tī, tio̍h thiaⁿ ah; Siōng-tè kiám m̄ sī kéng sè-kan sòng-hiong ê, hō͘ in tī sìn chòe hó-gia̍h, lâi sêng-chiap I só͘ èng-ún beh hō͘ thiàⁿ I ê lâng ê kok mah?

6但是lín就凌辱sòng-hiong人。富人kiám m̄是脅制lín，家己拖lín到審判廳？Nā-sī lín chiū lêng-jio̍k sòng-hiong lâng. Pù lâng kiám m̄ sī hia̍p-chè lín, ka-kī thoa lín kàu sím-phòaⁿ thiaⁿ?

7Kiám m̄是謗瀆lín所hō͘人叫尊貴ê名mah？Kiám m̄ sī pòng-to̍k lín só͘ hō͘ lâng kiò chun-kùi ê miâ mah?

8照聖經所記載，Tio̍h疼厝邊親像家己，lín若守chit-ê至好ê法到盡，chiah是好。Chiàu sèng-keng só͘ kì-chài, Tio̍h thiàⁿ chhù-piⁿ chhin-chhiūⁿ ka-kī, lín nā siú chit ê chì hó ê hoat kàu chīn, chiah sī hó.

9獨獨lín若用外貌取人，就犯罪，hō͘律法定做犯法ê。To̍k-to̍k lín nā ēng gōa-māu chhú lâng, chiū hoān chōe, hō͘ lu̍t-hoat tēng chòe hoān-hoat ê.

10因為見若全守律法，也tùi一條跋倒，就是犯tio̍h眾條。In-ūi kìⁿ-nā choân siú lu̍t-hoat, iā tùi chi̍t tiâu poa̍h-tó, chiū-sī hoān-tio̍h chèng tiâu.

11因為講，莫得姦淫ê，也講，莫得thâi人。若lín無姦淫也有thâi人，是做犯tio̍h律法ê人。In-ūi kóng, Bo̍h-tit kan-îm ê, iā kóng, Bo̍h-tit thâi lâng. Nā lín bô kan-îm iā ū thâi lâng, sī chòe hoān-tio̍h lu̍t-hoat ê lâng.

12Lín既然beh照hō͘人自由ê律法受審判，就tio̍h照án-ni講，照án-ni行。Lín kì-jiân beh chiàu hō͘ lâng chū-iû ê lu̍t-hoat siū sím-phòaⁿ, chiū tio̍h chiàu án-ni kóng, chiàu án-ni kiâⁿ.

13因為人無憐憫人，當審判也無得tio̍h憐憫；憐憫贏過審判來誇口。In-ūi lâng bô lîn-bín lâng, tng sím-phòaⁿ iā bô tit-tio̍h lîn-bín; lîn-bín iâⁿ-kè sím-phòaⁿ lâi khoa-kháu.

14我ê兄弟ah，人講有信，也無行，有甚麼利益？Chit號信能救伊mah？Góa ê hiaⁿ-tī ah, lâng kóng ū sìn, iā bô kiâⁿ, ū sím-mi̍h lī-ek? Chit hō sìn ōe kiù i mah?

15若有兄弟á是姊妹無thang穿無thang食，Nā ū hiaⁿ-tī á-sī chí-bē bô thang chhēng bô thang chia̍h,

16lín中間有人kā in講，Thang安然去，願lín穿燒食飽，也竟然無用身軀所欠用ê hō͘ in，有甚麼利益？lín tiong-kan ū lâng kā in kóng, Thang an-jiân khì, goān lín chhēng-sio chia̍h-pá, iā kèng-jiân bô ēng sin-khu só͘ khiàm-ēng ê hō͘ in, ū sím-mi̍h lī-ek?

17Án-ni，信若無行，就家己是死。Án-ni, sìn nā bô kiâⁿ, chiū ka-kī sī sí.

18Beh有人講，你有信，我有行；你無用行tio̍h hō͘我看你ê信，我就tùi我ê行hō͘你看我ê信。Beh ū lâng kóng, Lí ū sìn, góa ū kiâⁿ; lí bô ēng kiâⁿ tio̍h hō͘ góa khòaⁿ lí ê sìn, góa chiū tùi góa ê kiâⁿ hō͘ lí khòaⁿ góa ê sìn.

19你信上帝只有一個；這是好；hiah-ê鬼也信，來ngia̍uh-ngia̍uh-chhoah。Lí sìn Siōng-tè chí ū chi̍t ê; che sī hó; hiah ê kúi iā sìn, lâi ngia̍uh-ngia̍uh-chhoah.

20Hong-hàm ê人ah，無有行ê信就是空空，你ài知mah？Hong-hàm ê lâng ah, bô ū kiâⁿ ê sìn chiū-sī khang-khang, lí ài chai mah?

21咱ê祖亞伯拉罕獻伊ê kiáⁿ以撒tī壇頂，kiám m̄是tùi所行來得tio̍h稱做義mah？Lán ê chó͘ A-pek-la̍h-hán hiàn i ê kiáⁿ Í-sat tī tôaⁿ-téng, kiám m̄ sī tùi só͘ kiâⁿ lâi tit-tio̍h chheng-chòe-gī mah?

22可見信kap伊ê行平平進行，koh信tùi行來得tio̍h完全。Khó-kiàn sìn kap i ê kiâⁿ pîⁿ-pîⁿ chìn-hêng, koh sìn tùi kiâⁿ lâi tit-tio̍h oân-choân.

23就應驗聖經所講，亞伯拉罕信上帝，就kā伊算做義；伊koh得tio̍h稱做上帝ê朋友。Chiū èng-giām sèng-keng só͘ kóng, A-pek-la̍h-hán sìn Siōng-tè, chiū kā i sǹg chòe gī; i koh tit-tio̍h chheng chòe Siōng-tè ê pêng-iú.

24Tùi án-ni看，人得tio̍h稱做義是tùi所行，m̄是kan-ta tùi信。Tùi án-ni khòaⁿ, lâng tit-tio̍h chheng-chòe-gī sī tùi só͘ kiâⁿ, m̄ sī kan-ta tùi sìn.

25娼妓Lat-ha̍p接納使者，hō͘ in tùi別條路出，kiám m̄是猶原tùi所行來得tio̍h稱做義？Chhiong-ki Lat-ha̍p chiap-la̍p sù-chiá, hō͘ in tùi pa̍t tiâu lō͘ chhut, kiám m̄ sī iû-goân tùi só͘ kiâⁿ lâi tit-tio̍h chheng-chòe-gī?

26因為親像身軀，若無神，就是死，信無行也是死。In-ūi chhin-chhiūⁿ seng-khu, nā bô sîn, chiū sī sí, sìn bô kiâⁿ iā sī sí.