1上帝kap主耶穌基督ê奴僕， 雅各請安十二支派四散khiā起ê。Siōng-tè kap Chú Iâ-so͘ Ki-tok ê lô͘-po̍k, Ngá-kok chhéng-an cha̍p-jī chi-phài sì-sòaⁿ khiā-khí ê.

2我ê兄弟ah，lín陷落tī chōe-chōe樣ê試煉，tio̍h lóng掠做歡喜，Góa ê hiaⁿ-tī ah, lín hām-lo̍h tī chōe-chōe iūⁿ ê chhì-liān, tio̍h lóng lia̍h chòe hoaⁿ-hí,

3因為知lín信ê經驗能生出吞忍，in-ūi chai lín sìn ê keng-giām ōe siⁿ-chhut thun-lún,

4獨獨吞忍tio̍h hō͘伊到成功，hō͘ lín完全齊備，無所欠缺。To̍k-to̍k thun-lún tio̍h hō͘ i kàu sêng-kong, hō͘ lín oân-choân chiâu-pī, bô só͘ khiàm-kheh.

5Lín中間若有人欠缺智慧，tio̍h對hit-ê白白hō͘眾人，也無嫌人，ê上帝祈求，就beh hō͘伊。Lín tiong-kan nā ū lâng khiàm-kheh tì-hūi, tio̍h tùi hit ê pe̍h-pe̍h hō͘ chèng lâng, iā bô hiâm lâng, ê Siōng-tè kî-kiû, chiū beh hō͘ i.

6獨獨tio̍h用信來求，lóng無僥疑；因為僥疑ê人譬喻親像海湧hō͘風phah，來起落。To̍k-to̍k tio̍h ēng sìn lâi kiû, lóng bô giâu-gî; in-ūi giâu-gî ê lâng phì-jū chhin-chhiūⁿ hái-éng hō͘ hong phah, lâi khí-lo̍h.

7Hit號人免phah算tùi主有thang得tio̍h甚麼；Hit hō lâng bián phah-sǹg tùi Chú ū thang tit-tio̍h sím-mi̍h;

8兩樣心ê人，tī所行一切ê路無定準。nn̄g iūⁿ sim ê lâng, tī só͘ kiâⁿ it-chhè ê lō͘ bô tēng-chún.

9卑微ê兄弟tio̍h tùi伊ê高升來誇口；Pi-bî ê hiaⁿ-tī tio̍h tùi i ê ko-seng lâi khoa-kháu;

10好額ê tùi伊ê卑微也tio̍h án-ni；因為伊beh過去親像草ê花。hó-gia̍h ê tùi i ê pi-bî iā tio̍h án-ni; in-ūi i beh kè-khì chhin-chhiūⁿ chháu ê hoe.

11因為日出kap燒ê風，hō͘ hit-ê草乾，花謝，伊ê súi就無去；好額人tī伊ê所行也beh án-ni衰退。In-ūi ji̍t chhut kap sio ê hong, hō͘ hit ê chháu ta, hoe siā, i ê súi chiū bô-khì; hó-gia̍h lâng tī i ê só͘ kiâⁿ iā beh án-ni soe-thè.

12Tú-tio̍h試來忍受ê人有福氣，因為既然經過試驗beh得tio̍h活命ê冕旒，就是主所應允hō͘疼伊ê人ê。Tú-tio̍h chhì lâi jím-siū ê lâng ū hok-khì, in-ūi kì-jiân keng-kè chhì-giām beh tit-tio̍h oa̍h-miā ê bián-liû, chiū-sī Chú só͘ èng-ún hō͘ thiàⁿ I ê lâng ê.

13Tú-tio̍h試ê人莫得講，我是hō͘上帝所試；因為上帝無hō͘ pháiⁿ所試，伊家己也無試人。Tú-tio̍h chhì ê lâng bo̍h-tit kóng, Góa sī hō͘ Siōng-tè só͘ chhì; in-ūi Siōng-tè bô hō͘ pháiⁿ só͘ chhì, I ka-kī iā bô chhì lâng.

14獨獨ta̍k人tú-tio̍h試，lóng是hō͘家己私慾所迷所釣。To̍k-to̍k ta̍k lâng tú-tio̍h chhì, lóng sī hō͘ ka-kī su-io̍k só͘ bê só͘ tiò.

15私慾已經懷孕，就生罪惡，罪惡已經長成，就生出死無。Su-io̍k í-keng hoâi-īn, chiū siⁿ chōe-ok, chōe-ok í-keng tióng-sêng, chiū siⁿ chhut sí-bô.

16我所疼ê兄弟ah，莫得錯誤。Góa só͘ thiàⁿ ê hiaⁿ-tī ah, bo̍h-tit chhò -gō͘.

17見若好ê賞賜，kap完全ê恩賜，lóng是tùi頂面，tùi眾項光ê父落來。伊無變換，也無轉旋ê影。Kìⁿ-nā hó ê siúⁿ-sù, kap oân-choân ê un-sù, lóng sī tùi téng-bīn, tùi chèng hāng kng ê Pē lo̍h-lâi. I bô piàn-ōaⁿ, iā bô tńg-se̍h ê iáⁿ.

18伊照家己ê意思bat用真理ê道生咱，beh hō͘咱tī伊所造ê ê中間，做親像頭水ê果子。I chiàu ka-kī ê ì-sù bat ēng chin-lí ê tō siⁿ lán, beh hō͘ lán tī I só͘ chō ê ê tiong-kan, chòe chhin-chhiūⁿ thâu-chúi ê ké-chí.

19我所疼ê兄弟ah，lín知chit-ê。但是ta̍k人論到聽tio̍h緊，講話tio̍h慢，受氣也tio̍h慢。Góa só͘ thiàⁿ ê hiaⁿ-tī ah, lín chai chit-ê. Nā-sī ta̍k lâng lūn-kàu thiaⁿ tio̍h kín, kóng ōe tio̍h bān, siū-khì iā tio̍h bān.

20因為人ê受氣無成上帝ê義。In-ūi lâng ê siū-khì bô chiâⁿ Siōng-tè ê gī.

21所以lín除去lóng總am-cham，kap過額ê惡毒，tio̍h用溫柔來接納所眾tī內面ê道理，就是能救lín ê靈魂ê。Só͘-í lín tû-khì lóng-chóng am-cham, kap kè-gia̍h ê ok-to̍k, tio̍h ēng un-jiû lâi chiap-la̍p só͘ chèng tī lāi-bīn ê tō-lí, chiū-sī ōe kiù lín ê lêng-hûn ê.

22Lín tio̍h做行道理ê，m̄是kan-ta聽ê，來家己騙。Lín tio̍h chòe kiâⁿ tō-lí ê, m̄ sī kan-ta thiaⁿ ê, lâi ka-kī phiàn.

23因為聽道理，若無行ê，譬喻親像人tī鏡裡詳細看伊本然ê面；In-ūi thiaⁿ tō-lí, nā bô kiâⁿ ê, phì-jū chhin-chhiūⁿ lâng tī kiàⁿ-ni̍h siông-sè khòaⁿ i pún-jiân ê bīn;

24看過了就做伊去，liâm-piⁿ bōe記得伊生做甚麼款。Khòaⁿ kè-liáu chiū chòe i khì, liâm-piⁿ bōe kì-tit i siⁿ-chòe sím-mi̍h khoán.

25但是人注神tī hit-ê齊全ê律法，就是hō͘人自由ê，也長長tòa tī hit-ê，m̄是聽了bōe記得ê，是實在teh用工ê，chit號人tī伊ê所做beh有福氣。Nā-sī lâng chù-sîn tī hit ê chiâu-chn̂g ê lu̍t-hoat, chiū-sī hō͘ lâng chū-iû ê, iā tn̂g-tn̂g tòa tī hit-ê, m̄ sī thiaⁿ-liáu bōe kì-tit ê, sī si̍t-chāi teh ēng kang ê, chit hō lâng tī i ê só͘ chòe beh ū hok-khì.

26若有人掠家己做敬虔，也無約束伊ê舌，就是騙伊家己ê心，chit號人ê敬虔是空空。Nā ū lâng lia̍h ka-kī chòe kèng-khiân, iā bô iok-sok i ê chi̍h, chiū-sī phiàn i ka-kī ê sim, chit hō lâng ê kèng-khiân sī khang-khang.

27獨獨眷顧孤兒寡婦tī in ê患難中，koh家己守，無hō͘世俗bak-tio̍h，這tī父上帝ê面前就是做清氣無lâ-sâm ê敬虔。To̍k-to̍k koàn-kò͘ ko͘-jî kóaⁿ-hū tī in ê hoān-lān tiong, koh ka-kī siú, bô hō͘ sè-sio̍k bak-tio̍h, che tī Pē Siōng-tè ê bīn-chêng chiū-sī chòe chheng-khì bô lâ-sâm ê kèng-khiân.

1我ê兄弟ah，lín守咱ê主耶穌基督榮光ê主ê信，m̄-thang用外貌取人。Góa ê hiaⁿ-tī ah, lín siú lán ê Chú Iâ-so͘ Ki-tok êng-kng ê Chú ê sìn, m̄ thang ēng gōa-māu chhú lâng.

2若有人掛金手指，穿súi衫，入lín ê會堂，也有sòng-hiong人穿破爛ê衫平平入，Nā ū lâng kòa kim chhiú-chí, chhēng súi saⁿ, ji̍p lín ê hōe-tn̂g, iā ū sòng-hiong lâng chhēng phòa-nōa ê saⁿ pîⁿ-pîⁿ ji̍p,

3lín就看穿súi衫ê，kā伊講，你坐chit-ê頂位；也kā sòng-hiong ê講，你khiā hit位，á是坐我ê腳踏椅下；lín chiū khòaⁿ chhēng súi saⁿ ê, kā i kóng, Lí chē chit ê téng ūi; iā kā sòng-hiong ê kóng, Lí khiā hit ūi, á-sī chē góa ê kha-ta̍h-í ē;

4這kiám m̄是心內有cheng-choa̍h，用pháiⁿ念頭來分別mah？che kiám m̄ sī sim-lāi ū cheng-choa̍h, ēng pháiⁿ liām-thâu lâi hun-piat mah?

5我所疼ê兄弟，tio̍h聽ah；上帝kiám m̄是揀世間sòng-hiong ê，hō͘ in tī信做好額，來承接伊所應允beh hō͘疼伊ê人ê國mah？Góa só͘ thiàⁿ ê hiaⁿ-tī, tio̍h thiaⁿ ah; Siōng-tè kiám m̄ sī kéng sè-kan sòng-hiong ê, hō͘ in tī sìn chòe hó-gia̍h, lâi sêng-chiap I só͘ èng-ún beh hō͘ thiàⁿ I ê lâng ê kok mah?

6但是lín就凌辱sòng-hiong人。富人kiám m̄是脅制lín，家己拖lín到審判廳？Nā-sī lín chiū lêng-jio̍k sòng-hiong lâng. Pù lâng kiám m̄ sī hia̍p-chè lín, ka-kī thoa lín kàu sím-phòaⁿ thiaⁿ?

7Kiám m̄是謗瀆lín所hō͘人叫尊貴ê名mah？Kiám m̄ sī pòng-to̍k lín só͘ hō͘ lâng kiò chun-kùi ê miâ mah?

8照聖經所記載，Tio̍h疼厝邊親像家己，lín若守chit-ê至好ê法到盡，chiah是好。Chiàu sèng-keng só͘ kì-chài, Tio̍h thiàⁿ chhù-piⁿ chhin-chhiūⁿ ka-kī, lín nā siú chit ê chì hó ê hoat kàu chīn, chiah sī hó.

9獨獨lín若用外貌取人，就犯罪，hō͘律法定做犯法ê。To̍k-to̍k lín nā ēng gōa-māu chhú lâng, chiū hoān chōe, hō͘ lu̍t-hoat tēng chòe hoān-hoat ê.

10因為見若全守律法，也tùi一條跋倒，就是犯tio̍h眾條。In-ūi kìⁿ-nā choân siú lu̍t-hoat, iā tùi chi̍t tiâu poa̍h-tó, chiū-sī hoān-tio̍h chèng tiâu.

11因為講，莫得姦淫ê，也講，莫得thâi人。若lín無姦淫也有thâi人，是做犯tio̍h律法ê人。In-ūi kóng, Bo̍h-tit kan-îm ê, iā kóng, Bo̍h-tit thâi lâng. Nā lín bô kan-îm iā ū thâi lâng, sī chòe hoān-tio̍h lu̍t-hoat ê lâng.

12Lín既然beh照hō͘人自由ê律法受審判，就tio̍h照án-ni講，照án-ni行。Lín kì-jiân beh chiàu hō͘ lâng chū-iû ê lu̍t-hoat siū sím-phòaⁿ, chiū tio̍h chiàu án-ni kóng, chiàu án-ni kiâⁿ.

13因為人無憐憫人，當審判也無得tio̍h憐憫；憐憫贏過審判來誇口。In-ūi lâng bô lîn-bín lâng, tng sím-phòaⁿ iā bô tit-tio̍h lîn-bín; lîn-bín iâⁿ-kè sím-phòaⁿ lâi khoa-kháu.

14我ê兄弟ah，人講有信，也無行，有甚麼利益？Chit號信能救伊mah？Góa ê hiaⁿ-tī ah, lâng kóng ū sìn, iā bô kiâⁿ, ū sím-mi̍h lī-ek? Chit hō sìn ōe kiù i mah?

15若有兄弟á是姊妹無thang穿無thang食，Nā ū hiaⁿ-tī á-sī chí-bē bô thang chhēng bô thang chia̍h,

16lín中間有人kā in講，Thang安然去，願lín穿燒食飽，也竟然無用身軀所欠用ê hō͘ in，有甚麼利益？lín tiong-kan ū lâng kā in kóng, Thang an-jiân khì, goān lín chhēng-sio chia̍h-pá, iā kèng-jiân bô ēng sin-khu só͘ khiàm-ēng ê hō͘ in, ū sím-mi̍h lī-ek?

17Án-ni，信若無行，就家己是死。Án-ni, sìn nā bô kiâⁿ, chiū ka-kī sī sí.

18Beh有人講，你有信，我有行；你無用行tio̍h hō͘我看你ê信，我就tùi我ê行hō͘你看我ê信。Beh ū lâng kóng, Lí ū sìn, góa ū kiâⁿ; lí bô ēng kiâⁿ tio̍h hō͘ góa khòaⁿ lí ê sìn, góa chiū tùi góa ê kiâⁿ hō͘ lí khòaⁿ góa ê sìn.

19你信上帝只有一個；這是好；hiah-ê鬼也信，來ngia̍uh-ngia̍uh-chhoah。Lí sìn Siōng-tè chí ū chi̍t ê; che sī hó; hiah ê kúi iā sìn, lâi ngia̍uh-ngia̍uh-chhoah.

20Hong-hàm ê人ah，無有行ê信就是空空，你ài知mah？Hong-hàm ê lâng ah, bô ū kiâⁿ ê sìn chiū-sī khang-khang, lí ài chai mah?

21咱ê祖亞伯拉罕獻伊ê kiáⁿ以撒tī壇頂，kiám m̄是tùi所行來得tio̍h稱做義mah？Lán ê chó͘ A-pek-la̍h-hán hiàn i ê kiáⁿ Í-sat tī tôaⁿ-téng, kiám m̄ sī tùi só͘ kiâⁿ lâi tit-tio̍h chheng-chòe-gī mah?

22可見信kap伊ê行平平進行，koh信tùi行來得tio̍h完全。Khó-kiàn sìn kap i ê kiâⁿ pîⁿ-pîⁿ chìn-hêng, koh sìn tùi kiâⁿ lâi tit-tio̍h oân-choân.

23就應驗聖經所講，亞伯拉罕信上帝，就kā伊算做義；伊koh得tio̍h稱做上帝ê朋友。Chiū èng-giām sèng-keng só͘ kóng, A-pek-la̍h-hán sìn Siōng-tè, chiū kā i sǹg chòe gī; i koh tit-tio̍h chheng chòe Siōng-tè ê pêng-iú.

24Tùi án-ni看，人得tio̍h稱做義是tùi所行，m̄是kan-ta tùi信。Tùi án-ni khòaⁿ, lâng tit-tio̍h chheng-chòe-gī sī tùi só͘ kiâⁿ, m̄ sī kan-ta tùi sìn.

25娼妓Lat-ha̍p接納使者，hō͘ in tùi別條路出，kiám m̄是猶原tùi所行來得tio̍h稱做義？Chhiong-ki Lat-ha̍p chiap-la̍p sù-chiá, hō͘ in tùi pa̍t tiâu lō͘ chhut, kiám m̄ sī iû-goân tùi só͘ kiâⁿ lâi tit-tio̍h chheng-chòe-gī?

26因為親像身軀，若無神，就是死，信無行也是死。In-ūi chhin-chhiūⁿ seng-khu, nā bô sîn, chiū sī sí, sìn bô kiâⁿ iā sī sí.

1我ê兄弟ah，m̄-thang chōe-chōe人做先生，因為知咱beh受khah重ê審判。Góa ê hiaⁿ-tī ah, m̄ thang chōe-chōe lâng chòe sian-siⁿ, in-ūi chai lán beh siū khah tāng ê sím-phòaⁿ.

2因為咱眾人tī chōe-chōe項跋倒。Tī講話無跋倒ê，就是做完全ê人，也會約束伊thong身軀。In-ūi lán chèng lâng tī chōe-chōe hāng poa̍h-tó. Tī kóng ōe bô poa̍h-tó ê, chiū-sī chòe oân-choân ê lâng, iā ōe iok-sok i thong seng-khu.

3咱hē馬咬韁tī馬ê嘴，hō͘ in順thàn咱，就管轄in thong身軀。Lán hē bé-kā-kiuⁿ tī bé ê chhùi, hō͘ in sūn-thàn lán, chiū koán-hat in thong seng-khu.

4Koh，你看，hiah-e5chun5，雖然hiah大chiah，hō͘大風sau3i，猶原是用細細ê大雨伊tńg-oat，照tāi-kônge意思所ài。Koh, lí khòaⁿ, hiah ê chûn, sui-jiân hiah tōa chiah, hō͘ tōa hong sàu i, iû-goân sī ēng sòe-sòe ê tōa hō͘ i tńg-oat, chiàu tāi-kong ê ì-sù só͘ ài.

5Án-ni舌是細細ê體，iáu-kú講大ōe。你看，小khóa ê火燒樹木jōa chōe ah！Án-ni chi̍h sī sòe-sòe ê thé, iáu-kú kóng tōa ōe. Lí khòaⁿ, sió-khóa ê hé sio chhiū-ba̍k jōa chōe ah!

6舌就是火，tī咱百體中做不義ê世界，phah lâ-sâm thong身軀，一生ê行動tūi伊發火；伊家己ê火是tùi地獄發。Chi̍h chiū-sī hé, tī lán pah-thé tiong chòe put-gī ê sè-kài, phah lâ-sâm thong seng-khu, it-seng ê hêng-tōng tūi i hoat hé; i ka-kī ê hé sī tùi tē-ge̍k hoat.

7因為ta̍k類ê走獸、飛鳥、蟲thōa、水族，lóng受制壓，也已經hō͘人類制壓。In-ūi ta̍k lūi ê cháu-siù, pe-chiáu, thâng-thōa, chúi-cho̍k, lóng siū chè-ap, iā í-keng hō͘ jîn-lūi chè-ap.

8獨獨舌無人會制壓；是無停歇ê pháiⁿ物，有死ê毒滿滿。To̍k-to̍k chi̍h bô lâng ōe chè-ap; sī bô thêng-hioh ê pháiⁿ mi̍h, ū sí ê to̍k móa-móa.

9咱用伊o-ló主，就是父，koh用伊咒詛人，就是照上帝ê款式來創造ê。Lán ēng i o-ló Chú, chiū-sī Pē, koh ēng i chiù-chó͘ lâng, chiū-sī chiàu Siōng-tè ê khoán-sit lâi chhòng-chō ê.

10O-ló kap咒詛siāng一個嘴出。我ê兄弟ah，這是m̄應該。O-ló kap chiù-chó͘ siāng chi̍t ê chhùi chhut. Góa ê hiaⁿ-tī ah, che sī m̄ eng-kai.

11水泉kiám會tùi siāng一khang流出甜ê苦ê mah？Chúi-chôaⁿ kiám ōe tùi siāng chi̍t khang lâu chhut tiⁿ-ê khó͘-ê mah?

12我ê兄弟ah，無花果樹能生橄欖mah？á是葡萄樹能生無花果mah？án-ni tùi鹹ê流出chiáⁿ-ê也bōe-ōe。Góa ê hiaⁿ-tī ah, bû-hoa-kó chhiū ōe siⁿ kaⁿ-ná mah? á-sī phû-tô chhiū ōe siⁿ bû-hoa-kó mah? án-ni tùi kiâm-ê lâu-chhut chiáⁿ-ê iā bōe-ōe.

13Lín中間是誰有智慧見識ê ah？就tio̍h用智慧ê溫柔，tùi好ê品行，來顯明伊ê所行。Lín tiong-kan chī-chūi ū tì-hūi kiàn-sek ê ah? chiū tio̍h ēng tì-hūi ê un-jiû, tùi hó ê phín-hēng, lâi hián-bêng i ê só͘ kiâⁿ.

14Lín心內若勸惡毒ê怨妒kap相爭，就莫得誇口，莫得白賊來逆真理。Lín sim-lāi nā khǹg ok-to̍k ê oàn-tò͘ kap saⁿ-chiⁿ, chiū bo̍h-tit khoa-kháu, bo̍h-tit pe̍h-chha̍t lâi ge̍k chin-lí.

15Chit號智慧m̄是tùi頂面來ê，是屬tī罪，屬tī血氣，屬幾個款。Chit hō tì-hūi m̄ sī tùi téng-bīn lâi ê, sī sio̍k tī chōe, sio̍k tī hiat-khì, sio̍k kúi ê khoán.

16因為tī甚麼所在有怨妒kap相爭，就tī hia有擾亂kap一切ê pháiⁿ事。In-ūi tī sím-mi̍h só͘-chāi ū oàn-tò͘ kap saⁿ-chiⁿ, chiū tī hia ū jiáu-loān kap it-chhè ê pháiⁿ sū.

17獨獨tùi頂面ê智慧，一是清潔，iáu-ê是和平、溫柔、好商量、有憐憫kap好ê果子滿滿，無偏袒，無假好。To̍k-to̍k tùi téng-bīn ê tì-hūi, it sī chheng-kiat, iáu-ê sī hô-pêng, un-jiû, hó siong-liông, ū lîn-bín kap hó ê ké-chí móa-móa, bô phian-thán, bô ké-hó.

18Koh義ê果子是在tī和平，kā行和平ê人來種。Koh gī ê ké-chí sī chāi-tī hô-pêng, kā kiâⁿ hô-pêng ê lâng lâi chèng.